1. Mɛni tsakemi lɛ ba ngɛ ma komɛ a nɔ lingmi nɛ ɔ?

KE WA hyɛ jeha akpehi abɔ nɛ be ɔ, e ngɛ kaa nɔ́ nɛ nihi babauu nɛ a ngɛ je ɔ mi ɔ ngɛ jami ko mi. Se jeha bɔɔ komɛ ji nɛ ɔ, níhi tsake kulaa. Nihi babauu ngɛ nɛ a be jami ko mi. Ngɛ anɔkuale mi ɔ, ngɛ ma komɛ a nɔ ɔ, nihi hiɛhiɛɛ nɛ a deɔ ke a be jami ko mi. *​—Mat. 24:12.

2. Mɛni he je nɛ nihi babauu be jami ko mi mwɔnɛ ɔ?

² Mɛni he je nɛ nihi nɛ a deɔ ke a be jami ko mi ɔ a he ngɛ hiɛe wawɛɛ ɔ? * Ngɛ a kpɛti ni komɛ a blɔ fa mi ɔ, he lo nya níhi a se dimi loo nyagbahi nɛ a kɛ ngɛ kpee ɔ je a juɛmi kɛ je Mawu nɔ. (Luka 8:14) Ni komɛ he we yi hu kaa Mawu ngɛ. Ni komɛ lɛɛ, a he ye kaa Mawu ngɛ, se a susu kaa piɔ lɛɛ Mawu jami be be, e he hia we, nɛ e kɛ je mi si kpami kɔ we, nɛ juɛmi be mi. Eko ɔ, a pɔɔ numi nɛ a huɛmɛ, a tsɔɔli aloo oposide bi deɔ ke níhi nɛ wami ngɛ a mi ɔ bile, se a pɔɛ níhi nɛ sisi numi ngɛ he nɛ ma ha nɛ a he ye kaa Mawu ngɛ ɔ numi. Bɔ nɛ jami hɛ mi nyɛɛli kpakpaa nihi a he sika, nɛ a yeɔ nihi a nɔ ɔ ha nɛ ni komɛ a bua jɔɛ Mawu jami he. Ngɛ ma komɛ a nɔ ɔ, nɔ yemi ɔmɛ wo mlaahi nɛ tsiɔ jami ɔmɛ a nya ngɛ ní komɛ a mi.

3. Mɛni he je nɛ a to ní kasemi nɛ ɔ he blɔ nya?

³ Yesu fã wɔ ke: “Nyɛ ya pee nihi nɛ a ngɛ je ma amɛ tsuo a mi ɔ ye kaseli.” (Mat. 28:19) Mɛni wa ma nyɛ maa pee kɛ ye bua nihi nɛ a be jami ko mi ɔ konɛ a ná suɔmi kɛ ha Mawu nɛ a ba pee Kristo kaseli? E sa nɛ wa yɔse kaa  he nɛ nɔ ko hi kɛ wa a ma nyɛ maa tsɔɔ bɔ nɛ nɔ ɔ maa pee e ní ha ngɛ sɛ gbi ɔ he. Kaa nɔ hyɛmi nɔ́ ɔ, ke wa fiɛɛ kɛ ha nihi nɛ a je Yuropa a, eko ɔ, a be wɔ tue bue kaa nihi nɛ a je Asia a. Mɛni he je? Ngɛ Yuropa a, nihi babauu le Baiblo ɔ he nɔ́ ko, nɛ a nu hu kaa Mawu lɛ bɔ níhi tsuo. Se ngɛ Asia a, nihi babauu li nɔ́ ko nɔ́ ko kulaa ngɛ Baiblo ɔ he, aloo ke a le nɔ́ ko ngɛ he po ɔ, nɔ́ ko bɔɔ pɛ nɛ a le, nɛ a li hu kaa Bɔlɔ ko ngɛ. Enɛ ɔ he ɔ, a to ní kasemi nɛ ɔ he blɔ nya konɛ he nɛ nihi je loo nɔ́ nɛ a heɔ yeɔ tsuo se ɔ, wa ha nɛ sɛ gbi ɔ nɛ ta a tsui he.

