1-3. Eko ɔ, mɛni lɛ wo Evodia kɛ Sintika a kpɛti pɛ ɔ, nɛ mɛni wa ma nyɛ maa pee kɛ tsi nyagba nɛ ɔmɛ a nya? (Moo hyɛ foni nɛ ngɛ ní kasemi ɔ sisije ɔ.)

YEHOWA sɔmɔli ngɛ bu nɛ mi kuɔ kɛ ha Baiblo ɔ nɛ ji Mawu nitsɛ e womi ɔ. Akɛnɛ wa yi mluku he je ɔ, a kɛ Ngmami ɔ tsɔseɔ wɔ tsuo ngɛ be kɛ behi a mi. Kɛ wa peeɔ wa ní ngɛ tsɔsemi nɛ ɔ he ha kɛɛ? Mo susu Evodia kɛ Sintika nɛ a ji Kristofohi nɛ a hi si ngɛ kaseli ɔmɛ a be ɔ mi ɔ he nɛ o hyɛ. Baiblo ɔ tsɔɔ kaa pɛ sɛ yi nɛ ɔmɛ a kpɛti, se e tsɔɔ we nɔ́ nɛ kɛ pɛ nɛ ɔ ba. Mɛni ji nyagba a? Baiblo ɔ tsɔɔ we. Se kɛ̃ ɔ, ha nɛ wa susu nɔ hyɛmi nɔ́ nɛ ɔ he nɛ waa hyɛ nɔ́ nɛ eko ɔ, e ji nyagba a.

² Eko ɔ, Evodia fɔ̃ nyɛmimɛ komɛ nine kɛ ba e we mi konɛ a ye ní nɛ a je a hɛ ja. Evodia tsɛ we Sintika kɛ ba he nya buami ɔ sisi, se e nu nɔ́ nɛ ya nɔ ɔ he. Eko ɔ, Sintika de ke: ‘E pee mi nyakpɛ kaa Evodia fɔ̃ nihi nine kɛ ya okplɔɔ ngmɛmi ko sisi nɛ e tsɛ we mi! Jinɛ i le kaa wa ji huɛmɛ nɛ nyu bi ngɛ wa kpɛti.’ Sintika susu kaa Evodia sume e sane, nɛ e sume nɛ e kɛ lɛ maa bɔ huɛ hu. Enɛ ɔ he ɔ, Sintika hu fɔ̃ jamɛ a nyɛmimɛ ɔmɛ nɔuu nine kɛ ya he nya buami ko nɛ lɛ nitsɛ hu e tsɛ ɔ sisi, se e tsɛ we Evodia! Nyagba  nɛ te si ngɛ Evodia kɛ Sintika a kpɛti ɔ ma nyɛ ma puɛ tue mi jɔmi nɛ ngɛ asafo ɔ mi ɔ. Paulo wo mɛ ga kaa a dla a kpɛti konɛ tue mi jɔmi nɛ ba. Baiblo ɔ tsɔɔ we kaa a kɛ ga womi nɛ ɔ tsu ní loo a kɛ tsu we ní, se eko ɔ, nyɛmimɛ yi nɛ ɔmɛ kɛ ga womi nɛ bɔfo Paulo je suɔmi mi nɛ e kɛ ha mɛ ɔ tsu ní.—Filip. 4:2, 3.

³ Mwɔnɛ ɔ hu ɔ, haomihi kaa jã ma nyɛ maa ngɔ mi gbami kɛ ba Yehowa we bi a kpɛti ngɛ a we asafo ɔmɛ a mi. Se ke waa kɛ ga womi nɛ ngɛ Mawu Munyu nɛ ji Baiblo ɔ mi ɔ tsu ní ɔ, wa ma nyɛ ma tsu nyagba nɛ ɔmɛ a he ní, aloo wa maa tsi a nya. Ke wa ngɛ bu nɛ mi kuɔ kɛ ha Yehowa nitsɛ e Womi ɔ, waa kɛ blɔ tsɔɔmihi nɛ ngɛ mi ɔ ma tsu ní.—La 27:11.

