1. Kaa bɔ nɛ a tsɔɔ nya ngɛ Efeso Bi 6:10-13 ɔ, mɛni ji blɔ kake nɛ Yehowa guɔ nɔ kɛ tsɔɔ kaa e susuɔ wa he? Moo tsɔɔ nya.

BLƆ kake nɛ Yehowa guɔ nɔ kɛ tsɔɔ kaa e susuɔ wa he ji kaa e yeɔ bua wɔ konɛ wa nyɛ nɛ waa hwu kɛ si wa he nyɛli, titli ɔ, Satan kɛ e daimonio ɔmɛ. Yehowa bɔ wɔ kɔkɔ ngɛ wa he nyɛli nɛ ɔmɛ a he, nɛ e tsɔɔ wɔ nɔ́ nɛ wa ma nyɛ maa pee konɛ waa hwu kɛ si mɛ. (Kane Efeso Bi 6:10-13.) Ke waa kɛ wa hɛ fɔ Yehowa nɔ, nɛ wa ha nɛ e ye bua wɔ ɔ, wa ma nyɛ maa te si kɛ wo Abosiami. Wa ma nyɛ ma ná nɔ mi mami kaa wa maa ye wa he nyɛli ɔmɛ a nɔ kunimi. Bɔfo Paulo de ke: “Ke Mawu ngɛ kɛ ha wɔ ɔ, lɛɛ mɛnɔ maa te si kɛ wo wɔ?”​—Rom. 8:31.

2. Mɛni he wa ma susu ngɛ ní kasemi nɛ ɔ mi?

² Anɔkuale Kristofohi lɛɛ, waa kɛ wa juɛmi ma we níhi nɛ Satan kɛ e daimonio ɔmɛ peeɔ ɔ a nɔ tsɔ. Mohu ɔ, waa kɛ wa juɛmi maa Yehowa he ní kasemi kɛ Yehowa sɔmɔmi nɔ titli. (La 25:5) Se kɛ̃ ɔ, e he hia nɛ waa le níhi nɛ Satan peeɔ ɔmɛ. Mɛni he je? Konɛ e ko sisi wɔ. (2 Kor. 2:11, sisi ningma) Ngɛ ní kasemi nɛ ɔ mi ɔ, wa ma susu blɔ pɔtɛɛ ko nɛ Satan kɛ e daimonio ɔmɛ guɔ nɔ kɛ sisiɔ nihi ɔ he. Jehanɛ hu ɔ, wa maa hyɛ blɔ nɔ nɛ wa maa gu kɛ te si kɛ wo mɛ.

3-4. (a) Mɛni ji ní komɛ nɛ kɛ mumi yayami ɔmɛ ngɛ tsakpa? (b) Nihi enyɛmɛ nɛ a heɔ ní nɛ ɔmɛ yeɔ?

³ Satan guɔ daimonio ɔmɛ a nɔ titli kɛ jeɔ nihi kɛ jeɔ Mawu  he. Nihi nɛ a kɛ mumi yayamihi tsuɔ ní ɔ tsɔɔ kaa a le níhi nɛ adesahi be nyɛe maa le, nɛ a nyɛɔ peeɔ níhi nɛ adesahi be nyɛe maa pee ngɛ mɛ nitsɛmɛ a he wami nya. Kaa nɔ hyɛmi nɔ́ ɔ, ni komɛ tsɔɔ kaa a ma nyɛ maa gu klaami aloo dodoe mi hyɛmi nɔ kɛ tsɔɔ níhi nɛ maa ba hwɔɔ se. Ni komɛ hu peeɔ ní komɛ nɛ haa nɛ nihi heɔ yeɔ kaa a kɛ gbogboe ɔmɛ ngɛ munyu tue. Ni komɛ hu deɔ ke a kpɛɔ aze, a tsuɔ kunya, aloo a nyɛɔ nɛ a nyuaa nihi. *

