Jeha 40 nɛ Israel bi ɔmɛ ye ngɛ nga a nɔ ɔ, mana ji niye ní titli nɛ a ye. (2 Mose 16:35) Jehanɛ hu ɔ, Yehowa ha mɛ bebeehi loo hɔnehi nɛ a ye ngɛ si fɔfɔɛhi enyɔ mi. (2 Mose 16:​12, 13; 4 Mose 11:31) Se kɛ̃ ɔ, Israel bi ɔmɛ ná niye ní kpahi nɛ a ye.

Kaa nɔ hyɛmi nɔ́ ɔ, be komɛ ɔ, Yehowa nyɛɛɔ e we bi a hɛ mi kɛ hlaa “sito he” ha mɛ, nɛ lɔ ɔ ha nɛ a na hehi nɛ a ma ná niye ní kɛ nyu ngɛ. (4 Mose 10:33) Sito he nɛ ɔmɛ a kpɛti kake ji Elim, “he nɛ nyu hɛngmɛ 12 kɛ tã 70 ɔmɛ ngɛ ɔ.” Eko ɔ, tã henɔ nɛ ɔmɛ ngɛ kaa tsohi nɛ ngɛ foni nɛ ngɛ ba fa 31 ɔ. (2 Mose 15:27) Womi nɛ ji Plants of the Bible ɔ tsɔɔ kaa tso nɛ ɔ “waa ngɛ he slɔɔtohi, . . . nɛ e ji tso nɛ nihi fuu náa niye ní ngɛ mi ngɛ nga kplanaa nɔ. A náa niye ní kɛ nu ngɛ mi, nɛ nihi babauu ngɔɔ tso nɛ ɔ kɛ maa tsu hulɔ.”

Jehanɛ hu ɔ, e ma nyɛ maa ba kaa Israel bi ɔmɛ to si ngɛ he pɔtɛɛ ko nɛ kle wawɛɛ nɛ mwɔnɛ ɔ, a tsɛɛ ke Feiran nɛ e piɛɛ nyu dɔgba ko nɛ a tsɛɛ ke Wadi Feiran ɔ he ɔ. a Womi nɛ ji Discovering the World of the Bible ɔ tsɔɔ kaa, “Nyu dɔgba nɛ ɔ mi blimi maa su si tomi 81 nɛ e ji pahi nɛ a mi ka, nɛ a nɔ ngɛ fɛu wawɛɛ nɛ a he biɛ ngɛ Sinai ɔ a kpɛti kake.” Womi ɔ de hu kaa “Ke nɔ ko nyɛɛ maa pee si tomi 28 kɛ je he nɛ pa a kɛ wo ɔ kpe ngɛ ɔ, e maa su he nɛ a tsɛɛ ke Feiran Oasis ɔ. Tã amɛ ngɛ zugba nɛ e mi kami maa su si tomi 3 nɔ. Enɛ ɔ ha nɛ lejɛ ɔ ngɛ fɛu saminya. Lɔ ɔ he je nɛ nihi deɔ ke lejɛ ɔ ngɛ kaa Eden Abɔɔ ɔ nɛ. Jeha akpehi abɔ ji nɛ ɔ nɛ nihi yaa lejɛ ɔ ngɛ tã babauu ɔmɛ a he je.”

Benɛ Israel bi ɔmɛ maa je Egipt ɔ, a ngɔ mamu, tsesihi nɛ a pɔtɔɔ mamu ngɛ a mi, kɛ eko ɔ, ngma kɛ nu kɛ ho. E ngɛ heii kaa ní nɛ ɔmɛ a se kɛ we tsɔ nɛ e ta. Jehanɛ hu ɔ, Israel bi ɔmɛ ngɔ a “tohi kɛ a nahi hu [kɛ] ho; a kɛ lohwehi babauu nitsɛ ho.” (2 Mose 12:​34-39) Akɛnɛ si fɔfɔɛ ɔ he wa ngɛ nga a nɔ he je ɔ, e ngɛ heii kaa lohwe ɔmɛ fuu ma gbo. Eko ɔ, a ye ekomɛ, nɛ a kɛ ekomɛ hu sã afɔle, nɛ be komɛ po ɔ, a kɛ sãa afɔle ha lakpa mawuhi. b (Níts. 7:​39-43) Se kɛ̃ ɔ, Israel  bi ɔmɛ ngɛ tohi kɛ nahi. Nɔ́ nɛ Yehowa de e we bi benɛ a gbo e nɔ tue ɔ haa nɛ wa naa enɛ ɔ heii. E de ke: ‘Nyɛ binyumu ɔmɛ maa pee to hyɛli ngɛ nga a nɔ jeha 40.’ (4 Mose 14:33) Atsinyɛ jemi ko be he kaa lohwe ɔmɛ haa mɛ nyɔ nyu nɛ be komɛ po ɔ, a gbeɔ lohwe ɔmɛ nɛ a yeɔ. Se ngɛ anɔkuale mi ɔ, ní nɛ ɔmɛ be nyɛe maa su nihi maa pee ayɔ etɛ jeha 40 sɔuu. c

Jije lohwe ɔmɛ ná niye ní kɛ nyu ngɛ? d Eko ɔ, ngɛ jamɛ a be ɔ mi ɔ, hiɔmi nɛɛ bɔ nɛ sa, nɛ enɛ ɔ haa nɛ ngahi fuu puɛɔ ngɛ nga a nɔ. Insight on the Scriptures, Volume 1 ɔ tsɔɔ kaa jeha 3,500 nɛ be ɔ, “nyu fuu ngɛ he nɛ Israel bi ɔmɛ hi ɔ wawɛɛ pe bɔ nɛ e ji ha mwɔnɛ ɔ. Dɔgbahi loo takuhi nɛ a mi kuɔ nɛ amlɔ nɛ ɔ, a mi gbli, se jinɛ be ko nɛ be ɔ, a náa nyu babauu ngɛ a mi ɔ maa nɔ mi kaa hiɔmi nɛɛ wawɛɛ blema a, nɛ e haa nɛ pahi baa.” Se kɛ̃ ɔ, nga a nɔ gbli wawɛɛ, nɛ lejɛ ɔ hu ngɛ gbeye. (5 Mose 8:​14-16) Ngɛ anɔkuale mi ɔ, kaa Yehowa gui nyakpɛ blɔ nɔ kɛ ha we Israel bi ɔmɛ kɛ a lohwe ɔmɛ nyu ɔ, jinɛ a hɛ mi ko kpata.—2 Mose 15:​22-25; 17:​1-6; 4 Mose 20:​2, 11.

Mose de Israel bi ɔmɛ kaa Yehowa lɛ mɛ kɛ mana bɔ nɛ pee nɛ a ‘le kaa pi abolo pɛ nɛ haa nɔmlɔ yi náa wami, se mohu munyu tsuaa munyu nɛ jeɔ Yehowa nya mi ɔ nɛ haa nɔ yi naa wami.’—5 Mose 8:3.