4. Mɛni he je nɛ e sa nɛ wa ná juɛmi nɛ da a?

⁴ Mo Ná Juɛmi Nɛ Da. Daa jeha a, nihi nɛ a be jami ko mi ɔ a kpɛti ni komɛ ba peeɔ Yehowa Odasefohi. A kpɛti nihi fuu baa a je mi saminya momo, nɛ a bua jɔɛ osato nɛ jami ɔmɛ peeɔ ɔ he. Jinɛ ni komɛ hu bɛ a je mi saminya, nɛ a ti nihi fuu hu ngɛ su yayahi nɛ e sa kaa a ngmɛɛ he. Wa ma nyɛ ma ná nɔ mi mami kaa Yehowa maa ye bua wɔ konɛ waa na nihi nɛ a ngɛ “su kpakpa nɛ ma ha nɛ a ná neneene wami.”​—Níts. 13:48; 1 Tim. 2:3, 4.

5. Behi fuu ɔ, mɛni lɛ haa nɛ nihi buɔ wa sɛ gbi ɔ tue?

⁵ Mo Je Mi Mi Jɔmi Kpo Nɛ O Kɛ Hɛ Si Kami Nɛ Tsu Ní. Behi fuu ɔ, bɔ nɛ wa tuɔ munyu ɔ ha a lɛ haa nɛ nihi buɔ wa sɛ gbi ɔ tue se pi nɔ́ nɛ wa deɔ ɔ. Ke wa tu munyu kɛ mi mi jɔmi, waa kɛ hɛ si kami tsu ní, nɛ a na kaa wa suɔ a sane ɔ, a bua jɔɔ. Wa nyɛ we a nɔ kaa a bu wa sɛ gbi ɔ tue. Mohu ɔ, wa bɔɔ mɔde kaa wa maa le nɔ́ he je nɛ a susumi ngɛ jami he ngɛ ekpa a. Kaa nɔ hyɛmi nɔ́ ɔ, ni komɛ sume nɛ a kɛ nɔ ko nɛ a li lɛ maa sɛɛ jami he ní. Ni komɛ hu susu kaa ke nɔ ko bi nihi a susumi ngɛ Mawu he ɔ, e tsɔɔ we bumi. E peeɔ ni komɛ hu zo kaa nihi maa na mɛ kaa a ngɛ Baiblo ɔ kanee, titli ke Yehowa Odasefo no ko lɛ ba a ngɔ. Bɔ nɛ e ji ha fɛɛ ko ɔ, wa bɔɔ mɔde kaa wa maa nu mɛ sisi.​—2 Tim. 2:24, sisi ningma.

6. Mɛni bɔfo Paulo pee kɛ tsɔɔ kaa e tsakeɔ e munyu ɔ mi, nɛ kɛ wa ma plɛ kɛ kase lɛ ha kɛɛ?

⁶ Ke waa kɛ nɔ ko ngɛ ní sɛɛe, nɛ waa kɛ munyu komɛ kaa “Baiblo,” “adebɔ,” “Mawu” aloo “jami” tsu ní nɛ nɔ ɔ bua jɔɛ he ɔ, kɛ wa maa pee kɛɛ? Wa ma nyɛ maa pee wa ní kaa bɔfo Paulo konɛ wa tsake munyu ɔ mi. Ke Paulo ngɛ fiɛɛe ha Yuda bi ɔ, e kɛ mɛ susuɔ níhi a he kɛ jeɔ Ngmami ɔ mi. Se ke e ngɛ fiɛɛe ha Hela bi nɛ a ji womi mi leli ngɛ Areopago ɔ, e ha we nɛ a le kaa e ngɔ e munyu ɔ kɛ je Ngmami ɔ mi. (Níts. 17:2, 3, 22-31) Kɛ wa ma plɛ kɛ kase Paulo ha kɛɛ? Ke wa na nɔ ko nɛ e he we Baiblo ɔ yi ɔ, e maa hi kaa wa be Baiblo ɔ ta woe ngɛ wa ní sɛɛmi ɔ mi. Ke wa yɔse kaa nɔ ko be suɔe nɛ nihi nɛ a na kaa e kɛ wɔ ngɛ Baiblo ɔ kanee ɔ, wa ma nyɛ maa gu blɔ kpa ko nɔ kɛ pee jã konɛ nihi ko na. Eko ɔ, wa ma nyɛ maa kane ngɛ fon loo tablɛti nɔ.

