JEHA nɛ be ɔ, a hla nyumuhi babauu ngɛ Yehowa asafo ɔ mi kaa asafo mi nikɔtɔmahi kɛ asafo mi sɔmɔli ngɛ je kɛ wɛ. Ke o piɛɛ nyɛmimɛ nɛ ɔmɛ a he ɔ, lɛɛ atsinyɛ jemi ko be he kaa o bua jɔ sɔmɔmi he blɔ ehe nɛ o ná nɛ ɔ he wawɛɛ nitsɛ.

Eko ɔ, he blɔ nɛ o ná a ma ha nɛ o ye gbeye bɔɔ, se sisi numi ngɛ he. Niheyo wayoo ko nɛ a tsɛɛ lɛ ke Jason nɛ e ji asafo mi nɔkɔtɔma a de ke: “Benɛ a hla mi kaa asafo mi nɔkɔtɔma a, i nu he kaa ní tsumi ɔ kle pe mi.” Mose kɛ Yeremia susu kaa a be nyɛe ma tsu ní tsumi nɛ Yehowa kɛ wo a dɛ ɔ. (2 Mose 4:10; Yer. 1:6) Ke mo hu o nuɔ he jã a, kɛ o ma plɛ kɛ tsu si fɔfɔɛ nɛ ɔ he ní ha kɛɛ konɛ o ya o hɛ mi? Mo susu Kristo kaselɔ Timoteo nɔ hyɛmi nɔ́ ɔ he nɛ o hyɛ.​—Níts. 16:1-3.

Eko ɔ, benɛ Timoteo ye maa pee jeha 20 ɔ nɛ bɔfo Paulo ha nɛ e ba piɛɛ e he kɛ tsu ma se sane kpakpa fiɛɛmi ní tsumi ɔ nɛ. Akɛnɛ e wɛ tsɔ he je ɔ, eko ɔ, sisije ɔ, e ma susu kaa e he sui, nɛ lɔ ɔ ma ha nɛ e gbla e nane si ngɛ ní tsumi ehe nɛ a kɛ wo e dɛ ɔ he. (1 Tim. 4:11, 12; 2 Tim. 1:1, 2, 7) Se jeha nyɔngma se ɔ, Paulo de asafo nɛ ngɛ Filipi ɔ ke: “I ngɛ hɛ kɛ nɔ fɔmi ngɛ Nyɔmtsɛ Yesu . . . mi kaa e be kɛe nɛ ma tsɔ Timoteo nyɛ ngɔ . . . Ejakaa i be nɔ kpa ko hu nɛ e su ngɛ kaa e nɔ́ ɔ.”​—Filip. 2:19, 20.

Mɛni lɛ ha nɛ Timoteo ba pee asafo mi nɔkɔtɔma nɛ e bɔɔ mɔde ɔ? Ha nɛ wa susu níhi ekpa nɛ wa ma nyɛ maa kase ngɛ e nɔ hyɛmi nɔ́ ɔ mi ɔ he.

1. E susuɔ nihi a he, nɛ e yeɔ bua mɛ. Paulo de Kristofohi nɛ a ngɛ Filipi ɔ ke: “[Timoteo] maa je e tsui mi kɛ susu nyɛ hiami níhi a he.” (Filip. 2:20) Ngɛ anɔkuale mi ɔ, Timoteo susuɔ nɔ he. E suɔ nɛ e ye bua nyɛmimɛ ɔmɛ konɛ a hɛ kɛ su Yehowa he, nɛ e ngɔ lɛ nitsɛ e he kɛ ha mɛ faa.

E sɛ nɛ o pee o ní kaa dlɛɛva ko nɛ sumi nɛ e ma ya su he nɛ e yaa a he hia lɛ pe nihi nɛ e ma wo ngɛ blɔ ɔ he. Asafo mi nɔkɔtɔma ko nɛ a tsɛɛ lɛ ke William nɛ e kɛ jeha 20 kɛ se sɔmɔ ɔ wo asafo mi nikɔtɔma ehehi ga ke: “Nyɛɛ suɔ nyɛmimɛ ɔmɛ. Nyɛɛ ngɔ nyɛ juɛmi kɛ ma a hiami níhi a nɔ mohu pe blɔ nya ní tsumihi nɛ ngɛ nyɛ nɔ ɔ a nɔ.”

