1. Mɛni e sa nɛ Kristofohi nɛ a baptisi mɛ ɔ nɛ a ya nɔ nɛ a pee?

ANƐ a baptisi mo lo? Ke jã a, lɛɛ o de ngɛ ma hɛ mi kaa o ngɛ Yehowa mi hemi kɛ yemi nɛ o suɔ nɛ o piɛɛ e we asafo ɔ he kɛ sɔmɔ lɛ. * Ngɛ anɔkuale mi ɔ, e sa nɛ hemi kɛ yemi nɛ o ngɛ ngɛ Yehowa mi ɔ mi nɛ wa be fɛɛ be. Jehanɛ hu ɔ, e sa nɛ o ya nɔ nɛ o ná nɔ mi mami kaa Yehowa ngɛ e we asafo ɔ nɔ gue kɛ ngɛ ní tsue mwɔnɛ ɔ.

2-3. Ngɛ mɛni blɔ nɔ nɛ Yehowa ngɛ e we asafo ɔ blɔ tsɔɔe mwɔnɛ ɔ? Mo ha nɔ hyɛmi ní komɛ.

² Bɔ nɛ Yehowa kudɔɔ e we asafo ɔ ha mwɔnɛ ɔ haa nɛ wa naa Nɔ nɛ e ji, e yi mi tomi, kɛ e je mi bami he mlaahi. Nyɛ ha nɛ wa susu Yehowa su etɛ komɛ nɛ wa naa ngɛ e we asafo ɔ mi ɔ a he nɛ waa hyɛ.

³ Kekleekle ɔ, “Mawu hlɛ nɔ mi.” (Nits. 10:34) Suɔmi lɛ ha nɛ Yehowa ngɔ e Bi ɔ kɛ ha kaa “kpɔmi nɔ́ . . . kɛ ha nimli slɔɔtohi tsuo.” (1 Tim. 2:6; Yoh. 3:16) Yehowa guɔ e we bi a nɔ kɛ fiɛɛɔ sane kpakpa a kɛ haa nihi tsuo nɛ a suɔ nɛ a bu tue, nɛ kɛ gu jã peemi nɔ ɔ, nihi fuu ma nyɛ ma ná kpɔmi nɔ́ ɔ he se. Nɔ́ nɛ ji enyɔ ɔ, Yehowa ji Mawu nɛ e peeɔ e ní ngɛ blɔ nya tomi nya nɛ e suɔ tue mi jɔmi. (1 Kor. 14:33, 40) Enɛ ɔ he ɔ, e sa nɛ waa hyɛ blɔ kaa e sɔmɔli ma sɔmɔ lɛ ngɛ blɔ nya tomi nya kɛ tue mi jɔmi mi. Nɔ́ nɛ ji etɛ ɔ, Yehowa ji Tsɔɔlɔ Kpanaa. (Yes. 30:20, 21) Enɛ ɔ he je nɛ Yehowa asafo ɔ bɔɔ mɔde kaa e maa tsɔɔ ni kpahi e Munyu nɛ a je mumi mi kɛ ngma a ngɛ asafo ɔ mi kɛ fiɛɛmi mi ɔ nɛ. Ngɛ mɛni blɔ nɔ nɛ Kristofohi nɛ a hi si ngɛ kaseli ɔmɛ a be ɔ mi ɔ kase Yehowa su etɛ ɔmɛ? Ngɛ mɛni blɔ nɔ nɛ Kristofohi nɛ a ngɛ wa be nɛ ɔ mi ɔ hu kaseɔ Yehowa su nɛ ɔmɛ? Nɛ kɛ mumi klɔuklɔu ɔ ma nyɛ maa ye bua mo  ha kɛɛ be mi nɛ o piɛɛ Yehowa asafo ɔ he kɛ ngɛ lɛ sɔmɔe ɔ?

