1, 2. (a) Kɛ fɔli komɛ nɛ a ji Kristofohi peeɔ a ní ha kɛɛ ke a bimɛ de mɛ ke a suɔ nɛ a baptisi mɛ? (b) Mɛni he je nɛ a biɔ nihi nɛ a maa baptisi mɛ ɔ ke a jɔɔ a he nɔ kɛ ha Yehowa lo ɔ? (Moo hyɛ foni nɛ ngɛ ní kasemi ɔ sisije ɔ.)

NYƐMINYUMU ko kɛ e yo ngɛ a biyo nɛ a tsɛɛ lɛ ke Maria hyɛe benɛ e kɛ ni kpahi nɛ a maa baptisi mɛ ɔ te kɛ da si ɔ. Munyu tulɔ ɔ bi sane enyɔ komɛ, nɛ Maria kɛ gbi nɛ nya wa, nɛ e mi tsɔ ha sane ɔmɛ a heto. Be bɔɔ se ɔ, a baptisi Maria.

² Maria fɔli ɔmɛ a bua jɔ kaa a biyo ɔ jɔɔ e he nɔ ha Yehowa nɛ e ha nɛ a baptisi lɛ. Se kɛ̃ ɔ, loko a maa baptisi lɛ ɔ, e yayo pɔɔ e he sane komɛ bimi. E biɔ e he ke: ‘Anɛ Maria wa bɔ nɛ sa nɛ a ma nyɛ maa baptisi lɛ lo? Anɛ e le hɛdɔ nɛ ngɛ he kaa nɔ ko maa jɔɔ e he nɔ kɛ ha Yehowa lo? Anɛ e sa nɛ e mlɛ bɔɔ loko a baptisi lɛ lo?’ Enɛ ɔ ji sanehi nɛ fɔli nɛ a susuɔ a bimɛ a he ɔ biɔ mɛ nitsɛmɛ a he ke a bimɛ ɔmɛ de mɛ ke a suɔ nɛ a baptisi mɛ. (Fiɛlɔ 5:5) Tɔmi ko be he kaa fɔli ma bi a he sane nɛ ɔmɛ, ejakaa he nɔ jɔɔmi kɛ baptisimi ji níhi nɛ a he hia pe  kulaa ngɛ Kristofo no ko si himi mi.​—Hyɛ daka nɛ ji “ Anɛ O Jɔɔ O He Nɔ Ha Yehowa Lo?”

3, 4. (a) Mɛni nɔ́ he tomi nɔ́ Petro kɛ tsu ní kɛ tsɔɔ se nami nɛ ngɛ baptisimi he? (b) Mɛni he je nɛ a ma nyɛ maa ngɔ baptisimi kɛ to Noa daka a kpɛmi he ɔ?

³ Benɛ bɔfo Petro ngɛ baptisimi he munyu tue ɔ, e ngɔ baptisimi kɛ to Noa daka a kpɛmi he. E de ke: “Amlɔ nɛ ɔ, baptisimi nɛ e kɛ enɛ ɔ sɔ ɔ ngɛ nyɛ hu nyɛ yi wami hee.” (Kane 1 Petro 3:20, 21.) Daka a nɛ Noa kpɛ ɔ ha nɛ nihi na kaa Mawu suɔmi nya ní peemi ji nɔ́ nɛ he hia Noa pe nɔ́ fɛɛ nɔ́. Noa tsu ní tsumi nɛ Yehowa ha lɛ ɔ pɛpɛɛpɛ. Niinɛ, níhi nɛ Noa pee kɛ tsɔɔ kaa e ngɛ hemi kɛ yemi ɔ ha nɛ a he e kɛ e weku ɔ tsuo a yi wami ngɛ Nyu Kpekpemi ɔ mi. Mɛni he je nɛ Petro ngɔ baptisimi kɛ to Noa daka a kpɛmi he ɔ?

