1-2. Loko a maa baptisi nɔ ko ɔ, mɛni e sa kaa e pee?

 JEHA enuɔ nɛ be ɔ, a baptisi nihi ayɔ kake kɛ se nɛ a ba pee Yehowa Odasefohi. A kpɛti nihi fuu kase anɔkuale ɔ ‘kɛ je a bimwɔwi a si tɔɔ’ kaa bɔ nɛ Timoteo nɛ e hi si ngɛ kaseli ɔmɛ a be ɔ mi ɔ pee ɔ. (2 Tim. 3:​14, 15) Ní komɛ hu kase Yehowa he ní be mi nɛ a wa. Lingmi nɛ ɔ, yo ko kɛ Yehowa Odasefohi kase Baiblo ɔ, nɛ pee se ɔ, a baptisi lɛ benɛ e ye jeha 97!

² Ke a kɛ mo ngɛ Baiblo ɔ kasee loo o fɔli nɛ a ji Odasefohi ɔ lɛ a ngɛ mo tsɔsee ɔ, anɛ o ngɛ he susue kaa o ma ha nɛ a baptisi mo lo? Ke jã a, lɛɛ e ji oti kpakpa nɛ o kɛ ma o hɛ mi! Se loko a maa baptisi mo ɔ, e ma bi nɛ o jɔɔ o he nɔ kɛ ha Yehowa. Ngɛ ní kasemi nɛ ɔ mi ɔ, wa maa hyɛ nɔ́ nɛ he nɔ jɔɔmi tsɔɔ. Jehanɛ se hu ɔ, wa maa na nɔ́ he je nɛ e sɛ kaa waa gbla wa nane si kaa wa maa jɔɔ wa he nɔ kɛ ha Mawu nɛ wa ha nɛ a baptisi wɔ be mi nɛ wa pee klaalo.

MƐNI JI HE NƆ JƆƆMI?

3. Moo tsɔɔ ni komɛ nɛ a jɔɔ a he nɔ kɛ ha Yehowa ngɛ Baiblo ɔ mi.

³ Ngɛ Baiblo ɔ mi ɔ, ke nɔ ko jɔɔ e he nɔ kɛ ha Yehowa a, lɔ ɔ tsɔɔ kaa a hla lɛ kɛ ha ní tsumi klɔuu ko. Yehowa hla Israel bi ɔmɛ kaa e ma. Se a kpɛti ni komɛ jɔɔ a he nɔ kɛ ha Yehowa ngɛ blɔ klɛdɛɛ ko nɔ. Kaa nɔ hyɛmi nɔ́ ɔ, Aaron buɔ pɛɛ nɛ a ngɔ sika tsu nɔ́ pɛtɛpɛtɛ nɛ ngɛ tsɛ̃e ɔ kɛ wo hɛ mi. Lɔ ɔ ji “he nɔ jɔɔmi okadi klɔuklɔu ɔ” nɛ. Sika tsu nɔ́ pɛtɛpɛtɛ ɔ tsɔɔ kaa a hla lɛ kaa e sɔmɔ Yehowa ngɛ blɔ klɛdɛɛ ko nɔ, nɛ ji kaa e ma  sɔmɔ kaa osɔfo nɔkɔtɔma ngɛ Israel. (3 Mose 8:9) Nazir bi ɔmɛ ji nihi nɛ mɛ hu a jɔɔ a he nɔ kɛ ha Yehowa ngɛ blɔ klɛdɛɛ nɔ. A je munyungu nɛ ji “Nazir No” ɔ kɛ je Hebri munyungu nɛ ji nazir ɔ mi, nɛ e ma nyɛ maa tsɔɔ “Nɔ Ko Nɛ A Hla Lɛ,” loo “Nɔ Ko Nɛ E Jɔɔ E He Nɔ.” E sa nɛ Nazir bi ɔmɛ nɛ a ye mlaahi nɛ a wo mɛ ngɛ Mose Mlaa a mi ɔ nɔ.—4 Mose 6:​2-8.

4. (a) Ke o jɔɔ o he nɔ kɛ ha Yehowa a, mɛni lɛ ba peeɔ nɔ́ titli ngɛ o si himi mi? (b) Ke a ke nɔ ko nɛ “kua e he” ɔ, mɛni e tsɔɔ? (Hyɛ foni ɔ hulɔ.)

