1. Mɛni yi mi kpɔ nɛ́ e he hia nɛ e sa nɛ adesahi tsuo nɛ a mwɔ?

 MWƆNƐ Ɔ, e sa nɛ nihi nɛ a mwɔ yi mi kpɔ ko nɛ e he hia wawɛɛ. Anɛ a ma fĩ Yehowa Mawu se kaa lɛ ji nɔ nɛ e sa nɛ e ye je mluku ɔ tsuo nɔ, aloo a ma fĩ Satan Abosiami nɛ ji Mawu he nyɛlɔ ɔ se? E sa nɛ nɔ fɛɛ nɔ nɛ hla nɔ́ nɛ e suɔ. Yi mi kpɔ nɛ wa ti nɔ fɛɛ nɔ maa mwɔ ɔ lɛ maa tsɔɔ kaa wa ma ná neneene wami hwɔɔ se loo wa be náe. (Mat. 25:31-33, 46) Ngɛ “amanehlu ngua” a mi ɔ, a ma kadi nihi kɛ ha yi baami loo hɛ mi kpatami.​—Kpoj. 7:14; 14:9-11; Eze. 9:4, 6.

2. (a) Mɛni nɛ Hebri Bi 10:35-39 ɔ woɔ wɔ he wami nɛ waa pee? (b) Mɛni blɔ nɔ Kpo Jemi womi ɔ ma nyɛ maa ye bua wɔ?

² Kane Hebri Bi 10:35-39. Ke o hla kaa o ma fĩ Yehowa nɔ yemi se ɔ, lɛɛ o mwɔ yi kpɔ nɛ da. Amlɔ nɛ ɔ, o suɔ nɛ o ye bua ni kpahi nɛ́ mɛ hu a mwɔ yi mi kpɔ nɛ da. O kɛ níhi nɛ a ngɛ Kpo Jemi womi ɔ mi ɔ ma nyɛ maa ye bua mɛ. Womi nɛ sa kadimi nɛ ɔ tsɔɔ níhi nɛ maa ba nihi nɛ a teɔ si kɛ woɔ Yehowa a nɔ. Se pi lɔ ɔ pɛ, e tsɔɔ jɔɔmihi nɛ nihi nɛ a kɛ anɔkuale yemi fĩ Yehowa nɔ yemi ɔ se ɔ ma ná a hulɔ. E sa nɛ waa kase anɔkuale munyu nɛ ɔmɛ nɛ a he hia a. Ke wa pee jã a, e maa ye bua wɔ nɛ waa fia wa pɛɛ si kaa wa maa ya nɔ ma sɔmɔ Yehowa. Jehanɛ hu ɔ, waa kɛ níhi nɛ wa kase ɔ ma nyɛ maa ye bua ni kpahi nɛ mɛ hu a mwɔ yi mi kpɔ kaa a ma sɔmɔ Yehowa daa.

3. Mɛni he wa ma susu ngɛ ní kasemi nɛ ɔ mi?

³ Ngɛ ní kasemi nɛ ɔ mi ɔ, wa ma susu sane bimihi nɛ nyɛɛ se nɛ ɔmɛ a he: Mɛni nɛ nihi nɛ a fĩɔ Mawu nɔ yemi ɔ se ɔ ma ná? Mɛni maa ba nihi nɛ a hla kaa a ma fĩ lohwe  awi yelɔ tsutsuutsu ɔ nɛ a kale lɛ ngɛ Kpo Jemi womi ɔ mi ɔ se ɔ a nɔ?

4. Kuu te nɛɛ nɛ bɔfo Yohane na nɛ a kɛ Yesu ngɛ hiɔwe?

⁴ Ngɛ nina mi ɔ, Yohane na kuu enyɔ nɛ a fĩɔ Yehowa nɔ yemi ɔ se, nɛ a ma ná neneene wami hwɔɔ se. Kekleekle kuu ɔ ji nimli 144,000. (Kpoj. 7:4) A hla mɛ kɛ je zugba a nɔ konɛ a ya piɛɛ Yesu he kɛ ye Matsɛ ngɛ hiɔwe. A maa piɛɛ e he kɛ ye zugba a nɔ. (Kpoj. 5:9, 10; 14:3, 4) Ngɛ nina a mi ɔ, Yohane na mɛ nɛ a kɛ Yesu daa si ngɛ hiɔwe Zion Yoku ɔ nɔ.​—Kpoj. 14:1.

