1-2. Mɛni nyagbahi nɛ Odasefohi fuu kɛ kpeɔ?

BƆFO Paulo wo Timoteo kɛ Kristofohi tsuo he wami kaa a tsu sɔmɔmi ní tsumi ɔ kɛ pi si. (2 Tim. 4:5) Wɔ tsuo waa kɛ Paulo ga womi ɔ tsuɔ ní, nɛ wa peeɔ nɔ́ nɛ wa ma nyɛ. Se kɛ̃ ɔ, waa kɛ nyagbahi kpeɔ. Wa nyɛmimɛ fuu yeɔ gbeye kaa a ma tsu fiɛɛmi ní tsumi ɔ. (2 Tim. 4:2) Mo susu wa nyɛmimɛ nɛ a ngɛ hehi nɛ a tsi wa ní tsumi ɔ fã ko aloo tsuo nya ngɛ ɔ a he nɛ o hyɛ. A le kaa a ma nyɛ maa wo mɛ tsu ngɛ fiɛɛmi ní tsumi ɔ he je, se kɛ̃ ɔ, a yaa nɔ nɛ a fiɛɛɔ!

² Yehowa we bi kɛ nyagbahi fuu nɛ ma nyɛ ma jɔ̃ a kɔni mi ɔ kpeɔ. Kaa nɔ hyɛmi nɔ́ ɔ, a kpɛti nihi fuu kɛ be babauu tsuɔ ní loko a náa a weku ɔ he lo nya hiami níhi. A suɔ nɛ a pee babauu ngɛ fiɛɛmi ní tsumi ɔ mi, se ke otsi ɔ ke baa nyagbe ɔ kɛkɛ pɔ tɔ a he. A kpɛti ni komɛ ngɛ nɛ hiɔ nɛ nya wa ko ngɛ a nya gbae, loo a wa ngɛ jeha mi, loo eko ɔ, a tlɔ we mi, lɔ ɔ he ɔ, a nyɛ we nɛ a pee babauu. Ni komɛ hu susuɔ kaa a he hia we Yehowa. Nyɛmiyo ko nɛ a tsɛɛ lɛ ke Mary * ɔ de ke: “Ke ye kɔni mi jɔ̃ ɔ, e he waa ha mi kaa ma kudɔ susumi yayamihi nɛ i náa. E heɔ be loko i nyɛɔ peeɔ jã, nɛ enɛ ɔ ha we nɛ ma ná he wami nɛ ma kɛ tsu fiɛɛmi ní tsumi ɔ.”

3. Mɛni he wa ma susu ngɛ ní kasemi nɛ ɔ mi?

³ Ngɛ nyagba fɛɛ nyagba nɛ waa kɛ ngɛ kpee ɔ mi ɔ, Yehowa ma nyɛ ma ha wɔ he wami nɛ wa hia a konɛ waa ya nɔ nɛ waa pee nɔ́ nɛ wa ma nyɛ ngɛ e sɔmɔmi mi. Loko wa ma susu bɔ nɛ Yehowa ma nyɛ maa ye bua wɔ ha a he ɔ, nyɛ ha nɛ waa hyɛ bɔ nɛ Yehowa wo Paulo kɛ Timoteo he wami ha nɛ a nyɛ tsu a sɔmɔmi ní tsumi ɔ kɛ pi si ngɛ nyagbahi nɛ a kɛ kpe ɔ tsuo se.

4. Mɛni nyagbahi nɛ Paulo kɛ kpe?

⁴ Paulo kɛ nyagbahi fuu kpe. A kongo lɛ, a fiaa lɛ tɛ, nɛ a wo lɛ tsu; be nɛ ɔ mi ji be nɛ e hia he wami womi wawɛɛ. (2 Kor. 11:23-25) Paulo tsɔɔ kaa be komɛ ɔ, e kɔni mi jɔ̃ɔ, nɛ e he waa ha lɛ kaa e maa da nya. (Rom. 7:18, 19, 24) Jehanɛ hu ɔ, hiɔ ko nɛ ngɛ kaa ‘mio ko ngɛ e he lo ɔ mi’ nɛ e ná nɛ Mawu je ha lɛ.—2 Kor. 12:7, 8.