⁴ Nihi enyɛmɛ nɛ a heɔ níhi nɛ kɛ mumi yayami ɔmɛ ngɛ tsakpa a yeɔ? Níhi a mi hlami tsɔɔ kaa ngɛ mahi 18 a mi ngɛ Latin America kɛ Caribbean ɔ, ke a hla nihi etɛ ɔ, a kpɛti nɔ kake heɔ kunya tsumi kɛ aze kpɛmi yeɔ. A kpɛti nihi babauu hu he ye kaa nihi nɛ a gbo ɔ kɛ nihi nɛ a ngɛ wami mi ɔ ma nyɛ maa tu munyu. Níhi a mi hlami nɛ ɔ eko ya nɔ ngɛ Afrika mahi 18 hu a mi. Níhi a mi hlami ɔ tsɔɔ kaa nihi babauu heɔ aze kpɛmi yeɔ. Ngɛ anɔkuale mi ɔ, he fɛɛ he nɛ wa ngɛ ɔ, e sa nɛ waa hyɛ saminya ngɛ níhi nɛ kɛ mumi yayami ɔmɛ ngɛ tsakpa a he. Ejakaa Satan ngɛ mɔde bɔe kaa e maa sisi ‘nihi tsuo nɛ a ngɛ zugba a nɔ’ ɔ.​—Kpoj. 12:9.

5. Kɛ Yehowa naa níhi nɛ kɛ mumi yayami ɔmɛ ngɛ tsakpa a ha kɛɛ?

⁵ Yehowa ji ‘Mawu nɛ yeɔ anɔkuale.’ (La 31:5) Kɛ e naa níhi nɛ kɛ mumi yayami ɔmɛ ngɛ tsakpa a ha kɛɛ? E hiɔ! Yehowa de Israel bi ɔmɛ ke: ‘Koo sã o bimɛ ngɛ o bɔ sami la tɛ nɔ; jehanɛ hu nyɛ ti nɔ ko kó klaa, e ko pee nyakpɛ ní, e ko nu wɔ, e ko tsu kunya, e ko fi kablɛ, e ko tsɛ kpade, nɛ e ko bi ní hulɔ. Yehowa, o Mawu ɔ sume nihi nɛ tsuɔ níhi nɛ a hiɔ nɛ ɔ.’ (5 Mose 18:10-12) Mwɔnɛ ɔ, Kristofohi be Mlaa nɛ Yehowa kɛ ha Israel bi ɔmɛ ɔ sisi. Se kɛ̃ ɔ, wa le kaa bɔ nɛ Yehowa naa ní nɛ ɔmɛ ha a tsakee we.​—Mal. 3:6.

6. (a) Ngɛ mɛni blɔ nɔ nɛ Satan guɔ níhi nɛ kɛ mumi yayami ɔmɛ ngɛ tsakpa a nɔ kɛ yeɔ nihi awi? (b) Ngɛ Fiɛlɔ 9:5 ɔ nya a, mɛni si fɔfɔɛ mi nɛ gbogboe ɔmɛ ngɛ?

⁶ Yehowa bɔ wɔ kɔkɔ ngɛ níhi nɛ kɛ mumi yayami ɔmɛ ngɛ tsakpa a he ejakaa e le kaa Satan guɔ ní nɛ ɔmɛ a nɔ kɛ yeɔ nihi awi. Satan guɔ níhi nɛ kɛ mumi yayami ɔmɛ ngɛ tsakpa a nɔ kɛ gbɛɔ lakpa munyuhi kɛ fĩaa. E lakpa munyu ɔmɛ eko ji kaa nihi nɛ a gbo ɔ ngɛ wami mi loloolo ngɛ je ko mi. (Kane Fiɛlɔ 9:5.) Satan guɔ ní nɛ ɔmɛ a nɔ kɛ woɔ nihi a he gbeye, nɛ e kɛ jeɔ nihi kɛ jeɔ Yehowa he. E peeɔ jã konɛ nihi nɛ a he mumi yayami ɔmɛ nɛ a ye mohu pe Yehowa.

7. Mɛni Yehowa ha nɛ wa le?

⁷ Kaa bɔ nɛ wa susu he kɛ sɛ hlami ɔ, Yehowa tsɔɔ wɔ níhi nɛ e sa kaa waa le ngɛ Satan kɛ e daimonio ɔmɛ a he konɛ a ko sisi wɔ. Nyɛ ha nɛ wa susu ní komɛ nɛ maa ye bua wɔ konɛ wa nyɛ nɛ waa hwu kɛ si Satan kɛ e daimonio ɔmɛ a he.

