1-2. Mɛni yi mi tomi kake he je nɛ e sa nɛ wa bua nɛ Kpo Jemi womi ɔ he?

 ANƐ o ya slaa nɔ ko nɛ o ná he blɔ kɛ hyɛ e fotohi a mi hyɛ lo? Benɛ o ngɛ foto ɔmɛ hyɛe ɔ, o na nihi fuu nɛ o li mɛ. Se benɛ o su foto kake ko nɔ ɔ, o ná tsui nɛ o hyɛ lɛ saminya. Mɛni he je? Ejakaa o na o he ngɛ jamɛ a foto ɔ mi. Benɛ o ngɛ foto ɔ hyɛe ɔ, o bɔ mɔde kaa o ma kai be nɛ nyɛ po foto ɔ kɛ he nɛ nyɛ po ngɛ. Jehanɛ hu ɔ, o bɔ mɔde kaa o ma kai nihi nɛ a piɛɛ o he ngɛ foto ɔ mi ɔ tsuo. E ngɛ heii kaa o bua jɔ jamɛ a foto ɔ he wawɛɛ.

² Kpo Jemi womi ɔ ngɛ kaa jamɛ a foto ɔ. Mɛni he je? Ke e hí kulaa a, ngɛ yi mi tomi enyɔ komɛ a he je. Kekleekle ɔ, a ngma womi nɛ ɔ kɛ ha wɔ. Kekleekle kuku nɛ ngɛ Kpo Jemi womi ɔ mi ɔ de ke: “Kpo jemi ko nɛ Mawu ngɔ kɛ ha Yesu Kristo kaa e tsɔɔ e nyɔguɛ ɔmɛ níhi nɛ e sa kaa a ba mi ngɛ be kpiti mi.” (Kpoj. 1:1) Enɛ ɔ he je ɔ, a ngma níhi nɛ ngɛ Kpo Jemi womi ɔ mi ɔ kɛ ha wɔ nɛ wa sɔmɔɔ Mawu ɔ, se pi kɛ ha adesahi tsuo. Akɛnɛ wa ji Mawu we bi he je ɔ, e sɛ nɛ e pee wɔ nyakpɛ kaa sɔmɔmi ní tsumi ɔ nɛ wa ngɔɔ wa he kɛ woɔ mi ɔ ngɛ ye buae nɛ gbami nɛ ngɛ womi nɛ sa kadimi nɛ ɔ mi ɔ ngɛ mi bae. Enɛ ɔ he ɔ, níhi nɛ wa kaneɔ ngɛ Kpo Jemi womi ɔ mi ɔ ji níhi nɛ kɔɔ wa he nitsɛnitsɛ.

3-4. Kaa bɔ nɛ a tsɔɔ ngɛ Kpo Jemi womi ɔ mi ɔ, mɛni be nɛ gbamihi nɛ a ngɛ mi ɔ maa ba mi, nɛ mɛni nɛ e sa nɛ lɔ ɔ nɛ ha nɛ waa pee?

³ Yi mi tomi enyɔne ɔ ji be nɛ gbamihi nɛ a ngɛ Kpo Jemi womi ɔ mi ɔ maa ba mi. Bɔfo Yohane tsɔɔ be nɛ gbami nɛ ɔmɛ maa ba mi. E de ke: “Ngɛ mumi ɔ he wami  nya a, i ya je Nyɔmtsɛ ɔ ligbi ɔ mi.” (Kpoj. 1:10) Yohane ngma munyu nɛ ɔ ngɛ jeha 96 mi loko a fɔ Kristo. Jamɛ a be ɔ mi ɔ, “Nyɔmtsɛ ɔ ligbi ɔ” sui lolo kulaa. (Mat. 25:14, 19; Luka 19:12) Baiblo gbami tsɔɔ kaa Nyɔmtsɛ ɔ ligbi ɔ je sisi ngɛ jeha 1914 ɔ mi, be nɛ a wo Yesu Matsɛ ngɛ hiɔwe ɔ. Kɛ je jamɛ a jeha a kɛ ma a, gbamihi nɛ a ngɛ Kpo Jemi womi ɔ mi nɛ kɔɔ Mawu we bi a he ɔ bɔni mi bami. Ngɛ anɔkuale mi ɔ, amlɔ nɛ ɔ, wa ngɛ “Nyɔmtsɛ ɔ ligbi ɔ mi”!

