1. Ngɛ 1 Petro 5:2 ɔ nya a, mɛni he blɔ nɛ asafo mi nikɔtɔmahi ná?

 E JI asafo mi nikɔtɔmahi a blɔ nya ní tsumi kaa a hyɛ Yehowa jijɔ ɔmɛ nɛ a he jua wa kɛ ha lɛ ɔ a nɔ. Nyɛmimɛ nyumuhi anɔkualetsɛmɛ nɛ ɔmɛ a bua jɔ he blɔ nɛ a ná kɛ ngɛ a nyɛmimɛ ɔmɛ sɔmɔe ɔ he wawɛɛ. A ngɛ mɔde bɔe kaa a maa pee ‘nɔ hyɛli kpakpahi konɛ a hyɛ a nɔ.’ (Yer. 23:4; kane 1 Petro 5:2.) Wa bua jɔ kaa Yehowa ha wɔ nyumuhi kaa jã ngɛ wa asafo ɔmɛ a mi.

2. Mɛni nyagbahi nɛ asafo mi nikɔtɔma komɛ ma nyɛ ma kɛ kpe?

² Asafo mi nikɔtɔmahi kɛ nyagbahi fuu kpeɔ ke a ngɛ a blɔ nya ní tsumihi a he ní tsue. Ja a bɔ mɔde wawɛɛ loko a ma nyɛ maa hyɛ asafo ɔ nɔ. Tony nɛ e ji asafo mi nɔkɔtɔma ngɛ United States ɔ na kaa e biɔ nɛ e pee e he humi nɛ e ko ngɔ ní tsumihi fuu kɛ fɔ e kuɛ nɔ. E de ke: “Benɛ COVID-19 hiɔ ɔ je sisi ɔ, i ngɔ ní tsumi fuu kɛ fɔ ye kuɛ nɔ bɔ nɛ pee nɛ ma nyɛ ma to asafo mi kpehi kɛ fiɛɛmi ní tsumi ɔ he blɔ nya. I bɔɔ mɔde wawɛɛ mohu lɛɛ, se be fɛɛ be ɔ, ní tsumihi fuu ngɛ. Ní tsumi nɛ ɔmɛ ngɔ ye be wawɛɛ nɛ bɔɔbɔɔbɔɔ ɔ, i nyɛ we nɛ ma ná be fuu kɛ kane Baiblo ɔ, nɛ ma kase ní nɛ ma sɔle.” Asafo mi nɔkɔtɔma ko nɛ a tsɛɛ lɛ ke Ilir nɛ e ngɛ Kosovo ɔ hu kɛ nyagba kpa ko kpe. Benɛ e ya je he ko nɛ a pɔɔ ta hwumi ngɛ wawɛɛ ɔ, e he wa ha lɛ kaa e kɛ asafo ɔ blɔ tsɔɔmi ma tsu ní. E de ke: “Benɛ asafo ɔ de mi ke ma ya ye bua nyɛmimɛ nɛ a ngɛ he ko nɛ ngɛ oslaa a, i ye gbeye wawɛɛ, nɛ i nu he kaa nile be blɔ tsɔɔmi nɛ a kɛ ha mi ɔ mi.” E he wa ha Tim nɛ e ji ma se sane kpakpa fiɛɛlɔ ngɛ Asia a kaa e maa pee níhi nɛ e pɔɔ peemi daa ligbi ɔ. E de ke: “Be komɛ ɔ, pɔ tɔɔ ye he wawɛɛ, nɛ e he waa ha mi kaa ma ye bua nyɛmimɛ ɔmɛ.” Mɛni ma nyɛ maa ye bua asafo mi nikɔtɔmahi nɛ a kɛ nyagbahi kaa jã a ngɛ kpee ɔ?

