1-2. (a) Benɛ Paulo ngma sɛ womi kɛ ya ha Efeso bi ɔmɛ ɔ, mɛni si fɔfɔɛ mi e ngɛ? (b) Mɛni sane bimihi a he wa ma susu ngɛ ní kasemi nɛ ɔ mi?

 BENƐ a wo bɔfo Paulo tsu ngɛ we nɛ e ngɛ mi ɔ mi ngɛ Roma a, e suɔ wawɛɛ kaa e maa wo e nyɛmimɛ Kristofo ɔmɛ he wami. Se akɛnɛ e nyɛ we nɛ e ya slaa mɛ he je ɔ, e ngma mɛ sɛ womihi. Ngɛ jeha 60 loo 61 ɔ mi ɔ, e ngma sɛ womi nɛ ɔmɛ a kpɛti kake kɛ ya ha Efeso bi ɔmɛ.—Efe. 1:1; 4:1.

² Maa pee jeha nyɔngma nɛ be loko Paulo maa ngma sɛ womi ɔ kɛ ya ha Efeso bi ɔmɛ ɔ, e ngɔ be bɔɔ kɛ fiɛɛ sane kpakpa a ngɛ Efeso. (Níts. 19:​1, 8-10; 20:​20, 21) Paulo suɔ e nyɛmimɛ ɔmɛ wawɛɛ, nɛ e suɔ nɛ e ye bua mɛ konɛ a ya nɔ nɛ a kɛ anɔkuale yemi nɛ sɔmɔ Yehowa. Se mɛni he je nɛ e tu diblii kɛ la he munyu ngɛ sɛ womi nɛ e ngma kɛ ya ha Kristofohi nɛ a pɔ mɛ nu ɔ mi ɔ? Kɛ Kristofohi tsuo ma plɛ kɛ ná nɔ́ nɛ e ngma a he se ha kɛɛ? Wa maa na sane bimi nɛ ɔmɛ a heto ngɛ ní kasemi nɛ ɔ mi.

KƐ JE DIBLII MI KƐ BA LA NYA

3. Mɛni munyuhi nɛ Paulo kɛ tsu ní ngɛ sɛ womi nɛ e ngma kɛ ya ha Efeso bi ɔmɛ ɔ mi?

³ Paulo ngma sɛ womi kɛ ya ha Kristofohi nɛ a ngɛ Efeso ɔ, nɛ e de mɛ ke: “Be ko nɛ e be ɔ, diblii ji nyɛ, se amlɔ nɛ ɔ, la ji nyɛ.” (Efe. 5:8) Ngɛ ngmami nɛ ɔ mi ɔ, bɔfo Paulo ngɔ munyu  nɛ ji diblii kɛ la kɛ tsu ní kɛ tsɔɔ bɔ nɛ Efeso bi ɔmɛ pee tsakemi ngua ngɛ a je mi bami he ha. Amlɔ nɛ ɔ, nyɛ ha nɛ wa susu nɔ́ he je nɛ bɔfo Paulo de Efeso bi ɔmɛ ke “be ko nɛ e be ɔ, diblii ji nyɛ” ɔ he nɛ waa hyɛ.

4. Ngɛ jami blɔ fa mi ɔ, mɛni he je nɛ wa ma nyɛ ma de ke Efeso bi ɔmɛ ngɛ diblii mi ɔ?

⁴ Lakpa jami. Loko Efeso bi ɔmɛ nɛ Paulo ngma sɛ womi kɛ ya ha mɛ ɔ ma ba pee Kristofohi ɔ, a kɛ a he woɔ lakpa jami mi nɛ a tsuɔ kunya hulɔ. A ma sɔlemi we ko kɛ ha Hela bi a yo mawu Atemis ɔ ngɛ Efeso ma a mi. Jamɛ a be ɔ mi ɔ, nihi fuu naa sɔlemi we nɛ ɔ kaa tsu ko nɛ se be ngɛ je ɔ mi tsuo. Nihi babauu yaa sɔlemi we nɛ ɔ nɛ a ya jaa amagahi. Nihi peeɔ yo mawu Atemis amaga a kɛ e jami he ɔ henɔhi nɛ a juaa ha nihi, enɛ ɔ haa nɛ a náa sika babauu. (Níts. 19:​23-27) Jehanɛ hu ɔ, a le ma a mi bi ɔmɛ kaa a tsuɔ kunya wawɛɛ.—Níts. 19:19.

