1. Kɛ Baiblo ɔ kale suɔmi nitsɛnitsɛ ha kɛɛ?

 SUƆMI “la lilɛ ɔmɛ ji la lilɛ nɛ tsoɔ gegeege, Yah la lilɛ ɔ. Nyuhi nɛ a pee hamahama be nyɛe maa gbe suɔmi, nɛ pahi hu be nyɛe ma fɔ lɛ kɛ ho.” b (Lahi 8:6, 7, NW) Bɔ nɛ ngmami nɛ ɔ kale suɔmi nitsɛnitsɛ ha a sa kadimi wawɛɛ! E mi munyu ɔmɛ ma nyɛ maa wo nihi nɛ a sɛ gba si himi mi ɔ he wami wawɛɛ. E tsɔɔ wɔ kaa nihi nɛ a sɛ gba si himi mi ɔ ma nyɛ ma je suɔmi nɛ se pui kpo kɛ tsɔɔ a sibi.

2. Mɛni nɛ nihi nɛ a sɛ gba si himi mi ɔ ma nyɛ maa pee konɛ suɔmi nɛ ngɛ a kpɛti ɔ nya nɛ ko ba si?

² E biɔ mɔde bɔmi wawɛɛ loko nihi nɛ a sɛ gba si himi mi ɔ ma nyɛ ma je suɔmi nɛ se pui kpo kɛ tsɔɔ a sibi a wami be tsuo. Mo susu nɔ́ he tomi nɔ́ nɛ ɔ he nɛ o hyɛ: Ke a slɛ la a, ja a ngɔ lɛ kɛ ngɛ mi woe loko e maa tso be kɛkɛɛ nɛ e be gboe. Ke a pee we jã a, bɔɔbɔɔbɔɔ ɔ, la a ma gbo kulaa. Jã kɛ̃ nɛ loko suɔmi nɛ ngɛ nɔ kɛ e yo a kpɛti ɔ mi maa wa a, e sa nɛ a pee níhi nɛ ma ha nɛ e mi maa wa wawɛɛ. Be komɛ ɔ, a ma nyɛ maa nu he kaa suɔmi nɛ ngɛ a kpɛti ɔ ngɛ si bae, titli ɔ, ke a kɛ sika, hiɔ loo bimɛ a tsɔsemi he nyagbahi ngɛ kpee. Ke o sɛ gba si himi mi ɔ, mɛni o ma nyɛ maa pee konɛ suɔmi nɛ ji “Yah la lilɛ ɔ” nɛ ya nɔ nɛ e tso ngɛ o gba si himi ɔ mi? Ngɛ ní kasemi nɛ ɔ mi ɔ, wa ma susu ní etɛ komɛ nɛ maa ye bua nihi nɛ a sɛ gba si himi mi ɔ konɛ huɛ bɔmi nɛ ngɛ a kpɛti ɔ mi nɛ wa wawɛɛ, nɛ a bua nɛ jɔ ngɛ a gba si himi mi ɔ mi. c

3. Ke huɛ bɔmi kpakpa ngɛ nihi nɛ a sɛ gba si himi mi kɛ Yehowa a kpɛti ɔ, mɛni blɔ nɔ nɛ e maa ye bua mɛ konɛ suɔmi nɛ ngɛ a kpɛti ɔ mi nɛ wa wawɛɛ? (Fiɛlɔ 4:12) (Hyɛ foni ɔ hulɔ.)

