NÍ KASEMI 40
‘A Maa Tsɔɔ Nihi Babauu Blɔ Nɛ A Pee Nɔ́ Nɛ Da’
“Ni nɛmɛ nɛ tsɔɔ nihi babauu blɔ nɛ a pee nɔ́ nɛ da a, mɛɛ lɛɛ a ma kpɛ kaa dodoehi kɛ maa ya neneene.”—DAN. 12:3.
LA 151 E Ma Tsɛ Mɛ
NƆ́ NƐ WA MAA KASE *
1. Mɛni bua jɔmi be nɛ wa ngɛ blɔ hyɛe ngɛ Jeha Akpe Nɔ Yemi ɔ mi?
KE A bɔni ni gbogboe ɔmɛ si tlemi kɛ ba wami mi ngɛ zugba a nɔ ngɛ Kristo Jeha Akpe Nɔ Yemi ɔ mi ɔ, hyɛ bɔ nɛ wa bua maa jɔ ha! Nihi tsuo nɛ a suɔli gbo ɔ ngɛ blɔ hyɛe kaa a maa na mɛ ekohu, nɛ jã kɛ̃ nɛ Yehowa hu nuɔ he. (Hiob 14:15) Moo po he foni nɛ o hyɛ bɔ nɛ nɔ fɛɛ nɔ nɛ ngɛ zugba a nɔ ɔ bua maa jɔ ha ke a tle wa suɔli nɛ a gbo ɔ si. Kaa bɔ nɛ wa kase ngɛ ní kasemi nɛ sɛ enɛ ɔ hlami ɔ mi ɔ, “nihi nɛ a da” nɛ a ngma a biɛ ngɛ wami womi ɔ mi ɔ, a ma tle mɛ si kɛ ya “wami he gbogboehi a si tlemi mi.” (Níts. 24:15; Yoh. 5:29) Eko ɔ, wa suɔli nɛ a gbo ɔ a kpɛti nihi fuu maa piɛɛ nihi nɛ a maa sɛ hlami ma tle mɛ si ngɛ zugba a nɔ ɔ a he. * Jehanɛ hu ɔ, “nihi nɛ a dɛ” ɔ nɛ ji nihi nɛ a nɛ́ he blɔ kɛ kase Yehowa he ní aloo kɛ sɔmɔ lɛ loko a gbo ɔ, a ma tle mɛ si kɛ ya “kojomi he gbogboehi a si tlemi mi.”
2-3. (a) Kaa bɔ nɛ a tsɔɔ ngɛ Yesaya 11:9, 10, mɛni ní tsɔɔmi ní tsumi ngua ko nɛ maa ya nɔ nɛ eko bɛ hyɛ ngɛ adesahi a yi nɔ sane mi? (b) Mɛni he wa ma susu ngɛ ní kasemi nɛ ɔ mi?
2 Nihi tsuo nɛ a ma tle mɛ si ɔ, e he maa hia nɛ a tsɔɔ mɛ ní. (Yes. 26:9; 61:11) Enɛ ɔ tsɔɔ kaa ní tsɔɔmi ní tsumi ngua ko maa ya nɔ ngɛ je ɔ mi tsuo nɛ eko bɛ hyɛ. (Kane Yesaya 11:9, 10.) Mɛni he je? E he maa hia kaa a tsɔɔ nihi nɛ a dɛ nɛ a ma tle mɛ si ɔ ní. E sa nɛ a kase Yesu Kristo, Matsɛ Yemi ɔ he blɔ nya tomi, kpɔmi nɔ́ ɔ, bɔ nɛ Yehowa biɛ ɔ he hia ha kɛ nɔ́ he je nɛ lɛ pɛ ji nɔ nɛ e sa kaa e ye je ɔ tsuo nɔ ɔ he ní. Ngɛ nihi nɛ a da a po a blɔ fa mi ɔ, e he maa hia nɛ a kase níhi nɛ Yehowa tsɔɔ e we bi bɔɔbɔɔbɔɔ kɛ kɔ e yi mi tomi kɛ ha zugba a he ɔ he ní. Anɔkualetsɛmɛ nɛ ɔmɛ ekomɛ gbo jehahi babauu loko a ngma Yehowa munyu nɛ ji Baiblo ɔ ta. E he maa hia nɛ nihi nɛ a da kɛ nihi nɛ a dɛ ɔ tsuo nɛ a kase níhi fuu.