3. Ke wɔ tsuo wa susu Gideon nɔ hyɛmi nɔ́ ɔ he ɔ, kɛ e maa ye bua wɔ ha kɛɛ?

³ Asafo mi nikɔtɔmahi ma nyɛ maa kase nɔ hyɛmi nɔ́ nɛ  Gideon nɛ ji kojolɔ ɔ pee ɔ. (Heb. 6:12; 11:32) Gideon po Mawu we bi a he piɛ, nɛ e hyɛ a nɔ hulɔ. (Many. 2:16; 1 Kron. 17:6) Kaa bɔ nɛ e ji ngɛ Gideon blɔ fa mi ɔ, Mawu hla asafo mi nikɔtɔmahi kaa mɛ hu a hyɛ e we bi a nɔ ngɛ be nɛ mi wa wawɛɛ nɛ ɔ mi. (Níts. 20:28; 2 Tim. 3:1) Wɔ tsuo wa ma nyɛ maa kase bɔ nɛ Gideon pee e he humi nɛ e ba e he si nɛ e bu Yehowa tue ɔ mi. Benɛ e ngɛ ní tsumi nɛ a kɛ wo e dɛ ɔ he ní tsue ɔ, e kɛ si fɔfɔɛhi nɛ a mi wa kpe, se e fĩ si. Asafo mi nikɔtɔmahi ji wɔ jio, pi asafo mi nikɔtɔmahi ji wɔ jio, wa ma nyɛ ma je hɛsa kpo wawɛɛ ngɛ ní tsumi nɛ asafo mi nikɔtɔmahi ngɛ tsue ɔ he. Wa ma nyɛ ma fĩ nyumuhi anɔkualetsɛmɛ nɛ ɔmɛ nɛ a ngɛ mɔde bɔe wawɛɛ ɔ a se.—Heb. 13:17.

4. Mɛni blɔ nɔ nɛ Gideon pee e he humi nɛ e ba e he si?

⁴ Gideon ba e he si nɛ e pee e he humi. b Benɛ Yehowa bɔfo ko de Gideon kaa a hla lɛ kaa e kpɔ̃ Israel bi ɔmɛ kɛ je Media bi nɛ a he wa a dɛ mi ɔ, e kɛ he si bami de ke: “Weku nɛ i je mi ɔ ji weku nyafii pe kulaa ngɛ Manase wɛtso ɔ mi. Tsaatsɛ we ɔ mi hu imi ji jokuɛyo pe kulaa.” (Many. 6:15) E nu he kaa e he sui kɛ ha ní tsumi nɛ ɔ, se Yehowa le kaa e ma nyɛ ma tsu. Yehowa ye bua Gideon nɛ e nyɛ nɛ e tsu ní tsumi ɔ kɛ gbe nya.

5. Mɛni behi a mi nɛ e he ma nyɛ maa wa kɛ ha asafo mi nɔkɔtɔma ko kaa e maa pee e he humi nɛ e ba e he si?

⁵ Asafo mi nikɔtɔmahi bɔɔ mɔde kaa a maa pee a he humi, nɛ a ba a he si ngɛ níhi tsuo a mi. (Mika 6:8; Níts. 20:18, 19) A fĩɛ ngɛ níhi nɛ a tsu momo loo níhi a ma nyɛ ma tsu ɔ he, nɛ a susuu we kaa a he be se nami akɛnɛ a tɔ̃ɔ be komɛ ɔ he je. Ngɛ lɔ ɔ tsuo se ɔ, asafo mi nikɔtɔmahi kɛ kahi ma nyɛ maa kpe. Kaa nɔ hyɛmi nɔ́ ɔ, asafo mi nɔkɔtɔma ko ma nyɛ maa kplɛɛ ní tsumihi fuu a nɔ, nɛ e he ma nyɛ maa wa ha lɛ kaa e ma tsu tsuo he ní. Aloo e he ma nyɛ maa wa ha lɛ kaa e maa ba e he si nɛ e pee e he humi ke a tu e hɛ mi munyu loo a je e yi ngɛ nɔ́ ko nɛ e tsu ɔ he. Mɛni asafo mi nikɔtɔmahi ma nyɛ maa kase ngɛ Gideon he ke a kɛ si fɔfɔɛhi kaa jã kpe?

