1-2. Kaa bɔ nɛ e ji ngɛ Lot blɔ fa mi ɔ, mɛni nyagbahi nɛ Kristofohi tsuo kɛ kpeɔ mwɔnɛ ɔ?

 MWƆNƐ Ɔ, ke wa na bɔ nɛ nihi ngɔɔ a he kɛ woɔ je mi bami yaya mi ha a, e haa nɛ wa nuɔ he kaa bɔ nɛ Lot nɛ ji dalɔ ɔ nu he ɔ. ‘Nihi nɛ a yi mlaa nɔ ɔ, a nɔ buimi ngmlikiti ɔ ha nɛ e ye tsui wawɛɛ,’ ejakaa e le kaa wa hiɔwe Tsɛ ɔ sume je mi bami yaya. (2 Pet. 2:7, 8) Akɛnɛ Lot yeɔ Mawu gbeye nɛ e suɔ lɛ wawɛɛ he je ɔ, e kɛ e he wui je mi bami yayahi nɛ nihi nɛ a bɔle lɛ ɔ kɛ a he woɔ mi ɔ mi. Mwɔnɛ ɔ, nihi nɛ a bɔle wɔ ɔ hu kɛ Yehowa mlaa amɛ tsu we ní kulaa. Se kɛ̃ ɔ, wa ma nyɛ ma ha nɛ wa je mi bami he nɛ tsɔ be fɛɛ be ke wa ha nɛ suɔmi nɛ wa ngɛ kɛ ha Mawu ɔ mi wa wawɛɛ, nɛ wa ye lɛ gbeye ngɛ blɔ nɛ da nɔ.—Abɛ 14:2.

² Yehowa yeɔ bua wɔ konɛ wa nyɛ nɛ waa pee jã. E jeɔ suɔmi mi nɛ e woɔ wɔ he wami kɛ guɔ Abɛ womi ɔ nɔ. Nyumuhi kɛ yihi, jokuɛwi kɛ nikɔtɔmahi tsuo ma nyɛ ma ná ga womi nɛ ngɛ ngmami nɛ ɔ mi ɔ he se ke a susu he.

3. Ngɛ Abɛ 17:3 ɔ nya a, mɛni ji yi mi tomi kake he je nɛ e sa nɛ waa po wa tsui ɔ he piɛ? (Hyɛ foni ɔ hulɔ.)

³ Nɔ́ titli he je nɛ e sa nɛ waa po wa okadi peemi tsui ɔ he piɛ ji kaa Yehowa hyɛɔ wa tsui mi. Enɛ ɔ tsɔɔ kaa e naa níhi nɛ ni kpahi be nyɛe maa na ngɛ wa he, nɛ e le bɔ nɛ wa ngɛ ha tutuutu. (Kane Abɛ 17:3.) Ke wa susuɔ ga womi nɛ Yehowa kɛ haa wɔ nɛ ma ha nɛ wa ná neneene wami ɔ he ɔ, e bua maa jɔ wa he wawɛɛ. (Yoh. 4:14) Ke wa pee jã a, waa kɛ wa he be je mi bami yaya mi woe, nɛ lakpa munyuhi nɛ je Satan kɛ yiwutsotsɛmɛ a ngɔ ɔ hu be wa nɔ he wami náe. (1 Yoh. 5:18, 19) Ke wa ngɛ hɛe kɛ ngɛ Yehowa he sue ɔ, suɔmi kɛ bumi nɛ wa ngɛ ha  lɛ ɔ mi maa wa wawɛɛ. Akɛnɛ wa suɔ wa Tsɛ ɔ, nɛ wa sume nɛ waa pee nɔ́ ko nɛ maa dɔ lɛ he je ɔ, wa be suɔe kaa wa ma susu nɔ́ yayami ko he. Ke waa kɛ ka ko kpe nɛ ma ha nɛ waa pee yayami ɔ, wa ma nyɛ ma bi wa he ke, ‘Mɛni he je nɛ e sa nɛ ma je blɔ nɛ ma pee nɔ́ ko nɛ maa dɔ Yehowa, nɔ nɛ e je suɔmi kpo kɛ tsɔɔ mi wawɛɛ ɔ?’—1 Yoh. 4:9, 10.

