Anɛ O Kai Lo?
Anɛ o to o tsui si kɛ kane Hwɔɔmi Mɔ slɔɔtohi nɛ ba lingmi nɛ ɔ lo? Ke jã a, lɛɛ moo hyɛ kaa o ma nyɛ ma ha sane bimihi nɛ nyɛɛ se nɛ ɔmɛ a heto lo:
Mɛni níhi eywiɛ lɛ wa ma nyɛ maa pee konɛ waa bɔ mɔde ngɛ lami mi?
Wa ma nyɛ maa da si saminya konɛ wa wo wa la womi ɔ nɔ. E sa nɛ waa wo mumi saminya. Ke wa bli wa nya mi gbajaa nɛ wa la wawɛɛ ɔ, la a maa pɛ saminya.—w17.11, bf. 5.
Mɛni lɛ sa kadimi ngɛ Israel wesa he ma amɛ kɛ blɔhi nɛ yaa jamɛ a ma amɛ a mi ɔ he?
Wesa he mahi ekpa lɛ ngɛ Israel, nɛ blɔhi nɛ a guɔ nɔ kɛ yaa ma nɛ ɔmɛ a mi ɔ hi saminya. Enɛ ɔ he ɔ, e yi kulaa kaa nɔ ko maa tu fo kɛ ya sa we ngɛ ma nɛ ɔmɛ eko mi.—w17.11, bf. 14.
Mɛni he je nɛ kpɔmi nɔ́ ɔ nɛ Mawu gu Yesu nɔ kɛ ha wɔ ɔ ji nike ní nɛ hi pe kulaa nɛ wa ma nyɛ ma ná a?
E ha nɛ wa ná hɛ kɛ nɔ fɔmi kaa wa ma nyɛ maa hi si daa. Jehanɛ hu ɔ, a maa gu lɔ ɔ nɔ kɛ kpɔ̃ wɔ kɛ je yayami kɛ gbenɔ dɛ mi. Mawu suɔ Adam sisi bimɛ saminya, nɛ e ngɔ Yesu kɛ ha be mi nɛ wa ji yayami peeli.—wp17.6, bf. 6-7.
Kɛ La 118:22 kɔɔ Yesu si tlemi ɔ he ha kɛɛ?
Nihi he we yi kaa Yesu ji Mesia a, nɛ a gbe lɛ. Loko e ma nyɛ ma ba pee ‘kɔ̃ nya tɛ titli ɔ,’ ja a tle lɛ si kɛ je gbeje.—w17.12, bf. 9-10.
Anɛ bitɛte blɔ nya kɛ Mesia a ngɛ tsakpa ko lo?
Tsa pi Yesu nɛnɛkasowa amɛ tsuo nɛ a ji bitɛtehi. Jɛse bi David ɔ, tsa pi bitɛte ji lɛ. Se kɛ̃ ɔ, e nɔ nɛ Mesia a gu kɛ ba.—w17.12, bf. 14-15.
Mɛni sisi tomi mlaahi nɛ kɔɔ hiɔ tsami he lɛ ngɛ Baiblo ɔ mi?
Mose Mlaa tsɔɔ kaa e sa nɛ nihi nɛ a ngɛ hiɔ pɔtɛɛ komɛ nɛ a tsɔ a he banee. Ke nɔ ko ta gbogboe he ɔ, e sa nɛ e du e he. Mlaa a hu tsɔɔ kaa e sa nɛ a to niase yami hehi a he blɔ nya saminya. Ke a fɔ binyumu ɔ, e sa nɛ a po lɛ ngɛ ligbi kpaanyɔne ɔ nɔ, ejakaa jamɛ a be ɔ mi ɔ, muɔ ɔ ma nyɛ maa po mla.—wp18.1, bf. 7.
Mɛni he je nɛ e he hia nɛ Kristofo no nɛ e suɔ lɛ nitsɛ e he bɔ nɛ sa a?
E sa nɛ waa suɔ wa nyɛmimɛ nimli kaa bɔ nɛ wa suɔ wɔ nitsɛmɛ wa he ɔ. (Maak. 12:31) E sa nɛ hunomɛ nɛ a “suɔ a yi ɔmɛ kaa mɛ nitsɛmɛ a nɔmlɔ tso” ɔ. (Efe. 5:28) Se ke wa hyɛ we nɛ hi ɔ, wa ma nyɛ maa suɔ wa he tsɔ.—w18.01, bf. 23.
Mɛni ji ní komɛ nɛ wa ma nyɛ maa pee konɛ waa ya wa hɛ mi ngɛ mumi mi?
E sa nɛ waa kase Mawu Munyu ɔ, nɛ wa pue wa yi mi tɛ ngɛ níhi nɛ wa kase ɔ he nɛ wa kɛ tsu ní. E sa nɛ wa dla wa tsui kɛ wa juɛmi konɛ mumi klɔuklɔu ɔ nɛ kudɔ wɔ, nɛ́ waa ngmɛ blɔ nɛ ni kpahi nɛ a ye bua wɔ.—w18.02, bf. 26.
Mɛni he je nɛ dodoe mi hyɛmi kɛ klami be nyɛe maa tsɔɔ wɔ níhi nɛ maa ba hwɔɔ se ɔ?
Níhi fuu ngɛ nɛ tsɔɔ kaa a be nyɛe maa tsɔɔ wɔ níhi nɛ maa ba hwɔɔ se. Nɔ́ nɛ pa hi ngɛ a he ji kaa Baiblo ɔ kplɛɛ we ní peepee nɛ ɔmɛ a nɔ.—wp18.2, bf. 4-5.
Ke nɔ ko tsɛ wɔ ní yemi nɛ wa kplɛɛ nɔ ɔ, kɛ e sa nɛ waa pee wa ní ngɛ he ha kɛɛ?
Ke wa kplɛɛ nine fɔmi ko nɔ ɔ, e sa nɛ waa bɔ mɔde kaa wa maa ya. (La 15:4) E sɛ nɛ waa ngɔ nɔ́ ko kɛkɛ kɛ je wa nya nɛ waa po blɔ nya tomi ɔ mi. Eko ɔ, nɔ nɛ fɔ wɔ nine ɔ gbo dengme wawɛɛ kɛ dla wa se.—w18.03, bf. 18.
Mɛni nɛ asafo mi nikɔtɔmahi kɛ asafo mi sɔmɔli ma nyɛ maa kase ngɛ Timoteo he?
Timoteo ye bua nihi nitsɛnitsɛ. E ngɔ Mawu jami kɛ pee nɔ́ titli ngɛ e si himi mi. E tsu ní wawɛɛ ngɛ e sɔmɔmi ní tsumi ɔ mi, nɛ e ngɔ níhi nɛ e kase ngɛ ni kpahi a ngɔ ɔ kɛ tsu ní. E ya nɔ nɛ e tsɔse e he, nɛ e ha nɛ Yehowa mumi ɔ tsɔɔ lɛ blɔ. Asafo mi nikɔtɔmahi kɛ ni kpahi ma nyɛ maa kase e nɔ hyɛmi nɔ́ ɔ.—w18.04, bf. 13-14.