Ye papaa ji nɔkɔtɔma ngɛ sɔlemi ko nɛ a tsɛɛ ke ­United Church of Canada a. Lɔ ɔ he ɔ, daa otsi ɔ, e haa nɛ i kɛ ye nyɛmiyo ɔ wa yaa Sunday school, nɛ ke wa kpa nɛ a fia ngmlɛ 11 ɔ, wa ya piɛɛɔ nikɔtɔma amɛ a he kɛ peeɔ sɔlemi. Ke e su piani ɔ, waa kɛ wa mami yaa asafo mi kpe ngɛ Matsɛ Yemi Asa a nɔ. Wa na heii kaa slɔɔto ngɛ jami enyɔ nɛ ɔmɛ a kpɛti.

Bob kɛ Marion Hutcheson ji wa mami huɛmɛ nɛ e suɔ a sane wawɛɛ. Enɛ ɔ he ɔ, e kɛ mɛ sɛɛɔ ní ehehi nɛ e kase ngɛ Baiblo ɔ mi ɔ he ní, nɛ mɛ hu a ba pee Yehowa Odasefohi. Ngɛ jeha 1958 ɔ mi ɔ, Nyɛminyumu Hutcheson kɛ e yo ɔ ha nɛ i piɛɛ a kɛ a binyumuwi etɛ ɔmɛ a he kɛ ya kpe nɛ ji, Divine Will International Assembly nɛ a pee ngɛ New York City ɔ. A pee kpe nɛ ɔ ligbi kpaanyɔ. Amlɔ nɛ ɔ, i yɔse kaa a ná we lɛ gbɔjɔɔ ngɛ jamɛ a be ɔ mi kaa a kɛ mi maa ya kpe ɔ. Se ngɛ anɔkuale mi ɔ, ye hɛ ji níhi nɛ ya nɔ ngɛ jamɛ a kpe ɔ sisi ɔ nɔ gblegbleegble.

Benɛ i yi jeha nyingmi enyɔ lolo ɔ, wa lɛɔ lohwehi ngɛ he nɛ wa ngɛ ɔ, nɛ i hyɛɔ a nɔ. Enɛ ɔ he ɔ, i suɔ nɛ ma ya yunivɛsiti konɛ ma ba pee dɔkita nɛ e hyɛɔ lohwehi. Ye mami de asafo mi nɔkɔtɔma ko kaa nɔ́ nɛ i suɔ nɛ ma pee ji nɛ ɔ nɛ. Asafo mi nɔkɔtɔma a je mi mi jɔmi mi nɛ e kai mi kaa wa “ngɛ nyagbe ligbi ɔmɛ a mi,” nɛ e ha nɛ i na kaa ke i kɛ jehahi babauu ya yunivɛsiti ɔ, e maa sa huɛ bɔmi nɛ ngɛ i kɛ Yehowa wa kpɛti  ɔ he. (2 Tim. 3:⁠1) Enɛ ɔ he ɔ, i ma ye juɛmi nya si kaa i be yunivɛsiti yae.

Benɛ i gbe nɔ tsami sukuu nya a, i li nɔ́ nɛ ma tsu. E ngɛ mi kaa daa Hɔ kɛ Hɔgba a, i yaa fiɛɛmi mohu lɛɛ, se i kɛ kã pee we jã, nɛ i nɛ ye he kaa nɔ ko nɛ e ma nyɛ ma sɔmɔ kaa daa blɔ gbalɔ. Jamɛ a be ɔ mi ɔ, ye papaa kɛ ye tsɛwayo nɛ a pi Yehowa Odasefohi ɔ wo mi he wami kaa ma ya tsu ní ngɛ insurance company ko nɛ e he biɛ ngɛ Toronto ɔ. Ye tsɛwayo ɔ ngɛ blɔ nya ngua ngɛ ní tsumi ɔ mi, lɔ ɔ he ɔ, i kplɛɛ nɔ kaa ma ya tsu ní ngɛ lejɛ ɔ.

