1, 2. (a) Mɛni he je nɛ nile ngɛ mi kaa wa ma fĩ Yehowa se ɔ? (b) Mɛni he wa ma susu ngɛ munyu nɛ ɔ mi?

NILE ngɛ mi kaa wa maa mɛtɛ Yehowa he. Nɔ ko be nɛ e ngɛ he wami, nɛ e le ní aloo e ngɛ suɔmi pe Yehowa, wa Mawu ɔ! Enɛ ɔ he ɔ, wɔ tsuo wa suɔ nɛ wa fĩ e se. (La 96:4-6) Se Mawu sɔmɔli komɛ kɛ si fɔfɔɛ komɛ kpe nɛ e sa kaa a ko fĩ Yehowa se, se a nyɛ we nɛ a pee jã.

² Ngɛ munyu nɛ ɔ mi ɔ, wa ma susu ni komɛ nɛ a he sanehi ngɛ Baiblo ɔ mi ɔ he. Nimli nɛ ɔmɛ hi si kaa Yehowa sɔmɔli, se ngɛ jamɛ a be ɔ mi nɔuu ɔ, a pee níhi nɛ Yehowa sume. Níhi nɛ wa maa kase ngɛ a he ɔ maa ye bua wɔ konɛ waa ye Yehowa anɔkuale be fɛɛ be.

3. Mɛni he je nɛ Yehowa bɔ mɔde kaa e maa ye bua Kain, nɛ mɛni Yehowa de lɛ?

³ Mo susu Kain he nɛ o hyɛ. E ja we mawu kpa ko kaa Yehowa pɛ. Se Mawu bua jɔɛ bɔ nɛ Kain ja lɛ ha a he. Mɛni he je? Ejakaa Yehowa na ní yayahi ngɛ e tsui mi. (1 Yoh. 3:12) Yehowa bɔ Kain kɔkɔ ke: “E ji o pee nɔ́ nɛ hi jinɛ i ko ná  o he bua jɔmi. Se akɛnɛ o ya pee we nɔ́ nɛ hi ɔ, yayami buu si ngɛ o sinya a nya kaa lohwe dikalɔ nɛ e miɔ nɛ e maa tu mla mo. Se, hyɛ nɛ o ye yayami ɔ nɔ.” (1 Mose 4:6, 7) Ngɛ blɔ ko nɔ ɔ, Yehowa ngɛ Kain dee ke, “Ke o tsake o tsui, nɛ o bu mi tue ɔ, imi hu i be mo kuae.”

4. Benɛ Yehowa wo Kain ga kaa e tsake ɔ, mɛni Kain pee?

⁴ Ja Kain tsake e susumi loko Yehowa bua maa jɔ e he. Se Kain bui ga nɛ Yehowa wo lɛ ɔ tue. Susumi yaya kɛ akɔnɔ yaya nɛ e ná a ha nɛ e ya pee yayami. (Yak. 1:14, 15) Benɛ Kain wɛ ɔ, eko ɔ, e susuu we kaa be ko maa ba nɛ e maa te si kɛ wo Yehowa. Se pee se ɔ, e te si kɛ wo Yehowa, nɛ e gbe e nyɛmi ɔ!

5. Mɛni nɛ ke Kristofo no ko peeɔ ɔ, e ma nyɛ ma puɛ e kɛ Yehowa a kpɛti?

⁵ Mwɔnɛ ɔ hu ɔ, e ma nyɛ maa ba kaa nɔ ko ngɛ Yehowa sɔmɔe, se jamɛ a be ɔ mi nɔuu ɔ, e peeɔ níhi nɛ Yehowa sume kaa bɔ nɛ Kain pee ɔ. (Jud 11) Eko ɔ, nɔ ɔ yaa fiɛɛmi kɛ asafo mi kpehi, se jamɛ a be ɔ mi nɔuu ɔ, e susuɔ níhi nɛ tleɔ bɔmi nami he akɔnɔ si ɔ a he, aloo e hɛ kɔ̃ɔ, aloo e nyɛɔ e nyɛmi Kristofo no ngɛ e tsui mi. (1 Yoh. 2:15-17; 3:15) Ní nɛ ɔmɛ ma nyɛ ma ha nɛ e ya pee yayamihi nɛ hɛdɔ ngɛ he. Eko ɔ, ni kpahi li nɔ́ nɛ wa susuɔ aloo níhi nɛ wa peeɔ, se Yehowa lɛɛ, e naa nɔ́ fɛɛ nɔ́, nɛ ke waa kɛ wa tsui tsuo fĩ we e se hu ɔ, e le.​—Kane Yeremia 17:9, 10.

