1-2. Mɛni blɔ nɔ bɔfo Paulo nɔ hyɛmi nɔ́ ɔ ma nyɛ maa ye bua asafo mi nikɔtɔmahi mwɔnɛ ɔ?

 BƆFO Paulo suɔ e nyɛmimɛ ɔmɛ. E tsuɔ ní wawɛɛ kɛ yeɔ bua mɛ. (Níts. 20:31) Lɔ ɔ he je nɛ e nyɛmimɛ Kristofo ɔmɛ hu suɔ lɛ wawɛɛ ɔ nɛ. Be ko benɛ asafo mi nikɔtɔmahi nɛ a ngɛ Efeso ɔ ná le kaa a be Paulo nae hu ɔ, ‘mɛ tsuo a fo ya wawɛɛ nitsɛ.’ (Níts. 20:37) Asafo mi nikɔtɔmahi nɛ a ngɛ wa we asafo ɔmɛ a mi ɔ hu suɔ a nyɛmimɛ nyumuhi kɛ yihi wawɛɛ nitsɛ, nɛ a peeɔ nɔ́ fɛɛ nɔ́ nɛ a ma nyɛ kɛ yeɔ bua mɛ. (Filipi. 2:16, 17) Se be komɛ ɔ, asafo mi nikɔtɔmahi kɛ nyagbahi kpeɔ. Mɛni ma nyɛ maa ye bua mɛ kɛ da nyagba a nya?

² Asafo mi nikɔtɔma amɛ tsuɔ ní wawɛɛ, nɛ a ma nyɛ maa kase Paulo nɔ hyɛmi nɔ́ ɔ. (1 Kor. 11:1) Tsa pi hiɔwe bɔfo ji lɛ. E ji adesa nɛ e yi mluku kaa wɔ nɔuu, nɛ be komɛ ɔ, e he waa ha lɛ kaa e maa pee nɔ́ nɛ da. (Rom. 7:18-20) Paulo ngɛ nyagbahi fuu, se e ha we nɛ lɔ ɔ nɛ ha nɛ e kɔni mi nɛ jɔ̃ loo e puɛ e bua jɔmi. Ke asafo mi nikɔtɔmahi kase Paulo nɔ hyɛmi nɔ́ ɔ, a ma nyɛ maa ya nɔ nɛ a kɛ bua jɔmi nɛ sɔmɔ Yehowa ke a kɛ nyagbahi ngɛ kpee po. Nyɛ ha nɛ waa hyɛ blɔ nɔ nɛ a maa gu kɛ pee jã.

3. Mɛni he wa ma susu ngɛ ní kasemi nɛ ɔ mi, nɛ mɛni nɔ́ kpa ko hu wa maa kase?

³ Ngɛ ní kasemi nɛ ɔ mi ɔ, wa ma susu nyagbahi eywiɛ nɛ asafo mi nikɔtɔmahi kɛ kpeɔ ɔ he: (1) be nɛ a ma ná kɛ ha fiɛɛmi ní tsumi ɔ kɛ blɔ nya ní tsumi kpahi (2) be nɛ a ma ná kɛ slaa nyɛmimɛ ɔmɛ nɛ a wo mɛ he wami, (3) mɛ nitsɛmɛ a gbɔjɔmihi a nya nɛ a maa da, kɛ (4) ni kpahi a gbɔjɔmihi a nya nɛ a maa da. Wa ma susu nɔ́ nɛ ye bua Paulo nɛ e nyɛ da nyagba nɛ ɔmɛ eko fɛɛ eko nya kɛ bɔ nɛ asafo mi nikɔtɔmahi ma nyɛ maa kase e nɔ hyɛmi nɔ́ ɔ he.

