1. Mɛni nɔ hyɛmi nɔ́ nɛ Yesu pee ha e kaseli ɔmɛ, nɛ mɛni a pee? (Hyɛ foni nɛ ngɛ womi ɔ hɛ mi ɔ.)

BENƐ Yesu ngɛ zugba a nɔ ɔ, e ya nɔ nɛ e fiɛɛ, nɛ e ná hɛ kɛ nɔ fɔmi kaa nihi maa bu lɛ tue. E suɔ nɛ e kaseli ɔmɛ hu nɛ a pee jã. (Yoh. 4:35, 36) Benɛ Yesu kɛ e kaseli ɔmɛ ngɛ ɔ, a kɛ kã fiɛɛ wawɛɛ. (Luka 10:1, 5-11, 17) Se benɛ a nu Yesu nɛ a gbe lɛ ɔ, e kaseli ɔmɛ ngmɛɛ fiɛɛmi ní tsumi ɔ he kɛ fɔ si bɔɔ. (Yoh. 16:32) Benɛ a tle Yesu si ɔ, e wo mɛ he wami kaa a ngɔ fiɛɛmi ní tsumi ɔ kɛ pee oti ngɛ a si himi mi. Nɛ benɛ e ho hiɔwe ya a, e kaseli ɔmɛ kɛ kã fiɛɛ wawɛɛ nɛ a he nyɛli ɔmɛ de ke: “Hyɛ! nyɛ ha nɛ Yerusalɛm hyi tɔ kɛ nyɛ tsɔɔmi ɔ.”—Níts. 5:28.

2. Kɛ Yehowa jɔɔ fiɛɛmi ní tsumi ɔ nɔ ha kɛɛ?

² Yesu nyɛɛ fiɛɛmi ní tsumi ɔ nɛ Kristofohi nɛ a hi si ngɛ kaseli ɔmɛ a be ɔ mi ɔ tsu ɔ hɛ mi, nɛ Yehowa hu jɔɔ a mɔde bɔmi ɔ nɔ. Kaa nɔ hyɛmi nɔ́ ɔ, ngɛ Pentekoste ligbi ɔ nɔ ngɛ jeha 33 ɔ mi ɔ, a baptisi nihi maa pee 3,000. (Níts. 2:41) Nɛ kɛ je jamɛ a ligbi ɔ kɛ ma a, kaseli ɔmɛ a yibɔ ngɛ hɛ mi yae wawɛɛ. (Níts. 6:7) Yesu hu gba kɛ fɔ si kaa ngɛ nyagbe ligbi ɔmɛ a mi ɔ, nihi babauu maa kplɛɛ sane kpakpa a nɔ.—Yoh. 14:12; Níts. 1:8.

3-4. Mɛni he je nɛ fiɛɛmi ní tsumi ɔ he ma nyɛ maa wa ha ni komɛ ɔ, nɛ mɛni he wa ma susu ngɛ ní kasemi nɛ ɔ mi?

³ Wɔ tsuo wa bɔɔ mɔde kaa wa ma ná juɛmi nɛ da ngɛ fiɛɛmi ní tsumi ɔ he. Ngɛ ma komɛ a nɔ ɔ, e he wɛ kaa a maa pee jã. Mɛni he je? Ejakaa nihi fuu a bua jɔ Baiblo ɔ kasemi he, nɛ  ni komɛ po mlɛɛ hluu kɛ ya siɔ benɛ Odasefo no ko baa loko a kɛ mɛ ba kaseɔ Baiblo ɔ! Se ngɛ ma kpahi a nɔ ɔ, fiɛɛmi ní tsumi ɔ be gbɔjɔɔ; nihi fuu pɔɛ we mi himi, nɛ ke a ya ná mɛ po ɔ, behi fuu ɔ, a bua jɔɛ Baiblo ɔ kasemi he tsɔ.

⁴ Ke o ngɛ he ko nɛ fiɛɛmi ní tsumi ɔ he wa ngɛ ɔ, eko ɔ, níhi nɛ a tu he munyu ngɛ ní kasemi nɛ ɔ mi ɔ maa ye bua mo. Wa ma susu nɔ́ nɛ ye bua ni komɛ nɛ a nyɛ fiɛɛ kɛ ha nihi fuu ɔ he, kɛ nɔ́ he je nɛ wa ma nyɛ ma ná juɛmi nɛ da ke nihi bu wa sɛ gbi ɔ tue loo a bui tue.