5. Mɛni nɛ Paulo nyɛ nɛ e pee ngɛ nyagbahi nɛ e kɛ kpe ɔ tsuo se?

⁵ Ngɛ nyagbahi tsuo nɛ Paulo kɛ kpe ɔ mi ɔ, Yehowa wo lɛ he wami nɛ e nyɛ tsu e sɔmɔmi ní tsumi ɔ. Nyɛ ha nɛ waa hyɛ bɔ nɛ Paulo tsu e sɔmɔmi ní tsumi ɔ kɛ pi si ha. Benɛ a wo lɛ tsu ngɛ we mi ngɛ Roma a, e kɛ kã fiɛɛ kɛ ha nihi fuu, nɛ eko ɔ, e fiɛɛ kɛ ha amlaalohi po. (Níts. 28:17; Filip. 4:21, 22) Jehanɛ hu ɔ, e fiɛɛ kɛ ha Matsɛ Ngua a He Buli Ɔmɛ a kpɛti nihi fuu, nɛ e ye nihi tsuo nɛ a ba slaa lɛ ɔ odase. (Níts. 28:30, 31; Filip. 1:13) Ngɛ jamɛ a be ɔ mi nɔuu ɔ, Mawu gu Paulo nɔ kɛ ngma sɛ womihi kɛ ye bua anɔkuale Kristofohi nɛ a hi si ngɛ e be ɔ mi ɔ kɛ Kristofohi nɛ a ngɛ mwɔnɛ ɔ tsuo. Jehanɛ hu ɔ, Paulo nɔ hyɛmi nɔ́ ɔ wo asafo nɛ ngɛ Roma a he wami wawɛɛ. Enɛ ɔ ha nɛ nyɛmimɛ ɔmɛ ‘je kã babauu kpo pe kekle ɔ nɛ a fiɛɛ Mawu munyu ɔ nɛ́ a yi gbeye.’ (Filip. 1:14) E ngɛ mi kaa be komɛ ɔ, Paulo nyɛ we nɛ e peeɔ babauu kaa bɔ nɛ e ngɛ hlae maa pee ɔ, se e pee nɔ́ nɛ e ma nyɛ ngɛ e si fɔfɔɛ ɔ mi, nɛ ngɛ ‘anɔkuale mi ɔ, e si fɔfɔɛ ɔ ha nɛ sane kpakpa a ya nɔ mohu.’—Filip. 1:12.

6. Ngɛ 2 Korinto Bi 12: 9, 10 nya a, mɛni lɛ ye bua Paulo nɛ e tsu e sɔmɔmi ní tsumi ɔ kɛ pi si?

⁶ Paulo yɔse kaa Yehowa nɛ wo lɛ he wami nɛ e nyɛ tsu e sɔmɔmi ní tsumi ɔ, se pi lɛ nitsɛ e he wami. Paulo tsɔɔ kaa Mawu he wami ɔ “ngɛ mluku yee ngɛ gbɔjɔmi mi.” (Kane 2 Korinto Bi 12:9, 10.) Yehowa gu e mumi klɔuklɔu ɔ nɔ kɛ wo Paulo he wami nɛ e nyɛ tsu e sɔmɔmi ní tsumi ɔ kɛ pi si ngɛ yi mi wami nɛ e kɛ kpe, tsu nɛ a wo lɛ, kɛ nyagba kpahi nɛ e kɛ kpe ɔ tsuo se.

7. Mɛni nyagbahi nɛ e he ba hia nɛ Timoteo nɛ e da nya konɛ e nyɛ nɛ e tsu e sɔmɔmi ní tsumi ɔ kɛ pi si?

⁷ Niheyo Timoteo nɛ e ji Paulo huɛ ɔ hu ngɔ e hɛ kɛ fɔ Mawu he wami ɔ nɔ konɛ e nyɛ nɛ tsu e sɔmɔmi ní tsumi ɔ. Timoteo piɛɛ Paulo  he kɛ tsu ma se sane kpakpa fiɛɛmi ní tsumi ɔ. Jehanɛ hu ɔ, Paulo tsɔ lɛ nɛ e ya slaa asafo komɛ nɛ e wo mɛ he wami. (1 Kor. 4:17) Eko ɔ, Timoteo susu kaa e he sui kɛ ha ní tsumi nɛ ɔ. E ma nyɛ maa ba kaa lɔ ɔ he je nɛ Paulo wo lɛ he wami ke: “Ko ha nɛ nɔ ko nɛ e gbe niheyo nɛ o ji ɔ he guɛ kɔkɔɔkɔ” ɔ nɛ. (1 Tim. 4:12) Jehanɛ hu ɔ, ngɛ be nɛ ɔmɛ tsuo a mi ɔ, Timoteo nitsɛ hu ngɛ he lo mi mio ko, lɔ ɔ ji hiɔ nɛ ‘pɔɔ lɛ numi kpitikpiti’ ɔ nɛ. (1 Tim. 5:23) Se Timoteo le kaa Yehowa ma nyɛ maa gu e mumi klɔuklɔu ɔ nɔ kɛ ha lɛ he wami nɛ e hia a konɛ e ya nɔ nɛ e fiɛɛ sane kpakpa a nɛ e sɔmɔ e nyɛmimɛ.—2 Tim. 1:7.