6. Mɛni blɔ nɔ nɛ asafo mi nikɔtɔmahi ma nyɛ maa kase Gideon nɛ a pee a he humi? (Hyɛ foni ɔ hulɔ.)

⁶ Mo bi yemi kɛ buami. Nɔ nɛ peeɔ e he humi ɔ le níhi nɛ e ma nyɛ maa pee kɛ níhi nɛ  e be nyɛe maa pee. Gideon bi yemi kɛ buami kɛ je ni kpahi a ngɔ kɛ tsɔɔ kaa e peeɔ e he humi. (Many. 6:27, 35; 7:24) Asafo mi nikɔtɔmahi nɛ a ngɛ nile ɔ peeɔ jã nɔuu. Tony nɛ wa tu e he munyu kɛ sɛ hlami ɔ de ke: “Ngɛ bɔ nɛ a tsɔse mi ha a he je ɔ, i kplɛɛɔ ní tsumihi fuu a nɔ pe bɔ nɛ ma nyɛ ma tsu. Enɛ ɔ he ɔ, i ha nɛ wa kase humi peemi he ní ngɛ wa weku Mawu jami ɔ mi, nɛ i bi ye yo ɔ ke ji i ngɛ ye he mɔde bɔe lo. Jehanɛ se hu ɔ, i ya jw.org ɔ nɔ, nɛ i ya hyɛ video nɛ ji, Mo Tsɔse Nihi, He Mɛ Nɛ O Ye, Nɛ O Wo Mɛ He Wami, Kaa Bɔ Nɛ Yesu Pee ɔ.” Kɛ je lɔ ɔ se ɔ, Tony haa nɛ ni kpahi yeɔ bua lɛ kɛ tsuɔ ní tsumi nɛ a kɛ wo e dɛ ɔ. Mɛni je mi kɛ ba? Tony de ke: “Ní tsumihi nɛ ngɛ asafo ɔ mi ɔ ngɛ nɔ yae saminya, nɛ i náa be babauu kɛ fiaa ye he kɛ maa si ngɛ Mawu jami mi.”

7. Ke a tu asafo mi nikɔtɔmahi a hɛ mi munyu ɔ, mɛni a ma nyɛ maa pee kɛ kase Gideon? (Yakobo 3:13)

⁷ O mi mi nɛ ko fu ke a tu o hɛ mi munyu. Ke a tu asafo mi nikɔtɔmahi a hɛ mi munyu ɔ, e ba peeɔ ka kɛ haa mɛ. Ke e ba jã a, Gideon nɔ hyɛmi nɔ́ ɔ ma nyɛ maa ye bua mɛ. Gideon le kaa e yi mluku, lɔ ɔ he ɔ, benɛ Efraim bi ɔmɛ tu e hɛ mi munyu ɔ, e to e tsui si. (Many. 8:1-3) Gideon kɛ abofu ha we mɛ heto, mohu ɔ, e bu mɛ tue saminya, nɛ e je mi mi jɔmi mi kɛ tu munyu kɛ tsɔɔ kaa e baa e he si. Enɛ ɔ ha nɛ Efraim bi ɔmɛ a mi mi fumi ɔ nya ba si. Asafo mi nikɔtɔmahi nɛ a ngɛ nile ɔ kaseɔ Gideon nɛ ke a tu a hɛ mi munyu ɔ, a buɔ tue saminya, nɛ a jeɔ mi mi jɔmi mi kɛ tuɔ munyu. (Kane Yakobo 3:13.) Jã nɛ a peeɔ ɔ haa nɛ tue mi jɔmi hii asafo ɔ mi.