Ngɛ Toronto ɔ, i kɛ be babauu tsuɔ ní, nɛ i kɛ nihi nɛ tsa pi Yehowa Odasefohi ji mɛ ɔ lɛ bɔɔ. Enɛ ɔ he ɔ, tsa pi be fɛɛ be nɛ i nyɛɔ nɛ i yaa asafo mi kpe kɛ fiɛɛmi. Benɛ i ya lejɛ ɔ kekleekle ɔ, i ya hi ye nɛnɛ nɛ e pi Odasefo no ɔ ngɔ, se pee se ɔ, e ba gbo. Lɔ ɔ he ɔ, e he ba hia nɛ ma ya hi he kpa.

Nyɛminyumu Hutcheson kɛ e yo ɔ nɛ́ a kɛ mi ya kpe ngɛ jeha 1958 ɔ mi ɔ ngɔ mi kaa mɛ nitsɛmɛ a bi. Lɔ ɔ he ɔ, a ha nɛ i ba hi a ngɔ nɛ a ye bua mi nɛ huɛ bɔmi nɛ ngɛ i kɛ Yehowa wa kpɛti ɔ mi wa. Ngɛ jeha 1960 mi ɔ, a baptisi i kɛ a binyumu John tsuo. Lɔ ɔ se ɔ, John bɔni sɔmɔmi kaa daa blɔ gbalɔ, nɛ e wo mi he wami konɛ ma tsu babauu ngɛ fiɛɛmi ní tsumi ɔ mi. Nyɛmimɛ nɛ a ngɛ asafo ɔ mi ɔ na kaa i ngɛ hɛ mi yae ngɛ mumi mi, nɛ bɔɔbɔɔbɔɔ ɔ, a hla mi kaa Teokrase Sɔmɔmi Sukuu ɔ nɔ hyɛlɔ. a

Ngɛ jeha 1966 mi ɔ, i kɛ Randi Berge sɛ gba si himi mi. E ji blɔ gbalɔ nɛ e ngɛ kã nɛ e suɔ nɛ e ya sɔmɔ ngɛ he nɛ fiɛɛli fuu a he hia ngɛ. Wa kpɔ mi nɔ hyɛlɔ ɔ suɔ nɛ e ye bua wɔ nɛ waa ya wa hɛ mi ngɛ Yehowa sɔmɔmi mi, enɛ ɔ he ɔ, e wo wɔ he wami kaa wa ya ye bua asafo ko ngɛ Orillia, ngɛ Ontario. Lɔ ɔ he ɔ, wa hia kɛ ho lejɛ ɔ ya.

Benɛ wa ya su Orillia nɔuu nɛ imi hu i bɔni sɔmɔmi kaa daa blɔ gbalɔ. I bɔni bua jɔmi nami ngɛ blɔ gbami ní tsumi ɔ mi kaa Randi nɔuu. Benɛ i kɛ ye nyɛmi tsuo bɔni blɔ gbami ní tsumi ɔ tsumi ɔ, i na kaa i nyɛɔ nɛ i kɛ Baiblo ɔ yeɔ bua nihi konɛ a nu anɔkuale ɔ sisi, nɛ enɛ ɔ ha nɛ i ná bua jɔmi. Ye bua jɔ wawɛɛ kaa i ye bua  nyumu ko kɛ e yo ngɛ Orillia nɛ a pee tsakemi ngɛ a si himi mi, nɛ a ba bɔni Yehowa sɔmɔmi.

