1-2. (a) Mɛni he je nɛ e sa nɛ nihi nɛ a sɛ gba si himi mi kɛ we ɔ nɛ a ngɔ a hɛ kɛ fɔ Yehowa nɔ ɔ? (La 37:3, 4) (b) Mɛni he wa ma susu ngɛ ní kasemi nɛ ɔ mi?

ANƐ e be kɛe nɛ o maa sɛ gba si himi mi, loo o sɛ gba si himi mi kɛ we lo? Ke jã a, lɛɛ atsinyɛ jemi ko be he kaa o ngɛ blɔ hyɛe kaa o kɛ nɔ nɛ o suɔ lɛ wawɛɛ ɔ ma ná bua jɔmi ngɛ si himi mi. Ngɛ anɔkuale mi ɔ, gba si himi ngɛ lɛ nitsɛ e nyagbahi, nɛ yi mi kpɔ komɛ ngɛ nɛ a he hia nɛ e sa nɛ nyɛɛ mwɔ ngɛ si himi mi hulɔ. Bɔ nɛ nyɛ ma tsu nyagba nɛ ɔmɛ a he ní ha kɛ yi mi kpɔhi nɛ nyɛ maa mwɔ ɔ lɛ maa tsɔɔ kaa nyɛ ma ná bua jɔmi ngɛ nyɛ gba si himi ɔ mi loo nyɛ be náe. Ke nyɛ ngɔ nyɛ hɛ kɛ fɔ Yehowa nɔ ɔ, nyɛ maa mwɔ yi mi kpɔhi nɛ da, nyɛ gba si himi ɔ maa ye manye, nɛ nyɛ bua maa jɔ wawɛɛ. Ke nyɛɛ kɛ Yehowa blɔ tsɔɔmi tsu we ní ɔ, nyɛɛ kɛ nyagbahi nɛ mi wa ma nyɛ maa kpe ngɛ nyɛ gba si himi ɔ mi, nɛ nyɛ bua be jɔe.—Kane La 37:3, 4.

² E ngɛ mi kaa níhi nɛ ní kasemi nɛ ɔ tu he munyu ɔ kɔɔ nihi nɛ a sɛ gba si himi kɛ we ɔ a he mohu lɛɛ, se nyagbahi nɛ a tu a he munyu ɔ ji nyagbahi nɛ nihi tsuo nɛ a sɛ gba si himi mi ɔ kɛ ma nyɛ maa kpe. Ní kasemi nɛ ɔ tsɔɔ ní komɛ nɛ maa ye bua wɔ nɛ wa ma nyɛ maa kase ngɛ nyumu anɔkualetsɛmɛ komɛ nɛ Baiblo ɔ tu a he munyu ɔ a he. Baiblo ɔ tsɔɔ ní komɛ nɛ waa kɛ ma nyɛ ma tsu ní ngɛ si fɔfɔɛ slɔɔtohi a mi ngɛ wa si himi mi, nɛ gba si himi hu piɛɛ he. Jehanɛ hu ɔ, wa maa na nɔ́ nɛ wa ma nyɛ maa kase ngɛ nihi nɛ a sɛ gba si himi mi nɛ a peeɔ nɔ hyɛmi nɔ́ kpakpa ngɛ wa be nɛ ɔ mi ɔ a ngɔ.

3-4. Mɛni nyagbahi nɛ nihi nɛ a sɛ gba si himi mi kɛ we ɔ kɛ ma nyɛ maa kpe?

³ Ni komɛ ma nyɛ maa wo nihi nɛ a sɛ gba si himi mi kɛ we ɔ he wami kaa a pee a ní kaa bɔ nɛ nihi fuu peeɔ a ní mwɔnɛ ɔ. Kaa nɔ hyɛmi nɔ́ ɔ, eko ɔ, fɔli kɛ weku li maa nyɛ nihi nɛ a sɛ gba si himi mi kɛ we ɔ a nɔ kaa a je sisi nɛ a bɔni bimɛ fɔmi. Loo huɛmɛ kɛ weku li komɛ ma nyɛ maa wo mɛ he wami kaa a he we, nɛ a he níhi nɛ ngɛ fɛu kɛ wo mi.