6. Ke wa fĩ Yehowa se kpɛii ɔ, ngɛ mɛni blɔ nɔ nɛ lɛ hu e maa ye bua wɔ konɛ waa “ye yayami ɔ nɔ”?

⁶ Ke wa tɔ̃ Yehowa nɔ po ɔ, e kɔni gbo we ngɛ wa he. Ke nɔ ko hia nane ko nɛ ma nyɛ ma puɛ e kɛ Yehowa a kpɛti ɔ, Yehowa ngɛ lɛ dee ke: ‘Moo kpale kɛ ba ye ngɔ, nɛ i kɛ o he yayami ɔmɛ maa pa mo.’ (Mal. 3:7) Yehowa le kaa wa ngɛ mɔde bɔe nɛ waa ye wa gbɔjɔmi ɔmɛ a nɔ, se e suɔ nɛ waa hie ní yayamihi. (Yes. 55:7) Ke wa bɔ wa he mɔde ɔ, Yehowa hu be wɔ kuae, nɛ e ma ha wɔ he wami nɛ waa kɛ maa “ye yayami ɔ nɔ.”​—1 Mose 4:7.

7. Kɛ e ba kɛɛ nɛ huɛ bɔmi nɛ ngɛ Solomon kɛ Yehowa a kpɛti ɔ puɛ ɔ?

⁷ Wa ma nyɛ maa kase níhi fuu ngɛ Matsɛ Solomon he. Benɛ Solomon wɛ ɔ, e biɔ blɔ tsɔɔmi kɛ jeɔ Yehowa ngɔ. Mawu ha lɛ nile babauu, nɛ e de lɛ ke e ma sɔlemi we ngua ko nɛ ngɛ fɛu ngɛ Yerusalɛm. Se huɛ bɔmi nɛ ngɛ e kɛ Yehowa a kpɛti ɔ ba puɛ. (1 Ma. 3:12; 11:1, 2) Mawu Mlaa a tsɔɔ kaa e sɛ nɛ Israel matsɛ ko nɛ e ngɔ ‘yihi fuu; ejakaa ke e pee jã a, e tsui maa je Yehowa he.’ (5 Mose 17:17) Solomon gbo Mawu tue. E ngɔ yihi 700, nɛ e ná plãhi 300. (1 Ma. 11:3) E yi ɔmɛ a kpɛti nihi fuu pi Israel bi, nɛ a jaa lakpa mawuhi. Enɛ ɔ he ɔ, Solomon tɔ̃ Mawu Mlaa nɛ tsɔɔ kaa a ko ngɔ ma se yihi ɔ hu nɔ.​—5 Mose 7:3, 4.

8. Mɛni yayamihi Solomon pee kɛ si Yehowa?

⁸ Suɔmi nɛ jinɛ Solomon ngɛ kɛ ha Yehowa mlaa amɛ ɔ bɔni si bami bɔɔbɔɔbɔɔ, nɛ nyagbe ɔ, e pee yayamihi nɛ hɛdɔ ngɛ a he. Solomon ma afɔle sami la tɛhi kɛ ha yo mawu nɛ a tsɛɛ lɛ ke Astarte ɔ, kɛ lakpa mawu ko hu nɛ a tsɛɛ lɛ ke Kemosh ɔ, nɛ e kɛ e yi ɔmɛ ja lakpa mawu nɛ ɔmɛ. E ma afɔle sami la tɛ nɛ ɔmɛ ngɛ yoku ko nɔ ngɛ Yerusalɛm hɛ mi tutuutu, ngɛ he nɛ e ma Yehowa sɔlemi we ɔ ngɛ ɔ. (1 Ma. 11:5-8; 2 Ma. 23:13) Eko ɔ, Solomon mlɔɔ e he kaa ke e ngɛ níhi nɛ Yehowa sume pee nɛ jamɛ a be ɔ mi nɔuu e ngɛ afɔle sãe  ngɛ sɔlemi we ɔ, Yehowa ma ma e hɛ kɛ fɔ e yayami ɔ nɔ.

