NÍ KASEMI 47
Ko Ha Nɛ Nɔ́ Ko Nɛ Je Mo Kɛ Je Yehowa He
‘I ngɔ ye hɛ kɛ fɔ mo, Yehowa o nɔ.’—LA 31:14.
LA 122 Nyɛ Fĩ Si, Nyɛɛ Da Si Kpɛii!
NƆ́ NƐ WA MAA KASE a
1. Kɛ wa plɛ kɛ le kaa Yehowa suɔ nɛ e hɛ kɛ su wa he ha kɛɛ?
YEHOWA de wɔ ke waa hɛ kɛ su e he. (Yak. 4:8) E suɔ nɛ e pee wa Mawu, wa Tsɛ kɛ wa Huɛ. E haa wa sɔlemi ɔmɛ a heto, nɛ e yeɔ bua wɔ ngɛ haomi behi a mi. E guɔ e we asafo ɔ nɔ kɛ tsɔɔ wɔ ní, nɛ e poɔ wa he piɛ. Se mɛni e sa nɛ waa pee konɛ wa nyɛ nɛ waa hɛ kɛ su Yehowa he?
2. Mɛni blɔ nɔ wa maa gu kɛ hɛ kɛ su Yehowa he?
2 Wa ma nyɛ maa hɛ kɛ su Yehowa he kɛ gu sɔlemi, kɛ e Munyu ɔ nɛ wa maa kane, nɛ wa ma pue wa yi mi tɛ ngɛ he ɔ nɔ. Ke wa pee jã a, wa ma ná suɔmi kɛ ha lɛ, nɛ wa bua maa jɔ níhi nɛ e peeɔ kɛ haa wɔ ɔ he. Jehanɛ hu ɔ, lɔ ɔ maa wo wɔ he wami nɛ wa maa bu lɛ tue, nɛ waa kɛ yi jemi nɛ sa ma ha lɛ. (Kpoj. 4:11) Ke wa le Yehowa saminya a, lɔ ɔ ma ha nɛ hemi kɛ yemi nɛ wa ngɛ ngɛ e mi ɔ mi maa wa, nɛ wa ma ná hɛ kɛ nɔ fɔmi ngɛ e we asafo nɛ e guɔ nɔ kɛ yeɔ bua wɔ ɔ hu mi.
3. Mɛni blɔ nɔ nɛ Abosiami bɔɔ mɔde kaa e ma je wɔ kɛ je Yehowa he, se mɛni maa ye bua wɔ konɛ wa ko kua wa Mawu ɔ kɛ e we asafo ɔ kɔkɔɔkɔ? (La 31:13, 14)
3 Abosiami suɔ nɛ e je wɔ kɛ je Yehowa he, titli ɔ, be mi nɛ waa kɛ kahi ngɛ kpee. Mɛni blɔ nɔ e guɔ kɛ peeɔ jã? E bɔɔ mɔde kaa e ma ha nɛ hemi kɛ yemi nɛ wa ngɛ ngɛ Yehowa kɛ e we asafo ɔ mi ɔ mi nɛ gbɔjɔ bɔɔbɔɔbɔɔ. Se wa ma nyɛ maa hwu kɛ si e ga tsɔmi ɔmɛ. Ke wa hemi kɛ yemi ɔ mi wa, nɛ hɛ kɛ nɔ fɔmi nɛ wa ngɛ ngɛ Yehowa mi ɔ hu mi wa a, wa be wa Mawu ɔ kɛ e we asafo ɔ kuae.—Kane La 31:13, 14.
4. Mɛni he wa ma susu ngɛ ní kasemi nɛ ɔ mi?
4 Ngɛ ní kasemi nɛ ɔ mi ɔ, wa ma susu kahi etɛ nɛ waa kɛ ma nyɛ maa kpe ɔ he. Ka nɛ ɔmɛ ji wa nyɛmimɛ Kristofohi a ngɔ loo Yehowa asafo ɔ mi. Ka nɛ ɔmɛ eko fɛɛ eko ma nyɛ ma ha nɛ hemi kɛ yemi nɛ wa ngɛ ngɛ Yehowa kɛ e we asafo ɔ mi ɔ mi nɛ gbɔjɔ. Mɛni blɔ nɔ nɛ ka nɛ ɔmɛ ma nyɛ ma je wɔ kɛ je Yehowa he? Mɛni wa ma nyɛ maa pee konɛ waa hwu kɛ si Satan nɛ e nine nɛ nyɛ si.
