1. Mɛni si fɔfɔɛ mi nɛ bɔfo Yohane ya je maa pee jeha 95 ɔ mi?

MAA pee jeha 95 ɔ mi ɔ, bɔfo Yohane ya je si fɔfɔɛ ko nɛ mi wa mi. Jamɛ a be ɔ mi ɔ, e bwɔ, nɛ a wo lɛ tsu ngɛ Patmɔs, nɛ ji zugba kpɔ ko nɛ wo bɔle lɛ ɔ nɔ, nɛ e ma nyɛ maa pee kaa lɛ pɛ ji bɔfo nɛ piɛ. (Kpoj. 1:9) E le kaa si temi kɛ woli ngɛ asafo ɔmɛ sisie, nɛ a kɛ mi gbami ngɛ nyɛmimɛ ɔmɛ a kpɛti bae. E pee kaa nɔ́ nɛ anɔkuale Kristofohi bɔɔ nɛ ngɛ ɔ a sisi ma gumi.​—Jud 4; Kpoj. 2:15, 20; 3:1, 17.

2. Ngɛ Kpo Jemi 7:9-14 ɔ nya a, mɛni nina ko nɛ ngɛ bua jɔmi nɛ Yohane na? (Hyɛ foni nɛ ngɛ womi ɔ hɛ mi ɔ.)

² Benɛ Yohane ngɛ si fɔfɔɛ nɛ mi wa nɛ ɔ mi ɔ, Mawu je nina ko nɛ kɔɔ níhi nɛ maa ba hwɔɔ se ɔ kpo kɛ tsɔɔ lɛ. Ngɛ nina a mi ɔ, e na nɛ bɔfo ko de bɔfo kpa komɛ kaa a hɛɛ kɔɔhiɔ nɛ a kɛ ma kpata zugba a hɛ mi ngɛ amanehlu ngua a mi ɔ mi kpɛii, kɛ yaa si be nɛ a maa sɔu nyagbe nyɔguɛ nɛ ngɛ nyɔguɛhi a kuu ɔ mi ɔ nya. (Kpoj. 7:1-3) Nimli 144,000 lɛ ngɛ kuu nɛ ɔ mi, nɛ a maa piɛɛ Yesu he kɛ ye matsɛ ngɛ hiɔwe. (Luka 12:32; Kpoj. 7:4) Lɔ ɔ se ɔ, Yohane wo kuu kpa ko hu ta. Nihi nɛ a ngɛ kuu nɛ ɔ mi ɔ a he hiɛ wawɛɛ, lɔ ɔ he ɔ, e de ke: “Hyɛ!” Eko ɔ, munyungu nɛ ɔ nɛ Yohane kɛ tsu ní ɔ tsɔɔ bɔ nɛ nɔ́ nɛ e na a pee lɛ nyakpɛ ha. Mɛni Yohane na? E na “asafo kuu ngua ko nɛ adesa ko nyɛ we nɛ e kane, nɛ a je je mahi tsuo kɛ wɛtsohi kɛ nihi kɛ lilɛhi a mi, nɛ a daa si ngɛ matsɛ sɛ ɔ kɛ Jijɔ Bi ɔ hɛ mi.” (Kane Kpo Jemi 7:9-14.) Hyɛ bɔ nɛ Yohane bua maa jɔ ha benɛ e ba na kaa hwɔɔ se ɔ, adesa akpe nyɔngmahi abɔ ma ja Mawu ngɛ blɔ nɛ da nɔ ɔ!

3. (a) Mɛni he je nɛ e sa nɛ nina nɛ Yohane na a nɛ wo wa hemi kɛ yemi ɔ mi he wami ɔ? (b) Mɛni wa maa kase ngɛ munyu nɛ ɔ mi?