4. Kaa bɔ nɛ Ní Tsumi 1:8 ɔ tsɔɔ ɔ, mɛni fami nɛ Yesu kɛ ha e se nyɛɛli ɔmɛ, nɛ mɛni yemi kɛ buami nɛ a nine maa su nɔ?

⁴ Ngɛ kaseli ɔmɛ a be ɔ mi. Sɛ gbi nɛ Yesu fiɛɛ ɔ ha adesahi tsuo hɛ nɔ kami. (Luka 4:43) E fã e se nyɛɛli ɔmɛ kaa a tsa ní tsumi nɛ e je sisi ɔ nɔ, nɛ́ a ye nihi odase “kɛ yaa su zugba a nɔ hehi nɛ a kɛ wawɛɛ ɔ.” (Kane Ní Tsumi 1:8.) Ngɛ anɔkuale mi ɔ, mɛ nitsɛmɛ a he wami be nyɛe ma tsu ní tsumi nɛ ɔ. Kaa bɔ nɛ Yesu wo mɛ si ɔ, a maa hia mumi klɔuklɔu ɔ nɛ ji “yemi kɛ bualɔ ɔ.”​—Yoh. 14:26; Zak. 4:6.

5-6. Ngɛ mɛni blɔhi a nɔ nɛ mumi klɔuklɔu ɔ ye bua Yesu se nyɛɛli ɔmɛ?

⁵ Yesu se nyɛɛli ɔmɛ a nine su mumi klɔuklɔu ɔ nɔ ngɛ Pentekoste jeha 33 ɔ mi. Ngɛ mumi klɔuklɔu ɔ yemi kɛ buami nya a, a nyɛ nɛ a fiɛɛ amlɔ nɔuu, nɛ ngɛ be kpiti mi ɔ, nimli akpehi abɔ kplɛɛ sane kpakpa a nɔ. (Nits. 2:41; 4:4) Benɛ kaseli ɔmɛ kɛ si temi kɛ womi kpe ɔ, a yi gbeye, mohu ɔ, a bi Mawu nɛ e ye bua mɛ. A sɔle nɛ a de ke: “Ha nɛ wɔ o nyɔguɛ ɔmɛ waa ya nɔ nɛ waa kɛ kã nɛ tu o munyu ɔ.” Kɛkɛ nɛ mumi klɔuklɔu ɔ hyi mɛ tɔ, nɛ a ya nɔ nɛ a kɛ “kã ngɛ Mawu munyu ɔ tue.”​—Nits. 4:18-20, 29, 31.

⁶ Yesu kaseli ɔmɛ kɛ nyagba kpahi hu kpe. Kaa nɔ hyɛmi nɔ́ ɔ, Ngmami ɔ fã nɛ ngɛ jamɛ a be ɔ mi ɔ pi. A be womihi nɛ maa ye bua mɛ kɛ kase Baiblo ɔ kaa bɔ nɛ wa ngɛ mwɔnɛ ɔ. Jehanɛ hu ɔ, e he ba hia nɛ kaseli ɔmɛ nɛ a fiɛɛ kɛ ha nihi nɛ a tuɔ gbi slɔɔtoslɔɔtohi fuu. Se ngɛ nyagba nɛ ɔmɛ tsuo a se ɔ, kaseli nɛ a ngɛ kã nɛ ɔ pee nɔ́ ko nɛ ngɛ adesa susumi nya a, e be hie peemi. Lɔ ɔ ji kaa ngɛ jeha bɔɔ ko pɛ mi ɔ, a fiɛɛ sane kpakpa a “ngɛ adebɔ níhi tsuo nɛ a ngɛ hiɔwe sisi ɔ a kpɛti.”​—Kol. 1:6, 23.