³ Bɔ nɛ pee nɛ “Yah la lilɛ ɔ” nɛ ya nɔ nɛ e tso be fɛɛ be ɔ, e sa nɛ huno ɔ kɛ e yo ɔ nɛ a ha nɛ huɛ bɔmi kpakpa nɛ hi a kɛ Yehowa a kpɛti. Mɛni blɔ nɔ nɛ enɛ ɔ maa ye bua mɛ? Ke huno ɔ kɛ yo ɔ ha nɛ huɛ bɔmi kpakpa ngɛ a kɛ Yehowa a kpɛti ɔ, lɔ ɔ haa nɛ a kɛ Yehowa ga womi ɔmɛ ɔ tsuɔ ní. Enɛ ɔ yeɔ bua mɛ konɛ a nyɛ nɛ a yu a he ngɛ nyagbahi nɛ ma nyɛ ma puɛ suɔmi nɛ ngɛ a kpɛti ɔ he, loo a nyɛ nɛ a da nya. (Kane Fiɛlɔ 4:12.) Nihi nɛ huɛ bɔmi kpakpa ngɛ a kɛ Yehowa a kpɛti ɔ bɔɔ mɔde hu kaa a maa kase lɛ nɛ a je su kpakpahi nɛ e ngɛ ɔ kpo. Su nɛ ɔmɛ ekomɛ ji, mi mi jɔmi, tsui si tomi, kɛ tɔmi nɛ a kɛ maa ke. (Efe. 4:32–5:1) Ke nihi nɛ a sɛ gba si himi mi ɔ jeɔ su nɛ ɔmɛ kpo ɔ, e he be wae kaa suɔmi nɛ ngɛ a kpɛti ɔ mi maa wa. Nyɛmiyo ko nɛ a tsɛɛ lɛ ke Lena nɛ e sɛ gba si himi mi jeha 25 kɛ se ji nɛ ɔ de ke: “E he wɛ kulaa kaa o ma je suɔmi kɛ bumi kpo kɛ tsɔɔ nɔ ko nɛ e suɔ Yehowa.”

4. Mɛni he je nɛ Yehowa hla Yosef kɛ Maria kaa a pee Mesia nɛ maa ba a fɔli ɔ?

⁴ Mo susu Baiblo mi nɔ hyɛmi nɔ́ nɛ ɔ he nɛ o hyɛ. Benɛ e he ba hia nɛ Yehowa nɛ hla nihi nɛ a maa pee Mesia a nɛ maa ba a fɔli ɔ, e hla Yosef kɛ Maria kɛ je David weku ɔ mi. Mɛni he je? Ejakaa huɛ bɔmi kpakpa ngɛ mɛ ni enyɔ ɔmɛ tsuo a kɛ Yehowa a kpɛti, nɛ Yehowa hu le kaa a maa ngɔ e sɔmɔmi kɛ ye kekleekle blɔ he ngɛ a gba si himi ɔ mi. Mɛni nɛ nihi nɛ a sɛ gba si himi mi ɔ ma nyɛ maa kase ngɛ Yosef kɛ Maria a nɔ hyɛmi nɔ́ ɔ mi?

5. Mɛni nɛ hunomɛ ma nyɛ maa kase ngɛ Yosef nɔ hyɛmi nɔ́ ɔ mi?

⁵ Yosef je e tsui mi nɛ e kɛ Yehowa blɔ tsɔɔmi tsu ní, enɛ ɔ ha nɛ e pee huno kpakpa. Ke e hí kulaa a, Mawu kɛ blɔ tsɔɔmihi ha Yosef si etɛ sɔuu kɛ kɔ e weku ɔ he. Ngɛ si fɔfɔɛ nɛ ɔmɛ tsuo a mi ɔ, Yosef kɛ oya yemi bu tue ke lɔ ɔ ma bi nɛ e pee tsakemi nguahi po. (Mat. 1:20, 24; 2:13-15, 19-21) Akɛnɛ Yosef kɛ Mawu blɔ tsɔɔmi tsu ní he je ɔ, e po Maria he piɛ, nɛ e hyɛ e nɔ. Mo susu he nɛ o hyɛ: Nɔ́ nɛ Yosef pee ɔ ma ha nɛ suɔmi kɛ bumi nɛ Maria ngɛ kɛ ha lɛ ɔ mi maa wa wawɛɛ! Hunomɛ, ke nyɛɛ kɛ Baiblo ga womi nɛ tsɔɔ bɔ nɛ e sa kaa nyɛɛ hyɛ nyɛ weku ɔ nɔ ha a tsu ní ɔ, lɔ ɔ tsɔɔ kaa nyɛ ngɛ Yosef nɔ hyɛmi nɔ́ ɔ kasee. d Ke nyɛ bɔ mɔde nɛ nyɛ pee jã, nɛ e ma bi nɛ nyɛɛ pee tsakemi komɛ nɛ a he hia po ɔ, lɔ ɔ tsɔɔ kaa nyɛ suɔ nyɛ yi ɔmɛ nɛ nyɛ suɔ nɛ huɛ bɔmi nɛ ngɛ nyɛ kpɛti ɔ mi nɛ wa wawɛɛ. Nyɛmiyo ko nɛ e je Vanuatu nɛ e sɛ gba si himi mi jeha 20 kɛ se ji nɛ ɔ de ke: “Ke ye huno ɔ hla Yehowa blɔ tsɔɔmi se blɔ nɛ e kɛ tsu ní ɔ, e haa nɛ i buɔ  lɛ wawɛɛ. Lɔ ɔ haa nɛ i nuɔ he kaa i ngɛ slɔkee nɛ i náa nɔ mi mami kaa yi mi kpɔhi nɛ e mwɔɔ ɔ da.”