5. Mɛni nyagbahi nɛ Odasefohi fuu kɛ kpeɔ?

⁵ E he waa ha Odasefohi fuu kaa a maa na nihi ngɛ a wehi a mi. Fiɛɛli komɛ fiɛɛɔ ngɛ hehi nɛ a fia gbogbo kɛ wo wehi a he loo hehi nɛ buli ngɛ we ɔmɛ a nya. Behi fuu ɔ, buli nɛ a ngɛ we ɔmɛ a nya a kplɛɛ we nɛ nihi sɛɛ we ɔ mi ke a ha we mɛ he blɔ kaa a ba we ɔ mi. Se ngɛ he kpahi ɔ, fiɛɛli yaa wehi a mi faa, se a ya náa nihi bɔɔ pɛ ngɛ we mi. Jehanɛ hu ɔ, fiɛɛli komɛ fiɛɛɔ ngɛ hehi nɛ tsɔ a he banee nɛ nihi a he pi ngɛ kpakpa ko. Eko ɔ, fiɛɛli nɛ ɔmɛ nyɛɛɔ be gagaa loko a naa we kake, nɛ be komɛ po ɔ, a nɛ nɔ ko ngɛ we ɔ mi. Ke waa kɛ nyagba nɛ ɔmɛ eko ngɛ kpee ɔ, e sɛ nɛ wa kɔni mi nɛ jɔ̃! Mɛni wa ma nyɛ maa pee kɛ da nyagba nɛ ɔmɛ a nya konɛ wa fiɛɛmi ní tsumi ɔ nɛ nu tso?

6. Mɛni blɔ nɔ nɛ wa ngɛ kaa wo hɛli?

⁶ Yesu ngɔ fiɛɛmi ní tsumi ɔ kɛ to wo hɛmi he. (Maak. 1:17) Wo hɛli kɛ ligbihi fuu hɛɛ wo nɛ a nɛ lo kake po. Se a kɔni mi jɔ̃ we; a tsakeɔ a he kɛ woɔ si fɔfɔɛ ɔ mi. A tsakeɔ be, hehi nɛ a gbeɔ lo ngɛ, loo blɔ nɔ nɛ a guɔ kɛ gbeɔ lo ɔ. Wɔ hu wa ma nyɛ maa pee tsakemihi ngɛ wa fiɛɛmi ní tsumi ɔ mi. Amlɔ nɛ ɔ, nyɛ ha nɛ wa susu ní komɛ nɛ wa ma nyɛ maa pee ɔ a he nɛ waa hyɛ.

7. Ke wa fiɛɛ ngɛ be slɔɔtohi a mi ɔ, mɛni ma nyɛ maa je mi kɛ ba?

⁷ Moo ya nihi a ngɔ ngɛ be kpa mi. Ke wa ya nihi a ngɔ ngɛ be nɛ wa susu kaa wa nine maa su a nɔ ɔ mi ɔ, eko ɔ, wa maa na mɛ ngɛ we mi. Ke wa ma de ɔ, be pɔtɛɛ ko ngɛ nɛ nɔ fɛɛ nɔ kɛ yaa we mi! Nyɛmimɛ fuu yaa fiɛɛmi piani loo gbɔkuɛ, ejakaa a nine suɔ nihi fuu a nɔ jamɛ a be ɔ. Jehanɛ hu ɔ, jamɛ a be ɔ ji be nɛ nihi fuu kɛ jɔɔ a he nɛ a buɔ munyu ɔ tue. Aloo eko ɔ, ke o kɛ ga womi nɛ asafo mi nɔkɔtɔma ko nɛ a tsɛɛ lɛ ke David ɔ kɛ ha a tsu ní ɔ, e maa ye bua. E tsɔɔ kaa ke e fiɛɛ ngɛ he ko bɔɔ ɔ, e kɛ nɔ nɛ piɛɛ e he ɔ kpaleɔ kɛ yaa wehi nɛ a nɛ nihi ngɛ mi ɔ a mi ekohu. E de ke: “Ke wa kpale ya we nɛ ɔmɛ a mi ɔ, wa nine suɔ nihi fuu a nɔ, nɛ e peeɔ mi nyakpɛ wawɛɛ.” *