4. Mɛni he je nɛ eko ɔ, e he maa wa ha asafo nikɔtɔmahi kaa a maa a nyɛɛ hɛ mi ngɛ fiɛɛmi ní tsumi ɔ mi ɔ?

⁴ Nɔ́ he je nɛ enɛ ɔ ma nyɛ maa pee nyagba. E sa nɛ asafo mi nikɔtɔmahi nɛ a nyɛɛ fiɛɛmi ní tsumi ɔ hɛ mi, se ngɛ lɔ ɔ se ɔ, a ngɛ blɔ nya ní tsumihi fuu. Kaa nɔ hyɛmi nɔ́ ɔ, ngɛ otsi kpɛti kpe ɔ mi ɔ, asafo mi nikɔtɔmahi fuu sɔmɔɔ kaa sɛnɔhilɔ kɛ haa kpe ɔ aloo a hyɛɔ Asafo Baiblo Mi Ní Kasemi ɔ nɔ. A ma nyɛ ma ná ní peemi kpahi kaa munyu tumi hulɔ. Jehanɛ hu ɔ, a tsɔseɔ asafo mi sɔmɔli, nɛ a kɛ bua jɔmi woɔ nyɛmimɛ ɔmɛ he wami. (1 Pet. 5:2) Asafo mi nikɔtɔma komɛ yeɔ bua kɛ maa Matsɛ Yemi Asahi kɛ teokrase tsu kpahi, nɛ a yeɔ bua kɛ dlaa hulɔ. Se kɛ̃ ɔ, asafo mi nikɔtɔmahi tsuɔ ní tsumi nɛ he hia pe kulaa nɛ ji fiɛɛmi ní tsumi ɔ kaa bɔ nɛ fiɛɛli kpahi tsuo peeɔ ɔ.​—Mat. 28:19, 20.

5. Mɛni nɔ hyɛmi nɔ́ nɛ Paulo pee ngɛ fiɛɛmi ní tsumi ɔ mi?

⁵ Paulo nɔ hyɛmi nɔ́ ɔ. Wa maa na nɔ́ nɛ ye bua Paulo nɛ e ye manye ngɛ fiɛɛmi ní tsumi ɔ mi ɔ ngɛ Filipi Bi 1:10. E wo wɔ he wami ngɛ lejɛ ɔ ke: “Nyɛɛ le níhi nɛ a he hia wawɛɛ ɔ.” Paulo kɛ lɛ nitsɛ e ga womi ɔ tsu ní. A tu ní tsumi ko kɛ wo e dɛ, nɛ lɔ ɔ ji fiɛɛmi ní tsumi ɔ nɛ. Ngɛ jeha nyɔngmahi abɔ nɛ e kɛ tsu fiɛɛmi ní tsumi ɔ mi ɔ, e na ní tsumi nɛ ɔ kaa e he hia pe kulaa. E fiɛɛ ngɛ “ma hɛ mi kɛ we fɛɛ we mi.” (Níts. 20:20) Pi be pɔtɛɛ ko ngɛ ligbi ɔ mi pɛ nɛ e fiɛɛ, loo ligbi kake ko ngɛ otsi ɔ mi pɛ nɛ e fiɛɛ. E fiɛɛ be fɛɛ be, kɛ ngɛ he fɛɛ he nɛ e maa na nihi ngɛ! Kaa nɔ hyɛmi nɔ́ ɔ, benɛ Paulo ngɛ e huɛmɛ mlɛe ngɛ Atene ɔ, e fiɛɛ kɛ ha kuu ko nɛ a ji nimli nguahi, nɛ a kpɛti ni komɛ kplɛɛ sane kpakpa a nɔ. (Níts. 17:16, 17, 34) Benɛ a ‘wo lɛ tsu’ po ɔ, e fiɛɛ kɛ ha nihi nɛ a bɔle lɛ ɔ.​—Filip. 1:13, 14; Níts. 28:16-24.