4. Ngɛ mɛni blɔ nɔ nɛ Yehowa gbeye yemi ye bua nyɛmiyo ko nɛ e nyɛ nɛ e da ka nya?

⁴ Nyɛmiyo ko nɛ a tsɛɛ lɛ ke Marta nɛ e je Croatia nɛ e kɛ ajuama bɔmi he ka kpe ɔ de ke: “E he wa ha mi wawɛɛ kaa ma susu níhi a he saminya nɛ ma hwu kɛ si akɔnɔ yayahi. Se akɛnɛ i yeɔ Yehowa gbeye he je ɔ, lɔ ɔ po ye he piɛ.” b Ngɛ mɛni blɔ nɔ? Marta tsɔɔ kaa e pueɔ e yi mi tɛ ngɛ haomi nɛ e kɛ ma nyɛ maa kpe ke ji kaa e kɛ e he wo je mi bami yaya mi ɔ he. Wɔ hu wa ma nyɛ maa pee jã nɔuu. Ke waa kɛ wa he wo je mi bami yaya mi ɔ, e maa dɔ Yehowa wawɛɛ, nɛ wa be nyɛe ma sɔmɔ lɛ kɛ ya neneene.—1 Mose 6:5, 6.

5. Mɛni o ma nyɛ maa kase ngɛ Nyɛminyumu Leo nɔ hyɛmi nɔ́ ɔ mi?

⁵ Ke wa yeɔ Yehowa gbeye ɔ, lɔ ɔ maa ye bua wɔ konɛ waa kɛ nihi nɛ a peeɔ ní yayahi nɛ ko bɔ. Nyɛminyumu Leo nɛ e ngɛ Congo ɔ na kaa munyu nɛ ɔ ji anɔkuale. Benɛ a baptisi lɛ jeha eywiɛ se ɔ, e kɛ nihi nɛ a kɛ a he woɔ je mi bami yaya mi ɔ ya bɔ. E susu kaa akɛnɛ lɛ nitsɛ e pee we jamɛ a ní yayami ɔmɛ eko he je ɔ, e tɔ̃ we Yehowa nɔ. E kɛ we kulaa nɛ e huɛmɛ ɔmɛ ha nɛ e kɛ e he ya wo dã demi kɛ ajuama bɔmi mi. Lɔ ɔ se ɔ, e bɔni níhi nɛ e fɔli nɛ a ji Kristofohi tsɔɔ lɛ ɔ he susumi. Jehanɛ hu ɔ, e pue e yi mi tɛ ngɛ bua jɔmi nɛ e ná be mi nɛ e ngɛ Yehowa sɔmɔe ɔ he. Kɛ jã nɛ e pee ɔ ye bua lɛ ha kɛɛ? E hɛ ba e he nɔ ekohu. Asafo mi nikɔtɔma amɛ ye bua lɛ nɛ e kpale  kɛ ba Yehowa ngɔ. Amlɔ nɛ ɔ, e kɛ bua jɔmi ngɛ sɔmɔe kaa asafo mi nɔkɔtɔma kɛ blɔ gbalɔ klɛdɛɛ.