7. Ke wa suɔ nɛ waa kase nɔ́ nɛ Paulo pee nɛ a ngma ngɛ 1 Korinto Bi 9:20-23 ɔ, mɛni e he maa hia nɛ waa pee?

⁷ Moo Nu Mɛ Sisi Nɛ O Bu Mɛ Tue. Ke waa kɛ nɔ ko kpe ngɛ fiɛɛmi mi, nɛ e hɛɛ susumi ko ɔ, e sa nɛ waa bɔ mɔde nɛ waa le nɔ́ he je nɛ e hɛɛ jamɛ a susumi ɔ. (Abɛ 20:5) Mo susu Paulo nɔ hyɛmi nɔ́ ɔ he ekohu. E wa ngɛ Yuda bi a kpɛti. Enɛ ɔ he ɔ, benɛ e ya ngɛ fiɛɛe ha ma je li ɔmɛ ɔ, e na kaa e sa nɛ e pee tsakemi, ejakaa mɛɛ lɛɛ a li Yehowa kɛ Ngmami ɔ he nɔ́ ko tsɔ, aloo nɔ́ ko kulaa. Wa ma nyɛ ma hla níhi a mi aloo wa ma nyɛ ma bi nyɛmimɛ nɛ a ngɛ níhi a si kpami ɔ konɛ a ye bua wɔ nɛ waa nu nihi nɛ waa kɛ kpeɔ ngɛ wa zugba kpɔ ɔ mi ɔ sisi.​—Kane 1 Korinto Bi 9:20-23.

8. Mɛni ji blɔ kake nɛ wa ma nyɛ maa gu nɔ kɛ je Baiblo mi ní sɛɛmi sisi?

⁸ Oti nɛ waa kɛ ma wa hɛ mi ji kaa wa ma hla nihi nɛ a “sa.” (Mat. 10:11) Bɔ nɛ pee nɛ wa fiɛɛmi ní tsumi ɔ nɛ nu tso ɔ, e sa nɛ wa ha nɛ  ni ɔmɛ nɛ a tsɔɔ a susumi nɛ waa bu mɛ tue saminya. Nyɛminyumu ko nɛ e ngɛ England biɔ nihi a susumi ngɛ nɔ́ nɛ ma ha nɛ gba si himi nɛ pee bua jɔmi, bɔ nɛ e sa nɛ a tsɔse bimɛ ha, aloo bɔ nɛ wa maa pee wa ní ha ke a ye wɔ sane yaya a he. Ke a tsɔɔ a juɛmi ta a, e biɔ mɛ ke, “Kɛ o naa ga womi nɛ ɔ nɛ a ngma maa pee jeha 2,000 ji nɛ ɔ ha kɛɛ?” Kɛkɛ ɔ, e ngɔ ngmami nɛ sa kɛ tsɔɔ mɛ ngɛ e fon ɔ nɔ, be mi nɛ e wui “Baiblo” ɔ ta.

