YE BUA jɔ kaa ye fɔli nɛ a tsɔse mi ɔ ji Kristofohi. A tsɛɛ ye papaa ke Fred Molohan, nɛ a tsɛɛ ye yayo ke Edna Molohan. A fɔ mi ngɛ jeha 1934 ɔ mi. Jamɛ a be ɔ mi ɔ, ye fɔli ɔmɛ ji Baiblo Kaseli (Yehowa Odasefohi) jeha 20. A kɛ Mawu gbeye yemi tsɔse mi. Wa hi Parsons nɛ ji ma nyafii ko ngɛ Kansas woyi je ngɛ puje he blɔ. Nyɛmimɛ nɛ waa kɛ mɛ hi asafo mi ɔ hiɛhiɛɛ ji nihi nɛ a pɔ mɛ nu. Wa yaa asafo mi kpe be fɛɛ be, nɛ wa weku ɔ to be nɛ waa kɛ yaa fiɛɛmi nɛ wa ya tsɔɔ nihi anɔkuale nɛ ngɛ Mawu Munyu ɔ mi ɔ. Hɔ piani ji be nɛ wa weku ɔ to kɛ ha ma nɔ odase yemi. Jamɛ a be ɔ mi ɔ, a tsɛɛ fiɛɛmi ní tsumi fã nɛ ɔ ke gbɛjegbɛ he odase yemi. Be komɛ ɔ, pɔ tɔɔ wa he, se behi fuu ke wa kpa a, Papaa ya heɔ ice cream kɛ haa wɔ.

E ngɛ mi kaa wa he pi ngɛ asafo ɔ mi mohu lɛɛ, se zugba kpɔ nɛ wa fiɛɛɔ ngɛ mi ɔ kle wawɛɛ. Wa ya fiɛɛɔ ngɛ ngmɔ si kɛ kɔpehi nɛ bɔle wɔ ɔmɛ hu a mi. Ke wa ya fiɛɛ ha ngmɔ huli ɔmɛ ɔ, behi fuu ɔ, wa ngɔɔ wa womi ɔmɛ kɛ tsakeɔ ngmɔ ní tsɔwi, kungwɔ hlui (nɔ́ nɛ a ngmɛ kɛ we) aloo kungwɔ nitsɛnitsɛ. Akɛnɛ Papaa wo womi ɔmɛ a he hiɔ momo he je ɔ, ke waa kɛ ní nɛ ɔmɛ ya we mi ɔ, wa ya yeɔ.

Ye fɔli ɔmɛ he glamafoo, nɛ a kɛ tsu ní ngɛ fiɛɛmi mi. Akɛnɛ i wɛ tsɔ he je ɔ, i nyɛ we nɛ i kɛ tsuɔ ní. Se ke wa kpale kɛ ya slaa nihi aloo waa kɛ nihi ngɛ Baiblo ɔ kasee ɔ, i yeɔ bua Papaa kɛ Yayo kɛ fiaa Nyɛminyumu Rutherford munyu ɔmɛ kɛ haa ni ɔmɛ.

Ye papaa ngɔ munyu tumi klama kɛ fɔ wa lɔle nɛ ji 1936 Ford ɔ yi mi. Lɔle nɛ ɔ ye bua wɔ nɛ wa fiɛɛ Matsɛ Yemi sɛ gbi ɔ wawɛɛ. Behi fuu ɔ, e fiaa la kekle konɛ ni ɔmɛ a juɛmi nɛ ba wa nɔ, nɛ lɔ ɔ se ɔ, e fiaa Baiblo mi sɛ gbi. Ke munyu ɔ nya ta a, wa gbaa womihi kɛ haa nihi nɛ a bua jɔ munyu ɔ he ɔ.

Hɔgba ko nɛ wa ya ma nyafii ko nɛ a tsɛɛ ke Cherryvale ɔ mi ngɛ Kansas ɔ, polisi ko de ye papaa ke e be lɛ blɔ ngmɛe nɛ e ngɔ lɔle ɔ kɛ ya  ma paaki ɔ nɔ ejakaa nihi ba jɔɔ a he ngɛ lejɛ ɔ. Se e ma nyɛ maa ngɔ lɔle ɔ kɛ ya paaki ɔ se. Ye papaa de we nɔ́ ko, nɛ e ngɔ lɔle ɔ kɛ ya ma gbɛjegbɛ ɔ he ngɛ paaki ɔ kasa nya, nɛ e plɛ munyu tumi klama a kɛ tsɔɔ paaki ɔ konɛ ni ɔmɛ nɛ a nu sɛ gbi ɔ, kɛkɛ nɛ e bɔni munyu ɔ fiami. Ke i piɛɛ ye papaa kɛ ye nyɛminyumu Jerry he jamɛ a be ɔ mi kɛ ya fiɛɛmi ɔ, ye bua jɔɔ wawɛɛ.