6. Mɛni okadi peemi yihi enyɔ a he nɛ wa ma susu?

⁶ Nyɛ ha nɛ wa susu Abɛ yi 9 ɔ he nɛ waa hyɛ. Ngmami nɛ ɔ tu yihi enyɔ a he munyu. E tsɔɔ kaa nɔ kake daa si kɛ ha nile, nɛ nɔ kake ɔ hu daa si kɛ ha kuasia. (Kɛ to Roma Bi 5:14; Galatia Bi 4:24 ɔ he.) Be mi nɛ wa ngɛ ngmami nɛ ɔ he susue ɔ, o hɛ nɛ hi nɔ kaa ajuama bɔmi kɛ bɔmi nami he fonihi loo videohi pɔ he wawɛɛ ngɛ Satan je nɛ ɔ mi. (Efe. 4:19) Enɛ ɔ he ɔ, e he hia nɛ waa ye Mawu gbeye be fɛɛ be, nɛ wa je wa he kɛ je ní yayahi a he. (Abɛ 16:6) Jehanɛ hu ɔ, nyumuhi ji wɔ jio, yihi ji wɔ jio, wɔ tsuo ma nyɛ ma ná nɔ́ nɛ ngmami nɛ ɔ de ɔ he se. Ngɛ ngmami nɛ ɔ mi ɔ, yi enyɔ ɔmɛ tsuo ngɛ nihi nɛ a be níhi a si kpami, nɛ ji “nihi nɛ be juɛmi” ɔ nine fɔe. Yi enyɔ nɛ ɔmɛ tsuo ngɛ dee ke, “Ba nɛ o ba ye ye ní ɔ eko.” (Abɛ 9:1, 5, 6, 13, 16, 17) Se nɔ́ nɛ je nine fɔmi enyɔ nɛ ɔmɛ a mi kɛ ba a ngɛ ekpaekpa.

7. Ngɛ Abɛ 9:13-18 ɔ nya a, mɛni baa nihi nɛ a kplɛɛɔ yo kuasia a nine fɔmi ɔ nɔ ɔ a nɔ? (Hyɛ foni ɔ hulɔ.)

⁷ Mo susu “yo kuasia” a nine fɔmi ɔ he nɛ o hyɛ. (Kane Abɛ 9:13-18.) E ngɛ ngmlaa kpae nɛ e ngɛ nihi nɛ a be juɛmi ɔ dee ke, ‘Nyɛɛ ba hiɛ ɔ’ nɛ nyɛ ba je nyɛ hɛja. Mɛni maa ba nihi nɛ a maa kplɛɛ e nine fɔmi ɔ nɔ ɔ a nɔ? Ke ‘a ná ya sɛ e we ɔ mi pɛ a plɛ pee nɔ gbogboe.’ Eko ɔ, o ma kai kaa a kɛ munyuhi kaa kikɛ nɛ ɔ tsu ní kɛ sɛ hlami ngɛ Abɛ womi ɔ mi. A bɔ wɔ kɔkɔ ngɛ “yo kuasia” loo “yo yaholɔ” ɔ he. Ngmami ɔ de ke: “Ke o ya e we mi ɔ, gbenɔ blɔ nɔ o ngɛ nyɛɛe ɔ nɛ.” (Abɛ 2:11-19) Abɛ 5:3-10 hu bɔ wɔ kɔkɔ ngɛ “yo yaholɔ” kpa ko he. E tsɔɔ kaa ‘blɔ nɛ e nyɛɛɔ nɔ ɔ kɛ nɔ yaa gbeje.’

8. Mɛni yi mi kpɔ nɛ e sa nɛ waa mwɔ?

⁸ Nihi nɛ a buɔ “yo kuasia” a tue ɔ ngɛ yi mi kpɔ ko nɛ e sa kaa a mwɔ. E sa nɛ a mwɔ a yi mi kpɔ kaa a maa kplɛɛ e nine fɔmi ɔ nɔ loo a be nɔ kplɛɛe. Wɔ hu waa kɛ si fɔfɔɛ ko ma nyɛ maa kpe nɛ e ma bi nɛ waa mwɔ yi mi kpɔ. Kaa nɔ hyɛmi nɔ́ ɔ, ke nɔ ko ngɛ hlae nɛ e nyɛ wa nɔ konɛ waa kɛ wa he nɛ wo ajuama bɔmi mi, aloo bɔmi nami he foni ko ba wa fon loo tiivi ɔ nɔ tlukaa a, mɛni wa maa pee?

9-10. Mɛni yi mi tomihi a he je nɛ e sa nɛ waa yu wa he ngɛ ajuama bɔmi he?

