1. Kɛ Mawu sɔmɔli anɔkualetsɛmɛ komɛ ma nyɛ maa nu he ha kɛɛ?

 LEMI nɛ wa le kaa Yehowa bua jɔ e we bi tsuo a he ɔ woɔ wa bua wawɛɛ! Baiblo ɔ de ke: ‘Yehowa bua jɔɔ e we bi a he.’ (La 149:4) Se be komɛ ɔ, ni komɛ a kɔni mi jɔ̃ɔ nɛ a biɔ ke, ‘Anɛ Yehowa bua jɔ ye he niinɛ lo?’ Yehowa sɔmɔli anɔkualetsɛmɛ nɛ a hi si blema a hu a kɔni mi jɔ̃ɔ be komɛ, nɛ e he waa ha mɛ kaa a ma he ye kaa Yehowa bua jɔ a he.—1 Sam. 1:​6-10; Hiob 29:​2, 4; La 51:11.

2. Mɛnɔmɛ lɛ Yehowa bua jɔɔ a he?

² Baiblo ɔ tsɔɔ heii kaa adesahi nɛ a yi mluku ɔ ma nyɛ maa pee níhi nɛ ma ha nɛ Yehowa bua nɛ jɔ a he loo e kplɛɛ a nɔ. Ngɛ mɛni blɔ nɔ? E sa nɛ wa ná hemi kɛ yemi ngɛ Yesu Kristo mi nɛ wa ha nɛ a baptisi wɔ. (Yoh. 3:16) Ke wa pee jã a, wa ngɛ ni kpahi dee ke wa pia wa he ngɛ wa he yayami ɔmɛ a he, nɛ wa wo Mawu si kaa wa maa pee e suɔmi nya ní. (Níts. 2:38; 3:19) Ke wa pee ní nɛ ɔmɛ konɛ huɛ bɔmi kpakpa nɛ hi waa kɛ Yehowa wa kpɛti ɔ, e bua maa jɔ. Ke wa ya nɔ nɛ wa bɔ mɔde kaa wa maa ye wa he nɔ jɔɔmi kita a nɔ ɔ, Yehowa maa kplɛɛ wa nɔ nɛ e kɛ wɔ maa pee e huɛmɛ.—La 25:14.

3. Mɛni sane bimi etɛ komɛ a he wa ma susu?

³ Mɛni he je nɛ be komɛ ɔ, ni komɛ ma nyɛ maa nu he kaa Mawu kplɛɛ we a nɔ ɔ? Mɛni Yehowa peeɔ kɛ tsɔɔ kaa e kplɛɛ wa nɔ loo e bua jɔ wa he? Mɛni ma nyɛ maa ye bua Kristofo no ko nɛ e ná nɔ mi mami nɛ mi wa kaa Mawu bua jɔ e he?

 NƆ́ HE JE NƐ NI KOMƐ MA NYƐ MAA NU HE KAA YEHOWA KPLƐƐ WE A NƆ

4-5. Ke wa nu he kaa wa he be se nami po ɔ, mɛni nɔ mi mami wa ma nyɛ ma ná?

⁴ Kɛ je wa jokuɛwi a si tɔɔ nɛ wa kpɛti nihi fuu nuɔ he kaa wa he be se nami. (La 88:15) Nyɛminyumu ko nɛ a tsɛɛ lɛ ke Adrián ɔ de ke: “I nuɔ he be fɛɛ be kaa ye he be se nami. I kaiɔ kaa benɛ i ji jokuɛ ɔ, ke a ngɛ nihi nɛ a maa ya Paradeiso ɔ he munyu tue ɔ, i nuɔ he kaa i piɛɛ we he, se kɛ̃ ɔ, i sɔleɔ kaa Yehowa nɛ e ye bua ye weku ɔ konɛ waa sɛ Paradeiso ɔ mi.” Tony nɛ e weku li pi Odasefohi ɔ de ke: “Ye fɔli ɔmɛ de we mi gblee kaa a suɔ mi loo a bua jɔ ye he. Be fɛɛ be ɔ, nɔ́ nɛ a deɔ mi ji, o ma nyɛ maa pee babauu pe bɔ nɛ o pee nɛ ɔ.”