KE WAA KƐ HAOMI NGƐ KPEE
5. Ngɛ mɛni blɔ nɔ nɛ ke waa kɛ haomi ngɛ kpee ɔ, e ma nyɛ ma ha nɛ hemi kɛ yemi nɛ wa ngɛ ngɛ Yehowa kɛ e we asafo ɔ mi ɔ mi nɛ gbɔjɔ?
5 Be komɛ ɔ, wa weku li teɔ si kɛ woɔ wɔ, aloo wa ní tsumi puɛɔ. Mɛni blɔ nɔ nɛ kahi kaa jã a ma nyɛ ma ha nɛ hɛ kɛ nɔ fɔmi nɛ wa ngɛ ngɛ Yehowa asafo ɔ mi ɔ mi nɛ gbɔjɔ, nɛ́ e je wɔ kɛ je Yehowa he? Ke waa kɛ nyagbahi ngɛ kpee be kɛkɛɛ ɔ, wa kɔni mi ma nyɛ ma jɔ̃. Ngɛ behi kaa jã mi ɔ, Satan haa nɛ wa susuɔ kaa Yehowa sume wɔ. Abosiami suɔ nɛ wa susu kaa Yehowa kɛ e we asafo ɔ lɛ ha nɛ wa ngɛ nɔ́ nae ɔ nɛ. Nɔ́ ko kaa jã ba Israel bi ɔmɛ a kpɛti ni komɛ a nɔ benɛ a ngɛ Egipt ɔ. Sisije ɔ, a he ye kaa Yehowa lɛ hla Mose kɛ Aaron konɛ a ba kpɔ̃ mɛ kɛ je nyɔguɛ tso mi. (2 Mose 4:29-31) Se pee se nɛ Farao ha nɛ si himi ɔ mi wa ha mɛ ɔ, a pia Mose kɛ Aaron kaa mɛ lɛ a ha nɛ a ngɛ nɔ́ nae. A de mɛ ke: “Nyɛ ha wa he je fu wo Farao kɛ e tsɔli ɔmɛ, nɛ nyɛ ngɔ klaate ngɔ wo a dɛ mi nɛ́ a kɛ gbe wɔ.” (2 Mose 5:19-21) A pia Mawu sɔmɔli nɛ ɔmɛ nɛ a yeɔ anɔkuale ɔ. Nɔ́ nɛ ɔ ngɛ dɔmi wawɛɛ! Ke o kɛ haomi ngɛ kpee be kɛkɛɛ ɔ, mɛni o maa pee konɛ hemi kɛ yemi nɛ o ngɛ ngɛ Yehowa kɛ e we asafo ɔ mi ɔ mi nɛ wa?