Ngɛ jeha 1930 jeha amɛ a nyagbe ɔ, wa ngɔ wa he kɛ wo odase yemi klɛdɛɛ ko mi konɛ wa nyɛ nɛ wa tsu wa zugba kpɔ ɔ mi ní mla ngɛ hehi nɛ a teɔ si kɛ woɔ wa ní tsumi ɔ. Wa teɔ si loko je hɛ mi tsɔɔ (kaa bɔ nɛ wa pee ngɛ Joplin ngɛ Missouri ɔ) nɛ wa ngɔɔ dɛ womihi kɛ woɔ nihi a sinyahi a sisi. Ke wa gbe nya a, wa jeɔ ma a mi nɛ wa ya buaa wa he nya ngɛ he ko konɛ waa hyɛ kaa eko ɔ, polisi ɔmɛ nu wa ti nɔ ko lo.

Jamɛ a be ɔmɛ a mi ɔ, wa ngɔɔ wa he kɛ woɔ fiɛɛmi ní tsumi ɔ fã ko nɛ ngɛ bua jɔmi mi ɔ mi. Wa kplaa kaadihi nɛ a ngma ní ngɛ nɔ kɛ kpaa ma a mi tsuo, nɛ waa kɛ fiaa Matsɛ Yemi ɔ he gɔgɔ. I kai be ko nɛ wa nyɛmimɛ ɔmɛ ya kpa ma a mi. A kpla kaadihi nɛ a ngma ngɛ nɔ ke “Jami Ji Klama Nɛ Peeɔ Huhui.” A nyɛɛ maa pee si tomi kake kɛ kpa ma a mi, nɛ a kpale a se kɛ ba wa we ɔ mi. Bua jɔmi sane ji kaa nihi ti si kɛ wui mɛ tsɔ, se a na nihi fuu nɛ a bua jɔ munyu ɔ he.

Wa weku ɔ pɔɔ blɔ hiami kɛ jeɔ Kansas kɛ yaa kpe ngɛ Texas. Ye papaa tsu ní ngɛ tlee ní tsumi he ko nɛ a tsɛɛ ke Missouri-Kansas-Texas Railroad (a tsɛɛ ní tsumi he nɛ ɔ hu ke M-K-T, aloo Katy, Railroad). Akɛnɛ Papaa tsuɔ ní ngɛ lejɛ ɔ he je ɔ, wa sɛɛɔ tlee ɔ mi kɛ hiaa blɔ kɛ ya slaa wa weku li, nɛ waa kɛ yaa kpehi nɛ wa wui hiɔ. Ye yayo nyɛminyumu nɔkɔtɔma nɛ a tsɛɛ lɛ ke Fred Wismar kɛ e yo Eulalie hi Temple ma a mi ngɛ Texas. Tsɛko Fred kase anɔkuale ɔ benɛ e ji niheyo ɔ ngɛ jeha 1900 ɔ mi, nɛ a baptisi lɛ. E kɛ e nyɛmimɛ ɔmɛ nɛ ye yayo hu piɛɛ he ɔ kase anɔkuale ɔ. Nyɛmimɛ nɛ a ngɛ Texas ma a kpɛti je ɔ le lɛ wawɛɛ ejakaa e sɔmɔ kaa kpɔ mi nɔ hyɛlɔ ngɛ lejɛ ɔ hyɛ. E mi mi jɔ, nɛ be fɛɛ be ɔ, e ngɛ bua jɔmi. E ji nɔ ko nɛ nihi suɔ kaa a maa hɛ kɛ su e he. E hɛ dɔɔ ngɛ anɔkuale ɔ he, nɛ e ye bua mi wawɛɛ benɛ i wɛ ɔ.

