1-2. Ke a baptisi nɔ ko se ɔ, mɛni jɔɔmihi nɛ e náa?

 KE A baptisi mo nɛ o ba piɛɛ Yehowa weku ɔ he ɔ, e ngɛ bua jɔmi wawɛɛ. E ji he blɔ ngua nɛ wa ná kaa huɛ bɔmi kpakpa ngɛ waa kɛ Yehowa wa kpɛti. Ngɛ anɔkuale mi ɔ, waa kɛ nɔ́ nɛ Matsɛ David de ɔ kpa gbi. E de ke: “A gbaa nɔ tsuaa nɔ nɛ mo [Yehowa] nitsɛ o hla lɛ, nɛ o ngɔ lɛ kɛ ba o we ɔ.”—La 65:4.

² Tsa pi nɔ fɛɛ nɔ kɛkɛ nɛ Yehowa gblaa lɛ kɛ baa e weku ɔ mi. Kaa bɔ nɛ wa susu he ngɛ ní kasemi nɛ sɛ hlami ɔ mi ɔ, Yehowa gblaa nihi nɛ a suɔ nɛ huɛ bɔmi kpakpa nɛ hi a kɛ lɛ a kpɛti ɔ pɛ kɛ baa e ngɔ. (Yak. 4:8) Ke o jɔɔ o he nɔ kɛ ha Yehowa nɛ a baptisi mo ɔ, o ba peeɔ Yehowa huɛ ngɛ blɔ klɛdɛɛ ko nɔ. Ngɛ anɔkuale mi ɔ, o ma nyɛ ma ná nɔ mi mami kaa ngɛ o baptisimi se ɔ, Yehowa ma ha nɛ ‘ní kpakpa babauu maa nɛ ngɔ pue o nɔ babaaba kaa hiɔmi.’—Mal. 3:10; Yer. 17:​7, 8.

3. Mɛni blɔ nya ní tsumi nɛ hɛdɔ ngɛ he lɛ fɔɔ si ngɛ Kristofohi nɛ a jɔɔ a he nɔ kɛ ha Yehowa nɛ a baptisi mɛ ɔ a nɔ? (Fiɛɛlɔ 5:​4, 5)

³ Ngɛ anɔkuale mi ɔ, ke a baptisi nɔ ko ɔ, kpaako e je Yehowa sɔmɔmi sisi. Ngɛ lɔ ɔ se ɔ, e ma bi nɛ o pee nɔ́ fɛɛ nɔ́ nɛ o ma nyɛ konɛ o ye si nɛ o wo Yehowa kaa o maa ya nɔ maa ye lɛ anɔkuale ɔ nɔ ke o kɛ kahi loo haomihi ngɛ kpee po. (Kane Fiɛɛlɔ 5:​4, 5.) Akɛnɛ o ji Yesu kaselɔ he je ɔ, e sa nɛ o nyɛɛ Yesu nane mami he ɔmɛ a se haa, nɛ o ye e fami ɔmɛ hu a nɔ. (Mat. 28:​19, 20; 1 Pet. 2:21) Ní kasemi nɛ ɔ maa ye bua mo konɛ o nyɛ nɛ o pee jã.

 YAA NƆ NƐ O NYƐƐ YESU SE KE O KƐ KAHI KƐ HAOMIHI NGƐ KPEE

4. Ngɛ mɛni blɔ nɔ nɛ Yesu kaseli ɔmɛ tloo “sɛumi tso” ko? (Luka 9:23)

⁴ Ko susu kaa ke a baptisi mo se ɔ, o kɛ nyagbahi be kpee. Ngɛ anɔkuale mi ɔ, Yesu ha nɛ e pee heii kaa e kaseli ɔmɛ maa tloo “sɛumi tso” ko. E ngɛ heii kaa a maa pee jã “daa ligbi.” (Kane Luka 9:23.) Anɛ Yesu ngɛ tsɔɔe kaa e se nyɛɛli ɔmɛ maa hi nɔ́ nae be fɛɛ be lo? Dɛbi kulaa. Nɔ́ nɛ e ngɛ tsɔɔe pɛ ji kaa ngɛ jɔɔmihi nɛ a nine maa su nɔ ɔ tsuo se ɔ, a kɛ nyagbahi hu maa kpe. Nyagba nɛ ɔmɛ ekomɛ a nya dami ma nyɛ maa ye wawɛɛ.—2 Tim. 3:12.

