BENƐ Yesu tsɔɔ e kaseli ɔmɛ bɔ nɛ a maa fiɛɛ sane kpakpa a ha a, e ha nɛ a le kaa pi be fɛɛ be nɛ nihi a bua maa jɔ he kaa a maa bu Matsɛ Yemi ɔ he sane kpakpa a tue. (Luka 10:3, 5, 6) Wɔ hu waa kɛ nihi kaa jã ma nyɛ maa kpe ngɛ fiɛɛmi mi. Ni komɛ jɛɔ wɔ aloo a mi mi fuɔ wɔ. Enɛ ɔ ma nyɛ ma ha nɛ e he nɛ wa ha wɔ kaa wa ma je mi mi sami kpo kɛ tsɔɔ mɛ.

Nɔ nɛ e mi mi sãa lɛ ngɛ nihi a he ɔ, ke e na nyagbahi nɛ nihi kɛ ngɛ kpee ɔ, a ní peeɔ lɛ mɔbɔ, nɛ e bɔɔ mɔde kaa e maa ye bua mɛ. Ke wa mi mi sɛ̃ wɔ ha nihi nɛ waa kɛ mɛ kpeɔ ngɛ fiɛɛmi mi ɔ, lɔ ɔ ma ha nɛ kã nɛ wa ngɛ ɔ nya maa ba si. Mi mi sami ngɛ kaa kɔɔhiɔ nɛ haa nɛ la tsoɔ wawɛɛ. Ke wa mi mi sãa wɔ ngɛ nihi a he ɔ, lɔ ɔ ma ha nɛ waa kɛ kã maa fiɛɛ!​—1 Tɛs. 5:19.

Ke nihi bui wɔ tue po ɔ, mɛni blɔ nɔ wa maa gu kɛ je mi mi sami kpo kɛ tsɔɔ mɛ? Mo ha nɛ wa susu bɔ nɛ Yehowa, Yesu kɛ bɔfo Paulo plɛ kɛ je mi mi sami kpo ha a he konɛ waa kase mɛ.

Jeha akpehi abɔ ji nɛ ɔ nɛ nihi ngɛ Yehowa biɛ ɔ he guɛ gbee. Se kɛ̃ ɔ, “e mi mi jɔ kɛ ha nihi nɛ a li sina kɛ yiwutsotsɛmɛ” tsuo. (Luka 6:35) Ngɛ mɛni blɔ nɔ nɛ Yehowa mi mi jɔ kɛ ha mɛ? E to e tsui si kɛ ha nɔ fɛɛ nɔ. Yehowa suɔ nɛ e he “nimli slɔɔtohi tsuo” a yi wami. (1 Tim. 2:3, 4) Mawu sume yi wu tso ní peepee, se kɛ̃ ɔ e naa adesahi kaa a he jua wa, nɛ e sume nɛ a hɛ mi nɛ kpata.​—2 Pet. 3:9.

Yehowa le kaa Satan sisi nihi babauu nɛ a he lakpa tsɔɔmihi ye. (2 Kor. 4:3, 4) A tsɔɔ nihi fuu lakpa tsɔɔmihi kɛ je a jokuɛwi a si tɔɔ. Enɛ ɔ haa nɛ e he waa ha mɛ kaa a maa nu anɔkuale ɔ sisi. Se Yehowa pee klaalo kaa e maa ye bua nimli nɛ ɔmɛ. Kɛ wa plɛ kɛ le enɛ ɔ ha kɛɛ?

Mo susu bɔ nɛ Yehowa na blema Nineve bi ɔmɛ ha a he nɛ o hyɛ. Ngɛ a ní yayami ɔmɛ tsuo se ɔ, Yehowa de Yona ke: “Imi lɛɛ e sɛ kaa Nineve sane dɔɔ mi lo? Nineve ɔ, ma ngua, kɛ e mi nimli babauu, maa pee 120,000 kɛ se, nɛ a li kpakpa kɛ yayami a kpɛti slɔɔto.” (Yona 4:11) Nineve bi ɔmɛ a ní pee Yehowa mɔbɔ, ejakaa a li e he nɔ́ ko. Enɛ ɔ he ɔ, e tsɔ Yona konɛ e ya bɔ mɛ kɔkɔ.