6. Mɛni wa ma nyɛ maa kase ngɛ gbalɔ Habakuk he kɛ kɔ bɔ nɛ wa ma fĩ si ha ngɛ kahi a mi ɔ he? (Habakuk 3:17-19)
6 Moo sɔle nɛ o de Yehowa níhi tsuo nɛ ngɛ o tsui mi, nɛ o ngɔ o hɛ kɛ fɔ e nɔ kɛ ha yemi kɛ buami. Gbalɔ Habakuk kɛ haomihi fuu kpe. Be ko ɔ, e yi mi pee lɛ enyɔɔnyɔ, nɛ e susu kaa Yehowa susuu we e he. Lɔ ɔ he ɔ, e sɔle nɛ e de Yehowa bɔ nɛ e ngɛ he nue ha. E de ke: ‘Yehowa lee, kɛ yaa su mɛni be ma fa kue kɛ tsɛ mo loko o maa bu mi tue. Kɛ pee kɛɛ nɛ o ngɛ nɔ́ nɛ dɛ nɛ ɔ hyɛe, nɛ o pui mi ɔ?’ (Hab. 1:2, 3) Yehowa ha sɔlemi nɛ e sɔmɔlɔ anɔkualetsɛ nɛ ɔ sɔle kɛ je e tsui mi ɔ heto. (Hab. 2:2, 3) Benɛ Habakuk susu bɔ nɛ Yehowa he e we bi a yi wami ha a he wawɛɛ ɔ, e ná bua jɔmi ekohu. E ná nɔ mi mami kaa Yehowa susuɔ e he, nɛ e maa ye bua lɛ kɛ da ka saisaa nɛ e kɛ maa kpe ɔ nya. (Kane Habakuk 3:17-19.) Mɛni wa kaseɔ ngɛ mi? Ke o kɛ si fɔfɔɛhi nɛ a mi wa ngɛ kpee ɔ, moo sɔle kɛ ha Yehowa nɛ o de lɛ bɔ nɛ o ngɛ he nue ha. Lɔ ɔ se ɔ, ngɔɔ o hɛ kɛ fɔ e nɔ kaa e maa ye bua mo. Ke o pee jã a, o ma nyɛ ma ná nɔ mi mami kaa Yehowa ma ha mo he wami nɛ o hia a, nɛ́ o kɛ da nya. Ke o na kaa e ngɛ mo ye buae ɔ, hemi kɛ yemi nɛ o ngɛ ngɛ e mi ɔ mi maa wa.
7. Mɛni nɛ Shirley weku li ɔmɛ ka kaa a maa pee, nɛ mɛni ha nɛ hemi kɛ yemi nɛ e ngɛ ngɛ Yehowa mi ɔ mi gbɔjɔɔ we ɔ?
7 Yaa nɔ nɛ o pee níhi nɛ haa nɛ huɛ bɔmi gbagbanii hii o kɛ Yehowa nyɛ kpɛti ɔ. Nyɛmiyo ko nɛ a tsɛɛ lɛ ke Shirley nɛ e ngɛ Papua New Guinea ɔ pee jã be mi nɛ e kɛ haomihi ngɛ kpee ɔ, nɛ e ná he se. b Shirley weku ɔ be nɔ́ ko, nɛ be komɛ ɔ, e he waa ha mɛ kaa a ma ná niye ní. E weku no ko bɔ mɔde kaa e ma ha nɛ hemi kɛ yemi nɛ e ngɛ ngɛ Yehowa mi ɔ mi nɛ gbɔjɔ. E de lɛ ke: “Nyɛ deɔ ke Mawu mumi klɔuklɔu ɔ yeɔ bua nyɛ, se jije yemi kɛ buami ɔ ngɛ? Loloolo ɔ, weku ɔ ngɛ ohia yee, nɛ o ngɛ o be puɛe kɛ ngɛ fiɛɛe.” Shirley de ke: “I bi ye he ke: ‘Anɛ Mawu susuɔ wa he niinɛ lo?’ Amlɔ nɔuu nɛ i sɔle ha Yehowa nɛ i de lɛ nɔ́ fɛɛ nɔ́ nɛ ngɛ mi haoe. I ya nɔ nɛ i kane Baiblo ɔ kɛ asafo ɔ womi ɔmɛ, nɛ i yaa fiɛɛmi kɛ asafo mi kpehi hulɔ. Shirley ba yɔse kaa Yehowa ngɛ e kɛ e weku ɔ nɔ hyɛe. Hwɔ yi mɛ, nɛ a ngɛ bua jɔmi. Shirley de ke: “I nu he kaa Yehowa ha ye sɔlemi ɔ heto.” (1 Tim. 6:6-8) Ke o ya nɔ nɛ o pee níhi nɛ haa nɛ huɛ bɔmi gbagbanii hii o kɛ Yehowa nyɛ kpɛti ɔ, o yi mi be mo enyɔɔnyɔ pee, nɛ o be hae nɛ haomihi nɛ o kɛ ngɛ kpee ɔ nɛ je mo kɛ je Yehowa he.
