1. Ngɛ mɛni blɔ nɔ 2 Korinto Bi 3:1-3 ɔ yeɔ bua wɔ nɛ wa bua jɔɔ he blɔ nɛ wa ná kaa waa kɛ nihi maa kase Baiblo ɔ konɛ a ha nɛ a baptisi mɛ ɔ he? (Hyɛ womi ɔ hɛ mi foni ɔ.)

KE O na nɛ a baptisi Baiblo kaselɔ ko ngɛ nyɛ we asafo ɔ mi ɔ, kɛ o nuɔ he ha kɛɛ? Ngɛ anɔkuale mi ɔ, o bua jɔɔ wawɛɛ. (Mat. 28:19) Nɛ ke mo nɛ o kɛ kaselɔ ehe nɛ ɔ kase Baiblo ɔ, o bua jɔɔ wawɛɛ nitsɛ ke o na nɛ a ngɛ lɛ baptisie! (1 Tɛs. 2:19, 20) Kaseli nɛ a baptisi mɛ ehe ɔ ji “yi jemi sɛ womihi” kɛ ha nɔ nɛ e kɛ lɛ kase ní ɔ kɛ asafo ɔ tsuo.​—Kane 2 Korinto Bi 3:1-3.

2. (a) Mɛni sane bimi nɛ he hia nɛ e sa nɛ wa susu he, nɛ mɛni he je? (b) Mɛni ji Baiblo mi ní kasemi? (Hyɛ sisi ningma.)

² Ngɛ jeha eywiɛ nɛ be ɔ mi ɔ, akɔtaa bumi tsɔɔ kaa daa nyɔhiɔ ɔ, waa kɛ nihi maa pee 10,000,000 lɛ kaseɔ Baiblo * ɔ ngɛ je kɛ wɛ. Enɛ ɔ ji bua jɔmi sane nitsɛ. Ngɛ jamɛ a jeha amɛ nɔuu a mi ɔ, a baptisiɔ nihi 280,000 kɛ se daa jeha kaa Yehowa Odasefohi kɛ Yesu Kristo kaseli. Mɛni wa ma nyɛ maa pee kɛ ye bua Baiblo kaseli ayɔhi abɔ nɛ ɔmɛ konɛ a ha nɛ a baptisi mɛ? Akɛnɛ Yehowa to e tsui si nɛ e ha nihi be kɛ he blɔ konɛ a ba pee Kristo kaseli he je ɔ, e sa nɛ waa bɔ mɔde wawɛɛ nɛ waa ye bua mɛ nɛ a ya a hɛ mi kɛ su baptisi he mla. Be nɛ piɛ ɔ pi kulaa!​—1 Kor. 7:29a; 1 Pet. 4:7.

3. Mɛni he wa ma susu ngɛ ní kasemi nɛ ɔ mi kɛ kɔ Baiblo mi ní kasemi nɛ waa kɛ nihi peeɔ ɔ he?

³ Akɛnɛ e he hia wawɛɛ kaa waa pee nihi kaseli amlɔ nɛ ɔ he je ɔ, blɔ tsɔɔmi ajla toli ɔmɛ bi asafo ɔ ní tsumi kɔni ajla  toli ɔmɛ nɔ́ nɛ a ma nyɛ maa pee kɛ ye bua wa Baiblo kaseli konɛ a ya a hɛ mi nɛ a baptisi mɛ. Ngɛ ní kasemi nɛ ɔ kɛ nɔ́ nɛ nyɛɛ se ɔ mi ɔ, wa maa na nɔ́ nɛ wa ma nyɛ maa kase ngɛ blɔ gbali, ma se sane kpakpa fiɛɛli, kɛ kpɔ mi nɔ hyɛli nɛ a ngɛ níhi a si kpami ɔ a nɔ hyɛmi níhi a mi. * (Abɛ 11:14; 15:22) A tsɔɔ níhi nɛ Baiblo tsɔɔli kɛ Baiblo kaseli tsuo ma nyɛ maa pee konɛ a Baiblo mi ní kasemi nɛ nu tso. Ngɛ ní kasemi nɛ ɔ mi ɔ, wa ma susu níhi enuɔ nɛ e sa nɛ Baiblo kaseli nɛ a pee konɛ a ya a hɛ mi kɛ su baptisimi he ɔ he.

