Benɛ fiɛɛmi ní tsumi ɔ ngɛ hɛ mi yae ɔ, e he ba hia nɛ a ná asafo ɔ womihi fuu. Nyɛmimɛ nɛ a ngɛ Brooklyn Betel ɔ peeɔ womi tɛtlɛɛ ɔmɛ, se a haa nɛ ní tsumi hehi nɛ a peeɔ womi ɔ peeɔ womihi nɛ a se toto ɔ he wa a kɛ haa mɛ. Ní tsumi he nɛ printiɔ wa womi ɔmɛ ɔ nyɛ we nɛ e printi womihi abɔ nɛ wa hia nɛ waa kɛ maa ya fiɛɛmi ɔ nyɔhiɔhi babauu. Enɛ ɔ he ɔ, Nyɛminyumu Rutherford bi Robert Martin nɛ e hyɛɔ wa womi ɔmɛ a peemi nɔ ɔ ke ji mɛ nitsɛmɛ a ma nyɛ maa printi womi ɔmɛ eko ngɛ a dɛ he.

Nyɛminyumu Martin de ke, “Enɛ ɔ ji bua jɔmi munyu, ejakaa e ma ha nɛ wa ná he ko nɛ wa maa pee womihi ngɛ.” Nyɛmimɛ ɔmɛ ya hai he ko ngɛ 18 Concord Street nɛ ngɛ Brooklyn, nɛ a ná níhi nɛ a maa hia kɛ tsu ní tsumi ɔ.

Se tsa pi nɔ fɛɛ nɔ nɛ e bua jɔ he kaa nyɛmimɛ ɔmɛ ma bɔni mɛ nitsɛmɛ a womihi peemi. Ní tsumi he nɛ jinɛ a printiɔ womihi ha wɔ ɔ nɔ hyɛlɔ ɔ ba slaa si ngɛ wa womi peemi he ɔ. E de ke: “Nyɛ ngɛ klama kpakpahi nɛ a kɛ printiɔ womihi, se nyɛ ti nɔ ko li bɔ nɛ a kɛ klama nɛ ɔmɛ tsuɔ ní ha. Benɛ nyɔhiɔ ekpa maa su ɔ, nyɛ ma puɛ nyɛ klama amɛ tsuo.”

Nyɛminyumu Martin de ke: “Enɛ ɔ ma nyɛ maa pee anɔkuale.” E tsa nɔ ke, “wa le kaa Yehowa maa ye bua wɔ, nɛ e pee jã hulɔ.” Nɔ́ nɛ Nyɛminyumu Martin de ɔ ji anɔkuale. Be bɔɔ se ɔ, wa peeɔ womihi 2,000 daa ligbi ɔ.

Ngɛ mɛ nitsɛmɛ a womihi nɛ a peeɔ ɔ tsuo se ɔ, Yehowa we bi ba ná blɔ ehe nɛ a maa gu nɔ kɛ fiɛɛ sane kpakpa a, nɛ a pee jã kɛ gu radio nɔ. Nyɛminyumu Rutherford tu e kekleekle radio nɔ munyu Hɔgba piani ngɛ  February 26, 1922 ɔ nɔ. E munyu ɔ yi ji, “Nihi Ayɔhi Abɔ Nɛ A Hɛ Ngɛ Amlɔ Nɛ ɔ Be Gboe Hu.” E tu munyu nɛ ɔ ngɛ radio station ko nɛ a tsɛɛ lɛ ke KOG ɔ nɔ ngɛ Los Angeles ngɛ California, U.S.A.