8. Ke a jé asafo mi nikɔtɔmahi a yi ɔ, kɛ e sa kaa a pee a ní ha kɛɛ? Mo ha enɛ ɔ he nɔ hyɛmi nɔ́.

⁸ Ngɔɔ yi jemi ɔ tsuo kɛ ha Yehowa. Benɛ Gideon ye Media bi ɔmɛ a nɔ kunimi nɛ nihi je e yi ɔ, e gbla ni ɔmɛ a juɛmi kɛ ya Yehowa nɔ. (Many. 8:22, 23) Mɛni nɛ asafo mi nikɔtɔmahi ma nyɛ maa kase ngɛ Gideon nɔ hyɛmi nɔ́ ɔ mi. Ke a nyɛ tsu nɔ́ ko ngɛ asafo ɔ mi ɔ, e sa nɛ a ngɔ yi jemi ɔ kɛ ha Yehowa. (1 Kor. 4:6, 7) Kaa nɔ hyɛmi nɔ́ ɔ, ke a jé asafo mi nɔkɔtɔma ko yi ngɛ e ní tsɔɔmi he ɔ, e ma nyɛ ma de kaa blɔ tsɔɔmi nɛ ngɛ Mawu Munyu ɔ mi kɛ níhi nɛ wɔ tsuo wa ngɛ kasee ngɛ Yehowa asafo ɔ mi ɔ lɛ ye bua lɛ. E sa nɛ asafo mi nikɔtɔmahi nɛ a hyɛ ke ji a ní tsɔɔmi ngɔɔ yi jemi kɛ haa Yehowa aloo e gblaa nihi a juɛmi kɛ baa mɛ nitsɛmɛ a nɔ. Mo susu asafo mi nɔkɔtɔma ko nɛ a tsɛɛ lɛ ke Timothy ɔ he nɛ o hyɛ. Benɛ e bɔni sɔmɔmi kaa asafo mi nɔkɔtɔma a, e suɔ magbɛ nɔ munyu tumi wawɛɛ. E de ke: “I kɛ nɔ́ he tomi níhi nɛ a nya kɛ jeɔ ye munyu ɔmɛ a sisi. Enɛ ɔ haa nɛ nyɛmimɛ ɔmɛ jeɔ ye yi wawɛɛ nɛ a ngɔɔ a juɛmi kɛ maa ye nɔ pe Baiblo ɔ kɛ Yehowa mohu nɔ.” Bɔɔbɔɔbɔɔ ɔ, Timothy yɔse kaa e sa nɛ e pee tsakemi ngɛ e ní tsɔɔmi mi konɛ e ko gbla nihi a juɛmi kɛ ba e nɔ. (Abɛ 27:21) Mɛni je mi kɛ ba? E de ke: “Amlɔ nɛ ɔ, ke i tu magbɛ nɔ munyu ɔ, nyɛmimɛ ɔmɛ deɔ mi ke ye munyu ɔ yeɔ bua mɛ nɛ a nyɛɔ daa kahi kɛ nyagbahi nɛ a kɛ ngɛ kpee ɔ nya, nɛ a hɛɛ kɛ suɔ Yehowa he. Ke a de mi jã a, ye bua jɔɔ wawɛɛ pe ye yi nɛ a je be ko nɛ be ɔ.”

9. Mɛni ha nɛ e he wa ha Gideon kaa e maa bu Yehowa tue nɛ e pee kã a? (Hyɛ foni nɛ ngɛ womi ɔ hɛ mi ɔ.)

⁹ Benɛ a hla Gideon kaa kojolɔ ɔ, e he hia nɛ e bu blɔ tsɔɔmi tue nɛ e pee kã. Yehowa hla lɛ kaa e kpata afɔle sami la tɛ nɛ e papaa sã afɔle ngɛ nɔ kɛ ha Baal ɔ hɛ mi. Oslaa ngɛ ní tsumi nɛ ɔ he wawɛɛ. (Many. 6:25, 26) Pee se benɛ Gideon bua ta buli babauu nya a, Yehowa de lɛ si enyɔ sɔuu kaa e gbɔ a yibɔ ɔ nɔ. (Many. 7:2-7) Nyagbenyagbe ɔ, Yehowa de lɛ kaa e ya tua e he nyɛli ɔmɛ nyɔ mi ngɛ a sito he ɔ.—Many. 7:9-11.

10. Mɛni ma nyɛ ma ha nɛ e he nɛ wa ha asafo mi nɔkɔtɔma ko kaa e maa bu blɔ tsɔɔmi tue?

 ¹⁰ E sa nɛ asafo mi nikɔtɔmahi nɛ a “pee klaalo kaa [a] maa bu tue.” (Yak. 3:17) Asafo mi nɔkɔtɔma nɛ buɔ tue ɔ kɛ blɔ tsɔɔmi nɛ je Ngmami ɔ mi kɛ blɔ tsɔɔmi nɛ Yehowa asafo ɔ kɛ haa a tsuɔ ní oya nɔuu. Jã nɛ e maa pee ɔ maa pee nɔ hyɛmi nɔ́ kpakpa kɛ ha ni kpahi. Se kɛ̃ ɔ, e he ma nyɛ maa wa kaa e maa bu blɔ tsɔɔmi tue be komɛ nɛ e kɛ tsu ní. Kaa nɔ hyɛmi nɔ́ ɔ, e he ma nyɛ maa wa ha lɛ kaa e kɛ blɔ tsɔɔmi nɛ a kɛ ma ha a ma tsu ní. Be komɛ hu ɔ, e ma nyɛ maa nu he kaa nile be blɔ tsɔɔmi ko nɛ a kɛ ha a mi. Aloo eko ɔ, a ma nyɛ ma ha lɛ ní tsumi ko nɛ ma nyɛ ma ha nɛ a nu lɛ kɛ wo tsu mi po. Mɛni blɔ nɔ asafo mi nikɔtɔmahi ma nyɛ maa kase bɔ nɛ Gideon bu Yehowa tue ha a ke a kɛ si fɔfɔɛ kaa jã a kpe?