8. Kɛ wa ma nyɛ maa ngɔ Fiɛlɔ 11:6 kɛ tsu ní ngɛ fiɛɛmi mi ha kɛɛ?

⁸ E sɛ nɛ wa kɔni mi nɛ jɔ̃. Ngmami nɛ a ngɔ wa ní kasemi ɔ kɛ da nɔ ɔ kaiɔ wɔ bɔ nɛ e sa nɛ waa pee wa ní ha. Baiblo ɔ de ke: “Du o wu ɔ mɔtu, nɛ koo jɔɔ o nine he kɛ ya si gbɔkuɛ; ejakaa o li nɔ́ nɛ maa ye manye, enɛ ɔ jio, kaketsɛ ɔ jio, enyɔ ɔmɛ tsuo maa hi jio, o li.” (Fiɛlɔ 11:6, NW) David nɛ wa tu e he munyu kɛ sɛ hlami ɔ kɔni mi jɔ̃ we. E ya na wetsɛ ko ngɛ we ko nɛ e pɔɛ nihi nami ngɛ mi ɔ mi. Nyumu ɔ bua jɔ kaa e maa kase Baiblo ɔ. E de ke: “I hi hiɛ maa pee jeha kpaanyɔ sɔuu, se Yehowa Odasefo no ko ba si we ye sinya  hyɛ.” David de ke: “Ke wa na nihi ngɛ we mi ɔ, behi fuu ɔ, a buɔ sɛ gbi nɛ wa fiɛɛɔ ɔ tue.”

9. Mɛni nɛ Odasefohi komɛ pee konɛ a nine nɛ su nihi nɛ a nɛ́ mɛ ngɛ we mi ɔ a nɔ?

⁹ Moo fiɛɛ ngɛ he kpa. Bɔ nɛ pee nɛ nihi nɛ wa pɔɛ mɛ nami ngɛ we mi ɔ nɛ a nu sane kpakpa a, fiɛɛli komɛ tsake he nɛ a fiɛɛɔ ngɛ ɔ. Kaa nɔ hyɛmi nɔ́ ɔ, fiɛɛli komɛ nɛ a kɛ atsɛ̃se ɔ tsuɔ ní loo a fiɛɛɔ ngɛ gbɛjegbɛ he ɔ yeɔ manye ngɛ a fiɛɛmi ní tsumi ɔ mi. A nine suɔ nihi nɛ a ngɛ hehi nɛ a fia gbogbo kɛ wo wehi a he nɛ a ngmɛ́ blɔ nɛ nihi sɛɛ we ɔ mi ɔ a nɔ. Jã nɛ a peeɔ ɔ haa nɛ a náa he blɔ nɛ a kɛ nimli nɛ ɔmɛ sɛɛɔ ní hɛ mi kɛ hɛ mi. Fiɛɛli fuu to he hɛ kaa nihi fuu ngɔɔ wa womi ɔmɛ loo a kplɛɔ nɔ nɛ a kɛ mɛ sɛɛɔ ní ngɛ magbɛ nɔ, juahi a nɔ, kɛ hehi nɛ ní tsumihi fuu ngɛ. Floiran nɛ e ji kpɔ mi nɔ hyɛlɔ ngɛ Bolivia a de ke: “Wa yaa juahi a nɔ kɛ tsuapohi a mi maa pee piani ngmlɛ kake kɛ ya si ngmlɛ etɛ be mi nɛ ni ɔmɛ ná deka bɔɔ. Behi fuu ɔ, waa kɛ nihi jeɔ ní sɛɛmi sisi nɛ waa kɛ mɛ kaseɔ Baiblo ɔ po.”

