“NÍ NƐ a ma kpa a hiɛ, se ní tsuli ɔmɛ a he pi. Enɛ ɔ he ɔ, nyɛ kpa Ngmɔtsɛ ɔ pɛɛ konɛ e wo ní tsuli blɔ nɛ a ba kpa ní ha lɛ.” (Luka 10:2) Yesu tu munyu nɛ ɔ maa pee jeha 2,000 ji nɛ ɔ. Si fɔfɔɛ nɛ ngɛ Myanmar mwɔnɛ ɔ ngɛ kaa jã. Mɛni he je? Nihi ayɔ 55 lɛ a ngɛ Myanmar, se Odasefohi 4,200 pɛ lɛ a ngɛ sane kpakpa a fiɛɛe ngɛ lejɛ ɔ.

Se Yehowa nɛ ji “Ngmɔtsɛ ɔ” ta nyɛmimɛ nyumuhi kɛ yihi babauu a tsui he, nɛ a ya ngɛ ye buae kɛ ngɛ ní kpae ngɛ Southeast Asia ma nɛ ɔ mi. Nyɛmimɛ nɛ ɔmɛ je ma slɔɔtoslɔɔtohi a nɔ. Mɛni lɛ ha nɛ a hia kɛ je a mahi a mi ɔ? Mɛni ye bua mɛ loko a nyɛ nɛ a hia kɛ ya Myanmar a? Mɛni jɔɔmihi a ná? Ha nɛ waa hyɛ.

Jeha komɛ nɛ be ɔ, blɔ gbalɔ ko nɛ a tsɛɛ lɛ ke Kazuhiro nɛ e je Japan ɔ nu si nɔɔmi hiɔ. Benɛ hiɔ ɔ fia lɛ ɔ, e sɛ diblii mi, nɛ a ngɔ lɛ kɛ ho hiɔ tsami he ko ya. Dɔkita a de nyɛminyumu ɔ ke e ko hɛɛ lɔle jeha enyɔ. Nɔ́ nɛ ɔ pee Kazuhiro nyakpɛ. E bi e he ke: ‘Kɛ ma pee kɛ tsu blɔ gbami ní tsumi ɔ nɛ ye bua jɔ he ɔ kɛɛ?’ E sɔle wawɛɛ, nɛ e kpa Yehowa pɛɛ kaa e ye bua lɛ konɛ e ko kpa blɔ gbami ní tsumi ɔ.

Kazuhiro de ke: “Nyɔhiɔ kake se ɔ, ye huɛ ko nɛ e ngɛ sɔmɔe ngɛ Myanmar nu ye nyagba a he. E fia mi, nɛ e de mi ke: ‘Ngɛ Myanmar a, lɔle nɛ nihi kɛ yaa kɛ baa titli ji bɔɔsu. Ke o ba hiɛ ɔ, o ma nyɛ ma tsa o blɔ gbami ní tsumi ɔ nɔ. O hia we lɔle!’ I bi ye dɔkita a ke ji ye si fɔfɔɛ ɔ maa ngmɛ mi blɔ nɛ ma ya hi Myanmar. Nɔ́ nɛ ye dɔkita a de ɔ pee mi nyakpɛ. E de ke: ‘Dɔkita ko nɛ e le kalegbɔ he ní tsumi saminya a je Myanmar kɛ ma Japan piɔ. Ma ngɔ mo kɛ tsɔɔ lɛ. Ke o ya lejɛ ɔ nɛ hiɔ ɔ ba ekohu ɔ, e ma nyɛ maa hyɛ mo.’ Enɛ ɔ ha nɛ i na kaa Yehowa ha ye sɔlemi ɔ heto.”

Amlɔ nɔuu nɛ Kazuhiro ngma Myanmar asafo ɔ ní tsumi kɔni ɔ sɛ womi kɛ gu Intanɛti ɔ nɔ. E de mɛ ke e kɛ e yo ɔ, a suɔ nɛ a ba sɔmɔ kaa blɔ gbali ngɛ lejɛ ɔ. Ligbi enuɔ pɛ se ɔ, asafo ɔ ní tsumi kɔni ɔ ha mɛ heto ke, “Nyɛɛ ba, wa hia blɔ gbali fuu!” Kazuhiro kɛ e yo Mari jua a lɔle enyɔ ɔmɛ, nɛ a ya ngɔ visa, nɛ a po tikiti. Mwɔnɛ ɔ, a kɛ bua jɔmi ngɛ sɔmɔe ngɛ mumui a kuu ko mi ngɛ Mandalay. Kazuhiro de ke: “Níhi a si kpami nɛ ɔ ha nɛ wa he si nɛ Mawu wo ngɛ La 37:5 ɔ ye wawɛɛ nitsɛ: ‘Ngɔɔ o he kɛ ha Yehowa; ngɔɔ o hɛ kɛ fɔ e nɔ, nɛ e maa piɛɛ o he.’”

