1. Mɛni e sa nɛ waa pee konɛ wa ná yi baami ngɛ Yehowa ligbi ɔ nɔ?

 KE BAIBLO ɔ tu “Yehowa ligbi ɔ” he munyu ɔ, e tsɔɔ be nɛ Yehowa maa kojo e he nyɛli ɔmɛ, nɛ e ma he e we bi a yi wami. Ngɛ blema a, Yehowa gbla ma komɛ a tue. (Yes. 13:1, 6; Eze. 13:5; Zef. 1:8) Ngɛ wa be nɛ ɔ mi ɔ, “Yehowa ligbi ɔ” maa je sisi ke a tua Babilon Ngua a, nɛ e maa ba nyagbe ngɛ Harmagedon ta a mi. Loko wa yi ma ná wami ngɛ jamɛ a “ligbi ɔ” nɔ ɔ, e sa nɛ wa dla wa he kɛ to amlɔ nɛ ɔ. Yesu tsɔɔ kaa e sa nɛ waa pee klaalo kɛ ha “amanehlu ngua” a.—Mat. 24:21; Luka 12:40.

2. Mɛni he je nɛ wa ma nyɛ ma ná Tɛsalonika Bi a kekleekle womi ɔ he se?

² Ngɛ kekleekle sɛ womi nɛ bɔfo Paulo ngma kɛ ya ha Tɛsalonika bi ɔmɛ ɔ mi ɔ, e ngɔ nɔ́ he tomi níhi fuu kɛ tsu ní konɛ e kɛ ye bua Kristofo ɔmɛ nɛ a pee klaalo kɛ ha Yehowa kojomi ligbi ngua a. Paulo le kaa Yehowa ligbi ɔ be bae nɔuu ngɛ jamɛ a be ɔ mi. (2 Tɛs. 2:1-3) Se loloolo ɔ, e wo nyɛmimɛ ɔmɛ he wami kaa a dla a he kɛ ha jamɛ a ligbi ɔ kaa nɔ́ nɛ e nɔ jena pɛ nɛ e maa ba. Wɔ hu ma nyɛ maa ngɔ ga womi nɛ ɔ kɛ tsu ní. Nyɛ ha nɛ wa susu bɔ nɛ bɔfo Paulo tsɔɔ níhi nɛ nyɛɛ se nɛ ɔmɛ a mi ha a he: (1) bɔ nɛ Yehowa ligbi ɔ ma plɛ kɛ ba ha, (2) ni nɛmɛ nɛ a ma kpata a hɛ mi ngɛ Yehowa ligbi ɔ nɔ, kɛ (3) bɔ nɛ wa ma plɛ kɛ dla wa he konɛ wa yi nɛ ná wami.

3. Ngɛ mɛni blɔ nɔ nɛ Yehowa ligbi ɔ maa ba kaa bɔ nɛ julɔ baa nyɔ mi ɔ? (Hyɛ foni ɔ hulɔ.)

³ E maa ba “kaa bɔ nɛ julɔ baa nyɔ mi ɔ.” (1 Tɛs. 5:2) Nɔ́ he tomi níhi etɛ nɛ a kɛ tsu ní kɛ kɔ Yehowa ligbi ɔ he ɔ a kpɛti kekleekle nɔ́ ji nɛ ɔ nɛ. Juli a he sɔɔ wawɛɛ nɛ a baa nyɔ mi be mi nɛ nɔ ko hyɛ we mɛ blɔ. Jã nɔuu kɛ̃ nɛ Yehowa ligbi ɔ hu maa ba tlukaa, nɛ e ma ti nihi babauu si. Anɔkuale Kristofohi po a  nya maa kpɛ a he ngɛ bɔ nɛ níhi maa ya mlamlaamla ha a he. A ma kpata yiwutsotsɛmɛ a hɛ mi, se wɔɔ lɛɛ a ma he wa yi wami.