⁹ Wa ngɛ yi mi tomi kpakpahi fuu a he je nɛ e sa nɛ waa yu wa he ngɛ ajuama bɔmi he. Ngmami ɔ tsɔɔ kaa “yo kuasia” a ngɛ dee ke: “Nyu jujui ngɔɔ.” Mɛni ji jamɛ a “nyu jujui” ɔ? Baiblo ɔ ngɔ bɔmi nami mi ní peepeehi nɛ nihi nɛ a sɛ gba si himi mi ɔ kɛ a he woɔ mi ɔ kɛ to  nyu nɛ haa nɔ bua jɔmi ɔ he. (Abɛ 5:15-18) Nyumu kɛ yo nɛ a sɛ gba si himi mi ɔ ngɛ he blɔ nɛ a kɛ a he náa bɔmi. Ngɛ anɔkuale mi ɔ, enɛ ɔ ngɛ slɔɔto kulaa ngɛ “nyu jujui” he. Nyu jujui tsɔɔ bɔmi nami nɛ Yehowa kplɛɛ we nɔ. Nihi nɛ a kɛ a he woɔ jamɛ a ní peepee ɔ mi ɔ peeɔ jã ngɛ laami mi kaa bɔ nɛ julɔ juɔ ngɛ laami mi ɔ. E ma nyɛ maa pee kaa nɔ́ nɛ “nyu jujui” nɛ ɔ ngɔɔ ke ji kaa nihi nɛ a pee jã a susu kaa a ye a he nɛ nɔ ko nɔ ko be lee. Se e ji susumi nɛ dɛ! Yehowa naa níhi tsuo. Ngɛ anɔkuale mi ɔ, ke Yehowa kua nɔ ko ɔ, e ngɛ dɔmi wawɛɛ, nɛ e pi nɔ́ ko nɛ e “ngɔɔ” kulaa, mohu ɔ, e duɔ wawɛɛ. (1 Kor. 6:9, 10) Se pi lɔ ɔ pɛ.

¹⁰ Ke nɔ ko ya bɔ ajuama a, e ma nyɛ ma ha nɛ e hɛ mi nɛ pue si, nɛ e maa nu he kaa e he be se nami po. Jehanɛ se hu ɔ, e ma nyɛ ma ha nɛ nɔ ɔ nɛ ngɔ hɔ be mi nɛ e hyɛ we blɔ, nɛ e ma nyɛ ma puɛ wekuhi a kpɛti hulɔ. E ngɛ heii kaa nile ngɛ mi kaa wa ma kua yo kuasia a nine fɔmi ɔ. Jehanɛ hu ɔ, ke nɔ ko kɛ e he wo ajuama bɔmi mi ɔ, pi huɛ bɔmi nɛ ngɛ e kɛ Yehowa a kpɛti ɔ pɛ nɛ ma puɛ, e ma nyɛ maa nu gbenɔ hiɔ komɛ po. (Abɛ 7:23, 26) Abɛ yi 9 kuku 18 ɔ mwɔ nya ke: “Nihi tsuo nɛ ya sɛ e we ɔ mi ɔ, a wuhi a he je momo ngɛ gbeje.” Ke jã a, lɛɛ mɛni he je mɔ nɛ nihi fuu kplɛɛɔ yo kuasia a nine fɔmi ɔ nɔ nɛ a ngɔɔ haomihi babauu kɛ baa a nɔ ɔ?—Abɛ 9:13-18.