⁴ Akɛnɛ wa ngɛ be nɛ sa kadimi nɛ ɔ mi he je ɔ, e sa nɛ wa hɛ nɛ hi ga womi nɛ ngɛ Kpo Jemi 1:3 ɔ nɔ wawɛɛ. Lejɛ ɔ de ke: “Nɔ nɛ e woɔ e gbi nɔ kɛ kaneɔ gbami nɛ ɔ mi munyu ɔmɛ, kɛ ni nɛmɛ nɛ a nuɔ nɛ a yeɔ níhi nɛ a ngma ngɛ mi ɔmɛ a nɔ ɔ ngɛ bua jɔmi, ejakaa be nɛ a to ɔ su ta.” Ngɛ anɔkuale mi ɔ, e sa nɛ ‘waa kane gbami nɛ ɔ mi munyu ɔmɛ,’ nɛ waa “nu,” nɛ waa “ye” níhi nɛ a ngma ngɛ mi ɔmɛ a nɔ. Mɛni ji ní komɛ nɛ a ngma ngɛ mi nɛ e sa nɛ waa ye nɔ?

5. Mɛni blɔ nɔ Kpo Jemi womi ɔ tsɔɔ bɔ nɛ e he hia kaa waa pee níhi nɛ ma ha nɛ Yehowa nɛ kplɛɛ wa jami ɔ nɔ?

⁵ Kɛ je Kpo Jemi womi ɔ yi kake ɔ mi kɛ ma a nɔuu nɛ wa na kaa Yesu le nɔ́ fɛɛ nɔ́ nɛ ngɛ nɔ yae ngɛ asafo ɔmɛ a mi. (Kpoj. 1:12-16, 20; 2:1) Sɛ gbi nɛ Yesu kɛ ha asafohi kpaago nɛ a ngɛ Asia Nyafii ɔ ha nɛ wa na kaa e le nɔ́ fɛɛ nɔ́ nɛ ngɛ nɔ yae ngɛ asafo ɔmɛ a mi. Ngɛ jamɛ a sɛ gbi ɔmɛ a mi ɔ, e kɛ blɔ tsɔɔmi pɔtɛɛ ha Kristofohi nɛ a hi si ngɛ jamɛ a be ɔ mi ɔ ngɛ nɔ́ nɛ e sa nɛ a pee konɛ Yehowa nɛ kplɛɛ a jami ɔ nɔ ɔ he. Níhi nɛ e de ngɛ jamɛ a sɛ gbi ɔmɛ a mi ɔ kɔɔ Mawu we bi tsuo a he mwɔnɛ ɔ. Mɛni wa ma nyɛ maa kase ngɛ mi? Wa Hɛ Mi Nyɛɛlɔ nɛ ji Yesu Kristo le bɔ nɛ huɛ bɔmi nɛ ngɛ waa kɛ Yehowa wa kpɛti ɔ ngɛ ha. Lɛ nɛ e nyɛɛɔ wa hɛ mi nɛ e poɔ wa he piɛ. E naa nɔ́ fɛɛ nɔ́ nɛ ngɛ nɔ yae. E le nɔ́ nɛ e sa nɛ waa pee konɛ waa ya nɔ nɛ waa sa Yehowa hɛ mi. Mɛni blɔ tsɔɔmi e kɛ ha nɛ́ e sa kaa waa ye nɔ mwɔnɛ ɔ?

6. (a) Kaa bɔ nɛ a tsɔɔ ngɛ Kpo Jemi 2: 3, 4 ɔ, mɛni nyagba nɛ Yesu tsɔɔ kaa Efeso asafo ɔ ngɛ? (b) Mɛni wa ma nyɛ maa kase ngɛ mi?