KE A NGƐ NYUMUHI NƐ A NYƐƐƆ ASAFO Ɔ HƐ MI Ɔ YI MI WAE
8. Mɛni si fɔfɔɛ nɛ nyɛmimɛ nyumuhi nɛ a nyɛɛɔ asafo ɔ hɛ mi ɔ kɛ ma nyɛ maa kpe?
8 Wa he nyɛli guɔ tiivi, radio, adafi fiami womihi kɛ huɛ bɔmi hehi nɛ ngɛ Intanɛti ɔ nɔ ɔ a nɔ kɛ gbɛɔ nyɛmimɛ nyumuhi nɛ a ngɛ Yehowa asafo ɔ hɛ mi nyɛɛe ɔ a he lakpa munyuhi kɛ fĩaa. (La 31:13) A nuu nyɛmimɛ nyumuhi komɛ, nɛ a po a nya kaa a ji ojo fiali. Kristofohi nɛ a hi si ngɛ kaseli ɔmɛ a be ɔ mi ɔ hu kɛ si himi ko kaa jã kpe. Kaa nɔ hyɛmi nɔ́ ɔ, a po bɔfo Paulo nya, nɛ a wo lɛ tsu. Kɛ a pee a ní ha kɛɛ?
9. Benɛ a wo bɔfo Paulo tsu ɔ, kɛ Kristofohi komɛ pee a ní ha kɛɛ?
9 Kristofohi komɛ nɛ a hi si ngɛ kaseli ɔmɛ a be ɔ mi ɔ je bɔfo Paulo se benɛ a wo lɛ tsu ngɛ Roma a. (2 Tim. 1:8, 15) Mɛni he je? Anɛ e ngɛ mɛ zo pee kaa nihi bu Paulo kaa ojo fialɔ lo? (2 Tim. 2:8, 9) Aloo a ngɛ gbeye yee kaa mɛ hu a maa wa mɛ yi mi lo? Wa li nɔ́ he je nɛ a pee jã mohu lɛɛ, se mo susu bɔ nɛ Paulo kɔni mi ma jɔ̃ ha a he nɛ o hyɛ. E kɛ haomihi fuu kpe, nɛ e ngɔ e wami kɛ wo oslaa mi ngɛ a he je po. (Níts. 20:18-21; 2 Kor. 1:8) E sɛ nɛ waa pee wa ní kaa nihi nɛ a yi bua Paulo be mi nɛ e hia yemi kɛ buami ɔ kɔkɔɔkɔ! Mɛni nɛ e sa nɛ e hi wa juɛmi mi ke a ngɛ nyɛmimɛ nɛ a nyɛɛɔ asafo ɔ hɛ mi ɔ yi mi wae?
10. Mɛni nɛ e sa nɛ e hi wa juɛmi mi ke a ngɛ nyɛmimɛ nɛ a nyɛɛ asafo ɔ hɛ mi ɔ yi mi wae, nɛ mɛni he je?
10 Mo kai nɔ́ he je nɛ a waa wɔ yi mi, kɛ nɔ nɛ haa nɛ a peeɔ wɔ jã. Timoteo Womi Nɛ Ji Enyɔ yi 3:12 ɔ de ke: “Nihi tsuo nɛ a suɔ wawɛɛ kaa a maa hi si ngɛ Mawu gbeye yemi nya ngɛ Kristo Yesu mi ɔ, mɛ hu a maa wa mɛ yi mi.” Enɛ ɔ he ɔ, e sɛ nɛ e pee wɔ nyakpɛ kaa Satan je e hɛ kɛ pi nyɛmimɛ nyumuhi nɛ a ngɛ asafo ɔ hɛ mi nyɛɛe ɔ. E suɔ nɛ nyɛmimɛ nyumu nɛ ɔmɛ nɛ a kpa Yehowa anɔkuale yemi, nɛ e suɔ nɛ e wo a he gbeye hulɔ.—1 Pet. 5:8.