5. Mɛni nɛ e be kɛe nɛ́ e maa ba nimli 144,000 ɔ a kpɛti nihi nɛ a ngɛ wami mi ngɛ zugba a nɔ ɔ a nɔ?

⁵ A bɔni nimli akpehi abɔ hlami kɛ je bɔfo ɔmɛ a be ɔ mi kɛ ba si amlɔ nɛ ɔ, konɛ a ná yibɔ nɛ ji 144,000 ɔ. (Luka 12:32; Rom. 8:17) Se a de Yohane ngɛ nina mi kaa nihi nɛ a pɔ mɛ nu ɔ a kpɛti nihi bɔɔ ko pɛ nɛ a maa hi wami mi ngɛ zugba a nɔ ngɛ nyagbe ligbi ɔmɛ a mi. Loko amanehlu ngua a maa je sisi ɔ, nihi nɛ a pɔ mɛ nu ɔ a kpɛti nihi “nɛ piɛ ɔ,” ma ná a nyagbe “nya sɔumi,” nɛ tsɔɔ kaa Yehowa kplɛɛ a nɔ. (Kpoj. 7:2, 3; 12:17) Lɔ ɔ se ɔ, ngɛ amanehlu ngua mi ɔ, a maa ngɔ nihi nɛ a piɛ ɔ kɛ ho hiɔwe ya kɛ ya piɛɛ nimli 144,000 ɔ a kpɛti nihi nɛ a ye anɔkuale nɛ a gbo momo ɔ a he. A maa piɛɛ Yesu he kɛ ye matsɛ ngɛ Mawu Matsɛ Yemi ɔ mi.​—Mat. 24:31; Kpoj. 5:9, 10.

6-7. (a) Mɛni kuu nɛ Yohane na pee se, nɛ mɛni wa kaseɔ ngɛ a he? (b) Mɛni he je nɛ e sa nɛ nihi nɛ a pɔ mɛ nu ɔ kɛ “asafo kuu ngua” a tsuo a bua nɛ jɔ Kpo Jemi yi 7 ɔ he ɔ?

⁶ Benɛ Yohane na kuu nɛ a maa ya hiɔwe ɔ se ɔ, e na “asafo kuu ngua” ko hulɔ. Baiblo ɔ tsɔɔ we nihi nɛ a ngɛ kuu nɛ ɔ mi ɔ a yibɔ. (Kpoj. 7:9, 10) Mɛni wa ma nyɛ maa kase ngɛ nihi nɛ a ngɛ kuu nɛ ɔ mi ɔ a he? Yohane de ke: “Nimli nɛ ɔmɛ ji ni nɛmɛ nɛ a je amanehlu ngua a mi ɔ nɛ, nɛ a fɔ a tade klɔii ɔmɛ a he nɛ a pee mɛ futaa ngɛ Jijɔ Bi ɔ muɔ ɔ mi.” (Kpoj. 7:14) Ke “asafo kuu ngua” nɛ ɔ yi ná wami ngɛ amanehlu ngua a mi ɔ, a maa hi zugba a nɔ nɛ a ma ná jɔɔmihi fuu.​—La 37:9-11, 27-29; Abɛ 2:21, 22; Kpoj. 7:16, 17.

⁷ Ke wa piɛɛ nihi nɛ a maa ya hiɔwe ɔ he jio, wa piɛɛ nihi nɛ a maa hi zugba a nɔ ɔ a he jio, e sa nɛ wa ná hemi kɛ yemi kaa níhi nɛ wa kane ngɛ Kpo Jemi yi 7 ɔ maa ba mi. E maa pee bua jɔmi be kɛ ha Mawu we bi tsuo! Wa bua maa jɔ wawɛɛ kaa wa hla kaa wa ma fĩ Yehowa nɔ yemi ɔ se. Mɛni ji nɔ́ kpa nɛ Kpo Jemi womi ɔ de wɔ ngɛ asafo kuu ngua a he?​—Mat. 24:21.