⁶ Kane Kpo Jemi 2:3, 4. E sɛ nɛ waa ngmɛɛ kekleekle suɔmi nɛ wa ná kɛ ha Yehowa a he. Sɛ gbi nɛ Yesu kɛ ha Efeso asafo ɔ tsɔɔ kaa a fĩ si ngɛ níhi fuu a mi, nɛ a ya nɔ nɛ a sɔmɔ Yehowa ngɛ nyagbahi nɛ a mi wa nɛ a kɛ kpe ɔ tsuo se. Se kɛ̃ ɔ, a ngmɛɛ kekleekle suɔmi nɛ a ná kɛ ha Yehowa a he. E sa nɛ a ha nɛ a suɔmi ɔ mi nɛ wa ekohu. Ke a pee we jã a, Yehowa be a jami ɔ nɔ kplɛɛe. Mwɔnɛ ɔ hu ɔ, e sa nɛ waa pee babauu pe si nɛ wa ma fĩ pɛ. E sa nɛ wa fĩ si ngɛ yi mi tomi kpakpa he je. Níhi nɛ wa peeɔ ɔ he hia wa Mawu ɔ, se pi lɔ ɔ pɛ. Nɔ́ he je nɛ wa peeɔ jamɛ a ní ɔmɛ ɔ hu he hia lɛ. Yi mi tomi he je nɛ wa peeɔ nɔ́ ko ɔ he hia lɛ ejakaa e suɔ nɛ waa da suɔmi nɛ mi wa nɛ wa ngɛ ha lɛ ɔ kɛ hɛ sa nɛ wa ngɛ ɔ nɔ kɛ ja lɛ.​—Abɛ 16:2; Maak. 12:29, 30.

7. (a) Kaa bɔ nɛ a tsɔɔ ngɛ Kpo Jemi 3:1-3 ɔ, mɛni nyagba nɛ Saadis asafo ɔ ngɛ? (b) Mɛni nɛ e sa nɛ waa pee?

⁷ Kane Kpo Jemi 3:1-3. E sa nɛ waa ya nɔ nɛ wa ha nɛ wa hɛ nɛ hi wa he nɔ. Saadis asafo mi bi ɔmɛ a nyagba a ngɛ ekpa kulaa. E ngɛ mi kaa a kɛ kã sɔmɔ Mawu be ko nɛ be ɔ mohu lɛɛ, se a ba gbɔjɔ ngɛ mumi mi. Enɛ ɔ he ɔ, Yesu de mɛ ke a ‘hɛ  nɛ tsɛ̃.’ Mɛni wa ma nyɛ maa kase ngɛ mi? Ngɛ anɔkuale mi ɔ, Yehowa hɛ be wa ní tsumi ɔ nɔ jee. (Heb. 6:10) Se e sɛ nɛ wa susu kaa akɛnɛ waa kɛ kã sɔmɔ Yehowa be ko nɛ be ɔ he je ɔ, e he hia we nɛ waa pee jã amlɔ nɛ ɔ. Eko ɔ, wa nyɛ we nɛ waa pee ní komɛ nɛ wa nyɛɔ peeɔ be ko nɛ be ɔ, se e sa nɛ wa tsu babauu ngɛ “Nyɔmtsɛ ɔ ní tsumi ɔ mi,” nɛ wa hɛ hi wa he nɔ kɛ ya si nyagbe.​—1 Kor. 15:58; Mat. 24:13; Maak. 13:33.

8. Kaa bɔ nɛ a tsɔɔ ngɛ Kpo Jemi 3:15-17 ɔ, mɛni wa kaseɔ ngɛ sɛ gbi nɛ Yesu kɛ ha Laodikia asafo ɔ mi?

⁸ Kane Kpo Jemi 3:15-17. E sa nɛ waa kɛ wa tsui tsuo nɛ sɔmɔ Yehowa kɛ kã. Sɛ gbi nɛ Yesu kɛ ha Laodikea asafo ɔ hu tsɔɔ kaa mɛ hu a nyagba a je ekpa. A jami ɔ ngɛ “kulɔkulɔ.” Nyagba nɛ ɔ he je ɔ, Yesu de mɛ ke ‘a ngɛ haomi mi nɛ a ní ngɛ mɔbɔ.’ E sa nɛ a kɛ kã nɛ mi wa nɛ sɔmɔ Yehowa nɛ a pee kã ngɛ e jami mi. (Kpoj. 3:19) Mɛni wa ma nyɛ maa kase ngɛ mi? Ke kã nɛ waa kɛ ngɛ Yehowa sɔmɔe ɔ ba si ɔ, e sa nɛ wa hɛ nɛ sa ní kpakpahi tsuo nɛ Yehowa kɛ e we asafo ɔ to he blɔ nya kɛ ha wɔ ɔ. (Kpoj. 3:18) E sɛ nɛ wa ha nɛ si himi kpakpa nɛ wa ma ná ngɛ je nɛ ɔ mi ɔ he nɛ hia wɔ pe Yehowa sɔmɔmi.

