WƆ TSUO wa suɔ nɛ nihi nɛ a na kaa nimli kpakpahi ji wɔ. Se e be gbɔjɔɔ kaa wa maa pee ní kpakpahi ngɛ je yaya nɛ ɔ mi. Mwɔnɛ ɔ, nihi babauu “sume nɔ́ kpakpa.” (2 Tim. 3:3) A kua Yehowa blɔ tsɔɔmihi. Nɔ́ nɛ Yehowa tsɔɔ kaa e ji yayami ɔ, a ke e ji “kpakpa,” nɛ nɔ́ nɛ Yehowa ke e ji kpakpa a, a ke e ji “yayami.” (Yes. 5:20) Eko ɔ, bɔ nɛ a tsɔse wɔ ha kɛ mluku nɛ wa yi ɔ he je ɔ, e yeɔ ha wɔ kaa wa maa pee ní kpakpahi. Enɛ ɔ ma nyɛ ma ha nɛ waa nu he kaa bɔ nɛ Anne * nu he ɔ. Jehahi babauu ji nɛ ɔ nɛ Anne ngɛ Yehowa sɔmɔe, se e de ke: “Loloolo ɔ, i he we yi kaa ma nyɛ maa pee nɔmlɔ kpakpa.”

Se bua jɔmi sane ji kaa wɔ tsuo wa ma nyɛ maa pee nimli kpakpahi! Kpakpa peemi ji su ko nɛ Mawu mumi klɔuklɔu ɔ haa nɔ, nɛ Mawu mumi ɔ ngɛ he wami kulaa pe níhi nɛ haa nɛ e yeɔ ha wɔ kaa wa maa pee ní kpakpahi ɔ. Nyɛ ha nɛ waa hyɛ nɔ́ nɛ kpakpa peemi ji, kɛ bɔ nɛ wa ma plɛ kɛ ná su nɛ ɔ ha.

Kpakpa peemi kɔɔ je mi bami kpakpa aloo níhi nɛ a he tsɔ nɛ yayami ko be he ɔ he. Nɔmlɔ kpakpa hlaa blɔ slɔɔtohi nɛ e ma nyɛ maa gu nɔ kɛ pee nihi kpakpa, nɛ e peeɔ nihi kpakpa be fɛɛ be.

Eko ɔ, o yɔse kaa e yi ha nihi kaa a maa pee a weku li kɛ a huɛmɛ kpakpa. Se anɛ wa weku li kɛ wa huɛmɛ pɛ nɛ e sa kaa waa pee mɛ kpakpa lo? Ngɛ anɔkuale mi ɔ, nɔ ko be nɛ e ma nyɛ maa pee kpakpa be fɛɛ be, ejakaa Baiblo ɔ de ke “dalɔ ko dalɔ ko be zugba nɛ ɔ nɔ. Nɔ ko nɔ ko be nɛ peeɔ kpakpa daa nɛ ɔ, nɛ lɛɛ e pee we yayami gblegbleegble.” (Fiɛlɔ 7:20) Bɔfo Paulo de ke: “I le kaa ngɛ ye mi, nɛ ji ye he lo ɔ mi ɔ, nɔ́ kpakpa ko be.” (Rom. 7:18) Enɛ ɔ he ɔ, nile ngɛ mi kaa ke wa suɔ nɛ wa ná su nɛ ɔ, e sa nɛ waa kase Yehowa.

Yehowa pee kpakpa peemi he nɔ hyɛmi nɔ́ kɛ ha wɔ. Baiblo ɔ de ngɛ Yehowa he ke: “O hi, nɛ o peeɔ kpakpa saminya! Moo tsɔɔ mi o mlaa amɛ.” (La 119:68) Nyɛ ha nɛ wa susu níhi enyɔ nɛ ngɛ ngmami nɛ ɔ mi nɛ tsɔɔ kaa Yehowa hi aloo e peeɔ kpakpa a he nɛ waa hyɛ.