⁵ Ke wa nuɔ he be komɛ kaa wa he be se nami ɔ, e sa nɛ wa kai kaa Yehowa nitsɛ lɛ gbla wɔ kɛ ba e ngɔ. (Yoh. 6:44) E naa ni kpakpahi ngɛ wa mi nɛ eko ɔ, wɔ nitsɛmɛ po wa nɛ, nɛ e le nɔ́ nɛ ngɛ wa tsui mi. (1 Sam. 16:7; 2 Kron. 6:30) Enɛ ɔ he ɔ, ke Yehowa de ke wa he jua wa kɛ ha lɛ ɔ, e sa nɛ wa he ye.—1 Yoh. 3:​19, 20.

6. Kɛ bɔfo Paulo nu he ngɛ yayamihi nɛ e pee kɛ be ɔ he ha kɛɛ?

⁶ Loko wa ma ba kase anɔkuale ɔ, wa kpɛti ni komɛ pee ní komɛ nɛ eko ɔ, e haa nɛ wa he nile buɔ wɔ fɔ loloolo. (1 Pet. 4:3) Ngɛ anɔkuale mi ɔ, e he waa kɛ haa Kristofohi anɔkualetsɛmɛ po kaa a maa hwu kɛ si a gbɔjɔmihi. Anɛ mo hu o he nile buɔ mo fɔ lo? Ke jã a, lɛɛ o bua nɛ jɔ ejakaa Yehowa sɔmɔli anɔkualetsɛmɛ komɛ po nu he jã be komɛ. Kaa nɔ hyɛmi nɔ́ ɔ, ke bɔfo Paulo susu e gbɔjɔmi ɔmɛ a he ɔ, e haa nɛ e nuɔ he kaa e ní ngɛ mɔbɔ. (Rom. 7:24) Ngɛ anɔkuale mi ɔ, Paulo pia e he ngɛ e yayami ɔmɛ a he, nɛ e ha nɛ a baptisi lɛ. Se kɛ̃ ɔ, e tsɔɔ kaa lɛ ji “bɔfo ɔmɛ a kpɛti nɔ nyafii pe kulaa,” nɛ e ji yayami peelɔ “kpanaku” hulɔ.—1 Kor. 15:9; 1 Tim. 1:15.

7. Mɛni e sa nɛ e hi wa juɛmi mi ngɛ yayamihi nɛ wa pee kɛ be ɔ a he?

⁷ Wa hiɔwe Tsɛ ɔ wo wɔ si kaa ke wa pee yayami ko nɛ wa pia wa he ɔ, e kɛ maa ke wɔ. (La 86:5) Enɛ ɔ he ɔ, ke wa tsake wa tsui niinɛ ngɛ yayami ko nɛ wa pee kɛ be ɔ he ɔ, wa ma nyɛ ma ná nɔ mi mami kaa Yehowa kɛ wa tɔmi ɔ ke wɔ.—Kol. 2:13.

8-9. Ke o nuɔ he kaa o be nyɛe maa pee nɔ́ ko nɔ́ ko nɛ ma ha nɛ Yehowa nɛ kplɛɛ o nɔ ɔ, mɛni ma nyɛ maa ye bua mo?

⁸ Wɔ tsuo wa suɔ nɛ waa kɛ wa nyɛmi tsuo nɛ sɔmɔ Yehowa. Se kɛ̃ ɔ, ni komɛ ma nyɛ maa nu he kaa nɔ́ ko be nɛ wa ma nyɛ maa pee nɛ ma ha nɛ Yehowa nɛ kplɛɛ wa nɔ. Nyɛmiyo ko nɛ a tsɛɛ lɛ ke Amanda a de ke: “I susuɔ kaa loko ma nyɛ ma sɔmɔ Yehowa kɛ ye nyɛmi tsuo ɔ, ja i peeɔ babauu be fɛɛ be. Enɛ ɔ ha nɛ behi fuu ɔ, i bɔɔ mɔde kaa ma pee babauu pe bɔ nɛ ma nyɛ. Nɛ ke i yi manye ɔ, ye kɔni mi jɔ̃ɔ, nɛ i susuɔ kaa i ha nɛ Yehowa hu nine nyɛ si.”