4. Mɛni e sa nɛ waa le ngɛ Baiblo mi ní kasemi nɛ a peeɔ ngɛ sinya nya a he?

⁴ Nyɛmimɛ fuu kɛ nihi kaseɔ Baiblo ɔ ngɛ a sinya nya. E ngɛ mi kaa jã peemi hi, nɛ e haa nɛ nihi a bua jɔɔ Baiblo ɔ kasemi he mohu lɛɛ, se behi fuu ɔ, ní sɛɛmi nɛ ɔ ngɛ kpiti, nɛ e yɛ nɔ daa otsi. Bɔ nɛ pee nɛ ní sɛɛmi ɔ nɛ tsa nɔ ɔ, nyɛmimɛ komɛ ngmaa wetsɛ ɔ he sane kɛ fɔɔ si, a ngɔɔ a fon nɔma, nɛ a maneɔ mɛ sɛ gbi, nɛ a daa Baiblo ɔ nɔ kɛ woɔ mɛ he wami loko a kpaleɔ ya slaa mɛ. Eko ɔ, ní sɛɛmi nɛ ɔ ma tsa nɔ nyɔhiɔhi abɔ nɛ a tui Baiblo mi ní kasemi he blɔ nya po. Anɛ Baiblo kaselɔ ko maa ya e hɛ mi nɛ e jɔɔ e he nɔ kɛ ha Yehowa nɛ e ha nɛ a baptisi lɛ ke e ná we be babauu nɛ e kɛ kase Mawu Munyu ɔ lo? Dɛbi.

5. Ngɛ Luka 14:27-33 ɔ nya a, mɛni Yesu tsɔɔ kaa e ma nyɛ maa ye bua wɔ ngɛ wa kaselɔ peemi ní tsumi ɔ mi?

⁵ Yesu ngɔ nɔ́ he tomi nɔ́ ko kɛ tsu ní kɛ tsɔɔ nɔ́ nɛ e sa nɛ nɔ́ ko nɛ pee ke nɔ ɔ suɔ nɛ e ba pee e kaselɔ. E tu nɔ ko nɛ e suɔ nɛ e ma mɔ, kɛ matsɛ ko nɛ e suɔ nɛ e ya ta a he munyu. Yesu tsɔɔ kaa e sa nɛ mɔ malɔ ɔ nɛ ‘hi si kekle nɛ e bu nya’ nɛ e hyɛ kaa e ma nyɛ maa gbe nya lo. Jehanɛ hu ɔ, e sa nɛ matsɛ ɔ nɛ e ‘hi si nɛ e bi ga womi’ konɛ e hyɛ kaa e ta buli ɔmɛ ma nyɛ maa hwu ta a lo. (Kane Luka 14:27-33.) Jã nɔuu kɛ̃ nɛ Yesu le hu kaa ke nɔ ko suɔ nɛ e ba pee e kaselɔ ɔ, e he hia nɛ e susu níhi nɛ e sa nɛ e pee ɔ he saminya loko e nyɛɛ e se. Enɛ ɔ he ɔ, e sa nɛ waa wo wa Baiblo kaseli he wami konɛ a ngmɛ blɔ nɛ waa kɛ mɛ nɛ kase ní daa otsi. Ngɛ mɛni blɔ nɔ nɛ wa ma nyɛ maa pee jã?

6. Mɛni wa ma nyɛ maa pee konɛ wa Baiblo kaseli nɛ a ya a hɛ mi?

⁶ Kekleekle ɔ, mo ha nɛ níhi nɛ nyɛ susuɔ he ngɛ sinya a nya a se nɛ kɛ bɔɔ. Eko ɔ, ke nyɛ susuɔ ngmami kake pɛ he ngɛ sinya a nya a, nyɛ ma nyɛ maa pee lɛ enyɔ be fɛɛ be nɛ o ma ya slaa lɛ. Ke wetsɛ ɔ bua jɔ be nɛ nyɛɛ kɛ kaseɔ ní ɔ he ɔ, mo bi lɛ kaa nyɛ ma nyɛ maa hi si kɛ kase ní ɔ lo. Bɔ nɛ e ma  ha heto ha a ma ha nɛ o na bɔ nɛ Baiblo ɔ nɛ nyɛ kaseɔ ɔ he hia lɛ ha. Bɔ nɛ pee nɛ Baiblo kaselɔ ɔ nɛ ya e hɛ mi ɔ, o ma nyɛ ma bi lɛ kaa e maa suɔ nɛ nyɛɛ kase ní ɔ si enyɔ ngɛ otsi ɔ mi lo. Se kɛ̃ ɔ, e biɔ babauu pe ní nɛ nyɛ maa kase si kake loo si enyɔ ngɛ otsi ɔ mi.