9. Benɛ Solomon bui Mawu kɔkɔ bɔmi ɔ tue ɔ, mɛni ba?

⁹ Yehowa ma we e hɛ kɛ fɔɛ yayami nɔ kɔkɔɔkɔ. Baiblo ɔ de ke: ‘Yehowa, Israel Mawu ɔ je e he kpo ngɔ tsɔɔ Solomon si enyɔ, nɛ e wo lɛ mlaa ke e ko ja mawu kpahi; se Solomon bui Yehowa tue, nɛ e je e se. Enɛ ɔ he je ɔ, Yehowa mi mi fu Solomon.’ Nyagbenyagbe ɔ, Mawu kua Solomon, nɛ e bimɛ ɔmɛ ná we he blɔ nɛ a kɛ ye Israel ma a tsuo nɔ, nɛ a kɛ haomihi kpe jehahi babauu.​—1 Ma. 11:9-13.

10. Mɛni ma nyɛ ma puɛ huɛ bɔmi kpakpa nɛ ngɛ waa kɛ Yehowa wa kpɛti ɔ?

¹⁰ Solomon sane ɔ ha nɛ wa na kaa ke waa kɛ nihi nɛ a nui Yehowa mlaa amɛ a sisi nɛ a kɛ tsu we ní ɔ bɔɔ ɔ, huɛ bɔmi nɛ ngɛ waa kɛ Yehowa wa kpɛti ɔ ma nyɛ ma puɛ. Nimli nɛ ɔmɛ ma nyɛ maa pee nihi nɛ a ngɛ asafo ɔ mi, se huɛ bɔmi nɛ ngɛ a kɛ Yehowa a kpɛti ɔ mi wɛ. Aloo eko ɔ, nihi nɛ a pi Yehowa sɔmɔli nɛ a ji wa weku li, wa kpɔ mi bi, nihi nɛ waa kɛ mɛ tsuɔ ní kɛ nihi nɛ waa kɛ mɛ yaa sukuu. Ngɛ anɔkuale mi ɔ, ke nihi nɛ waa kɛ mɛ bɔɔ ɔ bui Yehowa mlaahi ɔ, bɔɔbɔɔbɔɔ ɔ, a ma puɛ huɛ bɔmi nɛ ngɛ waa kɛ Yehowa wa kpɛti ɔ.

11. Mɛni maa tsɔɔ kaa e sa nɛ o kɛ nɔ ko nɛ kpa huɛ bɔmi?

¹¹ Kane 1 Korinto Bi 15:33. Nihi fuu ngɛ nɛ tsa pi Yehowa Odasefohi ji mɛ, se a ngɛ su kpakpa komɛ, nɛ a baa a je mi bɔ nɛ sa hulɔ. Ke o ngɛ huɛ komɛ kaa jã a, anɛ lɔ ɔ tsɔɔ kaa a ji huɛmɛ kpakpahi lo? Kɛ nyɛ huɛ bɔmi ɔ maa sa o Mawu jami he ha kɛɛ? Anɛ a maa ye bua mo konɛ o ja Yehowa saminya lo? Mɛni lɛ e he hia mɛ wawɛɛ ngɛ a si himi mi? Anɛ be fɛɛ be ɔ, he dlami kɛ klamahi nɛ ba nɔ, sika, hɛ ja jemi kɛ he lo nya ní kpahi a he munyu pɛ a tuɔ lo? Anɛ a pɔɔ nihi a he munyu yaya tumi, nɛ a tsuaa yakayaka ní lo? Yesu de ke: “Nɔ́ nɛ hyi tsui ɔ tɔ ɔ, lɔ ɔ nɛ nya deɔ.” (Mat. 12:34) Ke o yɔse kaa nihi nɛ o kɛ mɛ ngɛ bɔe ɔ ma nyɛ ma puɛ o kɛ Yehowa nyɛ kpɛti ɔ, lɛɛ moo bɔ mɔde kaa o kɛ mɛ be bɔe tsɔ, aloo ke e he hia a, o kɛ mɛ nɛ kpa bɔmi kulaa.​—Abɛ 13:20.

12. (a) Mɛni sane lɛ Yehowa ha nɛ e mi tɛ̃ ha Israel bi ɔmɛ benɛ a je Ijipt bɔɔ pɛ ɔ? (b) Benɛ Yehowa de Israel bi ɔmɛ ke e sa nɛ a ja lɛ pɛ ɔ, mɛni a de?