9. Kaa bɔ nɛ a tsɔɔ ngɛ sɛ gbi nɛ Yesu kɛ ha Pergamo kɛ Tiatira asafo ɔ mi ɔ, mɛni oslaa nɛ e sa nɛ waa yu wa he ngɛ he?

⁹ E sa nɛ wa kua hemi kɛ yemi kuali a tsɔɔmihi. Yesu kã ni komɛ nɛ a kɛ mi gbami ngɛ Pergamo asafo ɔ mi bae ɔ a hɛ mi. (Kpoj. 2:14-16) E je nihi nɛ a ngɛ Tiatira asafo ɔ mi nɛ́ a yu a he ngɛ “Satan níhi nɛ a mi kuɔ” a he ɔ a yi, nɛ e wo mɛ he wami kaa a “pɛtɛ” anɔkuale ɔ he wawɛɛ. (Kpoj. 2:24-26) E sa nɛ Kristofohi nɛ a ngɛ lejɛ ɔ nɛ a gbɔjɔ, nɛ lakpa tsɔɔmi ná a nɔ he wami ɔ nɛ a tsake a tsui. Wɔ nɛ wa ngɛ mwɔnɛ ɔ hu nɛɛ? E sa nɛ wa kua tsɔɔmi fɛɛ tsɔɔmi nɛ e kɛ Yehowa susumi kpa we gbi. Wa maa na hemi kɛ yemi kuali kaa “Mawu jali,” se a ní peepee tsɔɔ kaa “a kua e mi he wami ɔ” loo a kɛ Baiblo ɔ tsu we ní. (2 Tim. 3:5) Ke wa kaseɔ Mawu Munyu ɔ saminya a, e be yee kaa wa ma yo lakpa tsɔɔmihi nɛ waa yu wa he ngɛ he.​—2 Tim. 3:14-17; Jud 3, 4.

10. Mɛni ji nɔ́ kpa ko nɛ wa ma nyɛ maa kase ngɛ nɔ́ nɛ Yesu de Pergamo kɛ Tiatira asafo ɔ mi?

¹⁰ E sa nɛ wa kua je mi bami yaya kɛ e he nɔ́ fɛɛ nɔ́. Nyagba kpa ko hu ngɛ Pergamo  kɛ Tiatira asafo ɔ mi. Yesu kã ni komɛ nɛ a ngɛ jamɛ asafo ɔmɛ a mi ɔ a hɛ mi kaa a kɛ a he ya wo je mi bami yaya mi. (Kpoj. 2:14, 20) Mɛni wa ma nyɛ maa kase ngɛ mi? Ke waa kɛ jeha babauu sɔmɔ Yehowa nɛ amlɔ nɛ ɔ wa ngɛ sɔmɔmi he blɔhi fuu po ɔ, e sɛ nɛ waa hyɛ blɔ kaa Yehowa bua maa jɔ wa he ke waa kɛ wa he wo je mi bami yaya mi. (1 Sam. 15:22; 1 Pet. 2:16) Ke nihi a je mi bami puɛ ngɛ je ɔ mi kaa mɛni po ɔ, Yehowa hyɛɔ blɔ kaa wɔɔ lɛɛ wa maa ba wa je mi saminya.​—Efe. 6:11-13.