5. Mɛni jɔɔmihi nɛ Yesu wo si kaa nihi nɛ a maa ngɔ níhi kɛ sã afɔle ɔ ma ná?

⁵ Eko ɔ, o weku li te si kɛ wo mo, aloo eko ɔ, o ngɔ he lo nya ní komɛ kɛ sã afɔle konɛ o nyɛ nɛ o ngɔ Mawu Matsɛ Yemi ɔ kɛ ye kekleekle blɔ he. (Mat. 6:33) Ke jã a, lɛɛ o ma nyɛ ma ná nɔ mi mami kaa Yehowa na níhi tsuo nɛ o pee kɛ ha lɛ ɔ. (Heb. 6:10) Eko ɔ, Yesu munyu nɛ nyɛɛ se nɛ ɔ ba mi ngɛ o blɔ fa mi. E de ke: “Nɔ ko be nɛ e si we aloo nyɛmimɛ nyumuhi aloo nyɛmimɛ yihi aloo nyɛ aloo tsɛ aloo bimɛ aloo ngmɔhi ngɛ imi kɛ sane kpakpa a he, nɛ́ e nine be nɔ sue kɛ bɔ he si 100 amlɔ nɛ ɔ ngɛ be nɛ ɔ mi—wehi, nyɛmimɛ nyumuhi, nyɛmimɛ yihi, nyɛmɛ, bimɛ, kɛ ngmɔhi, nɛ́ yi mi wami hu piɛɛ he—kɛ neneene wami ngɛ níhi a blɔ nya tomi nɛ ma a mi.” (Maak. 10:​29, 30) Ngɛ anɔkuale mi ɔ, jɔɔmihi nɛ o nine su nɔ ɔ hiɛ babauu pe nɔ́ fɛɛ nɔ́ ko nɛ o kɛ sã afɔle ɔ.—La 37:4.

6. Ngɛ o baptisimi se ɔ, mɛni he je nɛ e sa kaa o ya nɔ nɛ o hwu kɛ si “níhi nɛ peeɔ he lo ɔ akɔnɔ” ɔ?

⁶ Ke a baptisi mo se po ɔ, loloolo ɔ, e he maa hia nɛ o hwu kɛ si “níhi nɛ peeɔ he lo ɔ akɔnɔ” ɔ. (1 Yoh. 2:16) Nɔ́ he je ji kaa loloolo ɔ, o ji Adam nina nɛ o yi mluku. Be komɛ ɔ, o ma nyɛ maa nu he kaa bɔ nɛ bɔfo Paulo nu he ɔ. E ngma ke: “Ngɛ nɔmlɔ nɛ i ji ngɛ ye mi ɔ blɔ fa mi ɔ, ye bua jɔɔ Mawu mlaa a he wawɛɛ nitsɛ, se i naa mlaa kpa ko ngɛ ye nɔmlɔ tso ɔ mi nɛ e ngɛ hwue kɛ ngɛ ye juɛmi mlaa a sie, nɛ e ngɛ mi nyɔguɛ ngɔe kɛ ngɛ yayami mlaa nɛ ngɛ ye nɔmlɔ tso ɔ mi ɔ hae.” (Rom. 7:​22, 23) Eko ɔ, o kɔni mi ma jɔ̃ akɛnɛ e he wa kaa o maa hwu kɛ si akɔnɔ yayahi ɔ he je. Se kɛ̃ ɔ, ke o susu si nɛ o wo Yehowa benɛ o jɔɔ o he nɔ kɛ ha lɛ ɔ he ɔ, e maa wo mo he wami konɛ o ya nɔ nɛ o da kahi nɛ o kɛ maa kpe ɔ nya. Anɔkuale sane ji kaa ke o kɛ kahi kpe ɔ, si nɛ o wo Yehowa a maa ye bua mo konɛ o nyɛ nɛ o da nya. Ngɛ mɛni blɔ nɔ?

