1-2. Mɛni he je nɛ e sa nɛ waa kase Samson sane ɔ he ní ɔ?

 KE O nu biɛ nɛ ji Samson ɔ, mɛni baa o juɛmi mi? Eko ɔ, o susuɔ kaa Samson ji nɔ ko nɛ e ngɛ he wami wawɛɛ. Jã pɛpɛɛpɛ nɛ e ji. Se Samson mwɔ yi mi kpɔ ko nɛ ngɔ haomi kɛ ba e nɔ. Se kɛ̃ ɔ, Yehowa ngɔ e juɛmi kɛ ma níhi nɛ Samson pee konɛ e nyɛ nɛ e sɔmɔ lɛ ɔ nɔ. Lɔ ɔ he ɔ, e ha nɛ a ngma nɔ hyɛmi nɔ́ kpakpa nɛ Samson pee ɔ kɛ wo Baiblo ɔ mi konɛ wɔ hu wa ná he se.

² Yehowa gu Samson nɔ kɛ tsu nyakpɛ níhi fuu kɛ ye bua e ma nɛ ji Israel ɔ. Benɛ Samson gbo jeha lafa komɛ a se ɔ, Yehowa ha nɛ bɔfo Paulo wo e biɛ ta kɛ piɛɛ nyumu komɛ nɛ a kɛ anɔkuale yemi sɔmɔ Yehowa a he. (Heb. 11:​32-34) Samson nɔ hyɛmi nɔ́ ɔ ma nyɛ maa wo wɔ he wami wawɛɛ. Benɛ Samson kɛ nyagbahi ngɛ kpee po ɔ, e ngɔ e hɛ kɛ fɔ Yehowa nɔ. Ngɛ ní kasemi nɛ ɔ mi ɔ, wa maa hyɛ ní komɛ nɛ wa ma nyɛ maa kase kɛ je Samson nɔ hyɛmi nɔ́ ɔ mi, kɛ bɔ nɛ e nɔ hyɛmi nɔ́ ɔ ma nyɛ maa wo wɔ he wami ha.

3. Mɛni ní tsumi nɛ Yehowa kɛ wo Samson dɛ?

³ Benɛ a fɔ Samson ɔ, jamɛ a be ɔ mi ɔ, Filisti bi ɔmɛ ji nihi nɛ a ngɛ Israel ma a nɔ yee, nɛ a ngɛ mɛ yi mi wae wawɛɛ. (Many. 13:1) Akɛnɛ Filisti bi ɔmɛ wa Israel bi ɔmɛ yi mi he je ɔ, a na nɔ́ wawɛɛ. Yehowa hla Samson kaa lɛ ji nɔ nɛ e ‘maa nyɛɛ hɛ mi kɛ kpɔ̃ Israel bi ɔmɛ kɛ je Filisti bi ɔmɛ a dɛ mi.’ (Many. 13:5) Ní tsumi nɛ ɔ be gbɔjɔɔ kulaa! Loko Samson ma nyɛ ma tsu ní tsumi nɛ he wa nɛ ɔ, ja e ngɔ e hɛ kɛ fɔ Yehowa nɔ.

4. Mɛni Yehowa pee kɛ ye bua Samson nɛ e ye e he ngɛ Filisti bi ɔmɛ a dɛ mi? (Manyadali 15:​14-16)

 ⁴ Samson ngɔ e hɛ kɛ fɔ Yehowa nɔ konɛ e ye bua lɛ. Nyɛ ha nɛ wa susu nɔ hyɛmi nɔ́ ko nɛ tsɔɔ jã a he. Ligbi ko ɔ, Filisti ta buli ɔmɛ ba konɛ a ba nu Samson ngɛ Lehi. Eko ɔ, Lehi ngɛ Yuda. Yuda bi ɔmɛ a tsui po, enɛ ɔ he ɔ, a ma a juɛmi nya si kaa a maa ngɔ Samson kɛ ha Filisti bi ɔmɛ. Samson nitsɛ e ma mi bi ɔmɛ ngɔ kpã ehe enyɔ kɛ fi lɛ, nɛ a ngɔ lɛ kɛ ya ha Filisti bi ɔmɛ. (Many. 15:​9-13) Se ‘Yehowa mumi ɔ ba e nɔ wawɛɛ nitsɛ’ nɛ e tsɔ kpã amɛ, kɛkɛ nɛ e ‘na teji ku ko nɛ e gbo kɛ we tsitsa mi wu,’ nɛ e kɛ gbe Filisti nyumuhi 1,000!—Kane Manyadali 15:​14-16.