Yehowa hi. Yehowa lɛɛ nɔ́ nɛ hi pɛ nɛ e peeɔ. E su kpa amɛ tsuo daa si ngɛ himi nɛ e hi aloo kpakpa nɛ e peeɔ ɔ nɔ. Mo susu nɔ́ nɛ ba benɛ Yehowa de Mose ke “ma ha ye hɛ mi nyami ɔ tsuo maa be ngɛ o hɛ mi” ɔ he nɛ o hyɛ. Benɛ Yehowa hɛ mi nyami, nɛ e kpakpa peemi ɔ piɛɛ he ɔ ngɛ bee ngɛ Mose hɛ mi ɔ, e nu nɛ gbi ko de ke: ‘Yehowa a, Mawu mɔbɔ nalɔ, kɛ dloolɔ ji lɛ; e mi mi fu we mla, nɛ e suɔmi kɛ anɔkuale yemi hiɛ babauu. E yeɔ e si womi nɔ kɛ haa nimli akpeakpe, nɛ e ngɔɔ a he yayami kɛ tɔmi ngɔ paa mɛ. Se e be yayami peeli sie nɛ́ e be a tue gblae.’ (2 Mose 33:19; 34:6, 7) Enɛ ɔ he ɔ, wa ma nyɛ ma de ke nɔ́ fɛɛ nɔ́ nɛ Yehowa peeɔ ɔ, kpakpa peemi jeɔ kpo ngɛ mi. Ngɛ adesahi tsuo a kpɛti ɔ, Yesu ji nɔmlɔ kpakpa pe kulaa, se e de ke: “Nɔ ko be nɛ e ji nɔ kpakpa kaa ja Mawu pɛ.”​—Luka 18:19.

Yehowa peeɔ kpakpa saminya. Wa naa kpakpa peemi ngɛ nɔ́ fɛɛ nɔ́ nɛ Yehowa peeɔ ɔ mi. ‘Yehowa  peeɔ nɔ tsuaa nɔ kpakpa, nɛ e nuɔ nɔ́ he ha níhi tsuo nɛ e bɔ ɔ.’ (La 145:9) Yehowa hlɛ nɔ mi ngɛ kpakpa peemi he, e haa adesahi tsuo wami kɛ níhi nɛ a hia konɛ a hi wami mi. (Níts. 14:17) Mɔbɔ nɛ Yehowa naa wɔ, aloo nɔ́ he nɛ e nuɔ ha wɔ ɔ hu ji kpakpa nɛ e peeɔ wɔ. La polɔ ɔ ngma ke: ‘Yehowa, o hi, nɛ o kɛ yayami paa nɔ.’ (La 86:5) Wa ma nyɛ ma ná nɔ mi mami kaa ‘nihi nɛ peeɔ nɔ́ nɛ da a, Yehowa be hae nɛ nɔ́ ko nɛ hia mɛ.’​—La 84:11.

Mawu bɔ wɔ ngɛ e subai nɔ. Enɛ ɔ tsɔɔ kaa wa ma nyɛ maa pee nimli kpakpahi, nɛ wa ma nyɛ maa pee ní kpakpahi hulɔ. (1 Mose 1:27) Se kɛ̃ ɔ, Mawu Munyu ɔ woɔ e sɔmɔli he wami kaa a “kase kpakpa peemi.” (Yes. 1:17) Se kɛ wa ma plɛ kɛ kase su nɛ ɔ ha kɛɛ? Wa ma nyɛ maa pee jã ngɛ blɔ etɛ komɛ a nɔ.

Kekleekle ɔ, wa ma nyɛ maa sɔle konɛ Mawu nɛ ha wɔ e mumi klɔuklɔu ɔ, ejakaa mumi klɔuklɔu ɔ ma nyɛ maa ye bua Kristofohi konɛ a pee kpakpa saminya. (Gal. 5:22) Mawu mumi klɔuklɔu ɔ ma nyɛ maa ye bua wɔ konɛ waa suɔ nɔ́ kpakpa nɛ waa hie nɔ́ yayami. (Rom. 12:9) Ngɛ anɔkuale mi ɔ, Baiblo ɔ tsɔɔ kaa Yehowa ma nyɛ ma ha nɛ wa “he nɛ wa ngɛ nɔ́ kpakpa peemi fɛɛ nɔ́ kpakpa peemi kɛ munyu tumi mi.”​—2 Tɛs. 2:16, 17.

Nɔ́ nɛ ji enyɔ ɔ, e sa nɛ waa kane Mawu Munyu ɔ. Ke wa ngɛ Baiblo ɔ kanee ɔ, Yehowa ma nyɛ maa tsɔɔ wɔ ‘nɔ́ nɛ e sa nɛ waa pee,’ nɛ e ma dla wɔ kɛ ha “ní tsumi kpakpa fɛɛ ní tsumi kpakpa.” (Abɛ 2:9; 2 Tim. 3:17) Be fɛɛ be nɛ wa maa kane Baiblo ɔ, nɛ́ wa ma pue wa yi mi tɛ ngɛ he ɔ, wa maa le ní kpakpahi ngɛ Mawu he kɛ níhi nɛ e suɔ nɛ waa pee. Ní kpakpa nɛ ɔmɛ ma hyi wa tsui tɔ, nɛ a maa pee kaa june nɛ wa ngɔ kɛ to konɛ e ye bua wɔ pee se.​—Luka 6:45; Efe. 5:9.