E ngɛ mi kaa a wo Paulo tsu mohu lɛɛ, se Onesiforo fĩ e se kɛ kã. Mwɔnɛ ɔ hu ɔ, wa nyɛmimɛ nyumuhi kɛ yihi fĩɔ nyɛmimɛ nɛ a wo mɛ tsu ɔ a se kaa bɔ nɛ foni ɔ tsɔɔ ɔ (Hyɛ kuku 11-12)
11. Mɛni wa ma nyɛ maa kase ngɛ Onesiforo nɔ hyɛmi nɔ́ ɔ mi? (2 Timoteo 1:16-18)
11 Yaa nɔ nɛ o ye bua o nyɛmimɛ ɔmɛ, nɛ o kɛ anɔkuale yemi nɛ fĩ a se. (Kane 2 Timoteo 1:16-18.) Kristofo no ko hi si ngɛ kaseli ɔmɛ a be ɔ mi nɛ a tsɛɛ lɛ ke Onesiforo. Benɛ a wo Paulo tsu ɔ, e pee we e ní kaa bɔ nɛ Kristofohi kpa amɛ pee a ní ɔ. “Tsu kɛ kɔsɔkɔsɔhi nɛ a wo [Paulo ɔ] he zo pee we lɛ.” Mohu ɔ, Onesiforo ya hla Paulo, nɛ benɛ e na lɛ ɔ, e bɔ mɔde nɛ e ye bua lɛ nɛ e tsu níhi nɛ e hia a he ní kɛ ha lɛ. Onesiforo ngɔ e wami kɛ wo oslaa mi ngɛ jã peemi mi. Mɛni wa ma nyɛ maa kase ngɛ mi? E sɛ nɛ wa ha nɛ adesa hɛ mi gbeye yemi nɛ tsi wa nya ngɛ yemi kɛ buami nɛ e sa nɛ wa kɛ ha wa nyɛmimɛ nɛ a ngɛ mɛ yi mi wae ɔ he. Mohu ɔ, nyɛ ha nɛ wa fã a he nɛ waa ye bua mɛ. (Abɛ 17:17) E sa nɛ waa suɔ wa nyɛmimɛ nɛ ɔmɛ, a hia wa yemi kɛ buami.
12. Mɛni wa ma nyɛ maa kase ngɛ wa nyɛmimɛ nɛ a ngɛ Russia a he?
12 Mo susu bɔ nɛ wa nyɛmimɛ nɛ a ngɛ Russia a yeɔ bua a nyɛmimɛ nɛ a wo mɛ tsu ɔ he nɛ o hyɛ. Ke a ngɔ a ti ni komɛ kɛ ho kojomi he ya a, wa nyɛmimɛ nyumuhi kɛ yihi fuu yaa lejɛ ɔ nɛ a ya fĩɔ a se. Mɛni wa ma nyɛ maa kase ngɛ mi? Ke a po wa nyɛmimɛ ɔmɛ a nya, a wo mɛ tsu, loo a ngɛ mɛ yi mi wae ɔ, koo ye gbeye. Moo sɔle ha mɛ nɛ o hyɛ a weku mi bimɛ ɔmɛ a nɔ, nɛ o ye bua mɛ ngɛ blɔ kpahi hu a nɔ.—Níts. 12:5; 2 Kor. 1:10, 11.
KE A NGƐ WA HE FƐU YEE
13. Mɛni blɔ nɔ nɛ ke nihi ye wa he fɛu ɔ, e ma nyɛ ma ha nɛ hemi kɛ yemi nɛ wa ngɛ ngɛ Yehowa kɛ e we asafo ɔ mi ɔ mi ma gbɔjɔ?