7. Mɛni blɔ nɔ nɛ o he nɔ nɛ o maa jɔɔ kɛ ha Yehowa a maa ye bua mo konɛ o ye lɛ anɔkuale?

⁷ Ke o jɔɔ o he nɔ kɛ ha Yehowa a, lɔ ɔ tsɔɔ kaa o kua o he. Enɛ ɔ tsɔɔ kaa o hla kaa o ma kua níhi nɛ mo nitsɛ o suɔ kɛ otihi nɛ o bua jɔ a he konɛ o sa Yehowa hɛ mi. (Mat. 16:24) Enɛ ɔ he ɔ, ke o kɛ ka ko kpe ɔ, e he hia we nɛ o puɛ be kɛ susu nɔ́ nɛ o maa pee ɔ he, ejakaa o mwɔ o yi mi kpɔ ngɛ nɔ́ nɛ o maa pee ɔ he momo, nɛ lɔ ɔ ji kaa o maa ya nɔ maa ye Yehowa anɔkuale. E sa nɛ o ya nɔ nɛ o fia o pɛɛ si kaa o maa sa Yehowa hɛ mi. E sa nɛ o pee o ní kaa Hiob. E ngɛ mi kaa e kɛ haomihi nɛ mi wa wawɛɛ kpe mohu lɛɛ, se e de ke: “I be ye we anɔkuale yemi ɔ he ngmɛɛe!”—Hiob 27:​5, NW.

8. Ngɛ mɛni blɔ nɔ nɛ ke o pue o yi mi tɛ ngɛ o he nɔ nɛ o jɔɔ kɛ ha Yehowa a he ɔ, e maa ye bua mo nɛ o da kahi a nya?

⁸ Ke o pue o yi mi tɛ ngɛ o he nɔ nɛ o jɔɔ kɛ ha Yehowa a he ɔ, e maa wo mo he wami nɛ o nyɛ nɛ o da ka fɛɛ ka nɛ o kɛ maa kpe ɔ nya. Kaa nɔ hyɛmi nɔ́ ɔ, anɛ o maa pee nɔ́ ko kɛ tsɔɔ kaa o ná nɔ ko yo loo nɔ ko huno he suɔmi lo? E ngɛ heii kaa o be jã pee, ejakaa o wo Yehowa si momo kaa o be nɔ́ ko nɛ e bua jɔɛ  he ɔ pee kɔkɔɔkɔ. Ke o ha we nɛ akɔnɔ yaya nɛ he si ngɛ o mi ɔ, lɔ ɔ ma ha nɛ e he be wae ha mo kaa o maa hwu kɛ si akɔnɔ yaya. Enɛ ɔ ma ha nɛ o maa “yu o he” ngɛ “yiwutsotsɛmɛ a blɔ nɔ.”—Abɛ 4:​14, 15.

9. Ke o pue o yi mi tɛ ngɛ o he nɔ nɛ o jɔɔ kɛ ha Mawu ɔ he ɔ, kɛ e maa ye bua mo ha kɛɛ nɛ o kɛ Yehowa sɔmɔmi nɛ ye kekleekle blɔ he ngɛ o si himi mi?