Nɔ́ nɛ ji etɛ ɔ, e sa nɛ waa bɔ mɔde nɛ waa “kase nɔ́ kpakpa.” (3 Yoh. 11) Nɔ́ hyɛmi níhi ngɛ Baiblo ɔ mi nɛ wa ma nyɛ maa kase. Nihi titli nɛ wa ma nyɛ maa kase mɛ ji Yehowa kɛ Yesu. Se wa ma nyɛ maa kase ni kpa komɛ nɛ mɛ hu a pee kpakpa a. A kpɛti nihi enyɔ ji Tabita kɛ Banaba. (Níts. 9:36; 11:22-24) Ke o kane a nɔ hyɛmi nɔ́ ɔ ngɛ Baiblo ɔ mi ɔ, o ma ná he se wawɛɛ. Be mi nɛ o ngɛ a he ní kasee ɔ, moo to níhi nɛ a pee kɛ ye bua nihi ɔ he hɛ. Moo hyɛ kaa mɛni ji ní komɛ nɛ o ma nyɛ maa pee kɛ ye bua o weku mi bimɛ kɛ nyɛmimɛ ngɛ asafo ɔ mi. Jehanɛ hu ɔ, ke o susu se nɛ Tabita kɛ Banaba ná benɛ a pee nihi kpakpa a he ɔ, e maa wo mo he wami wawɛɛ.

Wa ma nyɛ maa kase nimli kpakpahi nɛ a ngɛ mwɔnɛ ɔ hulɔ. Kaa nɔ hyɛmi nɔ́ ɔ, mo susu asafo mi nikɔtɔmahi nɛ a tsuɔ ní wawɛɛ nɛ a “suɔ nɔ́  kpakpa” a he nɛ o hyɛ. O ma nyɛ maa kase nyɛmimɛ yihi nɛ a yeɔ anɔkuale, nɛ a munyu tutui kɛ a ní peepee tsɔɔ kaa “a tsɔɔ nɔ́ kpakpa” a hulɔ. (Tito 1:8; 2:3) Nyɛmiyo ko nɛ a tsɛɛ lɛ ke Roslyn de ke: “Ye huɛ ɔ yeɔ bua nyɛmimɛ ngɛ asafo ɔ mi, nɛ e woɔ mɛ he wami. E susuɔ si fɔfɔɛ nɛ a ngɛ mi ɔ he, nɛ behi fuu ɔ, e keɔ mɛ ní, nɛ e yeɔ bua mɛ ngɛ blɔ kpahi hu a nɔ. I na kaa e ji nɔmlɔ kpakpa niinɛ.”

Yehowa woɔ e we bi he wami kaa a “pee nɔ́ kpakpa.” (Amos 5:14) Ke wa pee jã a, e maa ye bua wɔ nɛ waa kɛ Yehowa blɔ tsɔɔmihi ma tsu ní, nɛ e maa wo wɔ he wami konɛ waa pee nɔ́ kpakpa.

E sɛ nɛ wa susu kaa ja wa pee ní nguahi kɛ ha nihi, aloo wa ke mɛ níhi nɛ a he jua wa loko e maa tsɔɔ kaa wa ngɛ kpakpa pee. Kaa nɔ hyɛmi nɔ́ ɔ, ke wa du tso ko ɔ, waa kɛ nyu fuu pue we nɔ si kake nɛ wa kpa, mohu ɔ, wa pueɔ nɔ nyu si abɔ konɛ e nyɛ nɛ e wa saminya. Jã kɛ̃ nɛ e sɛ nɛ waa pee nihi kpakpa si kake pɛ, mohu ɔ, e sa nɛ waa ya nɔ nɛ waa ye bua mɛ ngɛ ní nyafinyafihi po a mi.