8. (a) Mɛni ji nɔ́ titli nɛ maa ye bua wɔ konɛ waa hwu kɛ si mumi yayami ɔmɛ? (b) Ngɛ mɛni blɔ nɔ nɛ La 146:4 ɔ tsɔɔ kaa níhi nɛ Satan deɔ ngɛ gbogboe ɔmɛ a he ɔ ji lakpa a?

⁸ Moo kane Mawu Munyu ɔ nɛ o pue o yi mi tɛ ngɛ he. Jã nɛ wa maa pee ɔ be hae nɛ lakpa munyuhi nɛ mumi yayami ɔmɛ gbɛɔ kɛ fiaa a nɛ sisi wɔ. Mawu Munyu ɔ ngɛ kaa klaate nɛ  nya ba nɛ ma nyɛ maa poopoo Satan lakpa munyu ɔmɛ a mi. (Efe. 6:17) Kaa nɔ hyɛmi nɔ́ ɔ, Mawu Munyu ɔ ha nɛ wa na kaa e ji lakpa kaa waa kɛ ni gbogboe ɔmɛ ma nyɛ maa tu munyu. (Kane La 146:4.) Mawu Munyu ɔ ha nɛ wa le hu kaa Yehowa pɛ nɛ e ma nyɛ maa le nɔ́ nɛ maa ba hwɔɔ se. (Yes. 45:21; 46:10) Ke wa kaneɔ Mawu Munyu ɔ, nɛ wa pueɔ wa yi mi tɛ ngɛ he ɔ, e maa ye bua wɔ nɛ wa ma kua lakpa munyuhi nɛ mumi yayami ɔmɛ suɔ kaa wa he ye ɔ.

9. Mɛni ji ní komɛ nɛ a kɛ mumi yayamihi ngɛ tsakpa nɛ wa pee we?

⁹ Koo pee níhi nɛ kɛ mumi yayami ɔmɛ ngɛ tsakpa. Akɛnɛ wa ji anɔkuale Kristofohi he je ɔ, waa kɛ wa he wui níhi nɛ kɛ mumi yayami ɔmɛ ngɛ tsakpa a mi. Kaa nɔ hyɛmi nɔ́ ɔ, wa yɛ wɔtsɛmɛ loo ní peeli a ngɔ, nɛ wa gui blɔ kpa ko nɔ nɛ́ waa kɛ gbogboehi nɛ sɛɛ ní. Kaa bɔ nɛ wa na ngɛ ní kasemi nɛ sɛ hlami ɔ mi ɔ, waa kɛ wa he wui ya peemi kusumihi nɛ tsɔɔ kaa gbogboe ɔmɛ ngɛ wami mi ngɛ he ko ɔ mi. Jehanɛ se hu ɔ, wa gui klaami loo dodoe mi hyɛmi nɔ kɛ hla we níhi nɛ maa ba hwɔɔ se. (Yes. 8:19) Wa le kaa ní nɛ ɔmɛ yeɔ nɔ awi, nɛ a ma nyɛ ma ha nɛ Satan kɛ e daimonio ɔmɛ a nine nɛ su wa nɔ.

10-11. (a) Mɛni nɛ ni komɛ nɛ a hi si ngɛ kaseli ɔmɛ a be ɔ mi ɔ pee benɛ a kase anɔkuale ɔ? (b) Ngɛ 1 Korinto Bi 10:21 ɔ nya a, mɛni he je nɛ e sa kaa waa kase Kristofohi nɛ a hi si ngɛ kaseli ɔmɛ a be ɔ mi ɔ, nɛ kɛ wa ma plɛ kɛ kase mɛ ha kɛɛ?