⁴ Ke o jɔɔ o he nɔ kɛ ha Yehowa a, lɔ ɔ tsɔɔ kaa o hla kaa o maa pee Yesu Kristo kaselɔ, nɛ o kɛ Mawu suɔmi nya ní peemi maa pee nɔ́ titli ngɛ o si himi mi. Ke Kristofo no ko jɔɔ e he nɔ kɛ ha Mawu ɔ, mɛni nɛ e biɔ nɛ e pee? Yesu de ke: “Ke nɔ ko suɔ kaa e maa nyɛɛ ye se ɔ, e kua e he.” (Mat. 16:24) Hela munyu nɛ a tsɔɔ sisi ke “e kua e he” ɔ, ma nyɛ maa tsɔɔ hu kaa “e ko pee lɛ nitsɛ e suɔmi nya ní.” Ke o jɔɔ o he nɔ kɛ ha Yehowa a, e sa nɛ o kua nɔ́ fɛɛ nɔ́ nɛ Yehowa bua jɔɛ he ɔ. (2 Kor. 5:​14, 15) Enɛ ɔ ma bi nɛ o kua “he lo ɔ ní tsumi ɔmɛ.” Eko ji ajuama bɔmi. (Gal. 5:​19-21; 1 Kor. 6:18) Ke o kua ní nɛ ɔmɛ ɔ, anɛ e ma ha nɛ si himi ɔ mi nɛ wa ha mo lo? Ke o suɔ Yehowa nɛ o ngɛ nɔ mi mami kaa e mlaa amɛ a nɔ nɛ o maa ye ɔ maa po o he piɛ ɔ, lɛɛ e be bae jã. (La 119:97; Yes. 48:​17, 18) Nyɛminyumu ko nɛ a tsɛɛ lɛ ke Nicholas ɔ de ke, “Nɔ ko ma nyɛ maa na Yehowa mlaa amɛ nɛ e kɛ ma tsu ní ɔ kaa nɔ́ nɛ a wo lɛ tsu nɛ e nyɛ we nɛ e pee nɔ́ nɛ e suɔ. Aloo e ma nyɛ maa na Yehowa mlaa amɛ kaa dadehi nɛ a kɛ po piɛ kɛ wo jatahi a he konɛ a ko ye lɛ awi.”

5. (a) Kɛ o ma plɛ kɛ jɔɔ o he nɔ kɛ ha Yehowa ha kɛɛ? (b) Mɛni slɔɔto lɛ ngɛ he nɔ jɔɔmi kɛ baptisimi a kpɛti? (Hyɛ foni ɔ hulɔ.)

⁵ Kɛ o ma plɛ kɛ jɔɔ o he nɔ kɛ ha Yehowa ha kɛɛ? Lɔ ɔ ji kaa o maa sɔle nɛ o wo lɛ si kaa o ma ja lɛ pɛ, nɛ o maa ngɔ e suɔmi nya ní peemi kɛ ye kekle blɔ he ngɛ o si himi mi. Jã nɛ  o maa pee ɔ tsɔɔ kaa o ngɛ Yehowa si woe kaa o maa ya nɔ maa suɔ lɛ “kɛ o tsui tsuo kɛ o susuma tsuo kɛ o juɛmi tsuo kɛ o he wami tsuo.” (Maak. 12:30) He nɔ jɔɔmi ji nɔ́ ko nɛ o maa pee ngɛ laami mi, o kɛ Yehowa pɛ. Se baptisimi lɛɛ, o maa pee ngɛ ma hɛ mi, e haa nɛ ni kpahi naa kaa o jɔɔ o he nɔ kɛ ha Yehowa momo. Ke o jɔɔ o he nɔ kɛ ha Yehowa a, e tsɔɔ kaa o kã kita ko nɛ hɛdɔ ngɛ he, nɛ Yehowa hyɛɔ blɔ kaa o maa ye jamɛ a kita a nɔ.—Fiɛɛ. 5:​4, 5.

MƐNI HE JE NƐ E SA KAA O JƆƆ O HE NƆ KƐ HA YEHOWA?