8. Mɛni blɔhi a nɔ Yehowa guɔ kɛ woɔ e we bi he wami mwɔnɛ ɔ?

⁸ Mwɔnɛ ɔ, Yehowa haa e we bi “he wami nɛ pe adesahi a nɔ́” ɔ konɛ a ya nɔ nɛ a kɛ anɔkuale yemi nɛ sɔmɔ lɛ. (2 Kor. 4:7) Nyɛ ha nɛ wa susu níhi eywiɛ nɛ Yehowa ha wɔ nɛ ma nyɛ maa wo wɔ he wami nɛ maa ye bua wɔ nɛ waa ya nɔ nɛ waa ye lɛ anɔkuale ɔ he. Lɔ ɔmɛ ji, sɔlemi, Baiblo ɔ, Kristofohi a kpehi, kɛ fiɛɛmi ní tsumi ɔ.

9. Mɛni blɔ nɔ sɔlemi ma nyɛ maa ye bua wɔ?

⁹ E woɔ wɔ he wami kɛ guɔ sɔlemi nɔ. Ngɛ Efeso Bi 6:18 ɔ, Paulo wo wɔ he wami kaa waa sɔle kɛ ha Mawu “be fɛɛ be.” Mawu maa ye bua wɔ kɛ gu wa sɔlemihi a heto nɛ e ma ha a nɔ. Jonnie nɛ e ngɛ Bolivia a na bɔ nɛ Yehowa ye bua lɛ ha benɛ e kɛ nyagbahi fuu kpe ɔ. E yo kɛ lɛ nitsɛ e fɔli tsuo nu hiɔ ngɛ be kake mi. E he wa ha Jonnie kaa e maa hyɛ mɛ ni etɛ ɔmɛ tsuo a nɔ. E yayo ba gbo, nɛ e he be loko e yo ɔ kɛ e papaa ná he wami. Benɛ e ngɛ e nyagba a he munyu tue ɔ, e de ke: “Ke i hao wawɛɛ ɔ, i deɔ Yehowa bɔ nɛ i ngɛ he nue ha tutuutu ngɛ sɔlemi mi.” Yehowa ha Jonnie he wami nɛ e hia a nɛ e kɛ da e nyagba a nya. Asafo mi nɔkɔtɔma ko nɛ a tsɛɛ lɛ ke Ronald nɛ e ngɛ Bolivia a ná le kaa e yayo ná kansa. Nyɔhiɔ kake se ɔ, e yayo ɔ gbo. Mɛni lɛ ye bua lɛ kɛ da nyagba a nya? E de ke: “Ke i ngɛ sɔlee ha Yehowa a, i deɔ lɛ ye tsui mi susumihi tsuo kɛ bɔ nɛ i ngɛ he nue ha. I le kaa e nu mi sisi pe bɔ nɛ nɔ kpa ko maa nu mi sisi. E le mi wawɛɛ pe bɔ nɛ imi nitsɛ po i le ye he.” Be komɛ ɔ, wa nuɔ he kaa wa be nyɛe maa da wa nyagba amɛ a nya, nɛ wa li nɔ́ nɛ wa maa sɔle ngɛ he po. Se Yehowa woɔ wɔ he wami kaa waa sɔle ha lɛ ke e he wa ha wɔ kaa wa ma de lɛ bɔ nɛ wa ngɛ he nue ha po.—Rom. 8:26, 27.