4, 5. Mɛni ga womi nɛ Mawu Munyu ɔ kɛ ha wɔ ngɛ wa he nɔ nɛ wa maa ye ɔ he?

⁴ E be gbɔjɔɔ kaa nɔ ko maa ye e he nɔ, titli ɔ, ke nɔ ko pee wɔ nɔdɔ nɔ́ ko, aloo a ye wɔ sane yaya ko ɔ. Eko ɔ, nɔ ko maa tu munyu yaya ko kɛ si wɔ, aloo e maa ye wɔ sane yaya ko akɛnɛ e slo ma nɛ wa je nɔ, loo bɔ nɛ wa nɔmlɔ su ngɛ ha a he je. Enɛ ɔ ma nyɛ maa hao wɔ, se ke wa nyɛmi Kristofo no ko nɛ e pee jã a, e haoɔ wɔ wawɛɛ po pe jã! Anɛ ga womi ngɛ Mawu Munyu ɔ mi nɛ ma nyɛ maa ye bua wɔ konɛ waa da wa nyɛmimɛ a fã tɔmi ɔmɛ a nya lo?

⁵ Kɛ je adebɔ sisije tɔɔ ɔ, Yehowa le bɔ nɛ adesahi peeɔ a ní ha. Ke nɔ́ ko gba wa nya nɛ wa yi wa he nɔ ɔ, Yehowa le nɔ́ nɛ ma nyɛ maa je mi kɛ ba. Ke wa hao aloo wa mi mi fu ɔ, wa ma nyɛ ma de nɔ́ ko nɛ pee se ɔ, wa ma pia wa he. Enɛ ɔ he ɔ, nile ngɛ mi kaa waa kɛ Baiblo mi ga womi nɛ tsɔɔ kaa waa ye wa he nɔ, nɛ wa mi mi ko fu mlamlaamla a ma tsu ní! (Kane Abɛ 16:32; Fiɛlɔ 7:9.) Ngɛ anɔkuale mi ɔ, e sa nɛ wɔ tsuo waa bɔ mɔde nɛ waa ye wa he nɔ, nɛ waa ya nɔ nɛ waa kɛ nihi a tɔmi nɛ pa mɛ pe bɔ nɛ wa ngɛ pee amlɔ nɛ ɔ. Yesu tsɔɔ kaa ke wa ngɔɛ wa nyɛmimɛ a he yayami kɛ pa mɛ ɔ, Yehowa hu kɛ wa he yayami be wɔ pae. (Mat. 6:14, 15) Anɛ e sa nɛ o ya nɔ nɛ o kɛ yayami nɛ pa pe bɔ nɛ o ngɛ pee amlɔ nɛ ɔ lo, aloo e sa nɛ o bɔ mɔde kaa o maa ye o he nɔ wawɛɛ lo?

6. Mɛni he je nɛ e sɛ kaa wa ná nihi a he abofu loo ninyɛ ɔ?

⁶ Behi fuu ɔ, nihi nɛ a nyɛ we a he nɔ yemi ɔ a mi mi fuɔ mlamlaamla, nɛ a náa nihi a he ninyɛ. Enɛ ɔ he ɔ, eko ɔ, nihi be suɔe kaa a kɛ nihi kaa jã a maa bɔ. Nɔ nɛ e mi mi fuɔ mlamlaamla a ma nyɛ ma ha nɛ ni kpahi nɛ a ngɛ asafo ɔ mi ɔ nɛ a ná jamɛ a su ɔ eko. Eko ɔ, e maa bɔ mɔde kaa e be hae nɛ ni kpahi nɛ a na kaa e mi mi fuɔ mlamlaamla, aloo e ná nɔ ko he ninyɛ, se nyagbenyagbe ɔ, e su yaya a “maa je kpo kokooko ngɛ ma hɛ mi.” (Abɛ 26:24-26) Asafo mi nikɔtɔma amɛ ma nyɛ maa ye bua jamɛatsɛ ɔ konɛ e na kaa nɔ ko be nyɛe nɛ e ngɔ abofu, ninyɛ, kɛ pɛ kɛ hi Mawu blɔ nya tomi ɔ, aloo e we asafo ɔ mi. Yehowa nitsɛ e Womi nɛ se be ɔ tsɔɔ enɛ ɔ mi heii. (3 Mose 19:17, 18; Rom. 3:11-18) Anɛ o kplɛɛɔ ga womi nɛ ɔ nɔ lo?