⁴ Ke nihi nɛ a sɛ gba si himi mi kɛ we ɔ hyɛ we nɛ hi ɔ, a ma nyɛ maa mwɔ yi mi kpɔ komɛ nɛ ma ha nɛ a ye hiɔ. Nyumu ɔ kɛ yo ɔ tsuo ma tsu ní ngmlɛfiahi fuu konɛ a kɛ wo a he hiɔhi. Enɛ ɔ be hae nɛ a ná be fuu kɛ ha dɛ he ní kasemi peemi, weku Mawu jami, kɛ fiɛɛmi ní tsumi ɔ. A ma nyɛ maa po asafo mi kpehi a mi po konɛ a tsu ní be babauu kɛ wo a he hiɔhi loo nɛ a ní tsumi nɛ ko je a dɛ. Enɛ ɔ ma ha nɛ a be nyɛe ma bli a sɔmɔmi ní tsumi ɔ mi.

5. Mɛni o kase ngɛ Klaus kɛ Marisa a nɔ hyɛmi nɔ́ ɔ mi?

⁵ Nɔ hyɛmi níhi fuu tsɔɔ kaa nihi nɛ a mwɔ a yi mi kpɔ kaa a ma ná ní kokooko ɔ a bua jɔɛ. Mo susu nɔ́ nɛ Klaus kɛ Marisa nɛ a sɛ gba si himi mi ɔ kase ɔ he nɛ o hyɛ. * Benɛ a sɛ gba si himi mi pɛ ɔ, mɛ ni enyɔ ɔmɛ tsuo a ngɔ a be fuu kɛ tsu ní konɛ a si himi nɛ pee gbɔjɔɔ. Se ngɛ anɔkuale mi ɔ, a bua jɔɛ. Klaus de ke: “Wa ngɛ he lo nya níhi fuu, se waa kɛ mumi mi oti ko mɛ wa hɛ mi. Ngɛ anɔkuale mi ɔ, wa si himi ɔ mi hyi tɔ kɛ haomi sɔuu, nɛ níhi pee hwanyaa.” Eko ɔ, mo hu o yɔse kaa ke o ngɔ o juɛmi kɛ ma he lo nya níhi a hlami nɔ́ ɔ, o be bua jɔmi náe. Ke jã a, o kɔni mi ko jɔ̃. O ma nyɛ maa kase ni kpahi a nɔ hyɛmi ní kpakpahi konɛ e ye bua mo. Kekleekle ɔ, nyɛ ha nɛ waa hyɛ nɔ́ nɛ hunomɛ ma nyɛ maa kase ngɛ Matsɛ Yehoshafat nɔ hyɛmi nɔ́ ɔ mi.