6. Mɛni nɛ yigbayihi ma nyɛ maa kase ngɛ Maria nɔ hyɛmi nɔ́ ɔ mi?

⁶ Maria hu ha nɛ huɛ bɔmi kpakpa hi e kɛ Yehowa a kpɛti. Hemi kɛ yemi nɛ e ngɛ ngɛ Yehowa mi ɔ mi wa be fɛɛ be. Maria kase Ngmami ɔ saminya. Jehanɛ hu ɔ, e ná be kɛ pue e yi mi tɛ ngɛ níhi nɛ e kase ɔ he. (Luka 2:19, 51) Akɛnɛ huɛ bɔmi kpakpa ngɛ Maria kɛ Yehowa a kpɛti he je ɔ, e pee yogbayo kpakpa. Mwɔnɛ ɔ, yigbayihi fuu ngɛ nɛ a bɔɔ mɔde kaa a maa kase nɔ́ nɛ Maria pee ɔ. Kaa nɔ hyɛmi nɔ́ ɔ, nyɛmiyo ko nɛ a tsɛɛ lɛ ke Emiko ɔ de ke: “Benɛ i sɛ we gba si himi mi lolo ɔ, imi nitsɛ i toɔ blɔ nya nɛ i peeɔ níhi nɛ ma ha nɛ huɛ bɔmi kpakpa maa hi i kɛ Yehowa wa kpɛti. Se benɛ i sɛ gba si himi mi se ɔ, i yɔse kaa akɛnɛ ye huno ɔ ji nɔ nɛ sɔleɔ, nɛ e nyɛɛɔ weku Mawu jami hɛ mi he je ɔ, i kpa ní nɛ ɔmɛ peemi ngɛ ye dɛ he. I ba na kaa e sa nɛ imi nitsɛ ma pee níhi nɛ ma ha nɛ huɛ bɔmi kpakpa maa hi i kɛ Yehowa wa kpɛti. Enɛ ɔ he ɔ, i to be konɛ i kɛ Mawu nɛ sɛɛ ní ngɛ sɔlemi mi, ma kane Baiblo ɔ, nɛ ma pue ye yi mi tɛ ngɛ nɔ́ nɛ ma kane ɔ he.” (Gal. 6:5) Yigbayihi, ke nyɛ ya nɔ nɛ nyɛ pee níhi nɛ ma ha nɛ huɛ bɔmi kpakpa maa hi nyɛɛ kɛ Yehowa nyɛ kpɛti ɔ, nyɛ hunomɛ ma je nyɛ yi, nɛ a maa suɔ nyɛ wawɛɛ.​—Abɛ 31:30.

7. Mɛni huno kɛ e yo ma nyɛ maa kase ngɛ Yosef kɛ Maria a nɔ hyɛmi nɔ́ ɔ mi kɛ kɔ Yehowa nɛ a maa pee kake kɛ sɔmɔ lɛ ɔ he?