Nihi maa pee 25,000 nɛ a bu munyu nɛ ɔ tue. A kpɛti ni komɛ ngma sɛ womi kɛ tsɔɔ bɔ nɛ a bua jɔ e munyu ɔ he ha. Nihi nɛ a ngma sɛ womi ɔ, a kpɛti nɔ kake ji Willard Ashford nɛ e ngɛ Santa Ana ngɛ California. E na Nyɛminyumu Rutherford si ngɛ bɔ nɛ e tu munyu ɔ ha a he. E tsɔɔ kaa “munyu ɔ ngɛ bua jɔmi.” E de kɛ piɛɛ he ke: “Nihi etɛ ngɛ ye we ɔ mi nɛ hiɔ ha nɛ a tlɔ tsu mi. Ke pi radio ɔ he ɔ, jinɛ ke o ba tu munyu nɛ ɔ ngɛ we nɛ ngɛ wa kasa nya a mi po ɔ, wa ko nyɛ we bami.”

Ngɛ otsihi nɛ nyɛɛ se ɔ mi ɔ, a tu munyu kpahi ngɛ radio ɔ nɔ. Benɛ jeha 1922 ɔ ba nyagbe ɔ, Hwɔɔmi Mɔ ɔ tsɔɔ kaa “nihi maa pee 300,000 nɛ a bu munyu ɔ tue kɛ gu radio nɔ.”

Sɛ womihi nɛ nihi ngma kɛ munyuhi nɛ nihi tu ɔ ha nɛ Baiblo Kaseli ɔmɛ ma a juɛmi nya si kaa a maa ma radio station ngɛ asafo ɔ zugba ko nɛ ngɛ Staten Island nɛ e kɛ Brooklyn Betel ɔ he kɛ we ɔ nɔ. Ngɛ jehahi nɛ e maa nyɛɛ se ɔ mi ɔ, Baiblo Kaseli ɔmɛ kɛ radio nɛ ji WBBR ɔ maa gbɛ Matsɛ Yemi ɔ he sɛ gbi ɔ kɛ fĩa.

Hwɔɔmi Mɔ nɛ a pee ngɛ June 15, 1922 ɔ fia adafi kaa, a maa pee kpe ko ngɛ Cedar Point, ngɛ Ohio, kɛ je September ligbi 5 kɛ ya si ligbi 13, ngɛ jeha 1922 ɔ mi. Baiblo Kaseli ɔmɛ bua jɔ wawɛɛ benɛ a ya su kpe ɔ sisi ngɛ Cedar Point ɔ.

Benɛ Nyɛminyumu Rutherford maa je e kekleekle magbɛ nɔ munyu ɔ sisi ɔ, e de tue buli ɔmɛ ke: “I he ye kaa Nyɔmtsɛ ɔ maa . . . jɔɔ kpe nɛ ɔ nɔ, nɛ lɔ ɔ ma ha nɛ waa fiɛɛ kɛ ha nihi babauu pe be ko nɛ be ɔ.” Munyu tuli ɔmɛ tsuo wo nyɛmimɛ ɔmɛ he wami kaa a ya nɔ nɛ a fiɛɛ.

Ngɛ Soha, September ligbi 8 ɔ nɔ ɔ, nihi maa pee 8,000 ba bua a he nya ngɛ kpe peemi he ɔ, nɛ a pee klaalo kaa a maa bu  magbɛ nɔ munyu nɛ Nyɛminyumu Rutherford maa tu ɔ tue. A ngɛ blɔ hyɛe kaa e maa tsɔɔ “ADV” nɛ ngɛ nine fɔmi womi ɔ nɔ ɔ sisi. Benɛ a hi si ɔ, a kpɛti nihi babauu na bo ko nɛ a koklo ngɛ kpoku ɔ yi nɔ. Arthur Claus hia blɔ kɛ je Tulsa nɛ ngɛ Oklahoma ngɛ U.S.A. ɔ, nɛ e ba kpe ɔ eko. E ya hi he ko nɛ e ma nyɛ maa nu munyu ɔ saminya, ejakaa ngɛ jamɛ a be ɔ mi ɔ, a be munyu tumi klamahi nɛ ma ha nɛ ke nɔ ko ngɛ munyu tue ɔ, e gbi maa ya hiɔwe.