Ngɛ jeha 2014 ɔ mi ɔ, Yehowa Odasefohi nɛ a ngɛ Myanmar a ná he blɔ kɛ pee kpe klɛdɛɛ ko. Nyɛmimɛ fuu je ma kpahi a nɔ kɛ ya kpe nɛ ɔ. Monique nɛ e je United States nɛ e ye 34 ɔ ji a ti nɔ kake. Monique de ke: “Benɛ i je kpe ɔ kɛ ba a, i sɔle nɛ i de Yehowa kaa e ye bua mi konɛ ma nyɛ nɛ ma mwɔ yi mi kpɔ ko nɛ he hia ngɛ ye si himi mi. I kɛ ye fɔli sɛɛ otihi nɛ i kɛ ma ye hɛ mi ngɛ Mawu jami mi ɔ he ní. Weku ɔ tsuo kplɛɛ nɔ kaa e sa nɛ ma kpale kɛ ya Myanmar. Se i sɔle ngɛ he, nɛ e he mi be saii loko i nyɛ nɛ i mwɔ ye yi mi kpɔ.” Monique tsɔɔ nɔ́ he je.

“Yesu wo e se nyɛɛli ɔmɛ he wami kaa a ‘bu hiɔ ɔ nya’ nɛ a hyɛ. Enɛ ɔ he ɔ, i bi ye he ke: ‘Anɛ i ngɛ sika nɛ ma kɛ hia blɔ nɛ ɔ lo? Ke i ya lejɛ ɔ, mɛni ní tsumi ma tsu kɛ hyɛ ye he?’” E de ke: “Sika nɛ ma kɛ hia blɔ kɛ ya lejɛ ɔ po pee dengme.” Lɔ ɔ, jije e ná sika ngɛ kɛ ya Myanmar?​—Luka 14:28.

Monique de ke: “Ligbi ko ɔ, ye nitsumitsɛ ɔ de mi ke ma ba na lɛ. I ye gbeye bɔɔ. I susu kaa e maa ngmɛɛ ye he ngɛ ní tsumi ɔ mi. Se pi jã kulaa, e na mi si mohu ngɛ mɔde nɛ i ngɛ bɔe ɔ he. Kɛkɛ nɛ e de mi ke a maa ke mi sika ko. Sika nɛ i hia nɛ ma kɛ wo ye he hiɔhi loko ma nyɛ ma hia blɔ ɔ pɛpɛɛpɛ a ha mi ɔ nɛ!”

Monique bɔni sɔmɔmi ngɛ Myanmar kɛ je December 2014. Benɛ e ya sɔmɔ ngɛ he nɛ fiɛɛli fuu a he hia ngɛ ɔ, mɛni jɔɔmihi e ná? E de ke: “Ye bua jɔ wawɛɛ kaa i ngɛ sɔmɔe ngɛ hiɛ ɔ. I kɛ nihi etɛ kaseɔ Baiblo ɔ. A kpɛti nɔ kake ye jeha 67. Be fɛɛ be nɛ ma ya e ngɔ ɔ, e nyaa ye he nɛ e fuaa mi. Benɛ e ba le kaa Mawu biɛ ji Yehowa a, e fo ya, nɛ e de ke: ‘Kɛ je benɛ a fɔ mi ɔ, i nui hyɛ kaa Mawu biɛ ji Yehowa kaa mwɔnɛ ɔ. I wa pe mo hluu, se o tsɔɔ mi nɔ́ ko nɛ e he hia wawɛɛ nɛ e sa nɛ ma le.’ Kaa bɔ nɛ nyɛ ma susu ɔ, imi hu i fo ya. Níhi a si kpamihi kaa kikɛ haa nɛ ke o ngɛ sɔmɔe ngɛ he nɛ fiɛɛli a he hia ngɛ ɔ, o bua jɔɔ wawɛɛ.” Lingmi nɛ ɔ, Monique ná he blɔ kɛ ya Sukuu Kɛ Ha Matsɛ Yemi Sane Kpakpa Fiɛɛli ɔ eko.