Ngɛ jeha 1941 ɔ mi ɔ, wa weku ɔ hia blɔ kɛ ya kpe ngua ko nɛ a pee ngɛ St. Louis ngɛ Missouri ɔ. A fɔ̃ nihewi kɛ yihewi ɔmɛ tsuo nine konɛ a hi he pɔtɛɛ ko nɛ a to ha mɛ ɔ ngɛ paaki ɔ nɔ kɛ bu Nyɛminyumu Rutherford munyu nɛ ji, “Matsɛ ɔ Bimɛ” ɔ tue. Benɛ Nyɛminyumu Rutherford gbe e munyu ɔ nya a, e kɛ nihi nɛ a piɛɛ e he ɔ ha wɔ nike ní ko nɛ wa hyɛ we blɔ. Nike ní ɔ ji womi ehe ko nɛ a je kpo. Womi ɔ yi ji, Children. Nihewi kɛ yihewi nɛ a ná blɔ nya tomi nɛ ɔ he se ɔ, a yibɔ hiɛ pe 15,000.

Ngɛ April 1943 ɔ mi ɔ, a pee kpɔ mi kpe ko nɛ yi ji, “A Tsɛ Mɛ Konɛ A Ba Tsu Ní” ngɛ Coffeyville ngɛ Kansas. Ngɛ kpe nɛ ɔ sisi ɔ, a tsɔɔ kaa e be kɛe nɛ a ma bɔni Teokrase Sɔmɔmi Sukuu ɔ peemi  ngɛ asafohi tsuo a mi. A je womiyo ko nɛ ní kasemi 52 ngɛ mi nɛ a kɛ ma tsu ní ngɛ sukuu ɔ mi ɔ kpo. Jamɛ a jeha a mi ɔ, a ha mi ní tsumi ngɛ sukuu ɔ mi. Jamɛ a kpɔ mi kpe ɔ hu ji be klɛdɛɛ ko kɛ ha mi ejakaa a baptisi i kɛ ni kpa komɛ ngɛ taku nyafii ko nɛ e mi jɔ mi.

I gbe sukuu nya ngɛ jeha 1951 ɔ mi, nɛ e he ba hia nɛ ma mwɔ ye yi mi kpɔ ngɛ nɔ́ nɛ ma pee ngɛ ye si himi mi ɔ he. Oti nɛ i kɛ ma ye hɛ mi ji kaa ma sɔmɔ ngɛ Betel, he nɛ Jerry hu sɔmɔ ngɛ be ko nɛ be ɔ. Enɛ ɔ he ɔ, e kɛ we nɛ i ngɔ ye blɔ bimi womi ɔ kɛ mane Brooklyn ní tsumi kɔni ɔ. Yi mi kpɔ nɛ ɔ nɛ i mwɔ ɔ ye bua mi wawɛɛ. E kɛ we nɛ a fɔ̃ mi nine kaa ma ba sɔmɔ ngɛ Betel ngɛ March 10, 1952 ɔ mi.

Jinɛ i suɔ nɛ ma ya tsu ní ngɛ he nɛ a fiaa womi ɔmɛ ngɛ ɔ. Se a ha nɛ i ya tsu ní ngɛ Betel ní yemi he ɔ, nɛ pee se ɔ, i ya tsu ní ngɛ kpata a mi. I kase níhi fuu ngɛ he nɛ ɔmɛ. Enɛ ɔ he ɔ, i ná we he blɔ kɛ tsu ní ngɛ womi fiami he ɔ. Se bɔ nɛ a to ní tsumi he blɔ nya ha ní hooli ɔmɛ ɔ ha nɛ i náa be bɔɔ ngɛ ligbi ɔ mi kɛ peeɔ ye dɛ he ní kasemi ngɛ Betel womihi a to he ɔ. Enɛ ɔ ye bua mi nɛ i ba wa ngɛ mumi mi, nɛ ye hemi kɛ yemi ɔ hu mi wa. Lɔ ɔ ha nɛ i mwɔ ye yi mi kpɔ kaa ma sɔmɔ Yehowa ngɛ Betel jehahi fuu. Jerry je Betel ngɛ jeha 1949 ɔ mi nɛ e ya ngɔ yo. A tsɛɛ e yo ɔ ke Patricia. Se he nɛ a ngɛ ɔ kɛ Brooklyn he kɛ we. Benɛ i ba Betel kɛ we ɔ, mɛ ni enyɔ ɔmɛ tsuo a ye bua mi, nɛ a wo mi he wami.

