Mɛni he je nɛ nyumu ɔ nɛ a tsɛɛ lɛ ke “Asimasi” ɔ de ke e ma kpata lɛ nitsɛ e gbosi ní ɔ hɛ mi ke e kɛ Rut sɛ gba si himi mi ɔ? (Rut 4:1, 6, NW)

Ngɛ blema Israel ɔ, ke nyumu ko be bi nɛ e gbo ɔ, e tleɔ sane bimihi nɛ nyɛɛ se nɛ ɔ si: Ke e ngɛ e zugba ko ɔ, mɛni maa ba e zugba a nɔ? Anɛ e weku biɛ maa laa kɛ ya neneene lo? Mose Mlaa a maa ye bua wɔ nɛ wa ná sane bimi nɛ ɔmɛ a heto.

Ke nyumu ko gbo kɛ je e zugba he loo e ngɛ ohia yee nɛ e jua e zugba a, kɛ a maa pee zugba a kɛɛ? E nyɛminyumu loo e weku no ko nɛ e su e he haa ma nyɛ ma kpɔ̃ jamɛ a zugba a. Jã nɛ e maa pee ɔ ma ha nɛ zugba be e weku ɔ dɛ jee.​—3 Mose 25:23-28; 4 Mose 27:8-11.

Mɛni blɔ nɔ nɛ jã peemi ha we nɛ nɔ nɛ gbo ɔ weku biɛ nɛ laa? Ke nyumu ko gbo ɔ, e nyɛminyumu ngɔɔ e yo ɔ konɛ e kɛ lɛ nɛ fɔ. Bi nɛ a ma fɔ ɔ maa ngɔ nɔ nɛ gbo ɔ biɛ kɛ fɔ e nɔ, nɛ e maa ngɔ e gbosi ní ɔ hulɔ. Blɔ nya tomi nɛ ɔ hu yeɔ bua nɛ a hyɛɔ yalɔyo ɔ nɔ.​—5 Mose 25:5-7; Mat. 22:23-28.   

Mo susu Naomi si fɔfɔɛ ɔ he nɛ o hyɛ. E kɛ nyumu ko nɛ a tsɛɛ lɛ ke Elimelek ɔ sɛ gba si himi mi. Benɛ Elimelek kɛ e binyumu enyɔ ɔmɛ gbo ɔ, nyumu ko be weku ɔ mi nɛ e maa hyɛ Naomi nɔ. (Rut 1:1-5) Benɛ Naomi kpale kɛ ba Yuda a, e de e nganyɛ Rut kaa e de Boaz nɛ e kpɔ̃ a zugba a. Boaz weku no nitsɛnitsɛ ji Elimelek. (Rut 2:1, 19, 20; 3:1-4) Se Boaz yɔse kaa Elimelek ngɛ weku no kpa ko nɛ e hɛ kɛ su e he wawɛɛ, nɛ́ Baiblo ɔ tsɛɛ lɛ ke “Asimasi.” Lɛ ji nɔ kekleekle nɛ e ngɛ he blɔ kaa e kpɔ̃ɔ Rut.​—Rut 3:9, 12, 13.

Sisije ɔ, “Asimasi” pee klaalo kaa e maa ye bua. (Rut 4:1-4) E ngɛ mi kaa jã peemi biɔ sika mohu lɛɛ, se e le kaa Naomi bwɔ nɛ e be nyɛe ma fɔ, lɔ ɔ he ɔ, nɔ ko be nɛ maa ngɔ Elimelek zugba a kaa gbosi ní. Enɛ ɔ he ɔ, zugba a ma ba piɛɛ Asimasi weto ní ɔmɛ a he, nɛ enɛ ɔ ji sane kpakpa kɛ ha lɛ.

Se Asimasi tsake e juɛmi benɛ e ba le kaa e sa nɛ e ngɔ Rut kaa e yo ɔ. E de ke: “I be nyɛe ma kpɔ̃, ejakaa jã nɛ ma pee ɔ ma nyɛ ma kpata imi nitsɛ ye gbosi ní ɔ hɛ mi.” (Rut 4:5, 6, NW) Mɛni he je nɛ e tsake e juɛmi ɔ?

Ke Asimasi loo nɔ kpa ko ngɔ Rut nɛ e kɛ lɛ fɔ binyumu ɔ, jamɛ a bi ɔ maa ngɔ Elimelek zugba a kaa e gbosi ní. Kɛ jã peemi ma plɛ kɛ “kpata” Asimasi “gbosi ní ɔ” hɛ mi ha kɛɛ? Baiblo ɔ tsɔɔ we, se e ma nyɛ maa ba jã ngɛ yi mi tomi etɛ komɛ a he je.

• Kekleekle ɔ, sika nɛ e kɛ ma kpɔ̃ Elimelek zugba a maa pee yaka, ejakaa nyagbenyagbe ɔ, zugba a ba be e nɔ pee. E maa pee Rut binyumu ɔ nɛ e ma fɔ ɔ nɔ.

• Enyɔne, e ma ba pee e blɔ nya ní tsumi kaa e maa lɛ Naomi kɛ Rut tsuo nɛ e maa hyɛ a nɔ.

• Etɛne, ke Asimasi kɛ Rut fɔ bimɛ ɔ, bi nɛ ɔmɛ kɛ bi kpahi nɛ e ngɛ ɔ ma gba e weto ní ɔmɛ.

• Eywiɛne ɔ, ke Asimasi be bi kpa ko ɔ, lɛɛ binyumu nɛ Rut ma fɔ ɔ maa ngɔ Elimelek kɛ lɛ Asimasi ɔ tsuo a zugba a kaa e weto ní. Enɛ ɔ he ɔ, ke e gbo ɔ, e zugba a ma ya pee bi nɛ e ngɔ Elimelek biɛ kɛ fɔ e nɔ ɔ nɔ́, se pi lɛ Asimasi ɔ nɔ́. Lɔ ɔ he ɔ, Asimasi sume nɛ e ma kpata e weto ní hɛ mi konɛ e kɛ ye bua Naomi. E suɔ nɛ Boaz mo hu nɛ tsu jamɛ a ní tsumi ɔ. Boaz pee jã “bɔ nɛ pee nɛ Elimelek biɛ ko laa ngɛ e nyɛmimɛ ɔmɛ a kpɛti ngɛ e ma a mi.”​—Rut 4:10.

E ngɛ heii kaa Asimasi ngɛ lɛ nitsɛ e biɛ kɛ e gbosi ní ɔmɛ pɛ a he susue. E ngɛ lɛ pɛ e nɔ́ mi foe. E ngɛ mi kaa Asimasi ngɛ mɔde bɔe kaa e maa baa e biɛ yi mohu lɛɛ, se mwɔnɛ ɔ, wa li nɔ tutuutu nɛ e ji. Jehanɛ hu ɔ, Asimasi ná we he blɔ klɛdɛɛ nɛ Boaz ná a. Boaz biɛ ba piɛɛ weku kpa nɛ Mesia nɛ ji Yesu Kristo ɔ maa je mi kɛ ba a he. Hyɛ bɔ nɛ Asimasi nɛ e fo lɛ pɛ e nɔ́ mi, nɛ e sume kaa e maa ye bua nihi nɛ a hia yemi kɛ buami ɔ nyagbe ba ha!​—Mat. 1:5; Luka 3:23, 32