3 Ngɛ ní kasemi nɛ ɔ mi ɔ, wa ma susu sane bimihi nɛ nyɛɛ se nɛ ɔmɛ a he: Kɛ ní tsɔɔmi ní tsumi ngua nɛ ɔ maa ya nɔ ha kɛɛ? Anɛ bɔ nɛ nihi maa pee a ní ha ngɛ ní tsɔɔmi ní tsumi nɛ ɔ he ɔ lɛ maa tsɔɔ kaa a biɛ maa ya nɔ maa hi wami womi ɔ mi loo a biɛ be mi hie lo? Mwɔnɛ ɔ, sane bimi nɛ ɔmɛ nɛ wa maa na a heto ɔ he hia wɔ wawɛɛ. Kaa bɔ nɛ wa maa na a, gbami komɛ nɛ a tu a he munyu ngɛ Daniel kɛ Kpo Jemi womi ɔ mi ɔ maa ye bua wɔ konɛ waa na bɔ nɛ níhi maa ya nɔ ha ke a tle nihi nɛ a gbo ɔ si. Kekleekle ɔ, nyɛ ha nɛ waa hyɛ ní komɛ nɛ maa ya nɔ nɛ a gba kɛ fɔ si ngɛ Daniel 12:1, 2 ɔ.
‘NI NƐMƐ NƐ GBO Ɔ MAA TE SI’
4-5. Mɛni nɛ Daniel 12:1 ɔ de kɛ kɔ nyagbe be ɔ he?
4 Baiblo ɔ de ke: “Jamɛ a be ɔ mi ɔ, Mikael maa te si kɛ da si, ganɔ ngua a nɛ daa si ngɛ o ma bi ɔmɛ a nane mi ɔ. Nɛ haomi nɛ a nɛ́ eko hyɛ kɛ je be nɛ a to je ma amɛ a sisi kɛ ba si jamɛ a ligbi ɔ maa ba. Jamɛ a be ɔ mi ɔ, o ma mi bi ɔmɛ tsuo nɛ a ngma a biɛ kɛ wo womi ɔ mi ɔ, a ma he a yi wami.” (Dan. 12:1, NW.) Daniel womi ɔ tsɔɔ bɔ nɛ níhi maa ya nɔ setsɔsetsɔ ha ngɛ nyagbe ligbi ɔmɛ a mi. Kaa nɔ hyɛmi nɔ́ ɔ, Daniel 12:1 tsɔɔ kaa Mikael nɛ ji Yesu Kristo ɔ “daa si ngɛ [Mawu we bi] a nane mi.” Gbami nɛ ɔ bɔni mi bami kɛ je 1914 benɛ a hla Yesu kaa Matsɛ ngɛ Mawu Matsɛ Yemi ɔ nya a.
5 Jehanɛ ɔ, a de Daniel kaa Yesu “maa te si kɛ da si” ngɛ be nɛ “haomi nɛ a nɛ́ eko hyɛ kɛ je be nɛ a to je ma amɛ a sisi kɛ ba si jamɛ a ligbi ɔ maa ba” a mi. “Haomi” nɛ ɔ nɔuu ji “amanehlu ngua” a nɛ a tu he munyu ngɛ Mateo 24:21 ɔ. Yesu maa te si kɛ da si aloo e maa bu Mawu we bi a he ngɛ haomi be nɛ ɔ nyagbe nɛ ji Hamagedɔn ɔ mi. Kpo Jemi womi ɔ tu kuu nɛ ɔ nɔuu he munyu kaa mɛ ji asafo kuu ngua “nɛ a je amanehlu ngua mi ɔ nɛ.”—Kpoj. 7:9, 14.
6. Mɛni maa ba ke asafo kuu ngua a po amanehlu ngua a? Moo tsɔɔ nya. (Hyɛ “Sane Bimihi Nɛ Je Ní Kaneli A Ngɔ” nɛ ngɛ Hwɔɔmi Mɔ nɛ ɔ mi nɛ kɔɔ nihi nɛ a ma tle mɛ si ngɛ zugba a nɔ ɔ a he ɔ.)