10. Mɛni blɔ kpahi a nɔ wa ma nyɛ maa gu kɛ fiɛɛ ha nihi?

¹⁰ Mo tsake blɔ nɔ nɛ o guɔ kɛ fiɛɛɔ ɔ hɛ mi. Ngɔɔ lɛ kaa o ya bi nɔ ko si ngɛ we ko mi si abɔ, se o nɛ lɛ. O tsake be nɛ o kɛ yaa lejɛ ɔ, se loloolo ɔ, o nɛ lɛ. Anɛ o ma nyɛ ma tsake blɔ nɔ nɛ o guɔ kɛ fiɛɛɔ ɔ hɛ mi konɛ o nine nɛ su e nɔ lo? Katarína de ke: “I ngmaa sɛ womi kɛ haa nihi nɛ i nɛ́ mɛ ngɛ we mi ɔ, nɛ i ngmaa nɔ́ nɛ ma de mɛ ke i kɛ mɛ kpe ɔ ngɛ sɛ womi ɔ mi.” Mɛni wa ma nyɛ maa kase ngɛ níhi a si kpami nɛ ɔ  mi? Moo gu blɔ fɛɛ blɔ nɔ konɛ o nine nɛ su nihi tsuo nɛ a ngɛ o zugba kpɔ ɔ mi ɔ a nɔ.

11. Mɛni ha nɛ ni komɛ a bua jɔɛ wa sɛ gbi ɔ he ɔ?

¹¹ Ni komɛ a bua jɔɛ wa sɛ gbi ɔ he. A susu kaa e he hia we nɛ a le Mawu loo a kase Baiblo ɔ. A he we yi kaa Mawu ngɛ, ejakaa ke e ngɛ ɔ, lɛɛ mɛni he je nɛ adesahi ngɛ nɔ́ nae wawɛɛ ngɛ je ɔ mi jã a. A sume nɛ a kase Baiblo ɔ ejakaa a naa osato nɛ jami hɛ mi nyɛɛli ɔmɛ peeɔ ɔ. Ni komɛ hu susuɔ a ní tsumihi, a wekuhi kɛ a nyagbahi pɛ a he be fɛɛ be, nɛ a nɛ bɔ nɛ Baiblo ɔ ma nyɛ maa ye bua mɛ ha. Mɛni ma nyɛ maa ye bua wɔ nɛ waa ya nɔ nɛ wa ná bua jɔmi ke nihi nɛ wa fiɛɛɔ kɛ haa mɛ ɔ nɛ wa sɛ gbi ɔ kaa e he hia?

12. Kɛ Filipi Bi 2:4 ɔ nɛ waa kɛ ma tsu ní ɔ ma nyɛ maa ye bua wɔ ngɛ fiɛɛmi mi ha kɛɛ?

¹² Mo susu nihi a he. Ni komɛ nɛ be ko nɛ be ɔ, a bua jɔɛ sane kpakpa a he ɔ ba kplɛɛ nɔ amlɔ nɛ ɔ, ejakaa ni komɛ pee ní komɛ kɛ tsɔɔ kaa a susuɔ a he. (Kane Filipi Bi 2:4.) Kaa nɔ hyɛmi nɔ́ ɔ, David nɛ wa tu e he munyu kɛ sɛ hlami ɔ de ke: “Ke nɔ ko de kaa e bua jɔɛ wa sɛ gbi ɔ he ɔ, i ngɔɔ Baiblo ɔ kɛ wa womi ɔmɛ kɛ woɔ ye baagi ɔ mi nɛ i deɔ lɛ ke: ‘I suɔ nɛ ma le nɔ́ he je nɛ o nuɔ he jã.’” Ke wa je suɔmi kpo kɛ tsɔɔ nɔ ko ɔ, e ma nyɛ ma yɔse. Eko ɔ, a hɛ maa je nɔ́ tutuutu nɛ wa de mɛ ɔ nɔ, se a ma kai bɔ nɛ wa ha nɛ a nu he ha a. Ke wetsɛ ko ngmɛ́ wɔ blɔ nɛ waa tu munyu po ɔ, wa ma nyɛ maa ngɔ wa ní peepee kɛ bɔ nɛ wa maa pee wa hɛ mi ha a kɛ tsɔɔ kaa wa susuɔ a he.