13 Wa weku li nɛ a be asafo ɔ mi, nihi nɛ waa kɛ mɛ tsuɔ ní, loo nihi nɛ waa kɛ mɛ yaa sukuu ma nyɛ maa ye wa he fɛu ngɛ wa fiɛɛmi ní tsumi ɔ he, loo akɛnɛ wa yeɔ Yehowa mlaa amɛ a nɔ ɔ he je. (1 Pet. 4:4) Eko ɔ, a ma de ke: “I suɔ o sane, se nyɛ jami ɔ ngɛ kpɛii tsɔ, nɛ níhi nɛ nyɛ peeɔ ɔ be be.” Ni komɛ hu ma nyɛ maa tu munyu kɛ si wɔ ngɛ bɔ nɛ ke a fiee nɔ ko ngɛ asafo ɔ mi ɔ waa kɛ lɛ yeɔ ha a he, nɛ a ma de ke: “Enɛ ɔ nɛ nyɛ deɔ ke nyɛ suɔ nyɛ sibi ɔ?” Ke nihi tu munyu ko kaa jã a, eko ɔ, wa yi mi maa pee wɔ enyɔɔnyɔ nɛ wa ma bi ke: ‘Anɛ Yehowa ngɛ blɔ hyɛe kaa ma pee babauu pe bɔ nɛ i ngɛ pee ɔ lo? Anɛ Yehowa asafo ɔ ngɛ kpɛii tsɔ lo?’ Ke o kɛ si fɔfɔɛ kaa jã ngɛ kpee ɔ, mɛni o ma nyɛ maa pee konɛ o hɛ kɛ su Yehowa kɛ e we asafo ɔ he?
Nihi nɛ a pee a ní kaa a huɛ ji Hiob ɔ ye e he fɛu nɛ a tu lakpa munyuhi kɛ si lɛ, se e he we jamɛ a munyu ɔmɛ yi. Mohu ɔ, e fia e pɛɛ si kaa e maa ya nɔ maa ye Yehowa anɔkuale (Hyɛ kuku 14)
14. Ke nihi ye wa he fɛu ngɛ Yehowa mlaahi nɛ waa kɛ tsuɔ ní ɔ he ɔ, kɛ e sa nɛ waa pee wa ní ha kɛɛ? (La 119:50-52)
14 Moo fia o pɛɛ si kaa o maa ye Yehowa mlaa amɛ a nɔ. E ngɛ mi kaa nihi ye Hiob he fɛu mohu lɛɛ, se e ye Yehowa mlaa amɛ a nɔ. Nihi nɛ a pee a ní kaa a ji Hiob huɛmɛ ɔ a kpɛti nɔ kake bɔ mɔde kaa e ma ha nɛ Hiob nɛ nu he kaa Mawu susuu we e he, ke e pee nɔ́ nɛ da jio, e pee we nɔ́ nɛ da jio. (Hiob 4:17, 18; 22:3) Se Hiob he we jamɛ a lakpa munyu ɔmɛ yi. E le kaa mlaahi nɛ Yehowa wo kɛ kɔ nɔ́ nɛ da kɛ nɔ́ nɛ dɛ he ɔ hi, nɛ e mwɔ e yi mi kpɔ kaa e maa ye nɔ. E ha we nɛ ni kpahi a ní peepee nɛ ha nɛ e ngmɛɛ e we anɔkuale yemi ɔ he. (Hiob 27:5, 6) Mɛni wa ma nyɛ maa kase ngɛ mi? Ke nihi ye wa he fɛu ɔ, e sɛ nɛ lɔ ɔ nɛ ha nɛ wa yi mi nɛ pee wɔ enyɔɔnyɔ ngɛ Yehowa mlaa amɛ a he. Mo susu níhi nɛ ya nɔ ngɛ mo nitsɛ o si himi mi ɔ he nɛ o hyɛ. E ngɛ heii kaa o na si abɔ kaa ke o pee nɔ́ nɛ Yehowa tsɔɔ kaa e da a, o náa he se. Moo fia o pɛɛ si kaa o ma fĩ asafo nɛ e kɛ Yehowa mlaa amɛ tsuɔ ní ɔ se. Ke o pee jã nɛ nihi te si kɛ wo mo po ɔ, o be Yehowa he jee gblegbleegble.—Kane La 119:50-52.