10. Kaa bɔ nɛ a tsɔɔ ngɛ Hebri Bi 4:12 ɔ, mɛni he je nɛ e sa nɛ waa kane Baiblo ɔ nɛ wa pue wa yi mi tɛ ngɛ he ɔ?

¹⁰ E woɔ wɔ he wami kɛ guɔ Baiblo ɔ nɔ. Paulo kane Ngmami ɔ konɛ e ná he wami kɛ bua womi; wɔ hu e sa nɛ waa pee jã. (Rom. 15:4) Ke wa kane Ngmami ɔ nɛ wa pue wa yi mi tɛ ngɛ he ɔ, Yehowa ma nyɛ maa gu e mumi klɔuklɔu ɔ nɔ kɛ ye bua wɔ konɛ waa na bɔ nɛ ngmami ɔ kɔɔ wa si fɔfɔɛ ɔ he ha. (Kane Hebri Bi 4:12.) Ronald nɛ wa tu e he munyu kɛ sɛ hlami ɔ de ke: “Ye bua jɔɔ kaa i kaneɔ Baiblo ɔ fã ko daa gbɔkuɛ. I pueɔ ye yi mi tɛ ngɛ Yehowa su ɔmɛ, kɛ suɔmi kpo nɛ e je kɛ tsɔɔ e sɔmɔli ɔ he. Enɛ ɔ yeɔ bua mi nɛ i náa he wami ekohu.”

11. Mɛni blɔ nɔ nɛ Baiblo ɔ wo nyɛmiyo ko nɛ e hao ɔ he wami?

¹¹ Ke wa pue wa yi mi tɛ ngɛ Mawu Munyu ɔ he ɔ, e yeɔ bua wɔ nɛ wa náa juɛmi nɛ da ngɛ wa nyagba amɛ a he. Ha nɛ waa hyɛ bɔ nɛ Baiblo ɔ ye bua yalɔyo ko nɛ e ngɛ aywilɛho yee ɔ ha. Asafo mi nɔkɔtɔma ko wo lɛ ga kaa ke e kane Hiob womi ɔ nɛ e pue e yi mi tɛ ngɛ he ɔ, e ma nyɛ maa kase níhi fuu ngɛ mi.  Benɛ e kane ɔ, e he sɔ kɛ kojo Hiob kaa e ná susumi nɛ dɛ. Benɛ e ngɛ Hiob si fɔfɔɛ ɔ he foni poe ɔ, e de ke: “Hiob! Ko ná juɛmi nɛ dɛ!” Se pee se ɔ, e ba na kaa lɛ hu e ngɛ e ní pee kaa Hiob. Nɔ́ nɛ e pee ɔ ye bua lɛ nɛ e dla e susumi, nɛ e wo lɛ he wami nɛ e nyɛ da e huno ɔ gbenɔ ɔ he dɔdɔɛ ɔ nya.

12. Mɛni blɔhi a nɔ nɛ Yehowa guɔ wa nyɛmimɛ Kristofohi a nɔ kɛ woɔ wɔ he wami?

¹² E woɔ wɔ he wami kɛ guɔ Kristofohi a kpehi a nɔ. Yehowa guɔ wa nyɛmimɛ Kristofohi hu a nɔ kɛ woɔ e sɔmɔli he wami. Paulo tsɔɔ kaa e ngɛ hlae nɛ e na e nyɛmimɛ ɔmɛ konɛ ‘a wo a sibi he wami.’ (Rom. 1:11, 12) Mary nɛ wa tu e he munyu kɛ sɛ hlami ɔ tsɔɔ kaa e suɔ nɛ e hi e nyɛmimɛ a kpɛti. E de ke: “Yehowa gu nyɛmimɛ nɛ a li nyagba tutuutu nɛ i kɛ ngɛ kpee ɔ po a nɔ kɛ ye bua mi. Nyɛmimɛ ɔmɛ de nɔ́ ko nɛ wo mi he wami aloo a ngma bua womi munyuhi ngɛ kaadi nɔ kɛ mane mi. Enɛ ɔ ji nɔ́ nɛ i hia ngɛ jamɛ a be ɔ mi. Jehanɛ hu ɔ, e ye bua mi nɛ i kɛ nyɛmimɛ nɛ a kɛ nyagbahi nɛ i kɛ ngɛ kpee ɔ eko kpe hyɛ ɔ sɛɛ ní. Asafo mi nikɔtɔma amɛ haa nɛ i nuɔ he kaa ye he hia ngɛ asafo ɔ mi.”

