Ngmami nɛ ɔ tu Kristofohi a su nɛɛ he munyu: “Mumi ɔ yiblii ɔ ji suɔmi, bua jɔmi, tue mi jɔmi, tsui si tomi, mi mi jɔmi, kpakpa peemi, hemi kɛ yemi, he jɔmi, he nɔ yemi.” Se tsa pi su kpakpa nɛ ɔmɛ pɛ nɛ Mawu mumi ɔ ma nyɛ maa ye bua wɔ nɛ wa ná.

Kɛ wa plɛ kɛ le kɛɛ? Mo kadi kaa loko bɔfo Paulo maa tu mumi ɔ yiblii ɔ he munyu ɔ, e de ke: “He lo ɔ ní tsumi ɔmɛ . . . ji ajuama bɔmi, mu ní tsumihi, nɔ buimi ngmlikiti, wɔ jami, mumi yayami kɛ ní tsumi, ninyɛ, pɛ, hunga jemi, mi mi la womi, atsinyɛ jemihi, mi gbamihi, jami kuuhi, hɛkɔ, dã demi, okplɔɔ ngmɛmihi nɛ a ngɛ hoo, kɛ níhi kaa kikɛ nɛ ɔmɛ.” (Gal. 5:19-21) Paulo gbe e munyu ɔ nya kɛ munyu nɛ ji “níhi kaa kikɛ nɛ ɔmɛ.” Enɛ ɔ tsɔɔ kaa e tui níhi tsuo nɛ a ji “he lo ɔ ní tsumi” kaa nɔ́ nɛ ngɛ Kolose Bi 3:5 ɔ he munyu. Jã nɔuu kɛ̃ nɛ benɛ e tu su kpakpa nɛɛ komɛ a he munyu ta a, e de ngɛ kuku 23 ɔ ke: “A wui mlaa ko kɛ si we ní nɛ ɔmɛ.” Nɛ tsɔɔ kaa Paulo tu we su kpakpahi tsuo nɛ mumi klɔuklɔu ɔ ma nyɛ maa ye bua wɔ nɛ wa ná a he munyu.

Ke wa ngɔ mumi ɔ yiblii ɔ kɛ to la a yiblii ɔ nɛ Paulo ngma he sane kɛ ya ha asafo nɛ ngɛ Efeso ɔ he ɔ, wa naa kaa pi su kpakpa nɛɛ ɔ pɛ ji mumi ɔ yiblii ɔ. E de ke: “La a yiblii ɔ ji kpakpa peemi slɔɔtohi tsuo kɛ dami kɛ anɔkuale.” (Efe. 5:8, 9) Ngɛ anɔkuale mi ɔ, “kpakpa peemi” kɛ dami kɛ anɔkuale piɛɛ “la a yiblii” ɔ he, nɛ e piɛɛ “mumi ɔ yiblii ɔ” hu he.

Jehanɛ hu ɔ, Paulo wo Timoteo he wami kaa e je su kpakpahi ekpa komɛ kpo. E de lɛ ke: “Dii dami, Mawu jami, hemi kɛ yemi, suɔmi, si fimi kɛ he jɔmi se.” (1 Tim. 6:11) Su nɛ ɔmɛ a kpɛti etɛ (hemi kɛ yemi, suɔmi, he jɔmi) pɛ lɛ a piɛɛ “mumi ɔ yiblii ɔ” he. Loko Timoteo ma je su kpahi nɛ a tu he munyu nɛ ji dami, Mawu jami kɛ si fimi kpo ɔ, ja Mawu mumi ɔ ye bua lɛ.​—Kɛ to Kolose Bi 3:12; 2 Petro 1:5-7 ɔ he.

Lɔ ɔ he ɔ, Galatia Bi 5:22, 23 ɔ tu we su kpakpahi tsuo nɛ e sa nɛ Kristofohi nɛ a ná a he munyu. Mawu mumi ɔ ma nyɛ maa ye bua wɔ konɛ wa je su nɛɛ nɛ a piɛɛ “mumi ɔ yiblii ɔ” he ɔ kpo. Se su kpakpahi fuu ngɛ nɛ e sa nɛ wa ná konɛ wa nane nɛ pi si ngɛ Mawu jami mi, nɛ waa wo “su ehe ɔ nɛ a bɔ ngɛ Mawu suɔmi nya ngɛ dami nitsɛnitsɛ kɛ se fimi nitsɛnitsɛ mi ɔ.”​—Efe. 4:24.