8. Kɛ amanehlu ngua a ma plɛ kɛ je sisi ha kɛɛ, nɛ kɛ nihi fuu maa pee a ní ha kɛɛ?

⁸ Kaa bɔ nɛ wa na ngɛ kekleekle ní kasemi ɔ mi ɔ, e be kɛe nɛ je ɔ ma kudɔmi blɔ nya tomi ɔ ma tua Babilon Ngua a nɛ ji, lakpa jamihi tsuo nɛ a ngɛ je ɔ mi ɔ. (Kpoj. 17:16, 17) Tuami nɛ ɔ lɛ maa pee amanehlu ngua a sisije. Anɛ kɛ gu tuami nɛ ɔ nɔ ɔ, nihi fuu ma ba bɔni Yehowa sɔmɔmi lo? Dɛbi. Mohu ɔ, Kpo Jemi womi ɔ yi 6 tsɔɔ kaa ngɛ behi nɛ a mi wa nɛ ɔ mi ɔ, nihi nɛ a sɔmɔ we Yehowa a ma ya hla he piɛ pomi kɛ je je ɔ ma kudɔmi blɔ nya tomi ɔ kɛ jua yemi blɔ nya tomi, nɛ́ a kɛ to yoku he ɔ a ngɔ. Akɛnɛ jamɛatsɛmɛ ɔmɛ be Mawu Matsɛ Yemi ɔ se fĩe he je ɔ, Yehowa maa bu mɛ kaa nihi  nɛ a teɔ si kɛ woɔ e Matsɛ Yemi ɔ.​—Luka 11:23; Kpoj. 6:15-17.

9. Mɛni blɔ nɔ Yehowa we bi maa je ekpa kulaa ngɛ amanehlu ngua a mi, nɛ mɛni maa ba a nɔ?

⁹ Ngɛ anɔkuale mi ɔ, níhi a mi maa wa ngɛ amanehlu ngua a mi, se Yehowa sɔmɔli anɔkualetsɛmɛ maa je ekpa kulaa ngɛ be nɛ ɔ mi. Mɛ pɛ nɛ a ma sɔmɔ Yehowa Mawu ngɛ zugba a nɔ jamɛ a be ɔ mi, nɛ a be “lohwe awi yelɔ” ɔ se fĩe. (Kpoj. 13:14-17) Akɛnɛ a maa ya nɔ maa ye Yehowa anɔkuale he je ɔ, nihi nɛ a teɔ si kɛ woɔ Yehowa a mi mi ma fu mɛ wawɛɛ nitsɛ. Enɛ ɔ he ɔ, je mahi nɛ a pee kake ɔ ma tua Mawu we bi ngɛ je ɔ mi tsuo. Baiblo ɔ tsɛ tuami nɛ ɔ ke Gog Nɛ Je Magog ɔ tuami.​—Eze. 38:14-16.

10. Kaa bɔ nɛ a tsɔɔ ngɛ Kpo Jemi 19:19-21 ɔ, kɛ Yehowa maa pee e ní ha kɛɛ ke a tua e we bi?

¹⁰ Kɛ Yehowa maa pee e ní ha kɛɛ kɛ a tua e we bi? E de wɔ ke: ‘Ye mi mi ma fu wawɛɛ.’ (Eze. 38:18, 21-23) Kpo Jemi yi 19 ɔ tsɔɔ nɔ́ nɛ maa nyɛɛ se. Yehowa maa tsɔ e Bi ɔ konɛ e ya po e we bi a he piɛ, nɛ e ye a he nyɛli ɔmɛ a nɔ kunimi. “Hiɔwe tabo ɔmɛ” nɛ ji bɔfohi anɔkualetsɛmɛ kɛ nimli 144,000 ɔ maa piɛɛ Yesu he kɛ hwu kɛ si Gog Nɛ Je Magog ɔ. (Kpoj. 17:14; 19:11-15) Mɛni maa je ta nɛ ɔ mi kɛ ba? A ma kpata adesahi kɛ kuuhi tsuo nɛ a teɔ si kɛ woɔ Yehowa a hɛ mi pɛsɛpɛsɛ!​—Kane Kpo Jemi 19:19-21.

