1. Mɛni he je nɛ Yehowa sɔmɔli ngɛ bua jɔmi ɔ? (Moo hyɛ foni nɛ ngɛ ní kasemi ɔ sisije ɔ.)

YEHOWA ODASEFOHI ngɛ bua jɔmi wawɛɛ nitsɛ. Be fɛɛ be nɛ a ma bua a he nya ngɛ asafo mi kpehi kɛ kpokpa nɔ kpehi a sisi, aloo a ngɛ a hɛja jee ɔ, bua jɔmi ngɛ a kpɛti. Mɛni he je nɛ a ngɛ bua jɔmi ɔ? Nɔ́ he je ji kaa, a le Yehowa, a sɔmɔɔ lɛ, nɛ a bɔɔ mɔde kaa a maa kase “bua jɔmi Mawu ɔ.” (1 Tim. 1:11; La 16:11) Akɛnɛ Yehowa ji bua jɔmi Mawu he je ɔ, e suɔ nɛ wɔ hu wa ná bua jɔmi, nɛ e ha wɔ níhi babauu nɛ ma ha wɔ bua jɔmi.​—5 Mose 12:7; Fiɛlɔ 3:12, 13.

2, 3. (a) Mɛni ji bua jɔmi? (b) Mɛni he je nɛ e be gbɔjɔɔ kaa wa ma ná bua jɔmi ɔ?

² Se mo nitsɛ nɛɛ, anɛ o ngɛ bua jɔmi lo? Ke o ngɛ bua jɔmi ɔ, anɛ o ma nyɛ ma ná bua jɔmi pe bɔ nɛ o ngɛ ɔ lo? A ma nyɛ maa tsɔɔ bua jɔmi sisi kaa “si fɔfɔɛ ko nɛ ke nɔ ko ngɛ mi ɔ, e tsui nɔɔ e mi nitsɛnitsɛ. E ji si fɔfɔɛ nɛ ma nyɛ maa hi si be saii, nɛ behi fuu ɔ, nihi suɔ nɛ jamɛ a si himi ɔ nɛ tsa nɔ jã.” Baiblo ɔ tsɔɔ kaa nihi nɛ huɛ bɔmi kpakpa ngɛ a kɛ  Yehowa a kpɛti ɔ pɛ nɛ a ma nyɛ ma ná bua jɔmi nitsɛnitsɛ. Mwɔnɛ ɔ, e be gbɔjɔɔ kaa nɔ ko ma ná bua jɔmi. Mɛni he je?

³ Ke nɔ ko suɔlɔ gbo, aloo a fiee e weku no ko kɛ je asafo ɔ mi, aloo e gba loo e ní tsumi puɛ ɔ, e he maa wa kaa e ma ná bua jɔmi. Ke pɛ sɔuu lɛ ngɛ weku ɔ mi ɔ, e ma puɛ bua jɔmi nɛ ngɛ weku ɔ mi ɔ. Ke a yeɔ wa he fɛu ngɛ sukuu, ní tsumi he, a waa wɔ yi mi, aloo a wo wɔ tsu ngɛ wa hemi kɛ yemi ɔ he ɔ, e he maa wa kaa wa ma ná bua jɔmi. Jã kɛ̃ nɛ bwɔmi loo hiɔ ko nɛ wa ngɛ tsae nɛ e jɔɛ loo aywilɛho yemi be hae nɛ wa ná bua jɔmi. Se mo kai kaa Yesu Kristo nɛ ji “Nɔ Yelɔ kake pɛ nɛ e ngɛ bua jɔmi ɔ” maa wo adesahi a bua, nɛ a ma ná bua jɔmi. (1 Tim. 6:15; Mat. 11:28-30) E ngɛ mi kaa waa kɛ haomihi ngɛ kpee ngɛ Satan je yaya nɛ ɔ mi mohu lɛɛ, se ngɛ Yesu Yoku ɔ Nɔ Fiɛɛmi ɔ mi ɔ, e tsɔɔ níhi nɛ ke wa pee ɔ wa bua maa jɔ.