Benɛ i ya Betel be bɔɔ se ɔ, a to blɔ nya ko kɛ hla nyɛmimɛ nyumuhi bɔɔ kɛ piɛɛ nihi nɛ a tuɔ magbɛ nɔ munyu ɔmɛ a he. A haa nɛ nyɛmimɛ nɛ ɔmɛ yaa asafohi nɛ a kɛ Brooklyn he kɛmi maa pee si tomi 200 mi, nɛ a ya tuɔ magbɛ nɔ munyu, nɛ a kɛ asafo ɔmɛ yaa fiɛɛmi hulɔ. E ji he blɔ ngua nɛ i ná kaa i piɛɛ nyɛmimɛ nɛ ɔmɛ a he. Benɛ ma je ye kekleekle magbɛ nɔ munyu ɔ sisi ɔ, i ye gbeye bɔɔ. Jamɛ a be ɔ mi ɔ, waa kɛ ngmlɛfia kake lɛ tuɔ munyu ɔ. I pɔɔ tlee mi sɛmi kɛ yaa asafo nɛ ɔmɛ a mi. I kai Hɔgba piani ko ngɛ jeha 1954 ɔ mi benɛ fiɛ̃ ngɛ yee. I sɛ tlee ko nɛ yaa New York ɔ mi. Jinɛ e sa nɛ tlee ɔ nɛ kpale e se kɛ ba Brooklyn loko du nɛ bu. Se kɔɔhiɔ ngua ko fia, nɛ e mwɔɔ snoo fuu kɛ ba. Akɛnɛ tlee ɔ kɛ oslabai he wami lɛ ngɛ ní tsue he je ɔ, engine ɔ ná nyagba, nɛ e kpa ní tsumi. Nyagbenyagbe ɔ, tlee ɔ ba su tesia a ngɛ New York City maa pee Hɔɛgbi mɔtu ngmlɛ enuɔ. I nyɛɛ tlee blɔ ko nɔ kɛ ho Brooklyn ya. Benɛ i su nɔuu pɛ nɛ i ho ní tsumi ya. I kpɛ se bɔɔ nɛ pɔ hu tɔ ye he akɛnɛ i tlɔ tlee ɔ mi nyɔ ɔ mi ɔ tsuo he je. Se bua jɔmi nɛ i ná kɛ je nyɛmimɛ nɛ i ya sɔmɔ, kɛ huɛmɛ ehe nɛ i ná ngɛ asafo ɔ mi ɔ ha nɛ i hɛwi kulaa.

Benɛ i ya Betel kɛ we ɔ, a fɔ̃ mi nine konɛ ma ya piɛɛ nyɛmimɛ nɛ a ngɛ WBBR hleedio tesia a a he. Jamɛ a be ɔ mi ɔ, hleedio tesia a ngɛ 124 Columbia Heights mɔ ɔ siaudo enyɔne ɔ nɔ. Daa otsi ɔ, a peeɔ Baiblo mi ní kasemi ngɛ hleedio ɔ nɔ, nɛ a ha mi ní tsumi ngɛ mi. Nyɛminyumu A. H. Macmillan nɛ e kɛ jehahi fuu sɔmɔ ngɛ Betel ɔ pɔɔ ní tsumi nami ngɛ blɔ nya tomi nɛ ɔ mi. Nihi fuu tsɛɔ lɛ ke Nyɛminyumu Mac. E pee si fimi he nɔ hyɛmi nɔ́ kpakpa ngɛ Yehowa sɔmɔmi mi kɛ ha wɔ nihewi kɛ yihewi nɛ wa ngɛ sɔmɔe ngɛ Betel ɔ.

Ngɛ jeha 1958 ɔ mi ɔ, a ha nɛ i tsu ní tsumi komɛ kɛ ye bua Gilead Sukuu ɔ. Ní tsumi nɛ a ha mi ji kaa ma ye bua nyɛmimɛ nyumuhi kɛ yihi nɛ a ngɛ sukuu ɔ nya gbee ɔ konɛ a nine nɛ su visa nɔ. Jamɛ a jeha amɛ a mi ɔ, ɛloplee kɛ blɔ hiami he jua wa wawɛɛ, enɛ ɔ he ɔ, sukuu bi ɔmɛ bɔɔ ko pɛ nɛ a kɛ ɛloplee hiaa blɔ. A kpɛti nihi fuu nɛ a yaa Afrika kɛ mahi nɛ ngɛ tsitsaa puje he blɔ ɔ sɛɛ mele mi kɛ yaa. Benɛ nihi fuu kɛ ɛloplee bɔni blɔ hiami ɔ, sika nɛ a heɔ ngɛ blɔ hiali ɔmɛ a dɛ ɔ ba si. Enɛ ɔ he ɔ, ma se sane kpakpa fiɛɛli fuu bɔni ɛloplee ngɔmi.