11. Kɛ ba si hiɛ ɔ, mɛni wa kase? (Hyɛ daka nɛ ji, “ Ní Kasemi Nɛ Ngɛ Mi Kɛ Ha Wɔ Mwɔnɛ ɔ.”)

¹¹ Kɛ ba si hiɛ ɔ, mɛni wa kase? Wa na nɔ́ he je nɛ e sa nɛ waa pee níhi nɛ ma ha nɛ Yehowa nɛ kplɛɛ wa jami ɔ nɔ. Ke wa ngɛ nɔ́ ko pee nɛ ma ha nɛ wa jami ɔ be Yehowa hɛ mi sae ɔ, lɛɛ e sa nɛ wa kpa oya nɔuu. (Kpoj. 2:5, 16; 3:3, 16) Yesu tu nɔ́ kpa ko hu he munyu ngɛ sɛ gbi nɛ e kɛ ha asafo ɔmɛ ɔ mi. Mɛni ji jamɛ a nɔ́ ɔ?

12. Mɛni wa ma nyɛ maa kase ngɛ nɔ́ nɛ Yesu de nyɛmimɛ nɛ a ngɛ Smirna kɛ Filadelfia asafo ɔ mi ɔ? (Kpo Jemi 2:10)

¹² Amlɔ nɛ ɔ, nyɛ ha nɛ wa susu sɛ gbi nɛ Yesu kɛ ha Smirna kɛ Filadelfia asafo ɔ he nɛ waa hyɛ. E de Kristofohi nɛ a ngɛ asafo nɛ ɔmɛ a mi ɔ kaa e sɛ nɛ a ye gbeye kaa a maa wa mɛ yi mi, ejakaa a maa jɔɔ mɛ ngɛ anɔkuale nɛ a maa ye ɔ he. (Kane Kpo Jemi 2:10; 3:10) Mɛni wa ma nyɛ maa kase ngɛ mi mwɔnɛ ɔ? E sa nɛ waa hyɛ blɔ kaa a maa wa wɔ yi mi, nɛ waa pee klaalo kaa wa ma fĩ si kɛ da nya. (Mat. 24:9, 13; 2 Kor. 12:10) Mɛni he je nɛ kaimi nɛ ɔ he hia a?

13-14. Mɛni nɛ nɔ́ nɛ a bɔ he amaniɛ ngɛ Kpo Jemi yi 12 ɔ ngɔ kɛ ba Mawu we bi a nɔ?

¹³ Kpo Jemi womi ɔ ha nɛ wa le kaa a maa wa Mawu we bi yi mi ngɛ “Nyɔmtsɛ ɔ ligbi ɔ” mi. Jamɛ a be ɔ mi nɛ wa ngɛ nɛ ɔ nɛ. Kpo Jemi womi ɔ yi 12 ɔ tsɔɔ kaa benɛ a to Mawu Matsɛ Yemi ɔ sisi pɛ ɔ, ta fɛ ngɛ hiɔwe. Maikɛl nɛ ji Yesu Kristo nɛ a wo e hɛ mi nyami ɔ kɛ e tabo ɔ, kɛ Satan kɛ e Daimonio ɔmɛ hu ta. (Kpoj. 12:7, 8) A ye Mawu he nyɛli ɔmɛ a nɔ kunimi nɛ a fiee mɛ kɛ ba zugba a nɔ. Enɛ ɔ ngɔ haomi babauu kɛ ba nihi nɛ a ngɛ zugba a nɔ ɔ a nɔ. (Kpoj. 12:9, 12) Se kɛ enɛ ɔ saa Mawu we bi a he ha kɛɛ?

¹⁴ Kpo Jemi womi ɔ ya nɔ nɛ e de wɔ bɔ nɛ Satan pee e ní ha. E nyɛ we nɛ e ya hiɔwe hu, lɔ ɔ he ɔ, e ngɛ Mawu sɔmɔli nɛ a pɔ mɛ nu nɛ a ngɛ zugba a nɔ ɔ tuae. Nimli nɛ ɔmɛ ji Mawu Matsɛ Yemi ɔ mi nane mi dali nɛ a hɛɛ “Yesu he odase yemi ní  tsumi ɔ mi ɔ.” (Kpoj. 12:17; 2 Kor. 5:20; Efe. 6:19, 20) Mɛni blɔ nɔ nɛ gbami nɛ ɔ ba mi?