6. Kɛ Matsɛ Yehoshafat kɛ ga womi nɛ ngɛ Abɛ 3:5, 6 tsu ní ha kɛɛ benɛ e kɛ nyagba ko nɛ nya wa kpe ɔ?

⁶ Hunomɛ, anɛ e suu be nɛ nyɛ nuɔ he kaa blɔ nya ní tsumihi hiɛ ngɛ nyɛ kuɛ nɔ tsɔ lo? Ke jã a, nyɛ ma nyɛ ma ná Matsɛ Yehoshafat nɔ hyɛmi nɔ́ ɔ he se. Matsɛ Yehoshafat blɔ nya ní tsumi ji kaa e maa hyɛ nɛ níhi nɛ ya nɔ saminya ha ma a mi bi ɔmɛ tsuo! Mɛni blɔ nɔ e gu kɛ tsu ní nɛ ɔmɛ tsuo a he ní? E pee nɔ́ nɛ e ma nyɛ kɛ po nihi nɛ a ngɛ e sisi ɔ a he piɛ. E fia Yuda ma a gbogbo ɔmɛ, nɛ e bua ta buli nɛ a hiɛ pe 1,160,000 a nya. (2 Kron. 17:12-19) Pee se ɔ, Yehoshafat kɛ nyagba ko nɛ nya wa kpe. Amon bi, Moab bi kɛ nyumuhi nɛ a je Seir yoku ɔmɛ a nɔ ɔ wo e kɛ e weku ɔ kɛ e ma mi bi ɔmɛ a he gbeye. (2 Kron. 20:1, 2) Mɛni Yehoshafat pee? E bi Yehowa nɛ e ye bua lɛ nɛ  e wo lɛ he wami. Enɛ ɔ kɛ ga womi nɛ nile ngɛ mi nɛ ngɛ Abɛ 3:5, 6 kɔ. (Kane.) A ngma sɔlemi nɛ Yehoshafat je he si bami mi kɛ sɔle ɔ ngɛ 2 Kronika 20:5-12 ɔ. Enɛ ɔ ha nɛ wa na bɔ nɛ e he Yehowa, nɛ ji e hiɔwe Tsɛ ɔ ye wawɛɛ ha. Mɛni blɔ nɔ Yehowa gu kɛ ha Yehoshafat sɔlemi ɔ heto?

7. Mɛni blɔ nɔ Yehowa gu kɛ ha Yehoshafat sɔlemi heto?

⁷ Yehowa gu Levi no ko nɛ a tsɛɛ lɛ ke Yahaziel ɔ nɔ kɛ de Yehoshafat ke: ‘Nyɛɛ lɛɛ nyɛɛ da nyɛ blɔ hehi ngɛ nyɛ ta a nya, nɛ nyɛɛ mlɛ; nyɛ maa na kunimi nɛ Yehowa maa ye ha nyɛ.’ (2 Kron. 20:13-17) Tsa pi jã nɛ a hwuɔ ta! Se blɔ tsɔɔmi nɛ ɔ ji adesa ko ngɔ; e je Yehowa ngɔ. Hɛ kɛ nɔ fɔmi nɛ mi wa nɛ Yehoshafat ngɛ ngɛ Yehowa mi ɔ ha nɛ e pee kaa bɔ nɛ a de lɛ ɔ pɛpɛɛpɛ. Benɛ e kɛ e ma mi bi ɔmɛ je kpo konɛ a kɛ a he nyɛli ɔmɛ ya kpe ɔ, nihi nɛ e ha nɛ a nyɛɛ ta a hɛ mi ɔ pi ta buli nɛ a he be, mohu ɔ, a ji lali nɛ a hɛɛ we ta hwumi níhi. Yehowa ha we nɛ Yehoshafat nine nɛ nyɛ si; e kpata e he nyɛli ɔmɛ a hɛ mi.—2 Kron. 20:18-23.