7. Mɛni blɔ nɔ Baiblo tsɔɔli ma nyɛ ma dla a he saminya kɛ ha ní kasemi fɛɛ ní kasemi?

⁷ E sa nɛ Baiblo tsɔɔli nɛ a dla a he saminya kɛ ha ní kasemi ɔ eko fɛɛ eko. Kekleekle ɔ, o ma nyɛ maa kane kuku ɔ, nɛ o hyɛ ngmamihi nɛ a ngɛ mi ɔ. Mo kadi oti ɔmɛ. Mo susu munyuyi ɔ, munyuyi tsɔwitsɔwi, sane bimi ɔmɛ, ngmamihi nɛ a maa kane, foni ɔmɛ kɛ videohi nɛ o ma nyɛ ma je kɛ ye bua lɛ ɔ a he. Mo susu Baiblo kaselɔ ɔ he, kɛ bɔ nɛ o maa tsɔɔ lɛ níhi a nya ha konɛ e nu ní kasemi ɔ sisi nɛ e kɛ tsu ní ngɛ e si himi mi ɔ he.​—Neh. 8:8; Abɛ 15:28a.

8. Mɛni nɛ bɔfo Paulo munyu nɛ ngɛ Kolose Bi 1:9, 10 tsɔɔ wɔ ngɛ sɔlemi nɛ wa maa sɔle kɛ ha wa Baiblo kaseli ɔ he?

⁸ Ke o ngɛ o he dlae ɔ, o sɔle kɛ ha o Baiblo kaselɔ ɔ, nɛ o sɔle ngɛ e hiami níhi hu a he. Mo bi Yehowa nɛ e ye bua mo konɛ o ngɔ Baiblo ɔ kɛ tsɔɔ Baiblo kaselɔ ɔ ní ngɛ blɔ nɔ nɛ maa ta e tsui he. (Kane Kolose Bi 1:9, 10.) Mo susu níhi nɛ eko ɔ, e he maa wa ha o Baiblo kaselɔ ɔ kaa e maa nu sisi loo e maa kplɛɛ nɔ. Oti nɛ e sa nɛ e hi o juɛmi mi ji kaa o maa ye bua lɛ nɛ e ya e hɛ mi konɛ e ha nɛ a baptisi lɛ.

9. Kɛ tsɔɔlɔ ko ma nyɛ maa ye bua e Baiblo kaselɔ konɛ e dla e he kɛ ha ní kasemi ko ha kɛɛ? Moo tsɔɔ nya.

⁹ Wa he ye kaa ke Baiblo mi ní kasemi ɔ ngɛ nɔ tsae ɔ, e maa ye bua ní kaselɔ ɔ nɛ e bua maa jɔ nɔ́ nɛ Yehowa kɛ Yesu pee ɔ he, nɛ e maa suɔ kaa e kase babauu kɛ piɛɛ he. (Mat. 5:3, 6) Loko ní kaselɔ ɔ ma ná ní kasemi ɔ he se ɔ, jã e ngɔ e juɛmi tsuo kɛ ma nɔ́ nɛ e ngɛ kasee ɔ nɔ. Loko e ma nyɛ maa pee jã a, e ma bi nɛ o ye bua lɛ konɛ e na bɔ nɛ e he hia ha kaa e ma dla e he kɛ ha ní kasemi fɛɛ ní kasemi loko o maa ya e ngɔ. Jehanɛ hu ɔ, ke e ngɛ e he dlae ɔ, e ma bi nɛ e susu bɔ nɛ ní kasemi ɔ kɔɔ e he ha a he. Kɛ o ma plɛ kɛ ye bua lɛ kɛɛ? O kɛ lɛ nɛ pee kake kɛ dla nyɛ he kɛ ha ní kasemi ko, konɛ e na bɔ nɛ a peeɔ lɛ ha. * Tsɔɔ lɛ bɔ nɛ e maa pee ha  kɛ na sane bimi ɔmɛ a heto ɔmɛ, nɛ o ha nɛ e le kaa ke e po munyunguhi nɛ a he hia a sisi ɔ, lɔ ɔ ma ha nɛ e kai heto ɔmɛ mla. Lɔ ɔ se ɔ, ha nɛ e ngɔ lɛ nitsɛ e munyuhi kɛ ha heto. Ke e pee jã a, lɔ ɔ ma ha nɛ o na kaa e nu nɔ́ ɔ sisi saminya aloo e nui sisi. Se kɛ̃ ɔ, nɔ́ kpa ko hu ngɛ nɛ o ma nyɛ maa ye bua ní kaselɔ ɔ nɛ e pee.