⁹ Ke o ná ní tsumi ko nɛ be hae nɛ o ya asafo mi kpe be fɛɛ be hu nɛɛ? Ngɛ anɔkuale mi ɔ, o le nɔ́ nɛ e sa kaa o pee momo. Loko o ma ná jamɛ a ní tsumi ɔ po ɔ, o ma o juɛmi nya si momo kaa o be ní tsumi ko nɛ ma ha nɛ o po asafo mi kpehi a mi ɔ nɔ kplɛɛe. Enɛ ɔ he ɔ, ko susu kaa o ma nyɛ maa mwɔ yi mi kpɔ ko nɛ dɛ, nɛ loloolo ɔ, o ye manye. Ke o pue o yi mi tɛ ngɛ Yesu nɔ hyɛmi nɔ́ ɔ he ɔ, e maa ye bua mo saminya. Yesu fia e pɛɛ si kaa e maa pee e Tsɛ ɔ suɔmi nya ní. Kaa bɔ nɛ Yesu pee ɔ, moo fia o pɛɛ si kaa mo hu o kɛ oya yemi ma kua níhi tsuo nɛ sɛ Mawu hɛ mi.—Mat. 4:10; Yoh. 8:29.

10. Ngɛ o baptisimi se ɔ, kɛ Yehowa maa ye bua mo ha kɛɛ konɛ o ya nɔ nɛ o nyɛɛ Yesu se?

¹⁰ Ngɛ anɔkuale mi ɔ, kahi kɛ haomihi nɛ waa kɛ kpeɔ ɔ haa nɛ wa náa he blɔ kɛ tsɔɔ kaa wa suɔ nɛ waa ya nɔ nɛ waa nyɛɛ Yesu se. Ke e ba jã a, o ma nyɛ ma ná nɔ mi mami kaa Yehowa maa ye bua mo. Baiblo ɔ de ke: “Anɔkualetsɛ ji Mawu, nɛ e be hae nɛ a ka nyɛ pe bɔ nɛ nyɛ ma nyɛ maa da nya, mohu ɔ, ngɛ ka a mi ɔ, lɛ hu e ma je blɔ nɛ́ nyɛ ma nyɛ maa gu nɔ kɛ je mi, konɛ nyɛ nyɛ nɛ nyɛɛ da nya.”—1 Kor. 10:13.

NƆ́ NƐ O MA NYƐ MAA PEE KONƐ O YA NƆ NƐ O NYƐƐ YESU SE

11. Mɛni ji nɔ́ kake nɛ he hia wawɛɛ nɛ o ma nyɛ maa pee konɛ o ya nɔ nɛ o nyɛɛ Yesu se? (Hyɛ foni ɔ hulɔ.)

¹¹ Yesu kɛ e tsui tsuo sɔmɔ Yehowa, nɛ e ya nɔ nɛ e hɛ kɛ su Yehowa he kɛ gu sɔlemi nɔ.  (Luka 6:12) Ngɛ anɔkuale mi ɔ, nɔ́ kake nɛ se be nɛ o ma nyɛ maa pee konɛ o ya nɔ nɛ o nyɛɛ Yesu se ngɛ o baptisimi se ji kaa o maa ya nɔ maa pee níhi nɛ ma ha nɛ o hɛ kɛ su Yehowa he. Baiblo ɔ de ke: “He nɛ wa ya wa hɛ mi kɛ su ɔ, nyɛ ha nɛ waa ya nɔ nɛ waa nyɛɛ pɛpɛɛpɛ ngɛ blɔ nɛ ɔ nɔuu nɔ.” (Filip. 3:16) Be komɛ ɔ, o maa nu nyɛmimɛ nyumuhi kɛ yihi a níhi a si kpamihi nɛ tsɔɔ bɔ nɛ a bli a sɔmɔmi ní tsumi ɔ mi ha. Eko ɔ, a ya Sukuu Kɛ Ha Matsɛ Yemi Sane Kpakpa Fiɛɛli ɔ eko, aloo a hia kɛ ya hehi nɛ fiɛɛli fuu a he hia ngɛ. Ke mo hu o ma nyɛ maa ngɔ oti nɛ ɔmɛ eko kɛ ma o hɛ mi ɔ, lɛɛ moo bɔ mɔde nɛ o pee jã. Yehowa we bi suɔ nɛ a bli a sɔmɔmi ní tsumi ɔ mi. (Níts. 16:9) Se ke o nyɛ we nɛ o pee jã amlɔ nɛ ɔ hu nɛɛ? Ke e ba jã a, ko susu kaa nihi nɛ a bli a sɔmɔmi ní tsumi ɔ mi ɔ, a nɔ kuɔ pe mo. Nɔ́ nɛ hia ji kaa o maa ya nɔ ma fĩ si. (Mat. 10:22) O hɛ nɛ ko je nɔ kaa ke o nyɛ nɛ o pee nɔ́ nɛ o si himi maa ngmɛ mo blɔ kaa o pee ɔ, Yehowa bua maa jɔ. Enɛ ɔ ji nɔ ko nɛ e he hia wawɛɛ nɛ o ma nyɛ maa pee konɛ o ya nɔ nɛ o nyɛɛ Yesu se ngɛ o baptisimi se.—La 26:1.