Ngɛ jeha 1960 mi ɔ, a ngɔ ní tsumi kpa kɛ piɛɛ ye ní tsumi ɔ he ha mi. A ha nɛ i hai ɛloplee ha nihi nɛ a maa je United States kɛ ya Yuropa nɛ a maa ya mahi a kpɛti kpehi nɛ a pee ngɛ jeha 1961 mi ɔ. I piɛɛ a he ngɛ ɛloplee ɔ mi kɛ je New York  kɛ ya Hamburg ngɛ Germany he nɛ a pee kpe ɔ ngɛ ɔ. Benɛ a gbe kpe ɔ nya a, i kɛ nyɛmimɛ etɛ nɛ mɛ hu a sɔmɔɔ ngɛ Betel ɔ hai lɔle, nɛ wa hia blɔ kɛ je Germany kɛ ya Italy, nɛ wa ya slaa asafo ní tsumi kɔni ɔ ngɛ Rome. Benɛ wa je lejɛ ɔ, wa tsa nɔ kɛ ya France, kɛ gu Pyrenees Yoku ɔmɛ a nɔ kɛ ho Spain ya. Jamɛ a be ɔ mi ɔ, a tsi fiɛɛmi ní tsumi ɔ nya ngɛ lejɛ ɔ. Wa dla Baiblo kasemi womi ɔmɛ ekomɛ kaa nike ní konɛ nihi nɛ a ko yɔse, nɛ wa ngɔ kɛ ya ha nyɛmimɛ ɔmɛ ngɛ Barcelona. Benɛ wa na mɛ ɔ, wa bua jɔ wawɛɛ! Wa tsa wa blɔ hiami ɔ nɔ kɛ ho Amsterdam ya, nɛ wa ya ngɔ ɛloplee ngɛ lejɛ ɔ kɛ ya New York.

Maa pee jeha kake se ɔ, a ha nɛ i toɔ blɔ nya kɛ haa nyɛmimɛ nɛ a maa hia blɔ kɛ ya mahi a kpɛti kpe nɛ a maa pee ngɛ hehi fuu ngɛ je ɔ mi ɔ. Kpɔ Mi Kpe nɛ a pee ngɛ jeha 1963 ɔ mi ɔ yi ji, “Sane Kpakpa Nɛ Ngɛ Kɛ Yaa Neneene.” A to blɔ nya kaa nyɛmimɛ nɛ a he hiɛ pe 583 maa hia blɔ kɛ ya mahi fuu a mi ngɛ je kɛ wɛ. A maa ya Yuropa, Asia, kɛ South Pacific, nɛ a ma ya gbe nya ngɛ Honolulu, Hawaii, kɛ Pasadena ngɛ California. Blɔ hiami ɔ kɛ mɛ ya su Lebanon kɛ Jordan konɛ a ya slaa si nɛ a kɛ kase mahi nɛ a wo a ta ngɛ Baiblo ɔ mi ɔ a he ní. Ngɛ ɛloplee kɛ hwɔ he he blɔ nya nɛ wa toɔ ɔ se ɔ, wa hlaa visa kɛ haa nyɛmimɛ ɔmɛ.