5. Ngɛ je mi bami blɔ fa mi ɔ, mɛni he je nɛ wa ma nyɛ ma de ke Efeso bi ɔmɛ ngɛ diblii mi ɔ?

⁵ Je mi bami yaya. A le Efeso ma mi bi ɔmɛ kaa a je mi bami puɛ kulaa nɛ a zo tɔ ywia. Behi fuu ɔ, níhi nɛ a peeɔ ke a ngɛ a hɛja jee loo a ngɛ a jami gbijlɔ ɔmɛ yee ɔ kɔɔ bɔmi nami he. (Efe. 5:3) Nihi babauu nɛ a ngɛ Efeso ɔ, “nɔ́ ko nɔ́ ko pee we mɛ zo,” nɛ tsɔɔ kaa ke a ngɛ nɔ́ yaya ko pee ɔ, “a he nile bui mɛ fɔ.” (Efe. 4:​17-19) Loko Efeso bi nɛ ɔmɛ ma ba le nɔ́ nɛ Yehowa suɔ kɛ nɔ́ nɛ e sume ɔ, jamɛ a be ɔ mi ɔ, ke a pee yayami ko ɔ, nɔ́ ko nɔ́ ko si we mɛ kpu. Jehanɛ hu ɔ, bɔ nɛ Yehowa naa a ní peepee ha a pue we a tsui nɔ kulaa. Enɛ ɔ he je nɛ Paulo de ngɛ a he ke “a juɛmi ɔ mi wo diblii, nɛ a je a he kɛ je wami ɔ nɛ ji Mawu nɔ́ ɔ he” ɔ nɛ.

6. Mɛni he je nɛ Paulo nyɛ nɛ e de Efeso bi ɔmɛ ke “amlɔ nɛ ɔ, la ji nyɛ” ɔ?

⁶ Se Efeso bi nɛ ɔmɛ a kpɛti ni komɛ yɛ nɔ nɛ a hi diblii ɔ mi. Paulo ngma kɛ kɔ a he ke “amlɔ nɛ ɔ, la ji nyɛ ngɛ Nyɔmtsɛ ɔ mi.” (Efe. 5:8) Ngɛ anɔkuale mi ɔ, a ba kase Ngmami ɔ mi anɔkuale ɔ, nɛ a ngɛ a je mi bae ngɛ nya. (La 119:105) Efeso bi nɛ ɔmɛ ngmɛɛ lakpa jami mi ní peepeehi kɛ je mi bami yayahi a he. A ba “pee nihi nɛ a kaseɔ Mawu,” nɛ a bɔ  mɔde wawɛɛ kaa a ma ja Yehowa ngɛ anɔkuale mi, nɛ a sa e hɛ mi hulɔ.—Efe. 5:1.

7. Mɛni blɔ nɔ nɛ wa si fɔfɔɛ ngɛ kaa Kristofohi fuu nɛ a ngɛ Efeso ɔ a nɔ́ ɔ?

⁷ Jã nɔuu kɛ̃ nɛ e ji mwɔnɛ ɔ. Loko wa ma ba kase anɔkuale ɔ, lakpa jamihi kɛ je mi bami yaya ngɔ wɔ nyɔguɛ. Wa kpɛti ni komɛ ngɔ wa he kɛ wo lakpa jami gbijlɔhi a mi, ni kpahi hu ngɔ a he kɛ wo je mi bami sasɛ mi. Se akɛnɛ wa ba kase Yehowa je mi bami he mlaa amɛ nɛ kɔɔ nɔ́ nɛ da kɛ nɔ́ nɛ dɛ he he je ɔ, wa pee tsakemihi, nɛ waa ba wa je mi ngɛ Yehowa dami mlaa amɛ a nya. Enɛ ɔ ha nɛ wa ná jɔɔmihi babauu ngɛ wa si himi mi. (Yes. 48:17) E ngɛ mi kaa waa kɛ nyagba komɛ kpeɔ mohu lɛɛ, se e sɛ nɛ waa kpale wa se kɛ ya diblii ɔ nɛ wa je mi ɔ mi hu. E sa nɛ ‘waa ya nɔ nɛ waa nyɛɛ kaa la bimɛ.’ Mɛni blɔ nɔ wa maa gu kɛ pee jã?