¹² Jehanɛ hu ɔ, wa ma nyɛ maa kase ní kɛ je nɔ́ nɛ ba benɛ Israel bi ɔmɛ je Ijipt kɛ yaa Si Womi Zugba a nɔ ɔ mi. Israel bi ɔmɛ ya bua a he nya ngɛ Sinai Yoku ɔ  he, nɛ Yehowa je e he kpo kɛ tsɔɔ mɛ ngɛ nyakpɛ blɔ ko nɔ. Yehowa ha nɛ bɔku kpii ko wo, nɛ hiɔwe si, oslabai gba, nɛ la su ku ha yoku ɔ nɔ, nɛ a nu nɔ́ ko nɛ nya wa kaa titimati pɛmi. (2 Mose 19:16-19) Yehowa gu blɔ nɛ ɔ nɔ kɛ tsɔɔ Israel bi ɔmɛ kaa e ji ‘Mawu nɛ a kɛ lɛ plee we nɔ́ he,’ nɛ tsɔɔ kaa e suɔ nɛ a ja lɛ pɛ. E wo mɛ si kaa e maa ye nihi nɛ a suɔ lɛ nɛ a yeɔ e mlaa amɛ a nɔ ɔ anɔkuale. (Kane 2 Mose 20:1-6.) Ngɛ blɔ ko nɔ ɔ, Yehowa ngɛ e we bi ɔmɛ dee ke, “Ke nyɛ ja imi pɛ ɔ, imi hu i be nyɛ kuae.” Kaa o ngɛ lejɛ ɔ, jinɛ kɛ o ko pee o ní ngɛ nɔ́ nɛ Yehowa de ɔ he ha kɛɛ? E ngɛ heii kaa o ko pee kaa bɔ nɛ Israel bi ɔmɛ pee ɔ. Mɛ tsuo ‘a nya sɔ nɛ a de ke, “Nɔ́ tsuaa nɔ́ nɛ Yehowa de wɔ ke waa pee ɔ, wa maa pee.”’ (2 Mose 24:3) Se e kɛ we kulaa nɛ nɔ́ ko nɛ a hyɛ we blɔ ya nɔ. Enɛ ɔ ma bi nɛ Israel bi ɔmɛ nɛ a tsɔɔ kaa a fĩ Yehowa se loo a fĩ we e se.

13. Mɛni ka nɛ Israel bi ɔmɛ kɛ kpe?

¹³ Benɛ Israel bi ɔmɛ na bɔku kpii ɔ, oslabai gbami ɔ, kɛ nyakpɛ ní kpahi nɛ Mawu pee ɔ, a ye gbeye wawɛɛ. A kpa Mose pɛɛ kaa e da a nane mi konɛ e kɛ Yehowa nɛ ya tu munyu ngɛ Sinai Yoku ɔ nɔ ha mɛ. (2 Mose 20:18-21) Se Mose nɛ ji a hɛ mi nyɛɛlɔ ɔ se ya kɛ wawɛɛ ngɛ yoku ɔ nɔ. Enɛ ɔ ha nɛ Israel bi ɔmɛ susu kaa a tlɔ nga a nɔ. Eko ɔ, a ngɔ a hɛ kɛ fɔ Mose nɛ ji adesa a nɔ tsɔ. A de Aaron ke: ‘Kikɛmɛ a Mose nɛ ɔ nɛ je wɔ kɛ je Ijipt zugba a nɔ ɔ, wa li sane nɛ ya ba e nɔ. Lɔ ɔ he ɔ, moo pee mawu ha wɔ nɛ e nyɛɛ wa hɛ mi.’​—2 Mose 32:1, 2.

14. Mɛni susumi nɛ Israel bi ɔmɛ kɛ sisi a he, nɛ mɛni Yehowa pee ngɛ nɔ́ nɛ a pee ɔ he?

¹⁴ Israel bi ɔmɛ le kaa Yehowa sume amaga jami. E ji yayami nɛ hɛdɔ ngɛ he. (2 Mose 20:3-5) Se benɛ a wo Yehowa si ɔ, e kɛ we nɛ a bɔni sika tsu na bi ko jami! Ngɛ yayami nɛ Israel bi ɔmɛ pee nɛ ɔ tsuo se ɔ, a susu kaa a ngɛ Yehowa jae loloolo. Aaron po tsɛ amaga jami ɔ ke, ‘nyami ligbi ha Yehowa’! Kɛ Yehowa na nɔ́ nɛ a pee ɔ ha kɛɛ? E na kaa Israel bi ɔmɛ je e se. Yehowa de Mose ke ni ɔmɛ “ble a he,” nɛ ‘blɔ nɛ e fã mɛ ke a nyɛɛ nɔ ɔ, a gba kɛ je nɔ.’ Yehowa mi mi fu mɛ wawɛɛ, nɛ e pee e juɛmi po kaa e ma kpata Israel ma a tsuo hɛ mi.​—2 Mose 32:5-10.