13. Kɛ wa ma plɛ kɛ tsake wa sɛ gbi ɔ hɛ mi konɛ e kɛ wetsɛ ko si fɔfɔɛ nɛ kɔ ha kɛɛ?

¹³ Ke wa tsake wa fiɛɛmi ní tsumi ɔ hɛ mi bɔ nɛ pee nɛ e kɛ wetsɛ ɔ si fɔfɔɛ ɔ nɛ kɔ ɔ, lɔ ɔ tsɔɔ kaa wa susuɔ wetsɛ ɔ he. Kaa nɔ hyɛmi nɔ́ ɔ, anɛ wa yɔseɔ níhi nɛ tsɔɔ kaa jokuɛwi ngɛ we ɔ mi lo? Eko ɔ, wetsɛ ɔ bua maa jɔ Baiblo ga womihi nɛ kɔɔ bi tsɔsemi loo nɔ́ nɛ wa maa pee konɛ wa ná bua jɔmi ngɛ wa weku ɔ mi ɔ he. Anɛ o na kaa a kɛ kladowa fuu ngmɛ a sinya a mi lo? Waa kɛ mɛ ma nyɛ ma susu ní yayahi nɛ ngɛ nɔ yae ngɛ je ɔ mi, kɛ bɔ nɛ lɔ ɔ haa nɛ nihi yeɔ gbeye ha a he. Eko ɔ, wetsɛ ɔ bua maa jɔ ke e ba kase kaa ní yayahi nɛ ngɛ nɔ yae ɔ tsuo se maa po. Be fɛɛ be nɛ o maa fiɛɛ ha nɔ ko ɔ, moo ye bua lɛ nɛ e na bɔ nɛ Baiblo ga womihi ma nyɛ maa ye bua lɛ ha. Katarína nɛ wa tu e he munyu kɛ sɛ hlami ɔ de ke: “I kaiɔ ye he bɔ nɛ anɔkuale ɔ tsake ye  si himi ha.” Jã nɛ e peeɔ ɔ haa nɛ e tuɔ munyu kɛ nɔ mi mami, nɛ nihi nɛ a buɔ lɛ tue ɔ naa kaa e he nɔ́ nɛ e ngɛ dee ɔ ye.

14. Ngɛ Abɛ 27:17 ɔ nya a, mɛni blɔ nɔ nɛ ni enyɔ nɛ a ya fiɛɛmi ɔ ma nyɛ maa ye bua a sibi?

¹⁴ Mo ha nɛ ni kpahi nɛ a ye bua mo. Ngɛ kaseli ɔmɛ a be ɔ mi ɔ, Paulo tsɔɔ Timoteo bɔ nɛ e fiɛɛ nɛ e tsɔɔ ní ha, nɛ e wo lɛ he wami kaa lɛ hu e ye bua ni kpahi jã nɔuu. (1 Kor. 4:17) Kaa bɔ nɛ Timoteo pee ɔ, wɔ hu wa ma nyɛ maa kase ní kɛ je nihi nɛ a ngɛ níhi a si kpami ngɛ asafo ɔ mi ɔ a ngɔ. (Kane Abɛ 27:17.) Mo susu nyɛminyumu ko nɛ a tsɛɛ lɛ ke Shawn níhi a si kpami ɔ he nɛ o hyɛ. E sɔmɔ kaa blɔ gbalɔ ngɛ he ko nɛ nihi nɛ a ngɛ lejɛ ɔ a bua jɔ jami nɛ a ngɛ mi ɔ he. Mɛni lɛ ye bua lɛ nɛ e ya nɔ nɛ e ná bua jɔmi? E de ke: “Be fɛɛ be nɛ e maa hi ɔ, i kɛ nɔ ko tsuɔ ní ngɛ fiɛɛmi mi. Ke wa ngɛ blɔ nɔ kɛ yaa we ko mi ɔ, wa ngɔɔ jamɛ a be ɔ kɛ yeɔ bua wa sibi bɔ nɛ pee nɛ wa fiɛɛmi ní tsumi ɔ nɛ nu tso. Kaa nɔ hyɛmi nɔ́ ɔ, wa susuɔ nɔ́ nɛ wetsɛ ko de kɛ blɔ nɔ nɛ wa gu kɛ ha lɛ heto ha a he. Lɔ ɔ se ɔ, wa susuɔ blɔ nɔ nɛ wa maa gu kɛ tsu jamɛ a si fɔfɔɛ ɔ nɔuu he ní ngɛ blɔ kpa nɔ ha a he.”

