Ye fɔli hia kɛ je Estonia kɛ ho Germany ya benɛ a ngɛ je mi ta enyɔne ɔ hwue ɔ, nɛ lejɛ ɔ nɛ a fɔ mi ngɛ. Benɛ a fɔ mi se ɔ, a bɔni blɔ nya tomi kaa a maa ya Canada. Wa kekleekle we nɛ wa ya hi mi ngɛ Ottawa ngɛ Canada a ji tsu bi ko nɛ́ a lɛɛ kungwɔ ngɛ mi. Wa ji ohiatsɛmɛ, se ke e hí kulaa a, wa náa kungwɔ hlui nɛ wa yeɔ daa mɔtu.

Ligbi ko ɔ, Yehowa Odasefo ɔmɛ kane Kpo Jemi 21:3, 4 ɔ kɛ tsɔɔ ye mami. Munyu nɛ ɔ ta e tsui he wawɛɛ kɛkɛ nɛ e bɔni ya fomi. Ye papaa kɛ ye yayo ya nɔ nɛ a kase Baiblo ɔ nɛ a ya a hɛ mi mlamlaamla, nɛ be bɔɔ se ɔ, a baptisi mɛ.

E ngɛ mi kaa a nui Blɛfo gbi kpakpa ko mohu lɛɛ, se a kɛ hɛdɔ sɔmɔ Yehowa. Ye papaa tsuɔ ní ngɛ ní tsumi he ko nɛ a sileɔ dade ngɛ, ngɛ Sudbury ngɛ Ontario. E tsuɔ ní nyɔ ɔ mi tsuo, se daa Hɔ ɔ, i kɛ ye papaa kɛ ye nyɛmiyo wayoo Sylvia wa yaa fiɛɛmi. Nɛ daa otsi ɔ, wa kaseɔ Hwɔɔmi Mɔ ɔ kaa weku. Ye papaa kɛ ye yayo ye bua mi nɛ i ná suɔmi ha Mawu. Enɛ ɔ ha nɛ i jɔɔ ye he nɔ ha Yehowa ngɛ jeha 1956 mi benɛ i ye jeha nyɔngma a. Ye fɔli ɔmɛ suɔ Yehowa wawɛɛ, nɛ lɔ ɔ wo mi he wami nɛ i ya nɔ nɛ i sɔmɔ Yehowa.

Benɛ i gbe nɔ tsami sukuu nya a, ní komɛ bɔni ye juɛmi gblami, nɛ kã nɛ i kɛ ngɛ Yehowa sɔmɔe ɔ ba si. I susu kaa ke i ba pee blɔ gbalɔ ɔ, i be nyɛe ma ná sika fuu, nɛ i be nyɛe nɛ i kɛ ɛlopee maa hia blɔ kɛ kpa je ɔ mi kaa bɔ nɛ i suɔ kaa ma pee ɔ. I ná ní tsumi ngɛ radio station ko nɛ i ya tsu ní ngɛ lejɛ ɔ kaa DJ loo la fialɔ. Ye bua jɔ ní tsumi nɛ ɔ he wawɛɛ. Se i tsuɔ ní nyɔ mi, enɛ ɔ ha nɛ i nyɛ we asafo mi kpehi yami be fɛɛ be, nɛ i kɛ nihi nɛ a sume Mawu ɔ bɔni bɔmi. Pee se ɔ, níhi nɛ i kase ngɛ Baiblo ɔ mi ɔ ha nɛ ye he nile bɔni mi haomi nɛ i pee tsakemihi.

Lɔ ɔ se ɔ, i hia kɛ ho Oshawa ya ngɛ Ontario. Lejɛ ɔ nɛ i kɛ Nyɛminyumu Ray Norman kɛ Lesli kɛ blɔ gbali komɛ ya kpe ngɛ. Mɛ tsuo a bua jɔ ye he wawɛɛ. Benɛ i na bɔ nɛ a ngɛ bua jɔmi ha a, e wo mi he wami nɛ i susu otihi nɛ i kɛ ma ye hɛ mi ɔ he ekohu. A wo mi he wami kaa ma je blɔ gbami ní tsumi ɔ sisi, nɛ i pee jã ngɛ September 1966 mi. Ye bua jɔ wawɛɛ nɛ níhi ya nɔ ha mi saminya. Se pee se ɔ, ní komɛ ha nɛ ye si himi tsake.

