1, 2. (a) Ngɛ mɛni blɔ nɔ nɛ e slo níhi nɛ anɔkuale Kristofohi ngɛ blɔ hyɛe ɔ ngɛ níhi nɛ nihi nɛ a ngɛ Satan je ɔ mi ngɛ blɔ hyɛe ɔ he? (b) Mɛni sane bimihi nɛ a he hia he wa ma susu?

KRISTOFOHI ngɛ hɛ nɔ kami kpakpa ko! Wa piɛɛ nihi nɛ a pɔ mɛ nu ɔ a he jio, wa piɛɛ “to kpa” amɛ a he jio, wɔ tsuo wa ngɛ blɔ hyɛe kaa Mawu yi mi tomi ɔ maa ba mi, nɛ a tsɔ Yehowa biɛ ɔ he. (Yoh. 10:16; Mat. 6:9, 10) Enɛ ɔmɛ ji ní kpakpahi nɛ wa ngɛ blɔ hyɛe. Wa ngɛ blɔ hyɛe hu kaa be maa su nɛ wa nine maa su “hiɔwe he” aloo “zugba he” nɛ Mawu wo he si ɔ nɔ kɛ ya neneene. (2 Pet. 3:13) Se loko jamɛ a be ɔ maa su ɔ, wa ngɛ hɛ nɔ kami kaa Mawu maa ya nɔ maa tsɔɔ e we bi blɔ, nɛ e maa ye bua mɛ.

² Nihi nɛ a piɛɛ Satan je ɔ he ɔ hu ngɛ hɛ nɔ kami ko. Se a be nɔ mi mami kaa a hɛ nɔ kami ɔ maa ba mi. Kaa nɔ hyɛmi nɔ́ ɔ, nihi ayɔhi abɔ nɛ a bua jɔ asɔ fiɛmi he ɔ ngɛ hɛ kɛ nɔ fɔmi kaa a maa ye loto, se a be nyɛe ma ná nɔ mi mami kaa a maa ye loo a be yee. Se ngɛ Kristofohi a blɔ fa mi ɔ, hemi kɛ yemi nitsɛnitsɛ ji “níhi nɛ wa ngɛ blɔ hyɛe ɔ a nɔ mi mami.” (Heb. 11:1) Se eko ɔ, o ma bi o he ke, mɛni ma nyɛ ma ha nɛ o ná nɔ mi mami kaa níhi nɛ o ngɛ blɔ hyɛe ɔ maa ba mi? Ke wa ngɛ hemi kɛ yemi nɛ mi wa ngɛ níhi nɛ wa ngɛ blɔ hyɛe ɔ mi ɔ, kɛ wa ma ná he se ha kɛɛ?

3. Mɛni lɛ ha nɛ Kristofohi ngɛ hemi kɛ yemi ɔ?

 ³ A kɛ hemi kɛ yemi fɔ we nɔ. Ke Kristofo no ko ma ná hemi kɛ yemi ɔ, ja e ha Mawu mumi klɔuklɔu ɔ ta e tsui he nɛ e tsɔɔ lɛ blɔ. (Gal. 5:22) Baiblo ɔ tsɔɔ we kaa Yehowa ngɛ hemi kɛ yemi aloo e hia hemi kɛ yemi. Akɛnɛ Yehowa ji Ope nɛ e ngɛ nile pe nɔ tsuaa nɔ he je ɔ, nɔ́ ko be nyɛe maa tsi e yi mi tomi ɔ nya. Wa hiɔwe Tsɛ ɔ ngɛ nɔ mi mami kaa si nɛ e wo kaa e maa jɔɔ wɔ ɔ maa ba mi, enɛ ɔ he ɔ, e de ke: “A gbe nya!” (Kane Kpojemi 21:3-6.) Kristofohi le kaa Yehowa ji ‘Mawu nɛ yeɔ anɔkuale,’ nɛ e yeɔ e si womi tsuo nɔ. Enɛ ɔ he je nɛ wa ngɛ hemi kɛ yemi ngɛ e mi ɔ nɛ.​—5 Mose 7:9.