Nɔ́ kpa ko hu nɛ wo nyɛmimɛ komɛ he wami nɛ a ya Myanmar ji jeha 2013 Yearbook of Jehovah’s Witnesses nɛ e tu ma nɛ ɔ he munyu ɔ. Nyɛmiyo Li nɛ e ye jeha 30 kɛ se nɛ e ngɛ Southeast Asia momo ɔ hu hia kɛ ya Myanmar. Jinɛ e kɛ e be tsuo tsuɔ ní ngɛ ní tsumi ko mi, se benɛ e kane Myanmar he sane ngɛ Yearbook ɔ mi ɔ, e bɔni he susumi ke ji e ma nyɛ ma ya sɔmɔ ngɛ lejɛ ɔ. Nyɛmiyo Li de ke: “Benɛ i ya kpe klɛdɛɛ nɛ a pee ngɛ Yangon ngɛ jeha 2014 ɔ mi ɔ, i kɛ nyɛminyumu ko kɛ e yo nɛ a fiɛɛɔ ha Chinese bi nɛ a ngɛ Myanmar a kpe. Akɛnɛ i nu Chinese gbi he je ɔ, i pee ye juɛmi kaa ma hia kɛ ya Myanmar konɛ ma ya ye bua Chinese kuu nɛ ngɛ lejɛ ɔ. I kɛ Monique to blɔ nya nɛ wa ya hi Mandalay. Yehowa ye bua wɔ nɛ wa ná ní tsumi ngɛ he kake. Wa tsɔɔ ní ngɛ sukuu ko mi ligbi komɛ. Jehanɛ hu ɔ, wa ná tsu ngɛ sukuu ɔ kasa nya. E ngɛ mi kaa je mi dɔɔ la ngɛ hiɛ ɔ, nɛ waa kɛ nyagba komɛ kpeɔ mohu lɛɛ, se i náa bua jɔmi ngɛ ní nɛ i ngɛ tsue ha Yehowa a mi. Nihi nɛ a ngɛ Myanmar a be nɔ́ ko tsɔ, se a buɔ nɔ, nɛ a suɔ nɛ a bu sane kpakpa a tue. Bɔ nɛ Yehowa ngɛ ní tsumi ɔ fo woe ngɛ hiɛ ɔ ha a ngɛ nyakpɛ. I he ye wawɛɛ kaa Yehowa lɛ ha nɛ i ba Mandalay hiɛmi nɛ ɔ.”

Nyɛmimɛ nɛ a hia kɛ ya ma kpahi a nɔ konɛ a ya ye bua a na kaa Yehowa buɔ sɔlemi tue niinɛ. Mo susu Jumpei nɛ e ye jeha 37 kɛ e yo Nao nɛ lɛ hu e ye jeha 35 ɔ a níhi a si kpami ɔ he nɛ o hyɛ. Jinɛ a ngɛ mumui asafo ko mi ngɛ Japan. Mɛni he je nɛ a hia kɛ ya Myanmar? Jumpei de ke: “Jehahi fuu ji nɛ ɔ nɛ i kɛ ye yo ɔ wa pee wa juɛmi kaa wa maa ya ma se  konɛ wa ya sɔmɔ ngɛ he nɛ fiɛɛli fuu a he hia ngɛ. Nyɛminyumu ko nɛ waa kɛ lɛ ngɛ mumui asafo ɔ mi ngɛ Japan ɔ hia kɛ ho Myanmar ya. E ngɛ mi kaa sika bɔɔ ko pɛ nɛ wa nyɛ nɛ wa to si mohu lɛɛ, se ngɛ May 2010 mi ɔ, wɔ hu wa hia kɛ ho Myanmar ya. Nyɛmimɛ nyumuhi kɛ yihi nɛ a ngɛ Myanmar a nya wa he wawɛɛ nitsɛ!” Kɛ e naa sɔmɔmi ní tsumi ɔ ngɛ lejɛ ɔ ha kɛɛ? E de ke; “Ni ɔmɛ a bua jɔ munyu ɔ he wawɛɛ! Ke wa je videohi nɛ a pee ngɛ mumuihi a gbi mi kɛ tsɔɔ mumui ɔmɛ ɔ, a bua jɔɔ wawɛɛ. Wa bua jɔ kaa wa hia kɛ ba hiɛmi nɛ ɔ, nɛ wa ngɛ Yehowa sɔmɔe!”

