1. Mɛni he je nɛ wa ma nyɛ ma de ke níhi tsuo nɛ ngɛ ɔ ji Yehowa nɔ́ ɔ? (Moo hyɛ foni nɛ ngɛ ní kasemi ɔ sisije ɔ.)

YEHOWA ‘nɔ́ ji hiɔwe ploplooplo ɔ tsuo, zugba a, kɛ nɔ́ tsuaa nɔ́ nɛ ngɛ nɔ ɔ.’ (5 Mose 10:14; Kpoj. 4:11) Akɛnɛ Yehowa lɛ bɔ adesahi he je ɔ, e níhi ji mɛ tsuo. (La 100:3) Se kɛ̃ ɔ, ngɛ adesahi a yi nɔ sane mi ɔ, Mawu hla ni komɛ kaa e níhi ngɛ blɔ klɛdɛɛ ko nɔ.

2. Mɛnɔmɛ nɛ Baiblo ɔ tsɔɔ kaa Yehowa hla kɛ pee e ma ngɛ blɔ klɛdɛɛ nɔ ɔ?

² Kaa nɔ hyɛmi nɔ́ ɔ, ngɛ La 135 ɔ, Yehowa tsɛ blema Israel bi ɔmɛ nɛ a sɔmɔ lɛ ngɛ anɔkuale mi ɔ ke “e ma.” (La 135:4) Jehanɛ hu ɔ, Hosea gba kɛ fɔ si kaa ma je li komɛ ma ba pee Yehowa we bi. (Hos. 2:23) Hosea gbami ɔ ba mi benɛ Yehowa bɔni ma je li ɔmɛ hlami konɛ a piɛɛ Kristo he kɛ ye matsɛ ngɛ hiɔwe. (Níts. 10:45; Rom. 9:23-26) “Je ma klɔuklɔu” nɛ ɔ ji ‘nihi nɛ Yehowa ngɔ mɛ kɛ pee e nihi titli.’ A ngɔ mumi klɔuklɔu ɔ kɛ pɔ mɛ nu, nɛ a ngɛ hɛ nɔ kami kaa a maa ya hiɔwe. (1 Pet. 2:9, 10) Nɛ anɔkuale Kristofohi nɛ a ngɛ hɛ nɔ kami kaa a maa hi Paradeiso ngɛ zugba a nɔ ɔ hu nɛɛ? Yehowa tsɛɔ mɛ hu ke ‘e ma’ aloo nihi nɛ e hla.​—Yes. 65:22.

3. (a) Mwɔnɛ ɔ, mɛnɔmɛ nɛ a ná he blɔ kɛ ba pee Yehowa we bi nɛ e suɔ mɛ saminya? (b) Mɛni he wa ma susu ngɛ munyu nɛ ɔ mi?

 ³ Mwɔnɛ ɔ, “to kuu nyafii” ɔ nɛ a ngɛ hɛ nɔ kami kaa a maa ya hiɔwe ɔ kɛ ‘jijɔ kpa amɛ’ nɛ a ngɛ hɛ nɔ kami kaa a maa hi zugba a nɔ ɔ bla kɛ pee “to kuu kake,” nɛ Yehowa naa mɛ kaa e ma. (Luka 12:32; Yoh. 10:16) E sa nɛ waa na Yehowa si kaa wa ná he blɔ ngua nɛ ɔ, nɛ wa ba piɛɛ nihi nɛ e suɔ mɛ saminya a a he. Munyu nɛ ɔ maa ye bua wɔ konɛ waa na blɔ slɔɔtohi a nɔ nɛ wa maa gu kɛ na Yehowa si kaa e ha wɔ he blɔ klɛdɛɛ nɛ ɔ.

4. Mɛni ji blɔ kake ko nɛ wa ma nyɛ maa gu nɔ kɛ tsɔɔ Yehowa kaa wa bua jɔ huɛ bɔmi nɛ ngɛ waa kɛ lɛ wa kpɛti ɔ he, nɛ mɛni blɔ nɔ Yesu hu pee nɔ́ ko kaa jã?