5. Mɛni blɔ nɔ nɛ teji tsitsa mi wu nɛ Samson kɛ tsu ní ɔ tsɔɔ kaa e ngɔ e hɛ kɛ fɔ Yehowa nɔ?

⁵ Mɛni he je nɛ Samson ngɔ teji tsitsa mi wu kɛ gbe ni ɔmɛ ɔ? Teji tsitsa mi wu ɔ, tsa pi ta hwumi nɔ́ ko. E ngɛ heii kaa Samson le kaa Yehowa maa ye bua lɛ konɛ e ngɔ nɔ́ saisaa nɛ́ e ma ná a kɛ ye Filisti bi ɔmɛ a nɔ kunimi. Nyumu anɔkualetsɛ nɛ ɔ ngɔ nɔ́ nɛ e nine su nɔ ɔ kɛ tsu Yehowa yi mi tomi he ní. Ngɛ anɔkuale mi ɔ, akɛnɛ Samson ngɔ e hɛ kɛ fɔ Yehowa nɔ he je ɔ, Yehowa ha nɛ e ye kunimi ngua.

6. Ke a ha wɔ ní tsumi ko ngɛ asafo ɔ mi ɔ, mɛni wa ma nyɛ maa pee kɛ kase Samson?

⁶ Ke wa nuɔ he kaa ní tsumi ko nɛ a kɛ ha wɔ ɔ he wa kaa mɛni po ɔ, Yehowa ma nyɛ ma ha wɔ he wami nɛ wa kɛ tsu. Mawu ma nyɛ maa ye bua wɔ, nɛ e maa pee wɔ nyakpɛ. Mo ná nɔ mi mami kaa ke o ya nɔ nɛ o ngɔ o hɛ kɛ fɔ Yehowa nɔ ɔ, e maa ye bua mo konɛ o nyɛ nɛ o pee e suɔmi nya ní kaa bɔ nɛ e pee ha Samson ɔ.—Abɛ 16:3.