⁷ Yosef kɛ Maria hu pee kake kɛ tsu ní bɔ nɛ pee nɛ huɛ bɔmi nɛ ngɛ a kɛ Yehowa a kpɛti ɔ mi nɛ wa wawɛɛ. A le kaa e he hia wawɛɛ nɛ a pee kake kaa weku kɛ sɔmɔ Yehowa. (Luka 2:22-24, 41; 4:16) Eko ɔ, e he maa wa ha mɛ kaa a maa pee jã, titli ɔ, ke a weku mi bi ɔmɛ a he ngɛ hiɛe. Se a bɔ mɔde nɛ a pee jã. Enɛ ɔ ji nɔ hyɛmi nɔ́ ko nɛ sa kadimi wawɛɛ kɛ ha nihi nɛ a sɛ gba si himi mi mwɔnɛ ɔ! Ke nyɛ ngɛ bimɛ kaa Yosef kɛ Maria a, e he ma nyɛ maa wa kaa nyɛ maa ya asafo mi kpe loo nyɛ maa to be kɛ pee weku Mawu jami. Eko ɔ, e he ma nyɛ maa wa ha nyɛ kaa nyɛ ma bua nyɛ he nya kɛ kase ní loo nyɛ bla kɛ sɔle kaa nɔ kɛ yo. Se kɛ̃ ɔ, nyɛ kai kaa ke nyɛ pee kake kɛ sɔmɔ Yehowa a, nyɛ maa hɛ kɛ su e he wawɛɛ, nɛ nyɛ maa hɛ kɛ su nyɛ sibi a he hulɔ. Enɛ ɔ he ɔ, nyɛ ha nɛ Mawu jami he nɛ hia nyɛ wawɛɛ.

8. Mɛni nɛ nihi nɛ a sɛ gba si himi mi nɛ a kɛ nyagbahi ngɛ kpee ɔ ma nyɛ maa pee konɛ a ná weku Mawu jami he se wawɛɛ?

⁸ Mɛni o ma nyɛ maa pee ke o kɛ nyagbahi ngɛ kpee ngɛ o gba si himi ɔ mi? Eko ɔ, ke nyɛ bla kɛ pee weku Mawu jami ɔ, e peeɔ kaa nɔ́ nɛ bua jɔmi be mi. Ke jã a, nyɛɛ je sisi kɛ munyu kpitikpiti komɛ nɛ a ngɛ bua jɔmi. E sa nɛ e pee nɔ́ ko nɛ nyɛ tsuo nyɛ kplɛɛ nɔ nɛ nyɛ bua jɔ he. Ke nyɛ pee jã a, e ma ha nɛ suɔmi nɛ ngɛ nyɛ kpɛti ɔ mi maa wa, nɛ nyɛ maa suɔ wawɛɛ kaa nyɛ maa pee kake kɛ sɔmɔ Yehowa.

9. Mɛni he je nɛ e sa nɛ huno kɛ yo nɛ a ná be kɛ ha a sibi ɔ?

⁹ Hunomɛ kɛ yigbayihi, ke nyɛ ná be kɛ ha nyɛ sibi ɔ, lɔ ɔ hu ma ha nɛ suɔmi nɛ ngɛ nyɛ kpɛti ɔ mi maa wa wawɛɛ. Ke nyɛ pee jã a, nyɛ maa le nyɛ huno ɔmɛ loo nyɛ yi ɔmɛ a susumi ngɛ níhi a he kɛ bɔ nɛ a nuɔ he ha. (1 Mose 2:24) Nyɛmiyo Lilia kɛ e huno Ruslan sɛ gba si himi mi jeha 15 kɛ se ji nɛ ɔ. Mo kadi nɔ́ nɛ a ba yɔse benɛ a sɛ gba si himi mi be bɔɔ se ɔ. Lilia de ke: “Wa yɔse kaa wa be be náe kɛ ha wa sibi kaa bɔ nɛ wa susu ɔ. Ní tsumi, we mi ní peemi, kɛ bimɛ nɛ wa fɔ pee se ɔ ha we nɛ wa ná deka kulaa. Wa ba na kaa ke wa tui níhi a he blɔ nya konɛ wa ná be kɛ ha wa sibi ɔ, wa kpɛti ma nyɛ ma puɛ kulaa.”