⁴ Ke wa jɔɔ wa he nɔ ha Yehowa a, lɔ ɔ tsɔɔ kaa wa bua jɔ he blɔ nɛ e kɛ dloo wɔ ɔ he. Enɛ ɔ he ɔ, benɛ a baptisi mo ɔ, o ha nɛ nihi le ngɛ gua mi kaa Yehowa nɔ́ ji mo, nɛ o maa je o tsui mi kɛ bu lɛ tue be fɛɛ be. (Heb. 12:9) Yesu hu pee nɔ́ ko kaa jã benɛ a baptisi lɛ ɔ. Ngɛ blɔ ko nɔ ɔ, e de Yehowa ke: “I suɔ kaa ma pee o suɔmi nya ní.” (La 40:7, 8) A fɔ Yesu kɛ wo ma nɛ a jɔɔ a he nɔ kɛ ha Yehowa a mi, se kɛ̃ ɔ, lɛ nitsɛ hu e jɔɔ e he nɔ kɛ ha Yehowa kaa e maa pee e suɔmi nya ní.

5, 6. (a) Benɛ Yesu ha nɛ a baptisi lɛ ɔ, kɛ Yehowa nu he ha kɛɛ? (b) Mɛni nɔ́ he tomi nɔ́ lɛ tsɔɔ kaa ke wa jɔɔ wa he nɔ ha Yehowa a, e bua jɔɔ wawɛɛ?

⁵ Benɛ Yesu ha nɛ a baptisi lɛ ɔ, kɛ Yehowa nu he ha kɛɛ? Baiblo ɔ de ke: “Benɛ [Yohane] baptisi Yesu ta a, amlɔ nɔuu nɛ [Yesu] je kpo ngɛ nyu ɔ mi; nɛ hyɛ! hiɔwe nya bli, nɛ e na Mawu mumi ɔ nɛ ngɛ si kplee kɛ ma e nɔ kaa lahuɛ. Hyɛ! Gbi ko hu pɛ kɛ je hiɔwe ke: ‘Ye Bi ji nɛ ɔ nɛ, i suɔ lɛ, nɛ ye bua jɔ e he.’” (Mat. 3:16, 17) Yehowa nɔ́ ji Yesu. Se benɛ Yesu mwɔ e yi mi kpɔ kaa e hiɔwe Tsɛ ɔ suɔmi nya ní pɛ e maa pee ɔ, Yehowa bua jɔ wawɛɛ. Jã kɛ̃ nɛ ke nɔ ko jɔɔ e he nɔ kɛ ha Yehowa a, Yehowa bua jɔɔ, nɛ e jɔɔ lɛ.​—La 149:4.

⁶ Kaa nɔ hyɛmi nɔ́ ɔ, ngɔɔ lɛ kaa nyumu ko du mɔmɔ slɔɔtohi fuu nɛ a ngɛ fɛu ngɛ e we ɔ se. Ligbi ko ɔ, e biyo wayoo ko ya tsɔ mɔmɔ ɔ eko kɛ ba ke lɛ. E ngɛ mi kaa e papaa lɛ du mɔmɔ ɔmɛ tsuo mohu lɛɛ, se e bua jɔ kaa e biyo ɔ ngɔ mɔmɔ ɔ eko kɛ ba ha lɛ kɛ tsɔɔ kaa e suɔ lɛ. Tsɛ ɔ bua maa jɔ mɔmɔ ɔ nɛ e bi ɔ kɛ ba ke lɛ ɔ he pe mɔmɔ kpa amɛ nɛ a ngɛ we ɔ se ɔ. Wa ma nyɛ ma de kɛ nɔ mi mami kaa ke wa jɔɔ wa he nɔ kɛ ha Yehowa kaa wa maa pee lɛ pɛ e suɔmi nya ní ɔ, e bua maa jɔ wawɛɛ.​—2 Mose 34:14.