7, 8. (a) Mɛni blɔ nɔ Yehowa guɔ kɛ tsɔɔ e we bi nɛ a piɛɛ e blɔ nya tomi nɛ ngɛ zugba a nɔ ɔ he ɔ blɔ? (b) Mɛni ji blɔ tsɔɔmi komɛ nɛ ngɛ Mawu Munyu ɔ mi, nɛ mɛni he je nɛ e sa kaa wa kɛ tsu ní ɔ?

⁷ Yehowa kpakaa nihi nɛ a ngɛ e blɔ nya tomi ɔ fã nɛ ngɛ zugba a nɔ ɔ mi ɔ, nɛ e tsɔɔ ɔ mɛ ní. Ngɛ mɛni blɔ nɔ? E hla Kristo kaa ‘asafo ɔ yi,’ nɛ Kristo hu hla “tsɔlɔ anɔkualetsɛ kɛ ní lelɔ” ɔ konɛ a tsɔɔ Mawu we bi ní, nɛ a ngɔ blɔ tsɔɔmi kɛ ha mɛ. (Mat. 24:45-47; Efe. 5:23) Kaa bɔ nɛ blɔ tsɔɔmi ajla toli nɛ a hi si ngɛ kaseli ɔmɛ a be ɔ mi ɔ pee ɔ, tsɔlɔ nɛ ɔ hu kɛ ga womi, aloo sɛ gbi nɛ ngɛ Mawu munyu ɔ mi ɔ tsuɔ ní, nɛ e ngɛ bu nɛ  mi kuɔ kɛ ha Mawu womi ɔ. (Kane 1 Tesalonika Bi 2:13.) Mɛni ji blɔ tsɔɔmi komɛ, aloo ga womi komɛ nɛ ngɛ Baiblo ɔ mi nɛ maa ye bua wɔ?

⁸ Baiblo ɔ tsɔɔ kaa e sa nɛ waa ya asafo mi kpehi daa. (Heb. 10:24, 25) E woɔ wɔ he wami kaa wɔ tsuo waa kplɛɛ Baiblo tsɔɔmi kake nɔ. (1 Kor. 1:10) Mawu Munyu ɔ tsɔɔ wɔ kaa e sa nɛ waa ngɔ Matsɛ Yemi ɔ kɛ ye kekleekle blɔ he ngɛ wa si himi mi. (Mat. 6:33) Jehanɛ hu ɔ, Ngmami ɔ ha nɛ wa na kaa e ji sɔ nɛ fɔɔ si ngɛ wa nɔ, kɛ he blɔ nɛ wa ná kaa wa maa fiɛɛ ngɛ wehi a mi, magbɛ nɔ, kɛ be nɛ wa be fiɛɛmi tso mi. (Mat. 28:19, 20; Níts. 5:42; 17:17; 20:20) Mawu nitsɛ e Womi ɔ tsɔɔ asafo mi nikɔtɔmahi kaa e sa nɛ a ha asafo ɔ he nɛ tsɔ. (1 Kor. 5:1-5, 13; 1 Tim. 5:19-21) Nɛ Yehowa tsɔɔ kaa e sa kaa nihi tsuo nɛ a ngɛ e blɔ nya tomi ɔ mi ɔ a he nɛ tsɔ ngɛ he lo kɛ mumi mi.—2 Kor. 7:1.