4. Mɛni blɔ nɔ nɛ Yehowa ligbi ɔ ngɛ kaa bɔ nɛ yohɔyo nuɔ kɔɔmi ɔ?

⁴ E maa ba “kaa bɔ nɛ yohɔyo nuɔ kɔɔmi ɔ.” (1 Tɛs. 5:3) Ke e piɛ bɔɔ nɛ yohɔyo ko ma fɔ ɔ, e be nyɛe maa le be tutuutu nɛ e maa nu kɔɔmi. Se e le kaa be ko maa ba nɛ e maa nu kɔɔmi kɛ̃. E ngɛ heii kaa ke jamɛ a be ɔ su ɔ, e maa nu kɔɔmi tlukaa nɛ e maa ye lɛ nɛ e nya be hie tsimi. Jã kɛ̃ nɛ wɔ hu wa li ligbi kɛ ngmlɛfia nɛ Yehowa ligbi ɔ maa je sisi. Se wa ngɛ nɔ mi mami kaa Yehowa ligbi ɔ maa ba tlukaa, nɛ a maa kojo nimli yayami ɔmɛ nɛ a be a he yee.

5. Mɛni blɔ nɔ nɛ a ma nyɛ maa ngɔ amanehlu ngua a kɛ to makɛ he?

⁵ A ngɔ Yehowa ligbi ɔ kɛ to makɛ he. Ngɛ Paulo nɔ́ he tomi nɔ́ etɛne nɛ e kɛ tsu ní ɔ mi ɔ, e kpale wo juli nɛ a juɔ nyɔ mi ɔ a ta. Se jehanɛ ɔ lɛɛ, Paulo ngɔ e juɛmi kɛ ma nɔ́ kpa ko nɔ. E ngɔ Yehowa ligbi ɔ kɛ to makɛ he. (1 Tɛs. 5:4) Ke juli yaa ju ɔ, be komɛ ɔ, a ngɔɔ a juɛmi kɛ maa níhi fuu nɛ a maa ju ɔ nɔ, nɛ a yɔse we kaa je ngɛ nae. Ke a ji mla nɛ je na mɛ ɔ, nihi ma nyɛ maa na mɛ. Jã kɛ̃ nɛ amanehlu ngua a ma kpa nihi nɛ a ngɛ kaa juli nɛ a peeɔ níhi ngɛ diblii mi ɔ a he bo, ejakaa a ní peepee sɛ Mawu hɛ mi. Wa pee we wa ní kaa mɛ, mohu ɔ, wa peeɔ klaalo nɛ wa yuɔ wa he ngɛ níhi nɛ sɛ Yehowa hɛ mi ɔ he, nɛ wa diɔ “kpakpa peemi slɔɔtohi tsuo kɛ dami kɛ anɔkuale” yemi se. (Efe. 5:8-12) Lɔ ɔ se ɔ, Paulo ngɔ nɔ́ he tomi níhi enyɔ kɛ tsu ní kɛ kale nihi nɛ a ma kpata a hɛ mi ɔ.

6. Ngɛ mɛni blɔ nɔ nɛ nihi fuu hwɔ mahe? (1 Tɛsalonika Bi 5:6, 7)

⁶ “Ni nɛmɛ nɛ a hwɔɔ mahe ɔ.” (Kane 1 Tɛsalonika Bi 5:6, 7.) Paulo ngɔ nihi nɛ a be a yi  wami hee ngɛ Yehowa ligbi ɔ nɔ ɔ kɛ to nihi nɛ a hwɔ mahe ɔ a he. Nihi nɛ a hwɔ mahe ɔ li nɔ́ nɛ ngɛ nɔ yae, nɛ a li kaa be hu ngɛ yae. Enɛ ɔ he ɔ, ke nɔ́ ko nɛ sa kadimi ngɛ nɔ yae ɔ, a be lee nɛ a be nyɛe maa ngɔ a he kɛ wo mi hulɔ. Mwɔnɛ ɔ, nihi fuu hwɔ mahe ngɛ mumi mi. (Rom. 11:8) A li kaa wa ngɛ “nyagbe ligbi ɔmɛ” a mi, nɛ e be kɛe nɛ amanehlu ngua a hu maa ba. Ke nihi na kaa tsakemi nguahi ngɛ nɔ yae ngɛ je ɔ mi ɔ, a ti ni komɛ a bua jɔɔ Matsɛ Yemi ɔ he sɛ gbi nɛ wa ngɛ fiɛɛe ɔ he. Se ngɛ enɛ ɔ tsuo se ɔ, nihi fuu hwɔɔ mahe ngɛ mumi mi ekohu nɛ a pee we klaalo. Ni komɛ po he ye kaa Mawu maa kojo adesahi ligbi ko, se a susu kaa e be bae piɔ. (2 Pet. 3:3, 4) Se wɔɔ lɛɛ wa le kaa e he hia nɛ waa ya nɔ nɛ waa hwɔɔ daa ligbi.