15, 16. Mɛni Mose kɛ Aaron pee nɛ tsɔɔ kaa a fĩ Yehowa se? (Moo hyɛ foni nɛ ngɛ ní kasemi ɔ sisije ɔ.)

¹⁵ Se Yehowa ji Mawu nɛ e naa nɔ mɔbɔ. Enɛ ɔ he ɔ, e ma e juɛmi nya si kaa e be Israel bi ɔmɛ a hɛ mi kpatae hu. E mɔbɔ nami ɔ ha nɛ nihi nɛ a suɔ lɛ ɔ ná he blɔ kɛ tsɔɔ kaa a fĩ e se. (2 Mose 32:14) Benɛ Mose na bɔ nɛ ni ɔmɛ ngɛ ngmlaa kpae, nɛ́ a ngɛ lae, nɛ́ a ngɛ doe ngɛ amaga a hɛ mi ɔ, e mi mi fu, nɛ e wɛɛ sika tsu na bi ɔ bukɔbukɔ. Mose wo e gbi nɔ kɛ de ma a ke: ‘Nɔ tsuaa nɔ nɛ ngɛ Yehowa se ɔ, nɔ ɔ nɛ ba ye ngɔ!’ Kɛkɛ nɛ “Levi bi ɔmɛ tsuo bua a he nya ngɛ he kake, nɛ a bu kɛ ba [Mose] ngɔ.”​—2 Mose 32:17-20, 26.

¹⁶ E ngɛ mi kaa Aaron lɛ puɛ amaga a ha mɛ mohu lɛɛ, se e pia e he, nɛ e ya piɛɛ Levi bi ɔmɛ a he kɛ da Yehowa se. Pi Yehowa se pɛ nɛ anɔkualetsɛmɛ nɛ ɔmɛ ya da, se a tsɔ a he kɛ je yayami peeli ɔmɛ a he. Nile ngɛ mi kaa a pee jã, ejakaa jamɛ a ligbi ɔ, a gbe nihi akpehi abɔ nɛ a ja amaga a. Se nihi nɛ a ya da Yehowa se ɔ yi ná wami, nɛ Yehowa wo si kaa e maa jɔɔ mɛ.​—2 Mose 32:27-29.

17. Mɛni wa ma nyɛ maa kase kɛ je nɔ́ nɛ bɔfo Paulo de ngɛ sika tsu na bi ɔ he ɔ mi?

 ¹⁷ Pee se ɔ, bɔfo Paulo tu sika tsu na bi ɔ nɛ Israel bi ɔmɛ ja a he munyu, nɛ e bɔ wɔ kɔkɔ ke: “Ní nɛ ɔmɛ ba pee nɔ hyɛmi níhi kɛ ha wɔ konɛ wa ko . . . ba pee wɔ jali kaa bɔ nɛ a ti ni komɛ pee ɔ. A ngma [nɔ hyɛmi ní nɛ ɔmɛ] konɛ a kɛ bɔ wɔ nihi nɛ níhi a blɔ nya tomi nɛ ɔmɛ a nyagbe ɔ ba ná wɔ ɔ kɔkɔ. Enɛ ɔ he ɔ, ha nɛ nɔ nɛ e susu kaa e daa si ɔ nɛ e hyɛ nɛ hi konɛ e ko nɔ si.” (1 Kor. 10:6, 7, 11, 12) Kaa bɔ nɛ Paulo tsɔɔ ɔ, e ma nyɛ maa ba kaa Yehowa sɔmɔli nɛ a yeɔ lɛ anɔkuale ɔ po maa pee ní yayahi. Eko ɔ, nihi kaa jã ma susu kaa loloolo ɔ, a ji Yehowa huɛmɛ. Demi kɛkɛ nɛ nɔ ko ma de ke e huɛ ji Yehowa aloo e ngɛ Yehowa anɔkuale yee ɔ tsɔɔ we kaa Yehowa kplɛɛ e nɔ.​—1 Kor. 10:1-5.