6. Mɛni nɛ Paulo tsɔse ni kpahi konɛ a nyɛ nɛ a pee?

⁶ Paulo kɛ e be tsu ní saminya. E pɔɔ nihi nine fɔmi konɛ a ba piɛɛ e he kɛ tsu fiɛɛmi ní tsumi ɔ. Kaa nɔ hyɛmi nɔ́ ɔ, ngɛ e kekleekle ma se sane kpakpa fiɛɛmi ní tsumi ɔ mi ɔ, e ngɔ Yohane nɛ a tsɛɛ lɛ ke Marko ɔ kɛ piɛɛ e he; nɛ ngɛ enyɔne ɔ mi ɔ, e ngɔ Timoteo kɛ piɛɛ e he. (Níts. 12:25; 16:1-4) Paulo pee nɔ́ fɛɛ nɔ́ nɛ e ma nyɛ kɛ tsɔɔ nyɛmimɛ nyumuhi nɛ ɔmɛ bɔ nɛ e sa nɛ a to níhi a blɔ nya ha ngɛ asafo ɔ mi, bɔ nɛ e sa nɛ a slaa nyɛmimɛ ɔmɛ nɛ a wo mɛ he wami ha, kɛ nɔ́ nɛ a ma nyɛ maa pee konɛ a ní tsɔɔmi nɛ nu tso.​—1 Kor. 4:17.

7. Mɛni asafo mi nikɔtɔmahi ma nyɛ maa pee konɛ a nyɛ nɛ a ngɔ ga womi nɛ ngɛ Efeso Bi 6:14, 15 ɔ kɛ tsu ní?

⁷ Nɔ́ nɛ wa ma nyɛ maa kase ngɛ mi. Paulo fiɛɛ ngɛ wehi a mi, se pi lɔ ɔ pɛ, e fiɛɛ ngɛ he fɛɛ he, kɛ be fɛɛ be nɛ e ma ná he blɔ. Asafo mi nikɔtɔmahi ma nyɛ maa kase Paulo nɔ hyɛmi nɔ́ nɛ ɔ. (Kane Efeso Bi 6:14, 15.) Kaa nɔ hyɛmi nɔ́ ɔ, a ma nyɛ maa ye nihi odase ke a ngɛ nɔ́ ko hee, loo ngɛ a ní tsumi he. Aloo ke a ngɛ ye  buae kɛ ma teokrase tsu ko ɔ, a ma nyɛ maa fiɛɛ kɛ ha nihi nɛ a bɔle mɛ loo nihi nɛ a juaa ní ngɛ he nɛ a ngɛ tsu ɔ mae ngɛ ɔ. Kaa bɔ nɛ Paulo pee ɔ, asafo mi nikɔtɔmahi ma nyɛ ma tsɔse asafo mi sɔmɔli kɛ ni kpahi ke a kɛ mɛ ngɛ fiɛɛmi mi.

8. Be komɛ ɔ, mɛni nɛ e maa hia nɛ asafo mi nɔkɔtɔma ko nɛ pee?

⁸ E sɛ nɛ asafo mi nikɔtɔmahi nɛ a ngɔ a be tsuo kɛ tsu asafo ɔ ní tsumihi nɛ e ba lɛ kaa a be be náe kɛ ya fiɛɛmi po. Bɔ nɛ pee nɛ a ná be kɛ tsu níhi nɛ a he hia a he ní ɔ, be komɛ ɔ, e sɛ nɛ a ngɔ blɔ nya ní tsumihi fuu kɛ pue a kuɛ nɔ. Ke a susu he saminya nɛ a sɔle ngɛ he ɔ, eko ɔ, a maa na kaa ke a kplɛɛ ní tsumi ko nɔ ɔ, a be be náe kɛ tsu ní kpahi nɛ a he hia wawɛɛ ɔ a he ní. Níhi nɛ a he hia wawɛɛ nɛ ɔmɛ ekomɛ ji weku Mawu jami nɛ a maa pee daa otsi, fiɛɛmi ní tsumi ɔ nɛ a ma tsu lɛ saminya, loo a bimɛ nɛ a ma tsɔse mɛ konɛ a nyɛ nɛ a fiɛɛ. E he wa ha asafo mi nikɔtɔma komɛ kaa a ma kua sɔmɔmi he blɔ komɛ, se a ma nyɛ ma ná nɔ mi mami kaa Yehowa nu mɛ sisi, nɛ e le kaa a suɔ nɛ a tsu asafo ɔ ní tsumihi kɛ blɔ nya ní tsumi kpahi a he ní.