Benɛ wa ya Toronto ɔ, waa kɛ Nyɛminyumu Arnold MacNamara nɛ e piɛɛ nihi nɛ a nyɛɛɔ hɛ mi ngɛ Toronto Betel ɔ ya kpe. E bi wɔ kaa wa maa suɔ nɛ wa sɔmɔ kaa blɔ gbali klɛdɛɛ lo. Amlɔ nɔuu nɛ i ha heto ke: “Ee, wa suɔ! Wa suɔ nɛ wa ya sɔmɔ ngɛ he fɛɛ he ko, se wa sume Quebec!” Susumi yaya nɛ nihi nɛ a ngɛ Canada nɛ a tuɔ Blɛfo gbi ɔ ná ngɛ nihi nɛ a ngɛ Quebec nɛ a tuɔ French he ɔ, ná ye nɔ he wami. Ngɛ jamɛ a be ɔ mi ɔ, nihi nɛ a ngɛ Quebec ɔ bɔni si temi kɛ ngɛ nɔ yeli ɔmɛ woe kaa a suɔ nɛ a ma a nɛ tsɔ e he kɛ je Canada he.

Arnold ha mi heto ke, “Amlɔ nɛ ɔ, Quebec pɛ ji he nɛ asafo ɔ suɔ nɛ blɔ gbali klɛdɛɛ ɔmɛ nɛ a ya sɔmɔ ngɛ.” Oya nɔuu nɛ i kplɛɛ nɔ. I le kaa Randi bua jɔ he kaa wa ya sɔmɔ ngɛ lejɛ ɔ. Pee se ɔ, i ba na kaa enɛ ɔ ji yi mi kpɔhi nɛ hi pe kulaa nɛ wa mwɔ ngɛ wa si himi mi ɔ a kpɛti kake!

I kɛ Randi kase French otsi enuɔ. Lɔ ɔ se ɔ, nyɛminyumu ko kɛ e yo piɛɛ wa he kɛ ya Rimouski. Lejɛ ɔ kɛ Montreal kɛmi maa pee si tomi 336. Benɛ wa ya asafo mi kpe nɛ i kane adafi fiami komɛ ɔ, i na kaa loloolo ɔ, e sa nɛ waa ya nɔ nɛ waa kase gbi ɔ. Jamɛ a be ɔ mi ɔ, e be kɛe nɛ wa maa ya kpe ko, nɛ benɛ i ngɛ adafi fiami ɔmɛ kanee nɛ́ e sa nɛ ma de ke, “nihi fuu maa je Austria kɛ ba a, i nyɛ we biɛ ɔ tsɛmi saminya nɛ i de ke, “nihi fuu maa je ostrich kɛ ba.”

Benɛ wɔ ni eywiɛ ɔmɛ wa ya su Rimouski ɔ, Nyɛminyumu Huberdeaus kɛ e yo kɛ a bi yihi enyɔ ba piɛɛ wa he. Nyɛmimɛ yihi eywiɛ komɛ nɛ a ngɛ kã nɛ a sɛ we gba si himi mi ɔ hu ba piɛɛ wa he. Nyɛminyumu Huberdeaus kɛ e yo ɔ ya hai we ngua ko nɛ blɔ gbali ɔmɛ tsuo hi mi nɛ a bla kɛ wo tsu ɔ he hiɔ. Wa tsɛɔ we ɔ ke White House ejakaa a paint we ɔ hɛ mi kɛ ­pillar amɛ futaa. Behi fuu ɔ, nihi nɛ a hiɔ we ɔ mi ɔ a hiɛmi maa su nihi 12 kɛ yaa 14. Akɛnɛ i kɛ Randi ji blɔ gbali klɛdɛɛ he je ɔ, wa yaa fiɛɛmi mɔtu, piani, gbɔkuɛ. Enɛ ɔ he ɔ, wa bua jɔ kaa be fɛɛ be ko ɔ, wa naa nɔ ko nɛ waa kɛ lɛ yaa fiɛɛmi. Gbɔkuɛ nɛ fĩɛ ngɛ yee po ɔ, wa naa nihi nɛ waa kɛ mɛ yaa fiɛɛmi.

Huɛ bɔmi nɛ ngɛ waa kɛ blɔ gbali anɔkualetsɛmɛ nɛ ɔmɛ a kpɛti ɔ mi ba wa wawɛɛ nɛ wa ba pee kaa weku li po. Be komɛ ɔ, wa slɛɔ la nɛ wa hiɔ he, loo wa peeɔ kake kɛ hooɔ ní. Nyɛminyumu ko ngɛ wa kpɛti nɛ e le lami saminya, lɔ ɔ he ɔ, daa Hɔ gbɔkuɛ ɔ, wa peeɔ kake kɛ laa nɛ wa doɔ.