7. Ngɛ jeha 100 kɛ se nɛ be ɔ mi ɔ, kɛ Yehowa sɔmɔli plɛ kɛ le nɔ́ nɛ Mawu ngɛ hlae ngɛ a dɛ ha kɛɛ, nɛ mɛni a pee?

⁷ Ngɛ wa be nɛ ɔ mi. Mwɔnɛ ɔ hu ɔ, Yehowa ngɛ e we bi blɔ tsɔɔe nɛ e ngɛ mɛ he wami hae konɛ a nyɛ nɛ a pee e suɔmi nya ní. Ngɛ anɔkuale mi ɔ, Mawu Munyu ɔ nɛ a je mumi mi kɛ ngma a titli ji he nɛ blɔ tsɔɔmi nɛ ɔmɛ jeɔ. Mawu Munyu ɔ mi nɛ wa naa Yesu sɔmɔmi ní tsumi ɔ he sane kɛ fami nɛ e kɛ ha e se nyɛɛli ɔmɛ kaa a tsa ní tsumi nɛ e je sisi ɔ nɔ ɔ ngɛ. (Mat. 28:19, 20) July 1881 Hwɔɔmi Mɔ ɔ de ke: “Yehowa hlɛ wɔ kaa adesahi nɛ a wo wa hɛ mi nyami, nɛ e pɔɛ wɔ nu nɛ wa ba pee niatsɛmɛ hulɔ, mohu ɔ, e hla wɔ konɛ waa ngɔ níhi tsuo nɛ wa ngɛ ɔ kɛ ye bua asafo ɔ nɛ waa fiɛɛ sane kpakpa a.” Womiyo nɛ ji To Whom the Work Is Entrusted nɛ a pee ngɛ jeha 1919 ɔ mi ɔ de ke: “Ní tsumi ɔ kle mohu lɛɛ, se e ji Nyɔmtsɛ ɔ ní tsumi, lɔ ɔ he ɔ, e ma ha wɔ he wami ɔ nɛ wa kɛ tsu.” Ngɛ anɔkuale mi ɔ, nyɛmimɛ nɛ ɔmɛ pee kã nɛ a tsu ní wawɛɛ ejakaa a le kaa Mawu mumi klɔuklɔu ɔ maa ye bua mɛ konɛ a fiɛɛ kɛ ha nimli slɔɔtohi tsuo kaa bɔ nɛ Kristofohi nɛ a hi si ngɛ kaseli ɔmɛ a be ɔ mi ɔ pee ɔ. Mwɔnɛ ɔ hu ɔ, wɔ hu wa ngɛ nɔ mi mami kaa Yehowa mumi klɔuklɔu ɔ maa ye bua wɔ.

8-9. Mɛni blɔhi a nɔ Yehowa asafo ɔ gu kɛ fiɛɛ sane kpakpa a ngɛ je kɛ wɛ?

⁸ Yehowa asafo ɔ ngɔ níhi nɛ sa kɛ tsu ní, nɛ a kɛ fiɛɛ sane kpakpa a ngɛ je kɛ wɛ. Ní nɛ ɔmɛ ekomɛ ji, womihi, “Photo-Drama of Creation,” glamafoo, lɔlehi, kɛ hleedio. Amlɔ nɛ ɔ, waa kɛ kɔmpiutahi kɛ Intanɛti ɔ hu tsuɔ ní. Jehanɛ hu ɔ, Yehowa asafo ɔ ngɛ womihi kɛ ní kpahi fuu a sisi tsɔɔe kɛ ngɛ gbi slɔɔtohi a mi yae pe be ko nɛ be ɔ. Mɛni he je nɛ a ngɛ ní nɛ ɔmɛ a sisi tsɔɔe? A ngɛ jã pee konɛ nimli slɔɔtohi tsuo nɛ a nu sane kpakpa a ngɛ  a je gbi mi. Niinɛ, Yehowa hlɛ nɔ mi; e gba kɛ fɔ si kaa a maa fiɛɛ sane kpakpa a kɛ tsɔɔ “je ma fɛɛ je ma kɛ wɛtso kɛ lilɛ kɛ nihi.” (Kpoj. 14:6, 7) E suɔ nɛ nɔ fɛɛ nɔ nɛ nu Matsɛ Yemi ɔ he sɛ gbi ɔ.