13. Mɛni wa ma nyɛ maa pee kɛ wo wa sibi he wami ngɛ asafo mi kpehi a sisi?

¹³ He kake nɛ wa nyɛɔ woɔ wa sibi he wami wawɛɛ ngɛ ji asafo mi kpehi a sisi. Ke o ya asafo mi kpe ɔ, o ma nyɛ ma de o nyɛmimɛ bɔ nɛ o suɔ mɛ ha kɛ bɔ nɛ o bua jɔɔ nɔ́ nɛ a peeɔ ɔ he ha konɛ o kɛ wo mɛ he wami. Kaa nɔ hyɛmi nɔ́ ɔ, be ko benɛ e piɛ bɔɔ nɛ asafo mi kpe maa je sisi ɔ, asafo mi nɔkɔtɔma ko nɛ a tsɛɛ lɛ ke Peter de nyɛmiyo ko nɛ e huno sɔmɔ we Yehowa a ke: “O li bɔ nɛ ke i na mo ngɛ Matsɛ Yemi Asa a nɔ ɔ ye bua jɔɔ ha. Be fɛɛ be ɔ, o kɛ o bimɛ ekpa a tsuo dlaa nyɛ he, nɛ nyɛɛ kɛ nyɛ he woɔ ní kasemi ɔ mi.” Nyɛmiyo ɔ hɛ sa nɔ́ nɛ asafo mi nɔkɔtɔma a de lɛ ɔ, nɛ e kɛ vo nyu de ke: “O wo mi he wami wawɛɛ, enɛ ɔ ji nɔ́ nɛ i ngɛ hlae ma nu mwɔnɛ ɔ.”

14. Mɛni blɔ nɔ nɛ fiɛɛmi ní tsumi ɔ yeɔ bua wɔ?

¹⁴ E woɔ wɔ he wami kɛ guɔ fiɛɛmi ní tsumi ɔ nɔ. Ke wa fiɛɛ kɛ ha ni kpahi ɔ, wa bua jɔɔ, a bu tue jio, a bui tue jio. (Abɛ 11:25) Nyɛmiyo ko nɛ a tsɛɛ lɛ ke Stacy ɔ ná bɔ nɛ fiɛɛmi ní tsumi ɔ woɔ nɔ he wami ha a mi níhi a si kpami. Benɛ a fiee e weku no ko kɛ je asafo ɔ mi ɔ, e dɔ lɛ wawɛɛ nɛ e biɔ e he ke, ‘Anɛ i ko nyɛ pee nɔ́ kpa ko kɛ ye bua lɛ lo?’ Stacy nyɛ we nɛ e kpa nyagba a he susumi. Mɛni lɛ ye bua lɛ nɛ e nyɛ da si fɔfɔɛ nɛ ɔ nya? Fiɛɛmi ní tsumi ɔ! Benɛ e kɛ e he wo fiɛɛmi ní tsumi ɔ mi ɔ, lɔ ɔ ye bua lɛ nɛ e nyɛ nɛ e kɛ e juɛmi ma nɔ́ nɛ e ma nyɛ maa pee kɛ ye bua nihi nɛ a ngɛ e zugba kpɔ ɔ mi ɔ nɔ. E de ke: “Ngɛ jamɛ a be ɔ mi ɔ, Yehowa ha mi Baiblo kaselɔ ko nɛ ya e hɛ mi mlamlaamla. Enɛ ɔ wo mi he wami wawɛɛ. Nɔ́ nɛ ye bua mi wawɛɛ ngɛ ye si himi mi ji fiɛɛmi ní tsumi ɔ nɛ i kɛ ye he woɔ mi ɔ.”

15. Mɛni o kase ngɛ Mary munyu ɔ mi?

¹⁵ Eko ɔ, ni komɛ ma susu kaa a si fɔfɔɛ he je ɔ, a nyɛ we nɛ a pee babauu ngɛ sɔmɔmi ní tsumi ɔ mi. Ke jã ji bɔ nɛ o nuɔ he ɔ, lɛɛ mo kai kaa Yehowa bua jɔɔ ke o pee nɔ́ nɛ o ma nyɛ ngɛ o si fɔfɔɛ ɔ mi. Mo susu Mary nɔ hyɛmi nɔ́ ɔ he ekohu nɛ o hyɛ. Benɛ e hia kɛ ya he ko nɛ a tuɔ gbi kpa a, e nu he kaa e nyɛ we nɛ e pee babauu. E de ke: “Maa pee be saii ji nɛ ɔ, nɔ́ nɛ i peeɔ ngɛ fiɛɛmi mi pɛ ji kaa ma de nɔ́ ko kpiti, ma kane ngmami ko, loo ma ha dɛ womi.” Ke e kɛ e he to nihi nɛ a tuɔ jamɛ a gbi ɔ saminya a he ɔ, e nuɔ he kaa e bɔɛ mɔde. Se e tsake e susumi. E yɔse kaa e ngɛ mi kaa e nyɛ we nɛ e tuɔ gbi ɔ saminya mohu lɛɛ, se Yehowa kɛ lɛ ma nyɛ  ma tsu ní. E de ke: “Nɔ́ nɛ Baiblo ɔ de ɔ ngɛ kpiti loo e mɛ wɛ, nɛ e ma nyɛ ma tsake nihi a si himi.”