Fiɛɛmi ní tsumi ɔ wo yiblii wawɛɛ ngɛ Rimouski. Ngɛ jeha enuɔ mi ɔ, wa na kaa nihi nɛ waa kɛ mɛ kaseɔ Baiblo ɔ ya a hɛ mi nɛ a baptisi mɛ, nɛ wa ná fiɛɛli 35 ngɛ asafo ɔ mi. Enɛ ɔ ha nɛ wa bua jɔ wawɛɛ.

A tsɔse wɔ saminya kaa sane kpakpa fiɛɛli ngɛ Quebec. Wa na bɔ nɛ Yehowa ye bua wɔ ngɛ fiɛɛmi ní tsumi ɔ mi ha, nɛ wa na kaa e ha wɔ wa he lo nya hiami níhi. Jehanɛ hu ɔ, wa bua ba jɔ nihi nɛ a tuɔ French ɔ a he, nɛ wa bua ba jɔ a gbi ɔ kɛ bɔ nɛ a peeɔ a ní ha a he. Enɛ ɔ ha nɛ wa bua ba jɔ nihi nɛ a je ma kpahi a nɔ ɔ hu a he.​—2 Kor. 6:⁠13.

Tlukaa a, asafo ɔ ní tsumi kɔni ɔ ha nɛ wa hia kɛ ho Tracadie ya ngɛ New Brunswick ngɛ wo ɔ nya pu je he blɔ. Enɛ ɔ ba pee nyagba kɛ ha wɔ ejakaa wa to blɔ nya nɛ wa ma hai tsu ko, nɛ i ngɔɔ ligbi komɛ ngɛ otsi ɔ mi kɛ tsɔɔ ní ngɛ sukuu ko hulɔ. Jehanɛ se hu ɔ, nihi nɛ waa kɛ mɛ kaseɔ Baiblo ɔ ba pee fiɛɛli kɛ we, nɛ wa ngɛ nyɛmimɛ ɔmɛ ye buae kɛ ngɛ Matsɛ Yemi Asa ko mae hulɔ.

 Jamɛ a Hɔ kɛ Hɔgba a, wa sɔle wawɛɛ ngɛ si fɔfɔɛ ɔ he, nɛ wa ya slaa si ngɛ Tracadie ma a mi. Wa na kaa lejɛ ɔ je ekpa ngɛ Rimouski he. Se wa mwɔ wa yi mi kpɔ kaa akɛnɛ Yehowa suɔ nɛ waa ya lejɛ ɔ he je ɔ, wa maa ya. Wa ka Yehowa nɛ wa hyɛ, nɛ wa na kaa e ye bua wɔ kɛ tsu haomihi nɛ waa kɛ kpe ɔ he ní. (Mal. 3:​10) Huɛ bɔmi kpakpa ngɛ Randi kɛ Yehowa a kpɛti nɛ e suɔ kaa e maa ngɔ e he kɛ sã afɔle. Jehanɛ hu ɔ, e he ngɛ bua jɔmi wawɛɛ. Enɛ ɔ he ɔ, wa nyɛ nɛ wa ya hi lejɛ ɔ.

Robert Ross pɛ ji asafo mi nɔkɔtɔma nɛ ngɛ asafo ehe nɛ wa ya je mi ɔ mi. E kɛ e yo Linda hi lejɛ ɔ kɛ tsu blɔ gbami ní tsumi ɔ, nɛ benɛ a fɔ a kekleekle bi ɔ se ɔ, a to kaa a maa ya nɔ maa hi lejɛ ɔ. E ngɛ mi kaa a ngɛ a binyumu wayoo ɔ hyɛe mohu lɛɛ, se kã nɛ a kɛ tsu fiɛɛmi ní tsumi ɔ kɛ mi mi jɔmi nɛ a je kpo kɛ tsɔɔ i kɛ Randi ɔ wo wɔ he wami wawɛɛ.