7. Kɛ Malaki tu bɔ nɛ Yehowa naa nihi nɛ a jeɔ a tsui mi kɛ sɔmɔɔ lɛ ɔ he munyu ha kɛɛ?

⁷ Gbalɔ Malaki de ke: “Jamɛ a be ɔ mi ɔ, nihi nɛ a yeɔ Yehowa gbeye ɔ kɛ a sibi tu munyu, nɔ fɛɛ nɔ kɛ e nyɛmi tu munyu. Nɛ Yehowa ngɛ nɔ́ nɛ a ngɛ dee ɔ tue bue. A ngma kaimi womi ko ngɛ Yehowa hɛ mi kɛ ha nihi nɛ a yeɔ lɛ gbeye nɛ a pueɔ a yi mi tɛ ngɛ e biɛ ɔ he ɔ.” (Malaki 3:16, NW) Ke o jɔɔ we o he nɔ nɛ a baptisi mo lolo ɔ, mo susu nɔ́ he je nɛ jã peemi he hia a he nɛ o hyɛ. Kaa bɔ nɛ e ji ngɛ adesahi tsuo a blɔ fa mi ɔ, kɛ je benɛ a fɔ mo pɛ nɛ o ba pee Yehowa nɔ́. Se moo hyɛ bɔ nɛ Yehowa bua maa jɔ ha ke e na kaa o jɔɔ o he nɔ ha lɛ kaa o maa pee lɛ pɛ e suɔmi nya ní akɛnɛ o suɔ nɛ e ye o nɔ ɔ he je. (Abɛ 23:15) Yehowa hu le nihi tsuo nɛ a jeɔ a tsui mi kɛ sɔmɔɔ lɛ ɔ, nɛ e ngma a biɛ ngɛ e “kaimi womi” ɔ mi.

8, 9. Mɛni Yehowa hyɛɛ blɔ kaa nihi nɛ e ngma a biɛ ngɛ e “kaimi womi” ɔ mi ɔ nɛ a pee?

 ⁸ Ke wa suɔ nɛ wa biɛ nɛ tlɔ Yehowa “kaimi womi” ɔ mi ɔ, ní komɛ ngɛ nɛ e sa nɛ waa pee. Mo kadi kaa Malaki de ke e sa nɛ waa ‘ye Yehowa gbeye nɛ wa pue wa yi mi tɛ ngɛ e biɛ ɔ he.’ Ke wa ja nɔ kpa ko aloo nɔ́ kpa ko ɔ, Yehowa ma je wa biɛ kɛ je e womi ɔ mi.​—2 Mose 32:33; La 69:28.

⁹ Se Yehowa si nɛ wa maa wo kaa wa maa pee e suɔmi nya ní kɛ baptisimi nɛ a maa baptisi wɔ ɔ pɛ pi. He nɔ jɔɔmi kɛ baptisimi ngɔɛ be fuu. Se Yehowa se nɛ wa ma fĩ kaa e we bi ɔ lɛɛ, e sa nɛ waa pee jã be fɛɛ be. Be abɔ nɛ wa ngɛ wami mi ɔ, e sa nɛ wa ní peepee nɛ tsɔɔ kaa wa buɔ Yehowa tue.​—1 Pet. 4:1, 2.

10. Mɛni slɔɔto lɛ e sa nɛ e hi nihi nɛ a sɔmɔɔ Yehowa kɛ nihi nɛ a sɔmɔ we lɛ ɔ a kpɛti?

¹⁰ Ngɛ munyu nɛ sɛ hlami ɔ mi ɔ, wa susu Kain, Solomon, kɛ Israel bi ɔmɛ a he. Mawu sɔmɔli ji mɛ, se a yi Yehowa anɔkuale. Nɔ hyɛmi ní nɛ ɔmɛ tsɔɔ kaa e sa nɛ nihi nɛ a ji Yehowa we bi ɔ nɛ a pee nɔ́ nɛ da, nɛ a kua ní yayamihi. (Rom. 12:9) E da blɔ kaa benɛ Malaki tu “kaimi womi” ɔ he munyu se ɔ, Yehowa de ke a ‘maa na slɔɔto nɛ ngɛ nɔmlɔ nɛ sɔmɔɔ lɛ, kɛ nɔ nɛ sɔmɔ we lɛ ɔ a kpɛti.’​—Mal. 3:18.