4. Mɛni hɛ nɔ kami nɛ nyumuhi kɛ yihi anɔkualetsɛmɛ nɛ a hi si blema a ngɛ?

⁴ Hebri Bi ɔmɛ a womi ɔ yi 11 ɔ wo nyumuhi kɛ yihi 16 nɛ a ngɛ hemi kɛ yemi ɔ a biɛ ta. Nɔ nɛ ngma womi nɛ ɔ tsɔɔ kaa a “he Mawu ye, nɛ a ngɛ odase kpakpa nɛ ɔ yee ngɛ a he!” (Heb. 11:39) Nimli nɛ ɔmɛ tsuo ngɛ “nɔ mi mami” kaa Mawu ma ha nɛ “nina” nɛ a wo e he si ɔ ma ba kpata Satan kɛ Mawu he nyɛli tsuo a hɛ mi, nɛ e ma ha nɛ Yehowa yi mi tomi ɔ maa ba mi. (1 Mose 3:15) Anɔkualetsɛmɛ nɛ ɔmɛ be hɛ nɔ kami kaa a maa ya hiɔwe, ejakaa a gbo loko “nina” nɛ ji Yesu Kristo ɔ ba bli blɔ kaa nihi ma nyɛ maa ya hiɔwe. (Gal. 3:16) Se akɛnɛ Yehowa yeɔ e si womi nɔ he je ɔ, e ma tle mɛ si kɛ ba wami mi ekohu kaa adesahi nɛ a ye mluku, konɛ a ba hi zugba a nɔ ngɛ paradeiso mi.​—La 37:11; Yes. 26:19; Hos. 13:14.

5, 6. Mɛni Abraham kɛ e weku ɔ hyɛ blɔ kaa a nine maa su nɔ, nɛ mɛni ye bua mɛ nɛ a hɛɛ a hemi kɛ yemi ɔ mi wawɛɛ ɔ? (Moo hyɛ foni nɛ ngɛ ní kasemi ɔ sisije ɔ.)

⁵ Hebri Bi 11:13 ɔ tu ni komɛ nɛ a hi si loko Kristo asafo ɔ je sisi ɔ a he munyu ke: “Nimli nɛ ɔmɛ tsuo nɛ he Mawu ye ɔ, nɔ́ nɛ a wo mɛ he si ɔ, a nine sui nɔ loko a gbo. A na ní ɔmɛ ngɛ lokoo kɛkɛ nɛ a nya he.” Nimli nɛ ɔmɛ a kpɛti nɔ kake ji Abraham. Anɛ Abraham hyɛ blɔ kaa “nina” nɛ a wo e he si ɔ maa ba, konɛ si himi ɔ nɛ pee bua jɔmi lo? Yesu ha munyu nɛ ɔ heto. E de ke: “Nyɛ tsɛ Abraham hla nɛ e na ye bami be ɔ kɛ bua jɔmi. E na hulɔ, nɛ e nya.” (Yoh. 8:56) Jã kɛ̃ nɛ Sara, Isak, Yakob, kɛ ni kpahi hu hyɛ Matsɛ Yemi nɛ ji “ma nɛ Mawu nitsɛ to sisi, nɛ lɛ nɔuu e fia” nɛ maa ba hwɔɔ se ɔ blɔ.​—Heb. 11:8-11.

⁶ Mɛni ha Abraham kɛ e weku ɔ a hemi kɛ yemi ɔ mi wa a? Eko ɔ, a kase Mawu he ní ngɛ anɔkualetsɛmɛ nɛ a wa ngɛ jeha mi ɔ a ngɔ. Mawu gu e bɔfohi, ninahi kɛ nlamihi a nɔ nɛ e kɛ ni komɛ hu tu munyu, nɛ a kase ní komɛ hu ngɛ blema womihi a mi. Nɔ́ nɛ pe kulaa a, a hɛ ji Mawu si womihi nɛ a ngɛ bua jɔmi, kɛ níhi nɛ e ngɛ hlae ngɛ a dɛ nɛ a kase ɔ nɔ, nɛ a pue a yi mi tɛ ngɛ he hulɔ. Akɛnɛ nyumuhi kɛ yi nɛ ɔmɛ ngɛ nɔ mi mami kaa nɔ́ nɛ a ngɛ blɔ hyɛe ɔ maa ba mi kokooko he je ɔ, a ma a juɛmi nya si kaa a ma fĩ Mawu se daa, ke ji a maa na nɔ́ po.