Bɔ nɛ pee nɛ kpe ɔ sisi nɛ pee dii ɔ, sɛnɔhilɔ ɔ fia adafi kaa ke Nyɛminyumu Rutherford ngɛ e magbɛ nɔ munyu ɔ tue nɛ nɔ ko kpɛ se kɛ ba a, a be hae nɛ e sɛ kpe peemi he ɔ. Mɔtu 9:30 pɛpɛɛpɛ ɔ, Nyɛminyumu Rutherford je e munyu ɔ sisi, nɛ e tsɛ Yesu munyu nɛ ngɛ Mateo 4:17 ɔ se. Lejɛ ɔ de ke: “Hiɔwe matsɛ yemi ɔ su si ta.” (King James Version) E tsɔɔ bɔ nɛ adesahi ma plɛ kɛ nu Matsɛ Yemi ɔ sɛ gbi ɔ ha, nɛ e de ke: “Yesu nitsɛ de ke jamɛ a be ɔ mi ɔ, ke e ba a, e ma bua e we bi a nya, nɛ e maa hla nihi nɛ a yeɔ anɔkuale ɔ.”

Nyɛminyumu Claus nɛ e hii si ngɛ kpe peemi he ɔ de ke: “Wa ngɛ nɔ́ fɛɛ nɔ́ nɛ e ngɛ dee ɔ tue bue saminya.” Se tlukaa a, hiɔ ko fia lɛ, nɛ enɛ ɔ ha nɛ e je kpe peemi he ɔ. Nyɛminyumu Claus sume nɛ e maa je kpe peemi he ɔ ejakaa e le kaa ke e je ɔ, e be nyɛe maa kpale ba sɛ mi hu nɛ e bu Nyɛminyumu Rutherford munyu ɔ tue.

Be bɔɔ se ɔ, e ná he wami bɔ nɛ sa. E tsɔɔ kaa benɛ e kpale kɛ ma kpe peemi he ɔ, e nu nɛ nyɛmimɛ ɔmɛ ngɛ a dɛ mi gbɔe wawɛɛ. Enɛ ɔ ha nɛ e suɔ nɛ e le nɔ́ nɛ ngɛ nɔ yae. Lɔ ɔ he ɔ, e mwɔ e yi mi kpɔ kaa ke e maa hia nɛ e kuɔ kɛ ya tsu ɔ yi mi po ɔ, e maa pee jã konɛ e nyɛ nɛ e bu munyu nɛ piɛ nɛ ngɛ bua jɔmi ɔ tue. Jamɛ a be ɔ mi ɔ, Nyɛminyumu Claus ye jeha 23, lɔ ɔ he ɔ, e nyɛ nɛ  e kuɔ gbogbo ɔ kɛ ya tsu ɔ yi mi. A bli saflɛhi nɛ a je ngɛ tsu ɔ yi mi ɔ, nɛ benɛ e ngɛ lejɛ ɔ sue ɔ, e na kaa “e ngɛ munyu ɔ nue saminya.”

Se tsa pi Nyɛminyumu Arthur pɛ nɛ e ngɛ tsu ɔ yi mi. E huɛmɛ komɛ hu piɛɛ e he. A ti nɔ kake nɛ a tsɛɛ lɛ ke Frank Johnson ɔ ma fo ba ná lɛ nɛ e bi lɛ ke: “O ngɛ ha bi ko nɛ e nya ba lo?”

Arthur de ke: “Ee, i hɛɛ eko.”

Nyɛminyumu Frank de ke: “Yehowa gu o nɔ kɛ ha wa sɔlemi ɔ heto. Anɛ o na nɔ́ nɛ ɔ nɛ a koklo ɔ lo? E ji bo nɛ a ngma ní kɛ fɔ nɔ, nɛ a fĩ kɛ wo plɛɛko nɛ ɔmɛ a he. Moo bu Kojolɔ a ɔ tue saminya. Ke o nu nɛ e de ke, ‘nyɛɛ fia, nyɛɛ fia pɛ ɔ,’ poo kpa eywiɛ nɛ ɔmɛ.”