4, 5. Mɛni wa maa pee konɛ wa ná bua jɔmi daa?

⁴ Yesu tsɔɔ nɔ́ titli nɛ́ ma ha wɔ bua jɔmi. E de ke: “Nihi nɛ a le kaa a hia mumi mi níhi ɔ ngɛ bua jɔmi, ejakaa a nɔ́ ji hiɔwe Matsɛ Yemi ɔ nɛ.” (Mat. 5:3) Mɛni e sa nɛ waa pee kɛ tsɔɔ kaa mumi mi níhi a he hia wɔ? E sa nɛ waa kase Baiblo ɔ nɛ waa ye Mawu mlaa amɛ a nɔ, nɛ bua jɔmi Mawu ɔ nɛ wa ma ja lɛ ɔ he nɛ hia wɔ wawɛɛ. Ke wa pee ní nɛ ɔmɛ ɔ, wa ma ná bua jɔmi, nɛ hemi kɛ yemi nɛ wa ngɛ ngɛ Mawu si womi ɔmɛ a mi ɔ mi maa wa. Jehanɛ hu ɔ, “hɛ kɛ nɔ fɔmi nɛ ngɛ bua jɔmi” nɛ wa náa ngɛ Mawu Munyu ɔ mi ɔ maa wo wɔ he wami.​—Tito 2:13.

⁵ Ke wa suɔ nɛ wa ná bua jɔmi nitsɛ ngɛ si himi mi ɔ, lɛɛ e sa nɛ wa ha nɛ huɛ bɔmi kpakpa nɛ hi waa kɛ Yehowa wa kpɛti daa. Bɔfo Paulo ngma ke: “Be fɛɛ be ɔ, nyɛ nya ngɛ Nyɔmtsɛ [Yehowa] mi. Ma de ekohu ke nyɛ nya!” (Filip. 4:4) Ja wa ná nile nɛ je hiɔwe ɔ loko huɛ bɔmi kpakpa maa hi waa kɛ Yehowa wa kpɛti. Mawu Munyu ɔ de ke: “Nɔmlɔ nɛ le ní, nɛ e nuɔ nɔ́ sisi ɔ, a gbaa lɛ saminya. Nihi nɛ le ní ɔ, a naa bua jɔmi; nile haa mɛ wami.”​—Abɛ 3:13, 18.

6. Mɛni ji nɔ́ kpa ko hu nɛ wa maa pee konɛ wa ná bua jɔmi?

⁶ Ke wa suɔ nɛ wa ná bua jɔmi daa a, tsa pi Baiblo ɔ pɛ nɛ e sa kaa waa kane. Mohu ɔ, e sa nɛ waa ngɔ níhi nɛ wa kase ɔ kɛ tsu ní. Benɛ Yesu ngɛ se nami nɛ ngɛ he kaa waa kɛ níhi nɛ wa kaseɔ ɔ ma tsu ní ɔ tsɔɔe ɔ, e de ke: “Ke nyɛ le ní nɛ ɔmɛ nɛ nyɛ peeɔ ɔ, nyɛ ngɛ bua jɔmi.” (Yoh. 13:17; kane Yakobo 1:25.) Ke wa suɔ nɛ huɛ bɔmi kpakpa nɛ hi waa kɛ Yehowa wa kpɛti nɛ wa ná bua jɔmi ɔ, enɛ ɔ ji nɔ́ titli nɛ maa ye bua wɔ. Se kɛ wa maa pee kɛ ná bua jɔmi ha kɛɛ be mi nɛ níhi fuu ngɛ nɛ ma nyɛ ma puɛ wa bua jɔmi ɔ? Nyɛ ha nɛ waa hyɛ nɔ́ kpa ko hu nɛ Yesu de ngɛ e Yoku ɔ Nɔ Fiɛɛmi ɔ mi.