⁴ Kaa bɔ nɛ daka a ji odase nɛ tsɔɔ kaa Noa ngɛ hemi kɛ yemi ɔ, jã kɛ̃ nɛ ke a baptisi nɔ ko ngɛ nihi a hɛ mi ɔ, e peeɔ odase ha nihi. Mɛni he odase? Enɛ ɔ tsɔɔ kaa nɔ ɔ he Kristo nɛ a tle lɛ si ɔ ye, nɛ lɔ ɔ he je ɔ, e jɔɔ e he nɔ kɛ ha Yehowa. Nihi nɛ a jɔɔ a he nɔ ɔ tsuɔ ní tsumi nɛ Mawu kɛ ha mɛ kaa a tsu ɔ kaa bɔ nɛ Noa pee ɔ. Ke be su nɛ Mawu ma kpata je yaya nɛ ɔ hɛ mi ɔ, e ma he nihi nɛ a baptisi mɛ nɛ a yeɔ anɔkuale ɔ a yi wami kaa bɔ nɛ e he Noa yi wami ngɛ Nyu Kpekpemi ɔ mi ɔ. (Maak. 13:10; Kpoj. 7:9, 10) Enɛ ɔ tsɔɔ kaa he nɔ jɔɔmi kɛ baptisimi he hia wawɛɛ. Ke nɔ ko ngɔɔ níhi nɛ a he hia we kɛ jeɔ e nya kɛ tsɛ̃ɔ e baptisimi kɛ toɔ ɔ, neneene wami nɛ e ma ná hwɔɔ se ɔ ma nyɛ ma bɔ lɛ.

5. Mɛni he wa ma susu ngɛ munyu nɛ ɔ mi?

⁵ Bɔ nɛ pee nɛ waa le hɛdɔ nɛ ngɛ baptisimi he ɔ, e he hia nɛ wa susu sane bimi etɛ komɛ a he. Mɛni Baiblo ɔ de ngɛ baptisimi  he? Mɛni níhi nɛ e sa kaa nɔ ko nɛ e pee loko a baptisi lɛ? Mɛni he je nɛ e sa kaa waa tsɔɔ wa bimɛ aloo wa Baiblo kaseli se nami nɛ ngɛ baptisimi he?

6, 7. (a) Mɛni he je nɛ Yohane baptisi nihi? (b) Mɛnɔ baptisimi lɛ ngɛ slɔɔto kulaa, nɛ mɛni he je?

⁶ Yohane Nɔ Baptisilɔ ɔ ji kekleekle nɔ nɛ Baiblo ɔ tsɔɔ kaa e baptisi nihi. (Mat. 3:1-6) Mɛni he je nɛ nihi ya Yohane ngɔ konɛ e baptisi mɛ ɔ? Ni ɔmɛ kplɛɛ nɔ kaa a tɔ̃ Mose Mlaa a nɔ. Enɛ ɔ he ɔ, a suɔ kaa Yohane nɛ e baptisi mɛ kɛ tsɔɔ kaa a pia a he. Yohane ná he blɔ ngua ko nɛ se be. Lɛ ji nɔ nɛ baptisi Yesu, Mawu Bi nɛ e ye mluku ɔ. (Mat. 3:13-17) Baptisimi nɛ ɔ ngɛ slɔɔto kulaa, ejakaa Yesu pee we yayami ko nɛ e sa kaa e pia e he loko a baptisi lɛ. (1 Pet. 2:22) E baptisimi ɔ tsɔɔ kaa e ngɔ e he tsuo kɛ ha kaa e maa pee Mawu suɔmi nya ní.​—Heb. 10:7.

⁷ Benɛ Yesu bɔni fiɛɛmi ɔ, e ha nɛ e kaseli ɔmɛ hu baptisi nihi. (Yoh. 3:22; 4:1, 2) Ni ɔmɛ ha nɛ Yesu kaseli ɔmɛ baptisi mɛ, ejakaa mɛ hu a kplɛɛ nɔ kaa a tɔ̃ Mose Mlaa a nɔ, nɛ a pia a he. Se ngɛ Yesu gbenɔ kɛ e si temi ɔ se ɔ, nɔ́ he je nɛ a baptisiɔ nihi ɔ tsake kulaa.

8. (a) Benɛ a tle Yesu si ɔ, mɛni e fã e se nyɛɛli ɔmɛ kaa a pee? (b) Mɛni he je nɛ ke nɔ ko suɔ kaa e maa pee Kristofo no ɔ, e he hia nɛ a baptisi lɛ ɔ?