15. Mɛni he je nɛ a ye Brizit he fɛu ɔ?
15 Mo susu nyɛmiyo ko nɛ a tsɛɛ lɛ ke Brizit nɛ e ngɛ India a níhi a si kpami ɔ he nɛ o hyɛ. E weku li ye e he fɛu ngɛ e hemi kɛ yemi ɔ he je. A baptisi lɛ ngɛ jeha 1997 ɔ mi, se e huno ɔ lɛɛ e sɔmɔ we Yehowa. Be bɔɔ se ɔ, e huno ɔ ní tsumi ba puɛ. Lɔ ɔ he ɔ, e huno ɔ ma e juɛmi nya si kaa e kɛ Brizit kɛ a biyi ɔmɛ ma ya hi lɛ nyumu ɔ e fɔli a ngɔ ngɛ ma kpa nɔ. Enɛ ɔ tsuo se ɔ, Brizit kɛ nyagbahi nɛ a mi wa pe nɔ́ nɛ e kɛ ngɛ kpee ɔ kpe. Akɛnɛ e huno ɔ ní tsumi puɛ he je ɔ, e sa nɛ e ngɔ e be tsuo kɛ tsu ní kɛ ye bua kɛ hyɛ weku ɔ nɔ. Jehanɛ hu ɔ, asafo nɛ e kɛ he nɛ e ngɛ ɔ kɛ we ɔ mi kɛmi maa pee kaa si tomi 220. Aywilɛho sane ji kaa e huno ɔ weku li te si kɛ wo lɛ ngɛ e hemi kɛ yemi ɔ he je. Si temi kɛ womi ɔ nya wa hluu kaa e he ba hia nɛ Brizit kɛ weku ɔ nɛ a kpale nɛ a hia kɛ ya hi he kpa. Tlukaa a, e huno ɔ ba gbo. Pee se ɔ, a biyi ɔmɛ a kpɛti nɔ kake nɛ kansa nu lɛ ɔ hu gbo benɛ e ye jeha 12. Nɔ́ nɛ pa hí pe kulaa ji, Brizit weku li ɔmɛ pia lɛ kaa lɛ nɛ e ha nɛ jamɛ a ní ɔmɛ tsuo ba weku ɔ nɔ. A de lɛ ke akɛnɛ e pee Yehowa Odasefo no ɔ he je nɛ jamɛ a haomi ɔmɛ ba a nɔ ɔ nɛ. Se loloolo ɔ, e ya nɔ nɛ e ngɔ e hɛ kɛ fɔ Yehowa nɔ, nɛ e kɛ Yehowa asafo ɔ bɔ gbagbanii.
16. Mɛni blɔ nɔ Yehowa jɔɔ Brizit akɛnɛ e mɛtɛ Yehowa kɛ e we asafo ɔ he ɔ he je?
16 Akɛnɛ he nɛ Brizit jeɔ kɛ yaa asafo mi kpe kɛ he nɛ e ngɛ ɔ kɛ he je ɔ, kpɔ mi nɔ hyɛlɔ ko wo lɛ he wami kaa e fiɛɛ ngɛ e kpɔ ɔ mi, nɛ e pee asafo mi kpe ngɛ e we ɔ mi. Sisije ɔ, e peemi he wa ha lɛ. Se e kɛ blɔ tsɔɔmi ɔ tsu ní. E fiɛɛ sane kpakpa a kɛ tsɔɔ nihi, nɛ e pee asafo mi kpe ngɛ e we ɔ mi, nɛ e to be nɛ e kɛ e biyi ɔmɛ peeɔ weku Mawu jami. Mɛni je mi kɛ ba? Brizit nyɛ nɛ e kɛ nihi fuu je Baiblo mi ní kasemi sisi, nɛ a baptisi a kpɛti nihi fuu. Ngɛ jeha 2005 ɔ mi ɔ, e ba pee daa blɔ gbalɔ. Yehowa jɔɔ lɛ akɛnɛ e ngɛ hemi kɛ yemi ngɛ Yehowa mi, nɛ e ye e we asafo ɔ anɔkuale ɔ he je. E biyi ɔmɛ kɛ anɔkuale yemi ngɛ Yehowa sɔmɔe, nɛ amlɔ nɛ ɔ, asafo enyɔ ngɛ e kpɔ ɔ mi. Brizit ná nɔ mi mami kaa Yehowa ha lɛ he wami nɛ e nyɛ nɛ e da haomihi nɛ e kɛ kpe ɔ nya. E weku ɔ ye e he fɛu mohu lɛɛ, se e nyɛ nɛ e da nya.
