Gbɔkuɛ nɛ e nɔ jena Yesu ma gbo ɔ, e wo e bɔfo ɔmɛ ga kaa a ko hla blɔ nya kɛ ha a he ngɛ a nyɛmimɛ ɔmɛ a kpɛti. E de mɛ ke: “Matsɛmɛ ɔmɛ nɛ a ngɛ je ma amɛ a mi ɔ yeɔ a nɔ, nɛ a tsɛɛ nihi nɛ a hɛɛ blɔ nya nɛ a yeɔ a nɔ ɔ ke Dlooli. Se nyɛɛ lɛɛ, e sɛ nɛ e ba jã ngɛ nyɛ blɔ fa mi.”​—Luka 22:25, 26.

Mɛnɔmɛ ji Dlooli nɛ Yesu tu a he munyu ɔ? Blema ningmahi nɛ a na ngɛ sika, womi kɛ ní kpahi a nɔ ɔ yeɔ odase kaa Hela bi kɛ Roma bi pɔɔ nihi nɛ a he biɛ kɛ nɔ yeli tsɛmi ke Euergetes aloo Dlooli, nɛ a kɛ woɔ a hɛ mi nyami. A ha nimli nɛ ɔmɛ sablai nɛ ɔ kɛ woɔ a hɛ mi nyami ejakaa a pee nɔ́ ko kɛ ye bua a ma mi bi ɔmɛ.

Matsɛmɛ fuu ná sablai nɛ ɔ eko. A kpɛti ni komɛ ji Ijipt nɔ yeli nɛ ɔmɛ: Ptolemy III Euergetes (e hi si maa pee jeha 247-222 L.F.K.) kɛ Ptolemy VIII Euergetes II (e hi si maa pee jeha 147-117 L.F.K.). Roma nɔ yeli kaa Kaisare Yulio (48-44 L.F.K.) kɛ Kaisare Ɔgɛsto (31 L.F.K.–14 K.F.S) hu ná sablai nɛ ɔ. Hɛrode Ngua a, nɛ ji Yuda matsɛ ɔ hu ná sablai nɛ ɔ eko. Ngɛ Hɛrode blɔ fa mi ɔ, eko ɔ, benɛ hwɔ ba nɛ e sɛ ngma kɛ je ma se kɛ ha ma bi ɔmɛ nɛ e ha ohiatsɛmɛ he ha níhi ɔ lɛ ha nɛ e ná sablai nɛ ɔ nɛ.

Adolf Deissmann nɛ ji Baiblo he ní lelɔ nɛ e je Germany ɔ tsɔɔ kaa sablai nɛ ji Dloolɔ ɔ pɔ he wawɛɛ blema. Adolf Deissmann de ke: “Ke o ngɛ blema womihi a mi hyɛe ɔ, o ma nyɛ maa ngɔ be bɔɔ pɛ kɛ na sablai nɛ ɔ pe lafa ngɛ blema ningmahi a mi.”

Lɛɛ mɛni Yesu ngɛ tsɔɔe benɛ e de e kaseli ɔmɛ ke: “Nyɛɛ lɛɛ, e sɛ nɛ e ba jã ngɛ nyɛ blɔ fa mi” ɔ? Anɛ Yesu ngɛ tsɔɔe kaa a ko ye bua ni kpahi, aloo a kpɔ mi bi lo? Pi jã kulaa ji sane ɔ. Eko ɔ, yi mi tomi nɛ nihi kɛ peeɔ nihi kpakpa a he je nɛ Yesu tu munyu nɛ ɔ nɛ.

Ngɛ Yesu be ɔ mi ɔ, niatsɛmɛ ngɔɔ sika aloo ní kpahi kɛ fĩɔ hɛja jemi kɛ fiɛmihi nɛ yaa nɔ ngɛ he nya buami he ɔmɛ a se, a maa fiɛmi hehi kɛ sɔlemi tsuhi, nɛ a fĩɔ ní peemi kpahi kaa jã a se konɛ nihi nɛ a je a yi, a he biɛ aloo nihi nɛ a fɔ sɔ kɛ ha mɛ. Womi ko de ke: “E ngɛ mi kaa nimli nɛ ɔmɛ peeɔ níhi fuu kɛ haa a ma mi bi ɔmɛ mohu lɛɛ, se sɔ nɛ a suɔ kaa nihi nɛ a fɔ ha mɛ ɔ he je nɛ a peeɔ jã.” Su nɛ ɔ nɛ Yesu ngɛ e se nyɛɛli ɔmɛ kɔkɔ bɔe ngɛ he ɔ nɛ.

Jeha komɛ a se ɔ, bɔfo Paulo hu tsɔɔ kaa e sa nɛ waa hɛɛ juɛmi nɛ da ngɛ nɔ́ hami he. E ngma sɛ womi kɛ ya ha e nyɛmimɛ nɛ a ngɛ Korinto ɔ ke: “Nyɛ ha nɛ nɔ fɛɛ nɔ nɛ e pee kaa bɔ nɛ e ma nya si ngɛ e tsui mi ɔ, pi ngɛ mi gbigblimi mi aloo nɔ nyɛmi nya, ejakaa Mawu suɔ nɔ nɛ e haa nɔ́ kɛ bua jɔmi.”​—2 Kor. 9:7.