Benɛ a dɛ mi ta a, kɛ a pee kɛɛ? Jumpei de ke: “Benɛ wa ye jeha etɛ ngɛ hiɛ ɔ, lɔ ɔ ji wa ye wa sika a tsuo ta. Nɛ wa be nyɛe nɛ waa wo wa tsu ɔ he hiɔ kɛ ha jeha nɛ maa ba a. I kɛ ye yo ɔ wa sɔle ngɛ he si abɔ. Kɛkɛ nɛ benɛ wa hyɛ we blɔ ɔ, asafo ɔ ní tsumi kɔni ɔ ngma wɔ kaa wa sɔmɔ kaa blɔ gbali klɛdɛɛ be bɔɔ ko! Wa ngɔ wa hɛ kɛ fɔ Yehowa nɔ, nɛ e ha we nɛ wa nine nɛ nyɛ si. E hyɛ wa nɔ ngɛ nɔ́ fɛɛ nɔ́ mi.” Lingmi nɛ ɔ, Jumpei kɛ Nao ya Sukuu Kɛ Ha Matsɛ Yemi Sane Kpakpa Fiɛɛli ɔ eko.

Simone je Italy, nɛ e yo Anna hu je New Zealand. Mɛni lɛ wo Simone nɛ e ye jeha 43 ɔ kɛ e yo Anna e nɛ e ye jeha 37 ɔ he wami nɛ a hia kɛ ho Myanmar ya a? Anna de ke: “Myanmar he sane nɛ ngɛ jeha 2013 Yearbook ɔ mi ɔ lɛ wo wɔ he wami. Simone de ke: “E ji he blɔ nɛ wa ná kaa wa ba Myanmar. Si himi he wɛ tsɔ ngɛ hiɛ ɔ, nɛ wa náa be babauu kɛ tsuɔ Yehowa ní tsumi ɔ. Wa ná níhi a si kpamihi nɛ maa nɔ mi ha wɔ kaa Yehowa hyɛɛ nihi nɛ a ya sɔmɔɔ ngɛ hehi nɛ fiɛɛli a he hia ngɛ.” (La 121:5) Anna de ke: “I nɛ bua jɔmi ngɛ si himi kaa kikɛ hyɛ. Wa si himi pee kpokploo. I náa deka kɛ haa ye huno ɔ, nɛ suɔmi nɛ ngɛ wa kpɛti ɔ mi ba wa wawɛɛ. Wa ná huɛmɛ kpakpahi hulɔ. Nihi be Yehowa Odasefohi a he juɛmi yaya ngɛ hiɛ ɔ, nɛ bɔ nɛ nihi a bua jɔ sɛ gbi ɔ he ha a ngɛ nyakpɛ!” Ngɛ mɛni blɔ nɔ?

Anna de ke: “Ligbi ko ɔ, i ye yoyo ko nɛ e ngɛ yunivɛsiti yae ɔ odase ngɛ jua a nɔ, nɛ wa to kaa wa ma tsa wa ní sɛɛmi ɔ nɔ be kpa. Benɛ wa kpe ekohu ɔ, i na kaa e ngɔ e huɛ ko hu kɛ ba. Be kpa nɛ wa kpale kpe ɔ, e ngɔ ni kpahi hu kɛ ba. Pee se ɔ, e kpale ngɔ ni komɛ hu kɛ ba piɛɛ he. Amlɔ nɛ ɔ, i kɛ ni enuɔ ɔmɛ tsuo kaseɔ ní.” Simone de ke: “Nihi nɛ a ngɛ zugba kpɔ ɔ mi ɔ, a he ngɛ bua jɔmi nɛ a suɔ nɛ a le níhi fuu. Nihi fuu a bua jɔ sane kpakpa a he hluu kaa wa nine kpi a he po.”

Se ke nɔ ko suɔ nɛ e hia kɛ ya Myanmar a, mɛni ji ní komɛ nɛ e ma nyɛ maa pee? Mizuho nɛ e je Japan ɔ de ke: “Jehahi babauu ji nɛ ɔ nɛ i kɛ ye huno Sachio wa suɔ nɛ wa sɔmɔ ngɛ ma ko nɛ fiɛɛli fuu a he hia ngɛ. Se wa li he nɛ wa maa ya. Benɛ wa kane Myanmar he sane ngɛ 2013 Yearbook ɔ mi ɔ, níhi a si kpamihi nɛ taa nɔ tsui he nɛ wa kane ɔ ha nɛ wa  bɔni Myanmar he susumi.” Sachio hu de ke: “Wa to kaa waa kɛ otsi kake ma ya slaa si ngɛ Myanmar ma ngua nɛ ji Yangon ɔ mi konɛ wa kɛ hyɛ bɔ nɛ ma a si fɔfɔɛ ngɛ ha. Ligbi bɔɔ nɛ wa ya ye ngɛ lejɛ ɔ ha nɛ wa ná nɔ mi mami kaa wa ma nyɛ maa hia kɛ ya lejɛ ɔ.”