6 Baiblo ɔ de ke: “Ni nɛmɛ nɛ a hwɔ ngɛ zu mi ɔ, a ti nihi babauu maa te si, ni komɛ maa ya neneeene wami mi, nɛ ni komɛ hu a hɛ mi ma pue si nɛ a maa bu mɛ kaa nyangemi níhi kɛ ya daa.” (Dan. 12:2, NW.) Mɛni maa ba ke asafo kuu ngua a po amanehlu ngua a loo haomi nɛ a nɛ́ eko hyɛ ɔ? Be ko nɛ be ɔ, wa nu gbami nɛ ɔ sisi kaa e ji okadi peemi nɔ́ ko aloo mumi mi gbogboehi a si tlemi nɛ maa ya nɔ ngɛ nyagbe be nɛ ɔ mi. * Se amlɔ nɛ ɔ, wa nu sisi kaa e ji gbogboehi a si tlemi nɛ maa ya nɔ ngɛ je ehe ɔ mi ɔ. Mɛni he je nɛ wa de jã a? A kɛ munyungu nɛ ji “zu” ɔ tsu ní ngɛ Hiob 17:16 hulɔ, nɛ e kɛ munyungu nɛ ji “gbeje” ɔ tsuo tsɔɔ nɔ́ kake. Enɛ ɔ maa nɔ mi kaa gbogboehi a si tlemi nɛ a tu he munyu ngɛ Daniel 12:2 ɔ, pi okadi peemi nɔ́ ko. Mohu ɔ, e ji gbogboehi a si tlemi nitsɛ nɛ maa ya nɔ ke nyagbe ligbi ɔmɛ ba nyagbe, nɛ́ Hamagedɔn ta a ba nyagbe.
7. (a)Mɛni blɔ nɔ nɛ a ma tle ni komɛ si kɛ ya “neneene wami mi”? (b) Mɛni he je nɛ enɛ ɔ ji “gbogboehi a si tlemi nɛ e hi saminya a”?
7 Mɛni nɛ Daniel 12:2 ngɛ tsɔe benɛ e de ke a ma tle ni komɛ si kɛ ya “neneene wami mi” ɔ? Enɛ ɔ tsɔɔ kaa ngɛ jeha 1,000 ɔ mi ɔ, nihi nɛ a ma tle mɛ si nɛ a ma ba le aloo a maa ya nɔ maa le Yehowa, nɛ a maa bu e kɛ Yesu tue ɔ, nyagbenyagbe ɔ, a ma ná neneene wami. (Yoh. 17:3) Enɛ ɔ maa pee “gbogboehi a si tlemi nɛ e hi saminya” pe nihi nɛ a gbo blema nɛ a tle mɛ si ɔ. (Heb. 11:35) Mɛni he je? Ejakaa adesahi nɛ a yi mluku nɛ a tle mɛ si blema a kpale gbo ekohu.
8. Ngɛ mɛni blɔ nɔ nɛ a ma tle ni komɛ si kɛ ya ‘hɛ mi si puemi mi nɛ a maa bu mɛ kaa nyangemi níhi kɛ ya daa’?
8 Se tsa pi nihi nɛ a ma tle mɛ si kɛ ba wami mi ɔ tsuo nɛ a maa kplɛ nɛ Yehowa nɛ tsɔɔ mɛ ní. Daniel gbami ɔ de ke a ma tle ni komɛ hu si kɛ ya ‘hɛ mi si puemi mi nɛ a maa bu mɛ kaa nyangemi níhi kɛ ya daa.’ Ejakaa a ma kua blɔ tsɔɔmi, nɛ a be a biɛ ngmae kɛ wo wami womi ɔ mi, nɛ a be neneene wami hu náe. Mohu ɔ, “a maa bu mɛ kaa nyangemi níhi kɛ ya daa” aloo a ma kpata a hɛ mi. Lɔ ɔ Daniel 12:2 ɔ ngɛ nyagbe nɔ́ nɛ maa ba nihi nɛ a ma tle mɛ si ɔ a nɔ ɔ he munyu tue. Nɔ́ nɛ a maa pee ngɛ a si tlemi ɔ se ɔ lɛ maa tsɔɔ nɔ́ nɛ maa ba a nɔ. * (Kpoj. 20:12) Ni komɛ ma ná neneene wami; ni komɛ hu be náe.