³ E ngɛ heii kaa nina nɛ ɔ ha nɛ Yohane hemi kɛ yemi ɔ mi  wa. Nɛ e sa nɛ nina nɛ ɔ nɛ ha nɛ wa hemi kɛ yemi ɔ mi nɛ wa wawɛɛ po pe jã, ejakaa nina nɛ ɔ ngɛ mi bae ngɛ wa be nɛ ɔ mi! Wa naa nimli ayɔhi abɔ nɛ a ngɛ a nya buae, nɛ a hɛ kɛ nɔ fɔmi ji kaa a maa gblee haomi ngua a mi nɛ a hi si ngɛ zugba a nɔ kɛ ya neneene. Ngɛ munyu nɛ ɔ mi ɔ, wa maa na blɔ nɔ nɛ Yehowa gu kɛ ha nɛ wa le asafo kuu babauu ɔ jeha 80 kɛ se ji nɛ ɔ. Lɔ ɔ se ɔ, wa ma susu níhi enyɔ nɛ ɔmɛ a he ngɛ kuu nɛ ɔ he: (1) a he hiɛmi kɛ (2) he slɔɔtohi nɛ a je. Níhi enyɔ nɛ ɔmɛ a he nɛ wa ma susu ɔ maa wo nihi tsuo nɛ a ngɛ hɛ kɛ nɔ fɔmi kaa a maa piɛɛ kuu nɛ a jɔɔ mɛ nɛ ɔ he ɔ a hemi kɛ yemi mi he wami.

4. Mɛni Baiblo mi anɔkuale ko nɛ sɔlemi ɔmɛ li, se Baiblo Kaseli ɔmɛ hu nɛɛ?

⁴ Baiblo ɔ tsɔɔ kaa be maa su nɛ adesahi nɛ a buɔ Mawu tue ɔ maa hi si kɛ ya neneene ngɛ zugba a nɔ. Se sɔlemi ɔmɛ tsɔɔ we anɔkuale nɛ ɔ. (2 Kor. 4:3, 4) Mwɔnɛ ɔ, jamihi fuu tsɔɔ kaa nihi nɛ a peeɔ nɔ́ nɛ da a maa ya hiɔwe ke a gbo. Se Baiblo Kaseli * a kuu nyafii ko nɛ a peeɔ Hwɔɔmi Mɔ ɔ ngɛ jeha 1800 jeha amɛ a nyagbe ɔ lɛɛ e slo susumi nɛ a hɛɛ. A kase kaa Mawu ma ha nɛ zugba a maa pee Paradeiso ekohu, nɛ adesahi ayɔhi abɔ nɛ a buɔ lɛ tue ɔ maa hi zugba a nɔ, se pi hiɔwe. Se kɛ̃ ɔ, e he be loko a ba le nihi nɛ a buɔ Mawu tue nɛ ɔmɛ.​—Mat. 6:10.

5. Mɛni nɛ Baiblo Kaseli ɔmɛ kase ngɛ nimli 144,000 ɔ a he?

⁵ Ngɛ anɔkuale mi ɔ, Baiblo Kaseli ɔmɛ ba kase hu kaa kuu ko ngɛ nɛ a ma “he mɛ kɛ je zugba a nɔ,” nɛ a ma ya piɛɛ Yesu he kɛ ye matsɛ ngɛ hiɔwe. (Kpoj. 14:3) Kuu nɛ ɔ mi bimɛ a yibɔ ji 144,000. A jɔɔ a he nɔ kɛ ha Mawu, nɛ a kɛ kã kɛ anɔkuale yemi sɔmɔ lɛ benɛ a ngɛ zugba a nɔ ɔ. Nɛ asafo kuu ngua a hu nɛɛ?

6. Mɛni Baiblo Kaseli ɔmɛ tsɔɔ ngɛ asafo kuu ngua a he?

⁶ Ngɛ Yohane nina a mi ɔ, e na nɛ kuu nɛ ɔ “daa si ngɛ matsɛ sɛ ɔ kɛ Jijɔ Bi ɔ hɛ mi.” (Kpoj. 7:9) Munyu nɛ ɔ ha nɛ Baiblo Kaseli ɔmɛ ma nya si kaa asafo kuu ngua a maa hi hiɔwe kaa bɔ nɛ e ji ngɛ nimli 144,000 ɔ a blɔ fa mi ɔ. Ke nimli 144,000 ɔ kɛ asafo kuu ngua a tsuo maa hi hiɔwe ɔ, lɛɛ kɛ wa maa pee kɛɛ kɛ le slɔɔto nɛ ngɛ a kpɛti? Baiblo Kaseli ɔmɛ susu kaa asafo kuu ngua a maa pee Kristofohi nɛ benɛ a ngɛ zugba a nɔ ɔ, a bu Mawu tue se pi ngɛ nɔ́ fɛɛ nɔ́ mi. E ngɛ mi kaa nimli nɛ ɔmɛ baa a je mi saminya mohu lɛɛ, se eko ɔ, a ji sɔlemi slɔɔto ɔmɛ a mi. Baiblo Kaseli ɔmɛ tsɔɔ kaa suɔmi nɛ nimli nɛ ɔmɛ ngɛ kɛ ha Mawu ɔ pi, enɛ ɔ he ɔ, a kɛ Yesu be nyɛe maa ye matsɛ ngɛ hiɔwe. Akɛnɛ suɔmi nɛ asafo kuu ngua a ngɛ kɛ ha Mawu ɔ mi wɛ he je ɔ, a ma ná he blɔ kɛ ya hiɔwe, nɛ a ma ya hi matsɛ sɛ ɔ hɛ mi, se a be matsɛ sɛ ɔmɛ a nɔ hie.