9. Mɛni nɛ e he ma nyɛ maa wa ha asafo mi nikɔtɔmahi nɛ́ blɔ nya ní tsumihi fuu ngɛ a kuɛ nɔ ɔ kaa a maa pee?

⁹ Nɔ́ he je nɛ enɛ ɔ ma nyɛ maa pee nyagba. Yehowa we bi kɛ nyagbahi fuu kpeɔ. Ngɛ nyagbe ligbi nɛ ɔmɛ a mi ɔ, wɔ tsuo wa hia he wami womi, yemi kɛ buami kɛ bua womi. Be komɛ ɔ, e he hia nɛ a ye bua nyɛmimɛ komɛ konɛ a nyɛ nɛ a yu a he ngɛ je mi bami yaya he. (1 Tɛs. 5:14) Ngɛ anɔkuale mi ɔ, asafo mi nikɔtɔmahi be nyɛe ma tsu nyagbahi tsuo nɛ Yehowa we bi kɛ kpeɔ ɔ he ní loo a je kɛ je. Se Yehowa suɔ nɛ asafo mi nikɔtɔmahi nɛ a pee nɔ́ fɛɛ nɔ́ nɛ a ma nyɛ kɛ wo e we bi he wami nɛ a po a he piɛ. Mɛni nɛ asafo mi nikɔtɔmahi nɛ blɔ nya ní tsumihi fuu ngɛ a kuɛ nɔ momo ɔ ma nyɛ ma nyɛ maa pee konɛ a ná be kɛ ye bua nyɛmimɛ nyumuhi kɛ yihi?

10. Mɛni nɛ 1 Tɛsalonika Bi 2:7 ɔ tsɔɔ kaa Paulo pee kɛ ye bua Yehowa we bi?

¹⁰ Paulo nɔ hyɛmi nɔ́ ɔ. Paulo suɔ kaa e maa wo nyɛmimɛ ɔmɛ he wami be fɛɛ be nɛ e je a yi. E maa hi kaa asafo mi nikɔtɔmahi maa kase Paulo nɔ hyɛmi nɔ́ ɔ nɛ a je suɔmi kɛ mi mi jɔmi kpo kɛ tsɔɔ nyɛmimɛ ɔmɛ. (Kane 1 Tɛsalonika Bi 2:7.) Paulo ha nɛ nyɛmimɛ ɔmɛ ná nɔ mi mami kaa e suɔ mɛ nɛ Yehowa hu suɔ mɛ. (2 Kor. 2:4; Efe. 2:4, 5) Paulo kɛ nihi nɛ a ngɛ asafo ɔ mi ɔ hi si kaa e huɛmɛ, nɛ e ná be kɛ ha mɛ. Paulo je e tsui mi nɛ e de e nyɛmimɛ ɔmɛ níhi nɛ ngɛ e nya gbae kɛ e gbɔjɔmihi kɛ tsɔɔ kaa e he mɛ ye. (2 Kor. 7:5; 1 Tim. 1:15) Se Paulo kɛ e juɛmi mɛ lɛ nitsɛ e nyagba amɛ a nɔ, mohu ɔ, e suɔ nɛ e ye bua e nyɛmimɛ ɔmɛ.