7. Mɛni nɔ hyɛmi nɔ́ lɛ tsɔɔ kaa e he hia wawɛɛ kaa waa ngɔ wa hɛ kɛ fɔ Yehowa blɔ tsɔɔmi nɔ?

⁷ Nyɛmimɛ babauu nɛ a ngɔ a he kɛ ha kɛ maa asafo ɔ tsuhi ɔ, ngɔɔ a hɛ kɛ fɔɔ Yehowa nɔ. Be ko nɛ be ɔ, ke e sa nɛ a ma Matsɛ Yemi Asa ehehi loo asafo ɔ tsu kpahi ɔ, nyɛmimɛ ɔmɛ nɔuu lɛ a toɔ tsu ɔ tɛnimi he blɔ nya, nɛ a maa. Se akɛnɛ Yehowa asafo ɔ yi ngɛ blie he je ɔ, e he ba hia nɛ a pee tsakemi komɛ. Nyɛmimɛ nyumuhi nɛ a nyɛɛɔ hɛ mi ɔ sɔle kɛ bi Yehowa blɔ tsɔɔmi, nɛ a kɛ blɔ nya tomi ehehi bɔni ní tsumi. Kaa nɔ hyɛmi nɔ́ ɔ, a heɔ  tsuhi nɛ a ma momo nɛ a dlaa. Robert nɛ lingmi nɛ ɔ, e ye kɛ bua kɛ ma asafo ɔ tsuhi babauu ngɛ je kɛ wɛ ɔ de ke: “Sisije ɔ, ni komɛ ná we lɛ gbɔjɔɔ kaa a kɛ blɔ tsɔɔmi ehe nɛ ɔ ma tsu ní.” E de hu ke: “Blɔ tsɔɔmi nɛ ɔ je ekpa kulaa ngɛ nɔ́ nɛ wa kɛ tsu ní ngɛ jehahi nɛ be ɔ mi ɔ he. Se nyɛmimɛ ɔmɛ a bua jɔ he kaa a kɛ tsakemi nɛ ɔ ma tsu ní, nɛ e ngɛ heii kaa Yehowa ngɛ tsakemi nɛ ɔmɛ a nɔ jɔɔe.” Enɛ ɔ ji nɔ hyɛmi nɔ́ kake ko nɛ tsɔɔ bɔ nɛ Yehowa ngɛ e we bi blɔ tsɔɔe ha konɛ a nyɛ nɛ a tsu e yi mi tomihi a he ní. E sa nɛ wɔ tsuo waa pɔ wa he bimi ke, ‘Anɛ i hlaa Yehowa blɔ tsɔɔmi se blɔ, nɛ i pee klaalo kaa ma pee tsakemihi bɔ nɛ pee nɛ ma nyɛ nɛ ma sɔmɔ Yehowa ngɛ blɔ nɛ e ngɛ hlae ɔ nɔ lo?’

8. Ligbi ko nɛ kuma ngɛ Samson yee wawɛɛ ɔ, mɛni e pee?

⁸ Eko ɔ, o kane ní nguanguahi kpa komɛ nɛ Samson pee ɔ a he ní hyɛ. Be ko ɔ, lɛ nɔ kake pɛ e gbe jata, nɛ pee se hu ɔ, lɛ nɔ kake pɛ e kpata nyumuhi 30 komɛ a hɛ mi ngɛ Filisti bi ɔmɛ a ma nɛ ji Ashkelon ɔ mi. (Many. 14:​5, 6, 19) Samson le kaa ke pi Yehowa nɛ ye bua lɛ ɔ, jinɛ e ko nyɛ we ní nɛ ɔmɛ peemi. Odase nɛ maa enɛ ɔ nɔ mi ji benɛ Samson gbe Filisti bi 1,000 nɛ lɔ ɔ se ɔ, kuma bɔni lɛ yemi ɔ. Mɛni nɛ e pee? Samson de we ke lɛ nitsɛ e ma ya hla nyu nɛ e nu, mohu ɔ, e bi Yehowa yemi kɛ buami.—Many. 15:18.

9. Benɛ Samson kpa Yehowa pɛɛ kaa e ye bua lɛ ɔ, mɛni Yehowa pee? (Manyadali 15:19)

⁹ Yehowa ha Samson sɔlemi ɔ heto, nɛ e gu nyakpɛ blɔ nɔ kɛ ha lɛ nyu. Benɛ Samson nu nyu ɔ ta a, “e hɛ mi tsɔ lɛ, nɛ e ná he wami ekohu.” (Kane Manyadali 15:19.) Nyu nɛ je zugba a mi kɛ ba nɛ Samson nu eko ɔ, hi si jehahi babauu, nɛ benɛ Yehowa gu gbalɔ Samuel nɔ kɛ ngma Manyadali a womi ɔ po ɔ, e ngɛ loloolo. Enɛ ɔ he ɔ, be fɛɛ be nɛ Israel bi ɔmɛ maa na nyu nɛ ɔ nɛ ngɛ bee ɔ, eko ɔ, a ma kai kaa Yehowa yeɔ bua e sɔmɔli anɔkualetsɛmɛ ngɛ haomi behi a mi ke a ngɔ a hɛ kɛ fɔ e nɔ ɔ.