6. Mɛni ma nyɛ maa wo nɔ ko he wami konɛ e jɔɔ e he nɔ kɛ ha Yehowa?

⁶ Suɔmi ji nɔ́ titli nɛ maa wo mo he wami konɛ o jɔɔ o he nɔ kɛ ha Yehowa. Suɔmi nɛ o ngɛ kɛ ha Yehowa a pi he numi ko kɛkɛ, mohu ɔ, e daa si ngɛ “nile nitsɛnitsɛ” kɛ “mumi mi níhi a sisi numi” nɔ. Lɔ ɔmɛ ji níhi nɛ o kase ngɛ Yehowa he nɛ ha nɛ o ná suɔmi nɛ mi wa kɛ ha lɛ ɔ nɛ. (Kol. 1:9) Baiblo ɔ nɛ o kase ɔ ha nɛ o ná nɔ mi mami kaa (1) Yehowa ji nɔ nɛ ngɛ nitsɛnitsɛ, (2) Baiblo ɔ ji e Munyu, kɛ (3) e guɔ e we asafo ɔ nɔ kɛ tsuɔ e yi mi tomihi a he ní.

7. Mɛni e sa kaa waa ya nɔ nɛ waa pee loko waa jɔɔ wa he nɔ kɛ ha Mawu?

⁷ E sa nɛ nihi nɛ a jɔɔ a he nɔ kɛ ha Yehowa a nɛ a le Baiblo mi sisije tsɔɔmi ɔmɛ, nɛ a kɛ e mlaa amɛ nɛ tsu ní. A peeɔ nɔ́ fɛɛ nɔ́ nɛ a ma nyɛ konɛ a kɛ ni kpahi nɛ sɛɛ a hemi kɛ yemi ɔ he ní. (Mat. 28:​19, 20) Enɛ ɔ ha nɛ suɔmi nɛ a ngɛ kɛ ha Yehowa a mi ba wa, nɛ a suɔ kaa a ma ja lɛ pɛ kɛ a tsui tsuo. Anɛ jã nɛ e ji ngɛ o blɔ fa mi lo? Ke o ná suɔmi nɛ ɔ, e maa ye bua mo nɛ o be he nɔ jɔɔmi kɛ baptisimi nae kaa  nɔ́ ko nɛ e sa kaa o pee kɛ sa o Baiblo tsɔɔlɔ ɔ loo o fɔli a hɛ mi. Jã nɔuu kɛ̃ nɛ o be susue kaa e ji nɔ́ ko nɛ e sa nɛ o pee akɛnɛ o huɛmɛ ngɛ pee ɔ he je.

8. Mɛni blɔ nɔ nɛ hɛsa kpo nɛ o ma je ɔ maa ye bua mo konɛ o mwɔ o yi mi kpɔ kaa o maa jɔɔ o he nɔ kɛ ha Yehowa? (La 116:​12-14)

⁸ Ke o pue o yi mi tɛ ngɛ níhi tsuo nɛ Yehowa pee ha mo ɔ he ɔ, lɔ ɔ ma ha nɛ o je hɛsa kpo, nɛ o maa suɔ kaa o maa jɔɔ o he nɔ kɛ ha lɛ. (Kane La 116:​12-14.) Ngɛ anɔkuale mi ɔ, Baiblo ɔ tsɔɔ kaa “nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si” ɔ je Yehowa ngɔ. (Yak. 1:17) Nike ní nɛ pe kulaa nɛ Yehowa kɛ ha wɔ ɔ ji e Bi Yesu. Mo susu he nɛ o hyɛ! Kpɔmi nɔ́ ɔ ha nɛ huɛ bɔmi nɛ mi wa ba ngɛ o kɛ Yehowa nyɛ kpɛti. Jehanɛ hu ɔ, Yehowa wo si kaa o ma nyɛ maa hi si kɛ ya neneene. (1 Yoh. 4:​9, 10, 19) Blɔ nɛ hi pe kulaa nɛ o ma nyɛ maa gu nɔ kɛ tsɔɔ kaa o bua jɔ suɔmi nɛ se be nɛ Yehowa je kpo kɛ tsɔɔ mo, kɛ jɔɔmihi nɛ o nine su nɔ ɔ he ji kaa o maa jɔɔ o he nɔ kɛ ha Yehowa. (5 Mose 16:17; 2 Kor. 5:15) A tu bɔ nɛ wa ma plɛ kɛ je hɛsa nɛ ɔ kpo ɔ he munyu ngɛ ní kasemi 46 oti 4, nɛ ngɛ Ná Bua Jɔmi Kɛ Ya Neneene! womi ɔ mi ɔ mi. O maa na video nɛ e nya kɛmi ji hɛngmɛfia 3, nɛ e yi ji, Nike Níhi Nɛ Waa Kɛ Haa Mawu ɔ ngɛ lejɛ ɔ.