16. Mɛni ma nyɛ maa wo nihi nɛ a tlɔ we mi se a suɔ nɛ a fiɛɛ ɔ he wami?

¹⁶ Yehowa le kaa wa ti ni komɛ ngɛ nɛ wa suɔ nɛ waa fiɛɛ, se wa tlɔ we mi. E ma nyɛ maa ye bua wɔ nɛ waa fiɛɛ kɛ ha nihi nɛ a hyɛɛ wa nɔ loo dɔkitahi kɛ nɛɛsihi. Ke wa ngɔ nɔ́ nɛ wa peeɔ amlɔ nɛ ɔ kɛ to nɔ́ nɛ wa pee be ko nɛ be ɔ he ɔ, e ma nyɛ ma jɔ̃ wa kɔni mi. Ke wa yɔse bɔ nɛ Yehowa ngɛ wɔ yeɔ bua wɔ ha amlɔ nɛ ɔ, e ma ha nɛ wa ná he wami kɛ da wa nyagba amɛ a nya nɛ wa ná bua jɔmi.

17. Ngɛ Fiɛlɔ 11:6 nya a, mɛni he je nɛ e sa nɛ waa ya nɔ nɛ waa fiɛɛ ke nihi bui tue amlɔ nɔuu po?

¹⁷ Wa li wuhi nɛ wa du ɔ a kpɛti nɔ́ nɛ maa puɛ nɛ maa wa. (Kane Fiɛlɔ 11:6.) Kaa nɔ hyɛmi nɔ́ ɔ, nyɛmiyo ko nɛ a tsɛɛ lɛ ke Barbara nɛ e ye jeha 80 kɛ se ɔ fiɛɛɔ kɛ guɔ tɛlifoo kɛ sɛ womi ngmami nɔ be fɛɛ be. Ngɛ e sɛ womi ɔ eko mi ɔ, e ngɛ March 1, 2014 Hwɔɔmi Mɔ nɛ e yi ji “Nɔ́ Nɛ Mawu Pee Ha Mo” ɔ kɛ piɛɛ sɛ womi ɔ he kɛ mane nɔ ɔ. E li kaa mamoo e kɛ sɛ womi ɔ mane nyumu ko kɛ e yo nɛ be ko nɛ be ɔ a ji Yehowa Odasefohi ɔ. A kane sɛ womi ɔ si abɔ. Nyumu ɔ nu he kaa nɔ́ nɛ Yehowa kɛ lɛ ngɛ munyu tue tɛɛ. Nyumu ɔ kɛ e yo ɔ kpa asafo mi kpehi yami maa pee jeha 27 kɛ se, se bɔɔbɔɔbɔɔ ɔ, a bɔni asafo mi kpehi yami ekohu, nɛ nyagbenyagbe ɔ, a ba pee Odasefohi nɛ a ngɛ kã. Benɛ Barbara na nɔ́ nɛ je sɛ womi kake nɛ e ngma a mi kɛ ba a, e wo lɛ he wami wawɛɛ nitsɛ!

18. Mɛni wa ma nyɛ maa pee konɛ Mawu nɛ wo wɔ he wami?

¹⁸ Yehowa to níhi fuu a he blɔ nya konɛ e kɛ wo wɔ he wami. Yehowa guɔ sɔlemi, Baiblo ɔ, wa kpe ɔmɛ, kɛ fiɛɛmi ní tsumi ɔ nɔ kɛ woɔ wɔ he wami. Ke waa kɛ ní nɛ ɔmɛ tsu ní ɔ, lɔ ɔ tsɔɔ kaa wa he ye kaa Yehowa ma nyɛ maa ye bua wɔ, nɛ wa suɔ nɛ e ye bua wɔ. Nyɛ ha nɛ waa ngɔ wa hɛ kɛ fɔ wa hiɔwe Tsɛ ɔ nɔ be fɛɛ be, ejakaa “nihi nɛ yeɔ lɛ anɔkuale ɔ, e woɔ mɛ he wami.”—2 Kron. 16:9.