18. Mɛni ma nyɛ ma ha nɛ waa je Yehowa se, nɛ mɛni maa je mi kɛ ba?

¹⁸ Akɛnɛ Mose se ya kɛ ngɛ Sinai Yoku ɔ nɔ pe bɔ nɛ Israel bi ɔmɛ hyɛ blɔ he je ɔ, a hao. Ke ji kaa Yehowa kojomi ligbi ɔ kɛ je ehe ɔ bɛ mla kaa bɔ nɛ wa ngɛ blɔ hyɛe ɔ, eko ɔ, lɔ ɔ ma nyɛ ma ha nɛ wɔ hu waa hao. Eko ɔ, wa ma bɔni susumi kaa si womi nɛ ɔmɛ be mi bae piɔ aloo a be mi bae kulaa. Ke wa hyɛ we nɛ hi ɔ, susumi nɛ ɔmɛ ma ha nɛ waa di he lo nya níhi a se mohu pe nɛ wa maa pee Yehowa suɔmi nya ní. Bɔɔbɔɔbɔɔ ɔ, wa ma nyɛ maa je Yehowa se, nɛ wa ma ya pee níhi nɛ jinɛ be ko nɛ be ɔ wa be pee kɔkɔɔkɔ.

19. Mɛni anɔkuale munyu ko nɛ e sa nɛ wa kai be fɛɛ be, nɛ mɛni he je?

¹⁹ E sa nɛ wa kai be fɛɛ be kaa Yehowa suɔ nɛ waa bu lɛ tue nɛ wa ja lɛ pɛ. (2 Mose 20:5) Ke wa pee we Yehowa suɔmi nya ní ɔ, nɔ́ nɛ e tsɔɔ ji kaa wa ngɛ Satan suɔmi nya ní pee, nɛ wa le kaa haomi pɛ lɛ maa je mi kɛ ba. Enɛ ɔ he ɔ, Paulo bɔ wɔ kɔkɔ ke: “Nyɛ be nyɛe maa hi Yehowa kplu ɔ nya nue nɛ nyɛ maa hi daimonio ɔmɛ a kplu ɔ hu nya nue; nyɛ be nyɛe maa hi “Yehowa we okplɔɔ ɔ” nɔ ní yee nɛ nyɛ maa hi daimonio ɔmɛ hu a we okplɔɔ ɔ nɔ ní yee.”​—1 Kor. 10:21.

20. Ke wa tɔ̃ po ɔ, mɛni Yehowa ma nyɛ maa pee kɛ ye bua wɔ?

²⁰ Ngɛ Kain, Solomon kɛ Israel bi ɔmɛ a sane ɔ nɛ wa susu a he ɔ mi ɔ, nɔ́ kake sa kadimi. Mɛ tsuo a ná he blɔ nɛ a ko nyɛ ‘tsake a tsui’ nɛ́ a ‘kpale a se.’ (Níts. 3:19) Wa na kaa ke nihi tɔ̃ po ɔ, Yehowa kua we mɛ nɔuu. Ngɛ Aaron blɔ fa mi ɔ, Yehowa na lɛ mɔbɔ. Ngɛ wa be nɛ ɔ mi ɔ, Yehowa guɔ Baiblo ɔ, kɛ Baiblo kasemi womihi kɛ wa nyɛmimɛ Kristofohi a nɔ kɛ bɔɔ wɔ kɔkɔ. Ke wa buɔ kɔkɔ bɔmi nɛ ɔmɛ tue ɔ, wa ma nyɛ ma ná nɔ mi mami kaa Yehowa maa na wɔ mɔbɔ.

21. Ke waa kɛ kahi kpe ɔ, mɛni e sa nɛ waa fia wa pɛɛ si kaa wa maa pee?

²¹ Yi mi tomi ko he je nɛ Yehowa naa wɔ mɔbɔ ɔ nɛ. (2 Kor. 6:1) Enɛ ɔ haa wɔ he blɔ “konɛ wa kua ní peepeehi nɛ sɛ Mawu hɛ mi kɛ je mi akɔnɔhi.” (Kane Tito 2:11-14.) Be abɔ nɛ wa ngɛ “níhi a blɔ nya tomi nɛ ɔ mi” ɔ, waa kɛ si fɔfɔɛhi maa kpe nɛ e ma bi nɛ waa tsɔɔ kaa Yehowa pɛ nɛ wa ma ja. Nyɛ ha nɛ waa fia wa pɛɛ si kaa wa be Yehowa se jee gblegbleegble, ejakaa e sa nɛ waa ‘bu Yehowa, wa Mawu ɔ tue, nɛ wa ja lɛ nɔ kake pɛ,’ nɛ waa mɛtɛ e he.​—5 Mose 10:20.