ANƐ O PEE KLAALO KAA O MAA JƆƆ O HE NƆ HA YEHOWA NƐ A BAPTISI MO LO?

9. Mɛni he je nɛ e sɛ nɛ nɔ ko nɛ jɔɔ e he nɔ kɛ ha Yehowa akɛnɛ ni kpahi ngɛ jã pee he je?

⁹ Eko ɔ, e maa pee mo kaa o pee we klaalo kaa o maa jɔɔ o he nɔ kɛ ha Yehowa nɛ a baptisi mo. E ma nyɛ maa ba kaa e sa nɛ o pee tsakemi komɛ ngɛ o si himi mi nɛ o ba o je mi ngɛ Yehowa mlaa amɛ a nya. Aloo eko ɔ, o hia be babauu konɛ o kɛ ha nɛ o hemi kɛ yemi ɔ mi nɛ wa. (Kol. 2:​6, 7) E slo nihi nɛ waa kɛ kaseɔ Baiblo ɔ a kpɛti nɔ fɛɛ nɔ nyɛmi kɛ e mɔde bɔmi. Enɛ ɔ he ɔ, nihewi kɛ yihewi tsuo be nyɛe maa pee klaalo ngɛ be kake mi konɛ a jɔɔ a he nɔ kɛ ha Yehowa nɛ a baptisi mɛ. Moo bɔ mɔde kaa o maa le tsakemihi nɛ e sa kaa o pee, nɛ o pee níhi nɛ ma ha nɛ o ya o hɛ mi, nɛ o ko ngɔ o he kɛ to ni kpahi a he.—Gal. 6:​4, 5.

10. Ke o yɔse kaa o pee we klaalo kaa o maa jɔɔ o he nɔ kɛ ha Yehowa konɛ a baptisi mo ɔ, mɛni o ma nyɛ maa pee? (Hyɛ daka nɛ ji, “ Kɛ Ha Nihewi Kɛ Yihewi Nɛ A Ngɛ Mɛ Tsɔsee Ngɛ Anɔkuale ɔ Mi” ɔ hulɔ.)

¹⁰ Ke o yɔse kaa o pee we klaalo kaa o maa jɔɔ o he nɔ kɛ ha Yehowa po ɔ, moo ya nɔ nɛ o kɛ pee oti. Moo sɔle nɛ o bi Yehowa nɛ e ye bua mo konɛ o pee tsakemihi nɛ e sa kaa o pee ngɛ o si himi mi ɔ. (Filip. 2:13; 3:16) O ma nyɛ ma ná nɔ mi mami kaa Yehowa maa bu o sɔlemi ɔ tue nɛ e ye bua mo.—1 Yoh. 5:14.

NƆ́ HE JE NƐ NI KOMƐ GBLAA A NANE SI

11. Mɛni Yehowa maa pee kɛ ye bua wɔ konɛ waa ya nɔ nɛ waa ye lɛ anɔkuale?

¹¹ Ni komɛ ngɛ nɛ a he su kaa a maa jɔɔ a he nɔ kɛ ha Yehowa nɛ baptisi mɛ, se kɛ̃ ɔ, a toɔ tsle. Eko ɔ, a ma de ke, ‘Nɛ ke i ya pee yayami nɛ hɛdɔ ngɛ he ngɛ ye baptisimi se nɛ a fiee mi kɛ je asafo ɔ mi hu nɛɛ?’ Ke o nuɔ he jã a, lɛɛ mo ná nɔ mi mami kaa Yehowa ma ha mo nɔ́ fɛɛ nɔ́ nɛ o hia ‘konɛ o nyɛɛ bɔ nɛ sa Yehowa, nɛ́ o sa e hɛ mi kɛ pi si.’ (Kol. 1:10) Jehanɛ se hu ɔ, e maa wo mo he wami konɛ o pee nɔ́ nɛ da, ejakaa e ye bua nihi babauu nɛ a pee jã, lɔ ɔ he ɔ, e maa ye bua mo hulɔ. (1 Kor. 10:13) Enɛ ɔ ji yi mi tomi kake he je nɛ nihi bɔɔ ko pɛ lɛ a fieeɔ mɛ kɛ jeɔ Kristofohi asafo ɔ mi ɔ nɛ. Yehowa yeɔ bua e we bi konɛ a ya nɔ nɛ a ye lɛ anɔkuale.