MO KUA DIBLII Ɔ

8. Ngɛ Efeso Bi 5:​3-5 ɔ nya a, mɛni nɛ e sa kaa Efeso bi ɔmɛ nɛ a kua?

⁸ Kane Efeso Bi 5:​3-5. Bɔ nɛ pee nɛ Kristofohi nɛ a ngɛ Efeso ɔ nɛ a ko kpale a se kɛ ya diblii ɔ mi hu ɔ, e sa nɛ a ya nɔ nɛ a kua ní peepeehi nɛ sɛ Yehowa hɛ mi. Pi ajuama bɔmi pɛ nɛ e sa nɛ a kua, e sa nɛ a kua yakayaka munyuhi nɛ a kɛ woɔ nɔ nya muɔ hulɔ. Paulo kai Efeso bi ɔmɛ kaa ke a suɔ nɛ a ná “gbosi ní ko ngɛ Kristo kɛ Mawu a Matsɛ Yemi ɔ mi” ɔ, lɛɛ e sa nɛ a yu a he ngɛ ní nɛ ɔmɛ a he kulaa.

9. Mɛni he je nɛ e sa nɛ waa yu wa he ngɛ nɔ́ fɛɛ nɔ́ nɛ ma nyɛ ma ha nɛ waa bɔ ajuama a he ɔ?

⁹ Wɔ hu e sa nɛ waa ya nɔ nɛ waa hwu kɛ si “diblii mi ní tsumihi nɛ wui yiblii” ɔ. (Efe. 5:11) Ngɛ anɔkuale mi ɔ, níhi a si kpamihi tsɔɔ kaa ke nɔ ko yaa nɔ nɛ e hyɛɛ níhi nɛ sɛ, aloo e buɔ yakayaka munyuhi tue, loo e tuɔ yakayaka munyuhi ɔ, e he be wae kulaa kaa e maa pee yayami. (1 Mose 3:6; Yak. 1:​14, 15) Ngɛ ma ko nɔ ɔ, nyɛmimɛ fuu ba pee “huɛmɛ” ngɛ Intanɛti ɔ nɔ ngɛ group chat ko mi. Sisije ɔ, a kpɛti nihi fuu bɔ mɔde kaa a maa tu mumi mi níhi a he munyu ngɛ lejɛ ɔ. Se kɛ yaa kɛ yaa a, a bɔni níhi nɛ sɛ he munyu tumi ngɛ lejɛ ɔ. Behi fuu ɔ, níhi nɛ a tuɔ he munyu ɔ kɔɔ bɔmi nami he. Pee se ɔ, a kpɛti nihi fuu tsɔɔ kaa ní yayahi nɛ a tuɔ a he munyu ɔ lɛ ha nɛ a kɛ a he wo ajuama bɔmi mi ɔ nɛ.

10. Mɛni Satan peeɔ konɛ e kɛ sisi wɔ? (Efeso Bi 5:6)

¹⁰ Satan je nɛ ɔ bɔɔ mɔde kaa e maa sisi wɔ konɛ wa susu kaa tɔmi ko be níhi nɛ Yehowa naa lɛ kaa a ji ní yayahi loo mu ní tsumi ɔ a he. (2 Pet. 2:19) Enɛ ɔ pee we wɔ nyakpɛ kulaa! Kɛ je blema tɔɔ nɛ Abosiami bɔɔ mɔde kaa e maa sisi nihi konɛ a ko le slɔɔto nɛ ngɛ nɔ́ nɛ da kɛ nɔ́ nɛ dɛ a kpɛti. (Yes. 5:20; 2 Kor. 4:4) Enɛ ɔ he ɔ, e be nyakpɛ kaa níhi nɛ a jeɔ ngɛ tiivi nɔ, kɛ níhi nɛ a kɛ fɔɔ Intanɛti ɔ nɔ ɔ kɛ Yehowa mlaa amɛ kɔ we! Satan ngɛ mɔde bɔe kaa e ma puɛ wa juɛmi konɛ wa susu kaa ní yayahi kɛ je mi bami yayahi nɛ pɔ he mwɔnɛ ɔ tɔmi ko be he nɛ a yi nɔ awi hulɔ.—Kane Efeso Bi 5:6.