15. Mɛnɔmɛ nɛ “odase enyɔ ɔmɛ” nɛ a tu a he munyu ngɛ Kpo Jemi 11 ɔ daa si kɛ ha, nɛ mɛni ba a nɔ?

¹⁵ Satan ha nɛ Mawu he nyɛli tua nihi nɛ a pɔ mɛ nu nɛ a ngɛ Matsɛ Yemi fiɛɛmi ní tsumi ɔ hɛ mi nyɛɛe ɔ. Nyumu nɛ ɔmɛ daa si kɛ ha “odase enyɔ ɔmɛ” nɛ Kpo Jemi womi ɔ tsɔɔ kaa a gbe mɛ ɔ. * (Kpoj. 11:3, 7-11) Ngɛ jeha 1918 ɔ mi ɔ, a nuu nihi nɛ a ngɛ asafo ɔ hɛ mi nyɛɛe ɔ a kpɛti nihi kpaanyɔ nɛ a wo mɛ tsu, nɛ a tsɔɔ kaa a ma ha nɛ a ye jeha babauu ngɛ tsu womi ɔ mi. Ngɛ adesahi a susumi nya a, e ngɛ kaa nɔ́ nɛ a tsi nihi nɛ a pɔ mɛ nu ɔ a ní tsumi ɔ nya loo “a gbe” mɛ.

16. Mɛni nyakpɛ nɔ́ ko nɛ ya nɔ ngɛ jeha 1919 ɔ mi, nɛ mɛni nɛ Satan ya nɔ nɛ e pee kɛ je jamɛ a be ɔ mi kɛ ma?

¹⁶ Gbami nɛ ngɛ Kpo Jemi yi 11 ɔ tsɔɔ kaa “odase enyɔ ɔmɛ” maa kpale ba wami mi ngɛ be kpiti mi. Benɛ a wo nyɛmimɛ nɛ ɔmɛ tsu ɔ, e sui jeha kake po nɛ gbami nɛ ɔ ba mi. Ngɛ jeha 1919 sisije ɔ, a je nyɛmimɛ nyumu nɛ ɔmɛ kɛ je tsu womi mi, nɛ pee se ɔ, a ngmɛɛ a sane ɔ he kulaa. Oya nɔuu nɛ nyɛmimɛ nɛ ɔmɛ bɔni Matsɛ Yemi ní tsumi ɔ hɛ mi nyɛɛmi ekohu. Se lɔ ɔ ha we nɛ Satan nɛ kpa Mawu we bi tuami. Kɛ je jamɛ a be ɔ mi kɛ ma a, Satan ngɔ si temi kɛ womi kɛ ba Mawu we bi a nɔ kaa “pa.” (Kpoj. 12:15) Ngɛ anɔkuale mi ɔ, “hiɛ ɔ ji he nɛ e biɔ si fimi kɛ hemi kɛ yemi” ngɛ wa ti nɔ fɛɛ nɛ blɔ fa mi.​—Kpoj. 13:10.

17. Ngɛ tuami nɛ Satan kɛ ba Mawu we bi a nɔ tsuo se ɔ, mɛni yemi kɛ buami nɛ a nine su nɔ kɛ je he ko nɛ a hyɛ we blɔ?

¹⁷ Kpo Jemi yi 12 ɔ tsɔɔ kaa Mawu we bi ma ná yemi buami kɛ je he ko nɛ a hyɛ we blɔ. E tsɔɔ kaa “zugba a” mii “pa a” nɛ ji yi mi wami ɔ. (Kpoj. 12:16) Jã pɛpɛɛpɛ nɛ e ba mi. Be komɛ ɔ, Satan blɔ nya tomi ɔ fã komɛ kaa mlaa blɔ nya tomi ɔ jeɔ ngmlaa kɛ haa Mawu we bi. Yehowa we bi ye kunimi ngɛ kojomi hehi si abɔ, nɛ lɔ ɔ ha nɛ a ná he yemi bɔ nɛ sa. Kɛ a kɛ he yemi nɛ ɔ tsu ní ha kɛɛ? A kɛ he yemi nɛ ɔ tsu ní ngɛ nile mi nɛ a tsu ní  tsumi nɛ Yehowa kɛ wo a dɛ ɔ. (1 Kor. 16:9) Mɛni ji ní tsumi nɛ ɔ?