Benɛ wa tsu blɔ gbami ní tsumi ɔ jeha enyɔ se ngɛ Tracadie ɔ, a ha wɔ ní tsumi ko nɛ wa hyɛ we blɔ. Lɔ ɔ ji kpɔ mi nɔ hyɛmi ní tsumi ɔ. Wa tsu ní tsumi nɛ ɔ jeha kpaago ngɛ hehi nɛ a tuɔ Blɛfo gbi ngɛ. Lɔ ɔ se ɔ, a ha nɛ wa ya sɔmɔ ngɛ Quebec hehi nɛ a tuɔ French ngɛ. Ke i tu magbɛ nɔ munyu ɔ, wa kpokpa nɔ hyɛlɔ ngɛ Quebec nɛ a tsɛɛ lɛ ke Léonce Crépeault ɔ jeɔ ye yi. Se pee se ɔ, e biɔ mi ke, “Kɛ o ma plɛ kɛ ye bua nyɛmimɛ ɔmɛ konɛ a ngɔ nɔ́ nɛ o ngɛ dee ɔ kɛ tsu ní ha kɛɛ?” b Sane bimi nɛ ɔ ye bua mi nɛ i na kaa e sa nɛ ma bɔ ye he mɔde ngɛ ye ní tsɔɔmi mi konɛ nyɛmimɛ ɔmɛ nɛ a nu sisi saminya.

Ní tsumi ko nɛ i kaiɔ be fɛɛ be ji ní tsumi nɛ i tsu ngɛ jeha 1978 ɔ mi ngɛ “Victorious Faith” Interna­tional Convention nɛ a pee ngɛ Montreal ɔ sisi ɔ. I tsu ní ngɛ Ní Hoomi He ɔ. Wa hyɛ blɔ kaa nihi 80,000 nɛ a maa ba kpe ɔ, nɛ e sa nɛ waa gu blɔ kpa nɔ kɛ to niye ní he blɔ nya kɛ ha mɛ. Nɔ́ fɛɛ nɔ́ tsake kulaa. Níhi nɛ waa kɛ maa hoo ní ɔ, niye ní nɛ a maa hoo, kɛ blɔ nɔ nɛ a maa gu kɛ hoo ní ɔ tsake kulaa. Wa ngɛ fridge agbohi maa pee 20, se be komɛ ɔ, a tsu we ni kpakpa ko. Ligbi nɛ e nɔ jena a maa je kpe ɔ sisi ɔ, nyɔ mi loko wa nyɛ nɛ wa sɛ stadium ɔ mi nɛ wa ya to níhi a blɔ nya ejakaa jamɛ a ligbi ɔ, nihi ba gbɔle a kpɔ mi ngɛ lejɛ ɔ. Nɛ e sa nɛ waa su oven ɔmɛ loko je nɛ e na konɛ wa nyɛ nɛ waa to mɔtu niye ní he blɔ nya. Pɔ tɔ wa he wawɛɛ, se akɛnɛ nyɛmimɛ ɔmɛ nɛ i kɛ mɛ ngɛ ní ɔ tsue tsuɔ ní wawɛɛ nɛ́ a wa ngɛ mumi mi, nɛ́ a he ngɛ bua jɔmi he je ɔ, i kase níhi fuu kɛ je a ngɔ. Enɛ ɔ ha nɛ huɛ bɔmi nɛ ngɛ wa kpɛti ɔ mi wa kɛ ba si mwɔnɛ ɔ.  E ngɛ mi kaa ngɛ jeha 1940 kɛ ya si jeha 1960 mi ɔ, a ngɛ nyɛmimɛ ɔmɛ yi mi wae ngɛ Quebec ma komɛ a nɔ mohu lɛɛ, se wa bua jɔ kaa wa pee kpe nɛ he hia nɛ ɔ.