9. Kɛ wa ma plɛ kɛ ye bua nihi nɛ a sume nɛ waa kɛ mɛ nɛ sɛɛ Mawu he ní ɔ ha kɛɛ?

⁹ Wa ma nyɛ ma ha nɛ sɛ gbi ɔ nɛ ta nihi nɛ a sume nɛ waa kɛ mɛ nɛ sɛɛ Mawu he ní ɔ a tsui he ke waa kɛ mɛ sɛɛ níhi nɛ a bua maa jɔ he ɔ mohu a he ní. Kaa nɔ hyɛmi nɔ́ ɔ, nihi babauu a bua jɔ adebɔ níhi a he. Lɔ ɔ he ɔ, wa ma nyɛ ma de nɔ́ ko kaa kikɛ: “Eko ɔ, o le kaa je mi si kpali hyɛ adebɔ níhi a nɔ kɛ pee klamahi fuu. Kaa nɔ hyɛmi nɔ́ ɔ, a kase tue he ní, nɛ a hyɛ nɔ kɛ pee munyu tumi klamahi. A kase hɛ ngmɛ he ní nɛ a hyɛ nɔ kɛ pee foni pomi klamahi. Ke o na adebɔ nɔ́ ko ɔ, mɛni lɛ baa o juɛmi mi? Anɛ o susu kaa e ba gu lo, nɔ ko lɛ bɔ lo, aloo nɔ́ kpa ko?” Ke nɔ ɔ ngɛ heto hae ɔ, e sa nɛ waa bu lɛ tue saminya. Lɔ ɔ se ɔ, wa ma nyɛ ma de lɛ ke: “Ke klama he ní leli kase tue kɛ hɛ ngmɛ he ní kɛ pee klama nɛ ɔmɛ ɔ, lɛɛ mɛnɔ lɛ pee tue kɛ hɛ ngmɛ ɔ loko mɛɛ a hyɛ nɔ kɛ pee klamahi ɔ? Ye bua jɔ munyu ko nɛ asilɛte ko ngma jehahi babauu ji nɛ ɔ he. E ngma ke: ‘Nɔ nɛ pee wa tue ɔmɛ ɔ, e nui nɔ́ lo? Nɔ nɛ pee hɛ ngmɛ ɔmɛ ɔ, e hyɛ we nɔ́ lo? . . . Nɔ nɛ tsɔɔ adesahi tsuo ní ɔ, anɛ e be juɛmi lo?’ Je mi si kpali komɛ kplɛɛ munyu nɛ ɔ nɔ, nɛ a he ye kaa Bɔlɔ ko ngɛ.” (La 94:9, 10) Lɔ ɔ se ɔ, wa ma nyɛ maa ya jw.org^® ɔ nɔ nɛ waa ya “Interviews and Experiences” nɛ wa je “Viewpoints on the Origin of Life” video ɔmɛ eko kɛ tsɔɔ lɛ. (Yaa PUBLICATIONS > VIDEOS.) Aloo eko ɔ, wa ma nyɛ ma ha lɛ womiyo nɛ ji, Was Life Created? aloo The Origin of Life​—Five Questions Worth Asking ɔ eko.

10. Mɛni blɔ nɔ wa maa gu nɛ waa kɛ nɔ ko nɛ e sume nɛ waa kɛ lɛ nɛ sɛɛ Mawu he ní ɔ maa je ní sɛɛmi sisi?

¹⁰ Nihi fuu suɔ nɛ a ná si himi kpakpa hwɔɔ se. Se kɛ̃ ɔ, nihi babauu yeɔ gbeye kaa e maa su be ko nɛ zugba a hɛ mi ma kpata aloo e ma puɛ nɛ adesahi be nyɛe maa hi nɔ. Kpɔ mi nɔ hyɛlɔ ko nɛ e ngɛ Norway ɔ tsɔɔ kaa behi fuu ɔ, nihi nɛ a sume nɛ waa kɛ mɛ nɛ sɛɛ Mawu he ní ɔ suɔ nɛ waa kɛ mɛ nɛ sɛɛ níhi nɛ ngɛ nɔ yae ngɛ je ɔ mi ɔ he ní. Ke e nga ni ɔmɛ ta a, e biɔ mɛ ke: “Anɛ o susu kaa wa ma nyɛ ma ná si himi kpakpa hwɔɔ se lo? Mɛnɔ lɛ maa ngɔ si himi kpakpa a kɛ ba? Ma hɛ mi nyɛɛli lo, je mi  si kpali lo, aloo nɔ kpa ko?” Ke e bu mɛ tue saminya se ɔ, e kaneɔ ngmami ko nɛ tu si himi kpakpa nɛ maa ba hwɔɔ se ɔ he munyu kɛ tsɔɔ mɛ, aloo e tsɛɔ ngmami ɔ se. Ke ni komɛ nu ngɛ Baiblo ɔ mi kaa zugba a maa hi si kɛ ya daa, nɛ nimli kpakpahi maa hi nɔ kɛ ya neneene ɔ, a suɔ kaa a maa le babauu.​—La 37:29; Fiɛlɔ 1:4.

11. Mɛni he je nɛ e sa nɛ wa hla blɔ slɔɔtohi nɛ wa maa gu nɔ kɛ je ní sɛɛmi sisi ɔ, nɛ kaa bɔ nɛ wa na ngɛ Roma Bi 1:14-16, kɛ wa ma plɛ kɛ kase Paulo ha kɛɛ?

