Kɛ pee kɛɛ nɛ Yuda bi ɔmɛ ná kpe hehi?

A NÁ biɛ nɛ ji “kpe he” ɔ kɛ je Hela munyungu ko nɛ e sisi ji “kpe” aloo “he nya buami” ɔ mi. Biɛ ɔ sa ejakaa kpe he ɔmɛ ji hehi nɛ Yuda bi ɔmɛ buaa a he nya ngɛ kɛ kaseɔ Mawu he ní kɛ je blema tɔɔ. Hebri Ngmami ɔ tu we kpe he he munyu, se bɔ nɛ Hela Ngmami ɔ tu he munyu ha a tsɔɔ kaa he nya buami he ɔmɛ pɔ he ngɛ kaseli ɔmɛ a be ɔ mi wawɛɛ.

Ní leli fuu he ye kaa Yuda bi nɛ a nuu mɛ nyɔguɛ kɛ ya Babilon ɔ nɛ a bɔni a he nya buami ngɛ kpe hehi. Womi nɛ ji Encyclopaedia Judaica a de ke: “Akɛnɛ Nyɔguɛ ɔmɛ ya pee nibwɔhi ngɛ ni komɛ a ma mi nɛ Sɔlemi We ɔ be lejɛ ɔ he je ɔ, eko ɔ, a kpeɔ daa He Jɔɔmi Ligbi konɛ a kane Ngmami ɔ kɛ wo a sibi a bua.” Benɛ a ngmɛɛ a he kɛ je nyɔguɛ yemi mi ɔ, e maa pee kaa Yuda bi ɔmɛ kpa we a he nya buami ha sɔlemi kɛ Ngmami ɔ kanemi, nɛ he fɛɛ he nɛ a ya hi ɔ, a ma kpe he ngɛ lejɛ ɔ.

Benɛ e ke suu kaseli ɔmɛ a be ɔ mi ɔ, kpe he ɔmɛ ba pee he nɛ Yuda bi nɛ a ngɛ Mediterenia ní ɔmɛ a mi, Middle East kɛ Israel ɔ kpeɔ ngɛ titli kɛ ha Mawu jami kɛ ní kpahi. Ní lelɔ ko nɛ a tsɛɛ lɛ ke Lee Levine nɛ e tsɔɔ ní ngɛ yunivɛsiti ko nɛ ngɛ Jerusalem ɔ de ke: “Kpe he ɔmɛ ba pee he nɛ a kaseɔ ní ngɛ, he nɛ a yeɔ niye ní nɛ ngɛ klɔuklɔu ngɛ, he nɛ a yeɔ sanehi ngɛ, he nɛ a tsuɔ sika ngɛ, kɛ he nɛ ma kudɔmi kuuhi, kɛ ma nikɔtɔmahi kpeɔ ngɛ.” E de hu ke: “Se níhi nɛ kɔɔ jami he titli nɛ a peeɔ ngɛ lejɛ ɔ.” Enɛ ɔ he ɔ, e be nyakpɛ kaa benɛ Yesu ngɛ zugba a nɔ ɔ, e pɔɔ kpe he ɔmɛ yami. (Maak. 1:21; 6:2; Luka 4:16) Yesu tsɔɔ ní ngɛ kpe he ɔmɛ, nɛ e wo nihi nɛ a ba lejɛ ɔ he wami. Benɛ a to Kristofohi asafo ɔ sisi se po ɔ, bɔfo Paulo hu ya fiɛɛ ngɛ kpe he ɔmɛ. Nihi nɛ a suɔ Mawu bua jɔ kpe he ɔmɛ a yami he wawɛɛ, enɛ ɔ he ɔ, ke Paulo su ma ko nɔ ɔ, he nɛ e yaa kekleekle ji kpe he ɔ, nɛ e ya fiɛɛɔ ngɛ lejɛ ɔ.​—Níts. 17:1, 2; 18:4.