Wa naa nihi kaa bɔ nɛ Yehowa naa mɛ ɔ. Wa suɔ nɛ waa kase lɛ nɛ waa ye bua nihi konɛ a ba le lɛ. Ke a bui wɔ tue po ɔ, wa bɔɔ mɔde kaa wa maa ye bua mɛ.

Ke nihi bui wa sɛ gbi ɔ tue ɔ, e sa nɛ waa bɔ mɔde nɛ waa le nɔ́ he je nɛ a pee a ní jã a.  Eko ɔ, a ti ni komɛ a bua jɔɛ Baiblo ɔ he, aloo a le ni komɛ nɛ a tsɛɔ a he Kristofohi se a peeɔ ní yayahi. Eko ɔ, nihi ye wa he lakpa kɛ tsɔɔ mɛ. Aloo eko po ɔ, ke a bu wɔ tue ɔ, a kpɔ mi bi loo a weku li maa ye a he fɛu.

Eko ɔ, ni komɛ nɛ waa kɛ mɛ kpeɔ ngɛ fiɛɛmi mi ɔ gblee si himi komɛ nɛ a mi wa mi. Enɛ ɔ ha nɛ a yeɔ gbeye, nɛ lɔ ɔ he ɔ, a sume nɛ a maa bu wɔ tue. Ma se sane kpakpa fiɛɛlɔ ko nɛ a tsɛɛ lɛ ke Kim ɔ de ke: “Nihi nɛ a ngɛ ye zugba kpɔ ɔ mi ɔ weto ní tsuo hɛ mi kpata akɛnɛ a hwu ta ko ngɛ lejɛ ɔ he je. A be hɛ nɔ kami ko. A pee basaa nɛ a he we nɔ ko yi. Behi fuu ɔ, nihi nɛ a ngɛ hiɛ ɔ teɔ si kɛ woɔ wa fiɛɛmi ní tsumi ɔ. Ligbi ko nɛ i ngɛ fiɛɛe ɔ, nihi ba tua mi, nɛ a wo ye he gbeye.”

Ngɛ mɛni blɔ nɔ nɛ nyɛmiyo Kim je mi mi sami kpo ngɛ yi mi wami nɛ e kɛ kpe ɔ tsuo se? E de ke: “I bɔɔ mɔde kaa ma kai munyu nɛ ngɛ Abɛ 19:11 ɔ. Lejɛ ɔ de ke: ‘Nɔ nɛ ngɛ juɛmi ɔ, e mi mi fu we mla.’ Ke i susu nihi nɛ a ngɛ ye kpɔ ɔ mi a si fɔfɔɛ he ɔ, e yeɔ bua mi nɛ i jeɔ mi mi sami kpo kɛ haa mɛ. Se ni komɛ nɛ wa ya a ngɔ ɔ bu wɔ tue ngɛ jamɛ a kpɔ ɔ nɔuu mi, nɛ wa kpale ya slaa mɛ.”

Wa ma nyɛ ma bi wa he ke, ‘Ke imi nɛ i ngɛ wetsɛ ɔ si fɔfɔɛ ɔ mi ɔ, jinɛ kɛ i ko pee ye ní ngɛ sane kpakpa a he ha kɛɛ?’ Kaa nɔ hyɛmi nɔ́ ɔ, ke imi nɛ i nu lakpa munyuhi kɛ kɔ Yehowa Odasefohi a he ɔ, kɛ ma pee ye ní kɛɛ? Eko ɔ, wɔ hu wa be sane kpakpa a tue bue, nɛ e ma bi nɛ a je mi mi sami kpo kɛ tsɔɔ wɔ. Yesu de wɔ ke níhi nɛ wa suɔ nɛ nihi nɛ a pee ha wɔ ɔ, e sa nɛ wɔ hu waa pee jã nɔuu ha mɛ. Munyu nɛ ɔ he nɛ wa ma susu ɔ maa wo wɔ he wami nɛ wa ma je mi mi sami kpo kɛ tsɔɔ nihi.​—Mat. 7:12.