11. Mɛni he je nɛ Paulo wo e nyɛmimɛ nyumuhi kɛ yihi ga a?

¹¹ Be komɛ ɔ, e he hia nɛ Paulo nɛ wo e nyɛmimɛ ɔmɛ ga. Se e pee we jã akɛnɛ e mi mi fu mɛ loo a pee nɔ́ ko nɛ gba e nya a he je. E wo mɛ ga akɛnɛ e suɔ mɛ nɛ e suɔ nɛ e po a he piɛ ngɛ oslaahi a he ɔ he je. Akɛnɛ e suɔ nɛ a ngɔ  e ga womi ɔ kɛ tsu ní he je ɔ, e bɔɔ mɔde kaa e ma ha nɛ e ga womi ɔ nɛ pee nɔ́ nɛ e sisi numi yi. Kaa nɔ hyɛmi nɔ́ ɔ, Paulo kɛ ga womi ko nɛ hɛdɔ ngɛ he ha ngɛ sɛ womi nɛ e ngma kɛ ya ha Korinto bi ɔmɛ ɔ mi. Benɛ e ngma mɛ sɛ womi ɔ se ɔ, e tsɔ Tito kɛ ya a ngɔ. Paulo suɔ nɛ e le bɔ nɛ a pee a ní ha ngɛ sɛ womi ɔ he. E bua jɔ wawɛɛ benɛ e nu kaa a kplɛɛ ga womi ɔ nɔ, nɛ a kɛ tsu ní ɔ!​—2 Kor. 7:6, 7.

12. Mɛni blɔ nɔ asafo mi nikɔtɔmahi ma nyɛ maa gu kɛ wo a nyɛmimɛ Kristofohi he wami?

¹² Nɔ́ nɛ wa ma nyɛ maa kase ngɛ mi. Asafo mi nikɔtɔmahi ma nyɛ maa kase Paulo nɔ hyɛmi nɔ́ ɔ kɛ gu be nɛ a ma ná kɛ ha a nyɛmimɛ Kristofohi ɔ nɔ. Blɔ kake nɛ a ma nyɛ maa gu nɔ kɛ pee jã ji kaa a maa su Matsɛ Yemi Asa a nɔ mla konɛ a ná be nɛ a kɛ a nyɛmimɛ nɛ sɛɛ ní nɛ a wo mɛ he wami. Behi fuu ɔ, wa ma nyɛ maa je suɔmi mi nɛ waa ngɔ be bɔɔ kɛ wo nyɛminyumu ko loo nyɛmiyo ko he wami. (Rom. 1:12; Efe. 5:16) Asafo mi nɔkɔtɔma nɛ e kaseɔ Paulo nɔ hyɛmi nɔ́ ɔ ma nyɛ maa da Mawu Munyu ɔ nɔ kɛ wo nyɛmimɛ he wami nɛ e ha nɛ a ná nɔ mi mami kaa Mawu suɔ mɛ. Jehanɛ hu ɔ, e bɔɔ mɔde kaa e ma ha nɛ a le kaa e suɔ mɛ. E kɛ mɛ sɛɛɔ ní be fɛɛ be, nɛ e hlaa níhi nɛ e maa da nɔ kɛ je a yi. Ke e he ba hia nɛ asafo mi nɔkɔtɔma ko nɛ wo nɔ ko ga a, e sa nɛ e kɛ ga womi ɔ daa Mawu Munyu nɔ. E laa we nɔ ɔ nɔ́ ko nɔ, se e jeɔ mi mi jɔmi mi kɛ peeɔ jã, ejakaa e suɔ nɛ nyɛminyumu ɔ loo nyɛmiyo ɔ kɛ ga womi ɔ nɛ tsu ní.​—Gal. 6:1.

13. Kɛ asafo mi nɔkɔtɔma ko gbɔjɔmi ma nyɛ ma ha nɛ e nu he ha kɛɛ?

¹³ Nɔ́ he je nɛ enɛ ɔ ma nyɛ maa pee nyagba. Asafo mi nikɔtɔmahi yi mluku. Kaa bɔ nɛ e ji ngɛ wɔ tsuo wa blɔ fa mi ɔ, mɛ hu a tɔ̃ɔ. (Rom. 3:23) Be komɛ ɔ, e he ma nyɛ maa wa ha mɛ kaa a ma ná juɛmi nɛ da ngɛ a gbɔjɔmihi a he. A kpɛti ni komɛ ma nyɛ maa hao ngɛ a gbɔjɔmihi a he, nɛ lɔ ɔ ma nyɛ ma ha nɛ a kɔni mi nɛ jɔ̃. A kpɛti ni komɛ hu ma nyɛ ma susu kaa a gbɔjɔmi ɔ pee we nyagba ha mɛ, lɔ ɔ he ɔ, e hia we nɛ a pee tsakemi.

