NGƐ Baiblo ɔ mi ɔ, nyumuhi nɛ a kɛ anɔkuale yemi sɔmɔ Yehowa nɛ a “ngɛ he numihi kaa wɔ nɔuu” ɔ je a tsui mi kɛ tu munyuhi nɛ tsɔɔ bɔ nɛ a nuɔ he ha. (Yak. 5:17) Kaa nɔ hyɛmi nɔ́ ɔ, wa ma nyɛ maa nu Paulo sisi benɛ e tu munyu nɛ a ngma ngɛ Roma Bi 7:21-24 ɔ. E de ke: “Ke i suɔ kaa ma pee nɔ́ nɛ da a, nɔ́ yayami mohu lɛ e baa ye hɛ mi. . . . I ji nɔmlɔ nɛ e ní ngɛ mɔbɔ!” Ke wɔ hu wa ngɛ mɔde bɔe kaa wa maa ye wa gbɔjɔmihi a nɔ ɔ, Paulo munyu nɛ ɔ maa wo wɔ he wami.

Paulo je e tsui mi nɛ e de bɔ nɛ e nu he ha ngɛ ní kpa komɛ hu a he. Ngɛ Galatia Bi 2:20 ɔ, e tsɔɔ kaa e ngɛ nɔ mi mami kaa Yesu “suɔ [lɛ] nɛ e ngɔ e he kɛ ha ngɛ [e] he.” Anɛ jã nɔuu nɛ wɔ hu wa nuɔ he lo? Eko ɔ, pi be fɛɛ be.

Ke yayamihi nɛ wa pee kɛ be ɔ haa nɛ wa nuɔ he kaa wa he be se nami ɔ, eko ɔ, be komɛ ɔ, e maa ye ha wɔ kaa wa maa kplɛɛ nɔ kaa Yehowa suɔ wɔ nɛ e kɛ wa yayamihi pa wɔ, nɛ e maa ye kaa wa maa na kpɔmi nɔ́ ɔ kaa nike ní nɛ a kɛ ha wɔ. Anɛ jã nɛ Yesu suɔ nɛ waa na kpɔmi nɔ́ ɔ lo? Ke jã a, lɛɛ mɛni maa ye bua wɔ konɛ waa na kpɔmi nɔ́ ɔ kaa nike ní nɛ a kɛ ha wa ti nɔ fɛɛ nɔ? Nyɛ ha nɛ wa susu sane bimi enyɔ nɛ ɔmɛ a he nɛ waa hyɛ.

Ngɛ anɔkuale mi ɔ, Yesu suɔ nɛ wa ti nɔ fɛɛ nɔ nɛ e na kpɔmi nɔ́ ɔ kaa nike ní nɛ e kɛ ha lɛ. Mɛni tsɔɔ jã? Moo po nɔ́ nɛ a ngma ngɛ Luka 23:39-43 ɔ he foni nɛ o hyɛ. A sɛu nyumu ko ngɛ Yesu kasa nya. Nyumu ɔ kplɛɛ nɔ kaa e pee níhi nɛ sɛ. E ngɛ heii kaa yayami nɛ nyumu ɔ pee ɔ ngɛ hɛdɔ ejakaa nihi nɛ a pee yayami nɛ hɛdɔ ngɛ he wawɛɛ ɔ nɛ a sɛuɔ. Akɛnɛ nyumu ɔ hao wawɛɛ he je ɔ, e kpa Yesu pɛɛ ke: “Ke o sɛ o Matsɛ Yemi ɔ mi ɔ, mo kai mi.”

Mɛni Yesu pee? Moo po he foni nɛ o hyɛ bɔ nɛ Yesu ngɛ piie ha nɛ e kɛ hɛ mi miami plɛ e hɛ mi kɛ tsɔɔ nyumu ɔ. E ngɛ mi kaa Yesu ngɛ piie mohu lɛɛ, se e bɔ mɔde nɛ e muɔ hɛlii kɛ tsɔɔ nyumu ɔ nɛ e wo lɛ si ke: “Ngɛ anɔkuale mi ɔ, i ngɛ mo dee mwɔnɛ ɔ ke, o maa piɛɛ ye he ngɛ Paradeiso.” Jinɛ Yesu ma nyɛ ma de nyumu ɔ ke “nɔmlɔ Bi ɔ . .  ba . . . nɛ e ngɔ e wami kɛ ha kaa kpɔmi nɔ́ nɛ e kɛ kpɔ̃ nihi babauu.” (Mat. 20:28) Se anɛ o kadi kaa Yesu ha nɛ nyumu ɔ na kaa e kpɔmi afɔle sami ɔ ngɛ kɛ ha lɛ nyumu ɔ lo? Yesu ngɔ munyunguhi nɛ ji “mo” kɛ “ye” kɛ tsu ní kaa bɔ nɛ nɔ kɛ e huɛ tuɔ munyu ɔ. Jehanɛ hu ɔ, Yesu tsɔɔ nyumu ɔ se nami nɛ kpɔmi nɔ́ ɔ ma ha nɛ e ná, nɛ ji Paradeiso zugba a nɛ e maa hi nɔ ɔ.

Atsinyɛ jemi ko be he kaa Yesu suɔ nɛ nyumu ɔ nɛ kplɛɛ afɔle nɛ e maa sã a nɔ kaa nike ní nɛ e kɛ ha lɛ. Ke Yesu na ojo fialɔ nɛ e ná we he blɔ nɛ e kɛ ma sɔmɔ Mawu ngɛ blɔ nɛ ɔ nɔ ɔ, lɛɛ jã nɔuu kɛ̃ nɛ e maa na Kristofo no nɛ a baptisi lɛ nɛ e ngɛ Mawu sɔmɔe ɔ nɛ. Mɛni maa ye bua wɔ konɛ wa ná juɛmi nɛ da ngɛ wɔ nitsɛmɛ wa he ke wa pee yayamihi be ko nɛ be ɔ po?

