1. Mɛni Baiblo ɔ deɔ ngɛ tsɔsemi he?

KE O nu munyu nɛ ji “tsɔsemi” ɔ, mɛni lɛ baa o juɛmi mi? Eko ɔ, nɔ́ nɛ maa ba o juɛmi mi kekle ji tue gblami. Se pi tue gblami pɛ ji tsɔsemi. Baiblo ɔ tsɔɔ kaa tsɔsemi hi, nɛ se nami ngɛ he kaa bɔ nɛ se nami ngɛ nile, juɛmi, suɔmi kɛ wami he ɔ. (Abɛ 1:2-7; 4:11-13) Se nami ngɛ he, ejakaa ke Mawu tsɔse wɔ ɔ, e tsɔɔ kaa e suɔ wɔ, nɛ e suɔ nɛ wa ná neneene wami. (Heb. 12:6) Eko ɔ, Yehowa maa gbla wa tue ke e ngɛ wɔ tsɔsee, se e kɛ yi mi wami pee we jã. Ngɛ anɔkuale mi ɔ, nɔ́ nɛ “tsɔsemi” tsɔɔ titli ji, ní nɛ a tsɔɔ nɔ ko kaa bɔ nɛ fɔli tsɔɔ a bimɛ ní ɔ.

2, 3. Ngɛ mɛni blɔ nɔ nɛ ní tsɔɔmi kɛ tue gblami hu piɛɛ tsɔsemi he? (Moo hyɛ foni nɛ ngɛ ní kasemi ɔ sisije ɔ.)

² Mo susu nɔ hyɛmi nɔ́ nɛ ɔ he nɛ o hyɛ: Jokuɛ nyumuyo ko nɛ a tsɛɛ lɛ ke Johnny ɔ ngɛ bɔɔlu fiae ngɛ tsu mi. E yayo de lɛ ke: “Johnny, tse o le kaa e sɛ nɛ o fia bɔɔlu ngɛ tsu ɔ mi! O ma nyɛ ma puɛ nɔ́ ko.” Se Johnny bui e yayo tue. E ya nɔ nɛ e fia bɔɔlu ɔ hluu kɛ ya si e ywia buɛ ko nɛ a kɛ mɔmɔhi wo mi ɔ. Kɛ e yayo ma plɛ kɛ tsɔse lɛ ha kɛɛ? Eko ɔ, ní tsɔɔmi kɛ tue gblami maa piɛɛ tsɔsemi nɛ e kɛ ma ha lɛ ɔ he. Ke e ngɛ e bi ɔ ní tsɔɔe ɔ,  eko ɔ, e ma de e bi ɔ nɔ́ he je nɛ nɔ́ nɛ e pee ɔ dɛ ɔ. E maa suɔ nɛ e bi ɔ nɛ e le nɔ́ he je nɛ e sa kaa e bu e fɔli. E maa tsɔɔ lɛ kaa mlaahi nɛ e fɔli ɔmɛ wo ɔ he hia, nɛ sisi numi ngɛ he. Bɔ nɛ pee nɛ Johnny nɛ e kase nɔ́ ko ngɛ tsɔsemi nɛ ɔ mi ɔ, eko ɔ, e yayo maa suɔ nɛ e gbla e tue bɔɔ. Kaa nɔ hyɛmi nɔ́ ɔ, eko ɔ, e maa ngɔ bɔɔlu ɔ ngɛ Johnny dɛ be bɔɔ. Lɔ ɔ ma ha nɛ Johnny maa le kaa haomi jeɔ tue gbomi mi kɛ baa.

³ Akɛnɛ wa ngɛ Kristofohi asafo ɔ mi he je ɔ, wa ji Mawu weku mi bimɛ. (1 Tim. 3:15) Wa kplɛɛ nɔ kaa Yehowa ngɛ he blɔ nɛ e woɔ wɔ mlaahi, nɛ e ngɛ he blɔ hu nɛ e tsɔseɔ wɔ ke wa tɔ̃. Jehanɛ hu ɔ, ke wa pee nɔ́ ko, nɛ haomi ko je mi kɛ ba a, tsɔsemi nɛ Yehowa kɛ haa wɔ ɔ kaiɔ wɔ kaa e he hia nɛ waa bu wa hiɔwe Tsɛ ɔ tue. (Gal. 6:7) Mawu susuɔ wa he wawɛɛ, nɛ e sume nɛ waa na nɔ́.​—1 Pet. 5:6, 7.