9. Mɛnɔmɛ a nɔ Yesu guɔ kɛ yeɔ bua wɔ konɛ waa nu Mawu Munyu ɔ sisi?

⁹ Eko ɔ, ni komɛ ma susu kaa mɛ nitsɛmɛ a ma nyɛ maa nu nɔ́ nɛ Baiblo ɔ tsɔɔ ɔ sisi. Se Yesu hla “tsɔlɔ anɔkualetsɛ” ɔ kaa lɛ pɛ nɛ e maa gu e nɔ kɛ ye bua Mawu we bi konɛ a nu Baiblo ɔ sisi. Kɛ je jeha 1919 ɔ mi kɛ ma a, Yesu Kristo nɛ a wo e hɛ mi nyami ɔ kɛ tsɔlɔ nɛ ɔ ngɛ ní tsue, nɛ e kɛ ngɛ nihi ye buae konɛ a nu Mawu nitsɛ e Womi ɔ sisi, nɛ a kɛ blɔ tsɔɔmihi nɛ ngɛ mi ɔ nɛ tsu ní. Ke waa kɛ fami nɛ ngɛ Baiblo ɔ mi ɔ tsu ní ɔ, lɔ ɔ maa ye bua konɛ asafo ɔ he nɛ tsɔ, nɛ tue mi jɔmi kɛ kake peemi nɛ hi wa kpɛti. E sa nɛ wa ti nɔ tsuaa nɔ nɛ e bi e he ke, ‘Anɛ i fĩɔ nihi nɛ Yesu guɔ a nɔ kɛ tsɔɔ e we bi ní ɔ a se lo?’

10. Kɛ Ezekiel womi ɔ tsɔɔ kaa Yehowa blɔ nya tomi ɔ fã nɛ ngɛ hiɔwe ɔ ngɛ ha kɛɛ?

¹⁰ Yehowa Munyu nɛ a ngma a ha nɛ wa le bɔ nɛ e blɔ nya tomi ɔ fã nɛ ngɛ hiɔwe ɔ hu ngɛ ha. Kaa nɔ hyɛmi nɔ́ ɔ, gbalɔ Ezekiel na tlɔɔke ko ngɛ nina mi nɛ daa si kɛ ha Mawu blɔ nya tomi ɔ fã nɛ ngɛ hiɔwe ɔ. (Eze. 1:4-28) Yehowa lɛ ngɛ tlɔɔke nɛ ɔ kudɔe, nɛ he nɛ e mumi ɔ maa tsɔɔ kaa tlɔɔke ɔ nɛ ya a, lejɛ ɔ nɛ tlɔɔke ɔ yaa. E blɔ nya tomi ɔ fã nɛ ngɛ hiɔwe ɔ tsɔɔ e blɔ nya tomi ɔ fã nɛ ngɛ zugba a nɔ ɔ blɔ. Ngɛ anɔkuale mi ɔ, tlɔɔke nɛ ɔ ngɛ fo tue! Mo susu tsakemi slɔɔtohi nɛ Yehowa asafo ɔ pee ngɛ jeha nyɔngma nɛ be ɔ he nɛ o hyɛ. Mo kai kaa Yehowa lɛ ha nɛ a ngɛ tsakemi nɛ ɔmɛ pee. E be kɛe nɛ Yehowa maa gu Kristo kɛ e bɔfo klɔuklɔu ɔmɛ a nɔ kɛ kpata je yaya nɛ ɔ hɛ mi. Enɛ ɔ he ɔ, Yehowa tlɔɔke ɔ ngɛ fo tue mlamlaamla konɛ e wo Yehowa nguɔ kaa lɛ ji nɔ nɛ e sa kaa e yeɔ je ɔ nɔ, nɛ e tsɔ e biɛ klɔuklɔu ɔ hu he!

11, 12. Mɛni ji ní komɛ nɛ Yehowa asafo ɔ ngɛ pee?