14. Ngɛ Filipi Bi 4:13 ɔ nya a, mɛni blɔ nɔ nɛ he si bami ye bua Paulo nɛ e da e gbɔjɔmihi a nya?

¹⁴ Paulo nɔ hyɛmi nɔ́ ɔ. Akɛnɛ Paulo baa e he si he je ɔ, e yɔse kaa e be nyɛe maa ye e gbɔjɔmihi a nɔ ngɛ lɛ nitsɛ e nyɛmi nya. E hia he wami nɛ Mawu haa nɔ ɔ. Be ko nɛ be ɔ, Paulo wa Kristofo ɔmɛ yi mi wawɛɛ, se pee se ɔ, e kplɛɛ nɔ kaa nɔ́ nɛ e pee ɔ hí. Jehanɛ hu ɔ, e pee klaalo kaa e ma tsake e subai kɛ e ní peepee. (1 Tim. 1:12-16) Ngɛ Yehowa yemi kɛ buami nya a, Paulo ba pee asafo mi nɔkɔtɔma nɛ ngɛ suɔmi, nɛ e mi mi sãa lɛ nɛ e baa e he si. E le kaa e ngɛ gbɔjɔmihi fuu, se e kɛ e juɛmi mɛ lɔ ɔmɛ a nɔ. Mohu ɔ, e ná hemi kɛ yemi kaa Yehowa maa ngɔ e tɔmi ɔ kɛ ke lɛ. (Rom. 7:21-25) E hyɛ we blɔ kaa e maa pee e ní kaa nɔ ko nɛ e ye mluku, mohu ɔ, e bɔ mɔde nɛ e je  Kristofohi a suhi nɛ e ngɛ ɔ kpo. E ba e he si nɛ e ngɔ e hɛ kɛ fɔ Yehowa nɔ kaa e maa ye bua lɛ kɛ gbe e ní tsumi ɔ nya.​—1 Kor. 9:27; kane Filipi Bi 4:13.

15. Mɛni nɛ e sa nɛ asafo mi nikɔtɔmahi nɛ a pee konɛ a ná juɛmi nɛ da ngɛ a gbɔjɔmihi a he?

¹⁵ Nɔ́ nɛ wa ma nyɛ maa kase ngɛ mi. A hlɛ nihi kaa asafo mi nikɔtɔmahi akɛnɛ a ye mluku ɔ he je. Yehowa hyɛɔ blɔ kaa a maa kplɛɛ a tɔmihi a nɔ nɛ a je Kristofohi a suhi kpo. (Efe. 4:23, 24) E sa nɛ asafo mi nɔkɔtɔma fɛɛ asafo mi nɔkɔtɔma nɛ e da Mawu Munyu ɔ nɔ kɛ kpa e mi nɛ e hyɛ, nɛ e pee tsakemihi nɛ e he maa hia kaa e pee ɔ. Ke e pee jã a, Yehowa maa ye bua lɛ nɛ e bua maa jɔ, nɛ e maa ye manye.​—Yak. 1:25.

16. Mɛni ma nyɛ maa ba ke asafo mi nɔkɔtɔma ko ngɔ e juɛmi kɛ ma nyɛmimɛ a gbɔjɔmihi a nɔ?

¹⁶ Nɔ́ he je nɛ enɛ ɔ ma nyɛ maa pee nyagba. Ke asafo mi nikɔtɔmahi ná be kɛ ha nyɛmimɛ nyumuhi kɛ yihi nɛ a ngɛ asafo ɔ mi ɔ, e he be wae kaa a maa le nyɛmimɛ nɛ ɔmɛ a gbɔjɔmihi. Ke asafo mi nikɔtɔmahi hyɛ we nɛ hi ɔ, a mi mi ma nyɛ ma fu nyɛmimɛ nɛ ɔmɛ, a be mi mi jɔmi kpo jee kɛ tsɔɔ mɛ aloo nɔ́ fɛɛ nɔ́ ko nɛ nyɛmimɛ ɔmɛ maa pee ɔ, a maa tu he munyu. Paulo bɔ Kristofohi kɔkɔ kaa lɔ ɔ ji nɔ́ nɛ Satan maa suɔ nɛ a pee.​—2 Kor. 2:10, 11.