11. Mɛni ma nyɛ maa ye bua asafo mi nikɔtɔmahi konɛ a bu blɔ tsɔɔmi tue?

¹¹ Moo bu blɔ tsɔɔmi tue saminya nɛ o kɛ tsu ní. Mawu kɛ blɔ tsɔɔmi ha Gideon ngɛ bɔ nɛ e sa nɛ e kpata e tsɛ ɔ afɔle sami la tɛ ɔ hɛ mi ha, kɛ he nɛ e sa nɛ e ma ehe kɛ ha Yehowa ngɛ, kɛ lohwe nɛ e sa kaa e kɛ sã afɔle ɔ. Gideon yi mi pee we lɛ enyɔɔnyɔ ngɛ blɔ tsɔɔmi ɔmɛ a he, mohu ɔ, e pee nɔ́ nɛ Yehowa fã lɛ ke e pee ɔ pɛ. Mwɔnɛ ɔ, Yehowa asafo ɔ ngɔɔ blɔ tsɔɔmi kɛ haa asafo mi nikɔtɔmahi kɛ guɔ sɛ womi kɛ adafi fiami nɔ, kɛ blɔ tsɔɔmi kpahi nɛ ma ha nɛ waa hi si slɔkee nɛ waa hɛ kɛ su Yehowa he. Wa suɔ asafo mi nikɔtɔma amɛ wawɛɛ ejakaa a yeɔ anɔkuale nɛ a kɛ blɔ tsɔɔmi nɛ ɔmɛ tsuɔ ní, nɛ asafo ɔ tsuo náa he se.—La 119:112.

12. Mɛni blɔ nɔ nɛ asafo mi nikɔtɔmahi ma nyɛ maa ngɔ Hebri Bi 13:17 ɔ kɛ tsu ní ke asafo ɔ pee tsakemi ngɛ blɔ tsɔɔmi ko he?

¹² Moo pee klaalo kaa o maa pee tsakemi. Mo kai kaa Yehowa ha nɛ Gideon gbɔ e ta buli ɔmɛ a nɔ kulaa. (Many. 7:8) Eko ɔ, Gideon ma bi e he ke: ‘Anɛ tsakemi nɛ ɔ he hia lo? Anɛ tsakemi nɛ ɔ maa ye bua lo?’ Se ngɛ tsuo se ɔ, Gideon bu Yehowa tue. Mwɔnɛ ɔ, asafo mi nikɔtɔmahi ma nyɛ maa kase Gideon nɔ hyɛmi nɔ́ ɔ ke a kɛ blɔ tsɔɔmi nɛ a kɛ ha mɛ ɔ tsu ní be mi nɛ eko ɔ, a bua jɔɛ he po. (Kane Hebri Bi 13:17.) Kaa nɔ hyɛmi nɔ́ ɔ, ngɛ 2014 ɔ mi ɔ, Blɔ Tsɔɔmi Ajla Toli ɔmɛ tsake blɔ nɔ nɛ a guɔ kɛ woɔ Matsɛ Yemi Asahi kɛ Kpe Peemi Asahi a he hiɔ. (2 Kor. 8:12-14) Be ko nɛ be ɔ, asafo ɔ ní tsumi kɔni ɔ paa sika kɛ haa asafohi nɛ a kɛ maa Matsɛ Yemi Asa ha mɛ, nɛ pee se ɔ, asafo nɛ ɔmɛ ya woɔ sika a kɛ haa ní tsumi kɔni ɔ. Se amlɔ nɛ ɔ, asafo ɔ ngɔɔ yemi kɛ buami nɛ nyɛmimɛ ngɛ je kɛ wɛ ɔ haa a kɛ maa Matsɛ Yemi Asahi kɛ Kpe Peemi Asahi ngɛ he fɛɛ he nɛ e he maa hia ngɛ, nɛ asafohi nɛ a haa yemi kɛ buami bɔɔ ko po ɔ náa he se. Benɛ José nu tsakemi nɛ ɔ he ɔ, e susu kaa e be manye yee. E de ke: ‘A be nyɛe maa ma Matsɛ Yemi Asa kake ngmelu po. A pee we jã ngɛ wa ma nɛ ɔ mi.’ Mɛni ye bua José nɛ e nyɛ nɛ e fĩ blɔ tsɔɔmi nɛ ɔ se? E de ke: “Munyu nɛ ngɛ Abɛ 3:5, 6 kai  mi kaa e sa nɛ ma ngɔ ye hɛ kɛ fɔ Yehowa nɔ. Nɔ́ nɛ je mi kɛ ba a ngɛ nyakpɛ wawɛɛ! Amlɔ nɛ ɔ, pi Matsɛ Yemi Asahi fuu pɛ nɛ wa ngɛ mae, wa ba kase blɔ slɔɔtohi a nɔ nɛ wa maa gu kɛ ha yemi kɛ buami, nɛ enɛ ɔ ha nɛ a maa Matsɛ Yemi Asahi ngɛ he nɛ a he maa hia ngɛ.”