11. Mɛni blɔ nɔ nɛ Angela níhi a si kpami ɔ tsɔɔ heii kaa e he hia nɛ waa kɛ ga womi nɛ nile ngɛ mi nɛ ngɛ Efeso Bi 5:7 ɔ nɛ tsu ní? (Hyɛ foni ɔ hulɔ.)

¹¹ Satan suɔ nɛ waa kɛ nihi nɛ a haa nɛ e he waa kaa waa kɛ Yehowa mlaa amɛ ma tsu ní ɔ nɛ bɔ. Paulo de Efeso bi ɔmɛ ke: “Nyɛɛ kɛ mɛ nɛ ko pee jamɛ a ní ɔmɛ.” Nimli nɛ ɔmɛ ji nihi nɛ a peeɔ níhi nɛ sɛ Yehowa hɛ mi. (Efe. 5:7) Se kɛ̃ ɔ, e sa nɛ waa hyɛ wa he nɔ saminya kulaa pe Efeso bi ɔmɛ, ejakaa mwɔnɛ ɔ, waa kɛ nihi bɔɔ hɛ mi kɛ hɛ mi, nɛ waa kɛ nihi bɔɔ ngɛ Intanɛti ɔ nɔ hulɔ. Angela a nɛ e ngɛ Asia a na bɔ nɛ Intanɛti nɔ huɛ bɔmi hehi ma nyɛ maa ye nɔ awi ha. E de ke: “Bɔɔbɔɔbɔɔ ɔ, e ma nyɛ ma tsake o susumi. E ba su he ko ɔ, ke i kɛ nihi nɛ a kɛ Baiblo sisi tomi mlaahi tsu we ní ngɛ  bɔe ɔ, ye he nile bui mi fɔ hu. Nyagbenyagbe ɔ, i nɛ tɔmi ko ngɛ he kaa i kɛ ye he maa wo je mi bami nɛ sɛ Yehowa hɛ mi ɔ mi.” Se bua jɔmi sane ji kaa asafo mi nikɔtɔmahi nɛ a ngɛ suɔmi ɔ ye bua Angela nɛ e pee tsakemihi nɛ sa. E de ke: “Amlɔ nɛ ɔ, i ngɔɔ ye juɛmi kɛ maa Yehowa kɛ e susumihi a nɔ, se pi níhi nɛ ngɛ Intanɛti ɔ nɔ.”

12. Mɛni maa ye bua wɔ konɛ waa kɛ Yehowa mlaahi nɛ tsu ní?

¹² E sa nɛ wa kua susumi nɛ je ɔ hɛɛ kaa tɔmi ko be je mi bami yaya he ɔ. Wa le kaa je ɔ susumi ɔ dɛ kulaa. (Efe. 4:​19, 20) Enɛ ɔ he ɔ, mo bi o he ke: ‘Anɛ i kɛ nihi nɛ i kɛ mɛ tsuɔ ní, nihi nɛ i kɛ mɛ yaa sukuu, loo nihi nɛ a be bumi kɛ ha Yehowa mlaa amɛ ɔ bɔɔ gbagbanii lo? Anɛ i bɔɔ mɔde kaa i kɛ kã ma fĩ Yehowa mlaa amɛ a se, ke lɔ ɔ ma ha nɛ nihi nɛ a na mi kaa i ngɛ kpɛii po lo?’ Jehanɛ hu ɔ, kaa bɔ nɛ 2 Timoteo 2:​20-22 ɔ tsɔɔ ɔ, e sa nɛ waa hyɛ nɛ hi ngɛ nihi nɛ waa kɛ mɛ maa bɔ gbagbanii ngɛ asafo ɔ mi ɔ a he. E sa nɛ wa kai kaa pi nɔ fɛɛ nɔ nɛ ma nyɛ maa ye bua wɔ nɛ waa ya nɔ nɛ waa ye anɔkuale ngɛ Yehowa sɔmɔmi mi.