15. Mɛni he je nɛ sɔlemi he hia ngɛ fiɛɛmi ní tsumi ɔ mi?

¹⁵ Moo sɔle kɛ bi Yehowa yemi kɛ buami. Be fɛɛ be nɛ o maa ya fiɛɛmi ɔ, mo bi Yehowa ga womi. Wa be nyɛe maa ye manye kɔkɔɔkɔ ke Yehowa kɛ e mumi klɔuklɔu ɔ yi bua wɔ. (La 127:1; Luka 11:13) Ke o ngɛ sɔlee kɛ ngɛ Yehowa hae ɔ, moo tu ní pɔtɛɛ komɛ a he munyu. Kaa nɔ hyɛmi nɔ́ ɔ, mo bi lɛ nɛ e tsɔɔ mo blɔ kɛ ya nihi nɛ a ngɛ su kpakpa nɛ a suɔ nɛ a bu tue ɔ a ngɔ. Lɔ ɔ se ɔ, bɔɔ mɔde nɛ o fiɛɛ kɛ ha nɔ fɛɛ nɔ nɛ o kɛ maa kpe ɔ.

16. Bɔ nɛ pee nɛ wa fiɛɛmi ní tsumi ɔ nɛ nu tso ɔ, mɛni he je nɛ dɛ he ní kasemi he hia a?

¹⁶ Mo he be kɛ pee dɛ he ní kasemi. Mawu Munyu ɔ de ke: “Nyɛ nitsɛmɛ nyɛ ná Mawu suɔmi nya ní nɛ e ye mluku, nɛ e hi, nɛ e sa e hɛ mi ɔ nɔ mi mami.” (Rom. 12:2) Ke wa yaa nɔ nɛ wa kaseɔ Mawu he anɔkuale ɔ, lɔ ɔ ma ha nɛ waa kɛ nɔ́ mi mami maa tu e he munyu kɛ tsɔɔ ni kpahi, nɛ a maa na kaa wa he nɔ́ nɛ wa ngɛ mɛ dee ɔ ye. Katarína nɛ wa tu e he munyu kɛ sɛ hlami ɔ de ke: “Be bɔɔ komɛ a se ɔ, i ba na kaa e sa nɛ ma wo hemi kɛ yemi nɛ i ngɛ ngɛ Baiblo sisije tsɔɔmi komɛ a mi ɔ mi he wami. Enɛ ɔ ha nɛ i kase ní wawɛɛ, nɛ i ná nɔ mi mami kaa Bɔlɔ ko ngɛ, Baiblo ɔ ji Mawu Munyu, nɛ Mawu ngɛ blɔ nya tomi ko ngɛ zugba a nɔ.” Katarína tsɔɔ kaa dɛ he ní kasemi ha nɛ e hemi kɛ yemi ɔ mi wa, nɛ bua jɔmi nɛ e ngɛ ngɛ fiɛɛmi ní tsumi ɔ mi ɔ ya hɛ mi.

17. Mɛni he je nɛ Yesu ya nɔ nɛ e ná juɛmi nɛ da ngɛ fiɛɛmi ní tsumi ɔ he ɔ?

¹⁷ E ngɛ mi kaa nihi fuu bui Yesu sɛ gbi ɔ tue mohu lɛɛ, se e ya nɔ nɛ e ná juɛmi nɛ da, nɛ e ya nɔ nɛ e fiɛɛ. Mɛni he je? E le kaa e he hia nɛ nihi nɛ a le anɔkuale ɔ, nɛ e suɔ nɛ e ye bua nihi fuu konɛ a nu Matsɛ Yemi ɔ sɛ gbi ɔ. E le kaa eko ɔ, ni komɛ nɛ a bui sɛ gbi ɔ tue amlɔ nɛ ɔ ma ba kplɛɛ nɔ pee se. Mo susu nɔ́ nɛ ya nɔ ngɛ lɛ nitsɛ e weku ɔ mi ɔ he nɛ o hyɛ. Yesu kɛ jeha etɛ kɛ fã tsu fiɛɛmi ní tsumi ɔ, se e nyɛmimɛ ɔmɛ a kpɛti nɔ ko ba pee we e kaselɔ jamɛ a be ɔ. (Yoh. 7:5) Se benɛ a tle Yesu si se ɔ, a ba pee Kristofohi.—Níts. 1:14.