⁸ Benɛ a tle Yesu si ngɛ jeha 33 ɔ mi ɔ, e je e he kpo kɛ tsɔɔ nihi nɛ a he hiɛ pe 500 nɛ a bua a he nya, nɛ ji nyumuhi, yihi kɛ eko ɔ, jokuɛwi. Eko ɔ, jamɛ a be ɔ mi nɛ Yesu de ke: “Enɛ ɔ he ɔ, nyɛɛ ya nɛ nyɛ ya pee nihi nɛ a ngɛ je ma amɛ tsuo a mi ɔ ye kaseli, nyɛɛ baptisi mɛ ngɛ Tsɛ ɔ biɛ mi, ngɛ Bi ɔ biɛ mi, kɛ ngɛ mumi klɔuklɔu ɔ biɛ mi, nyɛɛ tsɔɔ mɛ nɛ a ye níhi tsuo nɛ i fã nyɛ ɔmɛ a nɔ.” (Mat. 28:19, 20; 1 Kor. 15:6) Benɛ Yesu fã ke a pee nihi e kaseli ɔ, eko ɔ, jamɛ a be ɔ, e se nyɛɛli babauu ngɛ lejɛ ɔ. Yesu ngɛ tsɔɔe kaa loko nɔ ko ma nyɛ maa nyɛɛ e se, aloo e maa tloo lɛ Yesu ɔ e kuɛpã tso ɔ, ja a baptisi lɛ. (Mat. 11:29, 30) Ke nɔ ko suɔ kaa e maa sa Mawu hɛ mi ɔ, e sa nɛ nɔ ɔ nɛ kplɛɛ nɔ kaa Mawu gu Yesu nɔ kɛ ngɛ ní tsue konɛ e yi mi tomi nɛ ba mi. Lɔ ɔ se ɔ, a ma nyɛ maa baptisi lɛ. Ja jã loko Mawu maa kplɛɛ e baptisimi ɔ nɔ. Odasehi fuu ngɛ Baiblo ɔ mi nɛ tsɔɔ kaa nihi nɛ a baptisi mɛ ngɛ kaseli ɔmɛ a be ɔ mi ɔ le se nami nɛ ngɛ baptisimi he. Enɛ ɔ he ɔ, a puɛ we be kulaa ngɛ baptisimi he.​—Níts. 2:41; 9:18; 16:14, 15, 32, 33.

9, 10. Mɛni wa ma nyɛ maa kase ngɛ Etiopia no ɔ kɛ bɔfo Paulo a baptisimi ɔ he?

⁹ Kane Ní Tsumi 8:35, 36. Nyɛ ha nɛ wa susu nɔ hyɛmi nɔ́ nɛ ɔ he nɛ waa hyɛ. Be ko ɔ, nyumu ko nɛ e je Etiopia nɛ e bua jɔ Yuda bi ɔmɛ a jami ɔ he ɔ ya ja Mawu ngɛ Yerusalɛm, nɛ e kpale e se kɛ yaa we mi. Benɛ e yaa a, Yehowa bɔfo ko ha nɛ Filipo ya ná lɛ ngɛ blɔ ɔ nɔ, nɛ e “jaje Yesu he sane kpakpa a kɛ tsɔɔ lɛ.” Kɛ Etiopia nyumu ɔ pee e ní ha kɛɛ? Akɛnɛ e suɔ nɛ e fĩ Yehowa blɔ nya tomi ɔ se he je ɔ, e ha nɛ a baptisi lɛ amlɔ nɔuu. Nɔ́ nɛ e pee ɔ tsɔɔ kaa e bua jɔ anɔkuale ɔ nɛ e kase ɔ he.