¹¹ E sa nɛ wa hla blɔ slɔɔtohi nɛ wa ma nyɛ maa gu nɔ kɛ je ní sɛɛmi sisi. Mɛni he je? Ejakaa e slo bɔ nɛ nɔ fɛɛ nɔ ngɛ ha. Nɔ́ nɛ nɔ ko bua jɔ he ɔ, nɔ ko sume. E hɛwi ni komɛ kaa waa kɛ mɛ maa sɛɛ Mawu aloo Baiblo ɔ he ní, se ni komɛ lɛɛ, ke waa kɛ mɛ sɛɛ we Mawu aloo Baiblo ɔ he ní tɛɛ ɔ, a maa bu wɔ tue. Bɔ nɛ e ji ha fɛɛ ko ɔ, e sa nɛ waa ngɔ he blɔhi nɛ wa ma ná a kɛ ye nimli slɔɔtohi tsuo odase. (Kane Roma Bi 1:14-16.) E sa nɛ wa kai kaa Yehowa ji nɔ nɛ haa nɛ anɔkuale ɔ waa ngɛ nihi nɛ a bua jɔ dami ní peemi he ɔ a tsui mi.​—1 Kor. 3:6, 7.

12. Mɛni wa ma nyɛ maa pee konɛ sɛ gbi ɔ nɛ ta nihi nɛ a je mahi nɛ a ngɛ Asia nɛ a susuu we he hyɛ kaa Bɔlɔ ko ngɛ ɔ a tsui he?

¹² Ngɛ je kɛ wɛ ɔ, fiɛɛli babauu kɛ nihi nɛ a je mahi nɛ a ngɛ Asia kpeɔ. Asia bi nɛ ɔmɛ ekomɛ je hehi nɛ nɔ yemi ɔmɛ wo mlaahi nɛ tsiɔ jami ɔmɛ a nya ngɛ ní komɛ a mi. Ngɛ Asia ma komɛ a nɔ ɔ, nihi babauu ji blɔ nɛ a susu he saminya nɛ a hyɛ kaa Bɔlɔ ko ngɛ niinɛ lo. A kpɛti ni komɛ suɔ nɛ a kase ní hehi, enɛ ɔ he ɔ, a kplɛɛɔ nɔ kaa waa kɛ mɛ nɛ kase Baiblo ɔ, se ni komɛ lɛɛ, sisije ɔ, a bua jɔɛ he kaa a maa kase nɔ́ ehe ko. Mɛni wa ma nyɛ maa pee kɛ ye bua mɛ? Fiɛɛli komɛ nɛ a he be ɔ yɔse kaa ke a ngɔ ní sɛɛmi ko kɛkɛ kɛ je sisi, a ha nɛ ni ɔmɛ na kaa a susuɔ a he, nɛ ngɛ be nɛ sa mi ɔ, a de mɛ bɔ nɛ Baiblo sisi tomi mlaa ko nɛ a kɛ tsu ní ɔ ye bua mɛ ha ngɛ a si himi mi ɔ, lɔ ɔ haa nɛ a buɔ sɛ gbi ɔ tue.