7. Mɛni Yehowa ha wɔ konɛ wa ná hemi kɛ yemi nɛ mi wa, nɛ kɛ e sa kaa waa ngɔ ní nɛ ɔmɛ kɛ tsu ní ha kɛɛ?

⁷ Yehowa ha wɔ e Munyu nɛ ji Baiblo ɔ, konɛ e ye bua wɔ nɛ wa hemi kɛ yemi ɔ mi nɛ wa. Ke e maa hi ɔ, e sa nɛ waa kane Mawu Munyu ɔ daa, konɛ e “gbaa” wɔ nɛ waa ye “manye.” (La 1:1-3; kane Bɔfo Ɔmɛ A Ní Tsumi 17:11.) Lɔ ɔ se ɔ, kaa bɔ nɛ Yehowa sɔmɔli nɛ a hi si blema a pee ɔ, e sa nɛ waa ya nɔ nɛ wa pue wa yi mi tɛ ngɛ Mawu si womi ɔmɛ a he, nɛ waa pee níhi nɛ e de wɔ ke waa pee ɔ. Yehowa guɔ “tsɔlɔ anɔkualetsɛ kɛ ní lelɔ” ɔ nɔ kɛ haa wɔ mumi mi niye ní fuu. (Mat. 24:45) Enɛ ɔ he ɔ, ke wa bua  jɔ níhi nɛ Yehowa kɛ dloo wɔ ɔ he ɔ, wa maa kase anɔkualetsɛmɛ nɛ a hi si blema a, nɛ wa ma ná “nɔ mi mami” kaa Mawu Matsɛ Yemi ɔ maa ba mi niinɛ.

8. Ngɛ mɛni blɔ nɔ nɛ sɔlemi ma nyɛ maa wo wa hemi kɛ yemi mi he wami?

⁸ Sɔlemi hu ye bua Mawu sɔmɔli nɛ a hi si blema a nɛ a ná hemi kɛ yemi nɛ mi wa. Mawu ha a sɔlemi ɔmɛ a heto, nɛ enɛ ɔ ha nɛ a hemi kɛ yemi ɔ mi wa. (Neh. 1:4, 11; La 34:4, 15, 17; Dan. 9:19-21) Jã kɛ̃ nɛ mwɔnɛ ɔ, wɔ hu wa ma nyɛ ma ná nɔ mi mami kaa ke wa ngɔ wa haomi ɔmɛ kɛ fɔ Yehowa hɛ mi ɔ, e maa bu wɔ tue, nɛ e maa wo wɔ he wami konɛ waa kɛ bua jɔmi nɛ fĩ si daa. Nɛ ke Mawu bu wa sɔlemi ɔ tue ɔ, wa hemi kɛ yemi ɔ mi maa wa wawɛɛ. (Kane 1 Yohane 5:14, 15.) Hemi kɛ yemi piɛɛ mumi yiblii ɔ he, enɛ ɔ he ɔ, Yesu wo wɔ he wami kaa waa ya nɔ nɛ ‘wa bi’ konɛ Mawu nɛ ha wɔ e mumi ɔ.​—Luka 11:9, 13.

9. Mɛnɔmɛ hu nɛ e sa kaa waa sɔle ha mɛ?

⁹ Se ke wa ngɛ sɔlee ɔ, e sɛ nɛ wa bi Mawu kaa e ha wɔ wa hiami níhi aloo e ye bua wɔ kɛkɛ. Wa ma nyɛ maa na Yehowa si daa ligbi ngɛ ‘nyakpɛ ní babauu nɛ e ha wɔ’ ɔ he, ejakaa ‘a hiɛ tsɔ’! (La 40:5) Jehanɛ hu ɔ, ke wa ngɛ sɔlee ɔ, e sa nɛ wa ‘kai nihi nɛ a wo mɛ tsu ɔ kaa nɔ́ nɛ waa kɛ mɛ tsuo lɛ a wo tsu’ ɔ nɛ. E sa kaa waa sɔle kɛ ha wa nyɛmimɛ nɛ a ngɛ je kɛ wɛ, titli ɔ, ‘nihi nɛ nyɛɛ wa hɛ mi’ ɔ. Ke Yehowa bu wa sɔlemi ɔ tue, nɛ wa na blɔ nɔ nɛ e gu kɛ pee jã a, wa bua jɔɔ wawɛɛ!​—Heb. 13:3, 7.