Benɛ i ngɛ nɔ tsami sukuu yae ɔ, i ngma Betel blɔ bimi womi ɔ nɔ ní ngɛ Toronto ngɛ Canada. Lɔ ɔ se benɛ i ngɛ blɔ gbami ní tsumi ɔ tsue ɔ, a fɔ mi nine kaa ma ya sɔmɔ jeha eywiɛ ngɛ Betel. Se ye bua jɔ Lesli he wawɛɛ, nɛ i ye gbeye kaa ke i kplɛɛ nine fɔmi nɛ ɔ nɔ ɔ, i be lɛ nae hu. I sɔle wawɛɛ be kɛkɛɛ,  nɛ i mwɔ ye yi mi kpɔ kaa ma ya sɔmɔ ngɛ Betel. Se e dɔ mi kaa i ngɛ Lesli he jee.

I ya tsu ní ngɛ Betel ngɛ he nɛ a fɔɔ níhi a he nɛ a toɔ níhi a nɔ ngɛ ɔ, nɛ pee se ɔ, i tsu ní kaa womi ngmalɔ hulɔ. Ngɛ jamɛ a be ɔ mi nɔuu ɔ, Lesli ngɛ sɔmɔe kaa blɔ gbalɔ klɛdɛɛ ngɛ Gatineau ngɛ Quebec. I pɔɔ e he susumi, nɛ be komɛ ɔ, i suɔ nɛ ma le nɔ́ nɛ e ngɛ pee, nɛ i biɔ ye he ke ji yi mi kpɔ nɛ i mwɔ ɔ da lo. Ligbi ko ɔ, nɔ́ ko ya nɔ nɛ e pee mi nyakpɛ wawɛɛ. A fɔ Lesli nyɛminyumu Ray nine kɛ ba Betel nɛ a ha nɛ i kɛ lɛ hi tsu kake mi. Lɔ ɔ ha nɛ i kɛ Lesli bɔni ní sɛɛmi ekohu. Benɛ jeha eywiɛ nɛ a ha mi kaa ma kɛ sɔmɔ ngɛ Betel ɔ ba nyagbe ɔ, jamɛ a ligbi ɔ nɔ nɔuu nɛ i kɛ Lesli sɛ gba si himi ngɛ February 27, 1971.

A ha nɛ i kɛ Lesli ya sɔmɔ ngɛ asafo ko mi ngɛ Quebec, nɛ gbi nɛ a tuɔ ji French. Jeha komɛ a se ɔ, e pee mi nyakpɛ kaa a ha nɛ i ya sɔmɔ kaa kpɔ mi nɔ hyɛlɔ be mi nɛ i ye jeha 28 pɛ. I nu he kaa i wɛ, nɛ ye he sui kɛ ha ní tsumi ɔ. Se munyu nɛ ngɛ Yeremia 1:7, 8 ɔ wo mi he wami. Akɛnɛ Lesli ná lɔle oslaa komɛ hyɛ he je ɔ, e nyɛ we mahe hwɔmi. Lɔ ɔ kɛ wa ma plɛ kɛ tsu kpɔ mi nɔ hyɛmi ní tsumi ɔ kɛɛ? Se ngɛ lɔ ɔ tsuo se ɔ, Lesli de ke, “Ke Yehowa ha wɔ ní tsumi ko ɔ, anɛ e sɛ nɛ waa bɔ mɔde nɛ wa tsu lo?” Wa kplɛɛ ní tsumi nɛ ɔ nɔ, nɛ waa kɛ bua jɔmi tsu ní tsumi nɛ ɔ jeha 17 sɔuu.