11. Mɛni he je nɛ bɔmi nami he fonihi loo videohi a hyɛmi yeɔ nɔ awi wawɛɛ ɔ?

¹¹ Nɔ́ ko nɛ pɔ he wawɛɛ nɛ e sa nɛ waa yu wa he ngɛ he ji bɔmi nami he foni loo video hyɛmi. Ni komɛ susuɔ kaa bɔmi nami he foni loo video hyɛmi yi nɔ awi. Se ngɛ anɔkuale mi ɔ, bɔmi nami he foni loo video hyɛmi yeɔ nɔ awi wawɛɛ, nɛ e haa nɛ nɔ nuɔ he kaa se nami ko be e he, nɛ e kpami hu yee. Ke nɔ ko hyɛ bɔmi nami he foni ɔ, e he waa kaa e ma je ngɛ e juɛmi mi. Nɛ e he waa kaa nɔ ɔ maa ye akɔnɔ yayahi a nɔ. (Kol. 3:5; Yak. 1:14, 15) Ngɛ anɔkuale mi ɔ, nihi fuu nɛ a hyɛɔ bɔmi nami he fonihi ɔ yaa nɔ nɛ a kɛ a he woɔ ajuama bɔmi mi.

12. Mɛni wa ma nyɛ maa pee kɛ tsɔɔ kaa wa poɔ wa he piɛ ngɛ fonihi nɛ a ma nyɛ ma tle wa we akɔnɔhi a si ɔ a he?

¹² Mɛni e sa kaa Kristofohi nɛ a pee ke a na bɔmi nami he foni loo video ngɛ a fon loo a tablɛti nɔ? E sa nɛ waa kɛ oya yemi nɛ kua. Wa ma nyɛ maa pee jã ke wa kai kaa huɛ bɔmi nɛ ngɛ waa kɛ Yehowa wa kpɛti ɔ he hia wɔ pe nɔ́ fɛɛ nɔ́. E ngɛ heii kaa fonihi nɛ a be kaa bɔmi nami he fonihi tutuutu po ma nyɛ ma tle wa we akɔnɔ si. Enɛ ɔ he ɔ, e sa nɛ wa kua foni nɛ ɔmɛ. Mɛni he je? Ejakaa wa sume nɛ waa pee nɔ́ nyafii ko po nɛ ma ha nɛ waa bɔ ajuama. (Mat. 5:28, 29) Asafo mi nɔkɔtɔma ko nɛ e ngɛ Thailand nɛ a tsɛɛ lɛ ke David ɔ de ke: “I biɔ ye he ke: ‘Ke tsa pi bɔmi nami he foni tutuutu nɛ i ngɛ hyɛe po ɔ, ke i ya nɔ nɛ i hyɛ ɔ, anɛ e maa sa Yehowa hɛ mi lo?’ Sane nɛ ɔ nɛ i biɔ ye he ɔ, yeɔ bua mi nɛ i kɛ nile tsuɔ ní.”

13. Mɛni maa ye bua wɔ konɛ waa kɛ nile nɛ tsu ní?

¹³ Ke wa sume kaa wa maa pee nɔ́ ko nɛ maa dɔ Yehowa a, lɔ ɔ yeɔ bua wɔ nɛ waa kɛ nile tsuɔ ní. “Loko o ma ná nile ɔ” ja o ye Mawu gbeye. (Abɛ 9:10) Wa naa enɛ ɔ ngɛ Abɛ yi 9 ɔ sisije. Ngɛ lejɛ ɔ, a kɛ ‘nile nitsɛnitsɛ’ to okadi peemi yo kpa ko he.

14. Mɛni nine fɔmi kpa ko nɛ ngɛ Abɛ 9:1-6?

¹⁴ Kane Abɛ 9:1-6. Ngmami nɛ ɔ ha nɛ wa na kaa nine fɔmi nɛ ɔ je Yehowa nɛ ji wa Bɔlɔ ɔ ngɔ. E ngɔ nɛ nile nitsɛnitsɛ je. (Abɛ 2:6; Rom. 16:27) Ngɛ ngmami nɛ ɔ mi ɔ, a tu tsu ngua ko kɛ e he titimahi kpaago he munyu. Enɛ ɔ tsɔɔ kaa Yehowa mi mi jɔ, nɛ e suɔ kaa nihi tsuo nɛ a ngɛ hlae nɛ a ná nile nitsɛnitsɛ ɔ nɛ a ba e ngɔ.