12. Mɛni maa ye bua wɔ konɛ wa ko pee yayami nɛ hɛdɔ ngɛ he?

¹² Akɛnɛ wa ji adesahi nɛ wa yi mluku he je ɔ, wa ma nyɛ maa nu he kaa waa pee nɔ́ nɛ dɛ. (Yak. 1:14) Se e sa nɛ o hla nɔ́ nɛ o maa pee ke  o kɛ ka ko kpe. Ngɛ anɔkuale mi ɔ, mo nitsɛ lɛ o maa ma o juɛmi nya si ngɛ bɔ nɛ o maa ba o je mi ha a he. Se ni komɛ tsɔɔ kaa wa be nyɛe ma kudɔ wa he numi kɛ wa ní peepee. Enɛ ɔ ji lakpa. O ma nyɛ ma kudɔ susumi loo he numi nɛ dɛ nɛ o náa a. Ke o kɛ ka ko kpe po ɔ, o ma nyɛ maa hla kaa o maa pee nɔ́ nɛ da. Jehanɛ hu ɔ, ní komɛ ngɛ nɛ o ma nyɛ maa pee konɛ o yu o he ngɛ yayami he. Kaa nɔ hyɛmi nɔ́ ɔ, moo sɔle nɛ o kase Mawu Munyu ɔ saminya, nɛ o ya asafo mi kpehi kɛ fiɛɛmi be fɛɛ be. Ke o peeɔ ní nɛ ɔmɛ daa ligbi ɔ, e maa ye bua mo konɛ o ya nɔ nɛ o ye Yehowa anɔkuale. Mo kai kaa Yehowa maa ye bua mo konɛ o pee jã.—Gal. 5:16.

13. Mɛni nɔ hyɛmi nɔ́ kpakpa nɛ Yosef pee kɛ ha wɔ?

¹³ Ke o sɛ hlami nɛ o susu nɔ́ nɛ o maa pee ke o kɛ ka ko kpe ɔ he ɔ, e be yee ha mo kaa o maa ye o he nɔ jɔɔmi kita nɛ o kã Yehowa a nɔ. Baiblo ɔ ha nɛ wa le kaa ni komɛ ya nɔ nɛ a ye Yehowa anɔkuale, e ngɛ mi kaa mɛ hu a yi mluku mohu lɛɛ. Kaa nɔ hyɛmi nɔ́ ɔ, Potifar yo ɔ ka si abɔ kaa e kɛ Yosef ma ná bɔmi, se Yosef le nɔ́ nɛ e sa kaa e pee ngɛ si fɔfɔɛ ɔ he momo. Baiblo ɔ tsɔɔ kaa “Yosef kplɛɛ we,” nɛ e de ke: “Mɛni he je mɔ nɛ ma tɔ̃ tɔmi agbo nɛ ɔ, nɛ ma pee yayami kaa kikɛ nɛ ɔ kɛ si Mawu?” (1 Mose 39:​8-10) E ngɛ heii kaa loko Yosef kɛ jamɛ a ka a maa kpe ɔ, e le nɔ́ nɛ e sa kaa e pee momo. Enɛ ɔ he ɔ, e he wɛ ha lɛ kaa e maa pee nɔ́ nɛ da.

14. Mɛni o ma nyɛ maa pee konɛ o nyɛ nɛ o da kahi a nya?

¹⁴ Mɛni blɔ nɔ o maa gu kɛ kase Yosef konɛ o ya nɔ nɛ o ye Mawu anɔkuale ke o kɛ ka ko kpe? Moo ma o juɛmi nya si amlɔ nɛ ɔ ngɛ nɔ́ nɛ o maa pee ke o kɛ ka ko kpe ɔ he. O kɛ oya yemi nɛ kua níhi nɛ Yehowa sume, nɛ ko susu jamɛ a ní ɔmɛ a he hulɔ. (La 97:10; 119:165) Ke o pee jã nɛ o kɛ ka ko kpe ɔ, o be yayami pee, ejakaa o le nɔ́ nɛ e sa kaa o pee momo.