8. Mɛni nɛ hunomɛ ma nyɛ maa kase ngɛ Yehoshafat nɔ hyɛmi nɔ́ ɔ mi?

⁸ Hunomɛ, nyɛ hu nyɛ ma nyɛ maa kase Yehoshafat nɔ hyɛmi nɔ́ ɔ. Nyɛ blɔ nya ní tsumi ji kaa nyɛ maa hyɛ nyɛ weku ɔ nɔ, enɛ ɔ he ɔ, nyɛ bɔɔ mɔde wawɛɛ kɛ poɔ nyɛ weku ɔ he piɛ nɛ nyɛ yeɔ bua mɛ. Ke nyɛɛ kɛ nyagba ko kpe ɔ, eko ɔ, nyɛ ma susu kaa nyɛ nitsɛmɛ nyɛ ngɛ he wami nɛ nyɛɛ kɛ maa da nya. Se koo ngɔ o hɛ kɛ fɔ mo nitsɛ o nɔ, mohu ɔ, moo sɔle ha Yehowa ngɛ o dɛ he. Jehanɛ hu ɔ, o kɛ o yo ɔ nɛ bla kɛ sɔle. Hla blɔ tsɔɔmi kɛ je Yehowa ngɔ kɛ gu Baiblo ɔ kɛ asafo womihi nɛ o maa kase ɔ nɔ, nɛ́ o kɛ blɔ tsɔɔmi ɔmɛ nɛ tsu ní. Ke o da Baiblo ɔ nɔ kɛ mwɔ o yi mi kpɔ ɔ, eko ɔ, ni komɛ kɛ mo be gbi kpae, nɛ a ma de mo po kaa juɛmi be nɔ́ nɛ o ngɛ pee ɔ mi. Eko ɔ, a ma de mo kaa sika kɛ níhi nɛ sika ma nyɛ ma he ɔ lɛ maa po o weku ɔ he piɛ. Se mo kai Yehoshafat nɔ hyɛmi nɔ́ ɔ. E ngɔ e hɛ kɛ fɔ Yehowa nɔ, nɛ e kɛ e ní peepee tsɔɔ jã. Yehowa kua we nyumu anɔkualetsɛ nɛ ɔ, nɛ e be mo hu kuae. (La 37:28; Heb. 13:5) Mɛni hu nɛ nihi nɛ a sɛ gba si himi mi ɔ ma nyɛ maa pee konɛ a ná bua jɔmi?

9. Mɛni wa ma nyɛ ma de ngɛ gbalɔ Yesaya kɛ e yo ɔ a he?

⁹ Gbalɔ Yesaya kɛ e yo ɔ ngɔ Yehowa sɔmɔmi kɛ pee nɔ́ titli ngɛ a si himi mi. Yesaya ji gbalɔ, nɛ eko ɔ, e yo ɔ hu ji gbalɔyo, ejakaa Baiblo ɔ tsɛ lɛ ke “gbalɔ yo ɔ.” (Yes. 8:1-4) Yesaya kɛ e yo ɔ ngɔ a juɛmi kɛ ma Yehowa sɔmɔmi nɔ. Enɛ ɔ ji nɔ hyɛmi nɔ́ kpakpa nɛ nihi nɛ a sɛ gba si himi mi mwɔnɛ ɔ ma nyɛ maa kase!

10. Ke nihi nɛ a sɛ gba si himi mi ɔ kase Baiblo gbamihi ɔ, kɛ lɔ ɔ maa ye bua mɛ ha kɛɛ konɛ a pee nɔ́ fɛɛ nɔ́ nɛ a ma nyɛ ngɛ Yehowa sɔmɔmi mi?

¹⁰ Mwɔnɛ ɔ, nihi nɛ a sɛ gba si himi mi ɔ ma nyɛ maa ngɔ Yehowa sɔmɔmi kɛ pee oti ngɛ a si himi mi kɛ a gu a nyɛmi tsuo nɛ a kɛ ma sɔmɔ Yehowa a nɔ. A ma nyɛ maa wo hɛ kɛ nɔ fɔmi nɛ a ngɛ ngɛ Yehowa mi ɔ mi he wami ke a bla kɛ kase Baiblo gbamihi, nɛ a na bɔ nɛ gbami nɛ ɔmɛ baa mi be fɛɛ be ha a. * (Tito 1:2) A ma nyɛ ma susu nɔ́ nɛ a ma nyɛ maa pee kɛ ye bua konɛ Baiblo gbami komɛ nɛ a ba mi ɔ he. Kaa nɔ hyɛmi nɔ́ ɔ, a ma nyɛ ma susu bɔ nɛ a maa ye bua ha kɛ ha nɛ Yesu gbami nɛ kɔɔ sane kpakpa a nɛ a maa fiɛɛ kɛ kpa je ɔ mi tsuo loko nyagbe ɔ nɛ ba a he. (Mat. 24:14) Ke nihi nɛ a sɛ gba si himi mi ɔ ná nɔ mi mami kaa Baiblo gbami komɛ ngɛ mi bae ɔ, lɔ ɔ maa wo mɛ he wami konɛ a pee babauu ngɛ Yehowa sɔmɔmi mi.