10. Mɛni he je nɛ e sa nɛ waa kane Baiblo ɔ daa ligbi ɔ, nɛ mɛni e he hia nɛ Baiblo kaselɔ ɔ nɛ pee konɛ e ná Baiblo kanemi ɔ he se?

¹⁰ Ke tsɔɔlɔ ɔ kɛ ní kaselɔ ɔ kaseɔ ní daa otsi po ɔ, e sa nɛ ní kaselɔ ɔ nɛ pee ní komɛ nɛ maa ye bua lɛ daa ligbi ngɛ e dɛ he. E sa kaa e kɛ Yehowa nɛ sɛɛ ní. Ngɛ mɛni blɔ nɔ? Enɛ ɔ ma bi nɛ e kɛ Yehowa nɛ tu munyu nɛ e bu lɛ tue hulɔ. Ke e kaneɔ Baiblo ɔ daa ligbi ɔ, lɔ ɔ tsɔɔ kaa e ngɛ Yehowa tue bue. (Yosh. 1:8; La 1:1-3) Moo tsɔɔ lɛ bɔ nɛ e kɛ “Baiblo Kanemi He Blɔ Nya Tomi” nɛ a kɛ fɔ jw.org ɔ nɔ ɔ ma tsu ní ha. * Se ngɛ anɔkuale mi ɔ, loko Baiblo kaselɔ ɔ ma ná e Baiblo kanemi ɔ he se ɔ, jã o wo lɛ he wami nɛ e pue e yi mi tɛ ngɛ nɔ́ nɛ Baiblo ɔ tsɔɔ ngɛ Yehowa he ɔ he, kɛ bɔ nɛ e kɛ nɔ́ nɛ e ngɛ kasee ɔ ma tsu ní ha ngɛ e si himi mi.​—Nits. 17:11; Yak. 1:25.

11. Mɛni ma nyɛ maa ye bua Baiblo kaselɔ ko nɛ e le bɔ nɛ a sɔleɔ ha saminya, nɛ mɛni he je nɛ e he hia kaa e sɔle ha Yehowa be fɛɛ be ɔ?

¹¹ Moo wo o Baiblo kaselɔ ɔ he wami konɛ e sɔle kɛ ha Yehowa daa ligbi. Loko nyɛ maa kase ní ɔ, moo je o tsui mi nɛ o sɔle, nɛ ke nyɛ gbe nya hu ɔ, moo pee jã nɔuu, nɛ́ o sɔle kɛ ha o Baiblo kaselɔ ɔ hulɔ. Ke e na bɔ nɛ o jeɔ o tsui mi kɛ sɔleɔ ha a, e maa kase bɔ nɛ a sɔleɔ ha, nɛ lɛ hu e maa je e tsui mi kɛ sɔle ha Yehowa Mawu ngɛ Yesu Kristo biɛ mi. (Mat. 6:9; Yoh. 15:16) Mo susu bɔ nɛ Baiblo ɔ nɛ e maa kane daa ligbi (Yehowa tue nɛ e maa bu) kɛ bɔ nɛ sɔlemi (Yehowa nɛ e kɛ maa sɛɛ ní ɔ) maa ye bua lɛ ha konɛ huɛ bɔmi nɛ hi e kɛ Mawu a kpɛti ɔ he! (Yak. 4:8) Ke e peeɔ ní nɛ ɔmɛ daa ligbi ɔ, e maa ye bua lɛ konɛ e ya e hɛ mi nɛ e jɔɔ e he nɔ kɛ ha Yehowa, nɛ́ e ha nɛ a baptisi lɛ.

