Níhi nɛ bɔfo Paulo tu he munyu loko e tu munyu nɛ ngɛ ngmami nɛ ɔ mi ɔ tsɔɔ kaa e ngɛ sɛ gbi nɛ kɔɔ Mawu yi mi tomi nɛ ngɛ Baiblo ɔ mi ɔ he munyu tue.

Wa tsɛ ngmami nɛ ngɛ Hebri Bi 4:12 ɔ se si abɔ ngɛ wa womihi a mi kɛ tsɔɔ kaa Baiblo ɔ ngɛ he wami nɛ e ma nyɛ maa tsake nihi a si himi, nɛ e da blɔ kaa wa tsɔɔ jã. Se ke wa susu níhi nɛ Paulo tu he munyu loko e tu munyu nɛ ngɛ Hebri Bi 4:12 ɔ, kɛ níhi nɛ e de ngɛ lɔ ɔ se ɔ he ɔ, lɔ ɔ maa ye bua wɔ konɛ waa nu sisi. Paulo ngɛ Kristofohi nɛ a ji Hebri bi ɔ he wami woe konɛ a ha nɛ a ní peepee kɛ Mawu yi mi tomi ɔ nɛ kɔ. A ngma yi mi tomi nɛ ɔmɛ a he munyu fuu ngɛ ngmami klɔuklɔu ɔ mi. Paulo ngɔ Israel bi nɛ a kpɔ̃ mɛ kɛ je Egipt ɔ kɛ pee nɔ hyɛmi nɔ́. A ngɛ hɛ nɔ kami kaa a nine maa su zugba nɛ “baa ní” ɔ nɔ, nɛ a ma ná he jɔɔmi nitsɛnitsɛ.​—2 Mose 3:8; 5 Mose 12:9, 10.

Enɛ ɔ ji Mawu yi mi tomi ɔ nɛ. Se Israel bi ɔmɛ kplii a tsui nɛ a be hemi kɛ yemi hulɔ, lɔ ɔ he ɔ, a nyɛ we nɛ a sɛ Mawu he jɔɔmi ɔ mi. (4 Mose 14:30; Yosh. 14:6-10) Se kɛ̃ ɔ, Paulo tsɔɔ kaa loloolo ɔ, Mawu ‘wo si ke e ma ha wa maa jɔɔ wa he ngɛ e he jɔɔmi ɔ mi.’ (Heb. 3:16-19; 4:1) E ngɛ heii kaa jamɛ a “si womi” ɔ piɛɛ Mawu yi mi tomi nɛ e ha nɛ wa le ɔ he. Kaa bɔ nɛ Kristofohi nɛ a ji Hebri bi ɔ pee ɔ, wɔ hu wa ma nyɛ maa kane munyu nɛ ɔ nɛ wa susu he. Bɔ nɛ pee nɛ Paulo nɛ e nyɛ nɛ e ma nɔ mi kaa si womi nɛ ɔ ngɛ Ngmami ɔ mi ɔ, e tsɛ 1 Mose 2:2 kɛ La 95:11 ɔ se.

E sa kaa wa bua nɛ jɔ kaa ‘Mawu wo si ke e ma ha waa sɛ e he jɔɔmi ɔ mi, nɛ siwo nɛ ɔ ngɛ kɛ ha wɔ kɛ mwɔɔ.’ Wa ngɛ hɛ kɛ nɔ fɔmi kaa wa ma nyɛ maa sɛ Mawu he jɔɔmi ɔ mi kaa bɔ nɛ Baiblo ɔ tsɔɔ ɔ, nɛ wa bɔ mɔde nɛ wa pee jã. Tsa pi Mose Mlaa a nɔ yemi, aloo kpakpa nɛ wa maa pee konɛ waa sa Yehowa hɛ mi kɛkɛ ɔ nɛ tsɔɔ kaa wa sɛ he jɔɔmi ɔ mi. Mohu ɔ, akɛnɛ wa ngɛ Mawu mi hemi kɛ yemi he je ɔ, waa kɛ bua jɔmi susuu ɔ Mawu yi mi tomi nɛ ɔ he. Nihi akpehi abɔ bɔni Baiblo ɔ kasemi ngɛ je kɛ wɛ, nɛ a ngɛ Mawu yi mi tomi nɛ e je kpo ngɔ tsɔɔ ɔ he ní kasee. Enɛ ɔ ye bua a kpɛti nihi fuu nɛ a pee tsakemi ngɛ a si himi mi, a ná hemi kɛ yemi ngɛ Mawu mi, nɛ a ha nɛ a baptisi mɛ. Tsakemi nɛ a pee ɔ tsɔɔ kaa ‘Mawu munyu ɔ hɛ ngɛ, nɛ e ngɛ he wami.’ Mawu yi mi tomi ɔ nɛ e je kpo ngɔ tsɔɔ wɔ ngɛ Baiblo ɔ mi ɔ ha nɛ wa pee tsakemi ngɛ wa si himi mi, nɛ e maa ya nɔ maa ye bua wɔ konɛ waa pee tsakemi.