11. Mɛni nɛ Akuila kɛ Priskila nyɛ nɛ a pee, nɛ mɛni he je?

¹¹ Nihewi kɛ yihewi nɛ a sɛ gba si himi mi ɔ ma nyɛ maa kase Akuila kɛ Priskila. A ji nɔ kɛ e huno. Yuda bi ji mɛ, nɛ a hi Roma. A nu sane kpakpa nɛ kɔɔ Yesu he ɔ, nɛ a bua jɔ he. Atsinyɛ jemi ko be he kaa a bua jɔ níhi nɛ a ngɛ ɔ a he. Se e kɛ we nɛ a si himi tsake benɛ Nɔ Yelɔ Klaudio fã Yuda bi tsuo kaa a je Roma a. Moo hyɛ bɔ nɛ Akuila kɛ Priskila maa nu he ha. E sa nɛ a je he nɛ a ngɛ ɔ nɛ a ya hla we kpa, nɛ a tsa bo tsu lomi ní tsumi ɔ nɔ ngɛ he kpa. Anɛ si himi nɛ mi wa nɛ ɔ ha nɛ a kɛ Matsɛ Yemi ɔ yi kekle blɔ he hu lo? Wa he ye kaa o le heto ɔ. Benɛ Akuila kɛ Priskila ya je Korinto ɔ, a kɛ asafo ɔ pee kake, nɛ a kɛ bɔfo Paulo tsu ní kɛ wo nyɛmimɛ ɔmɛ he wami. Pee se ɔ, a hia kɛ ho he ko nɛ a hia fiɛɛli fuu ngɛ ɔ ya. (Níts. 18:18-21; Rom. 16:3-5) E ngɛ mi kaa a be deka mohu lɛɛ, se a bua jɔ ngɛ a si himi mi!

12. Mɛni he je nɛ e sa nɛ nihi nɛ a sɛ gba si himi mi ɔ nɛ a ngɔ mumi mi otihi kɛ ma a hɛ mi ɔ?

¹² Nihi nɛ a sɛ gba si himi mi mwɔnɛ ɔ ma nyɛ maa kase Akuila kɛ Priskila ke a kɛ Matsɛ Yemi ɔ ye kekle blɔ he ngɛ a si himi mi. Be nɛ hi nɛ e sa kaa nihi nɛ a suɔ nɛ a sɛ gba si himi mi ɔ kɛ sɛɛ otihi nɛ a kɛ ma a hɛ mi ɔ a he ní ji be nɛ a ngɛ nyɛɛe kɛ sɛ gba si himi mi ɔ. Ke a sɛ gba si himi mi nɛ a pee kake kɛ mwɔ a yi mi kpɔ nɛ a bɔ mɔde kaa a maa su mumi mi oti komɛ a he ɔ, a maa na bɔ nɛ Yehowa mumi ɔ ma tsu ní ngɛ a si himi ha ngɛ blɔ slɔɔtohi a nɔ. (Fiɛlɔ 4:9, 12) Mo susu Russell kɛ Elizabeth a nɔ hyɛmi nɔ́ ɔ he nɛ o hyɛ. Russell de ke: “Benɛ wa ngɛ nyɛɛe kɛ sɛ gba si himi mi ɔ, wa je blɔ susu mumi mi otihi nɛ waa kɛ ma wa hɛ mi ɔ a he.” Elizabeth de ke: “Wa susu oti nɛ ɔmɛ a he bɔ nɛ pee nɛ ke e he ba hia nɛ waa mwɔ yi mi kpɔ kpahi pee se ɔ, lɔ ɔ ko tsi otihi nɛ waa kɛ ma wa hɛ mi ɔ a nya.” Russell kɛ Elizabeth ná he blɔ nɛ a ya Micronesia nɛ a ya sɔmɔ ngɛ he nɛ fiɛɛli fuu a he hia ngɛ.