4. (a) Mɛni tsɔsemi nɛ Yehowa jɔɔ nɔ? (b) Mɛni wa ma susu he ngɛ munyu nɛ ɔ mi?

⁴ Ke wa da Ngmami ɔ nɔ kɛ tsɔse wa bimɛ aloo wa Baiblo kaseli ɔ, lɔ ɔ maa ye bua mɛ konɛ a ba pee Kristo se nyɛɛli hwɔɔ se. Mawu Munyu ɔ nɛ wa daa nɔ kɛ tsɔseɔ nihi ɔ yeɔ bua wɔ nɛ wa nyɛɔ ‘tsɔseɔ nihi ngɛ dami mi.’ Enɛ ɔ maa ye bua wa bimɛ kɛ wa Baiblo kaseli konɛ a nu Yesu tsɔɔmi ɔmɛ a sisi, nɛ a ye ‘níhi tsuo nɛ e fã wɔ ɔmɛ a nɔ.’ (2 Tim. 3:16; Mat. 28:19, 20) Yehowa jɔɔ tsɔsemi nɛ ɔ nɔ, nɛ lɔ ɔ yeɔ bua nihi nɛ a tsɔse mɛ ɔ, nɛ mɛ hu a yeɔ nihi nɛ a ba peeɔ Kristo kaseli. (Kane Tito 2:11-14.) Amlɔ nɛ ɔ, nyɛ ha nɛ wa susu sane bimi etɛ komɛ nɛ a he hia wawɛɛ ɔ a he: (1) Mɛni blɔ nɔ nɛ tsɔsemi nɛ Mawu haa wɔ ɔ tsɔɔ kaa e suɔ wɔ? (2) Mɛni wa ma nyɛ maa kase ngɛ nihi nɛ Mawu tsɔse mɛ blema a he? (3) Ke wa ngɛ nihi tsɔsee ɔ, mɛni blɔ nɔ wa ma nyɛ maa gu kɛ kase Yehowa kɛ e Bi ɔ?

5. Ngɛ mɛni blɔ nɔ nɛ tsɔsemi nɛ Yehowa kɛ haa wɔ ɔ tsɔɔ kaa e suɔ wɔ?

⁵ Yehowa jeɔ suɔmi mi nɛ e tsɔseɔ wɔ, e tsɔɔ wɔ ní, nɛ ke wa pee nɔ́ ko nɛ dɛ ɔ, e dlaa wɔ. Enɛ ɔ yeɔ bua wɔ nɛ wa hiɔ e suɔmi ɔ mi, nɛ wa nyɛɛɔ wami blɔ ɔ nɔ. (1 Yoh. 4:16) Yehowa sume nɛ wa susu kaa wa he be se nami, lɔ ɔ he ɔ, e gbi wɔ zo, nɛ e jɛ we wɔ hulɔ. (Abɛ 12:18) Mohu ɔ, Yehowa ngɛ bumi kɛ ha wɔ, e hyɛɛ su kpakpahi nɛ wa ngɛ ɔ, nɛ e ngmɛɛ wɔ blɔ konɛ waa kɛ he blɔ nɛ wa ngɛ nɛ waa kɛ hlaa nɔ́ nɛ wa suɔ ɔ nɛ tsu ní. Ke Yehowa gu Baiblo ɔ, kɛ Baiblo kasemi womihi, aloo o fɔli kɛ asafo mi nikɔtɔmahi a nɔ kɛ tsɔse mo ɔ, anɛ o naa tsɔsemi ɔ kaa e ji suɔmi nɛ Yehowa je kpo kɛ tsɔɔ mo lo? Ke wa li kaa wa “hia nane yaya ko” nɛ asafo mi nikɔtɔma amɛ je suɔmi mi nɛ a tsɛ wa tue se ɔ, lɔ ɔ tsɔɔ kaa Yehowa suɔ wɔ.​—Gal. 6:1.

6. Ke tsɔsemi nɛ a kɛ ma ha nɔ ko ɔ ma bi nɛ a ngɔ he blɔhi nɛ e ngɛ ɔ ngɛ e dɛ po ɔ, ngɛ mɛni blɔ nɔ nɛ lɔ ɔ jeɔ Mawu suɔmi ɔ kpo?

