A fɔ mi ngɛ jeha 1983 ɔ mi. Benɛ i ngɛ wae ɔ, i ngɛ nɔmlɔ tso mi he wami kpakpa, se benɛ i ye jeha nyɔngma a, ye he mi tsuo bɔni mi yemi wawɛɛ. Maa pee jeha enyɔ se ɔ, i te si mɔtu ko nɛ i yɔse kaa i nyɛ we nɛ ma nyɛɛ. I bɔ mɔde kaa ma hia ye nane, se i nyɛ we. Kɛ je jamɛ a ligbi ɔ kɛ ma a, i nyɛɛ we hu. Hiɔ nɛ ngɛ ye nya gbae ɔ ha nɛ i nyɛ we nɛ ma wa hu. Nɛ loloolo po ɔ, i ngɛ kaa jokuɛyo.

Benɛ hiɔ ɔ ha nɛ i tlɔ we mi ɔ, Yehowa Odasefohi enyɔ komɛ ba slaa mi nyɔhiɔ bɔɔ komɛ a se. Jinɛ ke nibwɔhi ba we ɔ mi ɔ, i laa ye he, se jamɛ a ligbi ɔ lɛɛ, i ngmɛ blɔ nɛ Odasefo ɔmɛ kɛ mi tu munyu. Benɛ a kɛ mi ngɛ Paradeiso he munyu tue ɔ, i kai munyu ko nɛ i nu benɛ i ye jeha enuɔ ɔ. Benɛ i ye jeha enuɔ ɔ, ma se sane kpakpa fiɛɛlɔ ko nɛ a tsɛɛ lɛ ke Jethro nɛ e ngɛ Suriname ɔ baa wa kɔpe ɔ mi si kake ngɛ nyɔhiɔ ɔ mi nɛ e kɛ ye papaa ba kaseɔ Baiblo ɔ. Ye bua jɔ bɔ nɛ Jethro kɛ mi hi si ha a he, enɛ ɔ he ɔ, i suɔ e sane wawɛɛ. Jehanɛ hu ɔ, ye nɛnɛ kɛ ye maa kɛ mi yaa asafo mi kpehi nɛ a peeɔ ngɛ wa kɔpe ɔ mi ɔ. Enɛ ɔ he ɔ, benɛ Odasefo ɔmɛ nɛ a ba slaa mi ɔ a kpɛti nɔ kake nɛ a tsɛɛ lɛ ke Florence ɔ bi mi ke ji kaa ma suɔ nɛ ma kase níhi fuu ɔ, i de lɛ ke ee.

Pee se ɔ, Florence kɛ e huno Justus ba nɛ a kɛ mi ba bɔni Baiblo ɔ kasemi. Benɛ a yɔse kaa i li ní kanemi ɔ, a ye bua mi. Be bɔɔ se ɔ, i bɔni ní kanemi ngɛ ye dɛ he. Ligbi ko ɔ, Florence kɛ e huno ɔ de mi kaa asafo ɔ tsɔ mɛ kaa a ya fiɛɛ ngɛ Suriname. E dɔ mi wawɛɛ, ejakaa nɔ ko be Orealla nɛ e kɛ mi ma tsa ní kasemi ɔ nɔ. Se bua jɔmi sane ji kaa Yehowa hɛ ji ye nɔ.

E kɛ we nɛ blɔ gbalɔ ko nɛ a tsɛɛ lɛ ke Floyd ɔ ba Orealla. Be ko benɛ e ngɛ fiɛɛe ngɛ wehi a mi ɔ, e kɛ mi ba kpe. Benɛ e kɛ mi ngɛ Baiblo kasemi he munyu tue ɔ, i muɔ hɛlii. Lɔ ɔ he ɔ, e bi mi ke, “Mɛni he je nɛ o ngɛ muɔe hɛlii ɔ?” I ha nɛ e le kaa a kɛ mi kase womiyo nɛ ji Mini Mawu Ngɛ Hlae ngɛ Wa Dɛ? ɔ ta, nɛ waa kɛ womi nɛ ji Knowledge That Leads to Everlasting Life * ɔ ngɛ nɔ tsae. I tsɔɔ lɛ nɔ́ he je nɛ ní kasemi ɔ yɛ nɔ hu. Floyd kɛ mi tsa Knowledge womi ɔ nɔ nɛ wa gbe nya, se lɔ ɔ se ɔ, a ha nɛ e ya sɔmɔ ngɛ he kpa. Si kake ekohu ɔ, i be Baiblo tsɔɔlɔ.

 Se ngɛ jeha 2004 ɔ mi ɔ, asafo ɔ ha nɛ Granville kɛ Joshua nɛ a ji blɔ gbali klɛdɛɛ ɔ ba sɔmɔ ngɛ Orealla. A kɛ mi kpe benɛ a ngɛ fiɛɛe ngɛ wehi a mi ɔ. Benɛ a bi mi ke ji kaa ma suɔ nɛ ma kase Baiblo ɔ, i muɔ hɛlii. I de mɛ kaa a kɛ mi nɛ kase Knowledge womi ɔ ekohu. I ngɛ hlae nɛ ma le kaa nɔ́ nɛ a maa tsɔɔ mi ɔ maa je ekpa ngɛ ye tsɔɔli enyɔ ɔmɛ a nɔ́ ɔ he lo. Granville ha nɛ i le kaa a peeɔ asafo mi kpe ngɛ kɔpe ɔ mi. E ngɛ mi kaa maa pee jeha nyɔngma ji nɛ ɔ nɛ i hiɛ ye nane kɛ je ye we ɔ mi mohu lɛɛ, se i suɔ nɛ ma ya kpe ɔ. Enɛ ɔ he ɔ, benɛ e su asafo mi kpe be ɔ, Granville ba ngɔ mi kɛ hi wheelchair mi, nɛ e tsɛ̃ mi kɛ ya Matsɛ Yemi Asa a nɔ.