13. Ngɛ La 28:7 ɔ nya a, ke wa ngɔ wa hɛ kɛ fɔ Yehowa nɔ ɔ, mɛni se wa ma ná?

¹³ Kaa bɔ nɛ Russell kɛ Elizabeth pee ɔ, nyɛmimɛ fuu nɛ a sɛ gba si himi mi ɔ hu mwɔ yi mi kpɔhi nɛ be hae nɛ ní kpahi nɛ ngɔ a be tsɔ,  bɔ nɛ pee nɛ a ná be fuu kɛ tsu fiɛɛmi ní tsumi ɔ. Ke nihi nɛ a sɛ gba si himi mi ɔ ngɔ Mawu jami mi otihi kɛ ma a hɛ mi, nɛ a bɔ mɔde nɛ a su he ɔ, e maa wo yiblii kpakpa. A maa na bɔ nɛ Yehowa maa hyɛ a nɔ ha, hɛ kɛ nɔ fɔmi nɛ a ngɛ ngɛ e mi ɔ mi maa wa, nɛ a ma ná bua jɔmi nitsɛnitsɛ.—Kane La 28:7.

14. Ngɛ mɛni blɔ nɔ nɛ bɔfo Petro kɛ e yo ɔ tsɔɔ kaa a ngɛ hɛ kɛ nɔ fɔmi ngɛ si womi nɛ ngɛ Mateo 6:25, 31-34 ɔ mi?

¹⁴ Nihi nɛ a sɛ gba si himi mi ɔ ma nyɛ maa kase bɔfo Petro kɛ e yo ɔ a nɔ hyɛmi nɔ́ ɔ. Kekleekle be nɛ bɔfo Petro kɛ Yesu kpe ɔ se maa pee nyɔhiɔ ekpa kɛ yaa jeha kake mi ɔ, e he ba hia nɛ Petro nɛ mwɔ yi mi kpɔ ko nɛ he hia. Petro yaa wo kɛ hyɛɔ e weku ɔ. Enɛ ɔ he ɔ, benɛ Yesu fɔ Petro nine kaa e ba nyɛɛ e se kɛ e be tsuo ɔ, Petro susu e weku ɔ he. (Luka 5:1-11) Petro mwɔ e yi mi kpɔ kaa e maa piɛɛ Yesu he kɛ tsu fiɛɛmi ní tsumi ɔ. Nile ngɛ yi mi kpɔ nɛ e mwɔ ɔ mi wawɛɛ! Nɛ wa ma nyɛ ma de kaa Petro yo ɔ hu fĩ e se. Baiblo ɔ tsɔɔ kaa benɛ a tle Yesu si se ɔ, Petro kɛ e yo ɔ hia blɔ be komɛ. (1 Kor. 9:5) Atsinyɛ jemi ko be he kaa nɔ hyɛmi nɔ́ kpakpa nɛ Petro yo ɔ pee ɔ ha nɛ Petro nyɛ nɛ e wo Kristofohi hunomɛ kɛ yigbayi ga. (1 Pet. 3:1-7) E ngɛ heii kaa Petro kɛ e yo ɔ ná hɛ kɛ nɔ fɔmi ngɛ Yehowa si womi nɛ ji kaa ke a kɛ Matsɛ Yemi ɔ ye kekle blɔ he ɔ, e ma ha mɛ a hiami níhi ɔ mi.—Kane Mateo 6:25, 31-34.