2. E ha nɛ fiɛɛmi ní tsumi ɔ pee nɔ́ titli ngɛ e si himi mi. Benɛ Paulo ngɔ Timoteo si himi kɛ to ni kpahi a nɔ́ he ɔ, e de ke: “Ni kpa amɛ tsuo ngɛ mɛ nitsɛmɛ a nɔ́ mi foe, se pi Yesu Kristo nɔ́ mi.” (Filip. 2:21) Paulo ngma jamɛ a sɛ womi ngɛ Roma. E yɔse kaa nyɛmimɛ nɛ a ngɛ Roma a ngɔ a be tsuo kɛ ngɛ he lo nya níhi a se die. A tsu fiɛɛmi ní tsumi ɔ eko kɛ eko kɛkɛ. Se Timoteo lɛɛ e pee we jã! Benɛ e ná he blɔhi kaa e ma bli e sɔmɔmi ní tsumi ɔ mi ɔ, e pee e ní kaa Yesaya. Yesaya de ke: “I ngɛ hiɛ ɔ! Moo tsɔ mi!”​—Yes. 6:8.

Kɛ o ma pee kɛɛ konɛ o nyɛ nɛ o ngmɛ pɛpɛɛpɛ ngɛ o Mawu jami kɛ mo nitsɛ o blɔ nya ní tsumihi a mi? Kekleekle ɔ, mo tsu níhi nɛ a he hia amɛ a he ní kekle. Paulo wo wɔ he wami ke: “Nyɛɛ le níhi nɛ a he hia wawɛɛ ɔ.” (Filip. 1:10) Ngɔɔ níhi nɛ a he hia Mawu ɔ kɛ sɛ hlami. Nɔ́ nɛ ji enyɔ, moo pee o si himi kpokploo. Mo gbɔ níhi nɛ a he hia we nɛ a ngɔɔ o be kɛ o he wami ɔ a nɔ.  Paulo wo Timoteo he wami ke: “Tuu nihewi a we akɔnɔhi a nya fo, se moo di dami, hemi kɛ yemi, suɔmi, [kɛ] tue mi jɔmi se.”​—2 Tim. 2:22.

3. E pee we hejɔ̃ ngɛ e sɔmɔmi ní tsumi ɔ mi. Paulo kai Filipi bi ɔmɛ ke: “Nyɛ le odase nɛ [Timoteo] ye ngɛ lɛ nitsɛ e he ɔ, e piɛɛ ye he kɛ sɔmɔ kaa bi kɛ e tsɛ konɛ sane kpakpa a nɛ ya nɔ.” (Filip. 2:22) Timoteo pee we hejɔ̃. E piɛɛ Paulo he kɛ tsu ní wawɛɛ, nɛ enɛ ɔ ha nɛ suɔmi nɛ ngɛ a kpɛti ɔ mi ba wa.

Mwɔnɛ ɔ, ní tsumi fuu ngɛ Yehowa asafo ɔ mi. Ní tsumi nɛ ɔmɛ haa nɔ bua jɔmi, nɛ a ma ha nɛ o hɛ kɛ su o nyɛmimɛ ɔmɛ a he. Enɛ ɔ he ɔ, ngɔɔ kɛ pee oti kaa o ma “tsu babauu ngɛ Nyɔmtsɛ ɔ ní tsumi ɔ mi.”​—1 Kor. 15:58.

4. E kɛ níhi nɛ e kase ɔ tsu ní. Paulo ngma kɛ ya ha Timoteo ke: “Moo lɛɛ o nyɛɛ ní nɛ ɔmɛ a se haa: ye tsɔɔmi ɔ, ye je mi bami ɔ, ye yi mi tomi ɔ, ye hemi kɛ yemi ɔ, ye tsui si tomi ɔ, ye suɔmi ɔ, [kɛ] ye si fimi ɔ.” (2 Tim. 3:10) Akɛnɛ Timoteo kɛ níhi nɛ e kase ɔ tsu ní he je ɔ, e he su kɛ ha blɔ nya ní tsumihi nɛ a mi jiɔ.​—1 Kor. 4:17.

Anɛ o ngɛ huɛ ko nɛ e wa ngɛ jeha mi nɛ e nane pi si ngɛ Mawu jami mi nɛ o ma nyɛ maa kase lɛ lo? Ke o be huɛ ko kaa jã a, lɛɛ moo bɔ mɔde nɛ o hla eko. Tom nɛ e kɛ jehahi fuu sɔmɔ kaa asafo mi nɔkɔtɔma a de ke: “Asafo mi nɔkɔtɔma ko nɛ e ngɛ níhi a si kpami ɔ gbla mi kɛ wo e he, nɛ e tsɔse mi saminya. Be fɛɛ be ɔ, i biɔ lɛ ga womi, nɛ i kɛ e ga womi ɔ tsuɔ ní. Enɛ ɔ ha nɛ i ba ná hɛ kɛ nɔ fɔmi kaa ke a ngɔ ní tsumi ko kɛ wo ye dɛ ɔ, ma nyɛ ma tsu.”