Baiblo ɔ woɔ wɔ he wami kaa wa “dla” wa he, nɛ waa “pee klaalo” kaa wa maa pee nihi kpakpa. (2 Tim. 2:21; Tito 3:1) Ke wa toɔ si fɔfɔɛ nɛ nihi ngɛ mi ɔ he hɛ ɔ, eko ɔ, wa maa na níhi nɛ wa ma nyɛ maa pee kɛ pee mɛ kpakpa “nɛ e fia [mɛ] kɛ ma si.” (Rom. 15:2) Eko ɔ, enɛ ɔ ma bi nɛ wa ha mɛ níhi nɛ wa ngɛ ɔ eko. (Abɛ 3:27) Wa ma nyɛ maa fɔ mɛ nine nɛ waa kɛ mɛ nɛ ye ní aloo waa kɛ mɛ nɛ sɛɛ ní. Ke wa nu kaa nɔ ko be he wami ɔ, wa ma nyɛ maa ngma nɔ ɔ sɛ womi, wa ya slaa lɛ, aloo waa fia lɛ ngɛ fon nɔ. Wa ma nyɛ ma ná he blɔhi fuu kɛ de lɛ “nɔ́ nɛ e hi nɛ e maa fia [lɛ] kɛ ma si kaa bɔ nɛ hiami ɔ . . . ji ɔ, konɛ e he nɛ ba se nami kɛ ha [lɛ].”​—Efe. 4:29.

Wa suɔ nɛ waa pee nihi tsuo kpakpa kaa bɔ nɛ Yehowa peeɔ ɔ. Enɛ ɔ he ɔ, e sɛ nɛ waa hla nihi a mi. Matsɛ Yemi ɔ he sane kpakpa a nɛ wa maa fiɛɛ kɛ ha nɔ fɛɛ nɔ ɔ ji blɔ kake nɛ wa ma nyɛ maa gu nɔ kɛ tsɔɔ kaa wa hlɛ nihi a mi. E sa nɛ waa bɔ mɔde nɛ waa pee nihi nɛ a sume wa sane ɔ po kpakpa kaa bɔ nɛ Yesu fã wɔ ɔ. (Luka 6:27) Tsa pi tɔmi kaa wa ma je mi mi jɔmi kpo kɛ tsɔɔ nihi, nɛ́ waa pee mɛ kpakpa ejakaa “a wui mlaa ko kɛ si we” mi mi jɔmi kɛ kpakpa peemi. (Gal. 5:22, 23) Ke nihi ngɛ wɔ yi mi wae aloo waa kɛ nyagbahi ngɛ kpee se wa peeɔ nihi kpakpa a, e ma nyɛ ma ha nɛ nihi nɛ a le anɔkuale ɔ, nɛ e maa wo Mawu hɛ mi nyami.​—1 Pet. 3:16, 17.

“Nɔmlɔ kpakpa . . . ma ná e ní kpakpahi a he hiɔwo.” (Abɛ 14:14) Mɛni hiɔwo e ma ná? Ke wa peeɔ nihi kpakpa a, e be yee kaa mɛ hu a maa pee wɔ kpakpa. (Abɛ 14:22) Ke nihi pee we wɔ kpakpa po ɔ, kpakpa nɛ wa maa ya nɔ nɛ waa pee mɛ ɔ ma nyɛ ma tsake mɛ.​—Rom. 12:20.

Nihi fuu ma nyɛ maa ye odase kaa benɛ a kpa yayami peemi nɛ a bɔni nɔ́ kpakpa peemi ɔ, a ná he se wawɛɛ. Nyɛmiyo Nancy níhi a si kpami ji nɛ ɔ nɛ. E de ke: “Benɛ i ngɛ wae ɔ, ye hɛ mi jɔɛ kulaa, i bɛ ye je mi saminya, nɛ i bui nɔ. Se benɛ i ba kase Baiblo ɔ nɛ i kɛ Mawu blɔ tsɔɔmihi bɔni ní tsumi ɔ, i ba ná bua jɔmi. Amlɔ nɛ ɔ, nihi buɔ mi wawɛɛ.”

Nɔ́ titli he je nɛ e sa nɛ waa pee nihi kpakpa ji kaa lɔ ɔ haa nɛ Yehowa bua jɔɔ. Ke nihi nɛ́ ní kpakpahi nɛ wa peeɔ ɔ po ɔ, Yehowa naa. Be fɛɛ be nɛ wa maa pee nɔ́ kpakpa ko, aloo wa ma susu nɔ́ kpakpa ko he ɔ, e le. (Efe. 6:7, 8) Mɛni jɔɔmihi wa náa kɛ jeɔ mi? ‘Yehowa náa nɔmlɔ kpakpa he bua jɔmi.’ (Abɛ 12:2) Enɛ ɔ he ɔ, nyɛ ha nɛ waa ya nɔ nɛ waa pee ní kpakpa daa. Yehowa wo si kaa “hɛ mi nyami kɛ bumi kɛ tue mi jɔmi” maa pee “nɔ fɛɛ nɔ nɛ e tsuɔ ní tsumi kpakpahi ɔ” nɔ́.​—Rom. 2:10.