⁹ Nɛ nihi nɛ wa nyɛ we nɛ wa fiɛɛɔ ha mɛ ngɛ a wehi a mi akɛnɛ buli ngɛ a we ɔmɛ a nya loo a nga a we agbo ɔmɛ hu nɛɛ? Bɔ nɛ pee nɛ wa nyɛ nɛ waa fiɛɛ sane kpakpa a kɛ ha nihi babauu ɔ, Yehowa asafo ɔ tsɔɔ blɔ kpa komɛ a nɔ nɛ wa maa gu kɛ fiɛɛ. Kaa nɔ hyɛmi nɔ́ ɔ, ngɛ jeha 2001 ɔ mi ɔ, Blɔ Tsɔɔmi Ajla Toli ɔmɛ kplɛɛ nɔ kaa nyɛmimɛ nɛ a ngɛ France ɔ ma nyɛ maa ngɔ atsɛ̃se ɔ kɛ tsu ní. Pee se ɔ, a kpale kplɛɛ nɔ kaa nyɛmimɛ nɛ a ngɛ ma kpahi a nɔ hu ma nyɛ maa ngɔ kɛ tsu ní. Ngɛ jeha 2011 ɔ mi ɔ, a to blɔ nya ehe ko nɛ a kɛ maa ye nihi odase ngɛ United States ma nɛ ji New York City ɔ hehi nɛ nihi pɔɔ bemi ngɛ wawɛɛ ɔ. Ngɛ kekleekle jeha a mi ɔ, nyɛmimɛ ɔmɛ ha womihi 102,129 kɛ womi tɛtlɛɛhi 68,911, nɛ nihi 4,701 bi nɛ a kɛ mɛ nɛ ba kase Baiblo ɔ! Atsinyɛ jemi ko be he kaa Yehowa mumi klɔuklɔu ɔ lɛ ngɛ ní tsumi ɔ kudɔe. Enɛ ɔ he ɔ, Blɔ Tsɔɔmi Ajla Toli ɔmɛ kplɛɛ nɔ kaa nyɛmimɛ nɛ a ngɛ je kɛ wɛ ɔ tsuo ma nyɛ maa ngɔ atsɛ̃se ɔ kɛ tsu ní.

10. Mɛni wa ma nyɛ maa pee konɛ waa ya wa hɛ mi ngɛ fiɛɛmi ní tsumi ɔ mi?

¹⁰ Nɔ́ nɛ o ma nyɛ maa pee. Yehowa tsɔɔ wɔ blɔhi a nɔ nɛ waa maa gu kɛ fiɛɛ sane kpakpa a ngɛ wa kpe ɔmɛ a sisi. Moo ngɔ tsɔsemi nɛ ɔ kɛ tsu ní. Moo piɛɛ o fiɛɛmi yami kuu ɔ he kɛ fiɛɛ be fɛɛ be. Nyɛmimɛ ɔmɛ nɛ a ngɛ o kuu ɔ mi ɔ ma nyɛ maa ye bua mo nɛ o he nɛ be ngɛ fiɛɛmi ní tsumi ɔ mi, nɛ a nɔ hyɛmi nɔ́ kpakpa a hu maa wo mo he wami. Ke o kɛ nyagbahi ngɛ kpee po ɔ, yaa nɔ nɛ o fiɛɛ. Kaa bɔ nɛ ngmami nɛ a kɛ wa munyu ɔ da nɔ ɔ tsɔɔ, Mawu mumi klɔuklɔu ɔ lɛ yeɔ bua wɔ nɛ wa peeɔ e suɔmi nya ní, se pi wa he wami nya. (Zak. 4:6) Mawu ma ha wɔ he wami nɛ wa hia a, ejakaa wa ngɛ e ní tsumi tsue.

11. Ngɛ mɛni blɔ nɔ nɛ blɔ tsɔɔmi ajla toli nɛ a hi si ngɛ kaseli ɔmɛ a be ɔ mi ɔ pee kake kɛ tsu ní konɛ níhi nɛ ya nɔ saminya ngɛ Mawu we bi a kpɛti?