10. Mɛni Mawu sɔmɔli komɛ pee nɛ tsɔɔ kaa a ngmɛɛ we a hemi kɛ yemi ɔ he, nɛ mɛni ye bua mɛ nɛ a nyɛ pee jã a?

¹⁰ Ngɛ Hebri Bi yi 11 ɔ, bɔfo Paulo tsɔɔ kahi nɛ Mawu sɔmɔli komɛ nɛ a wui a biɛ ta a kɛ kpe nɛ a fĩ si ngɛ mi ɔ. Kaa nɔ hyɛmi nɔ́ ɔ, bɔfo Paulo tu yihi nɛ a ngɛ hemi kɛ yemi nɛ a binyumuhi gbo, se a tle mɛ si kɛ ba wami mi ekohu ɔ a he munyu. Lɔ ɔ se ɔ, e tu ni kpa komɛ hu a he munyu. E tsɔɔ kaa a “kplɛɛ we kaa a maa ngmɛɛ a hemi kɛ yemi ɔ he nɛ a ye a he. Mohu ɔ, a suɔ nɛ a na nɔ́ kɛ gbo, konɛ a tle mɛ si kɛ ba wami nɛ hi kulaa pe kekle nɔ ɔ mi.” (Heb. 11:35) E ngɛ mi kaa wa li nihi tutuutu nɛ Paulo ngɛ a he munyu tue ɔ mohu lɛɛ, se wa le kaa a fiaa ni komɛ kaa Nabot kɛ Zakaria tɛ nɛ a gbe mɛ akɛnɛ a suɔ kaa a maa bu Mawu tue nɛ a pee e suɔmi nya ní ɔ he je. (1 Ma. 21:3, 15; 2 Kron. 24:20, 21) Daniel kɛ e nyɛmimɛ ɔmɛ hu ná he blɔ kaa a ma kua a hemi kɛ yemi ɔ konɛ a “ye a he.” Se a pee we jã, mohu ɔ, a he ye kaa Mawu maa ye bua mɛ. Ngɛ blɔ ko nɔ ɔ, a “ha nɛ jatahi ma a nya,” nɛ a “gbe la nɛ ngɛ tsoe gegeege” ɔ po.​—Heb. 11:33, 34; Dan. 3:16-18, 20, 28; 6:13, 16, 21-23.

11. Mɛni kahi nɛ gbali ɔmɛ a ti ni komɛ kɛ kpe ngɛ a hemi kɛ yemi ɔ he je?

¹¹ A ye Mikaya kɛ Yeremia a ‘he fɛu nɛ a wo mɛ tsu’ ngɛ a hemi kɛ yemi ɔ he. Ni komɛ kaa Eliya hu “wo lalaalo ngɛ nga kplanaa nɔ, kɛ yohi a nɔ. A hi tɛ puɔhi, kɛ muɔhi a mi.” Nimli nɛ ɔmɛ tsuo nyɛ nɛ a da kahi nɛ a kɛ kpe ɔ nya, ejakaa a ngɛ ‘nɔ mi mami kaa níhi nɛ a ngɛ blɔ hyɛe ɔ maa ba mi.’​—Heb. 11:1, 36-38; 1 Ma. 18:13; 22:24-27; Yer. 20:1, 2; 28:10, 11; 32:2.

12. Mɛnɔ lɛ e da ka nɛ nya wa pe kulaa a nya, nɛ mɛni ye bua lɛ nɛ e nyɛ pee jã a?

¹² Benɛ Paulo tu nyumu kɛ yi nɛ ɔmɛ a he munyu ta a, e tu wa Nyɔmtsɛ Yesu Kristo nɛ e pee nɔ hyɛmi nɔ́ nɛ pe kulaa a he munyu. Hebri Bi 12:2 ɔ tsɔɔ kaa: ‘Akɛnɛ e le bua jɔmi nɛ e ma ná pee se he je ɔ, gbenɔ nɛ e ma gbo ngɛ sɛumi tso ɔ nɔ ɔ pi zo nɔ́ ko kulaa kɛ ha lɛ. Nɛ amlɔ nɛ ɔ, e hii si ngɛ Mawu matsɛ sɛ ɔ hiɔ nɔ.’ Niinɛ, e sa nɛ wa “susu” bɔ nɛ Yesu to e tsui si kɛ na  nɔ́ wawɛɛ ɔ he saminya. (Kane Hebri Bi 12:3.) Kaa bɔ nɛ a pee Yesu ɔ, Kristofohi nɛ a hi si ngɛ kaseli ɔmɛ a be ɔ mi ɔ a kpɛti ni komɛ kaa Antipa a ngmɛɛ we a hemi kɛ yemi ɔ he, enɛ ɔ he ɔ, a gbe mɛ. (Kpoj. 2:13) A ma tle nimli nɛ ɔmɛ si kɛ ya hiɔwe. A ma tle blematsɛmɛ nɛ a ngɛ hemi kɛ yemi ɔ si kɛ ba wami nɛ “hi pe kulaa” a mi. Se nihi nɛ a ma tle mɛ si kɛ ya hiɔwe ɔ a nɔ́ ɔ maa hi pe blematsɛmɛ ɔmɛ a nɔ́ ɔ. (Heb. 11:35) Benɛ Matsɛ Yemi ɔ bɔni nɔ yemi ngɛ jeha 1914 ɔ se ɔ, a tle anɔkualetsɛmɛ nɛ a pɔ mɛ nu nɛ a gbo ɔ si kɛ ho hiɔwe ya kaa mumi mi adebɔ, nɛ a kɛ Yesu ngɛ adesahi a nɔ yee.​—Kpoj. 20:4.