“NYƐƐ NYƐƐ KAA LA BIMƐ”

13. Ke a ke waa ‘ya nɔ nɛ waa nyɛɛ kaa la bimɛ’ ɔ, mɛni e tsɔɔ? (Efeso Bi 5:​7-9)

¹³ Paulo wo Kristofohi nɛ a ngɛ Efeso ɔ he wami kaa a ya nɔ nɛ a yu a he ngɛ diblii mi ní peepeehi a he, nɛ a ‘ya nɔ nɛ a nyɛɛ kaa la bimɛ’ hulɔ. (Kane Efeso Bi 5:​7-9.) Mɛni nɛ enɛ ɔ tsɔɔ? Nɔ́ nɛ e tsɔɔ pɛ ji kaa wa maa ba wa je mi kaa anɔkuale Kristofohi be fɛɛ be. Nɔ́ kake nɛ maa ye bua wɔ nɛ wa nyɛ nɛ waa pee jã ji kaa wa maa kase Baiblo ɔ kɛ wa womi ɔmɛ saminya. Jehanɛ hu ɔ, e he hia nɛ wa susu nɔ hyɛmi níhi nɛ Yesu Kristo pee, kɛ níhi nɛ e tsɔɔ ɔ he saminya, ejakaa lɛ ji “je ɔ la a nɛ.”—Yoh. 8:12; Abɛ 6:23.

14. Mɛni blɔ nɔ nɛ mumi klɔuklɔu ɔ ma nyɛ maa ye bua wɔ?

¹⁴ Jehanɛ hu ɔ, wa hia Mawu mumi klɔuklɔu ɔ yemi kɛ buami bɔ nɛ pee nɛ waa ya nɔ nɛ waa ba wa je mi “kaa la bimɛ.” Mɛni he je? Ejakaa e be gbɔjɔɔ kaa wa ma ha nɛ wa he nɛ tsɔ ngɛ je nɛ puɛ nɛ ɔ mi. (1 Tɛs. 4:​3-5, 7, 8) Mumi klɔuklɔu ɔ ma nyɛ maa ye bua wɔ nɛ wa kua susumi nɛ je ɔ hɛɛ ɔ, nɛ je mi nile kɛ  susumi nɛ dɛ nɛ nihi hɛɛ kaa Yehowa blɔ ɔmɛ dɛ ɔ hu piɛɛ he. Jehanɛ hu ɔ, mumi klɔuklɔu ɔ maa ye bua wɔ konɛ waa wo yiblii nɛ ji “kpakpa peemi slɔɔtohi tsuo kɛ dami” ní peepee.—Efe. 5:9.

15. Mɛni wa ma nyɛ maa pee konɛ wa nine nɛ su mumi klɔuklɔu ɔ nɔ? (Efeso Bi 5:​19, 20)

¹⁵ Blɔ kake nɛ wa ma nyɛ maa gu nɔ kɛ ná mumi klɔuklɔu ɔ ji kaa wa maa sɔle kɛ bi. Yesu tsɔɔ kaa Yehowa “maa ngɔ mumi klɔuklɔu ɔ kɛ ha nihi nɛ a biɔ lɛ ɔ.” (Luka 11:13) Jehanɛ hu ɔ, ke waa kɛ wa nyɛmimɛ ɔmɛ pee kake kɛ je Yehowa yi ngɛ asafo mi kpehi a sisi ɔ, wa náa mumi klɔuklɔu ɔ. (Kane Efeso Bi 5:​19, 20.) Mawu mumi klɔuklɔu ɔ maa ye bua wɔ konɛ waa pee níhi nɛ maa sa Mawu hɛ mi.

16. Mɛni maa ye bua wɔ konɛ waa mwɔ yi mi kpɔhi nɛ da? (Efeso Bi 5:​10, 17)

¹⁶ Ke e he ba hia nɛ waa mwɔ yi mi kpɔhi nɛ a he hia ngɛ wa si himi mi ɔ, e sa nɛ wa “yɔse nɔ́ nɛ ji Yehowa suɔmi nya ní,” nɛ waa da nɔ kɛ pee jã. (Kane Efeso Bi 5:​10, 17.) Ke wa hla Baiblo sisi tomi mlaahi nɛ kɔɔ wa si fɔfɔɛ ɔ he ɔ, lɔ ɔ tsɔɔ kaa wa suɔ nɛ waa le Mawu susumi ngɛ jamɛ a si fɔfɔɛ ɔ he. Lɔ ɔ se ɔ, ke waa kɛ Baiblo sisi tomi mlaa amɛ tsu ní ɔ, e he be wae kaa wa maa mwɔ yi mi kpɔhi nɛ da.