Benɛ i ji kpɔ mi nɔ hyɛlɔ ɔ, i ná we deka kulaa nɛ i ná we be fuu kɛ ha Lesli. Be ko ɔ, i ba kase nɔ́ kpa ko ngɛ ye si himi mi. Hɔɛgbi mɔtu mla ko ɔ, nɔ ko ba si wa sinya a. Benɛ wa ya hyɛ ɔ, nɔ ko nɔ ko be sinya a nya, se wa ya na kusii kɛ okplɔɔ nɔ hami nɔ́, tso yiblii, cheese, bloodo, wai kɛ he glass, kɛ kaadi ko nɛ a ngma ngɛ nɔ ke, “Ngɔɔ o yo ɔ kɛ je kpo.” Jamɛ a ligbi ɔ, je mi tsɔ saminya. Se i de Lesli ke i ngɛ magbɛ nɔ munyu ko nɛ ma tu, nɛ e sa nɛ ma dla ye, lɔ ɔ he ɔ, wa be nyɛe maa je kpo. E nu sisi mohu lɛɛ se e bua jɔɛ. Benɛ i ya hi si nɛ ma kase ní ɔ, ye he nile bɔni mi haomi, nɛ i susu Efeso Bi 5:25, 28 ɔ he, nɛ i na kaa Yehowa ngɛ ngmami nɛ ɔ nɔ gue kɛ ngɛ mi dee ke ma susu ye yo ɔ he. Benɛ i sɔle se ɔ, i de Lesli ke, “Waa ho,” nɛ e bua jɔ wawɛɛ. Wa hi wa lɔle ɔ mi kɛ ya he ko nɛ ngɛ fɛu ngɛ pa ko he, nɛ wa ngmɛ okplɔɔ nɔ hami nɔ́ ɔ ngɛ zugba, nɛ wa je wa hɛja wawɛɛ nitsɛ. Nɛ loloolo ɔ, i ná be kɛ dla ye he kɛ ha ye magbɛ nɔ munyu ɔ.

Wa ná bua jɔmi wawɛɛ ngɛ kpɔ mi nɔ hyɛmi ní tsumi ɔ mi, nɛ wa sɔmɔ asafohi fuu, kɛ je British Columbia kɛ ya si Newfoundland. Amlɔ nɛ ɔ, i hiaa blɔ wawɛɛ kaa bɔ nɛ i suɔ kaa maa pee benɛ i ji jokuɛ ɔ. E ngɛ mi kaa i suɔ nɛ ma ya Gilead Sukuu ɔ eko mohu lɛɛ, se ye bua jɔɛ he kaa ma pee ma se sane kpakpa fiɛɛlɔ. I nu he kaa nihi nɛ a ji ma se sane kpakpa fiɛɛli ngɛ slɔɔto kulaa, nɛ i be nyɛe ma tsu eko. Jehanɛ hu ɔ, i ye gbeye kaa ke i ya sukuu ɔ eko ɔ, a ma ha nɛ ma ya sɔmɔ ngɛ Afrika, he nɛ ta kɛ hiɔ pɔ he ngɛ ɔ. Ye bua jɔ he nɛ i ngɛ ɔ he.

Ngɛ jeha 1992 ɔ mi ɔ, Yehowa Odasefohi bɔni fiɛɛmi faa ekohu ngɛ ma komɛ nɛ jinɛ be ko nɛ be ɔ, a ngɛ Soviet Union nɔ yemi ɔ sisi ɔ. Lɔ ɔ he ɔ, nyɛmimɛ ɔmɛ bi wɔ kaa wa maa suɔ nɛ wa ya sɔmɔ kaa ma se sane kpakpa fiɛɛli ngɛ Estonia lo. E pee wɔ nyakpɛ wawɛɛ, se wa sɔle ngɛ he. Si kake ekohu ɔ, wa bi wa he ke, ‘Ke Yehowa ha wɔ ní tsumi ko ɔ, anɛ e sɛ nɛ waa bɔ mɔde kaa wa ma tsu lo?’ Wa kplɛɛ nɔ, nɛ ye bua jɔ kaa pi Afrika nɛ a de wɔ ke waa ya.