13, 14. Mɛni kahi nɛ Rudolf Graichen kɛ kpe, nɛ mɛni ye bua lɛ nɛ e nyɛ nɛ e fĩ si ɔ?

¹³ Mawu sɔmɔli ayɔhi abɔ nɛ a ngɛ mwɔnɛ ɔ kaseɔ Yesu nɔ hyɛmi nɔ́ ɔ, nɛ a ngɛ nɔ mi mami kaa níhi nɛ a ngɛ blɔ hyɛe ɔ maa ba mi. Enɛ ɔ he ɔ, a ha we nɛ kahi nɛ a kɛ ngɛ kpee ɔ nɛ ha nɛ a hemi kɛ yemi ɔ mi nɛ gbɔjɔ. Kaa nɔ hyɛmi nɔ́ ɔ, mo susu Rudolf Graichen nɛ a fɔ lɛ ngɛ Germany ngɛ jeha 1925 ɔ mi ɔ he nɛ o hyɛ. E kai kaa ngɛ e jokuɛwi a si ɔ, a ngɛ foni komɛ nɛ a da Baiblo ɔ nɔ kɛ pee ngɛ a we ɔ mi. E de ke:  ‘Foni ɔ kake tsɔɔ bɔ nɛ ogbetee kɛ jijɔ, apletsi bɔbɔyoo kɛ ngatsɛ, kɛ na bi kɛ jata hii si ngɛ tue mi jɔmi mi, nɛ jokuɛ bɔbɔyoo pɛ nɛ e ngɛ mɛ hyɛe. I kaiɔ foni nɛ ɔ be tsuaa be.’ (Yes. 11:6-9) E ngɛ mi kaa Nazi Gestapo ɔ wa Rudolf yi mi wawɛɛ, nɛ pee se ɔ, Communist Stasi ɔ nɛ ngɛ Germany pu je he ɔ hu wa lɛ yi mi wawɛɛ mohu lɛɛ, se e ngmɛɛ we hemi kɛ yemi nɛ e ngɛ kaa zugba a maa pee paradeiso ɔ he.

¹⁴ Ka kpahi nɛ Rudolf kɛ kpe hu ji kaa, asla ko nɛ a tsɛɛ lɛ ke typhus ɔ gbe e yayo nɛ e suɔ e sane wawɛɛ ɔ. E yayo ɔ gbo ngɛ nya tsimi he nɛ a waa nihi a yi mi ngɛ nɛ a tsɛɛ ke Ravensbrück ɔ. Jehanɛ hu ɔ, e hɛ mi paa nɛ e papaa ngɔ e nine kɛ wo womi sisi kaa e kɛ Yehowa Odasefohi be bɔe hu. Benɛ a je Rudolf kɛ je tsu mi ɔ, e sɔmɔ kaa kpɔ mi nɔ hyɛlɔ, nɛ pee se ɔ a ha nɛ e ya Gilead Sukuu ɔ eko. E ya sɔmɔ kaa ma se sane kpakpa fiɛɛlɔ ngɛ Chile, nɛ e kpale sɔmɔ kaa kpɔmi nɔ hyɛlɔ ngɛ lejɛ ɔ. Se loloolo ɔ, Rudolf kɛ kahi kpe. Rudolf kɛ nyɛmiyo ko nɛ a tsɛɛ lɛ ke Patsy nɛ ngɛ e sɔmɔe kaa ma se sane kpakpa fiɛɛlɔ ɔ sɛ gba si himi mi. Se jeha kake se ɔ, a biyo nɛ a fɔ ɔ gbo. Lɔ ɔ se ɔ, e yo nɛ e suɔ lɛ wawɛɛ nɛ e ye jeha 43 pɛ ɔ hu gbo. Rudolf nyɛ nɛ e da ka nɛ ɔmɛ tsuo a nya. Benɛ a ngma Rudolf he sane ngɛ August 1, 1997, Hwɔɔmi Mɔ ɔ ba fa 20-25 ɔ, e bwɔ nɛ e be he wami, se kɛ̃ ɔ, e ngɛ sɔmɔe kaa daa blɔ gbalɔ kɛ asafo mi nɔkɔtɔma jamɛ a be ɔ. ^[1]