7. Mɛnɔmɛ nɛ Baiblo Kaseli ɔmɛ tsɔɔ kaa a maa hi zugba a nɔ ngɛ Jeha Akpe Nɔ Yemi ɔ mi, nɛ mɛni nɛ Baiblo Kaseli ɔmɛ tsɔɔ ngɛ nyumuhi anɔkualetsɛmɛ nɛ a hi si blema a a he?

⁷ Lɛɛ mɛnɔmɛ nɛ a maa hi zugba a nɔ mɔ? Baiblo Kaseli ɔmɛ kase kaa ke nimli 144,000 ɔ kɛ asafo kuu ngua a ho hiɔwe ya se ɔ, a ma ha nimli ayɔ kpahi he blɔ nɛ a hi zugba a nɔ, nɛ a ma ná jɔɔmihi nɛ Kristo Jeha Akpe Nɔ Yemi ɔ maa ngɔ kɛ ba a he se. Baiblo Kaseli ɔmɛ susuu we kaa nimli ayɔ abɔ nɛ ɔmɛ ma sɔmɔ Yehowa loko Kristo Nɔ Yemi ɔ maa je sisi. Mohu ɔ, a tsɔɔ kaa ngɛ Jeha Akpe Nɔ Yemi ɔ mi ɔ, a maa tsɔɔ kuu nɛ ɔ Yehowa he ní. Lɔ ɔ se ɔ, a kpɛti ni nɛmɛ nɛ a kɛ Yehowa blɔ tsɔɔmi ma tsu ní ɔ, a maa jɔɔ mɛ nɛ a maa  hi si ngɛ zugba a nɔ kɛ ya neneene, nɛ a ma kpata nihi nɛ a bui Mawu tue ɔ a hɛ mi. Jehanɛ hu ɔ, Baiblo Kaseli ɔmɛ tsɔɔ kaa eko ɔ, ni komɛ nɛ a ma sɔmɔ kaa ‘ganɔhi’ ngɛ zugba a nɔ ngɛ Jeha Akpe Nɔ Yemi ɔ mi ɔ maa ya hiɔwe ke Jeha Akpe Nɔ Yemi ɔ ba nyagbe. A tsɔɔ hu kaa “blematsɛmɛ nɛ a ye anɔkuale” (nyumuhi anɔkualetsɛmɛ nɛ a gbo loko Kristo ba) nɛ́ a ma tle mɛ si ngɛ Jeha Akpe Nɔ Yemi mi ɔ hu ma sɔmɔ kaa ‘ganɔhi.’​—La 45:16.

8. Mɛni kuu etɛ nɛ Baiblo Kaseli ɔmɛ tsɔɔ kaa a ngɛ Mawu blɔ nya tomi ɔ mi?

⁸ Baiblo Kaseli ɔmɛ susu kaa kuu etɛ lɛ ngɛ: (1) nimli 144,000 nɛ a kɛ Yesu maa ye matsɛ ngɛ hiɔwe; (2) asafo kuu ngua nɛ a ji Kristofohi nɛ a be kã tsɔ nɛ a ma ya da Yesu matsɛ sɛ ɔ hɛ mi ngɛ hiɔwe; kɛ (3) nimli ayɔhi abɔ nɛ a maa tsɔɔ mɛ Yehowa he ní ngɛ zugba a nɔ ke Kristo ngɛ nɔ yee ngɛ e Jeha Akpe Nɔ Yemi ɔ mi. * Se ngɛ be nɛ Yehowa nitsɛ to ɔ nya a, anɔkuale la a bɔni kpɛmi nɛ e we bi bɔni tsɔɔmi nɛ ɔ sisi numi.​—Abɛ 4:18.