‘A MAA TSƆƆ NIHI BABAUU BLƆ NƐ A PEE NƆ́ NƐ DA’
9-10. Mɛni nɔ́ kpa nɛ maa ya nɔ ngɛ amanehlu ngua a se, nɛ mɛnɔmɛ lɛ “a ma kpɛ kaa pu” ɔ?
9 Kane Daniel 12:3. Mɛni ji nɔ́ kpa ko nɛ maa ya nɔ ngɛ “haomi” ɔ loo amanehlu ngua a se? Ngɛ nɔ́ nɛ Daniel 12:2 de ɔ se ɔ, kuku 3 ɔ hu tsɔɔ nɔ́ ko nɛ maa ya nɔ ngɛ amanehlu ngua a se.
10 Mɛnɔmɛ nɛ a “ma kpɛ kaa pu” ɔ? Yesu munyu nɛ e tu ngɛ Mateo 13:43 ɔ ma nyɛ maa ye bua wɔ nɛ waa na heto ɔ. Lejɛ ɔ de ke: “Jamɛ a be ɔ mi ɔ, dali ɔmɛ ma kpɛ wawɛɛ kaa pu ngɛ a Tsɛ ɔ Matsɛ Yemi ɔ mi.” Ngɛ munyu nɛ ɔ mi ɔ, Yesu ngɛ “Matsɛ Yemi ɔ mi bimɛ ɔmɛ,” nɛ ji nihi nɛ a pɔ mɛ nu nɛ a kɛ lɛ ma sɔmɔ ngɛ hiɔwe Matsɛ Yemi ɔ mi ɔ a he munyu tue. (Mat. 13:38) Lɔ ɔ he ɔ, e ma nyɛ maa pee kaa Daniel 12:3 ɔ ngɛ nihi nɛ a pɔ mɛ nu ɔ kɛ ní tsumi nɛ a ma tsu ngɛ Jeha Akpe Nɔ Yemi ɔ mi ɔ he munyu tue.
Nihi 144,000 ɔ kɛ Yesu Kristo maa pee kake kɛ nyɛɛ ní tsɔɔmi ní tsumi nɛ maa ya nɔ ngɛ jeha 1,000 ɔ mi ɔ hɛ mi (Hyɛ kuku 11)
11-12. Mɛni ní tsumi nɛ nihi 144,000 ma tsu ngɛ jeha 1,000 ɔ mi?
11 Mɛni blɔ nɔ nɛ nihi nɛ a pɔ mɛ nu ɔ maa “tsɔɔ nihi babauu blɔ konɛ a pee nɔ nɛ da”? Nihi nɛ a pɔ mɛ nu ɔ kɛ Yesu Kristo maa pee kake kɛ nyɛɛ ní tsɔɔmi ní tsumi nɛ maa ya nɔ ɔ ngɛ zugba a nɔ ngɛ jeha 1,000 ɔ mi ɔ hɛ mi. Nihi 144,000 ɔ ma sɔmɔ kaa matsɛmɛ, se pi lɔ ɔ pɛ, a ma sɔmɔ kaa osɔfohi hulɔ. (Kpoj. 1:6; 5:10; 20:6) Lɔ ɔ he ɔ, a maa ye bua kɛ ‘tsa nihi ngɛ je ɔ mi,’ nɛ bɔɔbɔɔbɔɔ ɔ, adesahi maa ye mluku. (Kpoj. 22:1, 2; Eze. 47:12) Hyɛ bɔ nɛ nihi nɛ a pɔ mɛ nu ɔ a bua maa jɔ ha!
12 Mɛnɔmɛ nɛ a piɛɛ “nihi babauu” nɛ a maa tsɔɔ mɛ blɔ nɛ a pee nɔ́ nɛ da a he? Mɛ ji nihi nɛ a ma tle mɛ si ngɛ zugba nɔ, kɛ nihi nɛ a po Hamagedɔn, kɛ eko ɔ, jokuɛwi nɛ a ma fɔ mɛ ngɛ je ehe ɔ mi. Ke jeha 1,000 ɔ ba nyagbe ɔ, adesahi nɛ a ngɛ zugba a nɔ ɔ tsuo maa ye mluku. Ke a kɛ pɛnsle ngma nɔ́ ko ɔ, o ma nyɛ ma tsu loo o gbe, se ke a kɛ pɛn ngma nɔ́ ko ɔ, o be nyɛe ma tsu loo o gbe. Ke jã a, lɛɛ mɛni be nɛ a kɛ pɛn maa ngma a biɛ ngɛ wami womi ɔ mi nɛ a be gbɛe hu?