13. Mɛni ma nyɛ ma ha nɛ nihi a bua nɛ jɔ he kaa a maa kase Baiblo ɔ? (Hyɛ foni nɛ ngɛ womi ɔ hɛ mi ɔ.)

¹³ Nɔ́ kekleekle nɛ nihi a bua jɔɔ he ji nile munyuhi nɛ ngɛ Baiblo ɔ mi nɛ yeɔ bua nɔ ngɛ si himi mi ɔ. (Fiɛlɔ 7:12) Nyɛmiyo ko nɛ e ngɛ New York nɛ e fiɛɛɔ ha nihi nɛ a tuɔ Mandarin gbi ɔ de ke: “I bɔɔ mɔde kaa ma je huɛ bɔmi su kpo kɛ tsɔɔ nihi, nɛ i buɔ mɛ tue. Ke i na kaa a ji ni hehi nɛ a hia kɛ je a ma mi kɛ ba a, i biɔ mɛ ke: ‘Kɛ níhi ngɛ nɔ yae ha kɛɛ? O na nɔ́ ko nɛ o ngɛ tsue lo? Ma bi ɔmɛ heɔ mo hɛ muɔ lo?’” Be komɛ ɔ, jã nɛ e peeɔ ɔ yeɔ bua lɛ nɛ e kɛ nihi jeɔ Baiblo mi ní sɛɛmi sisi. Ke si fɔfɔɛ ɔ ngmɛ lɛ blɔ ɔ, e biɔ mɛ ke: “Ke wa suɔ nɛ waa kɛ nihi nɛ hi si saminya a, mɛni o susu kaa e he hia nɛ waa pee? Abɛ ko ngɛ Baiblo ɔ mi nɛ ma suɔ nɛ ma kane kɛ tsɔɔ mo. E de ke: ‘Pɛ sisi jemi ngɛ kaa nyu nɛ a bli nya nɛ́ e be; lɔ ɔ he ɔ, benɛ nya sami ɔ mi wɛ lolo ɔ, moo ngmɛɛ he.’ Anɛ o susu kaa ga womi nɛ ɔ maa ye bua wɔ konɛ wa nyɛ nɛ waa kɛ nihi nɛ hi si saminya lo?” (Abɛ 17:14) Ní sɛɛmi kaa kikɛ maa ye bua wɔ konɛ waa na nihi nɛ a bua maa jɔ he kaa waa kpale ba slaa mɛ.

14. Mɛni nɛ nyɛminyumu ko nɛ e ngɛ tsitsaa puje he blɔ ɔ peeɔ kɛ yeɔ bua nihi nɛ a deɔ ke a he we Mawu yi ɔ?

¹⁴ Kɛ wa ma plɛ kɛ ye bua nihi nɛ a deɔ wɔ ke a he we Mawu yi ɔ hu kɛɛ? Nyɛminyumu ko nɛ e kɛ jehahi babauu fiɛɛ kɛ ha nihi nɛ a be jami ko mi nɛ a ngɛ mahi nɛ ngɛ tsitsaa puje he blɔ ɔ de ke: “Ngɛ hiɛ ɔ, ke nɔ ko de ke ‘i he we Mawu yi’ ɔ, nɔ́ nɛ e ngɛ tsɔɔe ji kaa e he we yi kaa e sa nɛ a ja amagahi nɛ nihi babauu jaa ngɛ ma a mi ɔ. Enɛ ɔ he ɔ, behi fuu ɔ, i kɛ mɛ kpaa gbi kaa mawuhi babauu ngɛ nɛ adesahi nɛ a puɛ mɛ, nɛ a pi mawuhi nitsɛ. Behi fuu ɔ, i kaneɔ Yeremia 16:20 ɔ kɛ tsɔɔ mɛ ke: ‘Anɛ nɔmlɔ  ma nyɛ maa pee mawuhi ha lɛ nitsɛ e he lo? Dɛbi! Ke e bɔ mɔde kaa mɛni po, mawu nitsɛnitsɛhi lɛɛ e be nyɛe maa pee.’ Lɔ ɔ se ɔ, i biɔ mɛ ke: ‘Kɛ wa ma plɛ kɛ le slɔɔto nɛ ngɛ mawu nitsɛ kɛ mawuhi nɛ nimli pee ɔ a kpɛti?’ I buɔ mɛ tue saminya, nɛ lɔ ɔ se ɔ, i kaneɔ Yesaya 41:23. Lejɛ ɔ de ke: ‘Nyɛɛ gba níhi nɛ maa ba hwɔɔ se, kɛkɛ wa maa na kaa mawuhi ji nyɛ niinɛ!’ Lɔ ɔ se ɔ, i tsɔɔ mɛ nɔ́ ko nɛ Yehowa gba kɛ fɔ si nɛ maa ba mi hwɔɔ se.”