⁶ Tsa pi be fɛɛ be nɛ tsɔsemi biɔ nɛ a wo nɔ ko ga aloo a kɛ lɛ nɛ tu munyu. Ke nɔ ko pee yayami nɛ hɛdɔ ngɛ he ɔ, eko ɔ, e he maa hia nɛ a ngɔ he blɔ komɛ nɛ e ngɛ ngɛ asafo ɔ mi ɔ ngɛ e dɛ. Ke e ba lɛ jã a, e sa nɛ waa kplɛɛ nɔ, ejakaa lɔ ɔ tsɔɔ suɔmi nɛ Mawu ngɛ kɛ ha wɔ. Kaa nɔ hyɛmi nɔ́ ɔ, ke a ngɔ he blɔ ngɛ nɔ ko dɛ ɔ, lɔ ɔ ma nyɛ maa hɛli lɛ si konɛ o na se nami nɛ ngɛ Baiblo ɔ nɛ e maa kase, e yi mi tɛ nɛ e ma pue ngɛ he, kɛ sɔlemi nɛ e maa sɔle ɔ he. Enɛ ɔ ma nyɛ maa ye bua lɛ konɛ e nane nɛ e pi si ngɛ Mawu jami mi ekohu. (La 19:7) Ngɛ be nɛ sa mi ɔ, nɔ ɔ nine ma nyɛ maa su he blɔhi nɛ je e dɛ ɔ nɔ ekohu. Ngɛ anɔkuale mi ɔ, ke a fiee nɔ ko ngɛ asafo ɔ mi po ɔ, lɔ ɔ jeɔ Yehowa suɔmi ɔ kpo, ejakaa ni kpahi kase we e su yaya a, nɛ lɔ ɔ poɔ asafo ɔ he piɛ.  (1 Kor. 5:6, 7, 11) Akɛnɛ Mawu kɛ tsɔsemi nɛ sa haa nɔ he je ɔ, ke a fiee nɔ ko kɛ je asafo ɔ mi ɔ, lɔ ɔ maa ye bua lɛ konɛ e na hɛdɔ nɛ ngɛ yayami nɛ e pee ɔ he nɛ e tsake e tsui.​—Níts. 3:19.

7. Mɛnɔ ji Shebna, nɛ mɛni su yaya nɛ e ná?

⁷ Nyɛ ha nɛ wa susu ni enyɔ komɛ nɛ Yehowa tsɔse mɛ ɔ a he konɛ waa na se nami nɛ ngɛ tsɔsemi he. Nɔ kake ji Shebna nɛ e hi si ngɛ Matsɛ Hezekia be ɔ mi, kɛ nyɛminyumu ko nɛ a tsɛɛ lɛ ke Graham. Shebna ji nɔkɔtɔma nɛ e “hyɛɛ matsɛ we ɔ nɔ.” Enɛ ɔ ji he blɔ ngua nɛ Shebna ná. (Yes. 22:15) Se aywilɛho sane ji kaa Shebna wo e he nɔ, nɛ e hla hɛ mi nyami kɛ ha e he. E kpɛ́ yɔkɔ ko nɛ e he jua wa kɛ ha e he, nɛ e hiɔ ‘ta zugba lɛ kpakpahi’ a mi!​—Yes. 22:16-18.

8. Kɛ Yehowa plɛ kɛ tsɔse Shebna ha kɛɛ, nɛ mɛni je mi kɛ ba?

⁸ Akɛnɛ Shebna hla hɛ mi nyami kɛ ha e he he je ɔ, Mawu ‘kpɔ̃ e blɔ nya a ngɛ e dɛ’ kɛ ha Eliakim. (Yes. 22:19-21) Yehowa kpɔ̃ he blɔ nɛ ɔ ngɛ Shebna dɛ benɛ Asiria matsɛ Senakerib ma Yerusalɛm tuami ɔ. Pee se ɔ, Senakerib tsɔ ma nikɔtɔmahi kɛ ta buli babauu kɛ ya Yerusalɛm, konɛ a ya jɔ̃ Yuda bi ɔmɛ a kɔni mi nɛ a wo Matsɛ Hezekia he gbeye konɛ e ha yi. (2 Ma. 18:17-25) Hezekia tsɔ Eliakim konɛ e kɛ nyumuhi nɛ Senakerib tsɔ mɛ ɔ nɛ ya tu munyu. Se pi lɛ pɛ nɛ e ya. Nihi enyɔ piɛɛ e he, nɛ a kpɛti nɔ kake ji Shebna nɛ jamɛ a be ɔ mi ɔ e ji matsɛ ɔ womi ngmalɔ ɔ. Enɛ ɔ ha nɛ wa na kaa eko ɔ, Shebna ba e he si, e mi mi fu we, nɛ e kplɛɛ ní tsumihi nɛ ba si nɛ a kɛ wo e dɛ ɔ nɔ. Mɛni wa ma nyɛ maa kase ngɛ Shebna sane ɔ mi? Nyɛ ha nɛ wa susu níhi etɛ nɛ wa ma nyɛ maa kase ngɛ sane nɛ ɔ mi ɔ a he nɛ waa hyɛ.