⁹ Ke o nuɔ he kaa o be nyɛe maa pee nɔ́ ko nɔ́ ko nɛ ma ha nɛ Yehowa nɛ kplɛɛ o nɔ loo e bua nɛ jɔ o he ɔ, mɛni ma nyɛ maa ye bua mo? Mo kai kaa Yehowa nuɔ nɔ́ sisi nɛ e be kpɛii. E hyɛ we blɔ kaa waa pee nɔ́ nɛ wa be nyɛe maa pee. Ke waa kɛ wa nyɛmi tsuo pee nɔ́ ko kɛ ha Yehowa a, e bua jɔɔ he. Jehanɛ hu ɔ, o ma nyɛ ma susu nɔ hyɛmi níhi nɛ ngɛ Baiblo ɔ mi nɛ kɔɔ nihi nɛ a kɛ a tsui tsuo sɔmɔ Yehowa a he. Kaa nɔ hyɛmi nɔ́ ɔ, mo susu Paulo he nɛ o hyɛ. E ngɔ e he wami tsuo kɛ tsu ní jehahi babauu nɛ e hia blɔ si tomi akpehi abɔ, nɛ e to asafohi fuu sisi. Se benɛ e si himi tsake nɛ e nyɛ we nɛ e tsu fiɛɛmi ní tsumi ɔ vii ɔ, anɛ Yehowa bua jɔɛ e he hu lo? Dɛbi. E ya nɔ nɛ e pee nɔ́ nɛ e ma nyɛ, nɛ  Yehowa jɔɔ lɛ. (Níts. 28:​30, 31) Jã nɔuu kɛ̃ nɛ eko ɔ, be komɛ ɔ, wa si fɔfɔɛ ma nyɛ ma tsake nɛ wa be nyɛe maa pee babauu ha Yehowa kaa bɔ nɛ wa ngɛ hlae ɔ. Ke e ba jã a, o kɔni mi nɛ ko jɔ̃, ejakaa nɔ́ nɛ he hia Yehowa titli ji yi mi tomi he je nɛ wa ngɛ lɛ sɔmɔe. Nyɛ ha nɛ waa hyɛ blɔ komɛ a nɔ nɛ Yehowa guɔ kɛ tsɔɔ kaa e bua jɔ wa he.

MƐNI YEHOWA PEEƆ KƐ TSƆƆ KAA E BUA JƆ WA HE?

10. Mɛni blɔ nɔ wa maa gu kɛ nu kaa Yehowa ngɛ wɔ dee ke e bua jɔ wa he? (Yohane 16:27)

¹⁰ E ha wɔ Baiblo ɔ. Yehowa haa nɛ e we bi naa kaa e suɔ mɛ nɛ e bua jɔ a he. Ngmami ɔ tsɔɔ si fɔfɔɛhi enyɔ a mi nɛ Yehowa de Yesu kaa lɛ ji e Bi nɛ e suɔ, nɛ e bua jɔ e he. (Mat. 3:17; 17:5) Anɛ o maa suɔ nɛ Yehowa nɛ de mo kaa e bua jɔ o he lo? Yehowa kɛ wɔ tui munyu tɛɛ kɛ ji hiɔwe, mohu ɔ, e guɔ Baiblo ɔ nɔ nɛ e kɛ wɔ tuɔ munyu. Ke wa kane Yesu munyuhi nɛ ngɛ Sane Kpakpa amɛ a mi ɔ, e ngɛ kaa nɔ́ nɛ wa ngɛ Yehowa gbi nue nɛ e ngɛ wɔ dee ke e bua jɔ wa he. (Kane Yohane 16:27.) Yesu kase bɔ nɛ e Tsɛ ɔ ngɛ ha a pɛpɛɛpɛ. Enɛ ɔ he ɔ, ke wa kane ngɛ Baiblo ɔ mi kaa Yesu bua jɔ e kaseli anɔkualetsɛmɛ nɛ a yi mluku ɔ a he ɔ, wa ma nyɛ maa po he foni kaa Yehowa ngɛ wɔ hu dee ke e bua jɔ wa he.—Yoh. 15:​9, 15.