15. Mɛni nɛ Mawu fɔ wɔ nine kaa waa pee?

 ¹⁵ Yehowa mi mi jɔ wawɛɛ nɛ e haa nɔ nɔ́ faa. Wa naa su nɛ ɔmɛ ngɛ okadi peemi yo nɛ daa si ha ‘nile nitsɛnitsɛ’ nɛ Abɛ yi 9 ɔ tu he munyu ɔ ní peepee mi. Ngmami ɔ tsɔɔ kaa yo nɛ ɔ to niye ní he blɔ nya, nɛ e futu e wai ɔ, nɛ e ngmɛ okplɔɔ ngɛ e we ɔ mi. (Abɛ 9:2) Jehanɛ hu ɔ, ngɛ kuku 4 kɛ 5 ɔ mi ɔ, ngmami ɔ tsɔɔ kaa yo ɔ nɛ daa si kɛ ha nile nitsɛnitsɛ ɔ ngɛ dee ke: ‘Nyɛ nihi tsuo nɛ nyɛ be juɛmi ɔ, nyɛɛ ba nɛ nyɛ ba ye ye ní ɔ eko!’ Mɛni he je nɛ e sa nɛ waa ya nile nitsɛnitsɛ we ɔ mi nɛ wa ya ye e niye ní ɔ eko ɔ? Yehowa suɔ nɛ e bimɛ ɔmɛ nɛ a le ní nɛ a hi slɔkee. E sume nɛ wa tɔ̃ nɛ waa na mi nɔ́ loko waa kase ní kɛ je mi. Lɔ ɔ he je nɛ “e ngɔɔ juɛmi kɛ toɔ kaa juetli kɛ haa dali” ɔ nɛ. (Abɛ 2:7, NW) Ke wa ngɛ bumi nɛ e mi kuɔ kɛ ha Yehowa a, wa maa suɔ kaa wa maa pee e suɔmi nya ní. Jehanɛ se hu ɔ, lɔ ɔ ma ha nɛ wa maa bu Yehowa ga womihi nɛ nile ngɛ mi ɔ tue, nɛ wa bua maa jɔ kaa waa kɛ ma tsu ní ngɛ wa si himi mi.—Yak. 1:25.

16. Mɛni blɔ nɔ nɛ Mawu gbeye yemi ye bua Alain nɛ e mwɔ yi mi kpɔ nɛ da, nɛ mɛni je mi kɛ ba?

¹⁶ Mo susu bɔ nɛ Mawu gbeye yemi ye bua Alain ha nɛ e nyɛ mwɔ yi mi kpɔ nɛ da a he nɛ o hyɛ. Alain ji asafo mi nɔkɔtɔma kɛ tsɔɔlɔ ngɛ sukuu. E de ke: “Ye huɛmɛ ɔmɛ nɛ mɛ hu a ji tsɔɔli ɔ naa bɔmi nami he foni loo video hyɛmi kaa nɔ́ ko nɛ a ma nyɛ ma kɛ kase bɔmi nami he ní.” Se Alain le kaa jamɛ a munyu ɔ pi anɔkuale. E de ke: “Akɛnɛ i yeɔ Yehowa gbeye he je ɔ, i fia ye pɛɛ si kaa i be video nɛ ɔmɛ hyɛe. Jehanɛ ɔ hu ɔ, i tsɔɔ mɛ nɔ́ he je nɛ i be jamɛ a ní ɔmɛ hyɛe ɔ.” Niinɛ, Alain kɛ ga womi nɛ ‘nile nitsɛnitsɛ’ kɛ ha a ngɛ ní tsue konɛ e “hla nile se blɔ.” (Abɛ 9:6) Akɛnɛ Alain pee kã he je ɔ, tsɔɔli kpa amɛ a bua jɔ e he, nɛ a kpɛti ni komɛ bɔni Baiblo ɔ kasemi nɛ a yaa asafo mi kpehi hulɔ.