¹¹ Ngɛ kaseli ɔmɛ a be ɔ mi. Blɔ tsɔɔmi ajla  toli nɛ a hi si ngɛ Yerusalem ɔ pee kake kɛ tsu ní konɛ a ha nɛ tue mi jɔmi nɛ hi Mawu we bi a kpɛti nɛ níhi nɛ ya nɔ ngɛ blɔ nya tomi nya. (Nits. 2:42) Kaa nɔ hyɛmi nɔ́ ɔ, ngɛ jeha 49 ɔ mi ɔ, Kristofo ɔmɛ kɛ a he kpa we gbi ngɛ nɔ pomi sane ɔ he. Enɛ ɔ he ɔ, blɔ tsɔɔmi ajla toli ɔmɛ sɔle konɛ Mawu mumi klɔuklɔu ɔ nɛ kudɔ mɛ ngɛ sane nɛ ɔ mi. Kaa asafo ɔ mi gba ngɛ sane nɛ ɔ he ɔ, jinɛ fiɛɛmi ní tsumi ɔ ko yɛ nɔ saminya. E ngɛ mi kaa bɔfo ɔmɛ kɛ ma nikɔtɔma amɛ ji Yuda bi mohu lɛɛ, se a ha we nɛ Yuda bi a kusumi loo nihi nɛ a fĩ kusumi nɛ ɔ se ɔ nɛ ná a nɔ he wami, mohu ɔ, a hyɛ Mawu Munyu ɔ mi, nɛ a ha nɛ Mawu mumi klɔuklɔu ɔ ye bua mɛ kɛ mwɔ yi mi kpɔ nɛ da. (Nits. 15:1, 2, 5-20, 28) Mɛni lɛ je mi kɛ ba? Yehowa jɔɔ yi mi kpɔ nɛ a mwɔ ɔ nɔ, tue mi jɔmi kɛ kake peemi hi asafo ɔ mi, nɛ fiɛɛmi ní tsumi ɔ hu ya hɛ mi.​—Nits. 15:30, 31; 16: 4, 5.

12. Mɛni lɛ tsɔɔ kaa tue mi jɔmi ngɛ Yehowa asafo ɔ mi mwɔnɛ ɔ, nɛ nɔ́ fɛɛ nɔ́ yaa nɔ ngɛ blɔ nya tomi nya?

¹² Ngɛ wa be nɛ ɔ mi. Yehowa asafo ɔ tsu ní wawɛɛ konɛ tue mi jɔmi nɛ ya nɔ nɛ e hi Yehowa we bi a kpɛti, nɛ́ nɔ́ fɛɛ nɔ́ nɛ ya nɔ ngɛ blɔ nya tomi nya. Ngɛ jeha 1895 ɔ mi ɔ, a ngma munyu ko nɛ e yi ji, “Decently and in Order” ngɛ November 15 Zion’s Watch Tower and Herald of Christ’s Presence ɔ mi. A ngɔ munyuyi nɛ ɔ kɛ da 1 Korinto Bi 14:40 ɔ nɔ. Hwɔɔmi Mɔ ɔ de ke: “Bɔfo ɔmɛ ngma níhi fuu kɛ kɔ blɔ nya tomi he kɛ ya ha Kristofohi nɛ a hi si ngɛ kaseli ɔmɛ a be ɔ . . . mi ɔ. A tsɔɔ kaa e he hia nɛ wa nyɛɛ ‘níhi tsuo nɛ a ngma ngɔ to kɛ ha wɔ ní tsɔɔmi ɔ’ se pɛpɛɛpɛ.” (Rom. 15:4) Mwɔnɛ ɔ hu ɔ, Yehowa asafo ɔ bɔɔ mɔde wawɛɛ kɛ toɔ níhi a he blɔ nya konɛ tue mi jɔmi nɛ hi asafo ɔmɛ a mi kaa bɔ nɛ e ji ngɛ kaseli ɔmɛ a be ɔ mi ɔ. Kaa nɔ hyɛmi nɔ́ ɔ, ke o ya asafo mi kpe ngɛ ma kpa nɔ nɛ a ngɛ Hwɔɔmi Mɔ ɔ Mi Ní Kasemi pee ɔ, o leɔ bɔ nɛ ní kasemi ɔ maa ya lɛ ha kɛ nɔ́ nɛ a maa kase. Enɛ ɔ haa nɛ o hɛwi! Mawu mumi klɔuklɔu ɔ pɛ lɛ ma nyɛ ma ha nɛ kake peemi nɛ ɔ nɛ ya nɔ.​—Zef. 3:9.