12-13. Ke o na kaa kã nɛ o kɛ ngɛ Yehowa sɔmɔe ɔ nya ngɛ si bae ɔ, mɛni o ma nyɛ maa pee? (1 Korinto Bi 9:​16, 17) (Hyɛ daka nɛ ji, “ Yaa Nɔ Nɛ O Tu Fo ɔ” hulɔ.)

¹² Ke o susu kaa o nyɛ we nɛ o je o tsui mi nɛ o sɔle ha Yehowa, aloo o nyɛ we nɛ o tsu fiɛɛmi ní tsumi ɔ kaa bɔ nɛ o pee be ko nɛ be ɔ, mɛni o ma nyɛ maa pee? Ke o nyɛ we nɛ o kane Baiblo ɔ saminya kaa bɔ nɛ o peeɔ be ko nɛ be ɔ hu nɛɛ? Ke o kɛ si himi ko kaa jã kpe ngɛ o baptisimi se ɔ, koo ma nya si kaa Yehowa mumi ɔ je o nɔ. Akɛnɛ o yi mluku he je ɔ, bɔ nɛ o nuɔ he ha ngɛ níhi a he ɔ ma nyɛ ma tsake. Ke kã nɛ o ngɛ ɔ nya ngɛ si bae ɔ, mo susu bɔfo Paulo nɔ hyɛmi nɔ́ ɔ he. E ngɛ mi kaa e bɔ mɔde kaa e maa kase Yesu mohu lɛɛ, se tsa pi be fɛɛ be nɛ e nyɛɔ peeɔ nɔ́ nɛ  e suɔ kaa e maa pee. (Kane 1 Korinto Bi 9:​16, 17.) E de ke: “Ke pi ye suɔmi nya po nɛ i pee ɔ, loloolo ɔ, i ngɛ we nɔ hyɛmi ní tsumi ko nɛ a tu ngɔ wo ye dɛ.” Ngɛ bɔ nɛ Paulo ngɛ he nue ha a tsuo se ɔ, e mwɔ e yi mi kpɔ kaa e maa gbe e sɔmɔmi ní tsumi ɔ nya.

¹³ Jã nɔuu kɛ̃ nɛ e sɛ nɛ waa da bɔ nɛ wa nuɔ he ha a nɔ pɛ kɛ mwɔ yi mi kpɔ. Moo bɔ mɔde kaa bɔ fɛɛ bɔ nɛ ji ɔ, o maa pee nɔ́ nɛ da ngɛ bɔ nɛ o ngɛ he nue ha a tsuo se. Ke o ya nɔ nɛ o pee nɔ́ nɛ da a, bɔɔbɔɔbɔɔ ɔ, e ma nyɛ ma tsake bɔ nɛ o nuɔ he ha ngɛ níhi a he. Ke o kaseɔ ní ngɛ o dɛ he be fɛɛ be, o sɔleɔ, o yaa asafo mi kpe, nɛ o tsuɔ fiɛɛmi ní tsumi ɔ be fɛɛ be ɔ, e maa ye bua mo nɛ o ya nɔ nɛ o nyɛɛ Yesu se ngɛ o baptisimi se. Ke nyɛmimɛ ɔmɛ na bɔ nɛ o fĩ si kɛ ngɛ Yehowa jae ha a, lɔ ɔ maa wo mɛ he wami.—1 Tɛs. 5:11.