12. Mɛni tsɔɔlɔ ko ma nyɛ maa pee kɛ ye bua Baiblo kaselɔ ko konɛ huɛ bɔmi kpakpa nɛ hi e kɛ Yehowa a kpɛti?

¹² Wa suɔ nɛ wa Baiblo kaselɔ ɔ nɛ e kase Yehowa he ní, se e sa nɛ nɔ́ nɛ e kase ɔ nɛ ta e tsui he konɛ e kɛ tsu ní ngɛ e si himi mi. Yesu ji tsɔɔlɔ nɛ ke e tsɔɔ ní ɔ, e tlɔɔ nihi a yi mi. Akɛnɛ níhi nɛ Yesu tsɔɔ ɔ taa nihi a tsui he he je ɔ, lɔ ɔ ha nɛ nihi nyɛɛ e se. (Luka 24: 15, 27, 32) E sa nɛ Baiblo kaselɔ ɔ nɛ e na Yehowa kaa nɔ ko nɛ ngɛ nitsɛnitsɛ nɛ e kɛ lɛ ma nyɛ maa pee huɛ. Jehanɛ hu ɔ, e sa nɛ e le kaa Yehowa ma nyɛ maa pee e Tsɛ, e Mawu, kɛ e Huɛ. (La 25:4, 5) Ke nyɛ ngɛ ní ɔ kasee ɔ, moo gbla e juɛmi kɛ ya Mawu su kpakpa amɛ a nɔ. (2 Mose 34:5, 6; 1 Pet. 5:6, 7) Ngɛ ní kasemi ɔ eko fɛɛ eko mi ɔ, moo gbla ní kaselɔ ɔ juɛmi kɛ ya Nɔ nɛ Yehowa ji ɔ nɔ. Moo ye bua ní kaselɔ ɔ konɛ e bua nɛ jɔ Yehowa su kpakpahi nɛ ekomɛ ji suɔmi, kpakpa peemi, kɛ mi mi sami ɔ he. Yesu tsɔɔ kaa “kita nɛ pe kulaa kɛ kekleekle nɔ́” ji “suɔ Yehowa o Mawu ɔ.” (Mat. 22:37, 38) Moo bɔ mɔde kaa o maa ye bua Baiblo kaselɔ ɔ nɛ e suɔ Yehowa wawɛɛ.

13. Mo ha nɔ hyɛmi nɔ́ ko nɛ tsɔɔ nɔ́ nɛ wa ma nyɛ maa pee kɛ ye bua Baiblo kaselɔ ko nɛ e na Yehowa su kpakpa amɛ.

¹³ Ke o kɛ o Baiblo kaselɔ ngɛ ní sɛɛe ɔ, mo ha nɛ e na bɔ nɛ o suɔ Yehowa wawɛɛ ha. Enɛ ɔ maa ye bua lɛ nɛ e maa na kaa e sa nɛ lɛ hu e ha nɛ huɛ bɔmi kpakpa nɛ hi e kɛ Mawu a kpɛti. (La 73:28) Kaa nɔ hyɛmi nɔ́ ɔ, anɛ munyukpɔ ko ngɛ ní kasemi ɔ mi, aloo ngmami ko nɛ o kane nɛ kɔɔ Yehowa suɔmi ɔ, nile, dami sane yemi loo e he wami ɔ he nɛ ta o tsui he lo? Ke o na ekomɛ ɔ, lɛɛ moo wo a ta kɛ tsɔɔ o Baiblo kaselɔ ɔ, nɛ́ o ha nɛ e le kaa enɛ ɔ ji yi mi tomi kake he je nɛ o suɔ wa hiɔwe Tsɛ ɔ. Nɔ́ kpa ko hu ngɛ nɛ e sa nɛ Baiblo kaseli tsuo nɛ a pee konɛ a nyɛ nɛ a ya a hɛ mi nɛ a ha nɛ a baptisi mɛ.

14. Mɛni nɛ Hebri Bi 10:24, 25 ɔ deɔ wɔ ngɛ asafo mi kpehi a he nɛ ma nyɛ maa ye bua wa Baiblo kaseli nɛ a ya a hɛ mi?

¹⁴ Wɔ tsuo wa suɔ nɛ wa Baiblo kaseli nɛ a ya a hɛ mi nɛ a ha nɛ a baptisi mɛ. Blɔ kake nɛ he hia nɛ wa ma nyɛ maa gu nɔ kɛ ye bua mɛ nɛ a nyɛ nɛ a pee jã ji kaa wa maa wo mɛ he wami nɛ a ya asafo mi kpehi. Tsɔɔli nɛ a he be ɔ tsɔɔ nya kaa Baiblo kaseli nɛ a yaa asafo mi kpe amlɔ nɔuu ɔ yaa a hɛ mi mlamlaamla. (La 111:1) Tsɔɔli komɛ deɔ a Baiblo kaseli kaa níhi fuu ngɛ nɛ a kaseɔ ngɛ asafo mi kpehi a sisi nɛ a kase we ngɛ a Baiblo mi ní kasemi ɔ mi. O kɛ Baiblo kaselɔ ɔ nɛ kane Hebri Bi 10:24, 25 nɛ o tsɔɔ lɛ se namihi nɛ e ma ná ke e ya asafo mi kpehi. Mo je video nɛ ji Mɛni A Peeɔ Ngɛ Matsɛ Yemi Asahi A Nɔ? ɔ kɛ tsɔɔ lɛ. * Moo ye bua o Baiblo kaselɔ ɔ nɛ e na asafo mi kpehi nɛ wa yaa ngɛ otsi ɔ mi ɔ kaa nɔ́ ko nɛ he hia wawɛɛ.