I kase níhi fuu kɛ je nyɛmimɛ kpahi nɛ a nyɛɛ hɛ mi ngɛ kpe ngua nɛ a pee ngɛ Montreal ɔ a ngɔ. Ngɛ jeha ko nɔ ɔ, Nyɛminyumu David Splane nɛ amlɔ nɛ ɔ, e sɔmɔɔ kaa Blɔ Tsɔɔmi Ajla Toli ɔmɛ a kpɛti nɔ kake ɔ lɛ hyɛ kpe ɔ nɔ. Pee se benɛ a ngɔ jamɛ a ní tsumi ɔ kɛ wo ye dɛ ɔ, Nyɛminyumu Splane ye bua mi wawɛɛ.

Se ngɛ jeha 2011 ɔ mi ɔ, benɛ wa tsu kpɔ mi nɔ ­hyɛmi ní tsumi ɔ jeha 36, a fɔ mi nine kaa ma ya sɔmɔ kaa tsɔɔlɔ ngɛ Asafo Mi Nikɔtɔmahi A Sukuu ɔ sisi. Ngɛ jeha enyɔ mi ɔ, i kɛ Randi hwɔ sa slɔɔtoslɔɔto 75 nɔ, se wa bua jɔ kaa wa ngɔ wa he kɛ sã afɔle. Loko otsi ɔ maa ba nyagbe ɔ, asafo mi nikɔtɔma amɛ a bua jɔɔ ejakaa a nuɔ he kaa Blɔ Tsɔɔmi Ajla Toli ɔmɛ susuɔ a he, nɛ a suɔ nɛ huɛ bɔmi nɛ ngɛ a kɛ Yehowa a kpɛti ɔ mi nɛ wa.

Pee se ɔ, i ya tsɔɔ nihi nɛ a yaa Sukuu Kɛ Ha Matsɛ Yemi Sane Kpakpa Fiɛɛli ɔ ní. Pɔ tɔɔ sukuu bi ɔmɛ a he ejakaa a ná we deka kulaa. A kaseɔ ní ngmlɛfia kpaago ngɛ ligbi ɔ mi. Nɛ ke e su gbɔkuɛ ɔ, a kɛ ngmlɛfia etɛ sɔuu tsuɔ ní tsumi nɛ a kɛ woɔ a dɛ ɔ. A tsuɔ ní tsumi kpahi eywiɛ loo enuɔ nɛ a kɛ woɔ a dɛ ɔ ngɛ otsi ɔ mi ɔ hulɔ. I kɛ tsɔɔlɔ kpa nɛ piɛɛ ye he ɔ deɔ mɛ ke a be nyɛe maa pee ní nɛ ɔmɛ tsuo ngɛ a dɛ he, ja Yehowa ye bua mɛ. Be fɛɛ be ɔ, i naa kaa sukuu bi ɔmɛ a bua jɔɔ kaa a ngɔ a hɛ kɛ fɔ Yehowa nɔ nɛ e ye bua mɛ, nɛ a nyɛ nɛ a tsu níhi nɛ a susuu we kaa a ma nyɛ ma tsu ɔ po.

Akɛnɛ ye mami susuɔ ni kpahi a he he je ɔ, lɔ ɔ ha nɛ nihi nɛ e kɛ mɛ kaseɔ Baiblo ɔ ya a hɛ mi, nɛ ye papaa po tsake bɔ nɛ e peeɔ e ní ha ngɛ anɔkuale ɔ he ɔ. Benɛ ye mami gbo ligbi etɛ se ɔ, ye papaa pee nɔ́ ko nɛ pee wɔ nyakpɛ wawɛɛ. E ba Matsɛ Yemi Asa a nɔ nɛ e ba bu magbɛ nɔ munyu ko tue. Kɛ je lɔ ɔ se ɔ, e ya nɔ nɛ e ya asafo mi kpehi jeha 26 sɔuu. E ngɛ mi kaa a baptisii we ye papaa mohu lɛɛ, se asafo mi nikɔtɔma amɛ de mi ke daa otsi ɔ, lɛ ji nɔ kekleekle nɛ e ya suɔ Matsɛ Yemi Asa a nɔ.