13. (a) Mɛni nɔ mi mami nɛ Gideon ná? (b) Kɛ asafo mi nikɔtɔmahi ma plɛ kɛ kase Gideon ha kɛɛ? (Hyɛ foni ɔ hulɔ.)

¹³ O kɛ kã nɛ pee Yehowa suɔmi nya ní. E ngɛ mi kaa oslaa ngɛ ní tsumi nɛ Yehowa ha Gideon ɔ he, nɛ e ye gbeye mohu lɛɛ, se e bu Yehowa tue. (Many. 9:17) Yehowa wo Gideon he wami, nɛ e ná nɔ mi mami kaa e maa ye bua lɛ kɛ po e we bi a he piɛ. Asafo mi nikɔtɔmahi nɛ a ngɛ hehi nɛ a tsi wa ní tsumi ɔ nya ngɛ ɔ kaseɔ Gideon. E ngɛ mi kaa a woɔ a he gbeye kaa a maa wo mɛ tsu, a biɔ mɛ sanehi, nɛ a ní tsumi jeɔ a dɛ loo a waa mɛ yi mi mohu lɛɛ, se a kɛ kã nyɛɛɔ asafo ɔ hɛ mi kɛ peeɔ kpehi nɛ a tsuɔ fiɛɛmi ní tsumi ɔ hulɔ. c Ngɛ amanehlu ngua a mi ɔ, e he maa hia nɛ asafo mi nikɔtɔmahi nɛ a pee kã nɛ a bu blɔ tsɔɔmi nɛ a kɛ ma ha mɛ ɔ tue, ke jã peemi maa ngɔ oslaa kɛ ba a nɔ po. Kaa nɔ hyɛmi nɔ́ ɔ, e ma nyɛ maa ba kaa a maa tsɔɔ wɔ bɔ nɛ wa plɛ fiɛɛ kojomi sɛ gbi ɔ, kɛ nɔ́ nɛ wa maa pee konɛ wa yi nɛ ná wami ngɛ Gog nɛ e je Magog ɔ tuami ɔ mi.—Eze. 38:18; Kpoj. 16:21.

14. Mɛni blɔ nɔ nɛ Gideon kɛ si fimi he ka kpe?

¹⁴ Ní tsumi nɛ a kɛ wo Gideon dɛ kaa kojolɔ ɔ ji ní tsumi nɛ he wa wawɛɛ. Benɛ Media bi ɔmɛ tu fo kɛ je ta nga a nɔ nyɔ mi ɔ, Gideon nyɛɛ a se kɛ je Yezreel Kɔ̃ ɔ mi kɛ ya si Yordan Pa a nya. E ngɛ heii kaa tsohi ngɛ lejɛ ɔ. (Many. 7:22) Se benɛ Gideon su Yordan Pa a nya a, anɛ e kpale lo? Dɛbi! E kɛ nyumuhi 300 ɔ po Yordan Pa a nɛ a nyɛɛ a se. Nyagbenyagbe ɔ, a ya ná Media bi ɔmɛ nɛ a ye a nɔ kunimi.—Many. 8:4-12.

15. Mɛni he je nɛ e he ma nyɛ maa wa kaa asafo mi nɔkɔtɔma ko ma fĩ si ɔ?

¹⁵ Be komɛ ɔ, asafo mi nɔkɔtɔma ko ma nyɛ maa nu he kaa pɔ tɔ lɛ nɛ e be nyɛe maa hyɛ  asafo ɔ kɛ e weku ɔ nɔ. Ke e ba jã a, kɛ asafo mi nikɔtɔmahi ma plɛ kɛ kase Gideon ha kɛɛ?