15. Mɛni wa ma nyɛ maa pee kɛ wo wa Baiblo kaselɔ he wami nɛ e ya asafo mi kpe be fɛɛ be?

 ¹⁵ Mɛni o ma nyɛ maa pee ke o Baiblo kaselɔ yɛ asafo mi kpe, aloo e poɔ asafo mi kpehi a mi? O kɛ bua jɔmi nɛ tu nɔ́ ko nɛ o kase lingmi nɛ ɔ ngɛ asafo mi kpe sisi ɔ he munyu kɛ tsɔɔ lɛ. Jã nɛ o maa pee ɔ ma nyɛ maa wo lɛ he wami nɛ e ba asafo mi kpe pe o nya kɛkɛ nɛ o kɛ ma de lɛ kaa e ba asafo mi kpe. Mo ha lɛ Hwɔɔmi Mɔ loo Si Himi Kɛ Sɔmɔmi Ní Tsumi Womi nɛ a ngɛ kasee jamɛ a be ɔ eko. Moo tsɔɔ lɛ nɔ́ nɛ a maa kase ngɛ asafo mi kpe sisi otsi nɛ maa ba a, nɛ o bi lɛ fã nɛ e bua jɔ he. Nɔ́ nɛ Baiblo kaselɔ ɔ maa na nɛ e maa nu ngɛ kekleekle asafo mi kpe nɛ e maa ya a sisi ɔ pã níhi nɛ e na loo e nu ngɛ jami kpahi a mi ɔ. (1 Kor. 14:24, 25) Jehanɛ hu ɔ, e maa na nihi nɛ a peeɔ nɔ hyɛmi ní kpakpahi nɛ e ma nyɛ maa kase mɛ, nɛ lɔ ɔ maa ye bua lɛ konɛ e ya e hɛ mi nɛ e ha nɛ a baptisi lɛ.

16. Mɛni e sa kaa waa pee konɛ nihi nɛ waa kɛ mɛ kaseɔ Baiblo ɔ nɛ a ya a hɛ mi nɛ a ha nɛ a baptisi mɛ, nɛ mɛni he wa ma susu ngɛ ní kasemi nɛ nyɛɛ se ɔ mi?

¹⁶ Mɛni blɔ nɔ wa ma nyɛ maa gu kɛ pee Baiblo mi ní kasemi nɛ ma ha nɛ wa Baiblo kaselɔ nɛ ha nɛ a baptisi lɛ? Ke wa wo wa Baiblo kaselɔ he wami kaa e ha nɛ waa kase ní ɔ daa otsi nɛ e dla e he kɛ ha ní kasemi ɔ eko fɛɛ eko ɔ, lɔ ɔ ma nyɛ maa ye bua lɛ konɛ e na ní kasemi ɔ kaa e he hia. Jehanɛ hu ɔ, e sa nɛ waa wo lɛ he wami nɛ e kɛ Yehowa nɛ sɛɛ ní daa ligbi nɛ e ha nɛ huɛ bɔmi kpakpa nɛ hi e kɛ Yehowa a kpɛti. Wa suɔ hu nɛ waa wo lɛ he wami nɛ e ya asafo mi kpe be fɛɛ be. (Hyɛ daka nɛ ji “ Nɔ́ Nɛ E Sa Kaa Baiblo Kaseli Nɛ A Pee Konɛ A Ya A Hɛ Mi Kɛ Su Baptisimi He.”) Se ní kasemi nɛ nyɛɛ se ɔ maa tsɔɔ wɔ ní enuɔ komɛ nɛ Baiblo tsɔɔli ma nyɛ maa pee konɛ a Baiblo kaseli ɔmɛ nɛ a ya a hɛ mi, nɛ a ha nɛ a baptisi mɛ.