7. Ngɛ mɛni blɔ nɔ nɛ nihi nɛ a yeɔ kɔmɔ ɔ ngɛ bua jɔmi?

⁷ “Nihi nɛ a yeɔ kɔmɔ ɔ ngɛ bua jɔmi, ejakaa a maa wo a bua.” (Mat. 5:4) Eko ɔ, ni komɛ ma bi ke, ‘Nɔ ko nɛ e ngɛ kɔmɔ yee hu ma nyɛ ma ná bua jɔmi lo?’ Pi nɔ fɛɛ nɔ nɛ yeɔ kɔmɔ kɛkɛ he munyu nɛ Yesu ngɛ tue. Nimli yayamihi po yeɔ kɔmɔ ngɛ “behi nɛ a mi wa” nɛ wa ngɛ mi ɔ he. (2 Tim. 3:1) Se a kɔmɔ yemi ɔ tsuo se ɔ, a hla we Yehowa se blɔ, enɛ ɔ  he ɔ, a be bua jɔmi. Lɔ ɔ he ɔ, nihi nɛ Yesu ngɛ a he munyu tue ɔ ji nihi nɛ a le kaa mumi mi níhi a he hia mɛ, nɛ a yeɔ kɔmɔ akɛnɛ nihi babauu kua Mawu ɔ he je. Jehanɛ hu ɔ, a yɔseɔ kaa yayami peeli ji mɛ, nɛ ní yayahi nɛ adesahi ngɛ pee ngɛ zugba a nɔ ɔ haoɔ mɛ. Yehowa toɔ nimli kaa jã a he hɛ, nɛ e guɔ Baiblo ɔ nɔ kɛ woɔ a bua, nɛ e haa mɛ bua jɔmi ngɛ si himi ɔ mi.​—Kane Ezekiel 5:11; 9:4.

8. Mo tsɔɔ nɔ́ he je nɛ nihi nɛ a he jɔ ɔ ngɛ bua jɔmi ɔ.

⁸ “Nihi nɛ a he jɔ ɔ ngɛ bua jɔmi, ejakaa a nine maa su zugba a nɔ.” (Mat. 5:5) Ngɛ mɛni blɔ nɔ nɛ nihi nɛ a he jɔ ɔ ngɛ bua jɔmi? Benɛ a kase anɔkuale ɔ ngɛ Baiblo mi ɔ, a pee tsakemihi ngɛ a si himi mi. Be ko nɛ be ɔ, a tuɔ munyu basabasa, a kɛ nihi pɛɛ, nɛ a hɛ mi jɔɛ. Se amlɔ nɛ ɔ, a wo “su ehe” ɔ, nɛ a jeɔ su komɛ kaa “mi mi sami,” “mi mi jɔmi, he si bami, he jɔmi, kɛ tsui si tomi” kpo. (Kol. 3:9-12) Enɛ ɔ he ɔ, amlɔ nɛ ɔ, a ngɛ tue mi jɔmi kɛ bua jɔmi nitsɛnitsɛ ngɛ si himi mi. Jehanɛ hu ɔ, Mawu wo si kaa nihi nɛ a he jɔ ɔ, a nine maa su “zugba a nɔ.”​—La 37:8-10, 29.

9. (a) Mɛni Yesu ngɛ tsɔɔe benɛ e de ke nihi nɛ a he jɔ ɔ, a “nine maa su zugba a nɔ” ɔ? (b) Ngɛ mɛni blɔ nɔ nɛ “nihi nɛ nɔ́ nɛ da peemi he hwɔ kɛ kuma yeɔ mɛ” ɔ ngɛ bua jɔmi?