NYAGBE KA
13-14. Mɛni nɛ e he maa hia nɛ nihi nɛ a ye mluku ngɛ zugba a nɔ ɔ nɛ́ a pee loko a ma ná neneene wami?
13 E sa nɛ wa kai kaa ke nɔ ko ye mluku ɔ, lɔ ɔ tsɔɔ we kaa bɔ fɛɛ bɔ nɛ ji ɔ, e ma ná neneene wami. Mo susu Adam kɛ Hawa he nɛ o hyɛ. A ji nihi nɛ a ye mluku, se ja a bu Yehowa Mawu tue loko a ma ná neneene wami. Aywilɛho sane ji kaa, a bui lɛ tue.—Rom. 5:12.
14 Ngɛ jeha 1,000 ɔ nyagbe ɔ, kɛ nihi nɛ a maa hi zugba a nɔ ɔ a si himi mi maa hi ha kɛɛ? Mɛ tsuo a maa pee nihi nɛ a ye mluku. Anɛ nihi nɛ a ye mluku ɔ tsuo ma fĩ Yehowa se kɛ ya neneene lo? Aloo ni komɛ maa pee a ní kaa Adam kɛ Hawa nɛ a yi anɔkuale bemi nɛ a ye mluku po ɔ lo? E he maa hia kaa wa ma ná sane bimi nɛ ɔmɛ a heto, se ngɛ mɛni blɔ nɔ?
15-16. (a) Mɛni be nɛ adesahi tsuo ma ná he blɔ kɛ tsɔɔ kaa a yeɔ Yehowa anɔkuale? (b) Mɛni maa je nyagbe ka nɛ ɔ mi kɛ ba?
15 A maa wo Satan tsu jeha 1,000. Ngɛ jamɛ a be ɔ mi ɔ, e be he blɔ náe kɛ sisi nɔ ko hu. Se ke jeha 1,000 ɔ ba nyagbe ɔ, a maa ngmɛɛ Satan he, nɛ e maa bɔ mɔde kaa e maa sisi adesahi nɛ a ye mluku ɔ. Jamɛ a be ɔ mi ɔ, adesahi ne a ye mluku tsuo ma ná he blɔ kɛ tsɔɔ heii kaa a ngɛ bu kɛ ha Mawu biɛ ɔ, nɛ a fĩ e nɔ yemi ɔ se. (Kpoj. 20:7-10) Nɔ́ nɛ nɔ ko maa pee jamɛ a be ɔ lɛ maa tsɔɔ kaa a maa ngma e biɛ ngɛ wami womi ɔ mi, nɛ́ a be gbɛe hu.
16 Baiblo ɔ de ke ni komɛ be anɔkuale yee kaa bɔ nɛ Adam kɛ Hawa pee ɔ, nɛ a ma kua Yehowa nɔ yemi ɔ. Mɛni maa ba a nɔ? Kpo Jemi 20:15 ɔ de ke: “A sake nɔ fɛɛ nɔ nɛ a nɛ kaa a ngma e biɛ ngɛ wami womi ɔ mi ɔ ngɔ wo la taku ɔ mi.” Ee, ngɛ ja mɛ a be ɔ mi ɔ, Yehowa ma kpata nihi nɛ a ma tsɔ̃ atua a hɛ mi pɛsɛpɛsɛ. Se adesahi nɛ a ye mluku ɔ a kpɛti nihi hiɛhiɛɛ maa ye manye ngɛ nyagbe ka nɛ ɔ mi. A maa ngma a biɛ ngɛ wami womi ɔ mi nɛ a be gbɛe hu gblegbleegble.