¹⁰ Mo puɛ níhi nɛ kɛ mumi yayami ɔmɛ ngɛ tsakpa a. Ngɛ kaseli ɔmɛ a be ɔ mi ɔ, ni komɛ nɛ a ngɛ Efeso ɔ peeɔ níhi nɛ kɛ mumi yayamihi ngɛ tsakpa. Se benɛ a ba kase anɔkuale ɔ, a pee tsakemihi nɔuu. “Nihi babauu nɛ jinɛ a tsuɔ kunya a ngɔ a womihi kɛ ba nɛ a bua a nya, nɛ a sã mɛ ngɛ nɔ fɛɛ nɔ hɛ mi.” (Níts. 19:19) Nimli nɛ ɔmɛ pee nɔ́ fɛɛ nɔ́ nɛ a ma nyɛ konɛ a je a he kɛ je mumi yayami ɔmɛ a he. E ngɛ mi kaa womihi nɛ a kɛ tsuɔ kunya a he jua wa nɛ a ma nyɛ maa jua aloo a kɛ  maa ke ni kpahi mohu lɛɛ, se a sã mɛ. A susuu we bɔ nɛ womi ɔmɛ a he jua wa ha a he. Nɔ́ nɛ a suɔ mohu ji kaa a maa pee Yehowa suɔmi nya ní.

¹¹ Kɛ wa ma plɛ kɛ kase Kristofohi nɛ a hi si ngɛ kaseli ɔmɛ a be ɔ mi ɔ ha kɛɛ? Nile ngɛ mi kaa wa ma puɛ níhi tsuo nɛ kɛ mumi yayami ɔmɛ ngɛ tsakpa a. Ní nɛ ɔmɛ ekomɛ ji sɛbɛhi, kɛ ní kpahi nɛ nihi woɔ aloo a kɛ woɔ a níhi a mi konɛ a kɛ po a he piɛ ngɛ mumi yayamihi a he.​—Kane 1 Korinto Bi 10:21.

12. Mɛni sanehi e sa kaa wa bi wa he ngɛ níhi nɛ waa kɛ jeɔ wa hɛja a he?

¹² Hyɛ níhi nɛ o kɛ jeɔ o hɛja a saminya. Mo bi o he ke: ‘Anɛ i kaneɔ mumi yayamihi a he ní ngɛ womihi a mi, aloo ngɛ Intanɛti ɔ nɔ lo? Nɛ lahi nɛ i buɔ tue, sinihi kɛ ní kpahi nɛ i hyɛɛ ngɛ TV nɔ, kɛ video nɔ fiɛmihi nɛ i kɛ jeɔ ye hɛja a hu nɛɛ? Anɛ a kɛ mumi yayamihi ngɛ tsakpa lo? Anɛ sinihi nɛ i hyɛɔ ɔ kɔɔ nihi nɛ a nuɔ nihi a muɔ loo gbogboehi nɛ a te si nɛ a yeɔ nihi awi aloo nihi nɛ a ngɛ he wami slɔɔto ko ɔ a he lo? Anɛ sini ɔmɛ haa nɛ kunya tsumi kɛ nɔ nyuami peeɔ kaa fiɛmi nɔ́ ko kɛkɛ lo? Be komɛ ɔ, a jeɔ sinihi nɛ níhi nɛ yaa nɔ ngɛ mi ɔ pi nɔ́ nitsɛ. Lɔ ɔ tsɔɔ we kaa jamɛ a sini ɔmɛ tsuo kɛ daimoniohi ngɛ tsakpa. Ke o ngɛ sinihi hlae nɛ o maa hyɛ ɔ, moo mwɔ o yi mi kpɔ kaa o maa hla sinihi nɛ be hae nɛ o hyɛ ní peepeehi nɛ Yehowa sume. E sa nɛ waa bɔ mɔde wawɛɛ konɛ ‘wa he nile nɛ e ko bu wɔ fɔ’ ngɛ Mawu hɛ mi.​—Níts. 24:16. *

13. Mɛni wa sume nɛ waa pee?

¹³ Koo hi níhi nɛ nihi deɔ ke daimonio ɔmɛ peeɔ ɔ he ní sɛɛe. E sa nɛ waa kase Yesu.  (1 Pet. 2:21) Loko Yesu maa ba zugba a nɔ ɔ, e le níhi fuu ngɛ Satan kɛ daimonio ɔmɛ a he. Se e kɛ nihi sɛɛ we níhi nɛ mumi yayami ɔmɛ pee ɔ he ní. Yesu suɔ nɛ e ye Yehowa he odase mohu pe nɛ e maa ye Satan he odase. Ke waa kɛ nihi sɛɛ we níhi nɛ nihi deɔ ke daimonio ɔmɛ pee ɔ he ní ɔ, lɔ ɔ tsɔɔ kaa wa ngɛ Yesu kasee. Wa ma nyɛ maa tsɔɔ nihi anɔkuale ɔ kɛ tsɔɔ kaa ‘munyu kpakpahi sɔuu lɛ ngɛ wa yi mi’ aloo wa tsui mi.​—La 45:1.