10. Ke wa suɔ nɛ Yehowa nɛ e ye bua wɔ ɔ, mɛni e sa nɛ waa pee? (Hyɛ foni ɔ hulɔ.)

¹⁰ Ke wa ngɛ nyɛmi ko loo wa nyɛɔ tsuɔ nɔ́ ko he ní saminya ngɛ Yehowa sɔmɔmi mi po ɔ, loloolo ɔ, e sa nɛ wɔ hu waa ngɔ wa hɛ kɛ fɔ Yehowa nɔ be fɛɛ be. E sa nɛ waa je he si bami mi nɛ waa kplɛɛ nɔ kaa ja wa ngɔ wa hɛ kɛ fɔ Yehowa nɔ loko wa ma nyɛ maa ye manye ngɛ si himi mi. Kaa bɔ nɛ Samson ná he wami ekohu akɛnɛ e nu nyu nɛ Yehowa kɛ ha lɛ ɔ he je ɔ, jã nɔuu kɛ̃ nɛ wɔ hu, e sa nɛ waa kplɛɛ Yehowa yemi kɛ buami nɔ konɛ wa nyɛ nɛ waa ya nɔ nɛ waa ye lɛ anɔkuale.—Mat. 11:28.

11. Mɛni blɔ nɔ wa maa gu kɛ ná Yehowa yemi kɛ buami ɔ he se kɛ pi si? Mo ha enɛ ɔ he nɔ́ he tomi nɔ́.

¹¹ Mo susu nyɛminyumu Aleksey nɔ hyɛmi nɔ́ ɔ he nɛ o hyɛ. E piɛɛ nyɛmimɛ nɛ a ngɛ mɛ yi mi wae wawɛɛ ngɛ Russia a he. Mɛni lɛ ye bua lɛ nɛ e nyɛ nɛ e ngɛ si fĩe ngɛ si fɔfɔɛhi nɛ a mi wa nɛ ɔ mi? E kɛ e yo ɔ to blɔ nya konɛ a nyɛ nɛ a kane Baiblo ɔ be fɛɛ be, nɛ a peeɔ ní kpahi nɛ ma ha nɛ huɛ bɔmi kpakpa nɛ hi a kɛ Yehowa a kpɛti. E de ke: “I bɔɔ mɔde kaa ma kase ní ngɛ ye dɛ he, nɛ ma kane Baiblo ɔ be fɛɛ be. Daa mɔtu ɔ, i kɛ ye yo ɔ susuɔ daa ligbi ngmami ɔ he nɛ wa blaa kɛ sɔleɔ.” Mɛni wa kaseɔ ngɛ níhi a si kpami nɛ ɔ mi? E sa nɛ waa ngɔ wa hɛ kɛ fɔ Yehowa nɔ mohu pe nɛ waa kɛ wa hɛ maa fɔ wɔ nitsɛmɛ wa he nɔ. Ngɛ mɛni blɔ nɔ? E sa nɛ waa pee níhi nɛ maa fia wa hemi kɛ yemi ɔ kɛ ma si. Ní nɛ ɔmɛ ekomɛ ji, Baiblo ɔ kanemi, sɔlemi, asafo mi kpe nɛ wa maa ya, kɛ fiɛɛmi ní tsumi ɔ nɛ wa ma tsu be fɛɛ be. Ke wa pee jã a, Yehowa maa jɔɔ  mɔde nɛ wa ngɛ bɔe kaa wa ma sɔmɔ lɛ ɔ nɔ. E maa wo wɔ he wami kaa bɔ nɛ e pee ha Samson ɔ.