Be komɛ a se ɔ, Granville wo mi he wami kaa ma ngɔ ye he kɛ wo Teokrase Sɔmɔmi Sukuu ɔ mi. E de ke: “O be nane mohu lɛɛ, se o tuɔ munyu. O maa tu magbɛ nɔ munyu ligbi ko. E maa ba nɔ kokooko.” E munyu ɔ wo mi he wami wawɛɛ.

I kɛ Granville bɔni fiɛɛmi yami. Se blɔhi nɛ ngɛ wa kɔpe ɔ mi ɔ fuu hi, lɔ ɔ he ɔ, e yee kaa o kɛ wheelchair ɔ maa gu nɔ. Enɛ ɔ he ɔ, i de Granville kaa e kɛ mi nɛ wo wheelbarrow mi nɛ e tsɛ̃ mi kɛ ya fiɛɛmi ɔ. Enɛ ɔ ye bua mi wawɛɛ. I ha nɛ a baptisi mi ngɛ April 2005 ɔ mi. Be bɔɔ se ɔ, nyɛmimɛ ɔmɛ tsɔse mi nɛ i bɔni wa womi ɔmɛ kɛ klama amɛ a nɔ hyɛmi ngɛ Matsɛ Yemi Asa a nɔ.

Se aywilɛho sane ji kaa ngɛ jeha 2007 ɔ mi ɔ, oslaa ko ná ye papaa ngɛ lɛ mi nɛ e gbo. Ye weku ɔ ye aywilɛho wawɛɛ. Se Granville kɛ wɔ pee kake kɛ sɔle nɛ e kɛ Baiblo mi munyuhi wo wa bua. Jeha enyɔ se ɔ, waa kɛ haomi kpa ko hu kpe. Oslaa ko ná Granville hu ngɛ lɛ mi nɛ e nɔ pa mi nɛ e gbo.

Asafo mi nɔkɔtɔma ko be wa asafo ɔ mi hu, nɛ asafo mi sɔmɔlɔ kake pɛ nɛ wa ngɛ. Granville gbenɔ ɔ dɔ mi wawɛɛ, ejakaa ye huɛ nɛ i suɔ e sane ji lɛ. E yeɔ bua mi konɛ ma hɛ kɛ su Yehowa he wawɛɛ, nɛ e haa mi ye hiami níhi hulɔ. Ngɛ e gbenɔ se ɔ, asafo ɔ ha mi he blɔ kaa ma kane Hwɔɔmi Mɔ ɔ mi ngɛ Hwɔɔmi Mɔ ɔ Mi Ni Kasemi ɔ sisi. Benɛ i kane kuku kake kɛ enyɔ ɔ pɛ kɛkɛ nɛ i bɔni ya fomi. I nyɛ we ma kpa ya a fomi, lɔ ɔ he ɔ, i je kpoku ɔ nɔ.

Se ye bua bɔni jɔmi benɛ nyɛmimɛ nyumu komɛ je asafo kpa mi kɛ ba ye bua wɔ ngɛ Orealla a. Jehanɛ hu ɔ, asafo ɔ ní tsumi kɔni ɔ tsɔ Kojo nɛ e ji blɔ gbalɔ klɛdɛɛ ɔ kɛ ba. Ye bua jɔ kaa ye yayo kɛ ye nyɛminyumu wayoo ɔ hu ha nɛ a kɛ mɛ kase Baiblo ɔ nɛ a ha nɛ a baptisi mɛ. Nɛ ngɛ March 2015 ɔ mi ɔ, a hla mi kaa asafo mi sɔmɔlɔ. Be bɔɔ se ɔ, i tu ye kekleekle magbɛ nɔ munyu. Jamɛ a ligbi ɔ, i muɔ hɛlii nɛ i fo ya benɛ i kai nɔ́ nɛ Granville de mi ɔ. E de ke: “O maa tu magbɛ nɔ munyu ligbi ko. E maa ba nɔ kokooko.”

JW Brɔɔdkastin ɔ ha nɛ i na kaa nyɛmimɛ komɛ ngɛ nɛ mɛ hu a si fɔfɔɛ ɔ ngɛ kaa ye nɔ́ ɔ. Se ngɛ lɔ ɔ tsuo se ɔ, a nyɛɔ nɛ a suu otihi nɛ a kɛ ma a hɛ mi ɔ fuu a he, nɛ a bua jɔɔ. Ní komɛ ngɛ nɛ imi hu ma nyɛ ma pee. I suɔ nɛ ma pee bɔ nɛ ma nyɛ ngɛ Yehowa sɔmɔmi mi, enɛ ɔ he ɔ, i ba pee daa blɔ gbalɔ. Nɛ ngɛ September 2019 ɔ mi ɔ, i nu adafi fiami ko nɛ ye hɛ be nɔ! Jamɛ a nyɔhiɔ ɔ mi ɔ, a fia adafi kaa a hla mi nɛ ma sɔmɔ kaa asafo mi nɔkɔtɔma. Fiɛɛli 40 nɛ a ngɛ wa we asafo ɔ mi.

I naa nyɛmimɛ nyumuhi kɛ yihi tsuo nɛ a kɛ mi kase ní nɛ a ye bua mi konɛ ma sɔmɔ Yehowa a si wawɛɛ nitsɛ. Nɛ nɔ́ nɛ pe kulaa a, i naa Yehowa si kaa e hɛ ji ye nɔ.