11. Mɛni he je nɛ e sa nɛ wa ha nɛ nihi nɛ a na kaa Yehowa pɛ nɛ wa jaa?

¹¹ Mɛni ji nɔ́ kpa ko nɛ wa ma nyɛ maa pee kɛ tsɔɔ kaa wa bua jɔ kaa Yehowa hla wɔ kɛ piɛɛ e we bi a he? E sa nɛ waa ya wa hɛ mi ngɛ Mawu jami mi “konɛ nihi tsuo nɛ a na.” (1 Tim. 4:15; Mat. 5:16) Mo bi o he ke: ‘Anɛ ni kpahi naa kaa i yeɔ Yehowa anɔkuale sisiisi lo? Anɛ e peeɔ mi zo kaa ma ha nɛ nihi nɛ a le kaa Yehowa Odasefo no ji mi lo?’ Hyɛ bɔ nɛ e maa dɔ Yehowa ha ke e peeɔ wɔ zo kaa wa ma ha nɛ nihi nɛ a le kaa e nimli ji wɔ.​—La 119:46; kane Maako 8:38.

12, 13. Mɛni nyɛmimɛ komɛ peeɔ nɛ ha we nɛ nihi nɛ a le mɛ kaa Yehowa Odasefohi?

¹² Aywilɛho sane ji kaa nyɛmimɛ  komɛ ha nɛ “je ɔ mumi ɔ” ngɛ mɛ kudɔe. Enɛ ɔ ha nɛ nihi nɛ́ ‘slɔɔto nɛ ngɛ a kɛ nihi nɛ a sɔmɔ we Yehowa a a kpɛti.’ (1 Kor. 2:12) Je ɔ mumi ɔ haa nɛ nihi baa a je mi ngɛ “he lo ɔ we akɔnɔ ɔmɛ” a nya. (Efe. 2:3) Kaa nɔ hyɛmi nɔ́ ɔ, ngɛ ga womihi nɛ a kɛ ha wɔ ɔ tsuo se ɔ, loloolo ɔ, ni komɛ suɔ kaa a ma dla a he nɛ a wo tadehi kaa bɔ nɛ nihi peeɔ ngɛ je ɔ mi ɔ. A woɔ tadehi nɛ miaa nɔ kɛ tadehi nɛ jeɔ nɔmlɔ tso ɔ he komɛ nɛ sɛ kaa nihi nɛ a na a kpo kɛ baa Kristofohi a kpehi a sisi. A sɛɛ yi komɛ, nɛ a peeɔ yi komɛ nɛ e sɛ kaa Kristofo no nɛ pee. (1 Tim. 2:9, 10) Enɛ ɔ he ɔ, ke a ngɛ nihi a kpɛti ɔ, e he waa kaa o maa le a kpɛti nɔ nɛ ji Yehowa huɛ kɛ nɔ nɛ ji “je ɔ huɛ.”​—Yak. 4:4.

¹³ Ní komɛ hu ngɛ nɛ nyɛmimɛ komɛ peeɔ nɛ tsɔɔ kaa a nyɛ we nɛ a kua je ɔ su ɔmɛ. Kaa nɔ hyɛmi nɔ́ ɔ, ke a ya okplɔɔ ngmɛmi ko sisi ɔ, bɔ nɛ a doɔ nɛ a peeɔ a ní ha a tsɔɔ we kaa Kristofohi ji mɛ. A fonihi nɛ a kɛ fɔɔ huɛ bɔmi hehi nɛ ngɛ intanɛti ɔ nɔ kɛ níhi nɛ a ngmaa kɛ fɔɔ lejɛ ɔ tsɔɔ kaa a hɛɛ je ɔ susumi. Eko ɔ, a pee we yayami nɛ hɛdɔ ngɛ he nɛ́ e sa nɛ a kã a hɛ mi ngɛ asafo ɔ mi. Se kɛ̃ ɔ, a ní peepee ɔ ma nyɛ ma ha nɛ e he nɛ wa ha nyɛmimɛ kpahi kaa a ma je a he kɛ je je ɔ he.​—Kane 1 Petro 2:11, 12.