12. Mɛni yi mi kpɔ ko nɛ dɛ nɛ Samson mwɔ, nɛ mɛni he je nɛ wa ma nyɛ ma de ke e kɛ Delila huɛ bɔmi ɔ ngɛ slɔɔto ɔ?

¹² Samson yi mluku kaa wɔ nɔuu, enɛ ɔ he ɔ, be komɛ ɔ, e mwɔɔ yi mi kpɔ komɛ nɛ dɛ. Yi mi kpɔ kake ko nɛ e mwɔ ɔ ngɔ haomi nguahi kɛ ba e nɔ. Benɛ Samson sɔmɔ kaa kojolɔ be bɔɔ ɔ, e ‘ná yo ko nɛ ngɛ Sorek Kɔ̃ ɔ mi nɛ a tsɛɛ lɛ ke Delila a he suɔmi.’ (Many. 16:4) Be ko nɛ be ɔ, jinɛ Samson suɔ kaa e kɛ yo ko nɛ e je Filisti ɔ nɛ sɛ gba si himi mi, nɛ enɛ ɔ ji ‘Yehowa nitsɛ yi mi tomi.’ Yehowa pee jã bɔ nɛ pee nɛ e kɛ “ná Filisti bi ɔmɛ a he blɔ,” nɛ́ e kpata a hɛ mi. Pee se ɔ, Samson ya hi yo yaholɔ ko ngɔ ngɛ Filisti bi ɔmɛ a ma nɛ ji Gaza a mi. Jamɛ a be ɔ mi ɔ, Yehowa ha Samson he wami nɛ e hia ma a agbo ɔ sinya amɛ, nɛ enɛ ɔ ha nɛ ma a be he piɛ pomi ko hu. (Many. 14:​1-4; 16:​1-3) Se Delila lɛɛ e ma nyɛ maa ba kaa e ji Israel no. Lɔ ɔ he ɔ, huɛ bɔmi nɛ́ ba hi e kɛ Samson a kpɛti ɔ lɛɛ tsa pi he blɔ ko nɛ Samson ná nɛ e kɛ maa hwu kɛ si Filisti bi ɔmɛ.

13. Mɛni nɛ Delila ha nɛ Samson pee?

¹³ Delila ngɔ sika ngua ko ngɛ Filisti bi ɔmɛ a dɛ konɛ e tsɔɔ Samson se blɔ. Eko ɔ, akɛnɛ Samson suɔ Delila wawɛɛ he je ɔ, e nyɛ we nɛ e yɔse nɔ́ nɛ e ngɛ hlae nɛ e pee ɔ. Se bɔ fɛɛ bɔ nɛ e ji ɔ, Delila nyɛ Samson nɔ si abɔ kaa e tsɔɔ lɛ nɔ́ he je nɛ e ngɛ he wami wawɛɛ ɔ. Nɛ nyagbenyagbe ɔ, Samson tsɔɔ lɛ nɔ́ he je. Aywilɛho sane ji kaa nɔ́ nɛ Samson pee ɔ ha nɛ e he wami ɔ je e dɛ, nɛ Yehowa kplɛɛ we e nɔ hu kɛ ya si be ko.—Many. 16:​16-20.

14. Mɛni haomihi nɛ Samson kɛ kpe akɛnɛ e he Delila ye ɔ he je?

¹⁴ Samson kɛ haomi nguahi kpe, ejakaa e he  Delila mohu ye pe Yehowa. Filisti bi ɔmɛ nu Samson nɛ a ta e hɛ ngmɛ. Lɔ ɔ se ɔ, a wo lɛ tsu ngɛ Gaza nɛ ji he nɛ e hia ma agbo ɔmɛ ngɛ be ko nɛ be ɔ. Nɛ a ha nɛ e wɛɛ ngma ngɛ he nɛ a wo lɛ tsu ngɛ ɔ. Lɔ ɔ se ɔ, ligbi ko nɛ Filisti bi ɔmɛ bua a he nya nɛ a ngɛ gbijlɔ ko yee ɔ, a ya ngɔ Samson kɛ ba lejɛ ɔ nɛ a ye e he fɛu. Filisti bi ɔmɛ sã afɔle ngua ko kɛ ha a lakpa mawu nɛ ji Dagon ɔ, ejakaa a susu kaa lɛ nɛ e ye bua mɛ nɛ a nine su Samson nɔ. A ya je Samson ngɛ tsu womi he ɔ kɛ ba, ejakaa a suɔ nɛ e ‘ba wo a nya muɔ bɔɔ,’ nɛ́ a ye e he fɛu.—Many. 16:​21-25.