9. (a) Ngɛ mɛni blɔ nɔ nɛ ke asafo kuu ngua a ngɛ zugba a nɔ ɔ, a ma nyɛ maa da “matsɛ sɛ ɔ kɛ Jijɔ Bi ɔ hɛ mi”? (b) Mɛni he je nɛ sisi numi ngɛ bɔ nɛ wa nu Kpo Jemi 7:9 ɔ sisi ha amlɔ nɛ ɔ he ɔ?

⁹ Ngɛ jeha 1935 ɔ mi ɔ, a tsɔɔ nihi tutuutu nɛ asafo kuu ngua a nɛ Yohane na a ji. Yehowa Odasefohi ba kase kaa tsa pi doo kaa asafo kuu ngua a nɛ a ya hiɔwe loko a ma nyɛ maa da si ngɛ “matsɛ sɛ ɔ kɛ Jijɔ Bi ɔ hɛ mi.” Mohu ɔ, jamɛ a munyu ɔ ji okadi peemi munyu. E ngɛ mi kaa asafo kuu ngua a maa hi zugba a nɔ mohu lɛɛ, se a ma nyɛ maa da “matsɛ sɛ ɔ hɛ mi” ke a kplɛɛ nɔ kaa Yehowa ji nɔ nɛ ngɛ he blɔ kaa e yeɔ je ɔ nɔ, nɛ a ngɔ a he kɛ wo e sisi. (Yes. 66:1) A ma nyɛ maa da “jijɔ bi ɔ hɛ mi” ke a ná hemi kɛ yemi ngɛ Yesu kpɔmi afɔle sami ɔ mi. Ngɛ Mateo 25:31, 32 ɔ, a tsɔɔ kaa a “bua je ma amɛ tsuo a nya” ngɛ Yesu matsɛ sɛ nɛ hɛ mi ngɛ nyami ɔ hɛ mi. Yayami peeli hu piɛɛ je ma amɛ nɛ a bua a nya a he. E ngɛ heii kaa pi hiɔwe nɛ je ma nɛ ɔmɛ ngɛ, mohu ɔ, a ngɛ zugba a nɔ. Ngɛ anɔkuale mi ɔ, sisi numi ngɛ bɔ nɛ wa ba nu munyu nɛ ɔ sisi ha amlɔ nɛ ɔ he. E tsɔɔ nɔ́ he je nɛ Baiblo ɔ de we ke a maa ngɔ asafo kuu ngua a kɛ ya hiɔwe ɔ. Kuu kake pɛ nɛ a wo mɛ si kaa a maa piɛɛ Yesu he ngɛ hiɔwe kɛ “ye zugba a nɔ kaa matsɛmɛ,” nɛ mɛ ji nimli 144,000 ɔ nɛ.​—Kpoj. 5:10.

10. Mɛni he je nɛ e he hia nɛ a tsɔɔ asafo kuu ngua a Yehowa he ní loko Jeha Akpe Nɔ Yemi ɔ nɛ je sisi ɔ?

¹⁰ Kɛ je jeha 1935 ɔ mi ɔ, Yehowa Odasefohi ba nu sisi kaa asafo kuu ngua a nɛ Yohane na ngɛ nina a mi ɔ ji Kristofohi anɔkualetsɛmɛ nɛ a ngɛ hɛ kɛ nɔ fɔmi kaa a maa hi si ngɛ zugba a nɔ kɛ ya neneene. Loko Jeha Akpe Nɔ Yemi ɔ maa je sisi ɔ, e sa nɛ a tsɔɔ asafo kuu ngua a Yehowa he ní konɛ a yi nɛ ná wami ngɛ amanehlu ngua a mi. E sa nɛ a ná hemi kɛ yemi nɛ mi wa konɛ a nyɛ nɛ a “je ní nɛ ɔmɛ tsuo nɛ maa ba a mi” loko Kristo Jeha Akpe Nɔ Yemi ɔ nɛ je sisi.​—Luka 21:34-36.