17-18. Mɛni jɔɔmihi nɛ nihi nɛ a kplɛɛɔ ‘nile nitsɛnitsɛ’ nine fɔmi ɔ nɔ ɔ ma ná, nɛ mɛni a ma nyɛ maa hyɛ blɔ? (Hyɛ foni ɔ hulɔ.)

¹⁷ Kɛ gu okadi peemi yihi enyɔ nɛ ɔmɛ a nɔ ɔ, Yehowa tsɔɔ wɔ nɔ́ nɛ e sa nɛ waa pee konɛ wa ná bua jɔmi hwɔɔ se. Nihi nɛ a kplɛɛɔ “yo kuasia” a nine fɔmi ɔ nɔ ɔ bɔɔ mɔde kaa a kɛ a he maa wo ajuama bɔmi mi konɛ a ná bua jɔmi. Se ngɛ anɔkuale mi ɔ, a li kaa jã peemi maa ngɔ haomihi kɛ ba a nɔ hwɔɔ se. A ní peepee ɔ maa ngɔ mɛ kɛ ya gbenɔ mi.—Abɛ 9:13, 17, 18.

¹⁸ Se nihi nɛ a kplɛɛɔ ‘nile nitsɛnitsɛ’ nine fɔmi ɔ nɔ lɛɛ, a si himi maa pee kpakpa hwɔɔ se. A ma ná bua jɔmi ejakaa a nine maa su níhi tsuo nɛ a maa hia konɛ huɛ bɔmi kpakpa nɛ hi a kɛ Yehowa a kpɛti ɔ nɔ. (Yes. 65:13) Yehowa de kɛ gu gbalɔ Yesaya nɔ ke: “Nyɛɛ bu mi tue  saminya nɛ nyɛɛ pee nɔ nɛ i ngɛ dee ɔ; kɛkɛ nyɛ maa ye ní kpakpahi, nɛ nyɛ bua maa jɔ nyɛ he.” (Yes. 55:1, 2) Wa na kaa e sa nɛ waa suɔ níhi nɛ Yehowa suɔ, nɛ waa hiɔ níhi nɛ e hiɔ. (La 97:10) Jehanɛ se hu ɔ, wa ngɛ bua jɔmi ejakaa wa ma nyɛ maa fɔ ni kpahi nine konɛ mɛ hu a ba ná ‘nile nitsɛnitsɛ’ ɔ he se. E ngɛ kaa nɔ́ nɛ a tsɔ wɔ kaa wa ‘ya da ma a mi he nɛ ya hiɔwe pe kulaa a, nɛ wa kpa ngmlaa ke, “Nyɛ nihi tsuo nɛ nyɛ be juɛmi ɔ, nyɛ gba hiɛmɛ nɛ ɔ!”’ Ke wa pee jã a, waa kɛ nihi nɛ a maa bu wɔ tue ɔ ma ná he se amlɔ nɛ ɔ kɛ hwɔɔ se hulɔ. Jehanɛ hu ɔ, e ma ha nɛ wa ma “ná wami” kɛ ya neneene, nɛ wa ma “hla nile se blɔ.”—Abɛ 9:3, 4, 6.

19. Ngɛ Fiɛlɔ 12:13, 14 ɔ nya a, mɛni nɛ e sa kaa waa fia wa pɛɛ si kaa wa maa pee? (Hyɛ daka nɛ ji, “ Mawu Gbeye Yemi Yeɔ Bua Wɔ” ɔ hulɔ.)

¹⁹ Kane Fiɛlɔ 12:13, 14. Nyɛ ha nɛ waa ya nɔ nɛ wa ha nɛ Mawu gbeye yemi nɛ bu wa tsui he, nɛ waa yu wa he ngɛ je mi bami yaya he, nɛ wa he nɛ wa ngɛ mumi mi ngɛ nyagbe ligbi nɛ ɔmɛ a mi. Mawu gbeye yemi maa wo wɔ he wami konɛ waa fɔ nihi babauu nine konɛ a ba hla ‘nile nitsɛnitsɛ’ se blɔ nɛ a ná he se.