9-11. (a) Mɛni wa ma nyɛ maa kase ngɛ Shebna sane ɔ mi? (b) Mɛni o ma nyɛ maa kase ngɛ bɔ nɛ Yehowa tsɔse Shebna ha a mi?

⁹ Kekleekle ɔ, he blɔ nɛ Shebna ngɛ ɔ je e dɛ. E níhi a si kpami ɔ maa nɔ mi kaa “nɔ nɛ woɔ e he nɔ ɔ, e hɛ mi kpataa; nɔ nɛ tsɔɔ e he ɔ, e blɔ nya jeɔ e dɛ.” (Abɛ 16:18) Ke o ngɛ he blɔ klɛdɛɛ ko ngɛ asafo ɔ mi ɔ, anɛ o maa ya nɔ nɛ o ba o he si lo? Anɛ o maa ngɔ yi jemi kɛ ha Yehowa ngɛ ní kpakpahi nɛ o ngɛ aloo níhi nɛ o nyɛɔ tsuɔ ɔ he lo? (1 Kor. 4:7) Bɔfo Paulo de ke: “I ngɛ nɔ fɛɛ nɔ nɛ e ngɛ nyɛ kpɛti ngɛ lejɛ ɔ dee kaa e ko bu e he pe bɔ nɛ e sa kaa e bu e he, mohu ɔ, e susu níhi a he konɛ e ná juɛmi nɛ mi tsɔ.”​—Rom. 12:3.

¹⁰ Nɔ́ nɛ ji enyɔ ɔ, tsɔsemi nɛ mi wa nɛ Yehowa kɛ ha Shebna a tsɔɔ kaa Yehowa le  kaa Shebna ma nyɛ ma tsake. (Abɛ 3:11, 12) Mwɔnɛ ɔ, nihi nɛ he blɔ ko je a dɛ ngɛ asafo ɔ mi ɔ ma nyɛ maa kase ní kɛ je Shebna sane ɔ mi! E he hia nɛ a ya nɔ nɛ a sɔmɔ Yehowa ngɛ si fɔfɔɛ ehe nɛ a ya je mi ɔ mi, nɛ a na kaa suɔmi nɛ Yehowa ngɛ kɛ ha mɛ ɔ he je nɛ e tsɔse mɛ ɔ nɛ, mohu pe nɛ a ma ná abofu. E sa nɛ wa kai kaa ke wa ba wa he si ha wa Tsɛ ɔ, e maa na kaa wa ma nyɛ ma tsake. (Kane 1 Petro 5:6, 7.) Suɔmi mi nɛ Yehowa jeɔ kɛ tsɔseɔ wɔ ɔ ji blɔ kake nɛ e guɔ nɔ kɛ dlaa wɔ. Enɛ ɔ he ɔ, nyɛ ha nɛ waa pee wa he zu nɛ he jɔ ngɛ e dɛ mi, konɛ e nyɛ nɛ e puɛ wɔ.

¹¹ Nɔ́ nɛ ji etɛ ɔ, nihi nɛ a ha mɛ he blɔ kaa a tsɔse nihi ɔ ma nyɛ maa kase ní kɛ je bɔ nɛ Yehowa tsɔse Shebna ha a mi. Ngɛ mɛni blɔ nɔ? Tsɔsemi nɛ Yehowa kɛ haa nɔ ko ɔ tsɔɔ kaa e hie yayami. E tsɔɔ hu kaa e susuɔ yayami peelɔ ɔ he. Ke o ji fɔlɔ aloo asafo mi nɔkɔtɔma nɛ o tsɔseɔ nihi ɔ, anɛ o suɔ nɛ o kase Yehowa lo? E sa nɛ o hie yayami nɛ jamɛ a be ɔ mi nɔuu hu ɔ, o suɔ o bi ɔ, aloo nɔ nɛ o ngɛ lɛ tsɔsee ɔ.​—Jud 22, 23.