11. Mɛni he je nɛ Baiblo Kaseli ɔmɛ ekomɛ susu kaa eko ɔ, a ma tle ni komɛ si kɛ ya hiɔwe ngɛ Jeha Akpe Nɔ Yemi ɔ se?

¹¹ Nɛ susumi nɛ nihi hɛɛ kaa a maa ngɔ ni komɛ nɛ a pee nɔ hyɛmi nɔ kpakpa a kɛ ho hiɔwe ya ngɛ Jeha Akpe Nɔ Yemi ɔ se ɔ hu nɛɛ? A tu nɔ́ nɛ ɔ he munyu ngɛ February 15, 1913 Blɛfo gbi Hwɔɔmi Mɔ ɔ mi. Eko ɔ, nɔ ko ma bi ke, ‘Mɛni he je nɛ e sa nɛ nyumuhi anɔkualetsɛmɛ nɛ a hi si blema a nɛ a hi zugba a  nɔ, be mi nɛ Kristofohi nɛ a we anɔkuale yemi sui blematsɛmɛ ɔmɛ a nɔ́ ɔ mohu maa ya hiɔwe?’ A ná juɛmi nɛ ɔ, ejakaa a ya susu kaa (1) asafo kuu ngua a ma ya hi hiɔwe, (2) asafo kuu ngua a ji Kristofohi nɛ a be kã tsɔ.

12-13. Mɛni nɛ nihi nɛ a pɔ mɛ nu ɔ kɛ asafo kuu ngua a tsuo le ngɛ jɔɔmi nɛ a ma ná a he?

¹² Kaa bɔ nɛ wa na a, kɛ je jeha 1935 ɔ mi nɛ Yehowa Odasefohi ba nu sisi kaa nihi nɛ a ma he a yi wami ngɛ Hamagedɔn mi ɔ ji asafo kuu ngua a nɛ Yohane na ngɛ e nina a mi ɔ nɛ. A maa “je amanehlu ngua a mi” ngɛ zugba nɛ ɔ nɔ, nɛ a kɛ ‘gbi nɛ nya wa maa hi ngmlaa kpae ke: “Wa yi wami hemi ɔ ngɛ wa Mawu ɔ, nɔ nɛ e hii si ngɛ matsɛ sɛ ɔ nɔ ɔ, kɛ e Jijɔ Bi ɔ a dɛ mi.”’ (Kpoj. 7:10, 14) Jehanɛ hu ɔ, Ngmami ɔ tsɔɔ kaa nihi nɛ a ma tle mɛ si kɛ ya hiɔwe ɔ a nine maa su “nɔ́ kpakpa ko” nɔ pe nyumuhi anɔkualetsɛmɛ nɛ a hi si blema a. (Heb. 11:40) Ngɛ sisi numi nɛ ɔ nya a, wa nyɛmimɛ ɔmɛ kɛ bua jɔmi bɔni nihi nine fɔmi nɛ a ba sɔmɔ Yehowa konɛ a ná neneene wami ngɛ zugba a nɔ hwɔɔ se.

¹³ Asafo kuu ngua a bua jɔ hɛ kɛ nɔ fɔmi nɛ a ngɛ ɔ he. A kplɛɛ nɔ kaa Yehowa ji nɔ nɛ maa tsɔɔ he nɛ e sɔmɔli anɔkualetsɛmɛ maa hi, hiɔwe jio, zugba a nɔ jio. Nihi nɛ a pɔ mɛ nu kɛ asafo kuu ngua a tsuo le kaa Yehowa dloomi ɔ nɛ e je kpo kɛ tsɔɔ mɛ kɛ gu Yesu Kristo kpɔmi afɔle sami ɔ nɔ ɔ he je nɛ a ná jɔɔmi nɛ ɔ.​—Rom. 3:24.

14. Ngɛ jeha 1935 ɔ se ɔ, mɛni he je nɛ nihi fuu susu bɔ nɛ gbami nɛ kɔɔ asafo kuu ngua a he ɔ ma plɛ kɛ ba mi ha a he ɔ?

¹⁴ Benɛ Yehowa we bi ba nu níhi a sisi ngɛ jeha 1935 ɔ se po ɔ, a kpɛti nihi fuu biɔ a he ke, ‘Kɛ e maa pee kɛɛ nɛ nihi nɛ a ngɛ hɛ nɔ kami kaa a maa hi zugba a nɔ ɔ ma ba pee asafo kuu ngua?’ Kaa nɔ hyɛmi nɔ́ ɔ, benɛ wa ba le nihi nɛ asafo kuu ngua a ji ɔ, jamɛ a be ɔ mi ɔ, Ronald Parkin ye jeha 12. E de ke: “Jamɛ a be ɔ, Odasefohi nɛ a ngɛ je ɔ mi tsuo a yibɔ ji 56,000, nɛ eko ɔ, a kpɛti nihi hiɛhiɛɛ ji nihi nɛ a pɔ mɛ nu. Enɛ ɔ he ɔ, e pee kaa nɔ́ nɛ asafo kuu ngua a he pi jã.”