Rodney kɛ e yo Jane nɛ a je Australia a tsuo ye jeha 50 kɛ se. A kɛ a binyumu Jordan kɛ a biyo Danica ngɛ sɔmɔe ngɛ Myanmar kɛ je jeha 2010. Rodney de ke: “Bɔ nɛ ni ɔmɛ suɔ wawɛɛ kaa a maa kase Mawu he ní ɔ woɔ wɔ he wami. I ngɛ wekuhi nɛ a ma nyɛ ɔ he wami woe kaa a ya sɔmɔ ngɛ he ko kaa Myanmar.” Mɛni he je? E ha heto ke: “Hiɛmi nɛ ɔ nɛ wa ba a ha nɛ huɛ bɔmi nɛ ngɛ waa kɛ Yehowa wa kpɛti ɔ mi ba wa wawɛɛ! Nihewi kɛ yihewi fuu ngmɛ blɔ nɛ fon, lɔle, ní tsumi kɛ ní kpahi ngɔ a be. Se wa bimɛ ɔmɛ lɛɛ a ngɔ a be kɛ ngɛ gbi ehe kasee konɛ a nyɛ nɛ a kɛ fiɛɛ. Jehanɛ hu ɔ, a kaseɔ blɔhi nɛ a ma nyɛ maa gu nɔ kɛ ye nihi nɛ a li Baiblo ɔ he nɔ́ ko tsɔ ɔ odase. A bɔɔ mɔde kaa a ma ha sane heto ngɛ gbi ehe nɛ a ngɛ kasee ɔ mi. A kɛ a he wo sɔmɔmi ní tsumi ɔ mi vii.”

Oliver nɛ e ye jeha 37 nɛ e je United States ɔ tsɔɔ nɔ́ he je nɛ e susu kaa se nami ngɛ sɔmɔmi ní tsumi nɛ ɔ he ɔ. E de ke: “Si himi ngɛ hiɛ ɔ be kaa he nɛ i je ɔ mohu lɛɛ, se i ná jɔɔmihi babauu. Ye ma mi nɛ i je kɛ ba hiɛ ɔ ha nɛ i ná hemi kɛ yemi ngɛ Yehowa mi kaa si himi fɛɛ ko nɛ i kɛ maa kpe ɔ, e maa ye bua mi. I ná he blɔ nɛ i kɛ nyɛmimɛ nɛ jinɛ i li mɛ ɔ pee kake kɛ ngɛ Mawu sɔmɔe. Se lemi nɛ i le kaa i kɛ mɛ tsuo wa hɛɛ hemi kɛ yemi kake ɔ ye bua mi, nɛ i na kaa nɔ́ ko be nɛ e he hia pe Mawu Matsɛ Yemi ɔ.” Mwɔnɛ ɔ, Oliver kɛ e yo Anna kɛ kã ngɛ fiɛɛe ha nihi nɛ a tuɔ Chinese gbi ɔ ngɛ a zugba kpɔ ɔ mi.

Nyɛmiyo Trazel nɛ e ye jeha 52 nɛ e je Australia a bɔni sɔmɔmi ngɛ Myanmar kɛ je jeha 2004. E de ke: “I ngɛ nihi tsuo nɛ a si fɔfɔɛ maa ngmɛ mɛ blɔ ɔ he wami woe kaa a ya sɔmɔ ngɛ he nɛ fiɛɛli fuu a he hia ngɛ. I kpa si nɛ i na kaa ke nɔ ko suɔ nɛ e sɔmɔ ɔ, Yehowa maa ye bua lɛ. I nla we po kaa ye si himi ma tsake kulaa kikɛ nɛ ɔ. Si himi nɛ haa nɔ bua jɔmi pe kulaa lɛ i ná a nɛ.”

Níhi nɛ nyɛmimɛ nɛ a ya ngɛ sɔmɔe ngɛ Myanmar a de ɔ nɛ wo mo he wami konɛ o hyɛ kaa o ma nyɛ ma ya ye bua ngɛ zugba kpɔhi nɛ a fiɛɛ we ngɛ mi hyɛ ɔ lo. Ee, yemi kɛ buali nɛ ɔmɛ ngɛ dee ke: “Wa kpa nyɛ pɛɛ, nyɛ po mi kɛ ba Myanmar nɛ nyɛ ba ye bua wɔ!”