¹⁰ Jehanɛ ɔ, nyɛ ha nɛ wa susu Yuda no ko nɛ a tsɛɛ lɛ ke Saulo nɛ e wa Yesu kaseli ɔmɛ yi mi ɔ hu he. Jinɛ Yehowa hla Yuda bi ɔmɛ kaa e ma. Se akɛnɛ a bui lɛ tue he je ɔ, e kua mɛ. Saulo ji Yuda no nɛ e kɛ Yuda bi ɔmɛ a jami kɛ a kusumihi fiɛ we kulaa, se pee se ɔ, e ba na blɔ  nɛ da nɛ e sa kaa a gu nɔ kɛ ja Mawu. Ligbi ko ɔ, Yesu nɛ a tle lɛ si, nɛ a wo e hɛ mi nyami ɔ kɛ lɛ tu munyu kɛ je hiɔwe. Kɛ Saulo pee e ní ha kɛɛ? E kplɛɛ yemi kɛ buami nɛ Yesu kaselɔ Anania kɛ ha lɛ ɔ nɔ. Baiblo ɔ de ngɛ Saulo he ke: “Lɔ ɔ se ɔ, e te si nɛ a baptisi lɛ.” (Níts. 9:17, 18; Gal. 1:14) Pee se ɔ, a ba tsɛ lɛ ke Paulo. Mo kadi kaa benɛ bɔfo Paulo ba le anɔkuale nɛ kɔɔ nɔ́ nɛ Yesu ngɛ tsue konɛ Mawu yi mi tomi nɛ ba mi ɔ he ɔ, e tui tsle. E ha nɛ a baptisi lɛ amlɔ nɔuu.​—Kane Ní Tsumi 22:12-16.

11. (a) Mɛni lɛ woɔ Baiblo kaseli he wami mwɔnɛ ɔ nɛ a haa nɛ a baptisiɔ mɛ? (b) Ke wa na nɛ a ngɛ nihi baptisie ɔ, kɛ e peeɔ wɔ ha kɛɛ?

¹¹ Mwɔnɛ ɔ, jokuɛwi kɛ nikɔtɔmahi babauu nɛ a ji Baiblo kaseli hu tui tsle ngɛ baptisimi he. Nihi nɛ a ngɛ hemi kɛ yemi nɛ a bua jɔ Baiblo ɔ mi anɔkuale ɔ he ɔ suɔ kaa a maa jɔɔ a he nɔ konɛ a baptisi mɛ. Baptisimi munyu ɔ ji munyu klɛdɛɛ a tuɔ kɛ tsɔɔ nihi nɛ a maa baptisi mɛ ngɛ kpokpa nɔ kpehi kɛ kpɔ mi kpehi a sisi. Ke Yehowa Odasefohi kɛ nɔ ko kase Baiblo ɔ nɛ e kplɛɛ anɔkuale ɔ nɔ, nɛ e ya e hɛ mi, nɛ a baptisi lɛ ɔ, a bua jɔɔ wawɛɛ. Ke fɔli na nɛ a ngɛ a bimɛ baptisie ɔ, mɛ hu a bua jɔɔ wawɛɛ. Ngɛ jeha 2017 sɔmɔmi jeha a mi ɔ, nihi nɛ a ngɛ “su kpakpa” nɛ a he hiɛ pe 284,000 jɔɔ a he nɔ kɛ ha Yehowa nɛ a ha nɛ a baptisi mɛ. (Níts. 13:48) E ngɛ heii kaa kaseli ehe nɛ ɔmɛ le kaa ja a baptisi mɛ loko a ma nyɛ maa pee Kristofohi. Mɛni ji níhi nɛ a pee loko a baptisi mɛ?