Jeha 1963 ɔ ji jeha ko nɛ ye hɛ be nɔ jee gblee. Mɛni he je? Ngɛ June 29 ɔ nɔ ɔ, i kɛ Lila Rogers nɛ e je Missouri nɛ jamɛ a be ɔ mi ɔ, e kɛ jeha etɛ sɔmɔ ngɛ Betel ɔ sɛ gba si himi mi. Otsi kake se benɛ wa sɛ gba si himi mi ɔ, i kɛ Lila ya kpokpa nɔ kpehi nɛ a pee ngɛ ma slɔɔtohi a nɔ ngɛ je kɛ wɛ ɔ eko. Wa ya Greece, Egypt, kɛ Lebanon. Wa ngɔ ɛloplee kɛ je Beirut kɛ ya ɛloplee si dami he nyafii ko ngɛ Jordan. Akɛnɛ a tsi wa ní tsumi ɔ nya ngɛ Jordan nɛ a de wɔ ke a ha we Yehowa Odasefohi visa kɛ ya Jordan he je ɔ, wa li nɔ́ nɛ maa ba ke wa ya su lejɛ ɔ. Benɛ wa ya su Jordan ɔ, nɔ́ nɛ wa na a pee wɔ nyakpɛ wawɛɛ. Wa na nyɛmimɛ fuu nɛ a bua a he nya ngɛ tsu ko yi mi ngɛ ɛloplee si dami he ɔ, nɛ a hɛɛ bo ko nɛ a ngma ngɛ nɔ ke “Nyɛ Hee Yehowa Odasefohi”! Wa bua jɔ wawɛɛ benɛ wa na ma nɛ ɔmɛ nɛ a wo a ta ngɛ Baiblo ɔ mi ɔ! Wa ya hehi nɛ blematsɛmɛ komɛ hi, hehi nɛ Yesu kɛ e bɔfo ɔmɛ fiɛɛ ngɛ, kɛ he nɛ Kristofohi a jami ɔ je sisi ngɛ loko e su je kɛ wɛ ɔ.​—Níts. 13:47.

Jeha 55 ji nɛ ɔ nɛ Lila kɛ anɔkuale yemi piɛɛ ye he kɛ ngɛ sɔmɔe. Wa ya slaa nyɛmimɛ nɛ a ngɛ Spain kɛ Portugal si abɔ benɛ a tsi wa ní tsumi ɔ nya ngɛ lejɛ ɔ. Wa wo nyɛmimɛ ɔmɛ he wami, nɛ wa ngɔ womihi kɛ ní kpahi komɛ kɛ ya ha mɛ. Wa nyɛ nɛ wa ya slaa wa nyɛmimɛ komɛ nɛ a wo mɛ tsu ngɛ blema ta buli a tsu ko mi ngɛ Cádiz ngɛ Spain. Ye bua jɔ wawɛɛ kaa i nyɛ nɛ i tu munyu kɛ je Baiblo ɔ mi kɛ wo mɛ he wami.

Kɛ je jeha 1963 kɛ ma a, i ná he blɔ kɛ to mahi a kpɛti kpehi a he blɔ nya kɛ ha nyɛmimɛ, nɛ a ya Afrika, Australia, Central kɛ South America, Yuropa, Hawaii, New Zealand, Puerto Rico kɛ  mahi nɛ ngɛ tsitsaa puje he blɔ. I kɛ Lila ná bua jɔmi ngɛ kpokpa nɔ kpehi fuu nɛ wa ya a mi. Ngɛ jeha 1989 ɔ mi ɔ, wa ya Warsaw ngɛ Poland. Nyɛmimɛ fuu nɛ a ngɛ Russia ba kpe ngua nɛ a pee nɛ ɔ eko. Lɔ ɔ ji kekleekle kpe nɛ a ya! Nyɛmimɛ fuu nɛ waa kɛ mɛ kpe ɔ ji nihi nɛ a wo mɛ tsu jeha babauu ngɛ Soviet tsu womi he ɔmɛ ngɛ a hemi kɛ yemi ɔ he je.

Wa ná he blɔ nɛ ngɛ bua jɔmi kɛ ya slaa asafo ɔ ní tsumi kɔnihi fuu, nɛ i wo Betel weku ɔmɛ kɛ ma se sane kpakpa fiɛɛli ɔmɛ he wami. Benɛ wa ya slaa asafo ɔ ní tsumi kɔni ɔ ngɛ South Korea a, waa kɛ nyɛmimɛ nɛ a wo mɛ tsu ngɛ Suwon ɔ a kpɛti nihi 50 kpe. Nyɛmimɛ nɛ ɔmɛ ha we nɛ tsu nɛ a wo mɛ ɔ nɛ jɔ̃ a kɔni mi, a tsɔɔ kaa a ngɛ blɔ hyɛe kaa a maa ngmɛɛ a he, nɛ a ma tsa fiɛɛmi ní tsumi ɔ nɔ ekohu. Slaami nɛ wa ya slaa mɛ ɔ wo wɔ he wami wawɛɛ!​—Rom. 1:11, 12.