15. Mɛni o kase ngɛ Tiago kɛ Esther a níhi a si kpami ɔ mi?

¹⁵ Ke nyɛ sɛ gba si himi mi jeha bɔɔ komɛ ji nɛ ɔ, mɛni nyɛ ma nyɛ maa pee konɛ nyɛ ná suɔmi ɔ kaa nyɛ ma bli nyɛ sɔmɔmi ní tsumi ɔ mi? Nɔ́ kake nɛ nyɛ ma nyɛ maa pee ji kaa nyɛ maa kane nihi nɛ a sɛ gba si himi mi ɔ a níhi a si kpamihi. Kaa nɔ hyɛmi nɔ́ ɔ, o ma nyɛ maa kase munyu komɛ nɛ je kpo ngɛ wa Hwɔɔmi Mɔ ɔ mi nɛ yi ji “A Ngɔ A He Kɛ Ha Ngɛ Mɛ Nitsɛmɛ A Suɔmi Nya” a. Munyu nɛ ɔmɛ ye bua Tiago kɛ e yo Esther nɛ a je Brazil ɔ nɛ a ná suɔmi ɔ kaa a ma ya sɔmɔ ngɛ he nɛ fiɛɛli fuu a he hia ngɛ. Tiago de ke: “Benɛ wa kane nihi a níhi a si kpamihi nɛ tsɔɔ bɔ nɛ Yehowa ye bua e sɔmɔli ngɛ wa be nɛ ɔ mi ha a, e wo wɔ he wami nɛ wa ná suɔmi ɔ kaa waa kɛ Yehowa blɔ tsɔɔmi ma tsu ní, konɛ e ye bua wɔ hulɔ.” Ngɛ jeha 2014 ɔ mi ɔ, a hia kɛ ho Paraguay ya, nɛ a ngɛ sɔmɔe ngɛ he nɛ a tuɔ Portuguese ngɛ. Esther de ke: “Ngmami kake nɛ wa bua jɔ he wawɛɛ ji Efeso Bi 3:20 ɔ. Wa na kaa ngmami nɛ ɔ ba mi si abɔ ngɛ wa blɔ fa mi ngɛ wa sɔmɔmi ní tsumi ɔ mi.” Ngɛ sɛ womi nɛ Paulo ngma kɛ ya ha Efeso Bi ɔmɛ ɔ mi ɔ, Paulo wo si kaa Yehowa ma ha wɔ babauu kɛ be nɔ pe bɔ nɛ wa biɔ ɔ po. Hyɛ bɔ nɛ munyu nɛ ɔ ji anɔkuale ha!

16. Ke nihewi kɛ yihewi nɛ a sɛ gba si himi mi ɔ kɛ mumi mi oti komɛ ngɛ a hɛ mi mae ɔ, mɛnɔmɛ a ngɔ a ma nyɛ ma bi ga womi ngɛ?

¹⁶ Nihewi kɛ yihewi nɛ a sɛ gba si himi mi mwɔnɛ ɔ ma nyɛ ma ná nihi nɛ a ngɔ a hɛ kɛ fɔ Yehowa nɔ ɔ a níhi a si kpamihi a he se. A kpɛti nihi fuu ngɔ jehahi babauu kɛ tsu be tsuo sɔmɔmi ní tsumi ɔ. Ke o ngɛ otihi nɛ o kɛ maa ma o hɛ mi ngɛ Yehowa sɔmɔmi mi ɔ he susue ɔ, mo de mɛ nɛ a wo mo ga. Lɔ ɔ ji nɔ́ kpa ko nɛ o ma nyɛ maa pee kɛ tsɔɔ kaa o ngɔ o hɛ kɛ fɔ Yehowa nɔ. (Abɛ 22:17, 19) Asafo mi nikɔtɔmahi hu ma nyɛ maa ye bua nihewi kɛ yihewi nɛ a sɛ gba si himi mi ɔ konɛ a ngɔ mumi mi otihi kɛ ma a hɛ mi.

