Anɛ o to o tsui si kɛ kane Hwɔɔmi Mɔ slɔɔtohi nɛ ba lingmi nɛ ɔ lo? Ke jã a, lɛɛ moo hyɛ kaa o ma nyɛ ma ha sane bimihi nɛ nyɛɛ se ɔ a heto lo:

Mɛni Ngmami ɔ de nɛ tsɔɔ kaa Mawu nuɔ nɔ́ he ha wɔ?

Benɛ Israel bi ɔmɛ ji nyɔguɛhi ngɛ Egipt ɔ, Mawu na a nɔ́ nami ɔ tsuo, nɛ e mi mi sã lɛ ngɛ a he. (2 Mose 3:7; Yes. 63:9) Mawu bɔ wɔ ngɛ e subai nɔ, lɔ ɔ he ɔ, wɔ hu wa mi mi sãa wɔ ngɛ ni kpahi a he. Ke wa tsui ngɛ wɔ fɔ bue ngɛ tɔmi ko he po ɔ, Mawu mi mi sãa lɛ ngɛ wa he.​—wp18.3, bf. 8-9.

Ngɛ mɛni blɔ nɔ nɛ Yesu tsɔɔmi ɔmɛ ye bua nihi, nɛ a ná we ma kpa mi bimɛ a he juɛmi yaya?

Ngɛ Yesu be ɔ mi ɔ, Yuda bi fuu buɔ a he pe nihi nɛ a je ma kpahi a nɔ. Kristo tsɔɔ e kaseli ɔmɛ kaa e sa nɛ a ba a he si, nɛ e sɛ nɛ a ngɔ ma nɛ a je mi ɔ kɛ fĩa. E wo e kaseli ɔmɛ he wami kaa a na a sibi kaa nyɛmimɛ.​—w18.06, bf. 9-10.

Mɛni wa ma nyɛ maa kase ngɛ Si Womi Zugba a nɛ Mawu ha we nɛ Mose nɛ ya nɔ ɔ mi?

Mose kɛ Yehowa ná huɛ bɔmi nɛ mi wa. (5 Mose 34:10) Benɛ jeha 40 nɛ Israel bi ɔmɛ kɛ nyɛɛ nga a nɔ ɔ ma nyagbe ɔ, Israel bi ɔmɛ tu munyu kɛ si Mose ngɛ nyu nɛ a nɛ́ ɔ he. Mawu de Mose ke e tu munyu kɛ tsɔɔ tɛ sa a. Se Mose ngɔ tso kɛ fia tɛ sa a mohu. Eko ɔ, nɔ́ he je nɛ Yehowa mi mi fu ji kaa Mose kɛ e blɔ tsɔɔmi tsu we ní, aloo e kɛ hɛ mi nyami ha we lɛ ngɛ nyakpɛ ní nɛ e pee ɔ he. (4 Mose 20:6-12) E sa nɛ enɛ ɔ nɛ tsɔɔ wɔ kaa e he hia nɛ waa bu Yehowa tue, nɛ́ waa wo e hɛ mi nyami.​—w18.07, bf. 13-14.

Ke wa hyɛ bɔ nɛ nihi ngɛ ha ngɛ kpo nɔ kɛ kojo mɛ ɔ, ngɛ mɛni blɔ nɔ nɛ eko ɔ, lɔ ɔ be hae nɛ waa ye dami sane?

Nihi fuu daa níhi etɛ nɛ ɔmɛ a nɔ kɛ kojoɔ nihi: nɔ he womi nɔ su aloo he nɛ nɔ ɔ je, sika nɛ nɔ ɔ ngɛ kɛ jeha nɛ e ye. E sɛ nɛ waa hyɛ nɔ hɛ mi, mohu ɔ, e sa nɛ waa bɔ mɔde nɛ waa na nihi kaa bɔ nɛ Mawu naa mɛ ɔ! (Níts. 10:34, 35)​—w18.08, bf. 8-12.

Mɛni ji ní komɛ nɛ Kristofohi nɛ a wa ngɛ jeha mi ɔ ma nyɛ maa pee kɛ ye bua ni kpahi?

Kristofohi nɛ a wa ngɛ jeha mi nɛ a tsake a sɔmɔmi ní tsumi kɛ ha mɛ ɔ, a he jua wa ha Mawu loloolo, nɛ a ma nyɛ maa ye bua ni kpahi ngɛ blɔhi fuu a nɔ. A ma nyɛ maa ye bua nihi nɛ a he we yi nɛ a hunomɛ loo a yihi ji Odasefohi, nihi nɛ a kpa asafo mi kpe kɛ fiɛɛmi yami, a kɛ nihi ma nyɛ maa kase Baiblo ɔ, nɛ a ma nyɛ ma bli a sɔmɔmi ní tsumi ɔ mi.​—w18.09, bf. 8-11.

Mɛni ní tsɔɔmi ga dadehi wa ngɛ?

Wa ngɛ JW.ORG kaadihi kɛ nine fɔmi womihi. Dɛ womi kpaanyɔ nɛ a kɛ ní tsumi yi, kɛ Hwɔɔmi Mɔ kɛ Awake! womi tɛtlɛɛ ɔmɛ. Womiyohi, womi titli enyɔ komɛ nɛ waa kɛ nihi kaseɔ kɛ video eywiɛ. Video nɛ ɔmɛ eko ji, Mɛni He Je Nɛ E Sa Kaa Waa Kase Baiblo ɔ?​—w18.10, bf. 16.

Kaa bɔ nɛ Abɛ 23:23 ɔ tsɔɔ ɔ, kɛ Kristofo no ko ma plɛ kɛ “he anɔkuale” ɔ ha kɛɛ?

Tsa pi sika nɛ waa kɛ ma he anɔkuale ɔ. Se kɛ̃ ɔ, e sa nɛ wa he be, nɛ waa bɔ mɔde loko wa nine ma nyɛ maa su anɔkuale ɔ nɔ.​— w18.11, bf. 4.

Mɛni wa ma nyɛ maa kase ngɛ bɔ nɛ Hosea kɛ e yo Gomer hi si ha a mi?

Gomer puɛ gba si abɔ, se Hosea kɛ e yayami ɔ pa lɛ, nɛ e kɛ lɛ hi si ekohu. Ke Kristofo no ko puɛ gba nɛ e huno ɔ loo e yo ɔ suɔ ɔ, e ma nyɛ maa ngɔ kɛ pa lɛ. Ke e kɛ nɔ nɛ puɛ gba a ná bɔmi ɔ, e be nyɛe maa da jamɛ a yayami ɔ nɔ kɛ po gba a mi pee se.​—w18.12, bf. 13.