¹¹ Mo susu níhi nɛ Mawu blɔ nya tomi ɔ fã nɛ ngɛ zugba a nɔ ɔ ngɛ pee ngɛ nyagbe ligbi nɛ ɔmɛ a mi ɔ he nɛ o hyɛ. Tsu mami. Nyɛmimɛ nyumuhi kɛ yihi lafahi abɔ tsu ní wawɛɛ kɛ ma Yehowa Odasefohi asafo ɔ ní tsumi yi ehe ɔ ngɛ Warwick, New York, U.S.A. Nihi akpehi abɔ ngɔ a he kɛ ha faa kɛ ngɛ ní tsue wawɛɛ, konɛ a ma Matsɛ Yemi Asahi kɛ  asafo ɔ kɔni slɔɔtohi. Ní Tsumi He Nɛ Hyɛɛ Tsu Mami Nɔ Kɛ Haa Asafo ɔ Ngɛ Je Kɛ Wɛ ɔ nɛ e kɛ blɔ tsɔɔmi haa ní tsuli nɛ ɔmɛ. Wa bua jɔ nihi fuu nɛ a ngɔ a he kɛ ha faa kɛ ngɛ ní tsumi nɛ he wa nɛ ɔ tsue ɔ a he! Matsɛ Yemi fiɛɛli nɛ a ngɛ je kɛ wɛ ɔ jeɔ a tsui mi nɛ a haa sika nɛ a ma nyɛ kɛ ye bua konɛ a nyɛ nɛ a ma asafo ɔ tsuhi ngɛ je kɛ wɛ. Akɛnɛ Yehowa we bi baa a he si nɛ a fiɔ e blɔ nya tomi ɔ se he je ɔ, e jɔɔ mɛ wawɛɛ.—Luka 21:1-4.

¹² Tsɔsemi. Mo susu sukuu slɔɔtohi nɛ Yehowa guɔ nɔ kɛ tsɔseɔ wɔ ɔ he nɛ o hyɛ. (Yes. 2:2, 3) Wa ngɛ Blɔ Gbali A Tsɔsemi Sukuu, Sukuu Kɛ Ha Matsɛ Yemi Sane Kpakpa Fiɛɛli, Gilead Sukuu, Betel Ní Tsuli A Tsɔsemi Sukuu, Kpɔ Mi Nɔ Hyɛli Kɛ A Yihi A Sukuu, Asafo Mi Nikɔtɔmahi A Sukuu, Matsɛ Yemi Sɔmɔmi Sukuu, kɛ Asafo ɔ Ní Tsumi Kɔni Ajla Toli Kɛ A Yihi A Sukuu. Hyɛ bɔ nɛ Yehowa suɔ kaa e ma tsɔse e we bi ha! Jehanɛ hu ɔ, wa ngɛ womihi ngɛ gbi lafahi abɔ a mi ngɛ wa wɛbsaiti nɛ ji jw.org ɔ nɔ nɛ yeɔ bua wɔ konɛ wa ná tsɔsemi kɛ je Baiblo ɔ mi. A ngɛ he pɔtɛɛ komɛ kɛ ha jokuɛwi kɛ wekuhi ngɛ wɛbsaiti nɛ ɔ nɔ, nɛ a ngɛ he ko nɛ a kɛ amaniɛ bɔmi fɔɔ hulɔ. Anɛ o kɛ jw.org wɛbsaiti ɔ tsuɔ ní ke o ngɛ fiɛɛmi mi, kɛ be nɛ nyɛ ngɛ weku Mawu jami pee lo?