Amlɔ nɔuu nɛ wa bɔni Estonia gbi ɔ kasemi. Nyɔhiɔ bɔɔ komɛ a se ɔ, a ha nɛ wa tsu kpɔ mi nɔ hyɛmi ní tsumi ɔ ngɛ lejɛ ɔ. A ha nɛ wa ya sɔmɔ asafohi 46 kɛ kuhi etɛ ngɛ Baltic ma komɛ a nɔ. Wa ya sɔmɔ ngɛ Kaliningrad ngɛ Russia hulɔ. Lɔ ɔ tsɔɔ kaa e sa nɛ waa kase Latvia, Lithuania kɛ Russia gbi ɔ. Wa nɛ lɛ gbɔjɔɔ kulaa, se kɛ̃ ɔ, nyɛmimɛ ɔmɛ a bua jɔ wa mɔde bɔmi ɔ he wawɛɛ nɛ a ye bua wɔ. Ngɛ jeha 1999 ɔ mi ɔ, a ná asafo ní tsumi kɔni ngɛ Estonia. Nɛ a ha nɛ i ya sɔmɔ kaa Asafo ɔ Ní Tsumi Kɔni Ajla Toli ɔmɛ a kpɛti nɔ kake ngɛ lejɛ ɔ. I kɛ Nyɛminyumu Toomas Edur, kɛ Nyɛminyumu Lembit Reile, kɛ Nyɛminyumu Tommi Kauko lɛ sɔmɔ kaa Asafo ɔ Ní Tsumi Kɔni Ajla Toli.

Wa ba le Odasefohi fuu nɛ a je mɛ we kɛ ho Siberia ya be ko nɛ be ɔ. E ngɛ mi kaa a wa nyɛmimɛ nɛ ɔmɛ yi mi nɛ a je mɛ kɛ je a weku li a he mohu lɛɛ, se a kɔni mi jɔ̃ we. A ya nɔ nɛ a kɛ kã kɛ bua jɔmi tsu fiɛɛmi ní tsumi ɔ. Enɛ ɔ ha nɛ wa na kaa wɔ hu wa ma nyɛ ma fĩ si, nɛ waa kɛ bua jɔmi ma nyɛ ma sɔmɔ Yehowa ngɛ si fɔfɔɛhi nɛ a mi wa po mi.

Wa tsu ní wawɛɛ jeha babauu, nɛ wa ná we be fuu nɛ waa kɛ maa jɔɔ wa he, lɔ ɔ he ɔ, Lesli bɔni pɔtɔtɔɛ he numi wawɛɛ. Sisije ɔ, wa yɔse we kaa hiɔ ko nɛ a tsɛɛ lɛ ke fibromyalgia a lɛ ngɛ Lesli haoe, nɛ lɔ ɔ he je nɛ e nuɔ pɔtɔtɔɛ he ɔ nɛ. Lɔ ɔ he ɔ, wa mwɔ wa yi mi kpɔ kaa wa maa kpale kɛ ho Canada ya. Benɛ a fɔ wɔ nine kaa waa ya sukuu kɛ ha Asafo ɔ Ní Tsumi Kɔni Ajla Toli Kɛ A Yihi ngɛ Patterson ngɛ New York, U.S.A. ɔ, i nu he kaa wa be nyɛe maa ya. Se benɛ wa sɔle wawɛɛ se ɔ, wa kplɛɛ nine fɔmi ɔ nɔ. Yehowa jɔɔ yi mi kpɔ nɛ wa mwɔ ɔ nɔ. Nɛ be mi nɛ wa ngɛ sukuu nɛ ɔ yae ɔ, jamɛ a be ɔ mi nɛ a ná Lesli hiɔ ɔ nya tsaba. Bɔɔbɔɔbɔɔ ɔ, wa bɔni níhi nɛ wa peeɔ daa a peemi ekohu.

Ngɛ jeha 2008 ɔ mi benɛ wa ngɛ Estonia a, gbɔkuɛ ko ɔ, a fia mi kɛ je asafo ɔ ní tsumi yi ɔ nɛ a de mi ke a kɛ ní tsumi ehe ko maa wo wa dɛ ngɛ Congo, lɔ ɔ wa maa suɔ lo? I hyɛ we blɔ kulaa, nɛ e sa nɛ ma ha mɛ heto e nɔ jena. I de we Lesli jamɛ a gbɔkuɛ ɔ, ejakaa i le kaa ke e nu ɔ, e be nyɛe maa hwɔ mahe. Se imi mohu nɛ i nyɛ we nɛ ma hwɔ mahe. I sɔle wawɛɛ kɛ ha Yehowa ngɛ nyagba nɛ i ngɛ ngɛ Afrika he ɔ he.