15. Mɛni Samson pee kɛ tsɔɔ kaa e ngɔ e hɛ kɛ fɔ Yehowa nɔ ekohu? (Manyadali 16:​28-30) (Hyɛ foni nɛ ngɛ womi ɔ hɛ mi ɔ.)

¹⁵ E ngɛ mi kaa Samson tɔ̃ tɔmi nɛ hɛdɔ ngɛ he mohu lɛɛ, se e kɔni mi jɔ̃ we. Samson le kaa Yehowa suɔ nɛ e kpata Filisti bi ɔmɛ a hɛ mi, lɔ ɔ he ɔ, e hla blɔhi a nɔ nɛ e maa gu kɛ pee jã. (Kane Manyadali 16:​28-30.) Samson kpa Yehowa pɛɛ nɛ e de lɛ ke: ‘Ha nɛ ma ye ye he lue ngɛ Filisti bi ɔmɛ a nɔ.’ Yehowa nɛ e ji anɔkuale Mawu ɔ ha Samson sɔlemi ɔ heto nɛ e ha lɛ e he wami ɔ ekohu. Enɛ ɔ he ɔ, Samson gbe Filisti bi nɛ a he hyɛ wawɛɛ nitsɛ pe nihi nɛ e gbe kɛ be ɔ po.

16. Mɛni wa ma nyɛ maa kase ngɛ tɔmi nɛ Samson tɔ̃ ɔ mi?

¹⁶ E ngɛ mi kaa Samson na nɔ́ nɛ e pee ɔ mi nɔ́ mohu lɛɛ, se e bɔ mɔde kaa e maa ya nɔ maa pee Yehowa suɔmi nya ní. Ke wa tɔ̃ tɔmi ko nɛ a kã wa hɛ mi loo he blɔ ko nɛ wa ngɛ ɔ je wa dɛ ɔ, e sɛ nɛ wa kɔni mi nɛ jɔ̃. E sa nɛ wa kai kaa Yehowa pee klaalo kaa e kɛ wa tɔmi ɔ maa ke wɔ. (La 103:​8-10) E ngɛ mi kaa wa tɔ̃ɔ mohu lɛɛ, se Yehowa ma nyɛ maa wo wɔ he wami konɛ waa pee e suɔmi nya ní kaa bɔ nɛ e pee ha Samson ɔ.

17-18. Mɛni nɛ o bua jɔ he ngɛ Michael nɔ hyɛmi nɔ́ ɔ he nɛ́ e ma nyɛ maa wo mo he wami? (Hyɛ foni ɔ hulɔ.)

¹⁷ Mo susu nyɛminyumu wayoo ko nɛ a tsɛɛ lɛ ke Michael ɔ nɔ hyɛmi nɔ́ ɔ he nɛ o hyɛ. Michael tsuɔ babauu ngɛ Yehowa sɔmɔmi mi, nɛ e sɔmɔɔ kaa asafo mi sɔmɔlɔ kɛ daa blɔ gbalɔ. Se aywilɛho sane ji kaa e tɔ̃ tɔmi ko nɛ lɔ ɔ ha nɛ he blɔhi nɛ e ngɛ ngɛ asafo ɔ mi ɔ je e dɛ. E de ke, “Loko ma tɔ̃ tɔmi nɛ ɔ, i kɛ hɛdɔ tsuɔ ye blɔ nya ní tsumihi a he ní ngɛ asafo ɔ mi. Kɛkɛ nɛ si kake too ɔ, i nu he kaa i be nyɛe ma pee nɔ́ ko ngɛ Yehowa sɔmɔmi mi hu. I le kaa Yehowa be mi kuae mohu lɛɛ, se i biɔ ye he ke ji huɛ bɔmi kpakpa ma nyɛ maa hi i kɛ Yehowa wa kpɛti ekohu kaa bɔ nɛ e ji be ko nɛ be ɔ,  aloo ke ma nyɛ ma je ye tsui tsuo mi kɛ sɔmɔlɔ lɛ ngɛ asafo ɔ mi kaa bɔ nɛ i pee be ko nɛ be ɔ lo.”