7. Mɛni blɔ nɔ nɛ nihi nɛ Mawu ma kpata a hɛ mi ɔ ngɛ kaa nihi nɛ a de dã a?

⁷ “Ni nɛmɛ nɛ a deɔ dã.” Bɔfo Paulo ngɔ nihi nɛ Mawu ma kpata a hɛ mi ɔ kɛ to nihi nɛ a de dã a he. Nihi nɛ a de dã li nɔ́ tutuutu nɛ ngɛ nɔ yae ngɛ he nɛ a ngɛ ɔ, nɛ a mwɔɔ yi mi kpɔhi nɛ dɛ. Jã kɛ̃ nɛ yiwutsotsɛmɛ hu bui Mawu kɔkɔ bɔmi ɔmɛ tue. A peeɔ níhi nɛ kɛ nɔ yaa hɛ mi kpatami mi. Se a wo Kristofohi he wami kaa a hɛ nɛ hi a he nɔ, nɛ a susu níhi a he saminya. (1 Tɛs. 5:6) Baiblo he ní lelɔ ko tsɔɔ kaa “nɔ nɛ susuɔ níhi a he ɔ peeɔ kpoo nɛ e yi gbeye, nɛ e nyɛɔ nɛ e mwɔɔ yi mi kpɔhi nɛ a da.” Mɛni he je nɛ e sa nɛ waa pee kpoo nɛ wa hɛ nɛ hi wa he nɔ ɔ? Ejakaa wa sume nɛ waa ngɔ wa he kɛ wo ma kudɔmi sanehi kɛ ní kpahi nɛ ngɛ nɔ yae ngɛ je ɔ mi ɔ a mi. Be mi nɛ Yehowa ligbi ɔ ngɛ sue ɔ, nihi maa nyɛ wa nɔ konɛ waa ngɔ wa he kɛ wo níhi kaa jã a mi. Se loloolo ɔ, e sɛ nɛ waa ye gbeye ngɛ bɔ nɛ wa maa pee wa ní ha a he. Mawu mumi ɔ ma nyɛ maa ye bua wɔ konɛ waa pee kpoo, nɛ wa hɛ nɛ hi wa he nɔ, nɛ waa mwɔ yi mi kpɔhi nɛ da.—Luka 12:11, 12.

8. Mɛni nɛ 1 Tɛsalonika Bi 5:8 ɔ tsɔɔ kaa e sa nɛ waa pee konɛ wa nyɛ nɛ waa hwɔɔ nɛ wa hɛ nɛ hi wa he nɔ? (Hyɛ foni ɔ hulɔ.)

⁸ E sa nɛ ‘waa wo gugue nɔ dama a, kɛ dade pɛɛ ɔ.’ Paulo ngɔ wɔ kɛ to ta buli nɛ a dla a he nɛ a pee klaalo kɛ ha ta a he. (Kane 1 Tɛsalonika Bi 5:8.) Nihi hyɛɔ blɔ kaa e sa nɛ ta bulɔ nɛ pee klaalo kɛ ha ta be fɛɛ be. Jã nɛ e ji ngɛ wɔ hu wa blɔ fa mi. Ke wa wo suɔmi kɛ hemi kɛ yemi he gugue nɔ dama a, nɛ wa bu yi wami hemi he hɛ kɛ nɔ fɔmi nɛ ji dade pɛɛ ɔ, lɔ ɔ tsɔɔ kaa wa pee klaalo kɛ ha Yehowa ligbi ɔ. Ke wa pee jã a, wa ma ná he se.