11. Mɛni he je nɛ ke waa kɛ haomi ko ngɛ kpee ɔ, lɔ ɔ tsɔɔ we kaa Yehowa kplɛɛ we wa nɔ ɔ? (Yakobo 1:12)

¹¹ E haa wɔ wa hiami níhi. Yehowa pee klaalo kaa e maa ye bua wɔ kɛ gu wa he lo nya hiami níhi nɛ e haa wɔ ɔ nɔ. Kaa bɔ nɛ e ba ngɛ dalɔ Hiob blɔ fa mi ɔ, be komɛ ɔ, Yehowa ngmɛɔ blɔ nɛ wa naa nɔ́. (Hiob 1:​8-11) Se ke waa kɛ kahi ngɛ kpee ɔ, lɔ ɔ tsɔɔ we kaa Yehowa kplɛɛ we wa nɔ. Mohu ɔ, ka nɛ ɔmɛ haa nɛ wa náa he blɔ kɛ tsɔɔ kaa wa suɔ Mawu nɛ wa heɔ lɛ yeɔ. (Kane Yakobo 1:12.) Jehanɛ se hu ɔ, wa naa bɔ nɛ Yehowa suɔ wɔ ha, kɛ bɔ nɛ e yeɔ bua wɔ kɛ daa kahi a nya ha.

12. Mɛni wa ma nyɛ maa kase ngɛ Dmitrii níhi a si kpami ɔ mi?

¹² Mo susu nyɛminyumu ko nɛ a tsɛɛ lɛ ke Dmitrii nɛ e je Asia a nɔ hyɛmi nɔ́ ɔ he nɛ o hyɛ. E ní tsumi puɛ, nɛ e hla ní tsumi nyɔhiɔhi babauu se e nɛ eko. Enɛ ɔ he ɔ, e mwɔ e yi mi kpɔ kaa e ma tsu fiɛɛmi ní tsumi ɔ wawɛɛ kɛ tsɔɔ kaa e ngɛ Yehowa mi hemi kɛ yemi. Be babauu ba pue mi, se loloolo ɔ, e nɛ  ní tsumi ko nɛ e ma tsu. Lɔ ɔ se ɔ, e ba nu hiɔ ko nɛ nya wa, nɛ enɛ ɔ ha nɛ e tlɔ tsu mi. E susu po kaa pi huno loo tsɛ kpakpa ji lɛ, nɛ e peeɔ lɛ kaa Yehowa bua jɔɛ e he hu. Kɛkɛ nɛ ligbi ko ɔ, e biyo ko ngma munyuhi nɛ ngɛ Yesaya 30:15 ɔ kɛ ya ha lɛ. Lejɛ ɔ de ke: “Nyɛɛ ngɔ nyɛ hɛ ngɔ fɔ ye nɔ kpoo. Ja jã loko nyɛ he maa wa.” E biyo ɔ ngɔ womi ɔ kɛ ba ha lɛ ngɛ e sa a he nɛ e de lɛ ke, “Papaa, be fɛɛ be nɛ o maa hao ɔ, mo kai ngmami nɛ ɔ.” Dmitrii ba yɔse kaa ngɛ haomi nɛ e kɛ ngɛ kpee ɔ tsuo se ɔ, Yehowa yeɔ bua e kɛ e weku ɔ wawɛɛ, nɛ a náa niye ní, tadehi, kɛ he ko nɛ a kɛ a yi fɔɔ. Dmitrii de ke: “I ba na kaa nɔ́ nɛ e sa nɛ ma pee pɛ ji kaa ma pee kpoo nɛ ma ya nɔ nɛ ma ngɔ ye hɛ kɛ fɔ ye Mawu ɔ nɔ.” Mo hu ke o kɛ haomi kaa jã ngɛ kpee ɔ, o ma nyɛ ma ná nɔ mi mami kaa Yehowa susuɔ o he, nɛ e maa ye bua mo kɛ da nya.