12-14. (a) Kɛ ni komɛ peeɔ a ní ngɛ tsɔsemi he ha kɛɛ? (b) Ngɛ mɛni blɔ nɔ nɛ Mawu Munyu ɔ ye bua nyɛminyumu ko, nɛ mɛni je mi kɛ ba?

¹² Aywilɛho sane ji kaa, ni komɛ ngɛ nɛ ke a tsɔse mɛ ɔ, e dɔɔ mɛ wawɛɛ nɛ a kpaa Mawu sɔmɔmi. (Heb. 3:12, 13) Se anɛ lɔ ɔ tsɔɔ kaa nɔ́ ko be hie peemi kɛ ye bua mɛ lo? Dɛbi! Kaa nɔ hyɛmi nɔ́ ɔ, mo susu nyɛminyumu ko nɛ a tsɛɛ lɛ ke Graham ɔ he nɛ o hyɛ. A fiee lɛ kɛ je asafo ɔ mi, nɛ pee se ɔ, a ngɔ lɛ ekohu. Se e kɛ we nɛ e kpa fiɛɛmi kɛ asafo mi kpehi yami. Jeha komɛ a se ɔ, e de asafo mi nɔkɔtɔma ko nɛ e kɛ lɛ pee huɛ ɔ kaa e kɛ lɛ nɛ kase Baiblo ɔ.

¹³ Asafo mi nɔkɔtɔma a de ke: “Graham woɔ e he nɔ. E tuɔ nikɔtɔmahi nɛ a ye e sane ɔ a he munyu yaya. Lɔ ɔ he ɔ, benɛ wa je ní kasemi ɔ sisi bɔɔ pɛ nɛ wa susu ngmamihi nɛ tuɔ he nɔ womi kɛ nyagbahi nɛ jeɔ mi kɛ baa he. Mawu Munyu ɔ ba pee kaa ahuhuɛ kɛ ha Graham, nɛ e na su komɛ ngɛ e he nɛ hí kulaa! Tsakemi nɛ Graham pee ɔ sa kadimi wawɛɛ! Graham ba na kaa he nɔ womi kɛ nihi a tɔmi nɛ e hlaa a ba pee kaa ‘plai’ ngɛ e hɛ ngmɛ nɔ. Benɛ e yɔse kaa lɔ ɔ ji lɛ nitsɛ e nyagba a, e pee tsakemi mlamlaamla. E bɔni asafo mi kpehi yami, e kaseɔ Mawu Munyu ɔ saminya, nɛ e sɔleɔ daa ligbi. Jehanɛ hu ɔ, e tsuɔ e blɔ nya ní tsumi kaa weku yi ɔ he ní, nɛ enɛ ɔ haa nɛ e yo ɔ kɛ e bimɛ ɔmɛ a bua jɔɔ.”​—Luka 6:41, 42; Yak. 1:23-25.

¹⁴ Asafo mi nɔkɔtɔma a de ke: “Ligbi ko ɔ, Graham de mi nɔ́ ko nɛ ha nɛ ye bua jɔ wawɛɛ. E de mi ke, ‘I kase anɔkuale ɔ jeha babauu ji nɛ ɔ, nɛ i sɔmɔ kaa blɔ gbalɔ hyɛ. Se ngɛ anɔkuale mi ɔ, kpaako ma nyɛ ma de ke i suɔ Yehowa.’ E kɛ we nɛ a ha lɛ he blɔ kaa e hyɛ munyu tumi klama a nɔ. Graham bua jɔ ní tsumi nɛ ɔ he wawɛɛ. E nɔ hyɛmi nɔ́ ɔ ha nɛ i kase kaa ke nɔ ko ba e he si, nɛ e kplɛɛ tsɔsemi nɛ Yehowa kɛ ha lɛ ɔ nɔ ɔ, jɔɔmihi fuu jeɔ mi kɛ baa!”