17. Ke a ke waa kɛ wa be nɛ tsu ní saminya a, mɛni e tsɔɔ? (Efeso Bi 5:​15, 16) (Hyɛ foni ɔ hulɔ.)

¹⁷ Jehanɛ hu ɔ, Paulo wo Kristofohi nɛ a ngɛ Efeso ɔ he wami kaa a ngɔ a be kɛ tsu ní saminya. (Kane Efeso Bi 5:​15, 16.) “Nɔ yayami ɔ,” nɛ ji wa he nyɛlɔ Satan suɔ nɛ waa ngɔ wa be tsuo kɛ di níhi nɛ ngɛ je ɔ mi ɔ se konɛ wa ko ná be kɛ sɔmɔ Mawu. (1 Yoh. 5:19) E he be wae kulaa kaa Kristofo no ko maa ngɔ he lo nya níhi, sukuu yami, aloo ní tsumi kɛ ye kekle blɔ he pe Yehowa nɛ e ma sɔmɔ. Ke e ba lɛ jã a, lɔ ɔ tsɔɔ kaa je ɔ susumi ɔ ngɛ e nɔ he wami náe. Ngɛ anɔkuale mi ɔ, tɔmi be ní nɛ ɔmɛ a he, se e sɛ nɛ waa ngɔ kɛ ye kekle blɔ he ngɛ wa si himi mi. Loko wa ma nyɛ maa nyɛɛ “kaa la bimɛ” ɔ, e sa nɛ waa kɛ wa  “be nɛ tsu ní ngɛ blɔ nɛ hi pe kulaa nɔ,” nɛ waa ngɔ wa juɛmi kɛ ma níhi nɛ a he hia wawɛɛ ɔ nɔ.

18. Mɛni Donald pee konɛ e nyɛ nɛ e kɛ e be nɛ tsu ní saminya?

¹⁸ Mo hla blɔhi a nɔ nɛ o ma nyɛ maa gu kɛ sɔmɔ Yehowa kɛ pi si. Donald nɛ e ngɛ South Africa a pee enɛ ɔ he nɔ hyɛmi nɔ́. E de ke: “I hyɛ ye si fɔfɔɛ, nɛ i sɔle ngɛ he kɛ ha Yehowa konɛ e ye bua mi konɛ ma tsu babauu ngɛ fiɛɛmi mi. I sɔle konɛ ma ná ní tsumi nɛ maa ngmɛ mi blɔ nɛ ma ngɔ ye be fuu kɛ tsu fiɛɛmi ní tsumi ɔ. Yehowa ye bua mi nɛ i ná ní tsumi nɛ sa. Enɛ ɔ ha nɛ i kɛ ye yo ɔ tsuo wa je be tsuo sɔmɔmi ní tsumi ɔ sisi ngɛ be kake mi.”

19. Mɛni maa ye bua wɔ konɛ waa nyɛɛ “kaa la bimɛ”?

¹⁹ E ngɛ heii kaa sɛ womi nɛ Paulo ngma kɛ ya ha Efeso bi ɔmɛ ɔ ye bua mɛ nɛ a ya nɔ nɛ a sɔmɔ Yehowa ngɛ anɔkuale mi. Wɔ hu sɛ womi nɛ ɔ ma nyɛ maa ye bua wɔ. Kaa bɔ nɛ wa na a, e maa ye bua wɔ konɛ waa hla hɛja jemi kɛ huɛmɛ nɛ sa. Jehanɛ se hu ɔ, e maa wo wɔ he wami konɛ waa ya nɔ nɛ waa nyɛɛ ngɛ anɔkuale la a nya kɛ gu Baiblo ɔ nɛ wa maa kase be fɛɛ be ɔ nɔ. Jehanɛ hu ɔ, Paulo sɛ womi ɔ ha nɛ wa le kaa mumi klɔuklɔu ɔ he hia wawɛɛ, nɛ e haa nɛ wa náa su kpakpahi. Ke waa kɛ Paulo ga womi ɔ tsu ní ɔ, e maa ye bua wɔ nɛ waa mwɔ yi mi kpɔhi nɛ kɛ Yehowa suɔmi nya ní kɔ. Ke wa pee ní nɛ ɔmɛ tsuo ɔ, wa ma nyɛ maa yu wa he ngɛ je nɛ e mi wo diblii nɛ ɔ he, konɛ waa ya nɔ nɛ waa nyɛɛ ngɛ la a nya.