13. Ngɛ Yakobo 3:17 ɔ nya a, mɛni sanehi nɛ e sa nɛ wa bi wa he?

¹³ Nɔ́ nɛ o ma nyɛ maa pee. Yehowa suɔ nɛ e we bi nɛ a “hɛɛ mumi ɔ kake peemi ɔ mi ngɛ tue mi jɔmi nɛ fĩɔ [mɛ] kɛ peeɔ kake ɔ mi.”  (Efe. 4:1-3) Enɛ ɔ he ɔ, mo bi o he ke: ‘Anɛ i peeɔ níhi nɛ ma ha nɛ kake peemi kɛ tue mi jɔmi nɛ hi asafo ɔ mi lo? Anɛ i buɔ nihi nɛ a nyɛɛɔ hɛ mi ɔ a blɔ tsɔɔmi tue lo? Ke i ngɛ blɔ nya ní tsumihi ngɛ asafo ɔ mi ɔ, anɛ ni kpahi ma nyɛ maa ngɔ a hɛ kɛ fɔ ye nɔ lo? Anɛ i yaa asafo mi kpe be fɛɛ be, i yeɔ bua ni kpahi, nɛ i pee klaalo kaa ma sɔmɔ mɛ lo?’ (Kane Yakobo 3:17.) Ke o na kaa e he hia nɛ o bɔ o he mɔde ngɛ ní nɛ ɔmɛ ekomɛ a peemi mi ɔ, moo sɔle nɛ Mawu mumi klɔuklɔu ɔ nɛ ye bua mo. Ke o ya nɔ nɛ o ha nɛ Mawu mumi klɔuklɔu ɔ ná o su kɛ o ní peepee nɔ he wami ɔ, lɔ ɔ ma ha nɛ nyɛmimɛ ɔmɛ maa suɔ mo nɛ a maa bu mo.

14. Kaa bɔ nɛ Kolose Bi 1:9, 10 tsɔɔ ɔ, mɛni blɔ nɔ Yehowa gu kɛ tsɔɔ e we bi ní ngɛ kaseli ɔmɛ a be ɔ mi?

¹⁴ Ngɛ kaseli ɔmɛ a be ɔ mi. Yehowa suɔ nɛ e tsɔɔ e we bi ní. (La 32:8) E suɔ nɛ e we bi nɛ a le lɛ, a suɔ lɛ, nɛ a hi si kɛ ya neneene kaa e bimɛ nɛ e suɔ. Ke pi tsɔsemi nɛ e kɛ haa wɔ ɔ he ɔ, jinɛ wa ko ná we kikɛmɛ a he blɔ nɛ ɔmɛ. (Yoh. 17:3) Ngɛ kaseli ɔmɛ a be ɔ mi ɔ, Yehowa gu Kristofohi asafo ɔ nɔ kɛ tsɔɔ e we bi ní. (Kane Kolose Bi 1:9, 10.) Jehanɛ hu ɔ, mumi klɔuklɔu ɔ nɛ ji “yemi kɛ bualɔ” ɔ nɛ Yesu wo he si ɔ hu ye bua mɛ wawɛɛ. (Yoh. 14:16) E ha nɛ kaseli ɔmɛ nu Mawu Munyu ɔ sisi saminya, nɛ e ha nɛ a kai níhi nɛ Yesu de kɛ níhi nɛ e pee kaa bɔ nɛ a ngma ngɛ Sane Kpakpa amɛ a mi ɔ. Nile nɛ kaseli nɛ ɔmɛ ná a wo a hemi kɛ yemi mi he wami, nɛ e ha nɛ suɔmi nɛ a ngɛ kɛ ha Mawu, e Bi ɔ, kɛ a sibi ɔ hu mi wa.

15. Ngɛ mɛni blɔhi a nɔ nɛ o naa kaa Yehowa gbami nɛ ngɛ Yesaya 2:2, 3 ɔ ngɛ mi bae?

¹⁵ Ngɛ wa be nɛ ɔ mi. Yehowa gba kɛ fɔ si kaa “hwɔɔ se ko ɔ” [ngɛ nyagbe ligbi ɔmɛ a mi ɔ], nihi nɛ a je je mahi tsuo a mi ma ba kuɔ e we o kadi peemi yoku ɔ konɛ e tsɔɔ mɛ ní. (Kane Yesaya 2:2, 3.) Wa naa kaa gbami nɛ ɔ ngɛ mi  bae mwɔnɛ ɔ. Anɔkuale jami ya hɛ mi kulaa pe lakpa jamihi tsuo. Yehowa je Baiblo ɔ mi kɛ ngɛ e we bi níhi babauu tsɔɔe! (Yes. 25:6) E gu “tsɔlɔ anɔkualetsɛ kɛ ní lelɔ ɔ” nɔ kɛ ngɛ wɔ mumi mi niye ní slɔɔtoslɔɔtohi fuu hae. Wa náa mumi mi niye ní nɛ ɔmɛ ekomɛ kɛ guɔ wa womi ɔmɛ, magbɛ nɔ munyuhi kɛ videohi a nɔ. (Mat. 24:45) Wa nuɔ he kaa bɔ nɛ Hiob huɛ Elihu nu he ɔ. E de ke: “[Mawu] kle pe tsɔɔli tsuo.”​—Hiob 36:22.

