Baiblo ɔ tsɔɔ we nɔ́ he je. Se e tu ní komɛ nɛ a he hia a he munyu, nɛ eko ɔ, lɔ ɔ he je nɛ a ya nɔ nɛ a hi Betlehem ɔ nɛ.

Bɔfo ko de Maria ke e maa ngɔ hɔ nɛ e ma fɔ. Benɛ bɔfo ɔ ngɔ sɛ gbi nɛ ɔ kɛ ya ha Maria a, jamɛ a be ɔ mi ɔ, Maria kɛ Yosef ngɛ Nazaret ngɛ Galilea, nɛ ji ma nɛ Yosef je mi ɔ. (Luka 1:26-31; 2:4) Pee se nɛ a je Egipt ɔ, a kpale kɛ ho Nazaret ya. Lejɛ ɔ nɛ Yesu wa ngɛ, nɛ e ba pee Nazaret no. (Mat. 2:19-23) Enɛ ɔ he je nɛ Nazaret baa wa juɛmi mi ke wa ngɛ Yesu kɛ Yosef kɛ Maria a he munyu tue ɔ nɛ.

Maria ngɛ weku no ko nɛ a tsɛɛ lɛ ke Elizabet, nɛ e ngɛ Yuda. Elizabet huno ji osɔfo Zakaria. Jehanɛ hu ɔ, lɛ nɛ e fɔ Yohane Nɔ Baptisilɔ ɔ nɛ. (Luka 1:5, 9, 13, 36) Maria ya slaa Elizabet ngɛ Yuda, nɛ e hi e ngɔ nyɔhiɔ etɛ sɔuu. Lɔ ɔ se ɔ, Maria kpale kɛ ho Nazaret ya. (Luka 1:39, 40, 56) Enɛ ɔ ha nɛ Maria le Yuda kpɔ ɔ mi.

Be komɛ a se ɔ, a fã nihi kaa a “ya ngma a biɛ,” nɛ Yosef bu tue. Enɛ ɔ he ɔ, e hia blɔ kɛ je Nazaret kɛ ho Betlehem nɛ ji “David ma” a mi ya. Lejɛ ɔ nɛ a gba kɛ fɔ si kaa a ma fɔ Mesia a ngɛ. (Luka 2:3, 4; 1 Sam. 17:15; 20:6; Mika 5:2) Benɛ Maria fɔ Yesu ngɛ Betlehem se ɔ, Yosef ha we nɛ e kɛ bimwɔyo ɔ nɛ hia blɔ gagaaga kɛ ho Nazaret ya. A hi Betlehem nɛ́ e kɛ Yerusalem kɛmi maa su si tomi ekpa a. Enɛ ɔ he ɔ, e he be wae ha mɛ kaa a kɛ bimwɔyo ɔ maa ya sɔlemi we ɔ konɛ a ya sã afɔle kaa bɔ nɛ Mlaa a tsɔɔ ɔ.—3 Mose 12:2, 6-8; Luka 2:22-24.

Mawu bɔfo ɔ sɛ hlami de Maria kaa binyumu nɛ e ma fɔ ɔ maa hi “David matsɛ sɛ ɔ” nɔ, nɛ e maa ‘ye nɔ kaa Matsɛ.’ Anɛ eko ɔ, e pee Yosef kɛ Maria nyakpɛ benɛ a na kaa a fɔ Yesu ngɛ David ma a mi ɔ lo? (Luka 1:32, 33; 2:11, 17) Eko ɔ, a susu kaa nile ngɛ mi kaa a maa ya nɔ maa hi lejɛ ɔ, konɛ a mlɛ kɛ ya si benɛ Mawu kɛ blɔ tsɔɔmi kpa ma ha mɛ ngɛ nɔ́ nɛ e sa kaa a pee ɔ he.

Ngɛ anɔkuale mi ɔ, wa li be abɔ nɛ a kɛ hi Betlehem loko dodoe mi hyɛli komɛ ba lejɛ ɔ. Ngɛ jamɛ be ɔ mi ɔ, Yosef kɛ e weku ɔ ngɛ we mi, nɛ a binyumu ɔ wa nɛ e ba pee “jokuɛ,” se pi bimwɔyo. (Mat. 2:11) Eko ɔ, a kpale we kɛ ya Nazaret, mohu ɔ, a ya nɔ nɛ a hi Betlehem be bɔɔ nɛ a hɛ muɔ si ngɛ lejɛ ɔ.

Herode fã kaa a gbe “jokuɛ nyumuwi tsuo nɛ a ngɛ Bɛtlehɛm . . . ni nɛmɛ nɛ a ye jeha enyɔ kɛ ni nɛmɛ nɛ a sui jã.” (Mat. 2:16) Bɔfo ko bɔ Yosef kɔkɔ ngɛ enɛ ɔ he, lɔ ɔ he ɔ, e kɛ Maria kɛ Yesu tu fo kɛ ho Egipt ya, nɛ a hi lejɛ ɔ kɛ ya si benɛ Herode gbo. Pee se ɔ, Yosef ngɔ e weku ɔ kɛ ho Nazaret ya. Mɛni he je nɛ a kpale we kɛ yɛ Betlehem ɔ? A pee we jã, ejakaa Herode binyumu Akelao nɛ e ji yiwutsotsɛ ɔ ngɛ nɔ yee ngɛ Yudea. Jehanɛ hu ɔ, bɔfo ɔ bɔ Yosef kɔkɔ kaa oslaa ngɛ he kaa a maa pee jã. Nazaret ji he ko nɛ ngɛ slɔkee nɛ Yosef ma nyɛ ma tsɔse Yesu ngɛ konɛ e sɔmɔ Mawu.—Mat. 2:19-22; 13:55; Luka 2:39, 52.

Ngɛ anɔkuale mi ɔ, Yosef gbo loko Yesu ba gbo kɛ bli blɔ kɛ ha ni kpahi konɛ a nyɛ nɛ a ya hiɔwe. Enɛ ɔ he ɔ, wa ma nyɛ ma de ke a ma tle Yosef si ngɛ zugba a nɔ. Nihi fuu ma ná he blɔ nɛ a maa na lɛ konɛ e de mɛ ní kpahi fuu kɛ kɔ nɔ́ he je nɛ e kɛ Maria hla kaa a maa ya nɔ maa hi Betlehem benɛ a fɔ Yesu se ɔ.