I na bɔ nɛ Yehowa jɔɔ e we bi nɛ a he hiɛ babauu ha jehahi nɛ be ɔ. Ngɛ jeha 1943 ɔ mi nɛ a baptisi mi ɔ, fiɛɛli nɛ a ngɛ je kɛ we ɔ a yibɔ maa su 100,000. Amlɔ nɛ ɔ, fiɛɛli 8,000,000 kɛ se nɛ a ngɛ Yehowa sɔmɔe ngɛ mahi 240 a nɔ. Fiɛɛmi ní tsumi ɔ nɛ nyɛmimɛ nɛ a ya Gilead ɔ ngɛ tsue kɛ kã a titli he je nɛ wa ngɛ hɛ mi yae ɔ nɛ. Ye bua jɔ kaa i kɛ jehahi fuu tsu ní kɛ ye bua ma se sane kpakpa fiɛɛli nɛ ɔmɛ, nɛ a nyɛ ya su hehi nɛ a tsɔ mɛ ɔ!

Ye bua jɔ hu kaa benɛ i ji niheyo ɔ, i mwɔ ye yi mi kpɔ kaa ma ya sɔmɔ ngɛ Betel kɛ bli ye sɔmɔmi ní tsumi ɔ mi. Ke i hyɛ ye se ɔ, i na kaa Yehowa jɔɔ mi ngɛ blɔhi fuu a nɔ. Ngɛ jɔɔmihi nɛ i kɛ Lila wa ná ngɛ wa Betel sɔmɔmi ɔ mi se ɔ, wa bua jɔ he blɔhi nɛ wa ná nɛ waa kɛ nyɛmimɛ sɔmɔ ngɛ asafohi nɛ wa hi mi ngɛ Brooklyn ɔ, nɛ wa ná huɛmɛ fuu.

Loloolo ɔ, i ngɛ sɔmɔe ngɛ Betel, nɛ Lila fĩ ye se be fɛɛ be. E ngɛ mi kaa amlɔ nɛ ɔ, i ye jeha 84 mohu lɛɛ, se i náa bua jɔmi ngɛ ní nɛ i ngɛ tsue ɔ mi. I yeɔ bua kɛ tsuɔ sɛ womihi nɛ asafo ɔ ní tsumi kɔni ɔ nine suɔ nɔ ɔ he ní.

Ye bua jɔ kaa i piɛɛ Yehowa asafo ɔ he, nɛ i na slɔɔto nɛ ngɛ nihi nɛ a sɔmɔɔ Yehowa kɛ nihi nɛ a sɔmɔ we lɛ ɔ a kpɛti. Amlɔ nɛ ɔ, wa ba nu ngmami nɛ ngɛ Malaki 3:18 ɔ sisi saminya. Lejɛ ɔ de ke: “Ye ma a maa na slɔɔto nɛ ngɛ dalɔ kɛ yayami peelɔ a kpɛti; nyɛ maa na slɔɔto nɛ ngɛ nɔmlɔ nɛ sɔmɔɔ mi, kɛ nɔ nɛ sɔmɔ we mi ɔ a kpɛti.” Daa ligbi ɔ, wa naa bɔ nɛ níhi ngɛ puɛe ha ngɛ Satan je nɛ ɔ mi. Nihi be hɛ nɔ kami kɛ bua jɔmi ko kulaa ngɛ a si himi mi. Se nihi nɛ a sɔmɔɔ Yehowa a ngɛ bua jɔmi ngɛ je nɛ mi wa nɛ ɔ mi. A ngɛ hɛ kɛ nɔ fɔmi nɛ mi wa. E ji he blɔ ngua nɛ wa ná kaa wa maa fiɛɛ Matsɛ Yemi sɛ gbi ɔ. (Mat. 24:14) Wa ngɛ blɔ hyɛe kaa be ko maa ba, nɛ e be kɛe nɛ Mawu Matsɛ Yemi ɔ ma kpata je momo nɛ ɔ hɛ mi, nɛ e maa ngɔ je ehe kɛ e mi jɔɔmi ɔmɛ tsuo kɛ ba. Jamɛ a be ɔ mi ɔ, wa ma ná nɔmlɔ tso mi he wami kpakpa, nɛ wa ma ná neneene wami. Kɛkɛ ɔ, Mawu sɔmɔli nɛ a yeɔ lɛ anɔkuale ngɛ zugba a nɔ ɔ maa hi si kɛ ya neneene.