¹⁸ Ngɛ anɔkuale mi ɔ, Michael kɔni mi jɔ̃ we. E de ke: “Akɛnɛ i suɔ nɛ huɛ bɔmi kpakpa nɛ hi i kɛ Yehowa wa kpɛti he je ɔ, i sɔleɔ kɛ jeɔ ye tsui mi, i kaseɔ ní, nɛ i pueɔ ye yi mi tɛ ngɛ níhi nɛ i kaseɔ ɔ he be fɛɛ be.” Pee se ɔ, Michael ba ná he blɔ ngɛ asafo ɔ mi ekohu. Amlɔ nɛ ɔ, e ngɛ sɔmɔe kaa asafo mi nɔkɔtɔma kɛ daa blɔ gbalɔ. E de ke: “Nyɛmimɛ ɔmɛ ye bua mi nɛ a wo mi he wami. Jehanɛ hu ɔ, yemi kɛ buami nɛ asafo mi nikɔtɔma amɛ kɛ ha mi ɔ ha nɛ i na kaa Yehowa suɔ mi loloolo. Amlɔ nɛ ɔ, i kɛ he nile kpakpa ngɛ sɔmɔe ngɛ asafo ɔ mi. Ye níhi a si kpami ɔ ha nɛ i na kaa ke nɔ ko tɔ̃ nɛ e tsake e tsui niinɛ ɔ, Yehowa maa ngɔ kɛ ke lɛ.” Ke wa tɔ̃ tɔmi komɛ nɛ wa bɔ mɔde nɛ wa dla wa blɔ ɔmɛ nɛ wa ngɔ wa hɛ kɛ fɔ Yehowa nɔ ɔ, wa ma nyɛ ma ná nɔ mi mami kaa Yehowa kɛ wɔ ma tsu ní nɛ e maa jɔɔ wɔ wawɛɛ.—La 86:5; Abɛ 28:13.

19. Mɛni blɔ nɔ nɛ Samson nɔ hyɛmi nɔ́ ɔ wo mo he wami?

¹⁹ Ngɛ ní kasemi nɛ ɔ mi ɔ, wa susu ní komɛ nɛ ya nɔ ngɛ Samson si himi mi ɔ he. Wa ba na kaa Samson yi mluku mohu lɛɛ, se e kɔni mi jɔ̃ we ngɛ Yehowa sɔmɔmi mi ngɛ tɔmi nɛ Delila ha nɛ e tɔ̃ ɔ tsuo se. Yehowa hu kɔni mi jɔ̃ we ngɛ Samson he. Mawu kɛ lɛ tsu ní ekohu ngɛ blɔ ngua ko nɔ. Ngɛ nɔ́ nɛ ya nɔ ɔ tsuo se ɔ, Yehowa ya nɔ nɛ e na Samson kaa e ji nɔ ko nɛ e ngɛ hemi kɛ yemi wawɛɛ, nɛ e ha nɛ a wo e biɛ ta kɛ piɛɛ nimli anɔkualetsɛmɛ nɛ a tu a he munyu ngɛ Hebri Bi yi 11 ɔ a he. E ji bua jɔmi sane kaa wa hiɔwe Tsɛ nɛ e ngɛ suɔmi nɛ wa ngɛ lɛ sɔmɔe ɔ woɔ wɔ he wami, titli ɔ, ke waa kɛ nyagbahi ngɛ kpee nɛ wa hia e yemi kɛ buami! Enɛ ɔ he ɔ, kaa bɔ nɛ Samson pee ɔ, nyɛ ha nɛ wɔ hu wa kpa Yehowa pɛɛ nɛ wa de lɛ ke: ‘I kpa mo pɛɛ, mo kai mi jehanɛ. Mawu lee, moo wo mi he wami.’—Many. 16:28.