9. Mɛni blɔ nɔ nɛ wa hemi kɛ yemi ɔ poɔ wa he piɛ?

⁹ Gugue nɔ dama poɔ ta bulɔ tsui he piɛ. Jã kɛ̃ nɛ hemi kɛ yemi kɛ suɔmi hu poɔ wa okadi peemi tsui ɔ he piɛ. Ní enyɔ nɛ ɔmɛ maa ye bua wɔ nɛ waa ya nɔ nɛ wa sɔmɔ Mawu nɛ waa nyɛɛ Yesu se. Hemi kɛ yemi haa nɛ wa náa nɔ mi mami kaa ke waa kɛ wa tsui tsuo hla Yehowa se blɔ ɔ, e maa jɔɔ wɔ. (Heb. 11:6) E maa ye bua wɔ nɛ wa maa ye Yesu nɛ ji wa Hɛ Mi Nyɛɛlɔ ɔ anɔkuale, ke lɔ ɔ ma ha nɛ waa kɛ kahi maa kpe po. Ke wa kase nyɛmimɛ nɛ a ngɛ mɛ yi mi wae, loo a kɛ sika he nyagba ngɛ kpee se a ngɛ Yehowa anɔkuale yee ɔ a he ní ɔ, wa hemi kɛ yemi ɔ mi maa wa, nɛ wa ma nyɛ maa da nyagbahi nɛ waa kɛ ngɛ kpee ɔ nya. Jehanɛ se hu ke wa kase nihi nɛ a pee a si himi kpokploo nɛ a ngɔ Matsɛ Yemi ɔ kɛ ye kekle blɔ he ngɛ a si himi mi ɔ, e maa ye bua wɔ konɛ wa ko di he lo nya níhi fuu a se. b

10. Mɛni blɔ nɔ nɛ suɔmi nɛ wa ngɛ ha Mawu kɛ nihi ɔ yeɔ bua wɔ nɛ wa fĩɔ si?

¹⁰ Suɔmi hu ji nɔ́ ko nɛ he hia wawɛɛ nɛ maa ye bua wɔ nɛ waa hwɔɔ nɛ wa hɛ nɛ hi wa he nɔ. (Mat. 22:37-39) Suɔmi nɛ wa ngɛ kɛ ha  Mawu ɔ yeɔ bua wɔ nɛ wa fĩɔ si ngɛ fiɛɛmi ní tsumi ɔ mi ngɛ haomi nɛ waa kɛ maa kpe ɔ tsuo se. (2 Tim. 1:7, 8) Akɛnɛ e he hia nɛ wa je suɔmi kpo kɛ tsɔɔ nihi nɛ a sɔmɔ we Yehowa a he je ɔ, wa yaa nɔ nɛ wa fiɛɛɔ ngɛ wa zugba kpɔ ɔ mi, nɛ wa yeɔ nihi odase kɛ guɔ tɛlifoo kɛ sɛ womi ngmami nɔ. Wa blɔ hyɛmi ji kaa ligbi ko ɔ, a ma tsake nɛ a ma ba pee nɔ́ nɛ da.—Eze. 18:27, 28.