15. Mɛni wa ma nyɛ maa kase ngɛ nyɛminyumu ko nɛ e ngɛ Asia puje he blɔ ɔ nɔ hyɛmi nɔ́ ɔ mi?

¹⁵ Nyɛminyumu ko nɛ e ngɛ Asia puje he blɔ ɔ tsɔɔ bɔ nɛ ke e kpale ya slaa nihi ɔ, e peeɔ ha. E de ke: “I tsɔɔ mɛ nile munyuhi nɛ ngɛ Baiblo ɔ mi, Baiblo gbamihi nɛ a ba mi kɛ mlaahi nɛ kudɔɔ dodoe ɔmɛ, zugba a kɛ ní kpahi nɛ Mawu bɔ ɔ. Kɛkɛ lɔ ɔ se ɔ, i haa nɛ a naa kaa ní nɛ ɔmɛ tsuo tsɔɔ kaa Bɔlɔ ko ngɛ nitsɛnitsɛ, nɛ e le ní. Ke nɔ ɔ kplɛɛ nɔ kaa eko ɔ Mawu ngɛ ɔ, kɛkɛ i bɔni lɛ nɔ́ nɛ Baiblo ɔ de ngɛ Yehowa he ɔ tsɔɔmi.”

16. Ngɛ Hebri Bi 11:6 nya a, mɛni he je nɛ e sa nɛ wa Baiblo kaseli ɔmɛ nɛ a ná hemi kɛ yemi ngɛ Mawu kɛ Baiblo ɔ mi, nɛ mɛni wa ma nyɛ maa pee kɛ ye bua mɛ konɛ a ná hemi kɛ yemi nɛ ɔ?

¹⁶ Ke waa kɛ nihi nɛ a be jami ko mi ɔ ngɛ Baiblo ɔ kasee ɔ, e sa nɛ waa ya nɔ nɛ wa ha nɛ a ná hemi kɛ yemi kaa Mawu ngɛ nitsɛnitsɛ. (Kane Hebri Bi 11:6.) Jehanɛ hu ɔ, e he maa hia nɛ waa ye bua mɛ konɛ a ná hemi kɛ yemi nɛ mi wa ngɛ Baiblo ɔ mi. Enɛ ɔ ma bi nɛ waa ti anɔkuale munyu komɛ a mi ha mɛ si abɔ. Be fɛɛ be nɛ waa kɛ mɛ maa kase ní ɔ, eko ɔ, e he maa hia nɛ waa kɛ mɛ nɛ susu odase ko nɛ tsɔɔ kaa Baiblo ɔ ji Mawu Munyu ɔ he. Eko ɔ, waa kɛ mɛ ma nyɛ ma susu Baiblo gbamihi nɛ a ba mi, bɔ nɛ Baiblo ɔ kɛ je mi si kpami kɛ yi nɔ sane kɔ ha aloo bɔ nɛ Baiblo ɔ maa ye bua wɔ ha ngɛ si himi mi ɔ he kpiti.

17. Kɛ suɔmi kpo nɛ wa ma je kɛ tsɔɔ nihi ɔ maa ye bua mɛ ha kɛɛ?

¹⁷ Ke nihi ngɛ jami ko mi jio, a be jami ko mi jio ɔ, wa jeɔ suɔmi kpo kɛ tsɔɔ mɛ, nɛ wa yeɔ bua mɛ kɛ yi mi tomi ɔ kaa a ba pee Kristo kaseli. (1 Kor. 13:1) Ke wa ngɛ mɛ ní tsɔɔe ɔ, oti nɛ waa kɛ maa wa hɛ mi ji kaa wa ma ha nɛ a na kaa Mawu suɔ adesahi, nɛ e suɔ nɛ waa suɔ lɛ. Daa jeha a, nihi akpehi abɔ nɛ be ko nɛ be ɔ, a bua jɔɛ jami he tsɔ aloo a bua jɔɛ he kulaa a ba náa suɔmi kɛ haa Mawu, nɛ a baptisiɔ mɛ. Enɛ ɔ he ɔ, mo ná juɛmi nɛ da ngɛ nimli slɔɔtohi tsuo a he nɛ o ha nɛ a na kaa o susuɔ a he. Moo bu mɛ tue. Moo bɔ mɔde kaa o maa nu mɛ sisi. Pee nɔ hyɛmi nɔ́ kpakpa kɛ ha mɛ konɛ lɔ ɔ nɛ ye bua mɛ nɛ a ba pee Kristo kaseli.