12. Mɛni ji níhi nɛ e sa kaa Baiblo kaselɔ ko nɛ e pee loko a ma nyɛ maa baptisi lɛ?

¹² Loko a maa baptisi Baiblo kaselɔ ko ɔ, e sa nɛ e le Mawu, e yi mi tomi, kɛ blɔ nya nɛ e to nɛ e kɛ ma he adesahi a yi wami. (1 Tim. 2:3-6) Lɔ ɔ se ɔ, e sa nɛ e ná hemi kɛ yemi nɛ maa ye bua lɛ konɛ e kpa ní yayahi peemi, nɛ e pee níhi nɛ da ngɛ Yehowa hɛ mi. (Níts. 3:19) Enɛ ɔ he ɔ, ke nɔ ko ke e jɔɔ e he nɔ kɛ ha Mawu, se e yaa nɔ nɛ e peeɔ níhi nɛ be hae nɛ e nine nɛ su Mawu Matsɛ Yemi ɔ nɔ ɔ, e he nɔ jɔɔmi ɔ maa pee yaka. (1 Kor. 6:9, 10) Tsa pi Yehowa Mlaa amɛ a nɔ yemi pɛ ji sane ɔ. Ke nɔ ko ngɛ mɔde bɔe kaa e maa sa Mawu hɛ mi ɔ, lɛɛ e sa nɛ e ya asafo mi kpehi, nɛ e fiɛɛ sane kpakpa a, nɛ e pee nihi kaseli. Yesu tsɔɔ kaa e kaseli anɔkualetsɛmɛ ɔmɛ lɛ a ma tsu ní tsumi nɛ ɔ. (Níts. 1:8) Ja nɔ ko je ní tsumi nɛ ɔ sisi loko e ma nyɛ maa jɔɔ e he nɔ kɛ ha Yehowa ngɛ sɔlemi mi, konɛ a baptisi lɛ ngɛ nihi a hɛ mi.

13. Mɛni he je nɛ e sa nɛ wa kai kaa ja a baptisi wa Baiblo kaseli ɔmɛ loko a ma nyɛ maa pee Kristofohi ɔ?

¹³ Ke wa ngɛ wa bimɛ kɛ wa Baiblo kaseli kpahi ye buae konɛ a ya a hɛ mi ngɛ Mawu jami mi ɔ, e sɛ nɛ wa hɛ nɛ je nɔ kaa ja a baptisi mɛ loko a ma nyɛ maa pee Kristo kaseli nitsɛnitsɛ. Ke wa ha nɛ enɛ ɔ hi wa juɛmi mi ɔ, e maa ye bua wɔ nɛ wa maa tsɔɔ mɛ se nami nɛ ngɛ he nɔ jɔɔmi kɛ baptisimi he ngɛ be nɛ sa mi. Ngɛ anɔkuale mi ɔ, wa suɔ nɛ wa bimɛ ɔmɛ kɛ wa Baiblo kaseli kpa amɛ nɛ a ya a hɛ mi nɛ a baptisi mɛ!

14. Mɛni he je nɛ e sɛ nɛ waa nyɛ nɔ ko nɔ kaa e ha nɛ a baptisi lɛ ɔ?

¹⁴ E sɛ nɛ fɔli, aloo Baiblo tsɔɔli, aloo nɔ kpa ko ngɛ asafo ɔ mi nɛ e nyɛ nɔ ko nɔ kaa e ha nɛ a baptisi lɛ. Yehowa po pee we jã. (1 Yoh. 4:8) Se ke wa ngɛ mɛ ní tsɔɔe ɔ, e sa nɛ waa ye bua mɛ nɛ a na kaa e he hia nɛ a kɛ Mawu nɛ ná huɛ bɔmi kpakpa. Ke wa ye bua Baiblo kaselɔ  ko, nɛ e bua ba jɔ anɔkuale ɔ he, nɛ e suɔ nɛ e pee níhi tsuo nɛ e sa kaa anɔkuale Kristofohi nɛ a pee ɔ, lɛ nitsɛ e ma de ke e suɔ nɛ a baptisi lɛ.​—2 Kor. 5:14, 15.

15, 16. (a) Anɛ a tsɔɔ jeha pɔtɛɛ nɛ e sa nɛ nɔ ko nɛ e ye loko a baptisi lɛ lo? Moo tsɔɔ nya. (b) Ke a baptisi nɔ ko ngɛ jami kpa ko mi momo po ɔ, mɛni he je nɛ e sa nɛ a baptisi lɛ ekohu kaa Yehowa Odasefo no ɔ?

¹⁵ A tsɔɔ we jeha pɔtɛɛ ko nɛ e sa nɛ nɔ ko nɛ e ye loko a baptisi lɛ. E slo bɔ nɛ nɔ fɛɛ nɔ ngɛ ha, nɛ Baiblo kaseli komɛ yaa a hɛ mi mlamlaamla pe Baiblo kaseli komɛ. Nihi fuu ngɛ nɛ a baptisi mɛ ngɛ a jokuɛ mi, nɛ a ngɛ Yehowa anɔkuale yee kɛ ba si mwɔnɛ ɔ. Ni komɛ hu ngɛ nɛ a wa ngɛ jeha mi loko a kase Baiblo ɔ, nɛ a ha nɛ a baptisi mɛ. A kpɛti ni komɛ po ye jeha 100 kɛ se loko a baptisi mɛ!