⁹ Mɛni Yesu ngɛ tsɔɔe benɛ e de ke nihi nɛ a he jɔ ɔ, a “nine maa su zugba a nɔ” ɔ? Yesu ngɛ tsɔɔe kaa e kaseli nɛ a pɔ mɛ nu ɔ, a nine maa su zugba a nɔ ke a bɔni zugba a nɔ yemi kaa matsɛmɛ kɛ osɔfohi. (Kpoj. 20:6) Nimli ayɔhi abɔ nɛ a be hiɔwe yae ɔ lɛɛ, a maa hi si ngɛ zugba a nɔ kɛ ya neneene. A maa ye mluku nɛ a ma ná tue mi jɔmi kɛ bua jɔmi. Mɛ kɛ̃ ji “nihi nɛ nɔ́ nɛ da peemi he hwɔ kɛ kuma yeɔ mɛ” ɔ nɛ. (Mat. 5:6) Akɛnɛ a peeɔ nɔ́ nɛ da he je ɔ, a bua maa jɔ a he ngɛ je ehe ɔ mi. (2 Pet. 3:13) Ke Mawu je yiwutsotsɛmɛ tsuo kɛ je ɔ, nihi nɛ a peeɔ nɔ́ nɛ da a ma ná bua jɔmi, nɛ a be kɔmɔ yee hu ejakaa nimli yayami ɔmɛ be hu.​—La 37:17.

10. Mɛni mɔbɔ nami tsɔɔ?

¹⁰ “Nihi nɛ a naa nɔ mɔbɔ ɔ ngɛ bua jɔmi, ejakaa a maa na mɛ mɔbɔ.” (Mat. 5:7) Hebri peemi munyu ko nɛ e kɛ mɔbɔ nami ngɛ tsakpa a tsɔɔ “mi mi sami kpo nɛ a jeɔ, kɛ bua nɛ a woɔ nɔ.” Jã kɛ̃ nɛ Hela peemi munyu ɔ hu tsɔɔ mi mi sami kpo nɛ a jeɔ kɛ tsɔɔ nɔ. Se mɔbɔ nami tsɔɔ babauu pe nɛ wa mi mi maa sã wɔ ngɛ nɔ ko he. Baiblo ɔ tsɔɔ kaa mɔbɔ nami tsɔɔ yemi kɛ buami pɔtɛɛ nɛ waa kɛ ma ha nihi.

11. Mɛni wa ma nyɛ maa kase ngɛ nɔ́ he tomi nɔ́ nɛ kɔɔ Samaria no mɔbɔ nalɔ ɔ he ɔ mi?

¹¹ Kane Luka 10:30-37. Yesu nɔ́ he tomi nɔ́ nɛ kɔɔ Samaria no mɔbɔ nalɔ ɔ he ɔ haa nɛ wa naa nɔ́ nɛ mɔbɔ nami tsɔɔ nitsɛnitsɛ. Mi mi sami kɛ mɔbɔ nami lɛ ha nɛ Samaria no ɔ pee nɔ́ ko kɛ ye bua nyumu ɔ nɛ e ngɛ nɔ́ nae ɔ nɛ. Benɛ Yesu gbe e nɔ́ he tomi nɔ́ ɔ nya a, e de ke: “Mo hu yaa nɛ o ya pee jã nɔuu.” Lɔ ɔ he ɔ, eko ɔ, wa ma bi wa he ke: ‘Anɛ i ngɛ jã pee lo? Anɛ i ngɛ Samaria no mɔbɔ nalɔ ɔ kasee lo? Anɛ ma nyɛ ma je mɔbɔ nami kpo nɛ ma ye kɛ bua nihi nɛ a ngɛ nɔ́ nae ɔ pe bɔ nɛ i ngɛ pee ɔ lo? Kaa nɔ hyɛmi nɔ́ ɔ, ma nyɛ ma ye bua nihi nɛ a wa ngɛ jeha mi, nihi nɛ a suɔli gbo, kɛ jokuɛwi nɛ a fɔli be asafo ɔ mi lo? Anɛ ma nyɛ ma “tu bua womi munyu kɛ tsɔɔ ni nɛmɛ nɛ a hao ɔ lo”?’​—1 Tɛs. 5:14; Yak. 1:27.