13. Mɛnɔmɛ a nɔ Yehowa ma nyɛ maa gu kɛ ha nɛ waa le kaa e bua jɔ wa he, nɛ ngɛ mɛni blɔ nɔ?

¹³ E guɔ wa nyɛmimɛ ɔmɛ a nɔ. Yehowa guɔ wa nyɛmimɛ ɔmɛ a nɔ kɛ haa nɛ wa naa kaa e bua jɔ wa he. Kaa nɔ hyɛmi nɔ́ ɔ, e ma nyɛ ma ha nɛ nyɛmi ko nɛ wo wɔ he wami ngɛ be nɛ sa mi. Nyɛmiyo ko nɛ e ngɛ Asia a ná enɛ ɔ mi níhi a si kpami benɛ e kɛ haomi ko nɛ nya wa kpe ɔ. E ní tsumi je e dɛ, nɛ e ba nu hiɔ wawɛɛ hulɔ. E huno ɔ hu pee yayami nɛ hɛdɔ ngɛ he, nɛ a ngɔ he blɔ nɛ e ngɛ kaa asafo mi nɔkɔtɔma a ngɛ e dɛ. Nyɛmiyo ɔ de ke: “I nui nɔ́ nɛ ya nɔ ngɛ jamɛ a be ɔ mi ɔ sisi, i susu kaa eko ɔ, i pee yayami ko nɛ lɔ ɔ ha nɛ Yehowa kplɛɛ we ye nɔ hu.” Wa nyɛmiyo ɔ kpa Yehowa pɛɛ konɛ e ha nɛ e le kaa loloolo ɔ, e bua jɔ e he. Mɛni Yehowa pee kɛ ye bua lɛ? Nyɛmiyo ɔ de ke: “Asafo mi nikɔtɔma amɛ kɛ mi tu munyu nɛ a ha nɛ i ná nɔ mi mami kaa Yehowa suɔ mi.” Pee se ɔ, e kpale kpa Yehowa  pɛɛ konɛ e ye bua lɛ. E de ke: “Jamɛ a ligbi ɔ, ye nine su sɛ womi ko nɔ kɛ je nyɛmimɛ komɛ nɛ a ngɛ asafo ɔ mi ɔ ngɔ. Benɛ i ngɛ bua womi munyuhi nɛ a ngma a kanee ɔ, i nu he kaa Yehowa bu ye sɔlemi ɔ tue.” Niinɛ, behi fuu ɔ, Yehowa guɔ ni kpahi a bua womi munyuhi a nɔ kɛ haa nɛ wa leɔ kaa e kplɛɛ wa nɔ.—La 10:17.