¹⁶ A baptisi yo nɔkɔtɔma ko ngɛ jami slɔɔtohi a mi loko a kɛ lɛ bɔni Baiblo ɔ kasemi. Enɛ ɔ he ɔ, e bi e Baiblo tsɔɔlɔ ɔ kaa e he hia nɛ a baptisi lɛ ekohu lo. Baiblo tsɔɔlɔ ɔ kɛ lɛ susu ngmami komɛ a he, nɛ e ná e sane bimi ɔ heto. Be bɔɔ se ɔ, e ha nɛ a baptisi lɛ. E ngɛ mi kaa e piɛ bɔɔ nɛ e maa ye jeha 80 mohu lɛɛ, se e na kaa e he hia nɛ a baptisi lɛ. Nɔ hyɛmi nɔ́ nɛ ɔ tsɔɔ kaa ja wa ná Yehowa he anɔkuale nile loko e maa kplɛɛ wa baptisimi ɔ nɔ. Enɛ ɔ he ɔ, ke a baptisi nɔ ko momo ngɛ jami kpa ko mi, nɛ lɔ ɔ se e ba kase Baiblo ɔ, e he hia nɛ a baptisi lɛ ekohu.​—Kane Ní Tsumi 19:3-5.

17. Mɛni nɛ e sa kaa nɔ ko nɛ susu he ngɛ e baptisimi ligbi ɔ nɔ?

¹⁷ Ke a baptisi nɔ ko ɔ, jamɛ a ligbi ɔ, e bua jɔɔ wawɛɛ. Se e ji be hu nɛ e sa nɛ e kɛ susu e he nɔ jɔɔmi kɛ baptisimi ɔ he saminya. E biɔ mɔde bɔmi loko nɔ ko ma nyɛ maa hi si ngɛ e he nɔ jɔɔmi ɔ nya. Enɛ ɔ he je nɛ Yesu ngɔ e se nɛ nɔ ko maa nyɛɛ ɔ kɛ to kuɛpã tso tloomi he ɔ nɛ. E sɛ nɛ Yesu se nyɛɛli ɔmɛ nɛ a “hi wami mi kɛ ha mɛ nitsɛmɛ a he hu, se mohu kɛ ha nɔ nɛ e gbo kɛ ha mɛ nɛ a tle lɛ si ɔ.”​—2 Kor. 5:15; Mat. 16:24.

18. Mɛni sane bimihi a he wa ma susu ngɛ munyu nɛ nyɛɛ se ɔ mi?

¹⁸ Ní nɛ ɔmɛ ji níhi nɛ Maria yayo susu a he benɛ e bi e he sanehi nɛ wa wo ta ngɛ munyu nɛ ɔ sisije ɔ. Ke o ji fɔlɔ ɔ, eko ɔ, mo hu o bi o he sane nɛ ɔmɛ hyɛ. Eko ɔ, o bi ke: ‘Anɛ ye bi ɔ nu baptisimi sisi nitsɛnitsɛ lo? Anɛ e ngɛ Yehowa he nile bɔ nɛ sa nɛ e ma nyɛ maa jɔɔ e he nɔ ha lɛ lo? Anɛ e sa kaa ye bi ɔ nɛ e ya sukuu kɛ ya tsitsaa nɛ e ná ní tsumi kpakpa loko e ha nɛ a baptisi lɛ lo? Nɛ ke a baptisi ye bi ɔ nɛ e ya pee yayami ko nɛ hɛdɔ ngɛ he hu nɛɛ?’ Wa ma susu sane bimi nɛ ɔmɛ a he ngɛ munyu nɛ nyɛɛ se ɔ mi, nɛ wa maa hyɛ nɔ́ nɛ fɔli ma nyɛ maa pee konɛ a ná juɛmi nɛ da ngɛ baptisimi he.