16-17. Mɛni ye bua Gideon nɛ e nyɛ nɛ e fĩ si, nɛ mɛni nɔ mi mami nɛ asafo mi nikɔtɔmahi ma nyɛ ma ná? (Yesaya 40:28-31) (Hyɛ foni ɔ hulɔ.)

¹⁶ Mo ná hemi kɛ yemi kaa Yehowa maa wo mo he wami. Gideon ngɔ e hɛ kɛ fɔ Yehowa nɔ konɛ e wo lɛ he wami, nɛ Yehowa pee jã niinɛ. (Many. 6:14, 34) Ligbi ko Gideon kɛ nyumuhi nɛ a piɛɛ e he ɔ tu fo kɛ nyɛɛ Media matsɛmɛ enyɔ a se. E ma nyɛ maa ba kaa matsɛmɛ nɛ ɔmɛ hi afukpɔngɔhi a nɔ. (Many. 8:12, 21) Se Mawu ye bua Israel bi ɔmɛ nɛ a ye a nɔ kunimi. Asafo mi nikɔtɔmahi hu ma nyɛ maa ngɔ a hɛ kɛ fɔ Yehowa nɔ ejakaa ‘pɔ tɔɛ Yehowa he, nɛ e gbɔjɔɔ we’ hulɔ. Ngɛ anɔkuale mi ɔ, Yehowa ma ha mɛ he wami nɛ a hia ngɛ be nɛ sa mi.—Kane Yesaya 40:28-31.

¹⁷ Mo susu Mathew níhi si kpami ɔ he nɛ o hyɛ. E piɛɛ Hiɔ Tsami He Kɛ Ní Sɛɛmi Ajla Toli ɔmɛ a he. Mɛni ye bua lɛ nɛ e nyɛ nɛ e fĩ si? E de ke: “I na kaa munyu nɛ ngɛ Filipi Bi 4:13 ɔ ji anɔkuale. Behi fuu ɔ, ke pɔ tɔ ye he ɔ, i sɔleɔ nɛ i kpaa Yehowa pɛɛ nɛ e ha mi he wami nɛ ma hia konɛ ma ye bua nyɛmimɛ ɔmɛ. I na kaa Yehowa mumi ɔ wo mi he wami nɛ e ye bua mi nɛ i fĩ si.” Kaa bɔ nɛ Gideon pee ɔ, asafo mi nikɔtɔmahi hu bɔɔ mɔde wawɛɛ kaa a maa hyɛ Yehowa we bi a nɔ, e ngɛ mi kaa pi be fɛɛ be nɛ jã peemi ngɛ gbɔjɔɔ. Ngɛ anɔkuale mi ɔ, e sa nɛ a pee a he humi nɛ a na kaa tsa pi nɔ́ fɛɛ nɔ́ nɛ a suɔ kaa a pee ɔ nɛ a ma nyɛ maa pee. Ke a sɔle ha Yehowa konɛ a fĩ si ɔ, a ma nyɛ ma ná nɔ mi mami kaa e maa ye bua mɛ.—La 116:1; Filip. 2:13.

18. Mɛni asafo mi nikɔtɔmahi ma nyɛ maa pee kɛ tsɔɔ kaa a kaseɔ Gideon?

¹⁸ Asafo mi nikɔtɔmahi ma nyɛ maa kase níhi fuu kɛ je Gideon nɔ hyɛmi nɔ́ ɔ mi. E sa nɛ a pee a he humi nɛ a ba a he si konɛ a le ní tsumi abɔ nɛ a ma nyɛ ma tsu. Nɛ ke nihi tu a hɛ mi munyu loo je a yi ɔ, e sa nɛ a pee a he humi nɛ a ba a he si. E sa nɛ a bu Yehowa tue nɛ a pee kã, titli ɔ, ngɛ be nɛ e be kɛe nɛ nyagbe ɔ maa ba nɛ ɔ mi. E sa nɛ a ná nɔ mi mami kaa ngɛ nyagbahi nɛ a kɛ maa kpe tsuo se ɔ, Mawu ma nyɛ maa wo mɛ he wami. Ngɛ anɔkuale mi ɔ, wa maa ‘ya nɔ maa bu nyumuhi kaa jã a saminya,’ ejakaa wa bua jɔ mɔde nɛ a ngɛ bɔe kɛ ngɛ asafo ɔ nɔ hyɛe ɔ he wawɛɛ.—Filip. 2:29.