15. Ke wa ngɛ hlae nɛ tsɔsemi nɛ wa tsɔseɔ nihi ɔ nɛ nu tso ɔ, mɛni e sa kaa waa pee?

¹⁵ E sa nɛ wɔ nitsɛmɛ waa kase ní saminya konɛ waa pee tsɔɔli kpakpahi. (1 Tim. 4:15, 16) Jã kɛ̃ nɛ e sa kaa nihi nɛ Yehowa ha mɛ he blɔ kaa a tsɔse nihi ɔ hu nɛ a ngɔ Yehowa blɔ tsɔɔmi kɛ tsu ní be fɛɛ be. Ke a pee jã a, lɔ ɔ ma ha nɛ nihi maa bu mɛ, nɛ ke a ngɛ nihi ga woe ɔ, e he be wae kaa a maa bu mɛ tue. Nyɛ ha nɛ wa susu Yesu nɔ hyɛmi nɔ́ ɔ he nɛ waa hyɛ.

16. Mɛni wa ma nyɛ maa kase ngɛ bɔ nɛ Yesu plɛ kɛ tsɔse nihi, kɛ bɔ nɛ e tsɔɔ nihi ní ha a mi?

 ¹⁶ Ke Yesu kɛ si himi nɛ nya wa kpe po ɔ, e yaa nɔ nɛ e buɔ e Tsɛ ɔ tue. (Mat. 26:39) E haa nɛ e tue buli ɔmɛ leɔ kaa e tsɔɔmi ɔmɛ kɛ nile nɛ e ngɛ ɔ je e Tsɛ ɔ ngɔ. (Yoh. 5:19, 30) Akɛnɛ Yesu baa e he si nɛ e buɔ e Tsɛ ɔ tue he je ɔ, tsui kpakpatsɛmɛ nyɛ nɛ a hɛ kɛ su e he, nɛ lɔ ɔ ha nɛ Yesu ba pee tsɔɔlɔ nɛ e mi mi jɔ nɛ e naa nɔ mɔbɔ. (Kane Mateo 11:29.) Mi mi jɔmi munyuhi nɛ e tuɔ ɔ hu haa nɛ nihi nɛ a pee kaa go nɛ e mi dɔ aloo kane mi tako nɛ e ngɛ tsoe sulii ɔ bua jɔɔ. (Mat. 12:20) Be mi nɛ e sa kaa e mi mi nɛ fu po ɔ, e jeɔ mi mi jɔmi kɛ suɔmi kpo kɛ tsɔɔ nihi. Wa naa enɛ ɔ he nɔ hyɛmi nɔ́ benɛ e kaseli ɔmɛ fo mɛ pɛ a nɔ́ mi nɛ́ a sã nya ngɛ nɔ nɛ ji a kpɛti nɔ nɛ pe kulaa a he ɔ.​—Maak. 9:33-37; Luka 22:24-27.

17. Mɛni su kpakpahi lɛ maa ye bua asafo mi nikɔtɔmahi konɛ a nyɛ nɛ a hyɛ asafo ɔ nɔ saminya?

¹⁷ Ke asafo mi nikɔtɔmahi da Ngmami ɔ nɔ kɛ tsɔse nihi ɔ, lɔ ɔ tsɔɔ kaa a ngɛ Kristo kasee. Jã nɛ a maa pee ɔ maa tsɔɔ kaa a ngmɛ blɔ nɛ Mawu kɛ e Bi ɔ ngɛ mɛ blɔ tsɔɔe. Bɔfo Petro de ke: “Nyɛɛ hyɛ Mawu to kuu ɔ nɛ a kɛ wo nyɛ dɛ ɔ nɔ, nyɛ sɔmɔ kaa a nɔ hyɛli, pi ngɛ nɔ nyɛmi nya, se nyɛɛ je nyɛ tsui mi kɛ pee ngɛ Mawu hɛ mi; pi ngɛ se nami nɛ ngɛ zo he suɔmi he je, se mohu kɛ bua jɔmi; nyɛ ko pee nyɔmtsɛmɛ ngɛ ni nɛmɛ nɛ a ji Mawu we bi ɔmɛ a nɔ, mohu ɔ, nyɛɛ ngɔ nyɛ he kɛ pee nɔ hyɛmi níhi kɛ ha to kuu ɔ.” (1 Pet. 5:2-4) Wa ma nyɛ ma ná nɔ mi mami kaa ke asafo mi nikɔtɔmahi ba a he si kɛ ha Mawu, kɛ Kristo nɛ ji asafo ɔ yi ɔ, mɛ nitsɛmɛ a ma ná he se, nɛ asafo ɔ hu ma ná he se.​—Yes. 32:1, 2, 17, 18.