10. Mɛni blɔ nɔ nɛ nihi nɛ a sɛ gba si himi mi ɔ ma nyɛ maa ngɔ sisi tomi mlaa nɛ ngɛ Efeso Bi 5:15, 16 kɛ tsu ní?

 ¹⁰ Mɛni nɛ nihi nɛ a sɛ gba si himi mi ɔ ma nyɛ maa pee konɛ a ná be kɛ ha a sibi? E ma bi nɛ a to be nɛ a kɛ maa pee níhi kɛ bla. (Kane Efeso Bi 5:15, 16.) Nyɛminyumu ko nɛ e ngɛ Nigeria nɛ a tsɛɛ lɛ ke Uzondu ɔ de ke: “Ke i ngɛ ye be he blɔ nya toe ɔ, i ngɔɔ be nɛ ma ná kɛ ha ye yo ɔ konɛ wa kɛ bla kɛ pee níhi ɔ kɛ piɛɛɔ he, nɛ i haa nɛ jamɛ a be ɔ he hiaa mi wawɛɛ.” (Filip. 1:10) Mo susu nɔ́ nɛ nyɛmiyo Anastasia pee konɛ e nyɛ nɛ e kɛ e be nɛ tsu ní saminya a he. E ji kpɔ mi nɔ hyɛlɔ ko yo ngɛ Moldova. E de ke: “Ke ye huno ɔ ngɛ e blɔ nya ní tsumihi a he ní tsue ɔ, i bɔɔ mɔde kaa ma ngɔ jamɛ a be ɔ kɛ pee níhi nɛ e sa kaa ma pee ngɛ ye dɛ he ɔ. Jã nɛ i peeɔ ɔ haa nɛ wa náa be kɛ haa wa sibi pee se.” Se ke o be ngmɛ́ mo blɔ konɛ nyɛɛ pee níhi kɛ bla hu nɛɛ?

11. Mɛni ní tsumihi nɛ Akuila kɛ Priskila pee kake kɛ tsu?

¹¹ Nihi nɛ a sɛ gba si himi mi ɔ ma nyɛ maa kase nɔ́ ko kɛ je nɔ hyɛmi nɔ́ nɛ Akuila kɛ Priskila pee ɔ mi. Akɛnɛ a peeɔ nɔ hyɛmi nɔ́ kpakpa he je ɔ, Kristofohi fuu nɛ a hi si ngɛ kaseli ɔmɛ a be ɔ mi ɔ a bua jɔ a he wawɛɛ. (Rom. 16:3, 4) E ngɛ mi kaa Baiblo ɔ de we níhi fuu kɛ kɔ a gba si himi ɔ he mohu lɛɛ, se Baiblo ɔ ha nɛ wa le kaa a bla kɛ tsu ní, a bla kɛ fiɛɛ nɛ a ye bua ni kpahi hulɔ. (Níts. 18:2, 3, 24-26) Ngɛ anɔkuale mi ɔ, be fɛɛ be nɛ Baiblo ɔ maa wo Akuila kɛ Priskila a biɛ ta a, e tuɔ a he munyu kɛ blaa.

12. Mɛni nɛ huno kɛ yo ma nyɛ maa pee konɛ a ná be fuu kɛ ha a sibi? (Hyɛ foni ɔ hulɔ.)

¹² Mɛni blɔ nɔ nɛ nihi nɛ a sɛ gba si himi mi ɔ ma nyɛ maa kase Akuila kɛ Priskila a nɔ hyɛmi nɔ́ ɔ? Mo susu níhi fuu nɛ e sa nɛ o kɛ o huno ɔ loo o yo ɔ nyɛ tsu he ní ɔ he nɛ o hyɛ. Anɛ nyɛ ma nyɛ maa pee ní nɛ ɔmɛ ekomɛ kɛ bla mohu pe nɛ nyɛ ma tsu a he ní ngɛ nyɛ dɛ he lo? Kaa nɔ hyɛmi nɔ́ ɔ, Akuila kɛ Priskila tsu fiɛɛmi ní tsumi ɔ kɛ bla. Anɛ toɔ o be he blɔ nya konɛ o kɛ o huno ɔ loo o yo ɔ nɛ pee jã lo? Jehanɛ se hu ɔ, Akuila kɛ Priskila pee kake kɛ tsu a he lo nya ní tsumi. Eko ɔ, o kɛ o huno ɔ loo o yo ɔ tsu we ní ngɛ he kake, se anɛ nyɛ ma nyɛ ma tsu we mi ní tsumihi kɛ bla lo? (Fiɛlɔ 4:9) Ke nyɛ ye bua nyɛ sibi ngɛ ní komɛ a peemi mi ɔ, e haa nɛ nyɛ nuɔ he kaa nyɛ ji nimli kake nɛ nyɛ nyɛɔ sɛɛ ní. Nyɛminyumu Robert kɛ e yo Linda sɛ gba si himi mi jeha 50 kɛ se ji nɛ ɔ. Robert de ke: “Ngɛ anɔkuale mi ɔ, wa ná we be fuu nɛ waa kɛ jeɔ wa hɛja. Se ke i ngɛ níhi a mi sae nɛ ye yo ɔ ngɛ mi jlalee loo i ngɛ we ɔ se hue nɛ ye yo ɔ ba lejɛ ɔ nɛ e ba ye bua mi ɔ, e haa nɛ ye bua jɔɔ wawɛɛ. Ke wa pee níhi kɛ bla a, e haa nɛ wa peeɔ kake, nɛ suɔmi nɛ ngɛ wa kpɛti ɔ hu mi waa wawɛɛ.”