E nɔ jena a, i kɛ Lesli sɛɛ he ní nɛ wa de wa he ke: “Yehowa ngɛ wɔ nine fɔe kɛ ya Afrika. Mɛni tsɔɔ kaa Yehowa be nyɛe maa ye bua wɔ nɛ wa tsu ní tsumi nɛ ɔ nɛ wa bua nɛ jɔ? E sa nɛ waa ka nɛ waa hyɛ.” Lɔ ɔ he ɔ, benɛ waa kɛ jeha 16 sɔmɔ ngɛ Estonia a, wa hia kɛ ho Kinshasa ya ngɛ Congo. Abɔɔ ko nɛ ngɛ fɛu ngɛ asafo ní tsumi kɔni nɛ ɔ, nɛ lejɛ ɔ hu  jɔ dii. Benɛ wa ya su lejɛ ɔ, níhi nɛ Lesli kɛ dla tsu ɔ mi kekleekle ɔ a kpɛti kake ji kaadi ko nɛ waa kɛ je Canada tɔɔ. A ngma ngɛ kaadi ɔ nɔ ke, “O bua nɛ jɔ ngɛ he fɛɛ he nɛ o ngɛ.” Benɛ waa kɛ nyɛmimɛ ɔmɛ kpe, nɛ waa kɛ ni komɛ kase Baiblo ɔ se ɔ, wa na bɔ nɛ ma se sane kpakpa fiɛɛmi ní tsumi ɔ maa hi bua jɔmi ha, nɛ wa tsui nɔ wa mi wawɛɛ. Pee se ɔ, a ha nɛ wa ya slaa asafo ní tsumi kɔni kakaaka 13 ngɛ Afrika ma komɛ a nɔ. Lɔ ɔ ha nɛ wa kase níhi fuu kɛ je nihi slɔɔtoslɔɔtohi nɛ a he ngɛ bua jɔmi ɔ a ngɔ. E ngɛ mi kaa sisije ɔ, i ye gbeye kaa ma ya Afrika mohu lɛɛ, se amlɔ nɛ ɔ, i yi gbeye hu. Wa bua jɔ kaa Yehowa ha nɛ wa ya sɔmɔ ngɛ Afrika.

Ngɛ Congo ɔ, wa kase niye ní ehe komɛ yemi. Eko ji lohwe tsɔwitsɔwihi. Sisije ɔ, i susu kaa wa be nyɛe maa ye níhi kaa jã. Se benɛ wa na kaa wa nyɛmimɛ ɔmɛ kɛ bua jɔmi ngɛ niye ní nɛ ɔmɛ yee ɔ, wa bɔ mɔde kaa wa maa ka nɛ waa hyɛ. Nɛ wa bua jɔ kaa wa pee jã.

Wa hia blɔ kɛ ho ma a puje he ya, nɛ wa ya wo nyɛmimɛ ɔmɛ he wami nɛ wa ha mɛ níhi nɛ a hia. Atuã tsɔli komɛ baa ma a mi nɛ a ba yeɔ yihi kɛ jokuɛwi awi. Jehanɛ se hu ɔ, nyɛmimɛ fuu be he lo nya níhi tsɔ ngɛ lejɛ ɔ. Se kɛ̃ ɔ, hɛ kɛ nɔ fɔmi nɛ a ngɛ ngɛ gbogboehi a si tlemi ɔ mi, kɛ suɔmi nɛ a ngɛ kɛ ha Yehowa a mi wa wawɛɛ. Jehanɛ hu ɔ, a yeɔ Yehowa asafo ɔ anɔkuale, nɛ enɛ ɔ ta wa tsui he wawɛɛ. A nɔ hyɛmi nɔ́ ɔ ha nɛ wa susu nɔ́ he je nɛ wa ngɛ Yehowa sɔmɔe ɔ he, nɛ e wo hemi kɛ yemi nɛ wa ngɛ ngɛ Yehowa mi ɔ mi he wami wawɛɛ. Nyɛmimɛ ɔmɛ ekomɛ po ngɛ nɛ a wehi kɛ a ngmɔ ní bɔ mɛ. Enɛ ɔ ha nɛ i ba na kaa he lo nya níhi ma nyɛ maa je wa dɛ ngɛ hɛngmɛfia mi. Wa ba na kaa huɛ bɔmi nɛ maa hi waa kɛ Yehowa wa kpɛti ɔ ji nɔ́ nɛ he hia pe kulaa. E ngɛ mi kaa níhi a mi wa ngɛ ma nɛ ɔ mi mohu lɛɛ, se nyɛmimɛ ɔmɛ tui níhi a he munyu nyanyaanya. Su nɛ ɔ nɛ nyɛmimɛ ɔmɛ je kpo ɔ ha nɛ wa na kaa e sa nɛ waa kɛ kã nɛ da haomihi kɛ si fɔfɔɛ kpahi a nya.