15. Mɛni nɔ hyɛmi níhi nɛ tsɔɔ kaa a ngɛ Yehowa Odasefohi nɛ a ngɛ mwɔnɛ ɔ yi mi wae mohu lɛɛ, se a ngɛ bua jɔmi?

¹⁵ E ngɛ mi kaa a ngɛ Yehowa Odasefohi yi mi wae loloolo mohu lɛɛ, se hɛ nɔ kami nɛ a ngɛ ɔ ha nɛ a ngɛ bua jɔmi. Kaa nɔ hyɛmi nɔ́ ɔ, a wo wa nyɛmimɛ fuu tsu ngɛ Eritrea, Singapore, kɛ South Korea. Ngɛ a kpɛti nihi fuu a blɔ fami ɔ, akɛnɛ a suɔ kaa a kɛ Yesu munyu nɛ tsɔɔ kaa a ko hia klaate ɔ nɛ tsu ní he je nɛ a wo mɛ tsu ɔ nɛ. (Mat. 26:52) Nimli lafahi abɔ nɛ ɔmɛ a kpɛti ni komɛ ji, Isaac, Negede, kɛ Paulos nɛ a wo mɛ tsu ngɛ Eritrea jeha 20 kɛ se ji nɛ ɔ! Nimli nɛ ɔmɛ nyɛ we nɛ a ye bua a fɔli, aloo a sɛ gba si himi mi. Se loloolo ɔ, a fĩ si ngɛ yi mi wami ɔ mi, nɛ a ngmɛɛ we a hemi kɛ yemi ɔ he. A foni nɛ ngɛ jw.org wɛbsaiti ɔ nɔ ɔ tsɔɔ kaa a ngɛ bua jɔmi. Muɔ nɛ ngɛ a nya he ɔ haa nɛ wa naa kaa a ngɛ hemi kɛ yemi nɛ mi wa. Nihi nɛ a hyɛɛ a nɔ ɔ po ngɛ bumi kɛ ha mɛ.

16. Ke o ngɛ hemi kɛ yemi nɛ mi wa a, mɛni blɔ nɔ nɛ lɔ ɔ maa ye bua mo ngɛ?

¹⁶ Yehowa we bi fuu ngɛ nɛ a kɛ yi mi wami kpi hyɛ. A kɛ ka kpahi nɛ kpee ɔ. Nihi fuu ngɛ ohia yee, nɛ tahi kɛ oslaahi hu ha nɛ ni komɛ ngɛ nɔ́ nae. Ni komɛ hu ngɔ ngɔɔmi yemi kɛ biɛ hemi kɛ sã afɔle kaa bɔ nɛ Mose kɛ blematsɛmɛ komɛ pee ɔ. A ngɛ mɔde bɔe kaa a be ní nami babauu se die. Mɛni ha nɛ a nyɛ pee jã? A suɔ Yehowa, nɛ a ngɛ hemi kɛ yemi nɛ mi wa ngɛ e si womi ɔ mi. A le kaa Mawu ma ha nɛ e sɔmɔli maa hi si kɛ ya neneene ngɛ je ehe nɛ a yeɔ dami sane ngɛ mi ɔ mi.​—Kane La 37:5, 7, 9, 29.

17. Mɛni nɛ o fia o pɛɛ si kaa o maa pee, nɛ mɛni he wa ma susu ngɛ munyu nɛ nyɛɛ se ɔ mi?

¹⁷ Ngɛ munyu nɛ ɔ mi ɔ, wa ba na kaa ke wa wa pueɔ wa yi mi tɛ ngɛ Mawu si womi ɔmɛ a he nɛ wa sɔleɔ daa a, lɔ ɔ ma ha nɛ wa hemi kɛ yemi ɔ mi maa wa. Lɔ ɔ maa ye bua wɔ nɛ wa maa da kahi a nya, nɛ waa kɛ wa hɛ maa fɔ “níhi nɛ wa ngɛ blɔ hyɛe ɔ” a nɔ. Ní kasemi nɛ nyɛɛ se ɔ maa ye bua wɔ konɛ waa le níhi fuu kɛ kɔ hemi kɛ yemi he.