13. Loko kake peemi maa hi nɔ ko kɛ e yo a kpɛti ɔ, mɛni e sa nɛ a pee?

¹³ Mo kai kaa we kake mi nɛ nyɛ ngɛ ɔ tsɔɔ we doo kaa kake peemi maa hi nyɛ kpɛti be fɛɛ be. Yogbayo ko nɛ e ngɛ Brazil ɔ de ke: “Mwɔnɛ ɔ, níhi fuu gblaa wa juɛmi, nɛ ke wa hyɛ we  nɛ hi ɔ, wa ma nyɛ ma susu kaa wa náa be kɛ haa wa sibi akɛnɛ wa ngɛ tsu kake mi ɔ he je. I ba na kaa e biɔ mɔde bɔmi wawɛɛ loko kake peemi maa hi wa kpɛti. E sa nɛ ma ná be kɛ ha ye huno ɔ nɛ waa sɛɛ ní hulɔ.” Mo kadi nɔ́ nɛ Nyɛminyumu Bruno kɛ e yo Tays pee konɛ a nyɛ nɛ a ná be kɛ ha a sibi. Bruno de ke: “Ke wa ngɛ wa hɛja jee ɔ, waa kɛ wa fon ɔmɛ fɔɔ he kpa kulaa nɛ waa kɛ wa sibi sɛɛɔ ní nɛ wa bua jɔɔ wawɛɛ.”

14. Ke nihi nɛ a sɛ gba si himi mi ɔ bua jɔɛ kaa a ma bla kɛ pee ní komɛ ɔ, mɛni a ma nyɛ maa pee?

¹⁴ Se ke o kɛ o huno ɔ loo o yo ɔ nyɛ bua jɔɛ ke nyɛ pee kake kɛ ngɛ ní komɛ pee hu nɛɛ? Eko ɔ, e slo níhi nɛ nyɛ ti nɔ fɛɛ nɔ bua jɔ he kaa e maa pee, loo eko ɔ, nyɛ ní peepee komɛ woɔ nyɛ sibi a mi mi la. Ke jã a, mɛni nyɛ ma nyɛ maa pee? Mo kai la a nɛ wa tu he munyu kɛ sɛ hlami ɔ. Pi benɛ a slɛ la a pɛ nɛ e bɔni tsomi wawɛɛ. Mohu ɔ, e ma bi nɛ a ngɔ lɛ kɛ wo mi bɔɔbɔɔbɔɔ. Jã nɔuu kɛ̃ nɛ nyɛ ma nyɛ maa ngɔ be kpiti ko kɛ pee ní komɛ kɛ bla daa ligbi. Nɔ́ nɛ nyɛ maa pee ɔ nɛ pee nɔ́ ko nɛ nyɛ tsuo nyɛ bua jɔ he, se pi nɔ́ nɛ maa ngɔ nya sami kɛ ba. (Yak. 3:18) Ke nyɛ je sisi bɔɔbɔɔbɔɔ ɔ, nyɛ maa na kaa suɔmi nɛ ngɛ nyɛ kpɛti ɔ mi ma bɔni wami ekohu.