NGƐ “NYAGBE BE Ɔ MI”
17. Mɛni nɛ bɔfo ɔ de Daniel ke e maa ya nɔ ngɛ wa be nɛ ɔ mi?
17 Moo hyɛ bɔ nɛ e ngɛ bua jɔmi ha kaa wa ma susu níhi nɛ maa ya nɔ hwɔɔ se ɔ he! Jehanɛ se hu ɔ, bɔfo ko ha nɛ Daniel na nina ko kɛ kɔ ní komɛ nɛ a he hia nɛ maa ya nɔ ngɛ wa be nɛ ɔ mi, nɛ ji “nyagbe be ɔ” he. Baiblo ɔ de ke: “Nɛ mo Daniel, ngɔɔ munyu nɛ ɔ kɛ to, nɛ o sɔu womi ɔ nya kɛ ya si nyagbe be ɔ. Nihi babauu maa nyɛɛ kɛ ya kɛ ba, nɛ anɔkuale nile ɔ ma ba hiɛ babauu.” (Dan. 12:4, NW; Kane Daniel 12:8-10; 2 Tim. 3:1-5) Bɔfo ɔ de Daniel ke: “Anɔkuale nile ɔ ma ba hiɛ babauu.” Enɛ ɔ tsɔɔ kaa Mawu we bi maa nu gbamihi nɛ ngɛ Daniel womi ɔ mi ɔ sisi wawɛɛ. Bɔfo ɔ tsa nɔ ke, “yiwutsotsɛmɛ be sisi nue, a maa ya nɔ maa pee yayami.”
18. Mɛni nɛ e be kɛe nɛ́ e maa ba yiwutsotsɛmɛ a nɔ?
18 Mwɔnɛ ɔ, nihi ngɛ ní yayahi pee wawɛɛ, nɛ e pee kaa nɔ́ nɛ a gblɛ a tue ngɛ a yayami ɔmɛ a he. (Mal. 3:14, 15) E be kɛe nɛ Yesu maa kojo nihi nɛ a ngɛ kaa apletsi ɔ, nɛ e ma je mɛ kɛ je nihi nɛ a ngɛ kaa jijɔ ɔmɛ a he. (Mat. 25:31-33) Yiwutsotsɛmɛ be nyɛe maa po amanehlu ngua a, nɛ a be mɛ si tlee kɛ ya je ehe ɔ mi hulɔ. A tu “kaimi womi” he munyu ngɛ Malaki 3:16 ngɛ New World Translation Baiblo ɔ mi. Yiwutsotsɛmɛ a biɛ be womi nɛ ɔ mi hie.
19. Mɛni nɛ e sa nɛ waa pee amlɔ nɛ ɔ, nɛ mɛni he je? (Malaki 3:16-18)
19 Amlɔ nɛ ɔ ji be nɛ e sa kaa waa tsɔɔ kaa wa piɛɛ we yiwutsotsɛmɛ a he. Baiblo ɔ de ke: “Jamɛ a be ɔ mi ɔ, nihi nɛ yeɔ Yehowa gbeye ɔ kɛ a sibi tu munyu, nɔ fɛɛ nɔ kɛ e nyɛmi tu munyu, nɛ Yehowa bu tue nɛ e nu nɔ́ nɛ a ngɛ dee ɔ. Nɛ a ngma kaimi womi ko ngɛ Yehowa hɛ mi kɛ ha nihi nɛ a yeɔ Yehowa gbeye ɔ, kɛ nihi nɛ a susuɔ e biɛ ɔ he ɔ.” (Mal. 3:16, NW; Kane Malaki 3:17, 18.) Yehowa ngɛ nihi nɛ e naa mɛ kaa a ji e “nihi pɔtɛɛ,” nɛ́ a he jua wa ha lɛ ɔ, a nya buae. Ngɛ anɔkuale mi ɔ, wa suɔ nɛ waa piɛɛ a he.
Hyɛ bɔ nɛ e maa pee bua jɔmi ha kaa wa maa na Daniel, wa suɔli nɛ a gbo, kɛ nihi babauu nɛ a maa “te si” konɛ a nine nɛ su a blɔ fa mi nɔ́ ɔ nɔ ngɛ je ehe ɔ mi! (Hyɛ kuku 20)