14-15. (a) Mɛni he je nɛ e sɛ nɛ waa ye mumi yayami ɔmɛ gbeye ɔ? (b) Mɛni odase nɛ tsɔɔ kaa Yehowa poɔ e we bi a he piɛ mwɔnɛ ɔ?

¹⁴ Koo ye mumi yayami ɔmɛ gbeye. Ngɛ je yaya nɛ ɔ mi ɔ, ní yayahi ma nyɛ maa ba wa nɔ. Oslaahi ma nyɛ ma ná wɔ, hiɔ ma nyɛ maa fia wɔ, nɛ wa ma nyɛ ma gbo kpatu gbenɔ hulɔ. E sɛ nɛ wa susu kaa mumi yayami ɔmɛ nɛ a ngɔɔ ní nɛ ɔmɛ kɛ baa. Baiblo ɔ tsɔɔ kaa ‘be kɛ nɔ́ yayami nɛ baa tlukaa’ a ma nyɛ maa ba wa ti nɔ fɛɛ nɔ ko nɔ. (Fiɛlɔ 9:12) Baiblo ɔ ha nɛ wa na kaa Yehowa ngɛ he wami kulaa pe daimonio ɔmɛ. Kaa nɔ hyɛmi nɔ́ ɔ, Mawu ngmɛ́ Satan blɔ nɛ e gbe Hiob. (Hiob 2:6) Yehowa ha Mose he wami nɛ e kɛ pee nyakpɛ níhi pe Egipt wɔnɔ ɔmɛ. (2 Mose 8:18; 9:11) Benɛ Mawu wo Yesu hɛ mi nyami ngɛ hiɔwe ɔ, e ha lɛ he wami, nɛ e kɛ fie Satan kɛ e daimonio ɔmɛ kɛ je hiɔwe kɛ ba zugba a nɔ. E be kɛe nɛ Yesu ma sake mɛ ngɔ fɔ muɔ voo ɔ mi, nɛ a be nyɛe maa ye nɔ ko nɔ ko awi.​—Kpoj. 12:9; 20:2, 3.

¹⁵ Odasehi fuu ngɛ nɛ tsɔɔ kaa Yehowa poɔ e we bi a he piɛ ngɛ wa be nɛ ɔ mi. Kaa nɔ hyɛmi nɔ́ ɔ, wa ngɛ anɔkuale ɔ fiɛɛe kɛ ngɛ nihi tsɔɔe ngɛ he fɛɛ he ngɛ zugba a nɔ. (Mat. 28:19, 20) Enɛ ɔ nɛ wa peeɔ ɔ kpaa ní yayahi nɛ Abosiami ngɛ pee ɔ he bo. Kaa Satan ngɛ he wami nɛ e kɛ ma nyɛ maa pee wɔ nɔ́ ko ɔ, jinɛ e ko tsi wa ní tsumi ɔ tsuo nya, se e be nyɛe. Enɛ ɔ he ɔ, e sɛ nɛ waa ye mumi yayami ɔmɛ gbeye. Ejakaa wa le kaa ‘Yehowa hɛ ngmɛ ngɛ je ɔ tsuo he, nɛ nihi nɛ a yeɔ lɛ anɔkuale ɔ, e woɔ mɛ he wami.’ (2 Kron. 16:9) Ke wa yeɔ Yehowa anɔkuale ɔ, daimonio ɔmɛ be nyɛe maa pee wɔ nɔ́ ko nɛ Yehowa be nyɛe ma dla.