15. Mɛni he je nɛ bumi he hia wawɛɛ loko suɔmi nɛ ngɛ huno kɛ e yo a kpɛti ɔ mi maa wa a?

¹⁵ Bumi he hia wawɛɛ ngɛ gba si himi mi. E ngɛ kaa kɔɔhiɔ nɛ haa nɛ la tsoɔ wawɛɛ ɔ. Ke kɔɔhiɔ be ɔ, la a ma gbo kulaa. Jã kɛ̃ nɛ ke nihi nɛ a sɛ gba si himi mi ɔ je we bumi kpo kɛ tsɔɔ a sibi ɔ, suɔmi nɛ ngɛ a kpɛti ɔ nya maa ba si kulaa. Lɔ ɔ he ɔ, ke huno ko kɛ e yo bɔ mɔde wawɛɛ nɛ a je bumi kpo kɛ tsɔɔ a sibi ɔ, lɔ ɔ tsɔɔ kaa a suɔ nɛ suɔmi nɛ ngɛ a kpɛti ɔ mi nɛ wa wawɛɛ be fɛɛ be. Se kɛ̃ ɔ, ha nɛ e hi o juɛmi mi kaa pi susumi nɛ o ma ná kaa o buɔ o huno ɔ loo o yo ɔ ji sane ɔ, e sa nɛ o huno ɔ loo o yo ɔ nɛ na ngɛ o ní peepee mi. Nyɛmiyo Penny kɛ e huno Aret sɛ gba si himi mi jeha 25 kɛ se ji nɛ ɔ nɛ. Penny de ke: “Akɛnɛ wa jeɔ bumi kpo kɛ tsɔɔ wa sibi he je ɔ, be fɛɛ be ɔ, suɔmi hyi wa we ɔ mi tɔ. Wa jeɔ wa juɛmi kpo ngɛ níhi a he faa, ejakaa wa le kaa nɔ fɛɛ nɔ susumi he hia.” Lɔ ɔ he ɔ, mɛni o ma nyɛ maa pee konɛ o yo ɔ loo o huno ɔ nɛ nu he kaa o buɔ lɛ niinɛ? Nyɛ ha nɛ wa susu Abraham kɛ Sara he.

16. Mɛni nɛ hunomɛ ma nyɛ maa kase ngɛ Abraham nɔ hyɛmi nɔ́ ɔ mi? (1 Petro 3:7) (Hyɛ foni ɔ hulɔ.)

¹⁶ Abraham je bumi kpo kɛ tsɔɔ Sara wawɛɛ. E bu Sara tue nɛ e susu bɔ nɛ e nuɔ he ha ngɛ níhi a he. Be ko ɔ, Sara mi mi fu nɛ e kɛ abofu ɔ kple Abraham nɔ, nɛ e pia lɛ ngɛ nyagbahi nɛ ba a he. Anɛ Abraham kɛ abofu tu munyu lo? Dɛbi. E le kaa Sara ji yo nɛ baa e he si, nɛ e fĩɔ yi mi kpɔhi nɛ e mwɔɔ ɔ se. Abraham bu Sara tue nɛ e bɔ mɔde nɛ e tsu sane ɔ he ní. (1 Mose 16:5, 6) Mɛni wa ma nyɛ maa kase ngɛ  mi? Hunomɛ, nyɛ ngɛ he blɔ nɛ nyɛ mwɔɔ yi mi kpɔhi kɛ haa nyɛ weku ɔ. (1 Kor. 11:3) Se ke nyɛ maa mwɔ yi mi kpɔhi nɛ maa sa nyɛ yi ɔmɛ a he, nɛ nyɛ je suɔmi mi nɛ nyɛ bi a juɛmi ngɛ he kekle ɔ, lɔ ɔ tsɔɔ kaa nyɛ susuɔ a he. (1 Kor. 13:4, 5) Be komɛ ɔ, o yo ɔ ma nyɛ maa hao nɛ e maa suɔ nɛ e de mo bɔ nɛ e ngɛ he nue ha. Ke e ba jã a, anɛ o jeɔ bumi kpo kɛ tsɔɔ lɛ nɛ o buɔ lɛ tue saminya lo? (Kane 1 Petro 3:7.) Angela kɛ Dmitry sɛ gba si himi mi maa pee jeha 30 ji nɛ ɔ. Angela tsɔɔ kaa e huno ɔ ngɔɔ e ní peepee kɛ tsɔɔ kaa e buɔ lɛ. E de ke: “Dmitry pee klaalo be fɛɛ be kaa e maa bu mi tue ke ye mi mi fu po loo i suɔ nɛ ma tu munyu kɛkɛ. E toɔ e tsui si kɛ haa mi ke i kɛ abofu tu munyu po.”