11. Mɛni ji ní peemi ko nɛ he hia pe kulaa nɛ Kpo Jemi womi ɔ tu he munyu.

¹¹ Mo susu he nɛ o hyɛ bɔ nɛ anɔkualetsɛmɛ nɛ a baa a yi nɛ a maa hi zugba a nɔ ɔ maa nu he ha benɛ a kpata Mawu he nyɛli ɔmɛ hɛ mi ɔ! Jamɛ a be ɔ mi ɔ, zugba a nɔ ma hyi tɔ kɛ bua jɔmi! E ngɛ mi kaa ke a kpata Babilon Ngua a hɛ mi ɔ, bɔfo ɔmɛ ma kpa ngmlaa kɛ bua jɔmi ngɛ hiɔwe mohu lɛɛ, se nɔ́ kpa ko hu ngɛ nɛ maa ngɔ bua jɔmi ngua kɛ ba. (Kpoj. 19:1-3) E ji ní peemi ko nɛ maa pee bua jɔmi nɛ Kpo Jemi womi ɔ tu he munyu. Lɔ ɔ ji “Jijɔ Bi ɔ yo kpeemi ɔ.”​—Kpoj. 19:6-9.

12. Kaa bɔ nɛ a tsɔɔ ngɛ Kpo Jemi 21:1, 2 ɔ, mɛni be nɛ Jijɔ Bi ɔ yo kpeemi ɔ maa ya nɔ?

¹² Mɛni be yo kpeemi ɔ maa ya nɔ? Nimli 144,000 ɔ tsuo maa hi hiɔwe loko a maa hwu Harmagedon ta a. Se pi jamɛ a be ɔ mi ji Jijɔ Bi ɔ yo kpeemi ɔ. (Kane Kpo Jemi 21:1, 2.) Jijɔ Bi ɔ yo kpeemi ɔ maa ya nɔ ke a hwu Harmagedon ta a se, nɛ a kpata Mawu he nyɛli ɔmɛ tsuo a hɛ mi.​—La 45:3, 4, 13-17.

13. Mɛni maa ya nɔ ngɛ Jijɔ Bi ɔ yo kpeemi ɔ sisi?

¹³ Mɛni maa ya nɔ ngɛ Jijɔ Bi ɔ yo kpeemi ɔ sisi? Kaa bɔ nɛ gba si himi peeɔ nyumu kɛ yo kake ɔ, jã kɛ̃ nɛ Jijɔ Bi ɔ yo kpeemi ɔ maa pee Matsɛ Yesu Kristo kɛ e we “ayɛflo” nɛ ji nimli 144,000 ɔ kake. Ní peemi nɛ ɔ nɛ he hia wawɛɛ. E ma ha nɛ nɔ yemi ehe maa ye zugba a nɔ jeha 1,000.​—Kpoj. 20:6.

14-15. Mɛni he nɛ Kpo Jemi yi 21 ɔ ngɔ nimli 144,000 ɔ kɛ to? (Hyɛ foni nɛ ngɛ womi ɔ hɛ mi ɔ.)

¹⁴ Lɔ ɔ se ɔ, Kpo Jemi yi 21 ɔ ngɔ nimli 144,000 ɔ kɛ to ma ko nɛ ngɛ fɛu nɛ a tsɛɛ lɛ ke “Yerusalem Ehe ɔ” he. (Kpoj. 21:2, 9) Ma nɛ ɔ ngɛ sisi tomi tɛhi 12, “nɛ a ngma Jijɔ Bi ɔ bɔfo 12 ɔmɛ a biɛ 12 ɔmɛ ngɛ a nɔ.” Mɛni he je nɛ munyu nɛ ɔ he hia Yohane ɔ? Ejakaa e na nɛ a ngma e biɛ  ngɛ tɛ ɔ kake nɔ. Enɛ ɔ ji he blɔ nɛ e se be nɛ e ná!​—Kpoj. 21:10-14; Efe. 2:20.