11. Ke wa suɔ wa nyɛmimɛ Kristofohi ɔ, kɛ e maa ye bua wɔ ha kɛɛ? (1 Tɛsalonika Bi 5:11)

¹¹ Wa suɔ wa nyɛmimɛ ɔmɛ hulɔ. Wa ‘woɔ wa sibi he wami nɛ wa fiaa wa sibi kɛ maa si’ kɛ tsɔɔ kaa wa suɔ mɛ. (Kane 1 Tɛsalonika Bi 5:11.) Kaa bɔ nɛ ta buli yeɔ bua a sibi ngɛ ta mi ɔ, jã kɛ̃ nɛ wɔ hu wa woɔ wa sibi he wami. Be komɛ ɔ, ke a ngɛ ta hwue ɔ, e ma nyɛ maa ba kaa ta bulɔ ko maa plaa e nyɛmi ta bulɔ nɛ pi nɛ e je blɔ. Jã kɛ̃ nɛ wɔ hu wa be blɔ jee kaa wa maa pee wa nyɛmimɛ ɔmɛ nɔ́ ko nɛ maa dɔ mɛ, loo waa pee mɛ nɔ́ ko kɛ to nane mi ke a tɔ̃ wa nɔ. (1 Tɛs. 5:13, 15) Jehanɛ hu ɔ, wa jeɔ bumi kpo kɛ tsɔɔ nihi nɛ a ngɛ asafo ɔ hɛ mi nyɛɛe ɔ kɛ tsɔɔ kaa wa suɔ mɛ. (1 Tɛs. 5:12) Benɛ Paulo ngma sɛ womi nɛ ɔ kɛ ya ha asafo nɛ ngɛ Tɛsalonika a, jamɛ a be ɔ mi ɔ, asafo ɔ yi jeha kake lolo. Enɛ ɔ he ɔ, eko ɔ, asafo mi nikɔtɔma amɛ be níhi a si kpami tsɔ, nɛ e ma nyɛ maa ba kaa a tɔ̃ tɔmi komɛ. Se loloolo ɔ, asafo mi bi ɔmɛ je bumi kpo kɛ tsɔɔ mɛ. E be kɛe nɛ amanehlu ngua a maa ba, nɛ eko ɔ, asafo mi nikɔtɔma amɛ maa ngɔ blɔ tsɔɔmihi fuu kɛ ha wɔ ngɛ jamɛ a be ɔ mi pe bɔ nɛ a peeɔ mwɔnɛ ɔ po. Jamɛ a be ɔ mi ɔ, eko ɔ, wa nine be nyɛe maa su blɔ tsɔɔmi nɔ kɛ je asafo ɔ ní tsumi yi ɔ kɛ asafo ɔ ní tsumi kɔni ɔmɛ a ngɔ. Enɛ ɔ he ɔ, amlɔ nɛ ɔ ji be nɛ e hia nɛ waa suɔ asafo mi nikɔtɔma amɛ nɛ waa bu mɛ. Ngɛ si fɔfɔɛhi nɛ waa kɛ maa kpe ɔ tsuo se ɔ, e sa nɛ wa hɛ nɛ hi wa he nɔ. E sɛ nɛ waa ngɔ wa juɛmi kɛ ma mluku nɛ a yi ɔ nɔ. mohu ɔ, e sa nɛ e hi wa juɛmi mi kaa Yehowa guɔ Kristo nɔ kɛ tsɔɔ nyumu anɔkualetsɛmɛ nɛ ɔmɛ blɔ.