16-17. Mɛni nɔ hyɛmi nɔ́ ko lɛ tsɔɔ kaa ja wa pee kã loko wa ma nyɛ maa hwu kɛ si mumi yayami ɔmɛ?

¹⁶ E biɔ kã loko wa ma nyɛ maa hwu kɛ si mumi yayami ɔmɛ, titli ke wa huɛmɛ kɛ wa weku li ngɛ wa nɔ nyɛɛe kaa waa ngɔ wa he kɛ wo ní peepeehi nɛ kɛ mumi yayamihi ngɛ tsakpa a mi. Nihi nɛ a peeɔ kã a, Yehowa bua jɔ a he, nɛ e jɔɔ mɛ. Mo susu nyɛmiyo Erica nɛ ngɛ Ghana a níhi a si kpami ɔ he nɛ o hyɛ. Erica bɔni Baiblo ɔ kasemi benɛ e ye jeha 21. E papaa ji wɔnɔ, nɛ ngɛ kusumi nya a, e sa nɛ lɛ hu e ye lohwehi nɛ a gbeɔ kɛ haa e papaa wɔ ɔmɛ ɔ eko. Benɛ Erica kua lo ɔ yemi ɔ, e weku ɔ tsɔɔ kaa e bui wɔ ɔmɛ. Weku ɔ he ye kaa a mawu ɔmɛ maa gbla a tue, nɛ a ma ha nɛ a nu hiɔ aloo a nu godo.

¹⁷ Weku li ɔmɛ nyɛ e nɔ kaa e ye lo ɔ. A de Erica kaa ke e yi lo ɔ, a maa fie lɛ kɛ je we ɔ mi, se e kua. Benɛ a fie lɛ ɔ, nyɛmimɛ komɛ ha nɛ e hi a ngɔ. Yehowa gu blɔ nɛ ɔ nɔ kɛ ye bua Erica, nɛ e ná weku ehe. Yehowa Odasefohi ba pee nyɛmimɛ ehe nɛ e ná. (Maak. 10:29, 30) E ngɛ mi kaa Erica weku li ɔmɛ kɛ lɛ po tako mi, nɛ a sã e níhi tsuo lɛɛ, se Erica ya nɔ nɛ e ye Yehowa anɔkuale. E ha nɛ a baptisi lɛ, nɛ amlɔ nɛ ɔ, e ngɛ sɔmɔe kaa daa blɔ gbalɔ. Erica yi daimonio ɔmɛ gbeye. E de ngɛ e weku li ɔmɛ a he ke: “Daa ligbi ɔ, i sɔleɔ konɛ ye weku li ɔmɛ hu nɛ a ba le Yehowa nɛ a sɔmɔ lɛ konɛ a ná jɔɔmihi nɛ i ngɛ náe ɔ eko. Lɔ ɔ ma ha nɛ a maa ye a he.”

18. Ke wa ngɔ wa hɛ kɛ fɔ Yehowa nɔ ɔ, mɛni jɔɔmihi wa ma ná?

¹⁸ Tsa pi nɔ fɛɛ nɔ nɛ e kɛ hemi kɛ yemi he ka nɛ ngɛ kaa Erica nɔ́ ɔ maa kpe. E sa nɛ wɔ tsuo waa hwu kɛ si mumi yayami ɔmɛ, nɛ́ wa ná hɛ kɛ nɔ fɔmi ngɛ Yehowa mi. Ke wa pee jã a, Yehowa maa jɔɔ wɔ, nɛ Satan be nyɛe maa ngɔ e lakpa munyu ɔmɛ kɛ sisi wɔ. Jehanɛ se hu ɔ, wa be mumi yayami ɔmɛ gbeye yee nɛ lɔ ɔ nɛ ha nɛ wa kpa Yehowa sɔmɔmi. Nɔ́ nɛ pe kulaa a, huɛ bɔmi nɛ ngɛ waa kɛ Yehowa wa kpɛti ɔ mi maa wa. Kaselɔ Yakobo de ke: “Nyɛɛ ngɔ nyɛ he kɛ wo Mawu sisi; se nyɛɛ te si kɛ wo Abosiami, nɛ e maa tu fo kɛ je nyɛ he. Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.”​—Yak. 4:7, 8.