¹⁵ Okadi peemi ma nɛ ɔ be kaa ma kpahi nɛ a le ɔ. Gbɛjegbɛ nɛ ngɛ ma nɛ ɔ mi ɔ, a kɛ sika tsu lɛ pee. E ngɛ agbo 12 nɛ́ a kɛ adiagba pee. A kɛ tɛhi nɛ a he jua wa lɛ pee e gbogbo ɔmɛ kɛ e sisi tomi ɔmɛ, nɛ susumi níhi nɛ a kɛ tsu ní ɔ da saminya. (Kpoj. 21:15-21) Se kɛ̃ ɔ, Yohane yɔse kaa nɔ́ ko laa! Mo kadi nɔ́ nɛ Yohane de wɔ kɛ nyɛɛ se nɛ ɔ. E de ke: “I nɛ sɔlemi we ko ngɛ ma a mi, ejakaa Yehowa Mawu Ope ɔ, kɛ Jijɔ Bi ɔ ji e sɔlemi we. Nɛ ma ngua a hia we pu ɔ aloo nyɔhiɔ ɔ nɛ e kpɛ ngɛ e nɔ, ejakaa Mawu hɛ mi nyami ɔ ha nɛ ma a mi tsɔ heii, nɛ Jijɔ Bi ɔ ji e kane.” (Kpoj. 21:22, 23) Nihi nɛ a piɛɛ Yerusalem ehe ɔ he ɔ kɛ Yehowa maa hi si. (Heb. 7:27; Kpoj. 22:3, 4) Nɛ tsɔɔ kaa Yehowa kɛ Yesu ji sɔlemi we ɔ nɛ ngɛ ma a mi ɔ nɛ.

16. Mɛni jɔɔmihi adesahi ma ná ngɛ Mawu Matsɛ Yemi ɔ Jeha Akpe Nɔ Yemi ɔ mi?

¹⁶ Ke nihi nɛ a pɔ mɛ nu ɔ susu ma nɛ ɔ he ɔ, a bua jɔɔ wawɛɛ. Se nihi nɛ a ngɛ hɛ nɔ kami kaa a maa hi zugba a nɔ ɔ hu ngɛ níhi nɛ a maa da nɔ kɛ nya. Ngɛ Mawu Matsɛ Yemi ɔ Jeha Akpe Nɔ Yemi ɔ mi ɔ, Yerusalem Ehe ɔ ma ha nɛ nihi nɛ a ná jɔɔmi. Yohane kale jɔɔmihi nɛ a ma ná a kaa “pa ko kɛ e mi wami nyu” nɛ ngɛ bee. Nɛ ngɛ pa a tue hiɛ kɛ hiɛ ɔ, o maa na “wami tsohi,” nɛ e baa amɛ “ngɛ kɛ ha je ma amɛ a tsami.” (Kpoj. 22:1, 2) Adesahi tsuo nɛ a maa hi wami mi jamɛ a be ɔ mi ɔ ma ná ní kpakpa nɛ ɔmɛ a he se. Bɔɔbɔɔbɔɔ ɔ, adesahi tsuo nɛ a buɔ Yehowa tue ɔ maa ye mluku. Hiɔ, nɔ́ yeyee kɛ ya fomi be si hie hu.​—Kpoj. 21:3-5.