YAA NƆ NƐ O YE YEHOWA KƐ E WE ASAFO Ɔ ANƆKUALE
17. Mɛni e sa nɛ waa fia wa pɛɛ si kaa wa maa pee?
17 Satan suɔ nɛ wa susu kaa Yehowa ma kua wɔ ngɛ behi nɛ a mi wa mi, nɛ ke wa ya nɔ nɛ wa hi Yehowa asafo ɔ mi ɔ, níhi a mi maa wa ha wɔ wawɛɛ. E suɔ hu nɛ waa ye gbeye ke a po nyɛmimɛ nyumuhi nɛ a nyɛɛɔ asafo ɔ hɛ mi ɔ a nya, loo a ngɛ mɛ yi mi wae loo a wo mɛ tsu. Nɛ e haa nɛ nihi yeɔ wa he fɛu konɛ wa susu kaa Yehowa mlaa amɛ a he hia we, nɛ́ hemi kɛ yemi nɛ wa ngɛ ngɛ e we asafo ɔ mi ɔ mi nɛ gbɔjɔ. Se wa le e ga tsɔmi ɔmɛ, nɛ wa be blɔ ngmɛe nɛ e sisi wɔ. (2 Kor. 2:11) Moo fia o pɛɛ si kaa o kɛ Satan lakpa munyu ɔmɛ be ní tsue, nɛ o maa ya nɔ maa ye Yehowa kɛ e we asafo ɔ anɔkuale. Mo kai kaa Yehowa be mo kuae kɔkɔɔkɔ. (La 28:7) Enɛ ɔ he ɔ, ko ha nɛ nɔ́ ko nɔ́ ko nɛ je mo kɛ je Yehowa he!—Rom. 8:35-39.
18. Mɛni he wa ma susu ngɛ ní kasemi nɛ nyɛɛ se ɔ mi?
18 Wa susu haomihi nɛ waa kɛ ma nyɛ maa kpe ɔ he ngɛ ní kasemi nɛ ɔ mi. Haomi nɛ ɔmɛ ji wa nyɛmimɛ Kristofohi a ngɔ loo Yehowa asafo ɔ mi. Se waa kɛ kahi ma nyɛ maa kpe ngɛ asafo ɔ mi hulɔ nɛ ma nyɛ ma ha nɛ hemi kɛ yemi nɛ wa ngɛ ngɛ Yehowa kɛ e we asafo ɔ mi ɔ mi ma gbɔjɔ. Mɛni wa maa pee konɛ wa nyɛ nɛ waa da kahi kaa jã a, a nya? Wa ma susu enɛ ɔ he ngɛ ní kasemi nɛ nyɛɛ se ɔ mi.
LA 118 “Ha Wɔ Hemi Kɛ Yemi Fuu”
a Loko wa ma nyɛ ma fĩ si nɛ waa hɛɛ wa we anɔkuale yemi ɔ mi ngɛ nyagbe ligbi nɛ ɔmɛ a mi ɔ, e sa nɛ wa ná hemi kɛ yemi ngɛ Yehowa kɛ e we asafo ɔ mi. Abosiami ngɔɔ kahi kɛ baa wa nɔ konɛ e kɛ puɛ jamɛ a hemi kɛ yemi ɔ. Ngɛ ní kasemi nɛ ɔ mi ɔ, wa ma susu kahi etɛ nɛ Satan kɛ baa wa nɔ ɔ he, kɛ nɔ́ nɛ wa maa pee konɛ waa ya nɔ nɛ waa ye Yehowa kɛ e we asafo ɔ anɔkuale.
b A tsake biɛ ɔmɛ ekomɛ.