20. Nyagbenyagbe ɔ, mɛni si nɛ a wo Daniel nɛ mɛni he je nɛ o ngɛ jamɛ a si womi ɔ mi bami ɔ blɔ hyɛe ɔ?
20 Ngɛ anɔkuale mi ɔ, wa ngɛ be nɛ e sa kadimi mi. Se níhi nɛ ma ngɛ wa hɛ mi ɔ lɛɛ, tsa pi nɔ́ bi kulaa. E be kɛe nɛ a ma kpata nimli yayamihi tsuo a hɛ mi. Lɔ ɔ se ɔ, si nɛ Yehowa wo Daniel ɔ maa ba mi. Yehowa de lɛ ke: “O maa te si ekohu, nɛ nyagbe ligbi ɔ, o nine maa su o blɔ fa mi nɔ́ ɔ nɔ.” (Dan. 12:13) Anɛ o ngɛ be nɛ Daniel kɛ nihi nɛ o suɔ mɛ nɛ a gbo ɔ maa “te si” ekohu ɔ blɔ hyɛe lo? Ke jã a, lɛɛ moo pee nɔ́ fɛɛ nɔ́ nɛ o ma nyɛ nɛ o ye anɔkuale, nɛ o ma ná nɔ mi mami kaa o biɛ nɛ a ngma ngɛ Yehowa wami womi ɔ mi ɔ maa hi mi kɛ maa ya neneene.
LA 80 “Moo Sa O Nya Nɛ O Maa Na Kaa Yehowa Hi”
^ Daniel 12:2, 3 ɔ tu ní tsɔɔmi ní tsumi ngua ko nɛ maa ya nɔ ɔ he munyu. Ní kasemi nɛ ɔ maa tsɔɔ wɔ sisi numi ehe nɛ wa ná ngɛ ní tsɔɔmi ní tsumi nɛ ɔ he. Wa maa na be nɛ ní tsɔɔmi ní tsumi nɛ ɔ maa ya nɔ, kɛ nihi nɛ a kɛ a he maa wo mi. Jehanɛ hu ɔ, wa maa na bɔ nɛ ní tsɔɔmi ní tsumi nɛ ɔ maa ye bua nihi nɛ a ngɛ zugba a nɔ ɔ ha konɛ a dla a he kɛ ha Kristo Jeha Akpe Nɔ Yemi ɔ nyagbe ka a.
^ Eko ɔ, gbogboehi a si tlemi ɔ maa je sisi kɛ je nihi nɛ a kɛ anɔkuale yemi sɔmɔ Yehowa loko a gbo ngɛ nyagbe ligbi ɔmɛ a mi ɔ a nɔ. E ma tsa nɔ senyasenya ngɛ yi nɔhi nɛ a kɛ hi si ɔmɛ a nya kɛ ya si be nɛ nihi tsuo nɛ a ngɛ Yehowa kaimi mi ɔ maa ba wami mi. Ke jã ji sane ɔ, lɛɛ nihi nɛ a hi si ngɛ be kake mi ɔ ma ná he blɔ kɛ kpee nihi nɛ a le mɛ nɛ a kɛ mɛ hi si loko a gbo ɔ. Ngmami ɔ tsɔɔ kaa níhi maa ya nɔ ngɛ “blɔ nya tomi nya” ngɛ nihi nɛ a ma tle mɛ si kɛ ya hiɔwe ɔ a blɔ fa mi. Lɔ ɔ he ɔ, wa ma nyɛ ma he ye kaa níhi maa ya nɔ ngɛ blɔ nya tomi nya ngɛ zugba a nɔ hulɔ.—1 Kor. 14:33; 15:23.
^ Sisi numi nɛ ɔ ji sisi numi ehe nɛ waa kɛ maa da munyuhi nɛ ngɛ Pay Attention to Daniel’s Prophecy! yi 17 ɔ, kɛ July 1, 1987 Hwɔɔmi Mɔ ɔ bf. 21-25 ɔ mi ɔ nane mi.
^ Ngɛ anɔkuale mi ɔ, “nihi nɛ a da” kɛ “nihi nɛ a dɛ” nɛ Ní Tsumi 24:15 ɔ tu a he munyu ɔ, kɛ “ni nɛmɛ nɛ a pee ní kpakpahi” kɛ “ni nɛmɛ nɛ a pee ní yayamihi” nɛ Yohane 5:29 ɔ tu a he munyu kaa a ma tle mɛ si ɔ, níhi nɛ a pee loko a gbo ɔ he munyu nɛ Ngmami ɔ ngɛ tue ɔ nɛ.