Bɔfo Paulo je mi mi sami kpo kɛ tsɔɔ nihi nɛ a te si kɛ wo e fiɛɛmi ní tsumi ɔ. Mɛni he je? E hɛ ji bɔ nɛ e pee e ní ha be ko nɛ be ɔ nɔ. E de ke: “Be ko nɛ e be ɔ, i ji musu bɔlɔ kɛ yi mi walɔ kɛ nɔ builɔ mohu. Se kɛ̃ ɔ, a na mi mɔbɔ, ejakaa i li nɛ i pee, nɛ i be hemi kɛ yemi hulɔ.” (1 Tim. 1:13) E le kaa Yehowa kɛ Yesu na lɛ mɔbɔ wawɛɛ nitsɛ. Eko ɔ, e yɔse kaa be ko nɛ be ɔ, lɛ hu e peeɔ e ní kaa nihi nɛ e ngɛ fiɛɛe ha mɛ ɔ.

Be komɛ ɔ, Paulo kɛ nihi nɛ a he lakpa tsɔɔmihi ye ɔ kpeɔ. Se kɛ e peeɔ e ní ha kɛɛ? Ní Tsumi 17:16 bɔ amaniɛ kaa benɛ Paulo ya Atene nɛ “e na kaa wɔhi babauu ngɛ ma a mi ɔ, e mumi nɛ e ngɛ e mi ɔ wo la.” E ngɛ mi kaa nɔ́ nɛ e na a gba e nya mohu lɛɛ, se lɔ ɔ  nɔuu nɔ nɛ e da kɛ ye mɛ odase. (Níts. 17:22, 23) E tsakeɔ blɔhi nɛ e guɔ nɔ kɛ fiɛɛɔ ɔ bɔ nɛ pee nɛ nimli slɔɔtohi a bua nɛ jɔ sɛ gbi ɔ he, konɛ e ‘gu blɔ fɛɛ blɔ nɛ e ma nyɛ nɔ kɛ he a ti ni komɛ a yi wami.’​—1 Kor. 9:20-23.

Wa ma nyɛ maa kase Paulo. Ke ji kaa wa yɔse su yayahi nɛ pɔ he ngɛ wa kpɔ ɔ mi kɛ lakpa tsɔɔmihi nɛ nihi fuu he ye ɔ, wa ma nyɛ maa gu ga blɔ nɔ konɛ waa tsɔɔ mɛ “manye munyu ɔ.” (Yes. 52:7) Nyɛmiyo ko nɛ a tsɛɛ lɛ ke Dorothy ɔ de ke: “Nihi fuu nɛ a ngɛ wa kpɔ ɔ mi ɔ he ye kaa Mawu yi mi wa nɛ e hlaa tɔmihi ngɛ wa he. I jeɔ a yi kaa a he Mawu ye nɛ lɔ ɔ se ɔ, i gblaa a juɛmi kɛ yaa Yehowa su ɔmɛ a nɔ ngɛ Baiblo ɔ mi, nɛ i tsɔɔ mɛ ní kpakpahi nɛ e to kaa e ma ha adesahi hwɔɔ se ɔ.”

E sa nɛ waa bɔ mɔde kaa wa maa wo wa nyɛmimɛ nɛ waa kɛ mɛ fiɛɛɔ ɔ he wami. Jessica de ke: “Ke a bui wɔ tue ngɛ we ko mi ɔ, i bɔɔ mɔde kaa ma je ye juɛmi ngɛ nɔ. Nɔ́ nɛ i peeɔ mohu ji kaa, i tsakeɔ ní sɛɛmi ɔ. Eko ɔ, wa maa tu yiblii kpakpa nɛ wa fiɛɛmi ní tsumi ɔ wo ɔ he munyu.”

Yehowa le haomihi nɛ waa kɛ kpeɔ ngɛ wa sɔmɔmi ní tsumi ɔ mi. Hyɛ bɔ nɛ e bua maa jɔ ha ke wa kase e mɔbɔ nami ɔ! (Luka 6:36) Se be maa su nɛ Yehowa maa kojo nihi nɛ a tsakee we a tsui ɔ. Jamɛ a be ɔ mi ɔ, e be mɛ mɔbɔ nae. Wa ngɛ nɔ mi mami kaa e le be nɛ e kɛ níhi a blɔ nya tomi nɛ ɔ maa ba nyagbe. Se loko jamɛ a be ɔ maa su ɔ, e sa nɛ waa fiɛɛ kɛ hɛdɔ. (2 Tim. 4:2) Nyɛ ha nɛ waa ya nɔ nɛ waa fiɛɛ kɛ kã nɛ wa je mi mi sami kpo kɛ ha “nimli slɔɔtohi tsuo.”