15. Mɛni ha nɛ a nyɛ nɛ a ngɛ asafo kuu ngua a nya buae ɔ?

¹⁵ Se kɛ je jeha 1935 ɔ se kɛ ma a, a tsɔ ma se sane kpakpa fiɛɛli kɛ ya mahi fuu a nɔ, nɛ enɛ ɔ ha nɛ Yehowa Odasefohi a yibɔ bɔni hɛ mi yami. Ngɛ jeha 1968 ɔ mi ɔ, a ngɔ womi nɛ ji The Truth That Leads to Eternal Life ɔ kɛ bɔni Baiblo mi ní kasemi peemi. Bɔ nɛ a tsɔɔ Baiblo ɔ mi anɔkuale ɔ sisi ngɛ womi nɛ ɔ mi ɔ sisi numi yi, nɛ lɔ ɔ gbla nihi fuu kɛ ba  Yehowa ngɔ pe sa a. Ngɛ jeha eywiɛ pɛ mi ɔ, nihi nɛ a he hiɛ pe ayɔ fã ba pee kaseli nɛ a baptisi mɛ. Benɛ Katoliki jami ɔ he wami ɔ bɔni si bami ngɛ Latin America kɛ ma kpahi a nɔ, nɛ́ a je nya tsimi nɛ a kɛ fɔ wa ní tsumi ɔ nɔ ngɛ Eastern Europe kɛ Afrika ma komɛ a nɔ ɔ, nimli ayɔhi babauu ha nɛ a baptisi mɛ. (Yes. 60:22) Ngɛ jehahi bɔɔ nɛ be nɛ ɔmɛ a mi ɔ, Yehowa asafo ɔ pee Baiblo kasemi ní kpahi nɛ́ a kɛ tsɔɔ nihi Baiblo ɔ mi anɔkuale ɔ. E ngɛ heii kaa lɔ ɔ ye bua nɛ a nyɛ nɛ a bua asafo kuu ngua nɛ amlɔ nɛ ɔ, a yibɔ ji ayɔ kpaanyɔ kɛ se ɔ a nya.

16. Jije nɛ a ngɛ asafo kuu ngua a nya buae kɛ ngɛ jee?

¹⁶ Benɛ Yohane ngɛ nina nɛ e na a ngmae ɔ, e tsɔɔ kaa asafo kuu ngua a maa pee nihi nɛ a je “je mahi tsuo kɛ wɛtsohi kɛ nihi kɛ lilɛhi a mi.” Gbalɔ Zakaria sɛ hlami nɛ e gba nɔ́ ko kaa jã. E de ke: “Jamɛ a be ɔ, nibwɔhi maa je ma slɔɔtohi a mi kɛ ba Yuda; ni nyɔngma ma ba nu Yuda no kake nɛ a maa pɛtɛ e tade he, nɛ a ma de lɛ ke, ‘Waa kɛ mo maa ya, ejakaa wa nu kaa Mawu kɛ nyɛ ngɛ.’”​—Zak. 8:23.