12. Ngɛ mɛni blɔ nɔ nɛ ke wa naa nihi mɔbɔ ɔ, wa bua maa jɔ?

¹² Mɛni he je nɛ ke wa na nihi mɔbɔ ɔ,  wa bua maa jɔ ɔ? Ke wa naa nihi mɔbɔ ɔ, e ngɛ kaa nɔ́ nɛ wa ngɛ mɛ nɔ́ ko hae, nɛ kaa bɔ nɛ Yesu de ɔ, bua jɔmi ngɛ nɔ́ hami mi. Jehanɛ hu ɔ, ke wa pee jã a, Yehowa bua maa jɔ wa he. (Níts. 20:35; kane Hebri Bi 13:16.) Matsɛ David de ngɛ nɔ nɛ e susuɔ nihi a he ɔ he ke: ‘Yehowa maa bu e he, nɛ e yi ma na wami. Yehowa maa gbaa lɛ ngɛ zugba a nɔ.’ (La 41:1, 2) Ke wa naa nihi mɔbɔ, nɛ wa mi mi sãa wɔ ngɛ a he ɔ, Yehowa hu maa na wɔ mɔbɔ, nɛ wa ma ná bua jɔmi kɛ ya neneene.​—Yak. 2:13.

13, 14. Ngɛ mɛni blɔ nɔ nɛ nihi nɛ a tsui mi tsɔ ɔ ngɛ bua jɔmi?

¹³ Yesu de ke: “Nihi nɛ a tsui mi tsɔ ɔ ngɛ bua jɔmi, ejakaa a maa na Mawu.” (Mat. 5:8) Loko wa tsui mi ma tsɔ ɔ, ja níhi nɛ wa susuɔ a he kɛ níhi nɛ wa peeɔ ɔmɛ a he tsɔ. Ke wa suɔ kaa jami nɛ wa jaa Yehowa a he nɛ tsɔ ɔ, lɛɛ e sa nɛ níhi nɛ wa susuɔ a he ɔ a he nɛ tsɔ.​—Kane 2 Korinto Bi 4:2; 1 Tim. 1:5.

¹⁴ Huɛ bɔmi kpakpa ma nyɛ maa hi nihi nɛ a tsui mi tsɔ ɔ kɛ Yehowa a kpɛti ejakaa Yehowa de ke: “A gbaa nihi nɛ fɔ a tade ɔmɛ a he” ɔ. (Kpoj. 22:14) Ngɛ mɛni blɔ nɔ nɛ a “fɔ a tade ɔmɛ a he”? Kristofohi nɛ a pɔ mɛ nu ɔ a he tsɔ ngɛ Yehowa hɛ mi, nɛ e ma ha mɛ wami nɛ gbenɔ be mi ngɛ hiɔwe, nɛ a ma ná bua jɔmi kɛ ya neneene. Nimli asafo ɔ nɛ a ngɛ hɛ nɔ kami kaa a maa hi si ngɛ zugba a nɔ ɔ hu ma ba pee Mawu huɛmɛ. Amlɔ nɛ ɔ, ‘a ngɛ a tade ɔmɛ a he fɔe ngɛ Jijɔ Bi ɔ muɔ ɔ mi konɛ e hiɛ futaa.’​—Kpoj. 7:9, 13, 14.

15, 16. Ngɛ mɛni blɔ nɔ nɛ nihi nɛ a tsui mi tsɔ ɔ ma nyɛ maa “na Mawu”?

¹⁵ Ngɛ mɛni blɔ nɔ nɛ nihi nɛ a tsui mi tsɔ ɔ “maa na Mawu” be mi nɛ “nɔmlɔ adesa ko be nyɛe nɛ e na [Mawu] hɛ mi nɛ e yi ma ná wami” ɔ? (2 Mose 33:20) Hela munyu nɛ a tsɔɔ sisi ke “na” a ma nyɛ maa tsɔɔ “juɛmi nɛ a kɛ poɔ nɔ́ he foni, aloo nɔ́ ko nɛ a leɔ.” Nihi nɛ a kɛ a “tsui hɛ ngmɛ ɔmɛ” naa Mawu ɔ ji nihi nɛ a le Mawu nitsɛnitsɛ nɛ a bua jɔ e su ɔmɛ a he ɔ nɛ. (Efe. 1:18) Akɛnɛ Yesu jeɔ Mawu su ɔmɛ kpo saminya he je ɔ, e nyɛ nɛ e de ke: “Nɔ fɛɛ nɔ nɛ e na mi ɔ, e na Tsɛ ɔ hulɔ.”​—Yoh. 14:7-9.