Ye mami pee nɔ hyɛmi nɔ́ kpakpa kɛ ha i kɛ ye nyɛmiyi ɔmɛ. Ye nyɛmiyihi etɛ ɔmɛ kɛ a huno ɔmɛ ngɛ Yehowa sɔmɔe ngɛ anɔkuale mi. A kpɛti nihi enyɔ ngɛ sɔmɔe ngɛ Betel. Nɔ kake ngɛ sɔmɔe ngɛ Portugal Betel, nɛ nɔ kake hu ngɛ sɔmɔe ngɛ Haiti Betel.

Amlɔ nɛ ɔ, i kɛ Randi ngɛ sɔmɔe kaa blɔ gbali klɛdɛɛ ngɛ Hamilton, ngɛ Ontario. Benɛ wa ngɛ kpɔ mi nɔ hyɛmi ní tsumi ɔ tsue ɔ, wa piɛɛɔ ni kpahi a he nɛ a kɛ nihi ya kaseɔ Baiblo ɔ. Enɛ ɔ ha nɛ wa bua jɔ wawɛɛ. Se amlɔ nɛ ɔ, wa naa kaa nihi nɛ wɔ nitsɛmɛ waa kɛ mɛ kaseɔ Baiblo ɔ ngɛ hɛ mi yae, nɛ enɛ ɔ hu haa wɔ bua jɔmi wawɛɛ. Benɛ waa kɛ nyɛmimɛ nɛ a ngɛ wa asafo ehe ɔ mi ɔ ba pee huɛmɛ ɔ, e wo wɔ he wami ejakaa wa na bɔ nɛ Yehowa ye bua mɛ ngɛ be kpakpahi kɛ haomi behi a mi ha.

Amlɔ nɛ ɔ, wa kaiɔ bɔ nɛ ni kpahi susu wa he ha a, nɛ e haa nɛ wa bua jɔɔ wawɛɛ. Enɛ ɔ haa nɛ wɔ hu wa bɔɔ mɔde kaa wa maa ‘ye tsui’ ngɛ ni kpahi a he konɛ waa wo mɛ he wami nɛ a pee nɔ́ fɛɛ nɔ́ nɛ a ma nyɛ ngɛ Yehowa sɔmɔmi mi. (2 Kor. 7:​6, 7) Kaa nɔ hyɛmi nɔ́ ɔ, ngɛ weku ko mi ɔ, nyɛmiyo ko kɛ e binyumu kɛ e biyo tsuo ngɛ blɔ gbami ní tsumi ɔ tsue. I bi huno ɔ nɛ ji weku yi ɔ kaa e susu he hyɛ kaa e ma tsu blɔ gbami ní tsumi ɔ eko lo. E de mi ke lɛ nɛ e ngɛ e yo ɔ kɛ a bimɛ ɔmɛ ye buae kɛ ngɛ blɔ gbami ní tsumi ɔ tsue. Lɔ ɔ he ɔ, i bi lɛ ke, “O ma nyɛ maa hyɛ a nɔ pe bɔ nɛ Yehowa ngɛ a nɔ hyɛe ɔ lo?” I wo lɛ he wami kaa e ngɔ e he kɛ wo blɔ gbami ní tsumi ɔ mi konɛ e ná bua jɔmi nɛ a ngɛ náe ɔ eko. Nyɔhiɔ ekpa se ɔ, e ba pee daa blɔ gbalɔ.

I kɛ Randi maa ya nɔ maa ‘sɛɛ nyakpɛ ní nguanguahi nɛ Yehowa pee ɔ kɛ ha yi nɔhi nɛ maa ba ngɛ se ɔ,’ nɛ wa he ye kaa mɛ hu a bua maa jɔ ngɛ Yehowa sɔmɔmi mi kaa wɔ.​—La 71:​17, 18.