14. Mɛni e sa nɛ waa pee kɛ po huɛ bɔmi nɛ ngɛ waa kɛ Yehowa wa kpɛti ɔ he piɛ?

¹⁴ Ngɛ je ɔ mi ɔ, nihi diɔ “níhi nɛ peeɔ he lo ɔ akɔnɔ kɛ níhi nɛ peeɔ hɛ ngmɛ ɔ akɔnɔ” ɔ se, nɛ a ngɔɔ níhi nɛ a ngɛ ɔ kɛ fĩaa. (1 Yoh. 2:16) Se akɛnɛ Yehowa we bi ji wɔ he je ɔ, ngmami ɔ woɔ wɔ he wami kaa wa “kua ní peepeehi nɛ sɛ Mawu hɛ mi kɛ je mi akɔnɔhi, nɛ waa kɛ juɛmi nɛ mi tsɔ kɛ dami kɛ Mawu gbeye yemi nɛ hi si ngɛ níhi a blɔ nya tomi nɛ ɔ mi.” (Tito 2:12) E sa nɛ wa munyu tumi, wa ní yemi kɛ wa ní numi, wa he dlami, bɔ nɛ wa peeɔ wa ní ha ngɛ ní tsumi he, kɛ nɔ́ fɛɛ nɔ́ nɛ wa peeɔ ɔ nɛ tsɔɔ kaa Yehowa sɔmɔli ji wɔ niinɛ.​—Kane 1 Korinto Bi 10:31, 32.

15. Mɛni he je nɛ e sa nɛ wa je mi mi jɔmi kpo kɛ tsɔɔ wa nyɛmimɛ nɛ waa suɔ mɛ ɔ?

¹⁵ Bɔ nɛ waa kɛ wa nyɛmimɛ hiɔ si ha a hu ma nyɛ maa tsɔɔ kaa wa bua jɔ huɛ bɔmi nɛ ngɛ waa kɛ Yehowa wa kpɛti ɔ he. Wa nyɛmimɛ ɔmɛ hu ji Yehowa huɛmɛ. Ke wa kai munyu nɛ ɔ be fɛɛ be ɔ, lɔ ɔ ma ha nɛ wa ma je mi mi jɔmi kpo kɛ tsɔɔ mɛ, nɛ wa maa suɔ mɛ. (1 Tɛs. 5:15) Yesu de e kaseli ɔmɛ ke: “Ke suɔmi ngɛ nyɛ kpɛti ɔ, lɔ ɔ ma ha nɛ nihi tsuo maa le kaa nyɛ ji ye kaseli.”​—Yoh. 13:35.

16. Mɛni nɛ ngɛ Mose Mlaa a mi nɛ haa nɛ wa naa kaa Yehowa fiɛ we e we bi a he?

¹⁶ Nɔ́ ko ngɛ Baiblo ɔ mi nɛ maa ye bua wɔ konɛ waa na bɔ nɛ e sa kaa waa kɛ wa nyɛmimɛ nɛ a hi si ha ngɛ asafo ɔ mi. Ngɛ Yehowa sɔlemi we ɔ, kpluhi kɛ ní kpahi nɛ ngɛ lejɛ ɔ ngɛ kɛ ha Mawu jami pɛ. Mose Mlaa a tsɔɔ bɔ nɛ e sa nɛ a ngɔ ní nɛ ɔmɛ kɛ tsu ní ha. Ke nɔ ko kɛ ní nɛ ɔmɛ tsu ní ngɛ blɔ nɛ dɛ nɔ ɔ, Mlaa a tsɔɔ kaa a gbe lɛ. (4 Mose 1:50, 51) Ke Yehowa ha nɛ a hyɛ níhi nɛ wami be a mi nɛ a kɛ tsu ní ngɛ sɔlemi we ɔ nɔ saminya a, lɛɛ kɛ e suɔ nɛ waa kɛ wa nyɛmimɛ nɛ hi si ha kɛɛ? Be ko ɔ, Yehowa de e we bi ke: “Nɔ nɛ maa ta nyɛ he ɔ, i be lɛ kplɛɛe.”​—Zak. 2:8.