14. Mɛni ji blɔ kpa nɔ nɛ Yehowa guɔ kɛ tsɔɔ kaa e bua jɔ wa he?

¹⁴ Jehanɛ se hu ɔ, Yehowa guɔ wa nyɛmimɛ ɔmɛ a nɔ kɛ woɔ wɔ ga ngɛ be nɛ sa mi kɛ tsɔɔ kaa e bua jɔ wa he. Kaa nɔ hyɛmi nɔ́ ɔ, ngɛ kaseli ɔmɛ a be ɔ mi ɔ, Yehowa ha nɛ bɔfo Paulo ngma sɛ womi kakaaka 14 kɛ ya ha e nyɛmimɛ Kristofohi. Ngɛ jamɛ a sɛ womi ɔmɛ a mi ɔ, Paulo je suɔmi mi nɛ e ngɔ ga womi nɛ ngɛ tɛɛ kɛ ha nyɛmimɛ ɔmɛ. Mɛni he je nɛ Yehowa ha nɛ Paulo ngɔ jamɛ a ga womi ɔ kɛ ha mɛ ɔ? Yehowa ji Tsɛ kpakpa, nɛ e tsɔseɔ e bimɛ ‘nɛ e bua jɔ a he ɔ.’ (Abɛ 3:​11, 12) Enɛ ɔ he ɔ, ke a da Baiblo ɔ nɔ kɛ wo wɔ ga a, lɔ ɔ tsɔɔ we kaa Yehowa mi mi fu wɔ, mohu ɔ, e tsɔɔ kaa e suɔ wɔ. (Heb. 12:6) Mɛni ji ní komɛ hu nɛ Yehowa peeɔ kɛ tsɔɔ kaa e kplɛɛ wa nɔ?

ODASE KPAHI NƐ TSƆƆ KAA YEHOWA BUA JƆ WA HE

15. Mɛnɔmɛ Yehowa ngɔɔ e mumi klɔuklɔu ɔ kɛ haa, nɛ mɛni he je nɛ enɛ ɔ woɔ wɔ he wami ɔ?

¹⁵ Yehowa ngɔɔ e mumi klɔuklɔu ɔ kɛ haa nihi nɛ e bua jɔ a he ɔ. (Mat. 12:18) Wa ma nyɛ ma bi wa he ke, ‘Anɛ i nyɛɔ nɛ i jeɔ Mawu mumi ɔ yiblii ɔ eko kpo ngɛ ye si himi mi lo?’ Anɛ o yɔse kaa o toɔ o tsui si wawɛɛ amlɔ nɛ ɔ pe benɛ o ba li Yehowa a lo? Ngɛ anɔkuale mi ɔ, ke o yaa nɔ nɛ o jeɔ Mawu mumi ɔ yiblii ɔ kpo ɔ, e haa nɛ o naa heii kaa Yehowa bua jɔ o he!—Hyɛ daka nɛ ji, “ Mumi ɔ Yiblii ɔ Ji . . .”

16. Mɛnɔmɛ lɛ Yehowa guɔ a nɔ kɛ fiɛɛɔ sane kpakpa a, nɛ kɛ lɔ ɔ haa nɛ o nuɔ he ha kɛɛ? (1 Tɛsalonika Bi 2:4)

¹⁶ Yehowa ngɔ sane kpakpa fiɛɛmi ní tsumi ɔ kɛ ha nihi nɛ e bua jɔ a he ɔ pɛ. (Kane 1 Tɛsalonika Bi 2:4.) Mo kadi bɔ nɛ nyɛmiyo Jocelyn ná sane kpakpa fiɛɛmi ní tsumi ɔ nɛ e kɛ e he wo mi ɔ he se ha. Ligbi ko ɔ, benɛ Jocelyn te si ngɛ sa mi ɔ, e hao wawɛɛ. E de ke: “I nu he kaa ye he wami ta, nɛ i be nyɛe ma pee nɔ́ ko nɔ́ ko. Se akɛnɛ blɔ gbalɔ ji mi he je ɔ, e sa nɛ ma ya fiɛɛmi jamɛ a ligbi ɔ. Lɔ ɔ he ɔ, i sɔle nɛ i ho fiɛɛmi ya.” Jamɛ a mɔtu ɔ, Jocelyn ya na yo ko nɛ a tsɛɛ lɛ ke Mary, nɛ e kplɛɛ nɔ kaa a kɛ lɛ nɛ kase Baiblo ɔ. Nyɔhiɔ  komɛ a se ɔ, Mary tsɔɔ kaa loko Jocelyn ma ba si e sinya a jamɛ a mɔtu ɔ, e sɔle kɛ ha Yehowa konɛ e ye bua lɛ. Mɛni Jocelyn kase ngɛ níhi a si kpami nɛ ɔ mi? E de ke: “I nu he kaa Yehowa ngɛ mi dee ke, ‘ye bua jɔ o he.’” Ngɛ anɔkuale mi ɔ, tsa pi nɔ fɛɛ nɔ nɛ buɔ wɔ tue ngɛ fiɛɛmi mi. Se wa ma nyɛ ma ná nɔ mi mami kaa Yehowa bua jɔɔ ke wa bɔ mɔde wawɛɛ nɛ wa fiɛɛ kɛ ha ni kpahi.