18. (a) Mɛni ní tsumi Yehowa kɛ ha fɔli? (b) Mɛni blɔ nɔ Yehowa guɔ kɛ yeɔ bua fɔli konɛ a nyɛ nɛ a tsu ní tsumi nɛ e kɛ wo a dɛ ɔ?

¹⁸ Sisi tomi mlaa nɛ ɔ nɔuu nɛ e sa nɛ wa kɛ tsu ní ngɛ weku ɔ mi. Baiblo ɔ de wekuyihi ke: “Nyɛ ko hi nyɛ bimɛ ɔmɛ a mi mi la woe, mohu ɔ, nyɛɛ ya nɔ nɛ nyɛɛ hi mɛ lɛe ngɛ Yehowa tsɔsemi kɛ e ga womi mi.” (Efe. 6:4) Hɛdɔ ngɛ munyu nɛ ɔ he wawɛɛ, ejakaa Abɛ 19:18 ɔ de ke: “Tsɔse o bi ngɛ be nɛ sa mi, nɛ́ o ko ba ha nɛ e hɛ mi nɛ kpata.” Ke fɔli tsɔse we a bimɛ ɔ, Yehowa kɛ mɛ ngɛ sane! (1 Sam. 3:12-14) Se kɛ̃ ɔ, ke fɔli kaneɔ Mawu Munyu ɔ, nɛ a jeɔ he si bami mi kɛ sɔleɔ ɔ, Yehowa kɛ e mumi klɔuklɔu ɔ maa ye bua mɛ konɛ a ná nile nɛ a kɛ ma tsɔse a bimɛ ɔmɛ.​—Kane Yakobo 1:5.

19, 20. (a) Ke wa ba wa he si nɛ Mawu tsɔse wɔ ɔ, mɛni jɔɔmihi wa ma ná? (b) Mɛni he wa ma susu ngɛ munyu nɛ nyɛɛ se ɔ mi?

¹⁹ Ke wa kplɛɛ tsɔsemi nɛ Yehowa kɛ haa wɔ ɔ nɔ, nɛ wa kase bɔ nɛ Yehowa kɛ Yesu tsɔseɔ nɔ ha a, jɔɔmihi nɛ wa ma ná a maa hiɛ babauu, nɛ wa be nyɛe maa kane po! Tue mi jɔmi maa hi wa weku ɔmɛ kɛ asafo ɔmɛ hu a mi. Kɛkɛ ɔ, nɔ fɛɛ nɔ maa nu he kaa a suɔ lɛ, se nami ngɛ e he, nɛ e ngɛ slɔkee. Jɔɔmi nɛ ɔmɛ ji ní kpakpahi nɛ wa ma ná hwɔɔ se ɔ he via kɛkɛ. (La 72:7) Atsinyɛ jemi ko be he kaa tsɔsemi nɛ Yehowa kɛ ngɛ wɔ hae amlɔ nɛ ɔ ngɛ wɔ dlae konɛ waa hi si kɛ ya neneene ngɛ tue mi jɔmi kɛ kake peemi mi kaa weku ngɛ e suɔmi ɔ mi. (Kane Yesaya 11:9.) Ke wa naa tsɔsemi nɛ Yehowa kɛ haa wɔ ɔ ngɛ blɔ nɛ ɔ nɔ ɔ, lɔ ɔ maa ye bua wɔ konɛ waa na tsɔsemi kaa e ji blɔ kake nɛ hi nɛ Mawu guɔ nɔ kɛ tsɔɔ wɔ kaa e suɔ wɔ.

²⁰ Ngɛ munyu nɛ nyɛɛ se ɔ mi ɔ, wa ma susu tsɔsemi nɛ yaa nɔ ngɛ weku ɔ kɛ asafo ɔ mi ɔ he. Jehanɛ hu ɔ, wa ma susu bɔ nɛ wa ma tsɔse wɔ nitsɛmɛ wa he ha, kɛ nɔ́ ko nɛ yeɔ nɔ pe tsɔsemi ɔ he.