Ngmami nɛ ɔ sa kadimi wawɛɛ. E kaneɔ ke: ‘Ke o na nɛ a ngɛ ohiatsɛ yi mi wae, aloo a plɛ sane hɛ mi ngɔ bu si, nɛ a kojo we ngɛ blɔ nɛ da nɔ ngɛ zugba ko nɔ ɔ, e ko pee mo nyakpɛ kulaa. Ejakaa jamɛ a nɔkɔtɔma a, nɔkɔtɔma kpa nɛ e nɔ kuɔ pe lɛ ngɛ lɛ hyɛe, nɛ ni kpahi hu ngɛ nɛ a nɔ kuɔ pe jamɛ a nikɔtɔma amɛ.’​—Fiɛlɔ 5:8.

Ke wa li Yehowa susumi ngɛ munyu nɛ ɔ he ɔ, wa ma susu kaa munyu nɛ ɔ kɔɔ adesa nɔ yeli pɛ a he. Se ke wa susu he kɛ ya tsitsaa a, wa maa na kaa munyu nɛ ɔ kɔɔ Yehowa hu he, nɛ e sa nɛ e wo wa bua nɛ wa ná nɔ mi mami ngɛ mi.

Fiɛlɔ 5:8 ɔ kɔɔ nɔ yelɔ ko nɛ e waa ohiatsɛmɛ yi mi nɛ e yi mɛ dami sane ɔ he. E sa nɛ nɔ yelɔ nɛ ɔ nɛ kai kaa eko ɔ, nɔ ko nɛ e nɔ kuɔ pe lɛ aloo nɔ ko nɛ ngɛ he blɔ nɛ nɔ kuɔ pe e nɔ́ ɔ ngɛ lɛ hyɛe. Nɛ eko ɔ, ni kpahi hu ngɛ nɛ a hɛɛ blɔ nya nguahi. Se aywilɛho sane ji kaa adesa nɔ yemihi tsuo puɛ nɛ a yi dami sane, enɛ ɔ haa nɛ nihi nɛ a ngɛ a sisi ɔ naa nɔ́ wawɛɛ.

Se kɛ̃ ɔ, bɔ fɛɛ bɔ nɛ si fɔfɔɛ ɔ ngɛ ha a, wa ma nyɛ ma ná bua womi ke wa ba le kaa Yehowa ‘hyɛɛ nikɔtɔmahi nɛ a nɔ kuɔ’ ngɛ adesa nɔ yemi mi ɔ. Wa ma nyɛ maa sɔle ha Mawu nɛ waa ngɔ wa haomi ɔmɛ kɛ fɔ e nɔ. (La 55:22; Filip. 4:6, 7) Ngɛ anɔkuale mi ɔ, wa ngɛ nɔ mi mami kaa ‘Yehowa hɛngmɛ ngɛ je ɔ tsuo he; nihi nɛ yeɔ lɛ anɔkuale ɔ, e woɔ mɛ he wami.’​—2 Kron. 16:9.

Fiɛlɔ 5:8 ɔ ha nɛ wa naa bɔ nɛ níhi yaa nɔ ha ngɛ je nɛ wa ngɛ mi ɔ mi. E ha nɛ wa naa kaa be fɛɛ be ɔ, nɔ ko ngɛ nɛ e ngɛ blɔ nya nɛ nɔ kuɔ. Se nɔ́ nɛ he hia titli ji kaa ngmami nɛ ɔ ha nɛ wa na kaa Yehowa ji Nɔ nɛ nɔ kuɔ pe kulaa. Niinɛ lɛ ji Nɔ Yelɔ Nɛ Nɔ Kuɔ Pe Kulaa. Amlɔ nɛ ɔ, Yehowa ngɛ nɔ yee kɛ gu e Bi Yesu Kristo nɛ ji Matsɛ Yemi ɔ nya Matsɛ ɔ nɔ. Ope ɔ nɛ e ngɛ níhi tsuo hyɛe ɔ da kɛ pi si, nɛ e Bi ɔ hu da kɛ pi si.