17. Mɛni nɛ yigbayihi ma nyɛ maa kase ngɛ Sara nɔ hyɛmi nɔ́ ɔ mi? (1 Petro 3:5, 6)

¹⁷ Sara fĩ yi mi kpɔ nɛ Abraham mwɔ ɔ se. Jã nɛ e pee ɔ tsɔɔ kaa e buɔ lɛ wawɛɛ. (1 Mose 12:5) Ligbi ko ɔ, Abraham suɔ kaa e maa pee ni komɛ nɛ a ba a ngɔ be mi nɛ a hyɛ we blɔ ɔ nubwɔ. E de Sara kaa e ngmɛɛ nɔ́ nɛ e ngɛ pee ɔ he konɛ e ya hoo ní kɛ ha mɛ. (1 Mose 18:6) Sara kɛ oya yemi pee nɔ́ nɛ Abraham de lɛ ɔ. Yigbayihi, ke nyɛ hunomɛ mwɔ yi mi kpɔ ko ɔ, nyɛ hu nyɛ ma nyɛ maa kase Sara nɛ nyɛ fĩ a se. Ke nyɛ pee jã a, e ma ha nɛ suɔmi nɛ ngɛ nyɛ kpɛti ɔ mi maa wa wawɛɛ. (Kane 1 Petro 3:5, 6.) Dmitry nɛ wa tu e he munyu kɛ sɛ hlami ɔ tsɔɔ kaa e yo ɔ hu haa nɛ e nuɔ he kaa e buɔ lɛ wawɛɛ. E de ke: “Ye bua jɔ kaa Angela fĩɔ yi mi kpɔhi nɛ i mwɔɔ ɔ se, ke wa kpa we gbi ngɛ níhi a he po. Ke yi mi kpɔ ɔ ya yi manye po ɔ, e pia we mi.” Ngɛ anɔkuale mi ɔ, e he wɛ kulaa kaa o maa suɔ nɔ ko nɛ e buɔ mo ɔ!

18. Ke nihi nɛ a sɛ gba si himi mi ɔ bɔ mɔde nɛ a ha nɛ suɔmi nɛ ngɛ a kpɛti ɔ mi wa a, kɛ a ma ná he se ha kɛɛ?

¹⁸ Mwɔnɛ ɔ, Satan suɔ nɛ e puɛ suɔmi nɛ ngɛ Kristofohi nɛ a sɛ gba si himi mi ɔ a kpɛti ɔ. E le kaa ke suɔmi nɛ ngɛ a kpɛti ɔ puɛ ɔ, a be nyɛe maa hɛ kɛ su Yehowa he hu. Se ngɛ anɔkuale mi ɔ, nɔ́ ko nɔ́ ko be nyɛe ma puɛ suɔmi nitsɛnitsɛ gblegbleegble! Enɛ ɔ he ɔ, nyɛ ha nɛ suɔmi nɛ ngɛ nyɛ gba si himi ɔ mi ɔ nɛ pee kaa nɔ́ nɛ a tu he munyu ngɛ Lahi A Mi La womi ɔ mi ɔ. Moo fia o pɛɛ si kaa o kɛ Yehowa maa ye kekle blɔ he ngɛ o gba a mi. Nyɛ ná be kɛ ha nyɛ sibi, nɛ nyɛ je bumi kpo kɛ tsɔɔ nyɛ sibi, nɛ nyɛ susu nyɛ sibi a hiami níhi a he. Ke nyɛ pee jã a, nyɛ gba a maa wo Yehowa, nɔ nɛ suɔmi nitsɛnitsɛ je e ngɔ ɔ hɛ mi nyami daa. Nɛ kaa bɔ nɛ ke a ngɔ lɛ kɛ ngɛ la mi woe nɛ e tsoɔ gegeege ɔ, nyɛ suɔmi ɔ hu mi maa wa kɛ maa ya neneene.