15. Mɛni nɔ ko ma nyɛ maa pee kɛ tsɔɔ kaa e ngɛ Yehowa se “blɔ hlae wawɛɛ”? (Hebri Bi 11:6)

¹⁵ Ngɛ o blɔ fa mi ɔ, eko ɔ, o le kaa o ba na anɔkuale ɔ, nɛ o suɔ nɛ o sɔmɔ Yehowa kɛ o tsui tsuo. Se kɛ̃ ɔ, o nuɔ he kaa o pee we klaalo kaa o maa jɔɔ o he nɔ kɛ ha Yehowa nɛ a baptisi mo. Ke jã a, mo hu o ma nyɛ maa pee nɔ́ nɛ Matsɛ David pee ɔ. O ma nyɛ maa sɔle ha Yehowa nɛ o de lɛ ke: “Mawu, hyɛ ye tsui mi nɛ o le mi. Kaa mi nɛ o hyɛ, nɛ o na níhi nɛ ngɛ ye juɛmi mi. Hyɛ kaa yayami ko pa ngɛ ye mi lo, nɛ o ngɔ mi kɛ fɔ blɔ nɛ kɛ nɔ yaa  neneene wami mi ɔ nɔ.” (La 139:​23, 24) Yehowa jɔɔ nihi nɛ a ngɛ e se “blɔ hlae wawɛɛ” ɔ. Ke o ngɛ mɔde bɔe kaa o maa jɔɔ o he nɔ kɛ ha Yehowa nɛ a baptisi mo ɔ, lɔ ɔ tsɔɔ kaa o ngɛ e se blɔ hlae.—Kane Hebri Bi 11:6.

YAA NƆ NƐ O HƐ KƐ SU YEHOWA HE

16-17. Mɛni blɔ nɔ nɛ Yehowa gblaa nihi nɛ a fɔli ji Yehowa Odasefohi ɔ kɛ baa e ngɔ? (Yohane 6:44)

¹⁶ Yesu tsɔɔ kaa Yehowa lɛ gbla e kaseli ɔmɛ kɛ ba e ngɔ. (Kane Yohane 6:44.) Mo susu bɔ nɛ enɛ ɔ ngɛ bua jɔmi ha, kɛ bɔ nɛ o ma plɛ kɛ ná he se ha a he nɛ o hyɛ. Yehowa na nɔ́ kpakpa ko ngɛ nɔ fɛɛ nɔ nɛ e gbla lɛ kɛ ba e ngɔ ɔ he. E naa a kpɛti nɔ fɛɛ nɔ kaa “e weto ní klɛdɛɛ” loo “e weto ní nɛ e fiɛ we he.” (5 Mose 7:6; sisi ningma) Jã nɔuu kɛ̃ nɛ e naa mo hulɔ.

¹⁷ Eko ɔ, o ji niheyo loo yiheyo nɛ o fɔli ji Yehowa Odasefohi. O ma nyɛ maa nu he kaa akɛnɛ o fɔli ɔmɛ ngɛ Yehowa sɔmɔe he je nɛ mo hu o ngɛ lɛ sɔmɔe ɔ nɛ. Eko ɔ, o ma susu kaa Yehowa nitsɛ gblɛ mo kɛ bɛ e ngɔ. Se kɛ̃ ɔ, Baiblo ɔ de ke: “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.” (Yak. 4:8; 1 Kron. 28:9) Ke o sɛ hlami nɛ o hɛ kɛ su Yehowa he ɔ, lɛ hu e maa hɛ kɛ su o he. Yehowa nɛ mo kaa o piɛɛ kuu ko he kɛkɛ. E gblaa nɔ fɛɛ nɔ kɛ baa e ngɔ, nɛ nihi nɛ a tsɔse mɛ ngɛ anɔkuale ɔ mi hu piɛɛ he. Kaa bɔ nɛ Yakobo 4:8 ɔ tsɔɔ ɔ, ke nɔ ko sɛ hlami kaa e maa hɛ kɛ su Yehowa he ɔ, Yehowa hu hɛɔ kɛ suɔ e he.—Kɛ to 2 Tɛsalonika Bi 2:13 ɔ he.

18. Mɛni he wa ma susu ngɛ ní kasemi nɛ nyɛɛ se ɔ mi? (La 40:8)

¹⁸ Ke o jɔɔ o he nɔ kɛ ha Yehowa nɛ a baptisi mo ɔ, lɔ ɔ tsɔɔ kaa o ngɛ Yesu kasee. E je e tsui mi nɛ e pee nɔ́ fɛɛ nɔ́ nɛ e Tsɛ ɔ de lɛ ɔ. (Kane La 40:8; Heb. 10:7) Ngɛ ní kasemi nɛ nyɛɛ se ɔ mi ɔ, wa ma susu nɔ́ nɛ maa ye bua mo konɛ o ya nɔ nɛ o sɔmɔ Yehowa nɛ o ye lɛ anɔkuale ngɛ o baptisimi se ɔ he.