17. Kɛ Paulo na e nyɛmimɛ nyumuhi kɛ yihi ha kɛɛ?

¹⁷ Paulo nɔ hyɛmi nɔ́ ɔ. Paulo ná juɛmi nɛ da ngɛ e nyɛmimɛ ɔmɛ a he be fɛɛ be. Paulo le nyɛmimɛ ɔmɛ a gbɔjɔmihi, ejakaa be komɛ ɔ, nyɛmimɛ ɔmɛ peeɔ ní komɛ nɛ dɔɔ lɛ. Se Paulo le kaa ke nɔ ko pee nɔ́ ko nɛ hí ɔ, lɔ ɔ tsɔɔ we kaa nɔmlɔ yayami ji lɛ. E suɔ e nyɛmimɛ ɔmɛ, nɛ e ngɔ e juɛmi kɛ ma a su kpakpa amɛ a nɔ. Ke e he wa ha e nyɛmimɛ ɔmɛ kaa a maa pee nɔ́ nɛ da a, e ngɔɔ lɛ kaa a hɛɛ juɛmi nɛ da, nɛ yemi kɛ buami pɛ nɛ a hia.

18. Mɛni o kase ngɛ bɔ nɛ Paulo tsu Yodia kɛ Sintike a sane ɔ he ní ha a mi? (Filipi Bi 4:1-3)

¹⁸ Mo susu bɔ nɛ Paulo ye bua nyɛmimɛ yihi enyɔ nɛ a ngɛ Filipi asafo ɔ mi ɔ ha a he nɛ o hyɛ. (Kane Filipi Bi 4:1-3.) Eko ɔ, Yodia kɛ Sintike kɛ a sibi kpa we gbi ngɛ níhi a he, nɛ lɔ ɔ ha nɛ huɛ bɔmi nɛ ngɛ a kpɛti ɔ puɛ. Paulo kã we a hɛ mi, mohu ɔ, e kɛ e juɛmi ma a su kpakpa amɛ a nɔ. Yi anɔkualetsɛmɛ nɛ ɔmɛ kɛ jehahi babauu sɔmɔ Yehowa. Paulo le kaa Yehowa suɔ mɛ. Akɛnɛ Paulo hɛɛ nyɛmimɛ yi nɛ ɔmɛ a he juɛmi kpakpa he je ɔ, e wo mɛ he wami kaa a dla nyagba nɛ ngɛ a kpɛti ɔ. Akɛnɛ Paulo ngɔ e juɛmi kɛ ma su kpakpahi nɛ ni kpahi ngɛ ɔ nɔ he je ɔ, e ya nɔ nɛ e ná bua jɔmi, nɛ e ha nɛ huɛ bɔmi kpakpa hi e kɛ e huɛmɛ nɛ a ngɛ asafo ɔ mi ɔ a kpɛti.

19. (a) Mɛni asafo mi nikɔtɔmahi ma nyɛ maa pee konɛ a ya nɔ nɛ a ná a nyɛmimɛ Kristofohi a he juɛmi nɛ da? (b) Mɛni o ma nyɛ maa kase ngɛ foni nɛ kɔɔ asafo mi nɔkɔtɔma a nɛ ngɛ Matsɛ Yemi Asa a nɔ dlae ɔ mi?