Lɔ ɔ he ɔ, Arthur hɛɛ ha a ngɛ e dɛ mi nɛ e pee klaalo kɛ ngɛ mlɛe. Be bɔɔ se ɔ, Nyɛminyumu Rutherford su he nɛ e maa tu jamɛ a munyu klɛdɛɛ ɔ ngɛ ɔ. Nyɛminyumu Rutherford ngɔ bua jɔmi kɛ kã kɛ tu munyu, nɛ e wo e gbi nɔ nɛ e de ke: “Nyɛɛ pee Nyɔmtsɛ ɔ we odasefohi nɛ a yeɔ anɔkuale. Nyɛɛ ya nyɛ hɛ mi kɛ ya si be nɛ a ma kpata Babilon ngua a hɛ mi pɛsɛpɛsɛ. Nyɛɛ fiɛɛ sɛ gbi ɔ ngɛ he fɛɛ he. E sa nɛ je ɔ nɛ le kaa Yehowa ji Mawu, nɛ Yesu Kristo ji matsɛmɛ a Matsɛ kɛ nyɔmtsɛmɛ a Nyɔmtsɛ. Mwɔnɛ ɔ ji mwɔnɛ ɔ. Hyɛ, Matsɛ ɔ ngɛ nɔ yee. Nyɛ ji e nane mi dali nɛ nyɛ fiɛɛɔ sane kpakpa a nɛ. Enɛ ɔ he ɔ, nyɛɛ fia, nyɛɛ fia, nyɛɛ fia Matsɛ ɔ kɛ e Matsɛ Yemi ɔ he gɔgɔ!”

Arthur tsɔɔ kaa e kɛ nyɛmimɛ nyumuhi nɛ a piɛɛ e he ɔ po kpa amɛ, kɛkɛ nɛ bo ɔ mi bli blɛuu kɛ ba zugba. “ADV” ji blɛfo gbi munyungu nɛ ji advertise ɔ kpiti pomi, nɛ e sisi ji, nyɛɛ fiɛɛ. A ngma ngɛ bo ɔ mi ke: “Nyɛɛ Fia Matsɛ ɔ Kɛ Matsɛ Yemi ɔ He Gɔgɔ.”

Kpe nɛ a pee ngɛ Cedar Point ɔ ye bua nyɛmimɛ ɔmɛ nɛ a ngɔ a juɛmi kɛ ma ní tsumi nɛ he hia nɛ ji Matsɛ Yemi sane kpakpa fiɛɛmi ní tsumi ɔ nɔ. Nihi nɛ a ngɛ ní tsumi ɔ he bua jɔmi ɔ ngɔ a he kɛ wo mi. Blɔ gbalɔ ko nɛ e je Oklahoma, U.S.A. ɔ ngma ke: “Kpɔ mi he nɛ wa ngɛ ɔ ji he nɛ a tsuaa amã ngɛ, nɛ nihi yeɔ ohia ngɛ lejɛ ɔ wawɛɛ.” E tsɔɔ kaa behi fuu ɔ, ke nihi nu sɛ gbi ɔ ngɛ Golden Age womi tɛtlɛɛ ɔ mi ɔ “kɛkɛ a bɔni ya fomi.” E mwɔ e sane ɔ nya ke, “Wa bua jɔɔ wawɛɛ kaa wa nyɛɔ nɛ wa woɔ a bua.”

Baiblo Kaseli ɔmɛ na bɔ nɛ munyu nɛ Yesu tu ngɛ Luka 10:2 ɔ he hia ha. E de ke: “Ní nɛ a ma kpa a hiɛ, se ní tsuli ɔmɛ a he pi.” Benɛ jeha a ke e baa nyagbe ɔ, a fia a pɛɛ si kaa a maa fia Matsɛ Yemi ɔ he gɔgɔ wawɛɛ ngɛ je kɛ wɛ pe be ko nɛ be ɔ.