¹⁶ Ngɛ Mawu su ɔmɛ lemi se ɔ, anɔkuale Kristofohi ‘naa Mawu’ ngɛ níhi nɛ Mawu peeɔ kɛ ha mɛ ɔ mi. (Hiob 42:5) Jehanɛ hu ɔ, a ngɔɔ a juɛmi kɛ maa jɔɔmihi nɛ Mawu kɛ ma ha nihi nɛ a bɔɔ mɔde kaa a ma ha nɛ a he ma tsɔ, nɛ a kɛ anɔkuale yemi ngɛ lɛ sɔmɔe ɔ nɔ. Ngɛ anɔkuale mi ɔ, nihi nɛ a pɔ mɛ nu ɔ maa na Mawu kɛ a hɛ ngmɛ ke a tle mɛ si kɛ ho hiɔwe ya.​—1 Yoh. 3:2.

17. Mɛni he je nɛ nihi nɛ a diɔ tue mi jɔmi se ɔ ngɛ bua jɔmi ɔ?

¹⁷ Yesu de ke: “Nihi nɛ a haa nɛ tue mi jɔmi baa a ngɛ bua jɔmi.” (Mat. 5:9) Ke waa kɛ nɔ ko wa kpɛti puɛ, nɛ wa ya e ngɔ konɛ wa dla waa kɛ lɛ wa kpɛti ɔ, wa ma nyɛ ma ná bua jɔmi. Kaselɔ Yakobo ngma ke: “Dami yiblii ɔ, tue mi jɔmi si himihi a mi nɛ a duɔ ngɛ kɛ haa nihi nɛ a kɛ tue mi jɔmi baa a.” (Yak. 3:18) Ke pɛ ba waa kɛ nɔ ko wa kpɛti ngɛ asafo ɔ mi loo weku ɔ mi ɔ, e sa nɛ wa kpa Mawu pɛɛ nɛ e ye kɛ bua wɔ konɛ wa nyɛ nɛ wa dla waa kɛ wa nyɛmi ɔ wa kpɛti. Ke wa pee jã a, Yehowa maa ngɔ e mumi klɔuklɔu ɔ kɛ ye bua wɔ, wa ma je su kpakpahi kpo, nɛ wa bua maa jɔ. Yesu tsɔɔ nɔ́ he je nɛ e sa kaa waa di tue mi jɔmi se. E de ke: “Lɔ ɔ he ɔ, ke o ngɔ o nike ní kɛ ma bɔ sami la tɛ ɔ he nɛ o kai ngɛ lejɛ ɔ kaa o nyɛmi ko kɛ mo ngɛ sane ko ɔ, si o nike ní ɔ ngɛ lejɛ ɔ, ngɛ afɔle sami la tɛ ɔ hɛ mi, nɛ o ho. Kekleekle ɔ, o kɛ o nyɛmi ɔ nɛ ya dla nyɛ kpɛti, konɛ lɔ ɔ se ɔ, o kpale kɛ ba nɛ o ngɔ o nike ní ɔ kɛ ba ha.”​—Mat 5:23, 24.

18, 19. Mɛni he je nɛ Kristofohi ma nyɛ ma ná bua jɔmi ke a ngɛ mɛ yi mi wae?