¹⁹ Nɔ́ nɛ wa ma nyɛ maa kase ngɛ mi. Asafo mi nikɔtɔmahi, nyɛ yɔse su kpakpahi nɛ nyɛmimɛ nyumuhi kɛ yihi ngɛ ɔ. Wa ti nɔ ko be nɛ e ye  mluku, se wa ti nɔ fɛɛ nɔ ngɛ su kpakpa nɛ sa kadimi. (Filipi. 2:3) Ngɛ anɔkuale mi ɔ, be komɛ ɔ, e he maa hia nɛ asafo mi nikɔtɔmahi nɛ a wo a nyɛmimɛ nyumuhi kɛ yihi ga. Se kaa bɔ nɛ Paulo pee ɔ, e sɛ nɛ asafo mi nikɔtɔmahi nɛ a ngɔ a juɛmi kɛ ma a nyɛmi ko ní peepee loo munyuhi nɛ e tuɔ nɛ woɔ a mi mi la a nɔ. Mohu ɔ, e sa nɛ a bɔ mɔde nɛ a ngɔ a juɛmi kɛ ma suɔmi nɛ a nyɛmi ɔ ngɛ kɛ ha Yehowa, bɔ nɛ e ngɛ si fĩe ngɛ Mawu sɔmɔmi mi ha, kɛ su kpakpahi nɛ nɔ ɔ ngɛ ɔ nɔ. Asafo mi nikɔtɔmahi nɛ a kɛ a juɛmi maa su kpakpahi nɛ a nyɛmimɛ nyumuhi kɛ yihi ngɛ ɔ nɔ ɔ yeɔ bua nyɛmimɛ ɔmɛ nɛ a nuɔ he kaa asafo ɔ tsuo suɔ mɛ.

20. Mɛni blɔ nɔ asafo mi nikɔtɔmahi ma nyɛ maa ya nɔ nɛ a ná Paulo nɔ hyɛmi nɔ́ ɔ he se?

²⁰ Asafo mi nikɔtɔmahi, ke nyɛ ya nɔ nɛ nyɛ kase Paulo nɔ hyɛmi nɔ́ ɔ, e maa ye bua nyɛ wawɛɛ. Kaa nɔ hyɛmi nɔ́ ɔ, nyɛ ma nyɛ ma hla munyuyi nɛ ji “Paul” ngɛ Watch Tower Publications Index ɔ mi, nɛ nyɛɛ hyɛ munyuyi wayoo nɛ ngɛ lɔ ɔ sisi nɛ ji “example for elders” ɔ. Ke o ngɛ womihi nɛ a tsɔɔ ngɛ lejɛ ɔ eko kanee ɔ, mo bi o he ke, ‘Mɛni blɔ nɔ Paulo nɔ hyɛmi nɔ́ ɔ maa ye bua mi nɛ ma ya nɔ nɛ ma ná bua jɔmi kɛ tsu ní tsumi nɛ a kɛ wo ye dɛ kaa asafo mi nɔkɔtɔma a saminya?’

21. Mɛni nɔ mi mami nɛ asafo mi nikɔtɔmahi ma nyɛ ma ná?

²¹ Asafo mi nikɔtɔmahi, nyɛ kai kaa Yehowa hyɛ we blɔ kaa nyɛɛ pee nyɛ ní kaa nihi nɛ a ye mluku; nɔ́ nɛ e ngɛ hlae nɛ nyɛɛ pee ji kaa nyɛ maa ye anɔkuale. (1 Kor. 4:2) Yehowa bua jɔ bɔ nɛ Paulo tsu ní wawɛɛ nɛ e ye anɔkuale ha a he. O ma nyɛ ma ná nɔ mi mami kaa Mawu bua jɔ níhi nɛ o peeɔ ngɛ e sɔmɔmi mi ɔ he. Yehowa hɛ be “nyɛ ní tsumi kɛ suɔmi nɛ nyɛ je kpo ngɛ e biɛ ɔ he kɛ gu sɔmɔmi nɛ nyɛ ngɛ ni klɔuklɔu ɔmɛ sɔmɔe nɛ nyɛ ya nɔ nɛ nyɛ ngɛ mɛ sɔmɔe ɔ nɔ [jee].”​—Heb. 6:10.