18. Mɛni he je nɛ e sa nɛ waa ya nɔ nɛ waa fiɛɛ?

¹⁸ Wa li nihi nɛ wa tsɔɔ mɛ Baiblo mi anɔkuale  ɔ a kpɛti nihi nɛ a ma ba kplɛɛ nɔ. E heɔ be loko ni komɛ kplɛɔ sɛ gbi ɔ nɔ. Nihi nɛ a bui wɔ tue ɔ po naa wa je mi bami kpakpa a kɛ juɛmi nɛ da nɛ wa hɛɛ ngɛ fiɛɛmi ní tsumi ɔ he ɔ, nɛ eko ɔ, nyagbenyagbe ɔ, a ma ba wo “Mawu hɛ mi nyami.”—1 Pet. 2:12.

19. Ngɛ 1 Korinto Bi 3:6, 7 ɔ nya a, mɛni e sa nɛ waa le?

¹⁹ Be mi nɛ wa ngɛ due nɛ wa ngɛ nɔ nyu puee ɔ, e sa nɛ wa yɔse kaa Mawu lɛ haa nɛ e waa. (Kane 1 Korinto Bi 3:6, 7.) Nyɛminyumu ko nɛ a tsɛɛ lɛ ke Getahun nɛ e ngɛ Ethiopia a de ke: “Jeha 20 sɔuu ji nɛ ɔ, imi pɛ ji Odasefo no ngɛ he nɛ i ngɛ ɔ. Se amlɔ nɛ ɔ, wa ngɛ fiɛɛli 14 ngɛ hiɛ ɔ. A baptisi a kpɛti nihi 13 nɛ ye yo ɔ kɛ ye bimɛ etɛ hu piɛɛ he.” Nihi maa pee 32 lɛ a baa asafo mi kpehi be fɛɛ be. Getahun ya nɔ nɛ e fiɛɛ nɛ e to e tsui si konɛ Yehowa nɛ gbla tsui kpakpatsɛmɛ kɛ ba e we asafo ɔ mi!—Yoh. 6:44.

20. Ngɛ mɛni blɔ nɔ nɛ wa ngɛ kaa yi wami hemi ní tsuli?

²⁰ Adesahi tsuo a wami he jua wa ha Yehowa. E ha wɔ he blɔ kaa waa piɛɛ e Bi ɔ he kɛ bua nihi tsuo nɛ a ngɛ je ma amɛ tsuo a mi ɔ a nya loko Satan je yaya nɛ ɔ nɛ ba nyagbe. (Hag. 2:7) Wa ma nyɛ maa ngɔ wa fiɛɛmi ní tsumi ɔ kɛ to yi wami hemi ní tsumi ko he. Nɛ wa ngɛ kaa nihi nɛ a tsɔ mɛ kaa a ya he sika tsu tsuali komɛ nɛ zu ku pue a nɔ ɔ a yi wami. E ngɛ mi kaa nihi nɛ a tsɔ ɔ a kpɛti nihi bɔɔ pɛ nɛ a ma nyɛ ma he nɔ ko yi wami mohu lɛɛ, se lɔ ɔ tsɔɔ we kaa ní nɛ ni kpa amɛ tsu ɔ he be se nami. Ja kɛ̃ nɛ e ji ngɛ wa fiɛɛmi ní tsumi ɔ hu blɔ fa mi. Wa li nihi abɔ nɛ wa ma nyɛ ma kpɔ̃ mɛ ngɛ Satan je yaya nɛ ɔ mi. Se Yehowa ma nyɛ maa gu wa kpɛti nɔ fɛɛ nɔ nɔ kɛ ye bua nihi. Andreas nɛ e ngɛ Bolivia a de ke: “Ke nɔ ko ba kase anɔkuale ɔ nɛ a baptisi lɛ ɔ, i le kaa nihi fuu nɛ a ye bua lɛ.” Nyɛ ha nɛ wɔ tsuo waa ya nɔ nɛ wa ná juɛmi nɛ da ngɛ fiɛɛmi ní tsumi ɔ he. Ke wa pee jã a, Yehowa maa jɔɔ wɔ, nɛ wa fiɛɛmi ní tsumi ɔ ma ha nɛ wa ná bua jɔmi nitsɛnitsɛ.