16. Mɛni o ma nyɛ maa pee konɛ o wa ngɛ mumi mi?

¹⁶ Nɔ́ nɛ o ma nyɛ maa pee. Mawu mumi ɔ ma nyɛ maa ye bua mo nɛ o ngɔ níhi nɛ o kase ngɛ Mawu Munyu ɔ mi ɔ kɛ tsu ní. Moo sɔle kaa bɔ nɛ la polɔ ɔ sɔle ɔ. E de ke: ‘Yehowa, tsɔɔ mi nɔ́ nɛ o suɔ kaa ma pee, nɛ ma ye mo anɔkuale sisiisi. Ha nɛ ma ngɔ ye he wami tsuo kɛ sɔmɔ mo.’ (La 86:11) Moo ya nɔ nɛ o ye mumi mi niye ní nɛ Yehowa gu e Munyu ɔ kɛ e we asafo ɔ nɔ kɛ to he blɔ nya a. Ngɛ anɔkuale mi ɔ, pi Baiblo ɔ mi nile pɛ nɛ o suɔ nɛ o ná, mohu ɔ, o suɔ nɛ anɔkuale ɔ nɛ sɛ o tsui mi tɔɔ nɛ o kɛ tsu ní ngɛ o si himi mi. Yehowa mumi klɔuklɔu ɔ ma nyɛ maa ye bua mo nɛ o pee jã. Jehanɛ hu ɔ, moo wo o nyɛmimɛ he wami. (Heb. 10:24, 25) Mɛni he je? Ejakaa a ji o weku li. Jehanɛ hu ɔ, moo sɔle kɛ bi Mawu mumi klɔuklɔu ɔ nɛ e ye bua mo nɛ o je o tsui mi kɛ ha sanehi a heto ke o ya asafo mi kpehi a sisi, nɛ ke a ha mo ní peemi ngɛ kpe ɔ sisi hu ɔ, moo pee lɛ saminya. Ke o pee ní nɛ ɔmɛ ɔ, lɔ ɔ ma ha nɛ Yehowa kɛ e Bi ɔ maa na kaa o suɔ a “jijɔ ɔmɛ.”​—Yoh. 21:15-17.

17. Mɛni o maa pee kɛ tsɔɔ kaa o kɛ anɔkuale yemi ngɛ Yehowa asafo ɔ se fĩe?

¹⁷ E piɛ bɔɔ nɛ Yehowa asafo ɔ nɛ e kɛ e mumi ɔ ngɛ lɛ kudɔe ɔ pɛ nɛ maa hi zugba a nɔ. Lɔ ɔ he ɔ, bɔɔ mɔde nɛ o kɛ Yehowa asafo ɔ nɛ nyɛɛ be fɛɛ be. Mo ha nɛ nihi nɛ a na kaa Yehowa hlɛ nihi a mi kɛ gu sane kpakpa a nɛ o maa fiɛɛ kɛ ha nimli tsuo ɔ nɔ. Moo kase Yehowa nɛ o ye bua nɛ tue mi jɔmi nɛ hi asafo ɔ mi nɛ níhi nɛ ya nɔ ngɛ blɔ nya tomi nya. Jehanɛ hu ɔ, moo bu Tsɔɔlɔ Kpanaa a tue kɛ gu mumi mi niye ní nɛ e to he blɔ nya nɛ o maa kase tsuo ɔ nɔ. Ke o pee jã a, o be gbeye yee be mi nɛ Satan je nɛ ɔ ma nyagbe ɔ. Mohu ɔ, o maa pee kã nɛ o maa piɛɛ Yehowa asafo ɔ nɛ a kɛ anɔkuale yemi ngɛ lɛ sɔmɔe ɔ a he.