18. Mɛni ji ní tsumi titli nɛ a kɛ wo wa dɛ ngɛ nyagbe be nɛ ɔmɛ a mi?

¹⁸ Yesu gba kɛ fɔ si kaa e we bi maa fiɛɛ ‘sane kpakpa nɛ kɔɔ Mawu Matsɛ Yemi ɔ he ɔ’ kɛ kpa zugba a nɔ tsuo loko nyagbe ɔ maa ba. (Mat. 24:14) Ke wa ngɛ fiɛɛe ɔ, wa nine suɔ yemi kɛ buami nɔ kɛ jeɔ bɔfo aloo bɔfohi a kuuhi a ngɔ. A kale bɔfo nɛ ɔmɛ kaa a “hɛɛ neneene sane kpakpa a nɛ [a] maa jaje kɛ tsɔɔ ni nɛmɛ nɛ a ngɛ zugba a nɔ ɔ, je ma fɛɛ je ma kɛ wɛtso kɛ lilɛ kɛ nihi.”​—Kpoj. 14:6.

19. Mɛni sɛ gbi kpa nɛ e sa nɛ nihi nɛ a suɔ Yehowa a nɛ a fiɛɛ?

¹⁹ Tsa pi sane kpakpa nɛ kɔɔ Mawu Matsɛ Yemi ɔ he ɔ pɛ ji sɛ gbi nɛ e sa nɛ Mawu we bi nɛ a fiɛɛ. E sa nɛ a fĩ ní tsumi nɛ bɔfohi nɛ a tu a he munyu ngɛ Kpo Jemi yi 8 kɛ ya si 10 ngɛ tsue ɔ hu se. Bɔfo nɛ ɔmɛ ngɛ nyagbahi nɛ maa ba nihi nɛ a kua Mawu Matsɛ Yemi ɔ sɛ gbi ɔ a nɔ ɔ jajee. Yehowa Odasefohi maa fiɛɛ kojomi sɛ gbi nɛ a kɛ to “gbiɛ ngo ngu kɛ la” he ɔ. Enɛ ɔ tsɔɔ nɔ́ nɛ maa ba Satan je yaya nɛ ɔ blɔ nya tomi fã slɔɔto ɔmɛ a nɔ. (Kpoj. 8:7, 13) E sa nɛ nihi nɛ a le kaa nyagbe ɔ su si ta konɛ a kɛ hɛdɔ nɛ pee tsakemi ngɛ a si himi mi, nɛ a yi nɛ ná wami ngɛ Yehowa ligbi ngua a nɔ. (Zef. 2:2, 3) Se sɛ gbi nɛ ɔ be ngɔe ha nihi. Ja wa pee kã loko wa ma nyɛ maa fiɛɛ sɛ gbi nɛ ɔ. Ngɛ amanehlu ngua a mi ɔ, nyagbe sɛ gbi nɛ wa maa fiɛɛ ɔ maa wo nihi a mi mi la wawɛɛ.​—Kpoj. 16:21.

20. Mɛni he wa ma susu ngɛ ní kasemi enyɔ nɛ nyɛɛ se ɔ mi?

²⁰ E sa nɛ waa ye ‘gbami ɔ mi munyu ɔmɛ’ a nɔ ejakaa níhi nɛ wa kaneɔ ngɛ Kpo Jemi womi ɔ mi ɔ a mi bami ɔ kɔɔ wa he. (Kpoj. 1:3) Se kɛ wa maa pee kɛɛ konɛ wa nyɛ nɛ wa fĩ si ngɛ yi mi wami mi, nɛ waa ya nɔ nɛ waa kɛ kã nɛ fiɛɛ sɛ gbi nɛ ɔmɛ? Níhi enyɔ maa wo wɔ he wami. Kekleekle nɔ́ ɔ ji nɔ́ nɛ Kpo Jemi womi ɔ de ngɛ Mawu he nyɛli a he. Enyɔne ɔ ji jɔɔmihi nɛ wa ma ná ke wa ya nɔ nɛ wa ye anɔkuale. Wa ma susu ní nɛ ɔmɛ a he ngɛ ní kasemi enyɔ nɛ nyɛɛ se ɔ mi.