A kpale ha wɔ ní tsumi kpa ko nɛ wa hyɛ we blɔ. A de wɔ kaa wa ya sɔmɔ ngɛ Hong Kong asafo ɔ ní tsumi kɔni ɔ. Wa susuu we he gblee kaa be ko maa ba nɛ wa ma ya hi Asia! Se akɛnɛ Yehowa ye bua wɔ kɛ tsu ní tsumihi tsuo nɛ a kɛ wo wa dɛ he je ɔ, enɛ ɔ wo wɔ he wami nɛ wa kplɛɛ ní tsumi ehe nɛ ɔ nɔ. Ngɛ jeha 2013 ɔ mi ɔ, wa je wa huɛmɛ nɛ wa suɔ mɛ  wawɛɛ kɛ afɛu níhi nɛ ngɛ Afrika a he. Nɔ́ nɛ ɔ dɔ wɔ wawɛɛ ejakaa wa li nɔ́ nɛ maa ya nɔ ngɛ Asia.

E ma bi nɛ waa pee tsakemi nguahi loko wa ma nyɛ maa hi Hong Kong, ejakaa nihi hiɛ ngɛ lejɛ ɔ wawɛɛ, nɛ a je he slɔɔtoslɔɔtohi. E he wa ha wɔ wawɛɛ kaa wa maa kase Chinese. Se nyɛmimɛ ɔmɛ he wɔ atuu nɛ wa bua jɔ a niye ní ɔmɛ a he. Ní tsumi nɛ a tsuɔ ngɛ asafo ɔ ní tsumi kɔni ɔ yi ngɛ blie, nɛ asafo ɔ hia he ko nɛ kle. Ngɛ jamɛ a be ɔ mi nɔuu ɔ, tsu he jua bɔni wami ngɛ ma a mi. Enɛ ɔ he ɔ, Blɔ Tsɔɔmi Ajla Toli ɔmɛ kɛ nile ma nya si kaa a hla he kpa konɛ a jua asafo ɔ ní tsumi kɔni ɔ tsu ɔmɛ ekomɛ. Be bɔɔ se ngɛ jeha 2015 ɔ mi ɔ, a ha nɛ wa ya tsa wa sɔmɔmi ɔ nɔ ngɛ South Korea. Ngɛ lejɛ ɔ hu ɔ, e he wa ha wɔ kaa waa maa kase gbi nɛ a tuɔ ngɛ ma a mi ɔ. E ngɛ mi kaa wa nyɛ we Korea gbi ɔ tumi kpakpa ko mohu lɛɛ, se nyɛmimɛ ɔmɛ woɔ wɔ he wami nɛ a deɔ wɔ ke wa ngɛ mɔde bɔe wawɛɛ kɛ ngɛ gbi ɔ kasee.

Ke nubwɔ ji mo ngɛ he ko ɔ, e be gbɔjɔɔ kaa o ma ná huɛmɛ ehehi. Se wa ba na kaa ke wa fɔ nihi nine nɛ a ba slaa wɔ ɔ, e yeɔ bua wawɛɛ. Jã nɛ wa pee ɔ ha nɛ wa ná huɛmɛ amlɔ nɔuu. Wa ba na kaa e ngɛ mi kaa wɔ tsuo wa je he slɔɔtoslɔɔtohi mohu lɛɛ, se wa ji nimli kake. Jehanɛ hu ɔ, wa ba na kaa Yehowa bɔ wɔ nɛ́ wa bli wa tsui mi gbajaa nɛ wa je suɔmi kpo kɛ tsɔɔ nihi babauu.—2 Kor. 6:11.