17. Mɛni nɛ ba Klaus kɛ Marisa nɔ, nɛ mɛni wa ma nyɛ maa kase ngɛ a níhi a si kpami ɔ mi?

¹⁷ Be komɛ ɔ, wa maa suɔ nɛ wa bli wa sɔmɔmi  ní tsumi ɔ mi ngɛ blɔ pɔtɛɛ ko nɔ, se Yehowa maa tsɔɔ wɔ blɔ kpa nɔ nɛ waa gu kɛ bli wa sɔmɔmi ní tsumi ɔ mi. Mo susu Klaus kɛ Marisa nɛ wa tu a he munyu ngɛ ní kasemi ɔ sisije ɔ a nɔ hyɛmi nɔ́ ɔ he nɛ o hyɛ. Benɛ a sɛ gba si himi mi jeha etɛ se ɔ, a hia kɛ je a we ɔ mi nɛ a ngɔ a he kɛ ha konɛ a ye bua kɛ ma asafo ɔ tsuhi ngɛ asafo ɔ ní tsumi kɔni nɛ ngɛ Finland ɔ. A de mɛ kaa a be hae nɛ a ye pe nyɔhiɔ ekpa ngɛ lejɛ ɔ. Sisije ɔ, a kɔni mi jɔ̃. Se pee se ɔ, a fɔ mɛ nine kaa a ba kase Arabic. Amlɔ nɛ ɔ, a bua jɔ kaa a ngɛ sɔmɔe ngɛ ma kpa nɔ ngɛ he nɛ a tuɔ Arabic ngɛ. Benɛ Marisa susu nɔ́ nɛ ya nɔ ɔ he ɔ, e de ke: “I ye gbeye kaa ma pee nɔ́ ko nɛ i pee we hyɛ nɛ́ ma ngɔ ye hɛ kɛ fɔ Yehowa nɔ kulaa. Se i na bɔ nɛ Yehowa ye bua wɔ ha ngɛ blɔ slɔɔtohi a nɔ. Wa hyɛ we blɔ po. Enɛ ɔ ha nɛ hɛ kɛ nɔ fɔmi nɛ i ngɛ ngɛ Yehowa mi ɔ mi wa wawɛɛ.” Kaa bɔ nɛ nɔ hyɛmi ní nɛ ɔmɛ tsɔɔ ɔ, o ma nyɛ ma ná nɔ mi mami kaa ke o ngɔ o hɛ kɛ fɔ Yehowa nɔ kulaa a, e maa jɔɔ mo.

18. Mɛni nɛ nihi nɛ a sɛ gba si himi mi ɔ ma nyɛ maa pee kɛ tsɔɔ kaa a ngɔɔ a hɛ kɛ fɔɔ Yehowa nɔ?

¹⁸ Gba si himi ji nike ní nɛ je Yehowa ngɔ. (Mat. 19:5, 6) E suɔ nɛ nihi nɛ a sɛ gba si himi mi ɔ a bua nɛ jɔ nike ní nɛ ɔ he. (Abɛ 5:18) Nihewi kɛ yihewi nɛ nyɛ sɛ gba si himi mi, anɛ nyɛ ngɛ nɔ́ nɛ nyɛɛ kɛ nyɛ wami maa pee ɔ he susue lo? Anɛ nyɛ ngɛ nɔ́ fɛɛ nɔ́ nɛ nyɛ ma nyɛ ɔ pee kɛ tsɔɔ kaa nyɛ bua jɔ nike ní nɛ Yehowa kɛ ha nyɛ ɔ he lo? Nyɛɛ kɛ Yehowa nɛ sɛɛ ní ngɛ sɔlemi mi. Nyɛ hla Baiblo sisi tomi mlaahi nɛ maa ye bua nyɛ ngɛ nyɛ si fɔfɔɛ ɔ mi. Nɛ nyɛɛ nyɛɛ blɔ tsɔɔmihi nɛ Yehowa kɛ ha nyɛ ɔ se. Ke nyɛ ngɔ Yehowa sɔmɔmi kɛ pee oti ngɛ nyɛ gba si himi ɔ mi ɔ, lɛɛ nyɛ ma nyɛ ma ná nɔ mi mami kaa nyɛ bua maa jɔ ngɛ si himi mi!