12. Mɛni blɔ nɔ nɛ wa hɛ kɛ nɔ fɔmi ɔ poɔ wa susumi he piɛ?

¹² Kaa bɔ nɛ dade pɛɛ buɔ ta bulɔ yi he konɛ  e ko plaa a, jã kɛ̃ nɛ wa yi wami hemi he hɛ kɛ nɔ fɔmi ɔ hu poɔ wa juɛmi he piɛ nɛ e yeɔ bua wɔ nɛ wa susuɔ níhi a he saminya. Wa ngɛ hɛ kɛ nɔ fɔmi nɛ mi wa, enɛ ɔ he ɔ, wa le kaa se nami be níhi nɛ a ngɛ je ɔ mi ɔ a he. (Filip. 3:8) Wa hɛ kɛ nɔ fɔmi ɔ yeɔ bua wɔ nɛ wa yaa nɔ nɛ wa peeɔ kpoo nɛ wa peeɔ klaalo. Wallace kɛ e yo Laurinda nɛ a ngɛ sɔmɔe ngɛ Afrika a na kaa munyu nɛ ɔ ji anɔkuale. Ngɛ otsi etɛ mi ɔ, a ti nɔ kake mami gbo, nɛ a ti nɔ kake hu papaa gbo. Se ngɛ COVID-19 hiɔ ɔ he je ɔ, a nyɛ we nɛ a ya slaa a weku li ɔmɛ. Wallace de ke: “Gbogboehi a si tlemi he hɛ kɛ nɔ fɔmi ɔ haa nɛ i susuɔ a he. I susuɔ bɔ nɛ a maa hi ha ke a tle mɛ si kɛ ba je ehe ɔ mi ɔ he, se pi bɔ nɛ a ngɛ ha loko a gbo ɔ. Enɛ ɔ yeɔ bua mi nɛ i peeɔ kpoo nɛ i yi aywilɛho tsɔ.”

13. Mɛni wa ma nyɛ maa pee konɛ Yehowa nɛ ha wɔ e mumi klɔuklɔu ɔ?

¹³ “Nyɛ ko gbe mumi ɔ la a.” (1 Tɛs. 5:19) Paulo ngɔ mumi klɔuklɔu ɔ kɛ to la ko nɛ ngɛ wa mi ɔ he. Ke Mawu ha wɔ mumi klɔuklɔu ɔ, e woɔ wɔ kã, nɛ e woɔ wɔ he wami nɛ wa peeɔ nɔ́ nɛ da, nɛ wa nyɛɔ nɛ wa tsuɔ ní ha Yehowa. (Rom. 12:11) Mɛni wa ma nyɛ maa pee konɛ Mawu nɛ e ha wɔ e mumi klɔuklɔu ɔ? E sa nɛ waa sɔle kɛ bi, nɛ waa kase Mawu Munyu ɔ, nɛ waa kɛ Yehowa asafo ɔ nɛ e mumi ɔ ngɛ lɛ kudɔe ɔ nɛ bɔ. Ke wa pee jã a, e maa ye bua wɔ nɛ wa ma je “mumi ɔ yiblii ɔ” kpo.—Gal. 5:22, 23.

14. Mɛni nɛ e sɛ kaa waa pee konɛ Mawu nɛ ha wɔ e mumi klɔuklɔu ɔ daa? (Hyɛ foni ɔ hulɔ.)

¹⁴ Ke Mawu ha wɔ e mumi klɔuklɔu ɔ, e sa nɛ waa hyɛ saminya nɛ wa “ko gbe mumi ɔ la a.” Mawu ngɔɔ e mumi klɔuklɔu ɔ kɛ haa nihi nɛ a susuɔ ní kpakpahi a he, nɛ a je mi bami he tsɔ ɔ pɛ. Ke wa susuɔ ní yayahi a he, nɛ wa peeɔ jamɛ a ní ɔmɛ ɔ, Yehowa ma je e mumi klɔuklɔu ɔ ngɛ wa nɔ. (1 Tɛs. 4:7, 8) Jehanɛ hu ɔ, e sɛ nɛ waa “gbe gbamihi a he guɛ” bɔ nɛ pee nɛ waa ya nɔ nɛ wa ná mumi klɔuklɔu ɔ. (1 Tɛs. 5:20) “Gbamihi” nɛ a kɛ tsu ní ngɛ hiɛ ɔ daa si kɛ ha sɛ gbihi nɛ Yehowa kɛ haa wɔ kɛ guɔ e mumi klɔuklɔu ɔ nɔ ɔ. Jehanɛ hu ɔ, e kɔɔ Yehowa ligbi ɔ he, kɛ bɔ nɛ e sa nɛ waa kɛ oya yemi nɛ tsu níhi a he ní ngɛ wa be nɛ ɔ mi ɔ he.  Wa susuu we kaa Yehowa ligbi ɔ loo Harmagedon be bae ngɛ wa be nɛ ɔ mi, mohu ɔ, waa kɛ wa ní peepee tsɔɔ kaa wa ngɛ jamɛ a ligbi ɔ blɔ hyɛe nɛ wa hɛ ngɛ nɔ. Enɛ ɔ he ɔ, waa kɛ wa he woɔ “Mawu jami mi ní peepeehi a mi” daa ligbi, nɛ wa haa nɛ wa je mi bami he tsɔɔ.—2 Pet. 3:11, 12.

