Ngɛ 2 Korinto Bi 12:2, 3 ɔ, Paulo tu nyumu ko nɛ “a sa lɛ kɛ ho hiɔwe etɛne ɔ ya” a he munyu. Mɛnɔ ji jamɛ a nyumu ɔ? Benɛ Paulo ngma sɛ womi kɛ ya ha Korinto asafo ɔ, e ma nɔ mi kaa Mawu kɛ lɛ ngɛ ní tsue kaa bɔfo. (2 Kor. 11:5, 23) Kɛkɛ nɛ e tu “Nyɔmtsɛ ɔ he nyakpɛ nina amɛ kɛ kpo jemi ɔmɛ” a he munyu. Paulo tu we nyɛmimɛ kpahi a he munyu ngɛ ngmami nɛ ɔ mi. Enɛ ɔ he ɔ, e ngɛ heii kaa lɛ nitsɛ e he munyu nɛ e ngɛ tue kaa a je ninahi kɛ kpo jemihi kɛ ha lɛ ɔ nɛ.​—2 Kor. 12:1, 5.

Enɛ ɔ he ɔ, Paulo ji nɔ nɛ “a sa lɛ kɛ ho hiɔwe etɛne ɔ” kɛ “paradeiso mi ya” a nɛ. (2 Kor. 12:2-4) E ngɔ munyungu nɛ ji “kpo jemi” kɛ tsu ní kɛ tsɔɔ nɔ́ ko nɛ a je kpo kɛ tsɔɔ lɛ nɛ maa ba hwɔɔ se.

Mɛni ji “hiɔwe etɛne ɔ” nɛ Paulo na a?

Ngɛ Baiblo ɔ mi ɔ, “hiɔwe” ma nyɛ maa tsɔɔ hiɔwe nɛ wa naa kɛ wa hɛ ngmɛ ɔ. (1 Mose 11:4; 27:28; Mat. 6:26) Se Baiblo ɔ ngɔɔ “hiɔwe” kɛ tsuɔ ní ngɛ blɔ kpahi hu a nɔ. Be komɛ ɔ, a kɛ daa si ha adesa nɔ yemi. (Dan. 4:20-22) Be komɛ hu ɔ, e tsɔɔ hiɔwe nɔ yemi kaa Mawu Matsɛ Yemi ɔ.​—Kpoj. 21:1.

Paulo na “hiɔwe etɛne ɔ.” Mɛni lɔ ɔ tsɔɔ? Behi fuu ɔ, Baiblo ɔ tiɔ munyu ko mi si etɛ kɛ maa munyu ɔ nɔ mi aloo e kɛ tsɔɔ hɛdɔ nɛ ngɛ munyu ɔ he. (Yes. 6:3; Eze. 21:27; Kpoj. 4:8) E ma nyɛ maa pee kaa “hiɔwe etɛne ɔ” nɛ Paulo tu he munyu ɔ tsɔɔ nɔ yemi ko nɛ nɔ kuɔ, nɛ ji Mesia Matsɛ Yemi ɔ nɛ a kɛ wo Yesu Kristo kɛ nimli 144,000 ɔmɛ a dɛ ɔ. (Hyɛ Insight on the Scriptures, Vol. 1, bf. 1059, 1062.) Bɔfo Petro ngma ke, ngɛ Mawu si womi ɔ nya a, wa ngɛ “hiɔwe ehe” ɔ blɔ hyɛe.​—2 Pet. 3:13.

Mɛni nɛ “paradeiso” ɔ nɛ Paulo tu he munyu ɔ hu tsɔɔ?

Munyungu nɛ ji “paradeiso” ma nyɛ maa tsɔɔ níhi fuu: (1) Akɛnɛ Mawu pee he nɛ Adam kɛ Hawa hi kekleekle ɔ Paradeiso he je ɔ, “paradeiso” nɛ Paulo tu he munyu ɔ ma nyɛ maa tsɔɔ zugba a tsuo nɛ maa pee Paradeiso hwɔɔ se ɔ. (2) E ma nyɛ maa tsɔɔ tue mi jɔmi si himi nɛ maa hi Mawu we bi a kpɛti ngɛ je ehe ɔ mi ɔ. (3) Jehanɛ hu ɔ, e ma nyɛ maa tsɔɔ si himi kpakpa nɛ ngɛ hiɔwe nɛ Kpo Jemi 2:7 ɔ tsɛ ke “Mawu paradeiso ɔ.”​—Hyɛ July 15, 2015 Hwɔɔmi Mɔ ɔ bf. 5, kk 8.

E ma nyɛ maa pee kaa níhi etɛ nɛ ɔmɛ tsuo a he munyu nɛ Paulo ngɛ tue ngɛ 2 Korinto Bi 12:4 ɔ nɛ.

Kɛ wa maa mwɔ nya ha kɛɛ?

“Hiɔwe etɛne ɔ” nɛ a wo ta ngɛ 2 Korinto Bi 12:2 ɔ ma nyɛ maa da si ha “hiɔwe ehe” ɔ nɛ ji, Mesia Matsɛ Yemi ɔ nɛ a kɛ wo Yesu Kristo kɛ nimli 144,000 ɔmɛ a dɛ ɔ.​—2 Pet. 3:13.

E ji “hiɔwe etɛne” ejakaa Mawu Matsɛ Yemi ɔ nɔ kuɔ pe nɔ yemi kpahi tsuo.

“Paradeiso” ɔ nɛ “a sa” Paulo kɛ ya mi ngɛ nina a mi ɔ ma nyɛ maa tsɔɔ (1) Paradeiso nɛ maa ba zugba a nɔ hwɔɔ se, (2) tue mi jɔmi si himi nɛ maa hi Mawu we bi a kpɛti jamɛ a be ɔ mi nɛ e ma pã nɔ́ nɛ ngɛ mwɔnɛ ɔ, kɛ (3) “Mawu paradeiso” nɛ ngɛ hiɔwe nɛ lɛ hu e maa hi si ngɛ je ehe ɔ mi ɔ.

Lɔ ɔ he ɔ, hiɔwe ehe ɔ kɛ zugba ehe ɔ lɛ ma bla kɛ pee je ehe ɔ nɛ. Blɔ nya tomihi tsuo maa pee ehe​—hiɔwe nɔ yemi ehe, kɛ paradeiso zugba nɛ adesahi tsuo ma ja Yehowa ngɛ nɔ.