17. Mɛni o kase ngɛ nɔ́ nɛ Vicky de ngɛ kpɔmi nɔ́ ɔ he ɔ mi? (La 5:12)

¹⁷ Nihi nɛ Yehowa haa nɛ a náa kpɔmi nɔ́ ɔ he se ji nihi nɛ e bua jɔ a he. (1 Tim. 2:​5, 6) Ke wa ngɛ hemi kɛ yemi ngɛ kpɔmi nɔ́ ɔ mi nɛ a baptisi wɔ, se loloolo ɔ, wa nuɔ he kaa Yehowa bua jɔɛ wa he hu nɛɛ? Mo kai kaa be komɛ ɔ, wa he numi ma nyɛ maa sisi wɔ, se wa ma nyɛ ma ná hemi kɛ yemi ngɛ Yehowa mi be fɛɛ be. E naa nihi nɛ a ngɛ hemi kɛ yemi ngɛ kpɔmi nɔ́ ɔ mi ɔ kaa a ji dali, nɛ e wo si kaa e maa jɔɔ mɛ. (Kane La 5:12; Rom. 3:26) Benɛ nyɛmiyo ko nɛ a tsɛɛ lɛ ke Vicky ɔ pue e yi mi tɛ ngɛ kpɔmi nɔ́ ɔ he ɔ, e ye bua lɛ saminya. Ligbi ko ɔ, benɛ e susu kpɔmi nɔ́ ɔ he kɛ ya tsitsaa a, e de ke: “I na kaa Yehowa to e tsui si kɛ ha mi be kɛkɛɛ. . . . Se bɔ nɛ i pee ye ní ha a ha nɛ e pee kaa nɔ́ nɛ i ngɛ Yehowa dee ke: ‘Suɔmi nɛ o ngɛ kɛ ha mi ɔ pi. O Bi ɔ nɛ o kɛ sã afɔle ɔ be nyɛe ma je ye he yayami ɔmɛ kɛ je.’” Benɛ e ba bɔni e yi mi tɛ puemi ngɛ nike ní nɛ ji kpɔmi nɔ́ ɔ he ɔ, e ba na kaa Yehowa suɔ lɛ saminya. Wɔ hu ke wa susu kpɔmi nɔ́ ɔ he ɔ, wa ma ba na kaa Yehowa suɔ wɔ nɛ e bua jɔ wa he.

18. Ke wa ya nɔ nɛ wa suɔ wa hiɔwe Tsɛ ɔ, mɛni nɔ mi mami nɛ wa ma nyɛ ma ná?

¹⁸ E ngɛ mi kaa wa maa bɔ mɔde kaa waa kɛ níhi nɛ wa kase ngɛ ní kasemi nɛ ɔ mi ɔ ma tsu ní mohu lɛɛ, se be komɛ ɔ, wa kɔni mi ma nyɛ ma jɔ̃, nɛ eko ɔ, wa maa nu he kaa Yehowa bua jɔɛ wa he. Ke e ba jã a, mo kai kaa Yehowa bua jɔɔ nihi nɛ a ‘yaa nɔ nɛ a jeɔ suɔmi kpo kɛ haa lɛ ɔ’ a he. (Yak. 1:12) Enɛ ɔ he ɔ, moo ya nɔ nɛ o hɛ kɛ su Yehowa he, nɛ o hyɛ kaa o maa na odasehi nɛ tsɔɔ kaa Yehowa kplɛɛ o nɔ lo. Be fɛɛ be ɔ, mo kai kaa Yehowa “kɛ wa ti nɔ fɛɛ nɔ he kɛ we.”—Níts. 17:27.