17. Mɛni Yehowa toɔ he hɛ ngɛ e we bi a he?

¹⁷ Malaki tsɔɔ hu kaa benɛ Yehowa we bi kɛ a sibi ngɛ ní sɛɛe ɔ, Yehowa “ngɛ nɔ́ nɛ a ngɛ dee ɔ tue bue.” (Mal. 3:16) Ngɛ anɔkuale mi ɔ, “Yehowa le nihi nɛ a ji e nihi.” (2 Tim. 2:19) Yehowa le nɔ́ fɛɛ nɔ́ nɛ wa peeɔ kɛ nɔ́ fɛɛ nɔ́ nɛ wa deɔ. (Heb. 4:13) Ke wa je we mi mi jɔmi kpo kɛ tsɔɔ wa nyɛmimɛ ɔ, Yehowa toɔ he hɛ. Jã kɛ̃ nɛ ke wa peeɔ wa nyɛmimɛ nibwɔ, wa keɔ mɛ ní nɛ waa kɛ a tɔmihi paa mɛ ɔ, Yehowa toɔ lɔ ɔmɛ hu a he hɛ.​—Heb. 13:16; 1 Pet. 4:8, 9.

18. Mɛni wa maa pee kɛ na Yehowa si kaa e hla wɔ kɛ pee e we bi?

¹⁸ Atsinyɛ jemi ko be he kaa wa suɔ nɛ Yehowa nɛ le kaa wa bua jɔ kaa e hla wɔ kɛ pee e we bi. Nile ngɛ mi kaa wa jɔɔ wa he nɔ kɛ ha Yehowa. E ngɛ mi kaa wa “ngɛ yi nɔ ko nɛ e kpɛ̃ nɛ e be e hanɔ ɔ mi” mohu lɛɛ, se wa suɔ nɛ waa pee nihi nɛ “piami ko kɛ sane ko be a he” konɛ wa ‘kpɛ kaa lahi ngɛ je ɔ mi.’ (Filip. 2:15) Wa sume nɛ waa pee níhi nɛ Yehowa bua jɔɛ he. (Yak. 4:7) Wa jeɔ suɔmi kpo kɛ tsɔɔ wa nyɛmimɛ, nɛ wa buɔ mɛ ejakaa wa le kaa mɛ hu Yehowa huɛmɛ ji mɛ.​—Rom. 12:10.

19. Ke wa tsɔɔ kaa Yehowa huɛmɛ ji wɔ ɔ, mɛni jɔɔmihi wa ma ná?

¹⁹ Baiblo ɔ wo si ke: ‘Yehowa be e ma a he ngmɛɛe kɔkɔɔkɔ.’ (La 94:14) Nɔ́ ko nɔ́ ko be nyɛe ma tsake Yehowa si womi nɛ ɔ. Gbenɔ po be nyɛe ma je wɔ kɛ je suɔmi nɛ Yehowa ngɛ kɛ ha wɔ ɔ he. (Rom. 8:38, 39) “Ke wa ngɛ wami mi ɔ, wa ngɛ wami mi kɛ ha Yehowa, nɛ ke wa gbo hu ɔ, wa gbo kɛ ha Yehowa.” (Rom. 14:8) Wa ngɛ be nɛ Yehowa ma tle e huɛmɛ tsuo nɛ a gbo ɔ si kɛ ba wami mi ekohu ɔ blɔ hyɛe wawɛɛ. (Mat. 22:32) Amlɔ nɛ ɔ po ɔ, Yehowa ngɛ wɔ jɔɔe babauu. Baiblo ɔ de ke, ‘a gbaa ma nɛ a Mawu ji Yehowa. A gbaa ma nɛ Yehowa hla kaa lɛ nitsɛ e ma a.’​—La 33:12.