13. Kaa Yehowa sɔmɔli anɔkualetsɛmɛ ɔ, mɛni blɔ nya ní tsumi lɛ fɔɔ si ngɛ wa nɔ?

¹³ E ji he blɔ nɛ wa ná kaa wa piɛɛ Yehowa blɔ nya tomi ɔ he! Wa le Mawu sisi tomi mlaahi kɛ níhi nɛ e ngɛ hlae nɛ waa pee, enɛ ɔ he ɔ, wa le kaa e ji wa blɔ nya ní tsumi kaa wa maa pee nɔ́ nɛ da kɛ tsɔɔ kaa lɛ nɛ e sa kaa e ye je mluku ɔ nɔ. Benɛ je ngɛ jɔe nɛ je ngɛ nae ɔ, ní yayahi ngɛ nɔ yae wawɛɛ ngɛ je ɔ mi. Enɛ ɔ he ɔ, e sa nɛ waa kase Yehowa konɛ waa “hie yayami.” (La 97:10) Wa pee we wa ní kaa nihi nɛ sɔmɔ we Mawu nɛ a ‘tsɛɔ yayami ke kpakpa, nɛ a tsɛɔ kpakpa ke yayami’ ɔ. (Yes. 5:20) Akɛnɛ wa suɔ kaa Mawu bua nɛ jɔ wa he he je ɔ, wa bɔɔ mɔde kaa wa he ma tsɔ ngɛ he lo kɛ mumi mi, nɛ wa je mi bami hu he nɛ tsɔ. (1 Kor. 6:9-11) Wa suɔ Yehowa nɛ waa kɛ wa hɛ fɔɔ e nɔ. Waa kɛ sisi tomi mlaahi nɛ ngɛ lɛ nitsɛ e Womi nɛ he jua wa a mi ɔ tsuɔ ní kɛ tsɔɔ kaa wa fĩ e se. Nɛ wa bɔɔ mɔde kaa waa kɛ jamɛ a sisi tomi mlaa amɛ ma tsu ní ngɛ wa wehi a mi, asafo ɔ mi, wa ní tsumi hehi kɛ sukuuhi a mi. (Abɛ 15:3) Nyɛ ha nɛ wa hla blɔ kpahi a nɔ nɛ wa ma nyɛ maa gu kɛ tsɔɔ kaa wa fĩ Mawu se.

14. Mɛni fɔli nɛ a ji Kristofohi ɔ maa pee kɛ tsɔɔ kaa a yeɔ Mawu anɔkuale?

¹⁴ Bimɛ a tsɔsemi. Ke fɔli nɛ a ji Kristofohi ngɔ Yehowa Munyu ɔ kɛ tsɔse a bimɛ ɔ, lɔ ɔ tsɔɔ kaa a fĩɔ Yehowa se. Ke fɔli nɛ a yeɔ Mawu gbeye ngɛ a bimɛ tsɔsee ɔ, a ha we nɛ je ɔ mumi ɔ nɛ tsɔɔ mɛ nɔ́ nɛ e sa kaa a pee. (Efe. 2:2) Bitsɛ ko nɛ a baptisi lɛ kaa Kristofo no ɔ be dee ke, ‘Ngɛ ye ma mi lɛɛ, yihi nɛ a tsɔseɔ bimɛ.’ Baiblo ɔ tsɔɔ munyu nɛ ɔ mi heii kaa, ‘Tsɛmɛ, nyɛ tsɔse nyɛ bimɛ ɔmɛ, nɛ nyɛɛ wo mɛ ga kpakpa nɛ maa sa Yehowa hɛ mi.’ (Efe. 6:4) Fɔli nɛ a yeɔ Mawu gbeye ɔ suɔ kaa a bimɛ nɛ a pee a ní kaa Samuel, ejakaa benɛ e ngɛ wae ɔ, Yehowa kɛ lɛ ngɛ.—1 Sam. 3:19.