17. Mɛni a ngɛ pee kɛ ngɛ nihi tsuo nɛ a je je mahi kɛ lilɛhi a mi ɔ ye buae?

 ¹⁷ Yehowa Odasefohi yɔse kaa loko a ma nyɛ ma bua nimli nɛ a tuɔ gbi slɔɔtohi tsuo a nya a, jã a fiɛɛ sane kpakpa a ngɛ gbihi fuu a mi. Jeha 130 kɛ se ji nɛ ɔ nɛ wa ngɛ Baiblo kasemi níhi a sisi tsɔɔe. Se amlɔ nɛ ɔ, wa tsɔɔ Baiblo kasemi níhi fuu a sisi kɛ yaa gbi lafahi abɔ mi. Enɛ ɔ eko bɛ hyɛ. E ngɛ heii kaa mwɔnɛ ɔ hu ɔ, Yehowa ngɛ nyakpɛ ní pee​—e ngɛ asafo kuu ngua ko nya buae kɛ je je ma amɛ tsuo a mi. E ngɛ mi kaa asafo kuu ngua a je je ɔ he slɔɔtoslɔɔtohi mohu lɛɛ, se akɛnɛ a pee Baiblo ɔ kɛ Baiblo kasemi womihi ngɛ gbihi fuu a mi he je ɔ, kuu nɛ ɔ pee kake kɛ ngɛ Yehowa jae. A le Odasefo ɔmɛ kaa a kɛ kã fiɛɛɔ sane kpakpa a, nɛ a ngɛ suɔmi kɛ ha a sibi. Hyɛ bɔ nɛ enɛ ɔ woɔ nɔ hemi kɛ yemi mi he wami ha!​—Mat. 24:14; Yoh. 13:35.

18. (a) Ngɛ Yesaya 46:10, 11 ɔ nya a, mɛni he je nɛ e sɛ nɛ e pee wɔ nyakpɛ kaa Yehowa ha nɛ gbami nɛ kɔɔ asafo kuu ngua a he ɔ ba mi? (b) Mɛni he je nɛ nihi nɛ a ngɛ hɛ kɛ nɔ fɔmi kaa a maa hi si ngɛ zugba a nɔ ɔ nui he kaa nɔ́ ko bɔ mɛ ɔ?

¹⁸ Atsinyɛ jemi ko be he kaa e sa nɛ wa bua nɛ jɔ gbami nɛ kɔɔ asafo kuu ngua a he ɔ he! E be nyakpɛ kaa Yehowa ha nɛ gbami nɛ ɔ ba mi ngɛ nyakpɛ blɔ nɔ. (Kane Yesaya 46:10, 11.) Asafo kuu ngua a bua jɔ hɛ kɛ nɔ fɔmi nɛ Yehowa ha mɛ ɔ he. A susuu we kaa nɔ́ ko bɔ mɛ akɛnɛ a kɛ Mawu mumi ɔ pɔɛ mɛ nu kaa a piɛɛ Yesu he kɛ ye nɔ ngɛ hiɔwe ɔ he je. Ke wa kane Baiblo ɔ, wa naa nyumuhi kɛ yihi anɔkualetsɛmɛ nɛ Mawu mumi ɔ gu a nɔ kɛ tsu níhi fuu, se a piɛɛ we nimli 144,000 ɔ a he. A kpɛti nɔ kake ji Yohane Nɔ Baptisilɔ ɔ. (Mat. 11:11) Nɔ kake hu ji David. (Níts. 2:34) A ma tle a kɛ ni kpa komɛ hu nɛ wa li a yibɔ ɔ si kɛ ba wami mi ngɛ Paradeiso ngɛ zugba a nɔ. Nimli nɛ ɔmɛ kɛ asafo kuu ngua a tsuo ma ná he blɔ nɛ a kɛ tsɔɔ kaa a fĩ Yehowa kɛ e nɔ yemi ɔ se.

19. Ngɛ mɛni blɔ nɔ nɛ Yohane nina nɛ kɔɔ asafo kuu ngua a he ɔ mi bami ɔ ha nɛ wa na kaa e be kɛe nɛ amanehlu ngua a maa ba?

¹⁹ Yehowa bua nimli ayɔhi abɔ nɛ a je ma slɔɔtohi a mi ɔ nya nɛ e pee mɛ kake. Nɔ́ ko kaa jã bɛ hyɛ ngɛ adesahi a yi nɔ sane mi. Ke wa hɛ kɛ nɔ fɔmi ji kaa wa maa ya hiɔwe jio, wa maa hi zugba a nɔ jio, e sa nɛ waa ye bua nihi babauu nɛ a ba piɛɛ asafo kuu ngua nɛ ji ‘jijɔ kpa amɛ’ ɔ a he. (Yoh. 10:16) E be kɛe nɛ Yehowa maa ngɔ amanehlu ngua nɛ a gba kaa e maa ba a kɛ kpata nɔ yemihi kɛ jamihi a hɛ mi, ejakaa a ha nɛ adesahi ngɛ nɔ́ nae. E ji he blɔ ngua nɛ asafo kuu ngua a ná kaa a ma sɔmɔ Yehowa ngɛ zugba a nɔ kɛ ya neneene!​—Kpoj. 7:14.