17. Kaa bɔ nɛ a tsɔɔ ngɛ Kpo Jemi 20:11-13 ɔ, mɛnɔmɛ nɛ a ma ná jɔɔmi ngɛ Jeha Akpe Nɔ Yemi ɔ mi?

¹⁷ Mɛnɔmɛ nɛ a ma ná blɔ nya tomi kpakpa nɛ ɔmɛ a he se? Nihi nɛ a ma ná he se kekle ji asafo kuu ngua a nɛ a maa po Harmagedon ɔ kɛ a bimɛ nɛ eko ɔ, a ma fɔ ngɛ je ehe ɔ mi ɔ. Se Kpo Jemi yi 20 ɔ hu wo si kaa a ma tle nihi nɛ a gbo ɔ si. (Kane Kpo Jemi 20:11-13.) Anɔkualetsɛmɛ “nɛ a da” nɛ a gbo blema a, kɛ “nihi nɛ a dɛ” nɛ a ná we he blɔ kaa a maa kase Yehowa he ní ɔ maa ba wami mi ngɛ zugba a nɔ ekohu. (Níts. 24: 15; Yoh. 5:28, 29) Anɛ enɛ ɔ tsɔɔ kaa a ma tle adesahi tsuo si kɛ ba wami mi ngɛ Jeha Akpe Nɔ Yemi ɔ mi lo? Dɛbi. A be nihi nɛ a ná he blɔ kaa a ma sɔmɔ Yehowa se a je blɔ kua loko a gbo ɔ si tlee. A ná he blɔ kaa a maa kase Yehowa he ní se a ní peepee tsɔɔ kaa a sɛ kaa a maa hi Paradeiso zugba a nɔ.​—Mat. 25:46; 2 Tɛs. 1:9; Kpoj. 17:8; 20:15.

18. Kɛ níhi maa ya nɔ ha kɛɛ ngɛ zugba a nɔ ngɛ jeha 1,000 ɔ nyagbe?

¹⁸ Ke jeha 1,000 ɔ ke e baa nyagbe ɔ, adesahi tsuo nɛ a ngɛ zugba a nɔ ɔ maa ye mluku. Jamɛ a be ɔ, yayami nɛ wa ná kɛ je Adam ngɔ ɔ be wa ti nɔ ko nɔ he wami náe hu. (Rom. 5:12) A ma je Adam yayami ɔ kɛ je kulaa. Nɛ tsɔɔ kaa a, nihi nɛ a ngɛ zugba a nɔ ɔ maa ‘ba wami mi’ kaa adesahi nɛ a ye mluku ngɛ jeha 1,000 ɔ nyagbe.​—Kpoj. 20:5.

19. Mɛni he je nɛ nyagbe ka a he hia a?

¹⁹ Wa le kaa Yesu ha we nɛ Satan nɛ sisi lɛ nɛ́ e ngmɛɛ e we anɔkuale yemi ɔ he. E ya nɔ nɛ e ye anɔkuale benɛ e kɛ kahi kpe. Se anɛ adesahi nɛ a ye mluku ɔ tsuo maa ye Yehowa anɔkuale ke Satan ka mɛ lo? Ke a je Satan kɛ je muɔ voo ɔ mi ngɛ jeha 1,000 ɔ nyagbe ɔ, wa ti nɔ fɛɛ nɔ ma ná he blɔ kɛ tsɔɔ kaa e maa ye Yehowa anɔkuale loo e be lɛ anɔkuale yee. (Kpoj. 20:7) Nihi nɛ a maa ya nɔ maa ye anɔkuale ngɛ nyagbe ka a mi ɔ ma ná he yemi nitsɛnitsɛ. (Rom. 8:21) A ma kpata nihi nɛ a ma tsɔ atua kɛ si Yehowa a hɛ mi pɛsɛpɛsɛ.​—Kpoj. 20:8-10.

20. Kɛ gbamihi nɛ sa kadimi nɛ ngɛ Kpo Jemi womi ɔ mi ɔ haa nɛ o nuɔ he ha kɛɛ?

²⁰ Amlɔ nɛ ɔ nɛ wa susu Kpo Jemi womi ɔ he bɔɔ ɔ, kɛ o ngɛ he nue ha kɛɛ? Anɛ o bua jɔɛ kaa gbami nɛ ɔmɛ kɔɔ o he lo? Atsinyɛ jemi ko be he kaa e wo mo he wami nɛ, o suɔ nɛ o fɔ ni kpahi nine nɛ a ba piɛɛ o he kɛ ja anɔkuale Mawu ɔ. (Kpoj. 22:17) Amlɔ nɛ ɔ nɛ wa susu níhi nɛ maa ba hwɔɔ se ɔ a he ɔ, wa bua jɔ, nɛ wɔ hu wa suɔ nɛ waa tu munyu nɛ bɔfo Yohane tu ɔ eko. E de ke: “Amen! Ba, Nyɔmtsɛ Yesu.”​—Kpoj. 22:20.