15. Ke wa maa mwɔ wa yi kpɔ ngɛ nɔ́ ko nɛ he hia he ɔ, mɛni wa ma nyɛ maa pee kɛ tsɔɔ kaa wa fĩ Yehowa se?

¹⁵ Yi mi kpɔ mwɔmi. Blɔ kake nɛ wa ma nyɛ maa gu nɔ kɛ tsɔɔ kaa wa fĩ Mawu se ji kaa, ke wa maa mwɔ wa yi mi kpɔ ngɛ nɔ́ ko nɛ he hia wawɛɛ he ɔ, wa ma hla ga womi kɛ je e ngɔ. Ga womi nɛ ngɛ e Munyu ɔ mi, kɛ nɔ́ nɛ e we asafo ɔ kɛ haa wɔ ɔ ma nyɛ maa ye bua wɔ. Kaa nɔ hyɛmi nɔ́ ɔ, mo susu si fɔfɔɛ ko nɛ hɛdɔ ngɛ he nɛ fɔli fuu kɛ kpeɔ ɔ he nɛ o hyɛ. Ngɛ ni komɛ a blɔ fami ɔ, ke a ya je ma se ɔ, a kɛ bimwɔwi nɛ a fɔ ɔ ya haa a weku li nɛ a hyɛ a nɔ ha mɛ, konɛ fɔli ɔmɛ nɛ a nyɛ  nɛ a tsu ní nɛ a ná sika fuu ngɛ ma ehe nɛ a ya je mi ɔ mi. Niinɛ, enɛ ɔ ji nɔ́ ko nɛ e sa kaa nɔ nitsɛ nɛ e mwɔ e yi mi kpɔ ngɛ he, se e sa nɛ wa kai kaa nɔ tsuaa nɔ maa bu yi mi kpɔ nɛ e mwɔɔ ɔ he akɔtaa ha Mawu. (Kane Roma Bi 14:12.) Anɛ juɛmi ngɛ mi kaa wa maa mwɔ wa yi mi kpɔ ngɛ níhi nɛ kɔɔ wa weku ɔ, aloo ní tsumi he nɛ wa be blɔ tsɔɔmi hlae kɛ je Baiblo ɔ mi lo? Juɛmi be mi kulaa kaa wa maa pee jã! E sa nɛ wa ha nɛ wa hiɔwe Tsɛ ɔ nɛ tsɔɔ wɔ blɔ, ejakaa wa be nyɛe maa pee nɔ́ ko ngɛ wɔ nitsɛmɛ wa he wami nya.—Yer. 10:23.

16. Benɛ yo ko fɔ e binyumu ɔ, mɛni ji nɔ́ ko nɛ e he ba hia kaa e mwɔ e yi mi kpɔ ngɛ he, nɛ mɛni ye bua lɛ nɛ e pee juɛmi nɛ da a?

¹⁶ Yo ko nɛ e fɔ binyumuyo benɛ e ngɛ ma se ɔ mwɔ e yi mi kpɔ kaa e kɛ e bi ɔ ma ya ha e fɔli nɛ a ngɛ e ma a mi ɔ konɛ a hyɛ e nɔ. Jamɛ a be ɔ, Yehowa Odasefo no ko kɛ yo ɔ bɔni Baiblo ɔ kasemi. E ya e hɛ mi mlamlaamla ngɛ ní kasemi ɔ mi, nɛ e na kaa e ji blɔ nya ní tsumi nɛ Mawu kɛ ha lɛ kaa e ma tsɔse e bi ɔ konɛ e sɔmɔ Yehowa. (La 127:3; Abɛ 22:6) Yo nɛ ɔ je e tsui mi tsuo kɛ sɔle ha Yehowa kaa bɔ nɛ Ngmami ɔ tsɔɔ wɔ kaa waa pee ɔ. (La 62:7, 8) E je e tsui mi nɛ e kɛ nɔ nɛ e kɛ lɛ kaseɔ Baiblo ɔ susu sane ɔ he, nɛ e kɛ ni komɛ nɛ a ngɛ asafo ɔ mi ɔ hu susu he. E ngɛ mi kaa e weku li kɛ e huɛmɛ nyɛ e nɔ kaa e ngɔ e bi ɔ kɛ ya ha e fɔli ɔmɛ mohu lɛɛ, se e mwɔ e yi mi kpɔ kaa e be jã pee, ejakaa e dɛ blɔ kaa e maa pee jã. E huno ɔ bua jɔ bɔ nɛ asafo ɔ ye bua e yo ɔ kɛ e bi ɔ ha a he, enɛ ɔ he ɔ, e kplɛɛ kaa a kɛ lɛ nɛ kase Baiblo ɔ, nɛ e kɛ e yo ɔ kɛ e bi ɔ bɔni asafo mi kpehi yami. Anɛ o susu kaa yo nɛ ɔ nɛ kaa Yehowa bu e kue fami ɔ tue lo? Atsinyɛ jemi ko be he kaa yo ɔ na lɛ jã.