¹⁸ “Ke nihi pue nyɛ hɛ mi si, nɛ a wa nyɛ yi mi, nɛ a tu lakpa munyu yayami slɔɔtohi kɛ si nyɛ ngɛ ye he ɔ, nyɛ bua nɛ jɔ.” Mɛni Yesu ngɛ tsɔɔe? Yesu de ke: “Nyɛ nya nɛ nyɛ bua nɛ jɔ wawɛɛ, ejakaa nyɛ hiɔwo kle ngɛ hiɔwe. Jã kɛ̃ nɛ a wa gbali ɔmɛ nɛ a sɛ nyɛ hlami ɔ yi mi.” (Mat. 5:11, 12) Benɛ a kongo bɔfo ɔmɛ nɛ a fã mɛ ke a ko fiɛɛ hu ɔ, “a je Sanhedri bi ɔmɛ a hɛ mi kɛ bua jɔmi.” Ngɛ anɔkuale mi ɔ, a bua jɔɛ kpa nɛ a fiaa mɛ ɔ he. Se kɛ̃ ɔ, a bua jɔ “ejakaa [Yesu] biɛ he je ɔ, a bu mɛ kaa a ji nihi nɛ a sa hɛ mi si puemi.”​—Níts. 5:41.

¹⁹ Mwɔnɛ hu ɔ, ke Yehowa sɔmɔli ngɛ nɔ́ nae ngɛ Yesu biɛ ɔ he, aloo a kɛ kahi nɛ a mi wa ngɛ kpee ɔ, a kɛ bua jɔmi fĩɔ si. (Kane Yakobo 1:2-4.) Wɔ hu wa bua jɔɛ nɔ́ nami slɔɔtohi nɛ waa kɛ kpeɔ ɔ he kaa Yesu bɔfo ɔmɛ nɔuu. Se ke wa ye Yehowa anɔkuale ɔ, Yehowa ma ha nɛ wa ná kã konɛ wa fĩ si. Kaa nɔ hyɛmi nɔ́ ɔ, a wo Henryk Dornik kɛ lɛ nitsɛ e nyɛmi ko tsu ngɛ August jeha 1944 ɔ mi. Nihi nɛ wo mɛ tsu ɔ de ke: “E he wa kaa o ma tsake nimli nɛ ɔmɛ a juɛmi nɛ a pee nɔ́ ko. A bua jɔ po kaa a ma gbo.” Nyɛminyumu Dornik de ke: “E ngɛ mi kaa i sume nɛ ma gbo mohu lɛɛ, se kã nɛ i kɛ da nɔ́ nami ɔ nya kɛ anɔkuale nɛ i ye Yehowa a ha nɛ i ná bua jɔmi. . . . I sɔle wawɛɛ, nɛ i hɛ kɛ su Yehowa he haa, nɛ i na kaa Yehowa ji Yemi Kɛ Bualɔ nitsɛnitsɛ.”

20. Mɛni he je nɛ wa bua jɔ kaa wa ngɛ “bua jɔmi Mawu ɔ” sɔmɔe ɔ?

²⁰ Ke Yehowa nɛ ji “bua jɔmi Mawu ɔ” kplɛɛ wa nɔ ɔ, wa ma nyɛ ma ná bua jɔmi ke a wa wɔ yi mi, wa weku li te si kɛ wo wɔ, wa nu hiɔ loo wa wa ngɛ jeha mi. (1 Tim. 1:11) Jehanɛ hu ɔ, akɛnɛ wa le kaa wa Mawu, “nɔ nɛ e be nyɛe maa ye lakpa a” si womi ɔmɛ tsuo maa ba mi he je ɔ, wa bua jɔɔ. (Tito 1:2) Ke wa ngɔ nyagbahi kɛ kahi nɛ waa kɛ kpeeɔ ɔ kɛ to jɔɔmihi nɛ Yehowa ma ha wɔ hwɔɔ se ɔ he ɔ, nyagba amɛ kɛ ka amɛ ji nɔ́ ko nyafii. Ngɛ Paradeiso ɔ mi ɔ, Yehowa maa jɔɔ wɔ babauu pe bɔ nɛ wa susu, nɛ bua jɔmi nɛ wa ma ná a be hie kalemi. Niinɛ, wa “maa hi zugba a nɔ ngɛ kplɔkɔtɔ, kɛ tue mi jɔmi mi.”​—La 37:11.