15. Mɛni wa ma nyɛ maa pee konɛ lakpa munyuhi loo munyuhi nɛ a je daimoniohi a ngɔ ɔ nɛ ko ná wa nɔ he wami? (1 Tɛsalonika Bi 5:21)

¹⁵ Ngɛ be nɛ ma ngɛ wa hɛ mi ɔ mi ɔ, Mawu he nyɛli ma de ke: “Tue mi jɔmi kɛ slɔkee si himi ba!” (1 Tɛs. 5:3) Munyuhi nɛ je Daimoniohi a ngɔ ɔ ma hyi je ɔ mi tɔ, nɛ e maa sisi nihi babauu. (Kpoj. 16:13, 14) Se wɔ hu nɛɛ? Ke wa “ná níhi tsuo a nɔ mi mami” ɔ, jamɛ a munyu ɔ be wɔ sisie. (Kane 1 Tɛsalonika Bi 5:21.) A ngɔ Hela munyungu nɛ a tsɔɔ sisi ke “ná níhi tsuo a nɔ mi mami” ɔ kɛ kale bɔ nɛ nihi plɛɔ kɛ leɔ kaa adiagba ko nɛ he jua wa a ji sika tsu nitsɛnitsɛ loo sika hiɔ. Enɛ ɔ he ɔ, loko wa maa kane munyu ko loo waa maa bu nɔ́ ko tue ɔ, e sa nɛ wa ‘ná nɔ mi mami’ kaa e hi loo e hí. Enɛ ɔ ye bua Tɛsalonika bi ɔmɛ, nɛ e maa ye bua wɔ wawɛɛ hulɔ, ejakaa e be kɛe nɛ amanehlu ngua a maa ba. E sɛ nɛ wa he nɔ́ fɛɛ nɔ́ nɛ waa ye kɛkɛ, mohu ɔ, e sa nɛ waa ngɔ níhi nɛ wa kaneɔ loo wa nuɔ ɔ kɛ to nɔ́ nɛ Baiblo ɔ kɛ Yehowa asafo ɔ tsɔɔ he. Ke wa pee jã a, e be hae nɛ lakpa munyuhi nɛ a je daimoniohi a ngɔ ɔ nɛ ná wa nɔ he wami.—Abɛ 14:15; 1 Tim. 4:1.

16. Mɛ ni hɛ kɛ nɔ fɔmi nɛ wa ngɛ, nɛ mɛni wa fia wa pɛɛ si kaa wa maa pee?

¹⁶ Wa le kaa a maa baa Mawu we bi a yi ngɛ amanehlu ngua a mi. Kaa ni kakaakahi ɔ, wa li nɔ́ nɛ maa ba hwɔɔ se. (Yak. 4:14) Se ke wa ngɛ wami mi loko amanehlu ngua a ba jio, wa gbo loko e ba jio, wa ma ná neneene wami ke wa ye anɔkuale kɛ ya si nyagbe. Nihi nɛ a pɔ mɛ nu ɔ maa piɛɛ Kristo he kɛ ye matsɛ ngɛ hiɔwe. Jijɔ kpa amɛ hu maa hi paradeiso zugba a nɔ. Enɛ ɔ he ɔ, nyɛ ha nɛ wɔ tsuo waa ngɔ wa juɛmi kɛ ma wa hɛ kɛ nɔ fɔmi ɔ nɔ, nɛ waa pee klaalo kɛ ha Yehowa ligbi ɔ!