17. Mɛni blɔ tsɔɔmi a kɛ ha wɔ ngɛ wa Baiblo kaseli a he?

¹⁷ Blɔ tsɔɔmi nɛ wa kɛ ma tsu ní. Blɔ kpa nɛ wa ma nyɛ maa gu nɔ kɛ tsɔɔ kaa wa fĩ Mawu se ji kaa waa kɛ blɔ tsɔɔmi nɛ e we asafo ɔ kɛ haa wɔ ɔ ma tsu ní. Kaa nɔ hyɛmi nɔ́ ɔ, mo susu ga womi nɛ a kɛ ha wɔ kɛ kɔ wa Baiblo kaseli a he ɔ he nɛ o hyɛ. A tsɔɔ kaa e maa hi wawɛɛ kaa ke waa kɛ nɔ ko je womi nɛ ji Mɛni Tutuutu Ji Baiblo ɔ Tsɔɔmi? ɔ kasemi sisi pɛ ɔ, e sa nɛ wa he be bɔɔ nɛ waa kɛ mɛ nɛ susu bɔ nɛ a to asafo ɔ he blɔ nya ha a he. Wa ma nyɛ maa ngɔ video nɛ ji Mɛni A Peeɔ Ngɛ Matsɛ Yemi Asahi A Nɔ? kɛ womiyo nɛ ji Mɛnɔmɛ Nɛ A Ngɛ Yehowa Suɔmi Nya Ní Pee Mwɔnɛ ɔ? ɔ kɛ ye bua mɛ. A kɛ blɔ tsɔɔmi ha kaa ke waa kɛ Baiblo kaselɔ ko nɛ e ngɛ e hɛmi yae gbe Baiblo Tsɔɔmi womi ɔ kasemi nya a, e sa nɛ waa kɛ lɛ nɛ kase womi nɛ ji “Nyɛɛ To Nyɛ He Ngɛ Mawu Suɔmi ɔ Mi” ɔ, ke a baptisi nɔ ɔ po. Yehowa asafo ɔ ngɔ blɔ tsɔɔmi nɛ ɔ kɛ ha wɔ konɛ waa ye bua kaseli ehehi nɛ a “hemi kɛ yemi ɔ mi nɛ wa.” (Kol. 2:7) Anɛ o kɛ blɔ tsɔɔmi nɛ ɔmɛ nɛ Yehowa asafo ɔ kɛ ha wɔ ɔ ngɛ ní tsue lo?

18, 19. Mɛni he je nɛ e sa kaa waa na Yehowa si?

¹⁸ E sa nɛ waa na Yehowa si ejakaa e pee níhi fuu ha wɔ! Mawu lɛ ha nɛ wa ngɛ wami mi, nɛ ke pi lɛ ɔ, jinɛ wa be nyɛe maa pee nɔ́ ko. (Níts. 17:27, 28) Mawu ha wɔ nike ní ko nɛ se be, lɛ nitsɛ e womi nɛ ji Baiblo ɔ. Waa kɛ bua jɔmi kplɛɛɔ sɛ gbi nɛ ngɛ Baiblo ɔ mi ɔ nɔ kaa e ji Mawu munyu kaa bɔ nɛ Tesalonika bi ɔmɛ pee ɔ.—1 Tes. 2:13.

¹⁹ Mawu Munyu ɔ ye bua wɔ nɛ wa hɛ wɔ kɛ su Yehowa he, nɛ lɛ hu e hɛ lɛ kɛ su wa he. (Yak. 4:8) Wa bua jɔ kaa wa hiɔwe Tsɛ ɔ ha nɛ wa ba piɛɛ e blɔ nya tomi ɔ he. Enɛ ɔ ji he blɔ kɛ jɔɔmi nɛ se be, nɛ wa bua jɔ he wawɛɛ! La polɔ ɔ hu bua jɔ he blɔ nɛ ɔ he, enɛ ɔ he ɔ e de ke: ‘Nyɛɛ na Yehowa si; ejakaa Yehowa hi, nɛ e suɔmi ɔ ngɛ kɛ yaa neneene!’ (La 136:1) Munyu nɛ ji “e suɔmi ɔ ngɛ kɛ yaa neneene” ɔ je kpo si 26 ngɛ La 136 a mi. Ke wa fĩ Yehowa kɛ e blɔ nya tomi ɔ se ɔ, wa maa na kaa munyu nɛ ɔ ji anɔkuale, ejakaa wa maa hi si kɛ ya neneene!