Sɔmɔmi ní tsumi nɛ a kɛ wo Paulo dɛ ɔ ha nɛ e na kaa Yesu gbo ha lɛ. Ngɛ mɛni blɔ nɔ? E de ke: “I naa Kristo Yesu wa Nyɔmtsɛ ɔ, nɔ nɛ e wo mi he wami ɔ si, ejakaa e bu mi anɔkualetsɛ kɛ gu sɔmɔmi ko nɛ e ngɔ kɛ wo ye dɛ ɔ nɔ, e ngɛ mi kaa be ko nɛ e be ɔ, i ji musu bɔlɔ kɛ yi mi walɔ kɛ nɔ builɔ mohu.” (1 Tim. 1:12-14) Be ko nɛ be ɔ, Paulo pee ní yayamihi fuu, se Yesu ngɔ ní tsumi kɛ wo e dɛ. Enɛ ɔ ha nɛ e ná nɔ mi mami kaa Yesu na lɛ mɔbɔ, e suɔ lɛ, nɛ e ngɛ hɛ kɛ nɔ fɔmi ngɛ e mi. Jã nɔuu kɛ̃ nɛ Yesu ha wa ti nɔ fɛɛ nɔ ní tsumi kaa waa fiɛɛ sane kpakpa a. (Mat. 28:19, 20) Anɛ ní tsumi nɛ ɔ nɛ a ha mo ɔ haa nɛ o naa kaa Yesu gbo kɛ ha mo lo?

Albert nɛ a fie lɛ kɛ je asafo ɔ mi jeha 34 loko a kpale ngɔ lɛ ɔ de ke: “Ye hɛ ngɛ ye yayami ɔmɛ a nɔ daa. Se ke i ngɛ fiɛɛmi tso mi ɔ, i nuɔ he kaa Yesu ha mi sɔmɔmi ní tsumi kaa bɔ nɛ e ha bɔfo Paulo ɔ nɔuu. Enɛ ɔ woɔ mi he wami nɛ i naa kaa ye he ngɛ se nami. Ye bua jɔ si himi nɛ i ná amlɔ nɛ ɔ kɛ si himi nɛ ma ná hwɔɔ se ɔ he.”​—La 51:3.

Allan nɛ e pee ní yayamihi fuu nɛ e peeɔ e ní basabasa loko e ba kase anɔkuale ɔ de ke: “Kɛ ba si mwɔnɛ ɔ, i susuɔ ní yayamihi nɛ i pee nihi ɔ a he. Be komɛ ɔ, e haa nɛ i yeɔ aywilɛho. Se i naa Yehowa si kaa e ha imi yayami peelɔ nɛ ɔ he blɔ kaa ma fiɛɛ sane kpakpa a ha nihi. Ke nihi bu sane kpakpa a tue ɔ, e kaiɔ mi kaa Yehowa mi mi hi nɛ e suɔ wɔ. I nuɔ he kaa Yehowa guɔ ye nɔ kɛ yeɔ bua ni kpahi nɛ mɛ hu a si himi ngɛ kaa si himi nɛ i hi mi sa a.”

Ke wa ngɛ fiɛɛe ɔ, e haa nɛ wa ngɔɔ wa juɛmi kɛ maa ní kpakpahi a peemi nɔ, nɛ wa susuɔ ní kpakpahi a he. Enɛ ɔ haa nɛ wa náa nɔ mi mami kaa Yesu naa wɔ mɔbɔ, e suɔ wɔ, nɛ e he wɔ ye.

Be mi nɛ Satan je yaya nɛ ɔ bɛ nyagbe lolo nɛ ɔ, wa tsui maa ya nɔ maa bu wɔ fɔ ngɛ yayamihi nɛ wa pee kɛ be ɔmɛ a he. Mɛni maa ye bua wɔ ke wa tsui ngɛ wɔ fɔ bue?

Behi fuu ɔ, Jean he nile buɔ lɛ fɔ akɛnɛ benɛ e ji yiheyo ɔ, e peeɔ osato ɔ he je. E de ke: “Lemi nɛ i le kaa ‘Mawu kle pe wa tsui’ ɔ haa nɛ ye tsui nɔɔ ye mi.” (1 Yoh. 3:19, 20) Wɔ hu ke wa le kaa Yehowa kɛ Yesu le kaa wa ji yayami peeli nɛ a nuɔ wɔ sisi ɔ, lɔ ɔ maa wo wa bua. Mo kai kaa tsa pi adesahi nɛ a ye mluku nɛ Yehowa kɛ Yesu ngɔ kpɔmi nɔ́ ɔ kɛ ha, mohu ɔ, a kɛ ha yayami peeli nɛ a pia a he ɔ.​—1 Tim. 1:15.

Ke wa sɔle, nɛ wa pue wa yi mi tɛ ngɛ bɔ nɛ Yesu pee e ní ha ngɛ wɔ adesahi nɛ wa yi mluku ɔ wa he, nɛ wa pee nɔ́ fɛɛ nɔ́ nɛ wa ma nyɛ kɛ tsu sɔmɔmi ní tsumi nɛ e ngɔ kɛ wo wa dɛ ɔ kɛ pi si ɔ, wa ma ná nɔ mi mami kaa Yesu gbo ha wa ti nɔ fɛɛ nɔ. Ke o pee jã a, lɛɛ kaa bɔ nɛ Paulo de ɔ, mo hu o ma nyɛ ma de ke, Yesu “suɔ mi nɛ e ngɔ e he kɛ ha ngɛ ye he.”