Wa ba na hu kaa e sa nɛ waa na nihi kaa bɔ nɛ Yehowa naa mɛ ɔ, nɛ́ wa hla odasehi nɛ tsɔɔ kaa Yehowa suɔ wɔ nɛ e ngɛ wɔ blɔ tsɔɔe. Be fɛɛ be nɛ wa kɔni mi ma jɔ̃ loo wa maa nu he kaa wa nyɛmimɛ ɔmɛ a bua jɔɛ wa he ɔ, wa kpaleɔ kaneɔ sɛ womihi loo he wami womi munyu kpitikpitihi nɛ wa huɛmɛ ɔmɛ ngma kɛ ha wɔ ɔ. Ngɛ anɔkuale mi ɔ, Yehowa ha wa sɔlemihi a heto. E ha nɛ wa na kaa e suɔ wɔ, nɛ e wo wɔ he wami konɛ wa nyɛ nɛ wa tsu ní tsumi nɛ e kɛ wo wa dɛ ɔ.

Ngɛ jehahi nɛ be ɔ mi ɔ, i kɛ Lesli wa na kaa ke wa be deka po ɔ, e he hia nɛ wa ná be kɛ ha wa sibi. Wa na hu kaa ke wa tɔ̃ nɛ wa mwɔ wa sibi ɔ, e yeɔ bua wɔ, titli ɔ, ke wa ngɛ gbi ehe ko kasee. Daa gbɔkuɛ ɔ, wa bɔɔ mɔde kaa wa ma susu níhi nɛ wa bua jɔ he ngɛ ligbi ɔ mi ɔ he konɛ waa na Yehowa si ngɛ he.

Ngɛ anɔkuale mi ɔ, i he we yi gblee kaa ma nyɛ ma ba pee ma se sane kpakpa fiɛɛlɔ aloo ma ya hi ma kpahi a nɔ. Se níhi a si kpami nɛ i ná a ha nɛ i na kaa kɛ gu Yehowa yemi kɛ buami nɔ ɔ, wa ma nyɛ maa pee nɔ́ fɛɛ nɔ́. I kaiɔ munyu nɛ gbalɔ Yeremia tu ɔ. E de ke: ‘Yehowa, o sisi mi pɛ.’ (Yer. 20:7) Ngɛ anɔkuale mi ɔ, ní tsumihi babauu nɛ a kɛ wo wa dɛ nɛ wa hyɛ we blɔ, kɛ jɔɔmihi fuu nɛ wa ná a tsuo je Yehowa ngɔ. Yehowa ha nɛ oti nɛ i kɛ ma ye hɛ mi kaa ma hi ɛloplee mi kɛ hia blɔ ɔ ba mi niinɛ. Wa hi ɛloplee mi kɛ hia blɔ kɛ ya hehi fuu pe bɔ nɛ i susu kaa ma pee benɛ i ji jokuɛ ɔ po, nɛ wa ya slaa asafo ní tsumi kɔnihi ngɛ mahi fuu a nɔ. Ye bua jɔ wawɛɛ kaa Lesli fĩ ye se ngɛ ní tsumi slɔɔtohi tsuo nɛ a kɛ wo wa dɛ ɔ mi.

Wa kaiɔ be fɛɛ be kaa suɔmi nɛ wa ngɛ kɛ ha Yehowa a he je nɛ wa peeɔ ní nɛ ɔmɛ tsuo ɔ nɛ. Jɔɔmihi nɛ wa ngɛ náe mwɔnɛ ɔ ha nɛ wa na kaa ke e su be nɛ adesahi maa hi si kɛ ya neneene ɔ, wa bua maa jɔ wawɛɛ, ejakaa Yehowa ma bli e dɛ mi nɛ e ma ha nɛ ‘nɔ́ tsuaa nɔ́ nɛ ngɛ hɛ ngmengmle ɔ maa tɔ.’—La 145:16.