“NYƐƐ YA NƆ NƐ NYƐƐ HI NYƐ HE KAE . . . NƐ NYƐƐ HI NYƐ MI KPAE”

14. Mɛni ji ní komɛ nɛ e sa kaa o kpa o mi ngɛ he be fɛɛ be, nɛ mɛni he je? (2 Korinto Bi 13:5)

¹⁴ Ke a baptisi mo se po ɔ, e he hia nɛ o ya nɔ nɛ o kpa o mi be fɛɛ be. (Kane 2 Korinto Bi 13:5.) E maa hi wawɛɛ kaa be komɛ ɔ, o maa hyɛ kaa o sɔleɔ, o kaseɔ Baiblo ɔ, nɛ o yaa asafo mi kpe kɛ fiɛɛmi be fɛɛ be lo. Moo hyɛ kaa mɛni blɔ nɔ o maa gu konɛ o ná ní nɛ ɔmɛ a he se wawɛɛ. Kaa nɔ hyɛmi nɔ́ ɔ, mo bi o he sanehi nɛ nyɛɛ se nɛ ɔmɛ: ‘Anɛ ma nyɛ ma tsɔɔ nihi Baiblo ɔ mi sisije tsɔɔmi ɔmɛ lo? Anɛ ní komɛ ngɛ nɛ ma nyɛ maa pee konɛ ma tsu fiɛɛmi ní tsumi ɔ saminya lo? Ke i ngɛ sɔlee ɔ, anɛ i tuɔ ní pɔtɛɛ komɛ a he munyu lo? Anɛ níhi nɛ i sɔleɔ ngɛ he ɔ tsɔɔ kaa i ngɔɔ ye hɛ kɛ fɔɔ Yehowa nɔ lo? Anɛ i yaa asafo mi kpehi daa lo? Ke i ya asafo mi kpe ɔ, mɛni ma nyɛ ma pee konɛ ma bu tue saminya, nɛ i kɛ ye he nɛ wo ní kasemi ɔ mi pe bɔ nɛ i peeɔ sa a?’

15-16. Mɛni o kase ngɛ bɔ nɛ nyɛminyumu ko plɛ kɛ da ka nya ha a mi?

¹⁵ Jehanɛ hu ɔ, e he hia wawɛɛ kaa o maa le o gbɔjɔmihi. Nyɛminyumu ko nɛ a tsɛɛ lɛ ke Robert ɔ ná enɛ ɔ mi níhi a si kpami. E de ke: “Benɛ i ye maa pee jeha 20 ɔ, i kɛ ligbi komɛ ya tsuɔ ní tsumi ko. Ligbi ko nɛ i kpa ní tsumi ɔ, yiheyo ko nɛ i kɛ lɛ tsuɔ ní ɔ fɔ mi nine kaa ma ba slaa lɛ ngɛ e we ɔ mi. E de mi kaa e maa piɛ wɔ pɛ ngɛ we ɔ mi, lɔ ɔ he ɔ, wa maa pee ‘nɔ́ nɛ wa suɔ.’ Sisije ɔ, i to tsle ngɛ heto nɛ ma ha lɛ ɔ he, se nyagbenyagbe ɔ, i de lɛ ke i be bae, nɛ i tsɔɔ lɛ nɔ́ he je.” Robert nyɛ nɛ e da ka nɛ ɔ nya, nɛ e sa yi jemi wawɛɛ. Pee se ɔ, benɛ e susu nɔ́ nɛ ya nɔ ɔ he ɔ, e na kaa e ko nyɛ ko tsu si fɔfɔɛ ɔ he ní saminya pe bɔ nɛ e pee ɔ. E de ke: “I nyɛ we nɛ ma de lɛ ke  dɛbi oya nɔuu kaa bɔ nɛ Yosef de Potifar yo ɔ. (1 Mose 39:​7-9) Ngɛ anɔkuale mi ɔ, e pee mi nyakpɛ kaa e he wa ha mi kaa ma de yiheyo ɔ ke i be e ngɔ bae. Si fɔfɔɛ nɛ ɔ ye bua mi nɛ i na kaa e sa nɛ ma ha nɛ huɛ bɔmi nɛ ngɛ i kɛ Yehowa wa kpɛti ɔ mi nɛ wa.”