5. E ya nɔ nɛ e tsɔse e he. Paulo wo Timoteo he wami ke: “Oti nɛ [e sa nɛ] o kɛ ma o hɛ mi ji kaa o kɛ Mawu jami ma tsɔse o he.” (1 Tim. 4:7) Fo kalɔ hia coach nɛ ma tsɔse lɛ, se kɛ̃ ɔ, e sa nɛ lɛ nitsɛ hu e tsɔse e he. Paulo wo Timoteo ga ke: “Yaa nɔ nɛ o ngɔ o juɛmi kɛ ma ní kanemi ngɛ nihi a hɛ mi, ga womi, kɛ ní tsɔɔmi nɔ. . . . Susu ní nɛ ɔmɛ a he wawɛɛ; ngɔɔ o he kɛ wo a mi kulaa, bɔ nɛ pee nɛ o nɔ yami ɔ nɛ je kpo heii konɛ nihi tsuo nɛ a na.”​—1 Tim. 4:13-15.

E he hia nɛ mo hu o ya o hɛ mi ngɛ níhi nɛ o le peemi ɔ mi. Moo kase ní wawɛɛ nɛ o kadi blɔ tsɔɔmi ehehi nɛ asafo ɔ kɛ haa a. Jehanɛ hu ɔ, koo ngɔ o hɛ kɛ fɔ o he nɔ nɛ o susu kaa o ngɛ níhi a si kpami nɛ o kɛ ma tsu níhi a he ní be mi nɛ o hla we níhi a mi. Moo kase Timoteo nɛ o “hyɛ mo nitsɛ o he nɔ kɛ o ní tsɔɔmi ɔ hu nɔ saminya.”​—1 Tim. 4:16.

6. E ha nɛ Yehowa mumi ɔ ye bua lɛ. Paulo wo Timoteo ga ngɛ fiɛɛmi ní tsumi ɔ he, nɛ e de lɛ ke: “Moo gu mumi klɔuklɔu ɔ nɛ e ngɛ wa mi ɔ nɔ kɛ bu juetli kpakpa nɛ ɔ he.” (2 Tim. 1:14) Bɔ nɛ pee nɛ Timoteo nɛ e nyɛ nɛ ya nɔ nɛ e tsu fiɛɛmi ní tsumi ɔ, e ha nɛ Mawu mumi ɔ ye bua lɛ.

Donald nɛ e kɛ jehahi fuu sɔmɔ kaa asafo mi nɔkɔtɔma a de ke: “E sa nɛ asafo mi nikɔtɔmahi kɛ sɔmɔli nɛ a na huɛ bɔmi nɛ ngɛ a kɛ Mawu a kpɛti ɔ kaa nɔ́ ko nɛ he hia wawɛɛ. Ni nɛmɛ nɛ a naa huɛ bɔmi nɛ ɔ kaa e he hia a ma ‘ná he wami ehe’ daa. Ke a sɔle nɛ Mawu ha mɛ e mumi ɔ, nɛ a ngɛ mumi ɔ yiblii ɔ woe ɔ, a nyɛmimɛ ɔmɛ ma ná a he se wawɛɛ.”​—La 84:7; 1 Pet. 4:11.

Ke wa na asafo mi nikɔtɔmahi kɛ sɔmɔli ehehi kaa mo nɛ́ a ngɛ a hɛ mi yae ngɛ Mawu jami mi ɔ, wa bua jɔɔ wawɛɛ. Jason nɛ wa wo e ta ngɛ munyu nɛ ɔ sisije ɔ de ke: “Benɛ i ba pee asafo mi nɔkɔtɔma a, i kase níhi fuu, nɛ enɛ ɔ ha nɛ i naa kaa ní tsumi fɛɛ ní tsumi nɛ a ma ha mi ɔ, ma nyɛ ma tsu. Amlɔ nɛ ɔ, ye bua jɔ sɔmɔmi ní tsumi nɛ a kɛ wo ye dɛ ɔ he nɛ i naa lɛ kaa e ji he blɔ ngua nɛ i ná!”

Anɛ o ma ha nɛ Yehowa nɛ e ya nɔ nɛ e kɛ mo nɛ tsu ní lo? Ngɔɔ kɛ pee oti kaa o maa kase Timoteo. Ke o pee jã a, mo hu o nyɛmimɛ ɔmɛ ma ná o he se wawɛɛ.