¹⁶ Ke mo hu o kpa o mi kaa bɔ nɛ Robert pee ɔ, o ma ná he se. Ke o nyɛ nɛ o da ka ko nya po ɔ, mo bi o he ke, ‘Be enyɛmɛ e ye loko i nyɛ nɛ i pee jã?’ Ke o na kaa e he hia nɛ o bɔ o he mɔde wawɛɛ be kpa a, o kɔni mi nɛ ko jɔ̃. O bua nɛ jɔ kaa o ba le o gbɔjɔmi nɛ ɔ. Moo sɔle ha Yehowa ngɛ he, nɛ o pee níhi nɛ maa ye bua mo konɛ o ya nɔ nɛ o ye Yehowa mlaa amɛ a nɔ.—La 139:​23, 24.

17. Kɛ anɔkuale nɛ Robert ye ɔ wo Yehowa biɛ ɔ hɛ mi nyami ha kɛɛ?

¹⁷ Nɔ́ kpa ko hu ngɛ nɛ wa ma nyɛ maa kase ngɛ Robert níhi a si kpami ɔ mi. Robert tsa nɔ ke: “Benɛ i kua yiheyo ɔ nine fɔmi ɔ se ɔ, e de mi ke, ‘O ye kunimi!’ I bi lɛ ke, kɛ o ngɛ tsɔɔe kɛɛ? E tsɔɔ kaa e huɛ ko nɛ be ko nɛ be ɔ, e ji Odasefo no ɔ de lɛ kaa nihewi kɛ yihewi nɛ a ji Odasefohi ɔ peeɔ yayami kɛ laa ke a ná he blɔ. Enɛ ɔ he ɔ, yiheyo ɔ de e huɛ ɔ kaa e maa hyɛ kaa imi hu i peeɔ ye ní jã lo. Benɛ i nu nɔ́ nɛ ɔ, ye bua jɔ kaa i ha nɛ Yehowa biɛ ɔ he tsɔ.”

18. Mɛni o fia o pɛɛ si kaa o maa pee ngɛ o baptisimi se? (Hyɛ daka nɛ ji, “ Munyuhi Nɛ O Bua Maa Jɔ He” ɔ hulɔ.)

¹⁸ Ke o jɔɔ o he nɔ kɛ ha Yehowa nɛ a baptisi mo ɔ, lɔ ɔ tsɔɔ kaa o suɔ nɛ o pee nɔ́ fɛɛ nɔ́ nɛ o ma nyɛ kɛ tsɔ Yehowa biɛ ɔ he. O ma nyɛ ma ná nɔ mi mami kaa Yehowa le nyagbahi kɛ kahi nɛ o kɛ ngɛ kpee kɛ bɔ nɛ o ngɛ a nya dae ha. Ke o ya nɔ nɛ o ye Yehowa anɔkuale ɔ, e maa jɔɔ o mɔde bɔmi ɔ nɔ. Mo ná nɔ mi mami kaa Yehowa maa gu e mumi klɔuklɔu ɔ nɔ kɛ wo mo he wami konɛ o ya nɔ nɛ o ye lɛ anɔkuale. (Luka 11:​11-13) Ngɛ Yehowa yemi kɛ buami nya a, o ma nyɛ maa ya nɔ maa nyɛɛ Yesu se ngɛ o baptisimi se.